الانطباع الاول من زيارتي لبلدي.

[yass]

اسفة على التأخير اولا
مين يلي قلك انو انا معتبرة او بدي يصير في موانة معك او مع غيرك ؟ انا جديدة هون هي اولا وتانيا انا بعامل الناس يلي مابعرفهم على الرسمي والرسمي كتير كمان

و صيغة رسمية هاي تقوليلي "يا عيوني" ؟؟

اوكي كلامك صح انت فيك تقول يلي بدك ياه بس مافيك تحاسبني ,فيك تبرر انو ماكان اصدك هيك, بس يا "ياس" (هي من اي كلمة سبقتا عم ناديلك باسمك حاف ) رح اعطيك مثال صغير كلنا منستخدمو ببيلنا شو معنات حضرتك بهيك ظرف , وقت اي شخص قريب او غريب بيعمل معنا فصل ناقص ومثلا بدنا نشوفو وهو تأخر عن موعدو شو منقول وقتا ؟ منقول : ما اجى حضرتو , ما وصل سيادتو , ماوصل جنابو , يعني حضرتو وسيادتو وجنابو هن فاعل شي سلبي(يعني منظووووم ) , وانت وقت قلتلي حضرتك كنت متدايق من الموضوع وهالشي ظهر بالمشاركات يلي تبعت ردي .

أحاسبك؟ مين حاسبك هون؟

و ما لازمني أبرر... ليش لحتى أبرر؟ ما مشكلتي أنا سوء ظنك فيني

خود راحتك وكتر وبرجع بقلك وجاوبتك انا لا بعلم حدا كيف بدو يحكي ولا حدا بعلمني كيف احكي بس بذكرك انا وقت بلمس انو في سخرية بلاها هي سخرية خلينا على على كلمة امتعاض , امتعاض بجوابك فمن حقي اني مارد وجاوبك انت او غيرك بيلي جاوبتو .

لأ هون اسمحيلي... أول شي استفهمي ازا عم يرد عليكي بسخرية أو امتعاض.. مو انتي تقرري انو عم يرد بسخرية و بالتالي تتعاملي معو ع هالمجال لأنو هون في احتمال انو عم تتهمي بالباطل.. متل هالحالة

هادا الحكي صحيح وقت بكون الشخص عم يسأل بشكل عادي بس مو متل ماكنت محتد وانت بتعرف بالموضوع سلفا وانت على اطلاع كامل عليه .وحقك تستفسر وانا استفسر وغيرنا مشان اذا كان في كذب بالموضوع نعرف الحقيقة .

برجع بقلك ماني محتد.. و مانك براسي لتعرفي محتد... لأنو من سألتي هالسؤال أنا بعرف ليش سألتيه (باقرارك اللي اجا بعدين تأكدت)... و لذلك فكرتيني امتعضت... لأنو انتي سائلة السؤال بدافع غير السؤال انما للغمز بطريقة ما

اما بالنسبة لكلامك الباقي فيعني كلام منطقي بدل على شخص عايش الوضوع تمام وشرحتو بشكل مببسط جدا ومشكور عليه وخاصة انو احد اعمامك على صلة بالموضوع انو اتهموه بهالشي يعني انت بداخل المعمعة .

طبعا عايشو و بعرف البير و غطاه.. بلدي و مدينتي و منطقتي.. ع كل ما عندي عادة احكي بشي ما بعرفو... بظل ساكت

هلئ انا صار لازم برر ليش سألت سؤالي لصاحب الموضوع
بطريق الصدفة عرفت عن الاخ صاحب الموضوع انو يتبع المذهب الفلاني وهو كان قد صرح بهالشي علانية باحد المواضيع وفعلا كان شجاع على جرأته وانا بهنيه عليها , بس وكلمة بس بحط تحتا خطين حمر انو يجي صاحب الموضوع وينتقد المذهب الاخر فهالشي انا مابسمح فيه ابدا (اهل مكة ادرى بشعابها ) وان كان لابد من انو ينتقد او يحط ملاحظة فكان من الافضل انو يحكي عن كل الظواهر يلي عم تمر فيها البلد .
للتوضيح مثال بسيط لكل الاعضاء
اذا انا كنت منتسبة لحزب يساري وشخص أخر منتسب لحزب ليبرالي بقوم بيجي اللليبرالي بنتقد حزبي فهالشي مرفوض الا في حال جلسنا وحطينا كلشي سلبي عن الحزب اليساري وحزب الليبرالي وقتها ممكن نسعى للتطور

هون بدي أوصل....


ببساطة و عفوية و قمة بالصراحة كلامك أنا شايفو طائفي (عم قول كلامك ما عم احكي بشخصك... و عم اوصف كلام مكتوب بوضوح)... يعني حضرتك شفتي انو صاحب الموضوع شيعي... و بالتالي رديتي عليه بطريقة طائفية لأنو أخدتي بعين الاعتبار طائفتو قبل أي شي تاني.. بدل ما تردي عالموضوع رديتي ع صاحبو (رديتي بسؤال ذو نية ثانية).

بعدين نظرية انو ما بيصير واحد ينتقد فكر (بفرض انو صاحب الموضوع انتقد فكر.. هو انتقد ظاهرة ..فقط لا غير) الا اذا منتميلو... يعني ما بعرف... بتذكرني بالنقد الذاتي تبع الشيوعيين.. هاي نظرية أصحاب الفكر الشمولي .. اصحاب فكر نحن نعرف و نحن نفهم و غيرنا ما ينتقدنا الا لأنو يكرهنا و ما عندو سبب موضوعي للنقد انما ينتقد من قبل حقد الاختلاف ...

أما مثالك تبع الحزب الليبرالي و الحزب اليساري فما بشوفو هيك... انا يساري... ماشي؟ ما فيني (أو بالاحرى مو مافيني... انما مضيعة وقت) أروح ع حزب يميني انتقد كيف يدير نفسو... لكن لما الحزب اليميني عندو طموح يقود مجتمعي و يوجهو بطريقة فكرية ما تأثر فيني فطبعا مو بس يحقلي انما من واجبي أوقف بوجهو فكريا و أبيّن وين الغلط بنظري... عدا انو المناظرة الفكرية ضرورية... مافي يمين بلا يسار و لا في أبيض بدون أسود... اللي مزبوط هو انو ما يصير تنأخذ وجهة نظر جهة وحدة و تنفرض كمقياس أو كموديل أو كأساس و نجي بعدين نقيّم على اساسها.. لكن انو شخص ما فينو ينتقد أو يحكي عن طريقة تفكير غيرو هاد اسمو قمع.. ببساطة

انا احترم كل المذاهب والطوائف والاديان وردودي بهذا الموضوع ليست طائفية بل هي من اجل الحرية وحرية التعبير والنقد الذاتي
علما ربما اكون لست من ذلك المذهب او ذاك وربما اكون من دين آخر

لا شك لدي بهالشي و لو انو اعتقد انو ما كان موفق من قبلك الرد أخذا بعين الاعتبار انو صاحب الموضوع شيعي... لأنو عم يحكي عن ظاهرة تصير ببلدو.. مثل ما لو .. بالعودة للمزار اللي انبنى بالرقة.. كنت أنا ضدو ( وأنا فعلا ضدو).. و ما حدا فينو يقول عني انو مافيني كون ضدو لأنو ماني شيعي.. انا ضدو ببساطة لأنو دمرولنا مقبرة جدادنا ليعمرو مكانها المزار.. و ضدو كجمالية شكل... معمرينو على الطراز الفارسي بمدينة كل آثارها عباسية... و صاير جنب سور الرقة المبني من اللبن و على الطراز العباسي.. و المزار من طراز لا علاقة له بالمحيط الهندسي (على كل الحيونة المعمارية شغالة ببلدنا ... في مبنى بيمارستان رائع شكلو و كمان مبنى باللبن و طرازو عباسي راحت البلدية عملت حواليه سور حجر سوري و حديد لونو أسود..) ... لكن برجع بقول انو لما تعمر الناس كلها فرحت لأنو قلنا هلأ يصير في سياحة متل الست زينب و يشتغل البلد و تجي حركة (و هالشي ما صار لأنو العدوانية اللي صارت تجاهو نتيجة الحملة الوهابية -أي وهابية.. لأنو بجوامع السعوديين و من قبل شيوخهم- تجاه الشيعة خلتهون يخافو و هلأ يجو عالرقة و ما بيتجولو بالمدينة و لا يزوروها انما عالمزار بوجههون و بيرجعو... رغم انو ما صار أي شي عدواني تجاههون من قبل أهل البلد).


و بخصوص الظاهرة اللي حكى عنها صاحب الموضوع بدي عقّب ع شغلة.. حكيت رأيي بظاهرة التدين برد سابق بهالموضوع و قلت انو بشكل عام ما تخيفني كتير و لا تقلقني انما هي رد فعل طبيعي على مجموعة من العوامل المحددة... لكن هو ساكن برا و أنا كمان و لذلك متفهم انو لما تغيب فترة طويلة و ترجع فعلا يلفت النظر النزعة الدينية عند الناس بشكل عام و الشباب بشكل خاص . بزيارتي الأخيرة صدفت شهر رمضان... في شب صديقي كنا سوا بالمدرسة و كان لا يصوم و لا شي و سيكارتو بتمو من الصف الثامن و أزعر يعني... كنت بزيارتي ما فيني واعدو لبعد الـ 12 بالليل لأنو قبل الافطار هو يشتغل.. و بعد الافطار كان يروح عالتراويح و يظل بالجامع بعد صلاة العشاء يقرا قرآن و يحضر دروس دينية و ما يغيب يوم واحد لو تنقلب الدنيا.. هاي حالة متطرفة جدا بس بشكل عام مزبوط لاحظت نزعة دينية عن أقرباء الي ما كانت موجودة و حتى احياء ليلة القدر مختلف عن ما تعودنا عليه.. قصدي من هالحكي انو الغياب فترة يخلي التغيير يبدو أكبر و أكثر اثارة للملاحظة...

[yass]

كاتب النص الأصلي : whiterose

عم تمزح ولا جد

ما فهمت

[صياد الطيور]

كاتب النص الأصلي : yass

ما فهمت

هي وايت روز من كتر ما اندهشت من الكلام و الخبر الي كتبتو ما صدقت الكلام و عم تستفسر ( من باب زيادة التعجب ) اذا عم تحكي جد ولا عم تمزح ؟

كيفني معك ماني محلل فيزلوجي بالله

[yass]

كاتب النص الأصلي : صياد الطيور

هي وايت روز من كتر ما اندهشت من الكلام و الخبر الي كتبتو ما صدقت الكلام و عم تستفسر ( من باب زيادة التعجب ) اذا عم تحكي جد ولا عم تمزح ؟

كيفني معك ماني محلل فيزلوجي بالله

ها أوكي... الله يديملنا التحليل خيو

لسى في كومة مواقع هدول وقت بكون ملاّن ببحبش فيهون... يطلعلك واحد سعودي ما عرفان سوريا وينها يحلل بتركيبتنا و يتفهمن علينا... غوغل كتير بتشوف كتير

بالزمانات تخانقت مع واحد اردني هون بالمهجر... قاعدين عم نتغدى ببيت صديق مشترك و هو ماسكها تطرف اسلامي شي مو طبيعي.. عن جد يعني حتى أصدقاء متدينين بعرفهون ينفرو منو .. فأنا ما كنت أيامها بعرفو كتير و صار يحكي طالع نازل عن الجهاد و حكم الشريعة و مدري شو و ما بعرف كيف رديت عليه على شغلة بتخص سوريا لما بلش يخبص عن انو كيف العلوية بيخلو الطلاب يسبو عمر بن الخطاب بالاصطفاف بالمدارس و من هالحكي هاد و قلتلو عمو ما بتعرف الله وين حاطك.. و فلت علي.. أول ماسألني انت شو ملتك (كون عرفوه علي انو أنا سوري) قلتلو ما شغلتك ملتي و هاي خصوصية لألي ما بيحقلك تسألها, فصاحب البيت مشان يلطف الجو اجا يقلو الأخ علماني و شوية حباشات من مثقف و متنور و يعني قعد يعطيني اطراءات هيك مشان يلطف جو.. اجا الأخ طلع معو: أيواااا علماني... علماني يعني شيوعي .. شيوعي يعني بعثي.. و بعثي يعني علوي.. اي ما بستغرب خجلان و مستحي تقول ملتك (يا شباب ريتها تنكسر ايدي اليسار اللي بكتب فيها ازا عم زل عليكون بحرف).. طبعا نهاية الخناقة ما كتير مهمة بس ما وصلنا للضرب بمعجزة..

قصدي من رواية هالقصة انو بوجود هيك عقليات ( وهاد محسوب علينا مثقف لأنو طالب جامعة و عندو شهادتين و شغلة كبيرة معتبر حالو) فتخيل شو فيك تلاقي حكي طالع نازل بهالانترنت...


أنا كتير بخاف من الغمز الطائفي و فعلا اعتبرو استهداف للبلد و خط أحمر.. احمر جدا.. اغلبكون يعرف اني معارض و اني ضد التخويف و التهويل الأمني... لكن من هالناحية بخاف..ما بخاف ع أهل البلد بين بعض.. ما رح توصل لشي هالشغلة.. خوفي من ورا الحملة هاي تبعيت انصرو اخوانكم السنة في سوريا انو المصروع السعودي او اليمني أو السوداني أو أو ... بدل ما يروح يفجر حالو بالعراق يجي يفجر حالو بالشام و معتبر حالو عم يجاهد.. هاد الخوف

[صياد الطيور]

في كتير من شكال صاحبك هاد
و أحياناً بتحاور واحد و ما بتصدق أنو معقول في بشر بهالعقلية هي !!

أي تطرف بالدين رح يكون مزعج للآخرين شو ما كان دينو أو ملتو


و أبشع شي لما بيعاملك شي واحد بحسب دينك ...

عالهامش .. كنت مفكرك مرتاح من هالنوعيات عندك
شو أخبار التلفزيون

[yass]

عالهامش .. كنت مفكرك مرتاح من هالنوعيات عندك
شو أخبار التلفزيون

هالنوعيات ماركة عالمية... صحيح قليلين بس متواجدين (يعني عندي هون الجالية العربية صغير و فيها المتدين و فيها غير المتدين.. عادي.. بس عندك هاد و كمان عيلتين وحدة مصرية و التانية من الضفة الغربية هدول خرج ينحطو بمتحف لحالهون)


التلفزيون شغال آخر حلاوة و بيسلم عليك

[sandy ahlawya]

انا عايشه فى مصر و مصريه و عمرى ماروحت سوريا خاااااااااالص
بس بجد انا بتكلم من منظور عام هو انتم عايزين ان الدين يبعد عن السياسه ولا ايه
لو كنتم عايزين كده
ازاى يعنى
ده الدين هو الدنيا و لو شلنا الدين من الدنيا هتبقى غايه و هتبقى العن من كده
يعنى انتم عايزين الدين بس يبقى صلاه و صوم و لبس محترم و بس و يتشال من السياسه و الاقتصاد يعنى
ولا ايه ؟
ولا انا فهمت غلط

[VivaSyria]

كاتب النص الأصلي : sandy ahlawya

انا عايشه فى مصر و مصريه و عمرى ماروحت سوريا خاااااااااالص
بس بجد انا بتكلم من منظور عام هو انتم عايزين ان الدين يبعد عن السياسه ولا ايه
لو كنتم عايزين كده
ازاى يعنى
ده الدين هو الدنيا و لو شلنا الدين من الدنيا هتبقى غايه و هتبقى العن من كده
يعنى انتم عايزين الدين بس يبقى صلاه و صوم و لبس محترم و بس و يتشال من السياسه و الاقتصاد يعنى
ولا ايه ؟
ولا انا فهمت غلط

أي دين يلي عم تحكي عنو؟؟ دينك هو الدنيا بالنسبة إلك انتي حرة.. أما بالنسبة إلنا حياتنا شغلنا و علاقاتنا و أخلاقنا و أفكارنا و قضايانا.. و لو انتي شايفة ان الدنيا بتصير غابة بلا الدين بتكوني كتير غلطانة.. الأخلاق الإنسانية و منظومة العلاقات الإجتماعية و الإحترام و لحرية هدول قيم من قبل ما يكون في شي اسمو دين.. هدول الفطرة البشرية و مالهون علاقة بالصوم و الصلاة و الحجاب يلي انتي مختصرة الدنيا فيهون..
ولعلمك مو كل واحد مانو من دينك بيكون بلا أخلاق و شخص سيئ.. بس يمكن صعب توصلك هي الفكرة..

عالهامش: بإعتبارك مصرية و مو جاية بحياتك على سوريا خليكي برات هيك مواضيع داخلية بتتعلق فينا و بتركيبة مجتمعنا يلي صعب شوي انك تستوعبيها..
وياهلا

[ابو عمير السوري]

كاتب النص الأصلي : باشق مجروح

مسا الحب.
كل واحد منا ازا غاب عن بلدو بيحب يرجعلو يلاقيه متغير للأحسن ومنطقياً التغير للأفضل بتفرضو ظروف الخط البياني لتطور المجتمعات والحضارات .
بهالموضوع ما رح احكي عن الغلا غير المبرر ولا رح احكي عن التماطل والوعود الحكومية و الفساد المستشري ولا بدي احكي عن البطالة ولا عن ازمة المي والكهربا.
بل بدي احكي عن سوريا بلدي الي تاريخو بيشيد باعتدال شعبو وتسامحو .. هالبلد يا شباب شفت انو عم بيتعرض لغزو تيارات دينية والقصد (المد الديني) والافكار الدينية بوسط الشباب .. افكار غريبة عن مجتمعنا كتير منها متشدد وغير وطني ومستورد.. انتشار النقاب بنسبة اكبر ولباس ديني للرجال ولحى طويلة كمان.
هل الوضع الاقتصادي للبلد هو السبب بلجوء الناس للدين .. هل الظاهرة عرضية وستزول وتتلاشى سريعاً ؟؟؟؟
ما رح كون متفائل للأسف .. هالمد الديني نتائجو برأيي غير محمودة و ظاهرة تستحق الوقوف والتأمل .. انا مو قصدي هون الا التشدد الديني المسئ للوطن والتسامح والوحدة والوطنية.

شو رأيكون شباب ؟

باكول هم البلد ؟ ولا باكول هوا وبتفرج على نور وسنوات الضياع متل بقية هالناس

هاالتشدد يلي عم تشوفوا سببه ردة فعل قوية على انتشار العولمة أو كما يسميها ماد تفتيح المخ على مظاهر لم نعتد عليها خلاف لكل قيمنا التي اعتدنا عليها

[ابو عمير السوري]

كاتب النص الأصلي : المحارب العتيق

كل هاد؟؟
هيك قالولك وهنن ماشيين بالطريق ؟؟؟؟
شو البلد أو الشام يلي عايش فيها غير الشام يلي لحنا عايشين فيها

الناس اعتادت أن تسمي كل جغرافية سوريا الشام لذلك لاتستغرب بيجوز يكون عم يحكي على شي محافظة تانية أو شي ضيعة ويقلك شام الله يعين هالشام

[..Jimy]

كاتب النص الأصلي : باشق مجروح

انا مع حرية الاعتقاد وحرية الفرد بالاعتقاد

له يستر عرضك شو حرية اعتقاد ما حرية اعتقاد.... والله منروح بشربة مي... أنا ضد.... ضد أنا..

كون بهالإيام دارجي موضة جديدي لحرية الاعتقاد... حرية اعتقاد بتتعدى عحريتي ..أو ليش بتتعدى .. بتنفي حريتي...حرية اعتقاد بتقيمني وبتحكم عليي وبتتصرف معي حسب حريتها بالاعتقاد..

يعني هلئ في جماعات متعصبي إذا لسّا زادت حريتها بالإعتقاد... بيجوا لعندو وبيئتلوني لأني بنظرهن كافر مثلاً (كون هني وكلاء الله)... أو بيجوز بيكسروا المدرسي فوء روسنا لأنو مختلطة مثلا...أو... أو...(في كتير)...

يعني عإيام الحرب بالعراق لقطوا واحد إدام عيوني (كان بدو ينفذ حريتو بالاعتقاد) كان رايح يفجر حالو بمشى الحصن البطرياركي.. وقبل الساعة ستي حصرا... لك حزور ليش!!... ميشان يلحق يتعشى مع الرسول.....

إي عنّا في هيك حرية إعتقاد...(يا أخي هوي حر).

خيو أنا ضد حرية الاعتقاد...

كاتب النص الأصلي : yass

اجا الأخ طلع معو: أيواااا علماني... علماني يعني شيوعي .. شيوعي يعني بعثي.. و بعثي يعني علوي.. اي ما بستغرب خجلان و مستحي تقول ملتك

هلئ عندك كمان في هيك نماذج

يعني حسب استنتاج صاحبك الخطير هاد:

علماني = علوي
يعني صاحبك هلئ عمل كل الأحزاب العلمانية أحزاب طائفية علوية(إد ما حط سميلات ما فيني عبّر)

عفكرة كان في دكتور إلماني ميدور عواحد من هالنوعيات بدو يعمل عنو حلقة بحث... إذا صاحبك عندو مصلحة.. لرد عالدكتور خبر...

[..Jimy]

وشغلي كمان

كاتب النص الأصلي : sezar

و كتير من الشباب يلي مصروفو مؤمن بيتجه للأشياء الأخرى ..

إي sezar وكمان في كتير من الشباب يلي مصروفو مأمن ...بس عند وعي..و وعي كبير...
بس للأسف كلهن ناطرين ياخدو الشهادي من هون ويسافورا من هون إما عـ إلمانيا..أو اليونان..أو السويد ... وأنا منهن (مو من الواعيين...من المسافرين)

[باشق مجروح]

كاتب النص الأصلي : المحارب العتيق

كل هاد؟؟
هيك قالولك وهنن ماشيين بالطريق ؟؟؟؟
شو البلد أو الشام يلي عايش فيها غير الشام يلي لحنا عايشين فيها

الله وكيلك لو كانت غير شام ما كنت اهتميت بس والله مشكلتها بلدنا الغالية وكل يوم زيادة عم قضيه هون عم شوف قديش الظاهرة قوية.
مبارحة كنت قاعد مع واحد وحكينا بهالقصة قلي هالتشدد الكبير ما رح يدوم وهوي فترة عابرة.
حسيت انو الزلمة متفائل شوي زيادة.
انا بتمنى يكون كلامو مزبوط قبل ما نكرر نموذج سعودي - ايراني او ما شابه.

[sandra]

يمكن اللي عايش بالبلد ما رح يلاحظ زيادة التشدد متل اللي بيغيب فترة وبيرجع
من هالشي الناس مستغربة شوي من كلامك

[باشق مجروح]

كاتب النص الأصلي : sandra

يمكن اللي عايش بالبلد ما رح يلاحظ زيادة التشدد متل اللي بيغيب فترة وبيرجع
من هالشي الناس مستغربة شوي من كلامك

ما كتير صعب الواحد يلاحظ . يفكر كم واحد من رفقاتو صار متدين .. كم واحد راح ع العراق للانتحار من العيلة او من المعارف ؟ .. كم وحدة منقبة بالحارة .؟؟ .. كيف صارت الخطب تنسمع بالسرافيس وبصالات الانتظار ؟ ..بمجرد نظرة سريعة للحالة بيعرف مباشرة ازا انا عم بحكي صح أو لأ.
الي لاحظتو انا انو الناس هون عرفانة وملاحظة هالشي.

[المحارب العتيق]

كاتب النص الأصلي : باشق مجروح

الله وكيلك لو كانت غير شام ما كنت اهتميت بس والله مشكلتها بلدنا الغالية وكل يوم زيادة عم قضيه هون عم شوف قديش الظاهرة قوية.
مبارحة كنت قاعد مع واحد وحكينا بهالقصة قلي هالتشدد الكبير ما رح يدوم وهوي فترة عابرة.
حسيت انو الزلمة متفائل شوي زيادة.

انا بتمنى يكون كلامو مزبوط قبل ما نكرر نموذج سعودي - ايراني او ما شابه.

بحب ألك أنو كلامك كلو غلط . قاعدين بالبلد وشايفين شو عميصير . وأحساسك هاد بعد غيابك بأوكارنيا . يعني كنت ماعم تشوف أي محجبة أو واحد طالق لحيتو . على العكس من سنة وجاية أنفتح خمسين كبارية وكازينو بريف الشام . ودعاياتهم معبية الدنية . عدا عن الأحصائية يلي طلعت من أقل من سنة عن بيوت الدعارة بالشام وريفها . يلي أنا ملاحظو هو أنحلال ديني مو العكس . بسبب الأختلاط الفظيع بالشام
بعدين ضحكتني كتير بقصة سعودي أو أيراني . أيام بحسك بتقول كلام وكأنك نايم . ليش عنا التركبية بتشبه هالبلدين

[sandra]

أنا بصراحة متل صافو لما نزلت عالبلد حسيت اديش في تشدد ديني والتعصب زايد
قبل ما كنت اسمع حدا بيسال انتي شو دينك هلا من أول ما بتلتقي بالشخص بدو يعرف هالشي وبيسأل بكل وقاحة
ما في حديث بينفتح إلا وبتنجاب سيرة الدين


وشغلة تانية بتلاحظها بالبلد انو نسبة التلطيش زادت ... قبل كانت البنت اللي لبسها غريب تتلطش (مع انو هاد مو مبرر للتلطيش) هلا صار بيكفي أنو بنت تكون ماشية بالشارع لتسمع مية كلمة بلا طعمة أوبوساخة

[phoenixbird]

وصارت اللحى الطويلة والتشدد موضة كبيرة
وفي اغرب انو اوركسترا شيعي او علوي او سني عم تنعزف بقوة هستيرية