مغامرات فصعون ..

[The morning]

فاق قصـعون بيوم من الايام و ما حابب يروح عالمدرسه بس ما قدر ينفد جرب جميع الخطط و الوسائل المعهوده مع امو بس امو ما اقتنعت و هددتو بقطع المصروف مدّه شهر لو ما بقوم بيروح عالمدرسه .. فـصعون ما عاد لقي ادامو خيار تاني .. فقام لبس المريول و حط الفولار اب الخمسا عشرين و ربطو بالجوزه و مشط شعراتو و حمل شنتايته على ظهرو و راح ..
و هو عطريق المدرسه تزكر انو هو تارك دفترو العلوم عند حـربوق - جارون بالبنايه - فقرر يرجع يجيبه .. و هو عطريق الرجعه بيشوف تنين من رفقاتو اللي بيعرفوه لحربوق عم يشترو من عند سوبر ماركت الصداقه .. بيسألهم عن حربوق بيقلولو ما شفنا حربوق اليوم . طيب عطاكون دفتري العلوم ؟ بيقول فصعون .. و بيجي الجواب المتوقع : لا .. فبيشتري فصعون مسكه سندباد و بكمل طريقو لبيت حربوق .. و لما بيوصل على باب البنايه و بدو يدفش الباب و يفوت .. بيسمع صوت حربوق عم يضحك بصوت عاااالي .. بيجي بدو يفوت بيسمع صوت حدا تاني عم يضحك كمان .. بس ما بيعرف مين .. بعدين بيسمع حربوق عم يضحك مره تانيه بيقوم بيطلع من فتحه الباب و بشوف حربوق عم يضحك عليه و على رسمات العلوم تاعه .. عم ينقل وظايفو و عم يلعبلو بالاجوبه اللي هو كاتبها و تعبان عليها .. وقتها حربوق بيدمعو عيونو .. و بتغرر الدموع بس هو بيقرر انو حربوق ليس صديق صدوق و هو ما بيستاهل .. و بيترك دفتر العلوم و ما عاد بيسأل عليه ..
لما بيرجع فصعون عالبيت و بيقعد عطاوله الغدا .. بيسألو ابوه عن حربوق .. ابوه سألو كيفو حربوق .. بس فصعون ما عرف شو يجاوب .. قلو منيح .. بعد شوي قلو ابوه لفصعون اتصلت في انسه العلوم اليوم .. و قال انك انت صاير مهمل كتيير .. و انك ما عم تنتبه بالصف و ما عم تعرف تحل الوظايف لهيك انا عم نبهك على هي القصه و اذا تكررت رح بحرمك تلعب مع صديقك العزيز حربوق اسبوع كامل ..
فصعون بيطلع على غرفتو عم يفكر و يقلب لامور براسوه ..
و باليوم التاني .. بيجي حربوق الصبح لعند فصعون مشان يروحو سوا عالمدرسه .. بس فصعون ما قادر يحكي مع حربوق بعد اللي شافو و سمعو مبارح .. فبيقلها لامو تقلو انو فصعون راح عالمدرسه .. طبعا امو بتفكرو عم يتحجج مشان ما يروح عالمدرسه و بتخبر حربوق يستناه ..
بيروحو عالمدرسه و لما بيرجعو فصعون بيطلع فورا عالبيت بدون مايلعبو بالطابه بباب البنايه .. و بفيق فصعون تاني يوم الصبح قبل ما يجي حربوق وبروح عالمدرسه و ضل يعمل هيك لفتره .. امو كتير تفاجأت بالتطورات و فكرت انو ظبطت تطبيقه فصعونه و صار فصعون يوصلها عمدرستها كل يوم اصبح قبل ما يروح عمدرستو .. بس ما حبت تحكي شي لانو عجبها الوضع ..
بعدين بيوم من الايام بيجي حربوق لعند فصعون و بيقلو انت مش صديق حقيقي انت تخليت عني كرمال ترضي امك و ابوك لانون بيفكرو اني عم لهيك و ما خليك تدرس و بينزل فيه بهادل فصعون ما بيعرف شو يقله و بينصدم بالفكره لهيك ما بقله شي ..
و هيك بروح فصعون تاني يوم عالمدرسه الصبح و بيلاقي كل الولاد ما حابين يلعبو معو لانو هو صديق غير صدوق ..
فتأمل يا رعــاك الله ..

[The morning]

لما صار فـصعون بصف الرابع انتقل على مدرسه جـديده (( للكـبار )) . و صف جديد .. اوّل شـي كتير حب لجو كتير و اكتر شي حب الزحليطه الحمرا ..بس بعد فتره و بما انو الجديد بالصف فلكل صار بدو يكسبو لصـفّو .. اي يعني حلـيف و بالفرصه اجت شـلّه القبضايات و قـعدو يـحكولو عن بـاقي الشلل بالمدرسه .. حكولو شغلات عن شـلّه الابطال حكي وقفلو شعراتو سبايكي عالموضه .. و ما عرف شو يقول فاكتفى بانو يهز براسو بدهشه .. بالفرصه التانيه .. اجت شـلّه الابطال و قعدت تحكيلو عن شلّه القبضايات .. فصعون اكتفى بهز راسو .. و بالباص شلّه العناتر حكتلو عن شلّه العناكب و بعدين اجت شله العناكب حكتلو عن شله فصعن عليها تنجلي و هيييك ضل فـصعون يـسمع و يسطـّر لحد ما فاق الصبح بيوم من الايام و اطلع على المرايه هيك الصبح .. و قال : يـافـصعون انت لازم تـاخد موقـف .. حتى لو كان الكل ضـدك .. انت لازم توقف هي المهزله ..
و لبس شنتايته على ضهره بكل فخـر و مشي باتجاه المدرسه و الافكار عم تدور براسه .. عن الطريقه اللي لازم يبلش تنفيذ الخطه فيها .. و لمعت براسو فكر بلمبه ..
بالفرصه الاولى .. مرّ فـصعون على كل الشلل و خـبرهم انو هو ناوي يـنضم الهم بـس يلاقولو بالفرصه التانيه جنـب الدرج .. و الشباب ما كذبو خـبّر .. اجتمعو كلون و هنن عم يزاورو بعـضهم و كل واحد يا ارض اشتدي ما حدا قــديي ..
بيوقف فـصعون على تالت درجه .. و بيكل ثـقه ببـلش يحكي عن الاخوّه و المحبه و التـضامن .. و من سـيره لـسيره .. بيبلش يـقول شو سـمع من كل شلّه عن الشـلل التانيه .. و انو هو ما عم يحب الوتوته اللي عم تـصير و هالشي ما لازم و الخ الخ ..
هون هو ما بيطر بقى يكمّل حديثه لانو ما عاد في داعي ..
فـصعون صـار بين الايادي .. و الكل اسـتلموه مباوسـه من نوع ثـقيل .. و باخر النـهار كان فـصعون بالمـشفى .. معو عدّه كـسور بالواقع و رضّ قـوي جدا بالقدر ..

[يمان Rooooonaldo]

ههه الجزء الماضي اللي قبل وتوتة .. ملعوب .. جدا جزيلا ..

[حـلا]

قصتك حزينة هالفصعون

ترى ما شي بيمشي لحبايب

الشغل شغل..

ما في رفئات ولا دياولووووووووو

يسلمو Morning

بالانتظار للأعداد الكادمة

[suryoyo]

فـصعون صـار بين الايادي .. و الكل اسـتلموه مباوسـه من نوع ثـقيل .. و باخر النـهار كان فـصعون بالمـشفى .. معو عدّه كـسور بالواقع و رضّ قـوي جدا بالقدر ..

هي نتيجة عملية للمثل المشهور ..... اعمل خير و زت بالشط أو اشمر بالبحر ...... الخ

شكرا على النصيحة



اتخيل فصعون كناية عن شخصية حقيقية


شكرا مورننج

[The morning]

مبارح بعد الضهر كان فـصعون مالل و دايق خلقو .. قام طلّع البوم الصور تبع الطفوله و قعد يتفرج عليه و يتزكر .. قام وقعت عينو على صورتو و هو عم يـعد ..
فـصعون و هو و صغـير كان يفكر انو الانسان عندو بس خمـس اصـابع و ما كـان يـقتنع انو عشـره .. كل مـرّه يعدون يطـلعو معو خـمسه و يرجع يـعيد الاصبعه التانيه و يطـلعو بس خـمسه .. و بهي الـصوره اللي طـلعت بايدو كان اوّل مره بـعدهم و بـيطلعو عـشره .. .. لهيك كانت صوره غاليه عليه كتـير .. و هو عم يطلع الصوره من الالبوم وقع من الالبوم ورقه مطبوع عليها عشر اصابع .. صار فصعون يضحك و يضحك كتير و بصوت عالي وقت شافها .. لانو بهي الورقه كان اول مره بيعرف انو اصبيعو كلها مو متل بعضها .. هون مرّه كان زعلان كتير من ابن الجيران بالبنايه الجديده اللي انتقلو عليها و صار يبكي و يقول بدي ارجع عبيتنا لانو هي البنايه ما بحبونا و ما حبابين .. امو جابتلو ورقه و الوان قالتلو اطبع ايدك .. و بعد ما طبعون قالتلو انو هدول كلون اصابيعك .. بس ولا واحد بيشبه التاني لانو اصابيعك كلها مو متل بعضها .. فـصعون كـبر و هالنظريه هي اكتر نظريه مقـنع فيها لانو عن تجربه .. لمن شي اسبوع اسبوعين شهر شهري مو بيناتنا .. المهم انو كان فاتح باب قلبو و قاعد عالاسطوح عم يفضفض غسـيل .. قام سمـع صـوت جايه من جوات البنايه .. ما قدر يحدد بالضبط شو هالصوت .. فصرخ فصعون .. شوفي ؟؟ شوفي ؟؟ ما حدا رد عليه قام فصعون وقف عند باب الدرج و قبل ما يطلع ليشوف شو صاير بلش يصرخ و يصرخ و يصرخ .. انطبق الباب على ايدو .. و فاق بعد ساعتين بالمشفى .. فات لعندو الدكتور قلو يا فصعون تسكر باب لاسطوح الحديد على اصابيعك و تأخرت لوصلت لعنا فما كان في قدامنا خيار غير انو نقصلك ياهم ..
فصعون بكي كتير وقت عرف .. بس وقت وقعت الورقه و شافها صار يضحك, لانو هلئ صارو كل اصابيعو متل بعض ..
!!

[suryoyo]

فات لعندو الدكتور قلو يا فصعون تسكر باب لاسطوح الحديد على اصابيعك و تأخرت لوصلت لعنا فما كان في قدامنا خيار غير انو نقصلك ياهم ..

صار تراجيدية ساخرة.. .




بلكي مثل أي دراما عربية ...

يصحى فصعون من النوم على صوت الوالدة ...... قوم روح للمدرسة تأخرت

[yass]

حبيتو لهالفصعون... شخصية جديرة بالاهتمام

[maroc17]

فصعون راح ينام جنب امه كان يوم عصيب عليه................................قصة جميلة قصة فصعون ابن فصعونة.

[بلاك 1]

مسكين يافصعون
لاتزعل كلنا فصاعين ودايما بنكتشف الاشياء متأخرين كتير بس بعد تجربتك المريرة ياترى شو احسن برأيك "أن تأتي متأخرا خير من ان لا تأتي ابدا ... ولا لما بدك تيجي متأخر بلاها هالجية.. أنا بقول التانية احسن

[maroc17]

فعلا لديك مو هبة morning في تاليف القصص .رغم اننا لم نفهم من هو فصعون هدا و من يكون

[maroc17]

لا زلنا ننتضر اخبار فصعون

[The morning]

كاتب النص الأصلي : suryoyo

يصحى فصعون من النوم على صوت الوالدة ...... قوم روح للمدرسة تأخرت

والده فـصعون بتسلم عليك

كاتب النص الأصلي : yass

حبيتو لهالفصعون... شخصية جديرة بالاهتمام

و ليش انت غيران

كاتب النص الأصلي : بلاك 1

أنا بقول التانية احسن

و انا هيك بـقول بس فـصعون رأيو انو الرايحات احسن من الجايات

كاتب النص الأصلي : maroc17

فعلا لديك مو هبة morning في تاليف القصص .رغم اننا لم نفهم من هو فصعون هدا و من يكون

فـصعون متل سـبايدر مـان ما بحب الناس تعرف مين هو

[maroc17]

مثل رافت الهجان .

[بلاك 1]

لك شبباااااااااااااااااااااا ب حدا شاف فصعون شي صارلو كم يوم مختفي ليكون لهلا تعبان بعد ماراحو اصابعو دورو عليه منننيح اصلو فصعون وما بيبببين عطول

[The morning]

بليله ضو القمر فيها ساطع كالشمس و مضوي غرفه فصعون .. و القمر بضوي عالناس و الناس بيتقاتلو بالطابق الاول من البنايه الي ساكن فيها فصعون .. فاق فصعون مرعوب كتير .. ركض على غرفه امو و ابوه بسرعه لدرجه انو نسي يلبس فرده شـحاطتو اليمين .. فتح الباب و فات قعد على الكرسي لهزاز اللي جنب التخت و صار يهز بسرعه كتير و كانو عم يحاول يطلع الرعبه من راسو بالحركه السريعه .. امو فاقت

و سألتو : فصعون شبك .؟
فصعون ما رد : فصعون رد علي ..
فصعون ما رد .. بعدين لما فيقت ابوه قلون
فصعون: انا منيح بس بدي اتأكد انو كان كابوس و بس..
بعد شي ساعه من الزمن بيطلب فصعون انو يروح على غرفتو .. تاني يوم الصبح بفيق فصعون و العقده لابسه وجهو لبس .. القالب غالب ما تبلى .. و بقضي يومو كلو على هي الطريقه .. و باليل بصير معو نفس الشي .. و نفس الكابوس .. هالمره بقرر يواجه الكابوس و ما يروح على غرفه اهله ,. بيكمش دبدوبه " فرتوك " و بشعل الضو اللي جنب راسه .. و بعد شي ساعه بقلو :فرتوك , انا خايف , عم شوف كابوس بخوف ..ما تخاف انا معك ما رح اتركك بس عم شوف انهم عم ياخدوك مني .. و عم يخبوك بصندوق بارد ..
فرتوك ما برد بشي بس بيوقع عالارض ..
بتروح الايام و بتجي الايام و بعد شي شهر من تكرار هالمنام بشكل بلش يصير مزعج جدا بالنسبه لفصعون ..

فصعون بياخد قرار .. (( دم دم )) * .. بيكمش فرتوك و بحطه عطاوله المطبخ و بقلو: فرتوك انت عزيز علي كتير و لا تصدق مهما حاولو يغيرولك عقلك .. بس تأكد انو هالعمليه اللي رح قوم فيها هلئ هي لمصلحتنا نحنا التنين .. انا خايف , خايف كتير انون ياخدوك مني .. و اني اخسرك عالاخر ,. لهيك قررت انو بدي اتخلص منك .. كرمال ما ضل خايف عليك ..
و بيمسك فرتوك هيك و بخبيه بصندوق شاريه كان بالفلنتاين على امل يلتقي بشي فصعونه ,. مرسوم عليه قلوب كبيره و صغيره و مشكله و بسكر الصندوق منيح .. و بحطو عالسقيفه .. طبعا تاني يوم بياكل بهدله من امو كونو طلع السلم من محلو و غبّر الدنيا اضافه الى انو نسي يرجعه لمكانه ..
بعد شي اسبوع بيجيه لفصعون دبدوب كبير , فصعون بسميه بربر و بصير كل يوم قبل ما ينام يبوسو و يقلو تصبح على خير ., تماما متل ما كان يعمل مع فرتوك ..

شرح المفردات :
* (( دم دم)) : مؤثرات صوتيه

[يمان Rooooonaldo]

هاد الجزء .. عجبني جدا جزيلا .. مدري ليش

[The morning]

كاتب النص الأصلي : يمان Rooooonaldo

هاد الجزء .. عجبني جدا جزيلا .. مدري ليش

مدري مدرك ..