رحلة مع المعارضة الايرانية

[sona78]

دائما لما كنت اسمع انومعارضة ما لدولة ما عملت مؤتمر الها بشي محل من اوروبا او اي محل تاني كنت فعلا استغرب من وين قادرة انها تلم مؤيدين الها باعداد كبيرة, لحتى اجتني فرصة عايش انا شخصيا تجربة من هيدا النوع مع المعارضة الايرانية ( حركة مجاهدي خلق الايرانية ) . انا بدي وضح بالاول انو اكيد مو كل المعارضات اسلوبها واحد بالعمل وكمان انو ما الي موقف ابدا من هيدي الحركة لانو الاسم جديد عليي وما بعرف عنها معلومات وافية لا عن اهدافها ولا تاريخها بس حابة احكي عن مؤتمرها يلي عملتو حديثا بضواحي باريس .

هيدا يا شباب من فترة اتوزع بالجامعة يلي عم ادرس فيها بالمانيا اعلان انو المعارضة الايرانية عاملة رحلة ع باريس لمدة 4 أيام: يوم للسفر (ببولمان ), يومين نومة بفندق نجمة وحدة مع فطور وخلالون نحنا ما ملزمين ابدا بمنظم الرحلة وانما قادرين نتفسح بباريس ع كيف كيفنا والبولمان بيوصلنا كل يوم ع ساحة برج ايفل وبيرجع المسا حسب موعد محدد بيلمنا ويرجعنا ع الفندق. ورابع يوم لازم نحضر المؤتمر يلي عاملتو المعارضة وبعد المؤتمر برجعونا ع المانيا.وتكلفة الرحلة كاملة للطالب 30 يورو بس لكامل البرنامج . يعني هيدا المبلغ بلا مبالغة ما بكفي بالعادة اجور مواصلات بباريس .المهم كانت صراحة فرصة لا تعوض وسجلنا وطلع من المدينة يلي انا عايشة فيها يا شباب حوالي 11 باص كل باص بيساع 50 شخص !!!! وبلا اية مبالغة كان اكتر من تسع اعشارون من جنسيات اوروبية شرقية وغربية وطبعا كان العرب يعني حدث ولا حرج من جميعو !! انا من ناحيتي فعلا ما عرفت غير اتنين ايرانية من كل هالتجمع يمكن كان في اكتر بس ما ميزت غير شخصين واحد من منظمي الرحلة وبنت عم تدرس هونيك .
المهم يا شباب رحنا ع الرحلة وقضيا نهارين يعني من العمر .واجا يوم المؤتمر رحنا ويا شباب عن جد كان منظر لا يفوت انا عديت لحد 80 باص كانو صافين وكان ضالل بتوقع لسا اكتر بكتير ,غير طبعا السيارات الخصوصية و بلا مبالغة كل جنسيات الكرة الارضية كانو هونيك وخلال المؤتمر كان في سندويش وكوكاكولا وقناني مي للشرب يعني شي متل الكذب والناس عم تحمل بالكرتونات واللاكل ع الارض والكولا سايحة ومزوعة الدني ويعني الجماعة حاجزين مكان يعني ما فيي قول غير ضخم جدا جدا جدا بضواحي باريس. طبعا وزعوا ع الناس رايات واعلام وصور لمريم رجوي وزوجها وشعارات معظمها بالايراني ( يعني الاغلبية العظمة ما فهمانة شو مكتوب او مين يلي حاملة صورتو ) واجا يلي اجا من الشخصيات الاوروبية ع المؤتمر وألقوا كلمات شي ايراني شي فرنسي واجت مغنية غنت بالعربي لفيروز وللشيخ امام وهالعالم تصفق وتصفر من دون ما تفهم ع شو كل هالحماس ( يلي كانو قاعدين جنبنا كانو كانو يا تشيكية يا اوكرانية وكل ما شافونا عم ننسجم مع غنية ينسجمو معنا !!!!!!) بس صراحة كان الجو خانق كتير والدخان يعني شي بفطس فكيف اقدرنا هربنا من المؤتمر ما حدا بيعرف . وبعدين ارجعنا ع المانيا .
بعد هاللت والعجن بيجي السؤال ليش عم اكتب عن هيدا الموضوع .
قال يا شباب مبارح وانا عم اقرنا ع النت شفت اخبار مكتوبة عن هيدا المؤتمر وقال شو مأعلنين:
المعارضة الايرانية تنجع بحشد 70 الف من مؤيديها الايرانيين في الخارج!!!! هيك بالمشرمحي طلعنا نحنا وبقية العالم ايرانية و ما النا خبر. فعلا يا شباب اذا قلتلكون كان في 20 الف ايراني ممكن توصفوني بالمبالغة.
يعني لما قريت الخبر ما عرفت بدي اضحك ولا بدي اقرف . هلق هيك طالعت المعارضات بتجمع مؤيديها بهالارقام الهائلة؟؟؟؟؟؟ طيب وكيف بتمولها ؟؟ مو سؤال هيدا؟؟انا واثقة يلي انصرف ع هيدا المؤتمر ما بقل عن 2 مليون يورو اذا مو اكتر يعني لما منسمي هيك مؤتمر بانو مؤتمر معارضة بتوقع انو عم نسخف كتير من معنى هالكلمة , عم نفرغها من مضمونها لانو هيدا الكلام ضحك ع الناس يلي ما بتعرف كيف هالمؤتمر انعقد
زبدة الحديث لما بتسمعو عن انو شي (معارضة )عملت مؤتمر وحشدت كذا الف شخص اول سؤال لازم يخطر ع بالكون انو . بالله وقديش كان رسم الرحلة؟؟؟
ملاحظة : اذا صارت رحلة جديدة بشارك فيها ولا لأ؟؟؟

[yass]

مجاهدي خلق فصيل سياسي ايراني كان يساري بالزمانات.. ما بعرف هلأ شو صار فيه.. كان معارض لشاه ايران و كان ذو شعبية كبيرة نوعا ما بهديك الفترة.. تحالفو مع الخميني و شاركو بشكل فعال بالثورة (تحت وعود الحفاظ على الحقوق السياسية) و بعد نجاح الثورة صار نزاع بينهون و بين قيادة الثورة الاسلامية و على اثرها تحاكم عدد من قوادها و اعدم منهم كذا واحد.. فهربو الى العراق و عملو حكومة في المنفى ما حدا اعترف فيها.. شاركو بالحرب العراقية الايرانية مع صدام حسين و حتى بعد نهاية الحرب حافظو على معسكرات داخل العراق حتى سقوط العراق في يد الاميركان.. لكن كتير اضمحل نشاطهون و صار مقتصر على الجاليات الايرانية في أوربا تقريبا

الولايات المتحدة تصنفها كمنظمة ارهابية لكن الاتحاد الأوربي لأ

هاد اللي بعرفو عن هالمنظمة..

تحية

[sona78]

كاتب النص الأصلي : yass

الولايات المتحدة تصنفها كمنظمة ارهابية لكن الاتحاد الأوربي لأ

هاد اللي بعرفو عن هالمنظمة..

تحية

شكرا جدا ع الرد . بس حسب ما فهمت من المؤتمر انو بريطانيا كانت اعلنت سابقا انو هيدا التنظيم ارهابي اعتمادا على المعطيات الامريكية ويالتالي كل دول الاتحاد الاروبي تبنت هيدا القرار. بس مجددا اعتبرت بريطانيا انو قرارها كانت خاطئ وسحبتو وطالبت مريم رجوي بالمؤتمر دول الاتحاد الاوروبي انو كمان هيي لازم تسحب قرارها كونها اخدتو اعتمادا على قرار بريطانيا.
مع انو امريكا بتصنفها منظمة ارهابية بس حسب ما قريت بمواقع مختلفة انها كمان بتعطيها مساعدات مالية من شان مواجهتها مع النظام الايراني

[yass]

كاتب النص الأصلي : sona78

شكرا جدا ع الرد . بس حسب ما فهمت من المؤتمر انو بريطانيا كانت اعلنت سابقا انو هيدا التنظيم ارهابي اعتمادا على المعطيات الامريكية ويالتالي كل دول الاتحاد الاروبي تبنت هيدا القرار. بس مجددا اعتبرت بريطانيا انو قرارها كانت خاطئ وسحبتو وطالبت مريم رجوي بالمؤتمر دول الاتحاد الاوروبي انو كمان هيي لازم تسحب قرارها كونها اخدتو اعتمادا على قرار بريطانيا.
مع انو امريكا بتصنفها منظمة ارهابية بس حسب ما قريت بمواقع مختلفة انها كمان بتعطيها مساعدات مالية من شان مواجهتها مع النظام الايراني

التصنيف البريطاني للمنظمات مختلف عن أوربا (متل ما بتعرفي بريطانيا كتير غيورة ع مجموعة خصوصيات و هي بالاتحاد الأوربي هيك بس عالريحة) .. يعني مثلا حزب الله لا يعتبر حزب ارهابي بتصنيف الاتحاد الأوربي , لكن ببريطانيا جناحو العسكري (هون يعتبرو جناح عسكري الشخصيات العسكرية بالحزب) يعتبر منظمة ارهابية بينما المؤسسات الخيرية و الصحية و الاجتماعية لحزب الله لا

أما دعم الولايات المتحدة لمجاهدي خلق فما عندي معلومات عن هالشي و بصراحة استبعد هالأمر, و الاتهام بتلقي الدعم من الولايات المتحدة هي تهمة جاهزة لكن معارض لنظام شرق أوسطي معادي لأمريكا. لكن ما فيني اجزم هالشي طبعا .. كل شي جائز...

[souriana]

يعني مثلا حزب الله لا يعتبر حزب ارهابي بتصنيف الاتحاد الأوربي , لكن ببريطانيا جناحو العسكري (هون يعتبرو جناح عسكري الشخصيات العسكرية بالحزب) يعتبر منظمة ارهابية بينما المؤسسات الخيرية و الصحية و الاجتماعية لحزب الله لا

هاد قرار اتخذ مؤخرا من فترة بسيطة , وعدا عن ذلك ماكان في اي تصنيف ارهابي للحزب

[yass]

كاتب النص الأصلي : souriana

هاد قرار اتخذ مؤخرا من فترة بسيطة , وعدا عن ذلك ماكان في اي تصنيف ارهابي للحزب

مزبوط بس القصد انو هاد قرار بريطاني و ليس اتحادي.. بريطانيا بهالأمور ما تابعة للاتحاد الأوربي

[VivaSyria]

كاتب النص الأصلي : yass

أما دعم الولايات المتحدة لمجاهدي خلق فما عندي معلومات عن هالشي و بصراحة استبعد هالأمر, و الاتهام بتلقي الدعم من الولايات المتحدة هي تهمة جاهزة لكن معارض لنظام شرق أوسطي معادي لأمريكا. لكن ما فيني اجزم هالشي طبعا .. كل شي جائز...

هون بس حابب وضح انو حالة منظمة خلق حالة خاصة شوي.. بغض النظر عن توجهات المنظمة أو رأينا فيها.. بس هي منظمة مدعومة بشكل علني من الولايات المتحده و هون رح إورد بعض الأمثلة:

بعد سقوط نظام الرئيس السابق صدام حسين في العام 2003 وقع الجيش الأمريكي اتفاقا مع مجاهدي خلق التي احتفظت بقواعد لها على الأراضي العراقية. تفاصيل الخبر : على .France 24.com .

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

و للمعلومات منظمة مجاهدين خلق من سنة 2002 تحظى بمعونة سنوية من الإدارة الأمريكية 200 مليون دولار و هاد الشي أبداً مانو سري بل معلن و حتى المنظمة بتعلنو جهاراً.

[sona78]

كاتب النص الأصلي : yass

مزبوط بس القصد انو هاد قرار بريطاني و ليس اتحادي.. بريطانيا بهالأمور ما تابعة للاتحاد الأوربي

حسب معلوماتي انو اي دولة من دول الاتحاد الاوروبي بتعتبر منظمة ما ارهابية فهيدا بيسري ع كل الدول الاعضاء بالاتحاد . بريطانيا دولة فعالة بالاتحاد الاوروبي سياسيا ( شيل مشكلة اليورو مثلا ) . ع كل برجع باكد انو معلوماتي غير موثقة وانا قريت جزء منها من موقع الحركة ع النت .

من ناحية انو تلقي اموال من امربكا صايرة تهمة لكل معارضة ما بعرف صراحة شو ممكن قول للاسف بعرف معارضين كتار بلاقو انو الحل الامثل حاليا هو الدعم الاميركي يلي احيانا بيجي بغطاء اوروبي وفي منون بدافع بشراسة عن هالشغلة تو يعني : لكن كيف بدنا نشتغل ونعمل مؤتمرات!!!!!!. يعني الاتهام بمس كتار من يلي بسمو حالهون معارضين ( اكيد مو الكل .. ع الاقل انا ما عم يوصلني شي )

[yass]

حسب معلوماتي انو اي دولة من دول الاتحاد الاوروبي بتعتبر منظمة ما ارهابية فهيدا بيسري ع كل الدول الاعضاء بالاتحاد

عفوا هاد الكلام مانو صحيح... لحتى يتم اعتبار منظمة ارهابية لازم يتم تصديق القرار بالبرلمان الأوربي ببروكسل و يكون قرار اتحادي... عدا ذلك الدول الموقعة على اتفاقية ماستريتشت ملتزمة بهالشي (و بريطانيا مانها موقعة الا على شغلات نقطية بهالاتفاقية..)

و بريطانيا وضعها خاص جدا بالاتحاد الأوربي.. دول الاتحاد الأوربي موقعة اتفاقية توحيد السياسة الخارجية بممثل اتحادي و بريطانيا لأ.. الها تمثيلها الخاص.. و حتى اقتصاديا. عدا انو ما قبلت تدخل اليورو فقرار البنك المركزي الأوربي (اللي يقرر قيمة الفوائد و كل هالأمور بكل الاتحاد) لا تسري على بريطانيا... هنن اعضاء هيك فخريين الا شوي و عندون خصوصيات سياسية و اقتصادية ما بدهون حدا يلمسها