.. Nokia 6500 ... القصة الخرافية ..

[أبو شريك]

بعرف انكم مفكريين ان الموضوع شرح وحكي عن نوكيا 6500 .. طبيعي تفكروا هيك
ولكن الموضوع ابعد ما يكون عن ذلك

بندخل بالموضوع ...

هي يا سادة يا كرام ، صارت معي قصة خرافية اخرف ( أي أشد خرفنة وخرافية) من قصة أليس في بلاد العجائب ، وبنهاية القصة لقيت بايدي NOKIA6500 !

اللي صار انو :

رفيقي بالجامعة ، وزميلي بالشغل بنفس الوقت ، واللي هوه يتيم الاب ، داقت فيه الدنيا وتعسر ماديا ، فباع موبايلو ليسدد الرسوم الجامعية ، واستعار موبايل والدتو لبين ما تفرج ،..
فلما انا دريت بهالشي :

انتخيت



واتشاهمت




واستكرمت




ودبت فيني الدماء العربيه



ودقيت على صدري وقلتلو : عنننندي ،، بس ينزل راتبي بجبلك واحد جديد





وبعد اسبوع او اسبوعين ، نزل الراتب

راتبي 73 دينار ، 60 عطيتن لابي وامي لانو اول راتب وبتعرفو انتو ، ضل 15 جبت ب 5 حلويات مشان نتحلى بهالمناسبه ، و 3 صرفتن عالملذات الشخصية ، ف ضل 5 د.ك فقط لا غير ،،،!

ضل 5 بعد بأول يوم


ف طبعا مو حلوه مشان صاحبي ، انا دقيت على صدري


ف قلت لحالي بعطيه موبايلي ، وبروح بجيب موبايل مستعل ب دينار او دينارين لإلي ، وبصرف ع حالي ب 3 دنانير من هون لأخر الشهر >> الله عالتخطيط العجيب

رحت دورت على موبايل ، ارخص شي لقيتو مستعمل ب 5 دنانير

هالابو ال 5 نوعو نوكيا الفين ومدري كم ... المهم اشتريتو

ورحت لعند صاحبي خيرتو بينن السامسونج تبعي :

وبين هالأخ :

صاحبي حربوء اختار السامسونج وقلي : خلي النوكيا إلك ، النوكيا اقوى <<<<<

ف خليت هالنوكيا معي وقلتو مبروك ، ورضيت بقضاء الله

وبعد يومين
او بلا بعد يومين

هالموبايل بالاول طلع المايك تبعو خربان ، فلما حدا يتصل علي انا بسمعو وهو ما بيسمع شي ، وصارت مشكله بسبب هالشغله

المهم بعد يومين
رفيقي بالكلية ( اسمو احمد ) دق علي وقلي انو كليتنا عاملة مسابقة ثقافيه

ولانو نسبة الثقافة بدمي مرتفعة كتير ، اشتركت انا وهوه و واحد تالت ( عبدالله ) وعملنا فريق واحد نحن اعضاءو

وبعدين اللجنة المنظمة طلبت من رفيقي أحمد اللي كان عم يحكي باسم الفريق ، طلبت نختار اسم لفريقنا ، فاتصل علي وقلي هيك ليآخد رأيي ..
ف قلتلو على الفور و بدون تردد : سميه فرريق الـنــصــر :d ................. وتم الأمر

كان في 32 فريق بالمسابقة ..... يعني متل أمم أوربا

.. قبل بدء البطولة ..

في يوم المسابقة ، وحتى ونحن عم نشوف الفرق اللي عم تلعب وناطرين دورنا بالقرعة ، كنا شبه متأكدين انو رح نتقلع تقليعه ال...... ، بس اخدنا الموضوع بايجابيه : يكفي شرف المنافسه والتواجد
يتبع ...

[أبو شريك]

.. الدور الأول ..

بعد 10 مباريات ، طلع اسم فريقنا بالسحب ، فتوجهنا للملعب :d ، والفريق الخصم كان ناقص منو لاعب اعتزر باللحظات الاخيره .... المهم بأول سؤال ، ويا دوب اللجنة سألت السؤال الاول وقالتلنا الاختيارات ، واذ احمد بيضرب صارووخ ارض جو وبقول الجواب بسرعه اندهشت الجماهيرر .... وتعالت الهتافات والتهليلات
وانتهت المباراة بفوز فريق النصر الذي حاز على اعجاب الجماهير بسبب أداءه الجميل
وكان الفرحه لا توصل ... حمدنا الله على هالتوفيق لانه كان توفيق من الله

.. دور ال 16 ..

بعد ساعات بدأ دور ال 16 ، وإذ بينسحب أحد الفرق ، فصار العدد 15 فريق ، لذا قررت اللجنة المنظمة أن تعمل سحب والفريق اللي بيطلع بالسحب بيتأهل بدون مباراة ..
فبدأت القلوب تخفق مع سحب احدى الاوراق من الصندوق ..... وفتحو الورقه ..... و بالصوت العالي :

المتأهل بدون مباراة : فريق النصر

وااااااو

وهيك تأهلنا بدون مباراة ، ورجعنا لبيوتنا لاستكمال التصفيات باليوم التالي .... والمعنويات كانت عاليه ومرتفعه كبير ، و زاد عدد المشجعين والكل صار بدو يهني ويبارك .... حسيت حالي زيدان إلا شوي

اليوم التالي :

.. دور ال 8 ..

الآن يفصل بيننا وبين التتويج مباراة وحدة ، لانو اللي بفوت بدور ال 4 رح يربح أكيد ، وعلى فكره ، بعد يوم أمس الحافل ، اتغيرت احلام افراد فريق النصر ، وكل واحد صار يفكر بالجائزة الكبرى ( ال 300دك ) ، مو بس هيك ، كمان فكرنا كيف رح نصرفها ، انا شخصيا صرفت منها 220 وضل معي 80 منها !!
بدأت المباراة ، وانتهت ال 5 اسئلة الاولى بالتعادل
فمددولنا وقت اضافي 3 اسئلة ، كمان تعاادل
فـ رحنا لضربات الترجيح ....، قصدي رحنا للقرعة مره اخرى !!
حطو بالصندوق ورقتين ، وحده فريقنا و وحده الفرق الخصم ، وبدأت القلوب تخفق مرة اخرى

سحبو ورقه منهم ... الفريق الفائز هو :

فريق النـصـــر

هيييييييه

.. دور ال 4 ..

دخلنا دور ال 4 بمعنويات واحلام كبيييييره ,..

العبنا مع فريق تعرفنا عليه من اول ما فتنا عالقاعة ، وكنا متأملين نشوفو بالنهائي لانو فريق محترم ولعبو نضيف
بس للاسف لعبنا معو اول مباراة ، وفاز علينا فوز مستحق ، فـ لعبنا عالمركز التالت مع الفريق الخاسر ، وكمان اخسرنا ..... ف فزنا بالمركز الرابع
و أتت لحظات التتويج بعد المباراة النهائية على طول ( مو متل بعض الناس )

فطلعنا عالمنصة مع تصفيق الجمهور ... واستلمنا الهدايا :

من اليمين : احمد - نصر - عبدالله - افراد اللجنة المنظمة
>>> واضح التعب والارهاق من قميص عبدالله
و بعدين احمد اخد على خاطرو لاني درتلو ضهري ، فصوره تانيه :

لك صحححي طلعنا عن الموضوع

هلق اذا بترجعو للصورة بوستر المسابقة بتلحظو ان المركز الرابع جائزتو اشتراك نادي صحي ، بس لما استلمنا الجوائز طلع كل واحد موبايل نوكيا 6500 :

سبحان الله ، فزنا بالقرعه مرتين ، وتغير ترتيب الجوائز .... وعوضني عن موبايلي .... هاد اللي بدي اوصلو
" من ترك شيئا لله ... عوضه الله خيرا منه " ..... ويأبى الله ان يكون هناك من هو أكرم منه ..

وهي هيه القصة الخرافية ...... يا ترى عندكم قصص خرافيه متلي ؟ شاركونا .... وسامحونا :d

[mesheal]

عن جد روعه


ربي يعطي الشخص على قد نيته 00 ودام اللي يساعد ما ينتظر مقابل الله يكافاه


ربي يوفقك

[اممي]

يعني بيقلك الشوام ماخلو شي الا وعملوا
انو مسابقة ثقافية وتنربح بالحظ
مبروك الموبايل رفيق

[blakvenus]

والله هي القصة ما بتفوت بالعقل بس انا استعملت العنف ودفشتها بعقلي دفش فعلا قصة شبه خرافيةههههههههههههه
انشالله الف مبروك الموبايل الجدد
على فكرة موبايل حلو كتير انا اخي شايل نفس الموبايل ولو ما كنت بحب السوني اركسون كنت انا كمان بدي اشتري متلو بس شو بدك تعمل القلب وما يهوا

[ابو عمير السوري]

انت ربحت باجتهادك........والرائع أن تشجع الأخريين على فعل الخير في وقت قل فاعلي الخير
تحياتي الك

[بلاك 1]

ييييييييييييييييييييييييي ييييييييييييييييييااااااا ااااااااااااااااااسلام ياهيك الربح يابلااا
مبروك وعقبالنا نربح شي شغلة ولو مرة بهالعمر