معقول السوري //طبيعيا ً // مو عربي ؟؟؟؟؟؟؟ (( واردة ))

[COSTA]

كاتب النص الأصلي : Joe

و شغلة تانية... الواحد مانو مضطر ينتمي لحزب معين حتى يقول عن حالو انو سوري... او بيشوف سوريا أمة وحدة .. و لو شو ما حب يعمل حدودها
انا ضد الانتماءات الحزبية و الدينية... فيك تكون ليبرالي بدون ما تنضم لحزب يساري.. فيك تكون متطرف بدون ما تنضم لحزب يميني... (طبعا الا اذا حابب تصير زعيم سياسي هادا شي تاني)

لأن الواحد بس ينضم لحزب معين.. بصير بشكل او بآخر محدود بالأفكار يلي بتصدر عن هادا الحزب. يعني بركي مثلا انا ما وافقت على كلشي حكاه سعادة؟ بركي تصرفات الحزب صارت مشينة او اياديهم ملطخة بالفساد او الدم؟

و يعني بالذات بالذات القوميين حسيت عندهم سخف زائد شوي. يعني اذا بدهم يزينوا شجرة الكريسمس بيحطوا عليها الزوبعة. لما توصل لهيك مرحلة.. شو الفرق بينك و بين الإخونجي يلي مصر يربي دقن و يلبس دشاش قصير

كلامك مزبوط يا معلم
بس يللي بدو ينتسب لحزب عاجبتوا افكارو مو شي غلط بالعكس هو بكون عم يساهم مع الحزب ببناء الوطن
بس اذا كانو القائمين على الحزب ملطخة اياديهم بالفساد ..... هاد الشي مو معناه انو الحزب غلط
بس في شغلة حابب اذكرها انو انا دايما بتخانق مع القوميين السوريين ............... ليش ؟؟
لانو كل شغلة بقلولك الزعيم حكى هيك ...... والزعيم ساوى هيك ...... والزعيم اشتغل هيك ........ الخ
طيب شو مافي حدا يشتغل غير الزعيم ؟؟؟؟
يعني هلأ الزعيم مات ...... طيب مافي حدا يفكر و يشتغل غير الزعيم ؟؟؟؟
شوي تانية رح يقولوا بالروح بالدم نفديك يا زعيم

[krimbow]

بالروح بالدم نفديك يا زعيم؟
كقوميين منقول يللي العن منها، كل ما دق الكوز بالجرة منقول "الخلود لسعادة"...
و متل ما قال كوستا كل شاردة و واردة مندحش فيها "سعادة" او "الزعيم"...

بس لحظة...
انو عن جد لازم اتأثر بالفكر النازي لحتى حس انو تعاطفي مع اللبناني و الفلسطيني و الاردني، ما بيشبه تعاطفي مع المصري او السعودي، او الفرنسي او الروسي؟

انا عايش بسوريا، مش باميركا او كندا ... و لما بشوف "غريب" مش متل لما بشوف "ابن البلد"
الافكار المعششة هون غير الافكار المعششة باميركا
و نحنا عنا مجموعة ضخمة جدا من المصايب، يللي بتحسدنا عليها كل امم الارض
تعا حطلي حل لهالمصايب
رح يكون الحل ببساطة
فصل الدين عن الدولة
منع رجال الدين من التدخل في شؤون السياسة و القضاء
تنظيم الانتاج على اساس العمل، مش على اساس القرابة الدموية
إلغاء الحواجز بين الطوائف يللي بيتكون منها مجتمعي
و اعداد جيش قوي يقدر يلعن ابو اسرائيل على ابو اميركا و كندا بما فيها من سوريين و غير سوريين

بصراحة شباب، انشالله تكون هالافكار جاية من المريخ، يعني عيب تجي تقللي انو افكارك مستوردة، قال يعني الاممية هيي الفكرة بنت البلد؟ و اللا الاسلام هوي يللي فقس بقاسيون؟

انا ما بكذب على حالي، لما تلعب سوريا و البرازيل، رح ازعل بس تخسر سوريا مع اني بعرف مسبقا هالشي
ممكن حدا يفسرلي حمى كأس العالم؟

انو ليش كل الناس بيحقلهم يفتخروا بقومياتهم و بس تجي علينا بتصير القومية كخا؟

شي طبيعي كتير اني افتخر ببلدي

نقطة اخيرة، القومية السورية ليست شوفينية، و ازا في شوفينيين بين القوميين فهي ما بتنسحب على كامل القوميين

مع التأكيد اني ضد الانضمام لاي حزب شمولي، و ضد كل حزب شمولي

[الموسيقار]

كاتب النص الأصلي : Joe

انا اول ايام الجامعة كمان كنت كتير مهتم بالحزب القومي السوري. بس مع الوقت اخي بتكتشف انو
اولا... الفكرة غير واقعية التطبيق (العراق و الكويت و قبرص؟؟؟) .. بعمرها هاي الشعوب ما كانت أمة وحدة.
تانيا .. مافي وجود جماهيري ... الجماهير هلق اتجاهها ديني
تالتا .. الفكرة مستوحاة من النازية... و هاي نقطة سلبية بنظري
رابعا و اهم شي... انا ضد بناء دولة على اسس القومية او الدين. الدول بتبنى على اسس الاقتصاد. بالاقتصاد بتقدر توحد كل أوروبا يلي طول عمرها كل دولة نازلة نتف بالتانية.. بس بالقومية فيك تعمل جارين بنفس البناية يتخانقوا

انا بشوف انو طبيعي اي شب سوري اول انفتاحو السياسي يتأثر يا بالحزب القومي يا بالشيوعية و تشي جيفارا .. بس اذا بتسحب اكتر من هيك (لأواخر العشرينات مثلا او التلاتينات).. يا بيكون عندو أسباب سياسية حتى ينتمي لهيك حزب او فكر (مثلا اهل ضهور الشوير بلبنان.. صارت القصة قصة تراث و انتماء اجتماعي)... يا انو عن جد الزلمة لسا مانو وعيان او عايش بالأحلام

بظن كوستا حكاا كلام .. برلنت بحكيكـ رفيقي ..

لما منعمل فكر .. أو فكرة ..

صدقني هاد بيكون .. خطوة باتججاه أنو نكون بني آدمين ..

يعني .. أنا شفت أنو القومي السوري ..

عندو شي ممكن تستند عليه .. شي بيلائم شعبنا ومتطلباته ..

ما قال الحزب .. أنو الشعب السوري .. لازم يصير شعب واحد .. وفورا ً وحالاً ..

بس قال أنو نبلش نزبط المجتمع .. ونسكج التخللف الي عم ياكله .. ويقضي عليه ..

[الموسيقار]

كاتب النص الأصلي : كوستا

كلامك مزبوط يا معلم
بس يللي بدو ينتسب لحزب عاجبتوا افكارو مو شي غلط بالعكس هو بكون عم يساهم مع الحزب ببناء الوطن
بس اذا كانو القائمين على الحزب ملطخة اياديهم بالفساد ..... هاد الشي مو معناه انو الحزب غلط
بس في شغلة حابب اذكرها انو انا دايما بتخانق مع القوميين السوريين ............... ليش ؟؟
لانو كل شغلة بقلولك الزعيم حكى هيك ...... والزعيم ساوى هيك ...... والزعيم اشتغل هيك ........ الخ
طيب شو مافي حدا يشتغل غير الزعيم ؟؟؟؟
يعني هلأ الزعيم مات ...... طيب مافي حدا يفكر و يشتغل غير الزعيم ؟؟؟؟
شوي تانية رح يقولوا بالروح بالدم نفديك يا زعيم

وهي الفكرة تحديدا ً .. هيي الي خلتني أنـــئز .. من فكر هالحزب ..

في شغلة تانية .. أنو وصل علاكهون .. لمرحلة .. أنو كل شي حزب تاني غير القومي السوري .. مالو وجود وماو فكر ..

ومالو فكاهة .. يعني معتبرين أنو هنن الحزب الحقيقي الوحيد في سوريا ..




وبضل بحكي أنو عم بحكي عن المنسبين .. مو عن فكر الحزب .. كـ فكر

[Joe]

فكرة الحزب بربط العراق و الكويت و قبرص مع سوريا انا بعترض عليها. حتى هلق لما نتطلع على دير الزور و الحسكة... فهم اقرب للعراق منهم لسوريا ... يعني جزء من الامتداد السكاني و الجغرافي للعراق اكتر بكتير من سوريا
بس انا فعلا بعتبر نفسي سوري... و بشوف قرابة كبيرة بيني و بين لبنان و فلسطين
بس اكتر من هيك لاء


اليوم بأوتاوا إجا George Galloway عمل محاضرة كانوا منظمينها القوميين السوريين. كانت عجقة كتير و اخدين مسرح بالجامعة... الزلمة عطى محاضرة حلوة... كلامه حماسي جدا جدا. بس يعني ما حكى شي كتير جديد

بس حكى شغلة جديدة ما كنت عرفانها عن مجزرة صبرا و شاتيلا. إنه وقت ياسر عرفات اضطر يترك بيروت... وقعت أميركا تعهد بحماية المقاتلين الفلسطينيين و اولادهم و نسائهم وقت عم يسافروا بالباخرة على تونس.. يعني صار اتفاق رسمي. بس هوي ترك عرفات من هون... اجا شارون شخصيا و اشرف على مجزة صبرا و شاتيلا من هون... بصراحة هالمعلومة كتير عملتلي أزمة


منرجع للموضوع.... انبعصت كتير من القوميين. اول شي طبعا عطوا مقدمة طويلة عريضة. و شبعونا حكي على سوريا و الزعيم. هلق طبعا بما إنهم نظموا المحاضرة ما غلط انهم يسوقوا لنفسهم شوي... بس حسيتهم تخنوها كتير. يعني على اقتباس لكلام للزعيم ... و على تعريف لسوريا بالمعاجم الأمريكية.. ما استهضمتهم

خاصة انو قالوا انو رح ينعزف النشيد الوطني تبع كندا و سوريا... و طلبوا من الكل يوقف... اوكي طبيعي... بس بعد مل خلص نشيد كندا.. حطوا نشيد الحزب القومي السوري... انا بصراحة انزعجت... حسيت الموضوع خداع .. ليش يعني حتى العالم يلي ما بتعرف انو مو هادا نشيد الجمهورية العربية السورية تفكرو فعلا النشيد... قمت انا قعدت بمحلي
بس ما حدا شافني لأنو كنت قاعد بآخر مقعد... يعني حركة الاعتصام ما حدى انتبهلها ... و يمكن لو كنت قاعد بأول مقعد كانت خانتني الشجاعة و ما قعدت... بالنهاية فيها شوية قلة زوق

سلام

[krimbow]

جو حبيبي
بالنسبة للنشيد، هنن (السوريين القوميين) بيعتبروا هاد نشيد سوريا الطبيعية، اما النشيد العربي السوري فبيسموه "النشيد الشامي"

هلأ بخصوص العراق، تعا احكي مع اي سرياني، ما رح يلاقي الترابط يللي انت بتحسو مع الاردنيين و الفلسطينيين، بقدر ما رح يستغرب عدم احساسك بالعراقيين، انت سوري و هوي سوري، بس هوي (و اجمالا اغلب المنطقة الشمالية لسوريا) ارتباطهم بالعراقيين اكتر من ارتباطهم بالحوارنة مثلا

اما بالنسبة لقبرص، تاريخيا مرتبطة بسوريا، و جغرافيا السواحل السورية هيي الاقرب لقبرص...
بزماناتو، بعت معاوية بن ابي سفيان لعثمان بن عفان (الخليفة بوقتها) انو بدو "يغزو" قبرص، فاعترض عثمان، رجع بعتلو معاوية "كيف لا اغزوها و اني اسمع صياح الديكة منها"، و بالتأكيد كلنا منعرف معركة "ذات الصواري" (او السوراي) المشهورة

هلأ جيو سياسيا، حركة الهجرة من و إلى سوريا، إلى و من قبرص على مر التاريخ ما وقفت لحظة، فالكلدان السوريين اليوم، يللي هيي واحدة من الطوائف السورية، اصلهم من قبرص، و الجالية القبرصية بسوريا (تلقب باليونانية) من اكبر الجاليات الاجنبية يللي تأصلت بالمجتمع السوري، حتى انهم تأصلوا بالمجتمع اكتر من الارمن على سبيل المثال
و كذلك الجالية السورية (لاحظ انو السورية هون بتضم اللبنانية و الفلسطينية و الشامية) بقبرص
عموما الموضوع تبع قبرص لا يلغي الفكرة القومية كلها، بالنهاية قبرص عمق استراتيجي لسوريا قوية

تحياتي و اشتقنا لهيك حوارات

[مسطول على طول]

يعطيك العافيه كريم انا بضم صوتي لصوتك بمعظم الي ذكرته . وبصراحه فهمتك هلاء بهل ثلاث مشاركات اكتر من كل المواضيع السابقه