ماذا يكتب سائقي السرفيس والتاكسي

[ghazwan72]

ما يكتب على السرفيس و التكسي :




* لا تشوفني عم اتدرج ... دوبلني واتفرج !!!
* ميلي على ميالك ابو عبدو خيالك
* عشقت السفر من ظلم البشر
* بحبك جكر بالناس
* لا تلحقني مخطوبة
* لولا المصالح ما حدا صالح
* ما طار طير وارتفع إلا كما طار وقع
* مكتوب على المرايا مخصص للصبايا
* بس للحلوين
* لاتسرع يا بابا نحن بانتظارك
* دلوعة أبو حبيب
* يا رضا الله ورضا الوالدين
* يصطفلوا !!
* عين الحسود فيها عود
* سارحة والرب راعيها
* يا ناظري نظرة حسد شكيتك لواحد أحد
* انا السوزوكي بغني و اسألوا الكيا عني
* ذكرى دمعه على صلعة
* مر و عدي و بلا تحدي
* الرصاصة التي لفت الكوع
* عاشق النبي يصلي عليه
* ياجبل مايهزك ريح
* يلي يهوانا يصبر على بلوانا
* لا تجحش محسوبك أجحش ..



أما الأثار الموجودة جوا :




* عنقيد عنب بلاستيك
* مسبحة زرئة أو حمرة
* قلب بيطفي و بيشعل مكتوب عليه I love you
* قطعة فخار (مكسورة) مكتوب عليها الله & محمد
* علبة محارم من الصدف أو الخرز الأزرق
* فوتيس محطوط عليه جراس صغيرة كل ما يغير برنو
* كاسة فاضية مدبئة علقان فيها الشاي بدو أسيد حتى يروح
* فردة بوط و لد صغير - مشان العين



أما و الشيئ الأكثر أهمية فهو :




* كلب صغير (كان) كان لونو أبيض هلأ صار يا رمادي يا أسود (من النضافة) بهز راسو بطريئة أستفزازية





والزلمة ما بحب يحس حالو بغربة :




* صورتو أدام السيارة بأخر شخاص
* صورة بنتو الصغيرة
* صورة مع الأصدقاء أو العائلة بين الحشيشات و الخضار مكتوب تحتها ذكرة يوم الجمعة على بسيمة أنا و العائلة الكريمة ...

[alter]

كل هال الكلام خرف الله وكيلك.على كلن يسلموا الايدين

[HashtNasht]

نظامي 100 %

[zerocold hacker]

انو ياسيدي لا تقلي حضارة والله حضارة

[روعة1]

انو فعلا.. مستحيل ما تشوف سرفيس او تكسي ما عامل شغلة من الشغلات المكتوبة فوق..
(بس السرافيس اكتر بكتير من التكاسي.. )
شي بتلاقي الواحد حاطط مسبحة .. شي بتلاقي حاطط قلب احمر متل مو مكتوب.. خيلة خيلة..
و اهم شي ما لازم ننسى .. هو تبع الغيار اللي بكونوا حاطينو .. مميز بكون.. دايما بكون شفاف (يعني بينشاف شوفي جواتو) و فيو ورد ..

* كلب صغير (كان) كان لونو أبيض هلأ صار يا رمادي يا أسود (من النضافة) بهز راسو بطريئة أستفزازية

زكرتني بدعاية ميلودي.. وقت اللي بكون في تاكسي و بيطلع معو اللي دايما بكون لابس اصفر و بيشبه
سوبر مان.. و اللي ع اساس بيتحدى الملل.. بكون في هدا الكلب حاطو صاحب التاكسي بقوم
السوبر مان شيت الميلودي بيرمي برا الشباك من قهرو منو..

[جـدل]

ههههههههههههههههههههههههه ههههه
بعد هل الموضوع صرت انتبه على كل تكسي شو كاتب
لحتى شوف ازا في شي غير هل الكلام انكتب او انقال
ههههههههههه

[bki]

والله شي فخم. وع راسي حارتك. بس مرة شفت تكسي مصرية حاط من ورة مكن النمرة عبارة النمرة مشغولة

[ghazwan72]

شكرا على مروركم

[هشام ابو شرار]

نحنا الشوفيرية نحنا
دواليب المدينة
لو شي يوم اتوقفنا
بنحبسكن في قنينة

[leonardo_dicabreo]

هههههه حلوه بس في وحده بتحزن , بشوفها عالتكاسي مرات :
عاملت الدنيا كأمي فعاملتني كمرأة أبي....

[سوا ربينا]

كاتب النص الأصلي : روعة1

زكرتني بدعاية ميلودي.. وقت اللي بكون في تاكسي و بيطلع معو اللي دايما بكون لابس اصفر و بيشبه
سوبر مان.. و اللي ع اساس بيتحدى الملل.. بكون في هدا الكلب حاطو صاحب التاكسي بقوم
السوبر مان شيت الميلودي بيرمي برا الشباك من قهرو منو..

وانا اول ما قرأت تبعت الكلب اللي جوا اتزكرت نفس الدعاية ...

بس حلوين وما بيخلصو هدول الجمل اللي بينكتبو ع التكاشي والباصات والشاحنات ...

[بنفسجة]

ههههههههههههههههههههههههه هههههه
عم تحكي نظامي

[رائد النجار]

ههههههههههههههههههههههههه
كلامك صحيح

[nasim adres]

راح ضفلك حسب ماني شايف
راحلوا الغوالي يا دنيا
معزور ولو تكبرت
عاشر اصيلا اذا جار الزمان يجود
(بس شي مرة فكرت تقرا الكلمات المكتوبة ع الموتورات)

[بروليتاري]

كاتب النص الأصلي : ghazwan72

* صورتو أدام السيارة بأخر شخاص
* صورة بنتو الصغيرة
* صورة مع الأصدقاء أو العائلة بين الحشيشات و الخضار مكتوب تحتها ذكرة يوم الجمعة على بسيمة أنا و العائلة الكريمة ...

يا سيدي كأني شايفون

[satoman]

كاتب النص الأصلي : nasim adres

راح ضفلك حسب ماني شايف
راحلوا الغوالي يا دنيا
معزور ولو تكبرت
عاشر اصيلا اذا جار الزمان يجود
(بس شي مرة فكرت تقرا الكلمات المكتوبة ع الموتورات)

حلوه هي

[nasim adres]

كاتب النص الأصلي : satoman

حلوه هي

اكيد مافي شك?

[سوا ربينا]

من شي فترة قرأت على باص هونداي ( انا الهونداي اغني .. اسأل الكيا عني ..)