الحكم على عدد من معتقلي سجن صيدنايا

[رجل من ورق]

النداء /خاص :
ذكرت مصادر عديدة من أهالي مجموعة من المعتقلين في سجن صيدنايا، أن فرع الأمن الجوي قد اتصل بهم هاتفيا، وأخبرهم عن انعقاد جلسات ثلاثة متتالية في محكمة أمن الدولة العليا لمحاكمة أبنائهم منذ حوالي الأسبوع ، وأن حكما بالسجن لثلاث سنوات صدر بحق كل منهم.
يذكر أن هذه المجموعة بلغ عدد أفرادها 17 شابا من مدينة حمص، وكانوا قد أوقفوا بتاريخ 11/11 2006 من قبل فرع الأمن الجوي، على خلفية اتهامهم بالانتماء لحزب التحرير الإسلامي، عرف منهم: أحمد الجنيات، وجهاد الكيال، ومحمد الخراز، وشاب من عائلة الشوا.
وهذا يعني إمكانية الإفراج عنهم بعد حوالي الشهر، فيما إذا منحوا حق إعفائهم من ربع المدة وفق نصوص القانون السوري .
ويلاحظ أن خبر الحكم المذكور يتعلق بمعتقلين سياسيين من سجن صيدنايا، الذي انقطعت أخباره، وحرم الأهالي من زيارة أبنائهم المعتقلين فيه ، منذ الأحداث الدامية والغامضة التي وقعت فيه قبل أكثر من ستة أشهر، عندما تناقلت الوكالات أخبار اضطرابات وصدامات وقعت فيه، وأدت إلى وقوع قتلى وجرحى من بين صفوف المعتقلين والحراس .
كما يلاحظ من جهة أخرى، أن هذه المحاكمات جرت بصمت وبدون أي اهتمام إعلامي أو حقوقي في ظل انشغال العالم بمذبحة غزة، ومن المعتاد لدى السلطات الأمنية وظلها القضائي في محكمة أمن الدولة أن تنعدم لديها جميع شروط المحاكمة العادلة ، وأولها العلنية وتوفير محامي الدفاع.

[marioma alghzayala]

بدنا عفو بدنا عفو يا الله ....

[ابو نجبو]

انشالله الفرج قريب
الحرية لاسرى الفكر و الضمير..

[مسطول على طول]

وايمتا دورنا ؟

يلي بتسترو السياسة الخارجية ، الجهات الامنية بتفضحو ، ليش هل النظام بوجهين ؟

على فكرة الاحكام كتير مخففه نسبتاً للفكر لي بيحملو الشباب

[satoman]

كاتب النص الأصلي : مسطول على طول

وايمتا دورنا ؟

لك شو عامل انت؟

[MadMax]

كاتب النص الأصلي : رجل من ورق

النداء /خاص :
ذكرت مصادر عديدة من أهالي مجموعة من المعتقلين في سجن صيدنايا،.

أنو ...
انحلت مشكلة سجن صيدنايا .. ولا لسا ..؟؟

[ayhamm26]

كاتب النص الأصلي : رجل من ورق

النداء /خاص :
ذكرت مصادر عديدة من أهالي مجموعة من المعتقلين في سجن صيدنايا، أن فرع الأمن الجوي قد اتصل بهم هاتفيا، وأخبرهم عن انعقاد جلسات ثلاثة متتالية في محكمة أمن الدولة العليا لمحاكمة أبنائهم منذ حوالي الأسبوع ، وأن حكما بالسجن لثلاث سنوات صدر بحق كل منهم.

حلو , الشباب صاير عندن مشاعر ومتصلين باهالي المعتقلين ليطمنون على ولادن .

انو المخابرات عنا ليش بيستمتعوا بلعب دور عصابات المافيا؟؟

يعني بيقتحموا البيوت, ناس لابسين مدني ومسلحين , مابتعرف هدول فعلا تابعين للدولة ولا هني ناس منتحلين صفة امنية ولا شو هني بالضبط, ما بيظهروا اي شي يثبت هويتن, اكيد ما معن امر قضائي لانو هني فوق القضاء ببلد اصلا ما في قضاء

اهل المعتقل بيلفوا كل مقرات العصابة ,بين قوسين فروع الامن, وكلن بيحلفوا انو ما منعرف هالزلمة ولا شفنا
وبعد شي كم سنة نقاهة بيقضيها المعتقل في سجون دولتو الحنونة قال شو بيتصلوا بخبروا اهلو بالتلفون انو لا تخافوا علي, عملنالو محكمة اضرب واطرح ومشان الاتحاد الاوربي اللي صار شريكنا هلق ما يحكي علينا ويقول في سوريا الاسد ما في ديمقراطية, عملنالو لابنكن الضال تلت جلسات وحكمنا حكم يعد ولا شي مقارنة بغيرو اللي راح وما رجع واندفن بمقابر جماعية, او بغيرو اللي قضى 15 سنة على فرد جنب بتدمر , او بغيرو اللي ما تحمل كرم ضيافتنا ورجعنا لاهلو ليدفنوا.
فمشان هيك لازم تحمدو ربكن وتدعوا للسيد الرئيس بطول العمر على كرمو.

[ayhamm26]

كاتب النص الأصلي : مسطول على طول

وايمتا دورنا ؟

على فكرة الاحكام كتير مخففه نسبتاً للفكر لي بيحملو الشباب

هي مو اول مرة بيحاكموا اعضاء بحزب التحرير

باواخر التسعينات حاكموا اعداد كبيرة من طلبة الجامعات وغيرن ومن المجندين بالجيش بتهمة انشاء تنظيم حزب التحرير, وعلى ما يبدو انو الفكر اللي بيتبنوا غير قائم على العنف , بعكس الاخوان المسلمين, يعني ما قتلوا حدا, مالقوا معن سلاح , ولا خطط من هالنوع وهدا ا للي خلاهون يصنفوهن على انن اقل خطرا من الاخوان وبالتالي تسليم ملفن لفرع الامن الجوي, بينما من المعروف انو ملف الحركات الاسلامية اللي بتشكل خطر على النظام , الاخوان سابقا والحركات السلفية الجديدة لاحقا , مسؤول عنو فرع الامن العسكري.

[مسطول على طول]

كاتب النص الأصلي : satoman

لك شو عامل انت؟

منتمي لحزب الفنكيش الحمر مخطط بالأبيض والو سحاب وشكلة من تنك ، بقا مابعرف أذا هيك فكر حرام ولا حلال حسب المفهوم الامني الاعوج

كاتب النص الأصلي : ayhamm26

هي مو اول مرة بيحاكموا اعضاء بحزب التحرير

باواخر التسعينات حاكموا اعداد كبيرة من طلبة الجامعات وغيرن ومن المجندين بالجيش بتهمة انشاء تنظيم حزب التحرير, وعلى ما يبدو انو الفكر اللي بيتبنوا غير قائم على العنف , بعكس الاخوان المسلمين, يعني ما قتلوا حدا, مالقوا معن سلاح , ولا خطط من هالنوع وهدا ا للي خلاهون يصنفوهن على انن اقل خطرا من الاخوان وبالتالي تسليم ملفن لفرع الامن الجوي, بينما من المعروف انو ملف الحركات الاسلامية اللي بتشكل خطر على النظام , الاخوان سابقا والحركات السلفية الجديدة لاحقا , مسؤول عنو فرع الامن العسكري.

بشرفي هدول نهفة لك حتى الاسرائيليين عاطينهم حرية موطبيعية من كتر افكارهم الخنفوشارية ، ال شو مابدهم من بني ادم شي بس انو تأيد اعادة الاخلافة الاسلامية والدعوة لاعادتها واسقاط الحكام عبر الضغط الشعبي واقامة الخلافة ومن هل القصص ، عودتاً لاسرائيل عندون مابصير تحارب او تجاهد ولو بفلسطين الا بعد اقامة الخلافة لك رصاصة ماضربو على يهودي ، وصرلون شي 50 سنة على هل الحالة ، صدقني انون مفيدين للدولة لاتسألني كيف

[BL@CK]

تحية للزوق العالي و تحية للإتصال بالأهالي و بهالخصوص تحية لسارية السواس .

من المنبر يا خيو .

[سيجارة]

الحرية لأسرى الرأي الحر
لأسرى النضال من أجل تقدم هذا الوطن
والموت لأسرى الحركات الأصولية الإسلامية

[ayhamm26]

كاتب النص الأصلي : سيجارة

والموت لأسرى الحركات الأصولية الإسلامية

اي والله ما قصرت يا معلم

عم حاول قلبها هيك ودور على تفسير ,انو شلون واحد بيتمنى الموت لشخص بس لانو بيحمل فكر مختلف عنو ومو بس هيك , بيتمنى الموت لواحد ملتعن نفسو ومعتقل.

على كل مشكور على مشاعرك.

[سيجارة]

كاتب النص الأصلي : ayhamm26

اي والله ما قصرت يا معلم

,انو شلون واحد بيتمنى الموت لشخص بس لانو بيحمل فكر مختلف عنو ومو بس هيك , بيتمنى الموت لواحد ملتعن نفسو ومعتقل.

.

حبيب نحنا مع الفكر للعضم
بس مو مع الشذوذ الفكري
يا ترى بيخطر عبالك أهالي الضحايا يلي ماتو بتفجيرات القزاز في دمشق هدول ما التعن ابون ما ؟

عوجاااااااااااااا

[ayhamm26]

كاتب النص الأصلي : سيجارة

حبيب نحنا مع الفكر للعضم
بس مو مع الشذوذ الفكري
يا ترى بيخطر عبالك أهالي الضحايا يلي ماتو بتفجيرات القزاز في دمشق هدول ما التعن ابون ما ؟

عوجاااااااااااااا

هيك قلتلي لكن, ليش انت بتعرف مين اللي نفذ تفجير القزاز؟ وبتعرف شو الفرق بينن وبين معتقلي حزب التحرير الاسلامي؟ وبتعرف اصلا انت شو هو حزب التحرير الاسلامي وشو تاريخو وشو افكارو, وشو الفرق بينو وبين الاخوان او السلفيين او القاعدة؟؟ ولا انت عندك كلو شوربة وخلص اي واحد الو دقن منحطو بطنجرة وحدة وبصير بدنا نموتو متل ما اتفضلت حضرتك

لسا فوق عم نحكي انا والاخ مسطول انن اخدين احكام مخففة لانن جماعة مسالمين

بنصحك قبل ما تعلق على شي تقرأ وتعرف عن شو عم تحكي بدل ما تطلق هيك احكام متطرفة وتصير متلك متل المتطرفين اللي بتكرهن.

[مسطول على طول]

كاتب النص الأصلي : سيجارة

الحرية لأسرى الرأي الحر
لأسرى النضال من أجل تقدم هذا الوطن
والموت لأسرى الحركات الأصولية الإسلامية

هلء الموت بيشمل حزب الله وحركة حماس شنو هدول اصوليين وللعضم ... حتى ايران شو تصنف دولة دينية ولا علمانية ؟

والاحلى انه حماس اخوان مسلمين .

[اممي]

الحرية لكل معتقلين الفكر من كل الاحزاب والتوجهات (باشتراط وطنيتها وايمانها بحق هذا الشعب في الحياة) وكل الشرفاء الذين تحضنهم سجون هذا الوطن مع تمني زيادة عدد المعتقلين من الحرامية والمنتفعين وتجار الضمائر واستمرار عمليات اجتثاث كل الحركات المتامرة والمتعاونة مع اي جهه خارجية علي حساب هذا الوطن