شو يعني علمانيّة؟؟؟

[أسير التشرد]

العلمانية ... سؤال عن التعريف:
الشيخ محمد عبده سألوه شو العلمانية يا مولانا ؟ قال لا سياسة في الدين ولا دين في السياسة...
العلمانية برأيي مو بس فصل الدين عن الدولة متل ما عم يتردد ع كتير من ألسنة الناس للي عم يشوفو العلمانية من منظور تاريخي... متل ما حدث في اوروبا من انهاء تحكم وسيطرة الكنيسة ع الدولة ... متناسين انو هالفصل اللي تم كان بداية للانطلاق نحو الحداثة... طبعاً هالشي ما اجى وفق قرار من الاعلى او حتى خلينا نقول ثورة شعبية مباغتة لكنو اجى عبر مسيرة قيام وافاقة هالانسان الاوروبي من سبات ونوم القرون الوسطى ... وما فينا نقول انو تلك الفترة كانت فترة سبات وظلام بل فترة حمل وولادة لما بعدها... وتم اكتمال كل مقوماتو في هالفترة...
بهالفترة تم تغير نظرة الانسان لذاتو وبانو هو سيد مصيرو وانو قادر ع صنع مستقبلو بايدو من دون الاعتماد ع قوى خارجية متسامية لكن بالاعتماد ع قدرة عقله من دون حاجة إلى اي نصوص مقدسة تهديه إلى سواء السبيل... والعلم اللي كان بالغ بهديك الفترة مرحلة الفتوة وكان قادر وكفيل باداء مهمتو... فكان ان انحصر دور الدين في حياة الانسان في معالجة شؤون السماء وليبقى الارض ساحة للعلم تحت السيادة الكاملة للإنسان...
طبعاً فصل الدين عن الدولة ما اجى من فراغ ... بس هو انعكاس للقاعدة ... الجماهير بدأت تنظر للمسألة وتفهم بشكل علمي تجريبي... ومن دون هالانعكاس برأيي لفصل الدين عن الدولة ما كان الو اي تأثير يذكر ...

هلأ في بعض الشباب عم يقولوا انو الدين سامي ولازم ما نعمم افعال البعض ع الكل ... لكن من بداية ظهور الاديان ولهلأ عم نشوف عدم التناغم والتوافقية بالمجتمع ... طبعاً العلة مو بالدين ... العلة باختلاف الاديان والشرائع ... تحت اي دولة دينية رح يكون هناك اضطهاد للاقليات الدينية ... وما فينا ننكر هالشي ابداً عبر التاريخ ...
الحل ... العلمانية فصل الدين عن الدولة عن السياسة ... وبرأيي انو الدين شي مقدس جداً وعند دخول الدين بالدولة والسياسة رح يتم توسيخ الدين ... لانو بالسياسة ما في شي ثابت متل مالدين ثابت ...
وتحياتي ...
ورح اكمل حديثي بوقت لاحق لاني هلأ جوعان كتيررررر

[krimbow]

الدين الصحيح انا اعرفه وانت تعرفه جيداً الدين الصحيح موجود في التوراة والانجيل والقران هو المحبة التسامح العدل واكتب ما شئت من المفاهيم التي تناقض الشر و الهمجية البشرية

و الزرداشتية ايضا تناقض الشر و الهمجية، و كذلك البوذية و الهندوسية و الدرزية و العلوية و الاسماعيلية و ...الخ

و لكن البوذية لا تعتمد على التورات و الانجيل و القرآن
و انا بحبشت فيهم و ما لقيت الدين الصحيح، و كتير ناس متلي (لكان ليش برأيك في كتير ديانات؟)

انت عم تقول الدين الصحيح بالكتب السماوية، بس انا ما لقيت فيها دين صحيح، و مع ذلك انا بشر متلي متلك، الي حقوق و عليي واجبات متلي متلك...
مو من حقك تقلي شو البس، و كيف نام مع مرتي، و مين اعبد و ايمت صوم و ايمت صلي
من حقك تصوم و تصلي و تعبد ربك، بس مو من حقك انو تجبرني اني اعبدو و صوم و صلي متلك

مشان هيك، لما الله نزل قوانينو ... و لما انتوا فسرتوها على كيفكم، و لما ما ركبت لا القوانين و لا كيفية تفسيرها بقعلي، و لما كان من الضروري انو ننظم حياتنا لحتى نتعايش بدون ما ندبح بعضنا (متل ما عم يصير بالعراق)، لهيك، حطلي ربك و قوانينو ع الرف شوي، و طبقهم على حالك، و تعال تحت قبة برلمان مثلا، او تحت قنديل شي عرزال .. وين و كيف ما بدك، نتفق كيف لازم نتعايش، و نحط القوانين يللي بتناسبني و بتناسبك سوا

و هالشي لما نعملو، بيكون اسمو علمانية

اما ما تعبده انت و ما اعبده انا فلا علاقة لي به ولا علاقة لك به وانما يجب علينا ان تعايش في كنف دولة تقيم العدل والمساواة مثلما فعل عمر اثناء خلافته بعتقد انك بتعرف شو حال الناس كان ايام عمر وبتعرف كيف تعايش المسلمين والمسيحيين في ارض فلسطين

يللي بعرفو انو بعهد عمر توزعت الضيع و الاطيان ع "الصحابة" و قيادات الجيش الاسلامي ..
عموما مشان ما تقللي اني عم اتعدى ع الدين، قديش فترة خلافة عمر؟ عشر سنين؟ فرجيني ايمت تكررت

خيو ابقى بس يجي عمر بن الخطاب بخليه يحكم على راسي

يعني عفوا منك بتاريخ الخلفاء الاسلاميين (حوالي الالف سنة) بأوائل الاسلام، اجا كم واحد بعدهم شربانين الدين من النبي محمد دغري (و مع ذلك كانت فترات حكمهم منيحة للمسلمين فقط، مش لكل الناس، بالنهاية ما يسمى بالفتوحات، هوي ذاتو يللي بيسمى احتلال)... بس بعدها ما عدنا شفنا هيك شي

بشكل عام يللي بيهمني بالحاكم انو يكون عندو كاريزما قيادية، يكون متقن فنون الادارة، و ما بيهمني بالمرة ازا كان بيصوم و بيصلي او ازا كان حافظ القرآن او الانجيل... عرفت عليي كيف؟

القيادة الها صفات، بيتخللها الفضائل، كالحكمة و العدالة و العفة و الشجاعة..الخ، و هي الفضائل ممكن تكون عند الهندوسي و ممكن تكون عند المسلم

برأيك مين افضل قياديا، هوغو شافيز الغير مسلم، و اللا الملك عبدلله "الهاشمي" المسلم؟؟؟

اذن فلنجعل البشر الهة ولنعبد البشر طالما وصلنا لقناعة مفادها ان الله عجز في تحديد قانون لحياة البشر في الوقت الذي ارتقى العقل البشري لاعلى درجاته واستطاع ان يستنبط القانون الذي يهيئ سبل السعادة للبشر
طالما استطاع البشر ذلك فلنعبد البشر

ممكن كتير، بس انو ممكن اكتر انو ما نعبد حدا، شو ضروري نكون عبيد ؟؟؟

امين بس ما قلتلي يلي بتدعيه انو واحد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

صديق من اصدقائي، اسمو بالمنتدى Tarek007 ، و معتقل حاليا من قبل اجهزة الامن السورية، يعني سجين رأي
و شكرا على دعاءك

بتمنى تعطيني مثال لواحد من اهل برا يلي نقشت معهم

بدك حطلك قائمة دول العالم الاول؟ و التاني؟

عن جد ما بتعرف مع مين نقشت العلمانية؟
يعني شو رأيك باليابان، طيب الصين الشيوعية، طيب فرنسا اميركا انكلترا استراليا سويسرا الدانمرك......

بدي اسألك ازا شي انكليزي مسيحي اشهر اسلامو، شو بتعمل معو الدولة الانكليزية؟؟ ولا شي
طيب ازا مسلم سعودي تمسح (صار مسيحي يعني و اشهر هالشي) شو بيصير؟؟؟
رح يعلنوا عليه حد الردة و يهدروا دمو، ليش ؟؟؟ لأنو هيك الله امر
الزلمة لا قتل و لا اذى حدا، الزلمة غير معتقداتو بس حسب القوانين الالهية لازم يموت

لا تلغي عقلك بس بعتقد انو هو قادر يحول اللبن ليصبح لونه اسود ولا انتا شو رئيك ؟؟؟؟؟؟؟؟؟؟؟؟

ما بعتقد .. يعني ما تسجل قبل بمرة انو صار اللبن اسود، إلا مرة وحدة، في واحد من شي 2000 سنة حول المي لخمر قاموا الناس الهوه

[أسير التشرد]

شو معلم كريمبو بنفس الوقت نزلنا ردنا سوا ... وكلنا سوا ...
تحياتي لك

[krimbow]

كاتب النص الأصلي : أسير التشرد

شو معلم كريمبو بنفس الوقت نزلنا ردنا سوا ... وكلنا سوا ...
تحياتي لك

و الك

و بانتظار تتابع حوارك

[وائل 76]

مو من حقك تقلي شو البس، و كيف نام مع مرتي، و مين اعبد و ايمت صوم و ايمت صلي
من حقك تصوم و تصلي و تعبد ربك، بس مو من حقك انو تجبرني اني اعبدو و صوم و صلي متلك

ما حدا عم يقلك و يقلي شو نلبس وشو ناكل وشو نشرب عم يحدد النا واجبات وحقوق لو كل واحد فينا التنزم بواجباته واخد حقوقه فقط بعتقد ما راح يكون في اي خلاف و بعتقد انو هون ما راح يحكم الطبيعة البشرية المحبة لذاتها اي قانون وضعي اوكي بتفق انو في ضمير وفي عقل وفي كتير اشيا لكن باوقات معينة الضمير والعقل بيفقد دورهم
لذلك كان لا بد من ثواب وعقاب محدد بالدين وربنا حدده بالاخرة هون لو كان الدين ثقافة و منهج بيحكم المجتمع و الدولة ملتزمة فيه اكيد مبدئ الثواب والعقاب راح يتغذى شعور الافراد باشيا عجز القانون الوضعي لهلاء انو يمنعها
فكرة احترام الاخر وحقوقه يلي مفتقدينها لهلاء

و لما انتوا فسرتوها على كيفكم،

لذلك انا عم ببحث عن التفسير المنطقي والحقيقي للدين بدون ما يكون توجيه الدين لخدمة مصالح معينة
بس ما مستوعب شو بتقصد بكلمة على كيفكم

(متل ما عم يصير بالعراق)،

يلي عم يصير بالعراق صعب لكن يلي عم يصير بدول من دول العالم الاول اصعب بعتقد اني كتبت عن بعض مشاكلها بمشاركة سايقة وهيا من الدول التي تتغنى بانها علمانية

نتفق كيف لازم نتعايش، و نحط القوانين يللي بتناسبني و بتناسبك سوا

عاشوا قبلنا كتير هون ببيت المقدس باعوا واشتروا وتزوجوا وعاشوا حياة كريمة في ظل دولة عادلة

يللي بعرفو انو بعهد عمر توزعت الضيع و الاطيان ع "الصحابة" و قيادات الجيش الاسلامي ..
عموما مشان ما تقللي اني عم اتعدى ع الدين، قديش فترة خلافة عمر؟ عشر سنين؟ فرجيني ايمت تكررت

عمر لما راح يستلم مفاتيح بيت المقدس كان يلبس ثوب مهترئ وقد تحدثت بعض الكتب عن ذلك الموقف وكيف اشار الصحابة عليه بان يلبس لباساً حسن ولكنه رفض الامر الذي اثار دهشة البطريرك الذي سلمه المفاتيح
فاذا كان خليفة المسلمين ثوبه مهترئ من اين ستاتي الاموال التي تتحدث عنها ؟؟؟؟؟؟؟؟؟؟؟؟؟؟؟؟

ذلك كانت فترات حكمهم منيحة للمسلمين فقط، مش لكل الناس،

مين الناس يلي عم تقصدهم انظلموا
كريم ما بدنا نفوت بحوار تاريخي هلاء ونطلع عنه الموضوع خلينا بالقصة وبنعمل شي موضوع تاني عن الخلافة

بشكل عام يللي بيهمني بالحاكم انو يكون عندو كاريزما قيادية، يكون متقن فنون الادارة، و ما بيهمني بالمرة ازا كان بيصوم و بيصلي او ازا كان حافظ القرآن او الانجيل... عرفت عليي كيف؟

القيادة الها صفات، بيتخللها الفضائل، كالحكمة و العدالة و العفة و الشجاعة..الخ، و هي الفضائل ممكن تكون عند الهندوسي و ممكن تكون عند المسلم

اي تمام هيك كتير وهذا ما ادى لظهور اول اولاد العلمانية .......... العولمة
لانو حين يسود الادين تنتفي كثيراً من المبادئ والقيم فتصبح المصلحة هي الحاكم الامر الذي ادى لخلق ما يسمى بالعولمة حتى يتم السيطرة على دول لمصلحة دولاً اخرى
اذن هنا طبقوا العلمانية ومع ذلك لم تستطع العلمانية التي توصلنا للمساواة واحترام الاخر الذي نتحدث عنه
بل اوصلتنا لمزيد من الحقد والكراهية لان المصلحة فقط هي التي تحكم

برأيك مين افضل قياديا، هوغو شافيز الغير مسلم، و اللا الملك عبدلله "الهاشمي" المسلم؟؟؟

لا تصح المقارنة بين تشافيز وعبد الله لان عبد الله لا يمثل القائد الذي يطبق الدين الصحيح
ان اردت المقارنة قارن بين قائد علماني حقيقي وقائد ممن يطبق الدين الصحيح وللاسف لن تجد احداً الان منهم ولا حتى منذ قرون
على فكرة تشافيز متدين جدا جدا جدا
وانا اكن له كل الاحترام والتبجيل

ممكن كتير، بس انو ممكن اكتر انو ما نعبد حدا، شو ضروري نكون عبيد ؟؟؟

المشكلة انو ابن العلمانية يلي هو العولمة راح يخلينا كلنا عبيد للسيد الغربي

صديق من اصدقائي، اسمو بالمنتدى Tarek007 ، و معتقل حاليا من قبل اجهزة الامن السورية، يعني سجين رأي

ما قصدت صديقك بسؤالي انتا كنت تحكي عن الهين وفي اخر القصة دعيت الله يفك اسره سالتك اي واحد منهم عم تدعي بما انك تحدثت عن اثنين ؟؟؟؟؟؟؟؟؟؟؟؟؟؟؟؟؟؟؟

عن جد ما بتعرف مع مين نقشت العلمانية؟

بالعكس ادرك جيدا اناقش من

يعني شو رأيك باليابان، طيب الصين الشيوعية، طيب فرنسا اميركا انكلترا استراليا سويسرا الدانمرك......

كثيرا ممن ذكرتهم دولاً تطبق الدين وليست علمانية الا بالمظهر
و يكفيني هنا مثالاً ان بوش عندما يريد ان يقوم باحدى غزواته فان خطابه للامة لا يخلو من كلمة الرب امرني
مرجع ذلك انه يدرك ان الدين فقط هو من يجعل الناس تقتنع وتاتمر لما يريد

بدي اسألك ازا شي انكليزي مسيحي اشهر اسلامو، شو بتعمل معو الدولة الانكليزية؟؟ ولا شي
طيب ازا مسلم سعودي تمسح (صار مسيحي يعني و اشهر هالشي) شو بيصير؟؟؟
رح يعلنوا عليه حد الردة و يهدروا دمو، ليش ؟؟؟ لأنو هيك الله امر
الزلمة لا قتل و لا اذى حدا، الزلمة غير معتقداتو بس حسب القوانين الالهية لازم يموت

بعتقد انو يلي عم تحكي عنه ممكن يصير سواء في ظل دولة علمانية او دولة دينية فاذا كانت الدولة العلمانية لن تطبق عليه الحد فان الارهاب كفيل ان يطبق عليه العقوبة والحمد لله الارهاب هاليومين منتشر بشكل كبير

ما بعتقد .. يعني ما تسجل قبل بمرة انو صار اللبن اسود، إلا مرة وحدة، في واحد من شي 2000 سنة حول المي لخمر قاموا الناس الهوه

--------------------------------------------------------------------------------

انا بعكسك تماماً اعتقد ذلك
لك وجهة نظرك ولي وجهة نظري واحترم وجهة نظرك وقناعاتك

[وائل 76]

كاتب النص الأصلي : krimbow

طيب ازا مسلم سعودي تمسح (صار مسيحي يعني و اشهر هالشي) شو بيصير؟؟؟

نسيت هاي معلش
بعتقد كامة اذا بحرف ذ وليس ز
لتوضيح فقط

[The morning]

اول شي مشكور أخ وائل و لاخوان جميع بس وائل بما انو كان المناقش الرئيسي فمعلش اسمحولنا بشكر خاص الو ...

الدين هو علاقه بين اثنين فقط العبد و ربه ... لكن لها تأثيرها على كل ما يدور حولنا من اشياء لان المعتقدات هي
دافع و اساس التعامل .. و التعامل بين البشر هو ما يحدد طبيعه حياه البشر فاذا انت تؤمن انو المجرم لازم ينال جزائه بدون الأخذ بالأسباب فانت ما عندك شي يردعك من انك تقوم تقتلو؟؟ و هون بيجي دور الدين .. يعني قيام دوله علمانيه مع شعب يعرف طريقه الى الايمان الصحيح بعقائد مبنيه على اسس صحيحه ليس مشكله انما المشكله هي عندما نبتدع اراء و افكار و اسماء لتبرر لنا افعالنا التي لا يقبلها الدين الذي هو منطق و اساس حياتي مهم..
أنا لست ضد العلمانيه عندما تصل الى اسمى حالاتها..
شكرا جميع

[mahmoom]

كاتب النص الأصلي : ابومزيد

العلمانية ما بتعارض الدين بس بتحد من تجاوزات المتدينين (على اساس)وممارساتون التدخلية بشؤون الاخرين يعني شغلة حلوة انو ما اسمع كل مولد بيصير بالجامع غصبا عني وانا قاعد ببيتي لك حتى لو كنت متدين وبحب الموالد ما فيني افهم شو عم يقولوا لانو الميكروفون مو كل هالقد بس المشكلة انو اذا حكى الواحد بيصير رزيل وكافر وان سكت بياكل ***

لللللللللللك عشت

[Willi]

طيب سؤال لو سمحتو.

مين الاحق بأنو يحكم بلادنا مثلا؟؟
يعني من انو دين لازم يكون, لتكون الو الاحقية بأنو يحكم هالبلاد؟

[The morning]

كاتب النص الأصلي : Willi

طيب سؤال لو سمحتو.

مين الاحق بأنو يحكم بلادنا مثلا؟؟
يعني من انو دين لازم يكون, لتكون الو الاحقية بأنو يحكم هالبلاد؟

يعني انت موافق ع المبدأ و ما بقي عندك مشكله غير طبيعه الدين .. ؟؟

[Willi]

على انو مبدأ عم تحكي؟؟

بالنسبة لسؤالي انا بدي وصل بنتيجة من وراه

[The morning]

كاتب النص الأصلي : Willi

على انو مبدأ عم تحكي؟؟

بالنسبة لسؤالي انا بدي وصل بنتيجة من وراه

الدين ليس موضوعنا .. هذا ما عنيته لانو هاد الشي يأتي لاحقا .. و هو شي فرعي .. يعني وقت العالم بتوصل
لتقبل فكره الدين بنتناقش اي دين .. لانو اي دين سماوي يحكم بالحق و هو دين حق .. فما هي المشكله

[Spector]

كاتب النص الأصلي : The morning

الدين ليس موضوعنا .. هذا ما عنيته لانو هاد الشي يأتي لاحقا .. و هو شي فرعي .. يعني وقت العالم بتوصل
لتقبل فكره الدين بنتناقش اي دين .. لانو اي دين سماوي يحكم بالحق و هو دين حق .. فما هي المشكله

ليس كل دين يحكم بالحق

وليست كل الاديان سماوية

[Willi]

الدين ليس موضوعنا .. هذا ما عنيته لانو هاد الشي يأتي لاحقا .. و هو شي فرعي .. يعني وقت العالم بتوصل
لتقبل فكره الدين بنتناقش اي دين .. لانو اي دين سماوي يحكم بالحق و هو دين حق .. فما هي المشكله

شلون الدين ليش موضوعنا
ليش شو النا عم نحكي من الصبح!!

طيب مو مشكلة اللي كان بدي وصلو من كلامي. انو اي انسان من ابناء الوطن شو ماكان دينو (حتى لو ما كان عندو دين, او حتى لو كان ما بأمن بالله كلو من اصلو). هو الو الحق بأنو يحكم هالبلد.
وهون مشكلة من مشاكل الدين بالدولة.
لانو طيب انو دين من الاديان بدنا نطبق للدولة؟؟

[ابومزيد]

كاتب النص الأصلي : Willi

طيب سؤال لو سمحتو.

مين الاحق بأنو يحكم بلادنا مثلا؟؟
يعني من انو دين لازم يكون, لتكون الو الاحقية بأنو يحكم هالبلاد؟

الدين الجديد اللي بيكون الضمير المنبثق من العقل السليم هو الحكم

[Willi]

عيني ربك عيني.

[krimbow]

لكن باوقات معينة الضمير والعقل بيفقد دورهم

لما بتفقد البشرية الضمير و العقل، ساعتها بتكون الحرب، و على مدى غياب الضمير و العقل بتزيد و بتنقص ضحايا و خسائر الحرب، و ساعتها لا رسول يشفع و لا نبي ينفع
يا حضرة
لما بيغيب العقل و الضمير، الدين بيفقد دورو، هي الاسرائيليين متدينين، و احد وصاياهم "لا تقتل"، و مع ذلك فاقدين الضمير و عم نشوف شو عم يعملوا...

لذلك كان لا بد من ثواب وعقاب محدد بالدين وربنا حدده بالاخرة هون لو كان الدين ثقافة و منهج بيحكم المجتمع و الدولة ملتزمة فيه اكيد مبدئ الثواب والعقاب راح يتغذى شعور الافراد باشيا عجز القانون الوضعي لهلاء انو يمنعها

اي شغلة الثواب و العقاب، هي موجودة من قبل ما يبلش الله يبعت انبياؤو ازا بدك (اذا باللهجة الشامية تقيلة، لذلك بكتبها ازا، متل مو ملاحظ اغلب كلامي بالعامي، بس بالعامية و الفصحى، يتواءم الهمزة ع السطر، اجمالا قواعد كتابة الهمزة غير معروفة و بحب نوه عليها كل ما سنحتلي فرصة، يعني بعكسك ... انا منطلق من النية الطيبة) من ايام حمورابي (على فكرة، حمورابي مش اول مين وضع الشرائع، بل هوي اول مين دونها، بس الشرائع كانت بتتواتر من قبل حمورابي بآلاف السنين) و الاشيا يللي عجز القانون الوضعي عن منعها اقل بكتيييييييييير من الاشيا يللي عجزت قوانين الله عن منعها

لذلك انا عم ببحث عن التفسير المنطقي والحقيقي للدين بدون ما يكون توجيه الدين لخدمة مصالح معينة
بس ما مستوعب شو بتقصد بكلمة على كيفكم

عم اقصد ...
شوف معلم، المقدمات الخاطئة تنتج بالضرورة اجابات خاطئة، و بالتالي التحدث عن امور ميتافيزيقية (غير مثبتة علميا) سيوصل بالتأكيد إلى عدة تفسيرات، و جميعها ستبدو منطقية لبعضنا
انت عم "تبحث" عن تفسير منطقي و حقيقي، لأنك لسا ما وجدتو، كيف عم تدافع عن شي ما عثرت على حقيقتو؟؟؟؟ او على الاقل على تفسير منطقي لحقيقتو؟؟؟؟

خيو، خليك عم "تبحث" ... لأ جد عم بحكي، بس بعقل منفتح على كل الاحتمالات، و خلي ببالك دايما انو العقل هوي الشرع الاعلى للانسان، و هالشي ما بيخالف ايمانك، لأنو حسب ايمانك الله هوي خالق العقل... انا كنت متلك، باحث عن الحقيقة.. و اسوأ شي ممكن يحصل معك انو تلاقي الحقيقة لأنو ساعتها رح ينتهي بحثك، لذلك، ادعي دايما لربك انك ما تلاقيها، صدقني معلم... ما في امتع من رحلة البحث عن الحقيقة، اوعى انك تنهيها

يلي عم يصير بالعراق صعب لكن يلي عم يصير بدول من دول العالم الاول اصعب بعتقد اني كتبت عن بعض مشاكلها بمشاركة سايقة وهيا من الدول التي تتغنى بانها علمانية

لا خيو
ما في اصعب من الاخ يقتل اخوه، ما في اصعب من الوضع بالعراق و فلسطين
صليلهم معلم، صليلهم بركي الله بيسمع منك

يرحم ترابك يا أمير "عبد القادر الجزائري"، لولا حكمتك كانت سوريا اليوم غرقانة بحمامات دم متل اللي عم تحصل بالعراق و فلسطين و متل ما حصل بلبنان

و الله يديم عقلاء هالبلد، ويبعت لاخواننا متلهم

عاشوا قبلنا كتير هون ببيت المقدس باعوا واشتروا وتزوجوا وعاشوا حياة كريمة في ظل دولة عادلة

عمر لما راح يستلم مفاتيح بيت المقدس كان يلبس ثوب مهترئ وقد تحدثت بعض الكتب عن ذلك الموقف وكيف اشار الصحابة عليه بان يلبس لباساً حسن ولكنه رفض الامر الذي اثار دهشة البطريرك الذي سلمه المفاتيح
فاذا كان خليفة المسلمين ثوبه مهترئ من اين ستاتي الاموال التي تتحدث عنها ؟؟؟؟؟؟؟؟؟؟؟؟؟؟؟؟

مين الناس يلي عم تقصدهم انظلموا
كريم ما بدنا نفوت بحوار تاريخي هلاء ونطلع عنه الموضوع خلينا بالقصة وبنعمل شي موضوع تاني عن الخلافة

يا باشا
يا باشا

لما ما بدك تفوت بحوار تاريخي.... ليش عم تستشهد بشواهد تاريخية مش متفقين على صحتها ؟؟؟

و اصلا انا برفض اني ناقشك بحوار تاريخي قبل ما تكون على الاقل قاري "تاريخ الطبري"

عموما بعيدا عن الحوار التاريخي، يا ريت (للمرة التانية عم اطلب هالطلب) انك تذكرلي العهد الذهبي يللي حكيت عنو اديش استمر؟؟؟ هاد تبع الدين الصحيح

اي تمام هيك كتير وهذا ما ادى لظهور اول اولاد العلمانية .......... العولمة

طولي بالك ... طولي بالك كتييير

شو رأيك بفكرة انو يسود الاسلام بالعالم كلو؟؟؟ فكرة منيحة مش هيك؟؟ بس هي اسمها يا كابتن عولمة

عموما معك خبر انو نحنا السوريين ... اسياد العولمة؟؟؟
العالم كلو بيمشي على الارقام يللي اخترعناها (اسمها الارقام العربية، بينما من كتر تخلفنا منسعتير ارقام من عند جيراننا الهنود و منكتب فيها.. )
اغلبو للعالم بيكتب بابجدية نحنا اخترعناها
و عند الفرح او الحزن بيتبع طقوس نحنا وضعناها
و بيحاكم نفسو بقوانين نحنا سنيناها
و بياكل و بيشرب من مأكولات و مشروبات نحنا تفننا فيها (النبيد و البيرة على سبيل المثال)
اكتر من مليون و ميتين الف اختراع .. ما زلنا منستعملهم لليوم، متل الدولاب و العربات، ...الخ، اخترعهم اجدادك

لك حتى الاديان، طلعت من بلادنا

حاج لهون لأنو العولمة مش موضوعنا و يا ريت ما تغير المحاور

وللاسف لن تجد احداً الان منهم ولا حتى منذ قرون

شو ؟؟؟؟
يا رجل، يا رجل، طالما مش رح لاقي واحد حتى لو رجعت لورا كزا قرن (كذا هيك بتنكتب بعرف، بس لذات السبب السابق كتبتها هيك) ع شو عم تناقشني؟

بدك ياني اتبع نظام بيعتمد على كاريزما لشخصية ... ما اجت منذ قرون خلت ؟؟؟؟

طيب على فرض انو وجدنا اليوم هالملهم ... شو بيضمنلي انو بس يموت يجي واحد تاني، و اللا بدك ياني استنى كمان قرون ليجي واحد تاني، و بهالوقت بيتمقطعوا هدول تبع المصلحة الشخصية يللي مو طايقهم حضرتك فينا ؟؟؟؟

والله يا معلم كيف ما عم ابرمها معك .. ما عم لاقي حل احسن من العلمانية، يعني صدقني انا حابب لاقي حل تاني، بس ما عم لاقي

على فكرة تشافيز متدين جدا جدا جدا
وانا اكن له كل الاحترام والتبجيل

اي صحي بس هوي بنفس الوقت ... علماني جدا جدا جدا، يعني ما بتصور انو عم يظلم المسلمين تبع فنزويللا

عموما احترامك و تبجيلك الو ناتجة عن صحوة ضميرك، بالدرجة الاولى
رغبتك بتحرير عقلك من قيودو بالدرجة التانية
و ناتجة عن عدالة و حكمة و شجاعة و عفة شافيز بالدرجة التالتة، و هي هيي الفضائل نفسها يللي قلت عنها انها بتودي للعولمة و ما عجبتك

المشكلة انو ابن العلمانية يلي هو العولمة راح يخلينا كلنا عبيد للسيد الغربي

ابدا، العلمانية تعتمد على العقلانية بقوة، و بالتالي بتعتمد على العلم، ليكو الدين ما حمانا من الاحتلال العثماني، و لا الانكلو فرنسي، و لا الاسرائيلي

و كما قال الشاعر:
العلم يبني بيوتا لا عماد لها = و الجهل يهدم بيوت العز و الكرم

ما قصدت صديقك بسؤالي انتا كنت تحكي عن الهين وفي اخر القصة دعيت الله يفك اسره سالتك اي واحد منهم عم تدعي بما انك تحدثت عن اثنين ؟؟؟؟؟؟؟؟؟؟؟؟؟؟؟؟؟؟؟

اتنين؟؟؟؟، قوي قلبك يا رجل، قول سبعة و سبعين و لا تخاف
عموما قصدت الاله القادر على فك اسرو هوي و رفقاتو، ببقى بعرفك عليه شي يوم... هوي التاني صاحبي

كثيرا ممن ذكرتهم دولاً تطبق الدين وليست علمانية الا بالمظهر

عفوا .. بس العلمانية مش متل الدين، ما الها مظهر و باطن، يا بتطبق يا ما بتطبق، مش انو منضحك ع بعضنا و منقول "طبقنا العلمانية"

اصلا العلمانية هيي مجموعة من الظواهر، كيف بدك يكون الها جوهر؟؟؟

العلمانية يا حبيبي هيي انو تتخذ القرارات و تنسن القوانين و التشريعات بناءا على حاجة المجتمع بغض النظر عن النصوص المقدسة ...
يعني لما اختاروا اللون الاحمر لحتى توقف عليه السيارات باشارات المرور .. ما اهتموا ازا هالشي "حلال او حرام"
و طالما انو هالقوانين ما الها قوة غير قوة التطبيق يللي بتقوم فيها الحكومة، و بالتالي ممكن تغييرها ازا (نفس الملاحظة) بيوم بطلت تخدم مصلحة المجتمع...
يعني بوكرا رح تصير السيارات تطير، اشارات المرور الحمرا ما عاد ممكن تنظم حركة السير، و بالتالي رح يحطوا انظمة جديدة بتتناسب مع الموقف، بغض النظر ازا الله و اوصياؤو علينا باركوا هالخطوة و اللا لعنوها.. عرفت عليي كيف؟

يكفيني هنا مثالاً ان بوش عندما يريد ان يقوم باحدى غزواته فان خطابه للامة لا يخلو من كلمة الرب امرني
مرجع ذلك انه يدرك ان الدين فقط هو من يجعل الناس تقتنع وتاتمر لما يريد

مشان هيك لازم نحارب هالظاهرة .. و نفهم العالم (حتى الاميركان) انو ما حدا ع راسو ريشة و آخر نبي عمل خير و ختملنا هالطاقة يللي بتجي منها الريح

بعتقد انو يلي عم تحكي عنه ممكن يصير سواء في ظل دولة علمانية او دولة دينية فاذا كانت الدولة العلمانية لن تطبق عليه الحد فان الارهاب كفيل ان يطبق عليه العقوبة والحمد لله الارهاب هاليومين منتشر بشكل كبير

الارهاب؟؟؟

يا سلام

اي لا عاد تقول انو الاسلام ما عم ينتشر بحد السيف لكان

بعدين الله تبع المسلمين هوي يللي بيهدي من يشاء .. مش اخوات الـذين تبع الارهاب

[امرأة من ورق]

كاتب النص الأصلي : The morning

الدين هو علاقه بين اثنين فقط العبد و ربه ... لكن لها تأثيرها على كل ما يدور حولنا من اشياء لان المعتقدات هي
دافع و اساس التعامل .. و التعامل بين البشر هو ما يحدد طبيعه حياه البشر فاذا انت تؤمن انو المجرم لازم ينال جزائه بدون الأخذ بالأسباب فانت ما عندك شي يردعك من انك تقوم تقتلو؟؟ و هون بيجي دور الدين .. يعني قيام دوله علمانيه مع شعب يعرف طريقه الى الايمان الصحيح بعقائد مبنيه على اسس صحيحه ليس مشكله انما المشكله هي عندما نبتدع اراء و افكار و اسماء لتبرر لنا افعالنا التي لا يقبلها الدين الذي هو منطق و اساس حياتي مهم..
أنا لست ضد العلمانيه عندما تصل الى اسمى حالاتها..
شكرا جميع

كيف يعني هون بيجي دور الدين؟؟؟ انا بشوف انو هون بيجي دور القانون الموجود واللي بيحكم بالدولة العلمانية
مابعرف ليش عم صرت شايفة باكتر من رد هون الغاء وجود اي سلطة بالدولة العلمانية وانو الامور رح تكون سايبة
اكيد حياتي بالدولة العلمانية في وجود لقانون رح يحكم وينظم امور العالم ورح يكون قانون يناسب كل افراد الشعب ومايفرق بين مسلم ومسيحي وغيرو من اديان