كيف ممكن يصير حوار؟؟

[ري مي]

فعلاً أنك نبيهة

يي شو عرفك باسمي
...
...
طلعت عن الموضوع sorry

[butterfly]

كاتب النص الأصلي : كهربجي مثقف

بالمنطق الإيمان بشريعة الله بيحدّ العقل لأنو شريعة الرب لا تقبل النقاش... يعني فيكي تناقشي تحريم الزنى تبع المسيح؟؟؟ نفس الشي مو ممكن المسلم يناقش أشياء دينية بتتدخل بحياتنا اليوميّة متل حريّة المرأة اللي حكيت فيها قبل...

منطالب المؤمن ما يحكم عالملحد أنو كافر ويحترم فكرو .. بالمقابل الملحد بيشوف حالو بيفكر أكتر أنت عندك احكام مسبقة ... وأنا المفروض عليي أني أقبلا وما احكم عليك
مين قلك ما فيني ناقش بتحريم الزنى تبع المسيح لعيونك وللصبح ( بس مو بهالموضوع
المشكلة طول ما أنت حاسس انك أفضل وأنو المؤمن مانو ند لألك ... بتبدا المشكلة من عندك بغض النظر عن المؤمن اللي قدامك يعني من قبل ما يفتح تمو أنت حاكم عليو بالمحدودية ؟؟؟ معناتا مستحيل تتناقشو

[كهربجي]

كاتب النص الأصلي : butterfly

أحلى شي بمشاركتي الوردة يا زلمي
كل هالحكي ما حلو بس الوردة يعني
العالم اللي أنا عايشة فيو !!! لك انا عايشة بسورية أنا ما عم عيش تماما متل ما كتبت ... عم حاول ... وما عم يكون سهل
الأسهل أنك تحكم عالناس
المؤمن متشدد
والملحد منفتح
المسلم ما بيتحاور
المسيحي أخد الحرية مياعة
كتير سهل نطلق الأحكام الجاهزة عالأخرين
المهم نضل عم نحاول ( وما بدي حطلك وردة مشان يكون في شي تاني حلو بردي غير الوردة )

أنا ما حكيت شي مسبق أبداً وأنت بتعرفي تمام أنّي ما بفكر هيك..

ليكني أنا اليساري عم قول أنّو في كتير شيوعيين جحاااش ومتعصبين.. الفكرة هي أنّو الناس مو متل بعضها والمؤمن محدود تفكيرو.. أنا عطيتك دليل ومثال ناقشيني بشي متلو.. مو بحكي أحلام

و ع راسي ماروووو

الوردة كمان أحلي شي

[كهربجي]

ما في داعي عيد الحكي مرتين.. ليكني ردّيت بس على هداك.. ما كنت شايف هاد لسّا..

[وائل 76]

كاتب النص الأصلي : كهربجي مثقف

أول شي شكراً كتير ع مشاركتك وائل... في شغلة كتييييييير مهمة..

ألا وهي أنّو أنا ما اعتبرت المؤمن كائن غريب الأطوار.. أبداً... يا أخي ممكن الواحد يكون شيوعي ومع هيك مو ممكن محاورتو لأنو مؤمن متدين بس بالستالينية مثلاً... يعني عامل ماركس الله.. وهو ما عاد بيصير شيوعي بالمناسبة.. وعلى هالنسق ممكن تقيس

بس المؤمن بالإسلام (مثلاً) صعب كتير تحاوروا بحرّيّة المرأة الكااااملة لأن (الرجال قوامون على النساء) هذا حكي قرآن أي بالنسبة للمسلم هو حكي سماوي.. أي أنّه غير قابل للتغيير لأنه منزل من عند الله (صححلي إذا غلطان بهي كمان)... يعني بالمحصلة المرجعية الدينية هي مرجعية بتأدي لدخول الفكر بإطار النسق المغلق اللي ما عاد يطلع منّو


هلق كيف ممكن يصير حوار؟؟ لمّا بيقتنع المؤمن أنّو مو شغلتو يفرض شرع الله على الأرض.. ممكن وقتها يكون في معنى للحوار.. ممكن نحكي عن كل شي بعيد عن الدين.. حتى الفن أو الجنس أو كرة القدم يا زلمة...

لو انا بعتبرك من هاي العالم ما ممكن شاركك هون انا بحكي بشكل عام كهربجي
بتمنى انك تقرا ما بين السطور
هلاء الفكرة الاساسية انو نحنا كلنا عم ننطلق من تغييب الاخر تركنا كل شي ممكن نتحاور فيه ونلاقي قواسم مشتركة تجمعنا ورحنا على المواضيع يلي ما ممكن نلاقي فيها حل وسط لذلك اكيد راح تزيد فرقتنا فرقة
هلاء انا مازلت مصر انو المؤمن عم ينطلق من عقله متل الملحد والفرق بين التنين هو بالنتائج يلي وصل الها العقل المؤمن عقله وصله للايمان والملحد عقله وصله للالحاد
لو بدنا نتحاور بشكل منظم وهادف ممكن نتجاوز كل العالم يلي بتحاول تضفي تسلطها وتغيبها للاخر اثناء الحوار

متل ما قالت بيتر فلاي وهيا جابة الخلاصة كلنا مختلفين ويجب ان تجمعنا انسانيتنا وان ننطلق من كونا بشر يجب ان نكون مختلفين وان نقبل اختلافاتنا ونقفز ونتجاوز كل شي بيفرقنا لنصل لقواسم مشتركة
من هون بعتقد انو طرح مواضيع فيها اقصى التطرف ما راح تزيدنا غير فرقة اكثر من ذلك
بس

[كهربجي]

بس يا وائل يا عيوني المشكلة أنّو يجب ويجب...

لسّا منقول لازم يصير هيك ولازم يصير هيك.. أكيد يمكن أنا وأنت تحاورنا.. أنا عم بعمل هاد الشي مع كتير متدينين بس مو معقول قديش نسبة التجاوب صغييييييييييرة

بعدين من وين لوين بالعقل.. معليش يا وائل أنت أكيد مؤمن عن عقل وكمان مارو بس من وين لوين ممكن تعمم؟؟

الدين كلّو بالبلد هون مورّث.. غير مدروس و متعصب.. ومشان ما أطلع عم عمّم مو الكل.. الأغلبية

وهي إلك و إلها

[butterfly]

كاتب النص الأصلي : كهربجي مثقف

بعدين من وين لوين بالعقل.. معليش يا وائل أنت أكيد مؤمن عن عقل وكمان مارو بس من وين لوين ممكن تعمم؟؟

الدين كلّو بالبلد هون مورّث.. غير مدروس و متعصب.. ومشان ما أطلع عم عمّم مو الكل.. الأغلبية

وهي إلك و إلها

وأغلبية الملحدين موضة ...
هيك بدو يصير النقاش
وأغلبية البنات سطحيات
وأغلبية اليهود شريرين
وأغلبية العرب متخلفين
لك نحنا دابحتنا الأغلبية بتخلينا نعمل كاتالوج متل كاتالوج الدهان
مؤمن ( رقم 22336 ... المواصفات التقنية والتعبوية : يمزج مع قليل من العقل وكثير من المنطقية لأنو متشدد ومحدود ... )
الناس أكبر من التصانيف

[suryoyo]

يا شباب

يوجد صنف من بين المؤمنين بين الملحدين

الملحدين الجدد الذين يؤمنون بوجود الله بس ما يريدون اي تقييد على الحرية

انا اشوف هذول يمثلون شريحة كبيرة من الناس

[ري مي]

مؤمن ( رقم 22336 ... المواصفات التقنية والتعبوية : يمزج مع قليل من العقل وكثير من المنطقية لأنو متشدد ومحدود ... )

..........

[وائل 76]

كاتب النص الأصلي : كهربجي مثقف

بعدين من وين لوين بالعقل.. معليش يا وائل أنت أكيد مؤمن عن عقل وكمان مارو بس من وين لوين ممكن تعمم؟؟



وهي إلك و إلها

متل ما انا بتجاوز العالم يلي ماسكا الالحاد من ديله وعم تستعرض مواهبها بالكفر بدون ادنى عقل او منطق في تفكيرها وتوجهها
يجب عليك ان تتجاوز المؤمن الذي يغيبك ويعتبرك استثناء على الاصل او القاعدة

هون ممكن نوصل لشي مشترك مبدئيا وبعدها بنقدر نناقش كتير اشيا بنعجز عنها هلاء

ما زلت مصر ومتفق مع بيترفلاي في فكرتها
لو كان الاغلبية متل ما عم تحكي انتا فلتسعى لتغيير فكرة الاغلبية ولتناضل من اجل عقيدتك التي تعتنقها مثلما انا اناضل من اجل عقيدتي التي مقتنع بها
لنتجاوز كل ما تتحدث عنه وننطلق من كوننا بشر نحمل في جماجمنا عقولاً هي من اوصلتنا لقناعاتنا


وهاي 392 وردة الك ولبيترفلاي و لري مي كمان اعطوها شوي

[hanny dagher]

تسجيل متابعة عجبني الموضوع بس صير بالبيت رح اقرا الردود

[suryoyo]

الدين لا يدعو الى التشدد

و الدين يميز بين الفكر

مو يعني ممنوع التفكير........

بس ما معقولة كل واحد تجي فكرة على باله يروح يعملها يبررها باسم الحرية في الدين او الحياة او الالحاد !

[the hunter]

الحوااااااااار يكون باحترام وتبادل وجهات النظر ........ وشكرا على الموضوع

[ليندا]

ابيض -اسود
ويستمر المسلسل
باختصار
الدين
يؤمن بالحوار ومدّ جسور التعاون مع أتباع الديّانات الأخرى ويؤمن باحترام المقدسات الدينية دون تمييز حتى مع الملحدين
هذا ماتعلمناه ......الجميع دون استثناء

[LaDyInReD]

اول شي بهنيك على موضوعك الرائع والبالغ في الاهمية خاصة واننا نرى وضع اخوية المتدهور من هذه الناحية.

الحوارات تتعدد بتعدد أغراضها؛ فمنها ما يكون هدف المحاور إقناع الآخر بأن اعتقاده أو رأيه أو موقفه هو الأحق بأن يتبع، ومنها ما يكون هدفه مجرد معرفة ما عنده؛ كي لا يكون هنالك سوء تفاهم بأن يَنسب إليه ما لا يرى أو يعتقد، ومنها ما يكون الغرض منه إمكانية الوصول إلى آراء أو أهداف مشتركة تساعد على التعايش والتعاون، وهكذا.

وكذلك فان لكل انسان قناعاته ومبادئه..ولا بد ان نرى في اي نقاش مبادىء واراء مختلفة فاذا كان النقاش على امور دينية فلا نستطيع ان نضع جانبا التصنيف مؤمن وملحد لان الصدع بينهما غير قابل للرأب فيما يتعلق بأمور السماء وكل من الطرفين يعطي ال MAX الذي عنده ليقنع الذين حوله ان رأيه هو الرأي الصواب واحيانا يلجئ لطرق غير اخلاقية ايضا.فاما للطرف الاخر ان يتقبل هذه المبادئ واما ان يباشر هو كذلك في النقاش بهذه الطريقة..

ما اريد ان اصل له هو ان الشيء يتعلق بنوع الحوار..فاذا كان لا يخص مسألة الايمان ويتعلق بامور الارض اكثر منها من الامور السماوية فان الحوار سيتطور بالشكل السليم طبعا دون تدخيل مسألة الايمان بالله لانه يمكن ان يكون هناك اختلاف في الافكار في امور الارض حتى بين ابناء الفئة الواحدة ( مؤمن او ملحد) لذلك لا يمكن تقسيم الفئات لملحد ومؤمن في امور الارض والحضارة والمجتمع .

[chefadi]

كاتب النص الأصلي : butterfly

كمان .. الحوار بحاجة لانفتاح .. يعني أنا مؤمنة وأعشق المسيح عشق ... بس فيني أتقبل أنو فادي واللي هوي من أعز صحابي ملحد والمسيح ما بيعنيلو .

و انا فيني أتقبل

كاتب النص الأصلي : butterfly

وأغلبية الملحدين موضة ...
هيك بدو يصير النقاش
وأغلبية البنات سطحيات
وأغلبية اليهود شريرين
وأغلبية العرب متخلفين
الناس أكبر من التصانيف

مرسيل انا بوافقك انو الناس اكبر من كل التصنيفات بس بالنهاية في ذهنية معينة ممكن تستشفي من خلالها توجهات البشر ,,, بس اكيد مانها منظار لأصدار احكام مطلقة (وهي الاغلبية ما اجت من ضباب )
و انطلاقا من هي النتيجة لما متدين مايكون متعصب (بحوارو و أفكارو ) بيكون هون الشذوذ عن القاعدة و لما بيكون في شيوعي جحش و متعصب (متل ماقال الكهربجي ) بيكون كمان هو الشذوذ عن العام ,,,
بس انتبهو ,,,, انا ماعم قول انو مو موجود هادي الاستثناء ,,, موجودة و بكثرة بس بتضل استثناءات ...

كاتب النص الأصلي : كهربجي مثقف

بالمنطق الإيمان بشريعة الله بيحدّ العقل لأنو شريعة الرب لا تقبل النقاش...

هاد كلام سليم و بحب ضيف ,,,, حتى لو كانت تقبل النقاش فهو حصرا داخل الغرف المغلقة على أصحابها

حياكم جميعا ............

[مسطول على طول]

موضوع حلو كهربجي مثقف .... بس وين الحل ؟ انا شايف موضوع سياسي هيك انا شايف

انا برآيي المتواضع انه الديموقراطيه وقبول الرآي والرآي الآخر مهما كان من اقصا اليمين الى اقصا اليسار

وانا ضد الفكر الاستئصالي او الاصولي من آي تيار كان فليكن ان كان على مبدء الاسلاميين او الشيوعيين

وانا مع الديموقراطيه للعظم

الفكره الديموقراطيه تعني ان نسمح للجميع بحرية التعبير والنزول للشارع والاعتصام و. و. الخ..

وبس نقبل كلنا ببعض ونحترم بعض بغض النظر عن المعتقد الفكري والعقائدي من هنا ممكن ان نبداء اما كل هل الحوار هو حوار الطرشان

ولو افترضنا او سلمنا جدلاً انه كان في تعدديه وديموقراطيه ووصل احد الاحزاب للسلطه بانتخاب الشعب ... الفكر الديموقراطي الذي سمح بالتعدديه هو سيكون بمثابة قدوه وهم لايستطيعون الا ان يحترموه

ولكن عليه ايضاً ان يكون قد حضر برنامج وقوانين لايستطيع آي حزب آخران يستئثروا بالحكم و ان وجدوا فرصه وان يضع لهم خطوط حمر في صلب الدستور غير قابله للتغير الاباغلبيه توافقيه حزبيه او برلمانيه او شعبيه

وعند وصولهم للحكم المعارضه ستفند اخطاء ذالك الحزب امام الشارع وعلى مرئا الشعب الخ...

وهنا وبعد وصولهم للحكم سنرى تجربتهم ان نجحوا اهلاً وسهلاً وان فشلوا الشعب سيرمي بهم ويستبدلهم لانو حاجه بقا مابدنا هيك برنامج

وهنن سيتعلموا من رآي وحكم الشعب وسيراجعوا انفسهم ويعدلوا من برنامجهم وهنا نكون بدئنا ببناء الدوله الديموقراطيه (حكم الشعب)

بالنهايه الاستئصال لن يفيد احد وسنظل بهذه الدوامه الى مالانهايه .والديموقراطيه هيه الحل وخود مثل من اكثر الحركات تشدداً في العالم ( القاعده )

خليك معي

هلاء لوكان في ديموقراطيه وحريه بالسعوديه مثلاً ماكان تأسس تنظيم القاعده من الاساس ..هلاء .بن لادن وهو بطل العالم في الطميمه هو في نظر البعض بطل وبنظر الآخريين آرهابي متوحش .. بس شوقصته لعمو بن لادن لح نحاول نختصر

مالح نروح على افغانستان واذا بدك روح انته : للأختصار زلمه عاد للسعوديه بعد خروج الاتحاد السوفيتي من افغانستان

وبعد حرب الخليج الثانيه(احتلال الكويت) زلمه نبعص من وجود 350 الف من جنود امريكا وحلف الاطلسي ببلده فقام واصدر صحيفه اسمها الاصلاح والارشاد

انتقد فيها وجماعة آل سعود نبعصو كمان سكرولوياها (بلا معنا) بعد فتره سافر على السودان وهوه مهندس ورجل اعمال فتح شركه زراعيه وشركة تعهدات الخ..

بس رجع اصدر نفس الصحيفه بالسودان وصار ينتقد آل سعود بالاسماء ويكبر على الامريكان بلاطول سيره قلعوا من السودان وصادرولوا املاكه

طيب هاد زلمه عنده جماعه متشتته بالعالم كله مهم راح سافر لباكستان وبعدا راح على افغانستان وهوه عرفان انه العوده للسعوديه لن تفيده

دعاه الدكتور المسعري المعارض الشهير في بريطانيا ان يأتي لهناك رفض لانه صوته لن يصل ولن يحدث تغير

بعد فتره اعلن تأسيس تنظيم القاعده وهدد امريكا وبريطانيا بشن هجمات وبلشت سلسلة الانفجارات الخبر ونيروبي ودار السلام

حتى وصل لنيورك وهي العراق وافغانستان متل مو شايفين

المهم لو هل ابن لادن سمح له بحقه بالتعبير او انشاء حزب يعبر عن رآيه لما وصل الى المغارات

المهم الديموقراطيه هيه الحل والفكر الديموقراطي وحرية التعبير حل لكل شيىء في محيطنا العربي

يلي عاوز شيوعيين يجيب ويلي عاوز اسلاميين يجيب ويلي عاوز ديموقراطيين يجيب ويلي عاوز عمال يجيب

ويلي عاوز خرارايه يجيب كل واحد خرارايه ...........

حدا فهم الغايه والعبره من مسيو بن لادن ؟؟؟؟

[ابو صخر بفش اهر]

مسطول ؛؛كلامك في وجهة نظر بس في بعض اسلاميين رافضين يدخلوا انتخابات برلمانيه اصلاً وبكتير دول عربيه ممكن يصل اسلاميين للحكم وشفنا شو صار بالديموقراطيه بالجزائر وانه اسلاميين فازوا وبنسبه اكتر من 90% وباعتراف مراقبيين اروربيين والغية الانتخابات وشفنا شو صار وهي جبهه الانقاذ منحله والشيوعيين واليساريين بالجيش هنن كان الهم دور كبير بالغاء الانتخابات يعني هل تيارين متل نار والبارود صعب نجمع بيناتهم ولتنين بنظر الديموقراطيين والفكر الديموقراطي بيعتبر طرفين متطرفيين والديموقراطيين مالح يقبلوا فيهم