ايطاليا: الوزير كالديرولي يهدد بطرد المسلمين في اول تصريح له

[yass]

كاتب النص الأصلي : Donald Duck

اكيد في اوروبا في المتعصبين والمعتدلين ..

وانا ما صورت انو كل اوروبا متعصبين ..

بعرف انو في اوروبا في ناس معتدلين كثير ..

خصوصا انو في عائلة اسبانية عاشت ببلدي .. وابنهم كان من اعز اصدقائي ..

في كل انحاء العالم في التعصب وفي المعتدل ..

ما قصدي عليك انما عم احكي عن وسائل الاعلام اللي تنقل فقط أخبار العنصرية, مثل حالة هالخبر هاد عرفت كيف؟

[باشق مجروح]

باسبانيا في قانون صريح وواضح يمنع التمييز بالتعامل مهما كان السبب و مهما كان المسبب..و عقوبة موظف عام يثبت عليه انو عامل بتمييز عنصري أو ديني توصل للسجن و الطرد (صارت حالة من فترة انو شب برازيلي رفع دعوة على عنصرين بشركة حراسة خاصة لأنو قال انو ما خلوه يدخل على ديسكوتيك لأنو برازيلي... انحكمو 3 سنين و غرامة عشر آلاف كل واحد) و القانون عم يتطبّق جدا و في اهتمام بالغ من الحكومة الاسبانية انو يتطبق بحذافيرو, و كتير كتير مهووسين بهالناحية.

رائع جداً جد حلو كتير هالحكي.
هون للأسف كتير اماكن ممنوع دخول العرب عليها ( أكيد مو بشكل مباشر ) بس من خلال الـ face control وأكيد بما انو مشاكل العرب كتيرة فبيمنعو بشكل عام دخول العرب بمجرد رؤيتهون او قراءة الاسم ع البطاقة وهيك شغلات .. الي قصدتو انو هالشغلات ما اجت من عداء للدين بل من ممارسات اشخاص. يعني ما في شي اسمو حرب ضد الاسلام فقط بالفطرة.
رغم انو الدولة مانجة تراخيص لأحزاب وجمعيات اسلامية ومساجد ومؤسسات فوق ما تتخيل.
اما بالمطارات فأنا بسترجع الفيلم الي اضافو مرة جابرييل وكان عن امريكي حاول يعيش كمسلم 30 يوم كيف انو بمجرد ارتدائو اللباس الخاص تم تفتيشو أكتر من مرة وطلبو منو خلع الحذاء وتفريغ الشناتي وهيك امور وكان تعليقو : (( غريب أن يكون اللباس الدال على دين محدد سبب تمييز )).
لذلك التمييز موجود وسببو الاعمال التخريبة فقط وليس عنصرية ولدت مع الشعوب.

[yass]

هاي عالهامش بس ردا على دونالد داك بخصوص تيسير علوني..

قضية تيسير علوني هي الممثل الأكبر لكيف ممكن تزوّر قضية و تمشّيها حسب مصلحتك... الحكي بقصد فيه قناة الجزيرة طبعا

أول شي الزلمة مانو مسجون... محطوط بالاقامة الجبرية ببيتو ( فينو يطلع بدائرة قطرها خمس كيلومترات و بدو ينام ببيتو حصرا اذا ما عطوه موافقة بغير هالأمر, و حكمو 9 سنين و للاسباب المخففة صارو ستة و راحو منهون 3)

الزلمة ببساطة كان عندو علاقة بشلة ارهابيين (ما عندي مشكلة سميهون ارهابيين لأنو اللي عملوه هو الارهاب بعينو.. ) سوريين و منهم قائدهم واحد حلبي اسمو عماد الدين بركات جركس (المشهور باسم أبو الدحداح) و أبو الدحداح هاد و شلتو انمسكو قبل ما ينفذو عملية ضد عدة اهداف منها وزارة الخارجية و المحكمة الدستورية و كان بدهون يفجرو سكة قطار الآفي (هاد القطار السريع جدا اللي سرعتو فوق الـ300 كيلو بيربط بين مدريد و برشلونة) .. و تيسير علوني خلال فترة عملو كمراسل للجزيرة بافغانستان (تيسير مقيم باسبانيا و معو جنسية من أكثر من 25 سنة) ثبت ضدو تحويلات مالية لصالح هالناس من جهات مجهولة محوّلة ع حسابو البنكي هيك كوسيط و آخد و جايب مصاري و مستندات و شغلات كثيرة.. و محاكمتو كانت علنية بشكل كامل و هو أقر بهالشي و ما نفاه, و ما نفى علمو بانو كان في تحضيرات "لشيء ما", و بانو نقل مصاري و معلومات و اتصالات من و الى افغانستان و الى جهات ثالثة .. بحسن نية طبعا و مالو علاقة لكن مثل ما قال المدعي العام.. غلطة الشاطر بألف

هو قبل بالحكم و ما استئنفو (أصلا عائلتو ما كانو يحلمو بهيك حكم مخفف) و مع ذلك الجزيرة عملت زيطة و زفة على قصتو لأنو يهمها تطالع قضيتو و كأنو استهداف الها لما مشكلتو مالها علاقة بقناة الجزيرة انما جاية من علاقاتو الشخصية\

قلت من زمان بموضوع خاص عنو و برجع بقول... لو هالعملة عاملها ببلد عربي كان عفّن بالحبس


بالنسبة لباشق... الفيلم اللي تحكي عنو بأميركا.. و اعتقد الفوبيا بأميركا أكبر من أوربا بكتير... رغم انو ما بعرف لأنو ما رحت لهنيك... متل ما قلتلك أنا بعرف عن اسبانيا و قوانين اسبانيا و حرص حكومة اسبانيا الشديد جدا على هالمسألة كون يهم سياستهون الخارجية هالأمر.. بدهون يعملو محفل الأمم و علاقات مع دول شمال أفريقيا و معروفة توجهات ثاباتيرو بهالمجال

[Donald Duck]

صحيح كلامك ياس ..

بس خطر في بالي شغلة ..

انو الي بتعامل مع اسامة بن لادن او هيك ارهابين حسب تعبيرك .. وما بختلف معك بهذه النقطة ..

بكون مصيرة المحاكمة ..

بس في شغلة ..

كيف بتم تحديد الارهابي والغير ارهابي !!

لانو لو بدنا نيجي للحقيقة ..

شارون والي معه ما في انسان في العالم بقدر ينافسة على لقب ارهابي .. هذا اذا في عنده انسانية ..

وما في حدا بحاكمة وبحاكم الي معه ..

يعني القانون الدولي .. والقوانين في دول اوروبا .. كانها مربطة ..

[yass]

من فترة كم سنة.. من بعد دعوى رفعوها مجموعة فلسطينيين صار في تعديل للقانون البلجيكي بحيث يعطي المحاكم البلجيكية سلطة محاكمة جرائم الحرب.. من يومها مافي مسؤول اسرائيلي زار بلجيكا لأنو تهمة جريمة الحرب لا توقفها الحصانة الديبلوماسية و ممكن يتوقّف..

من فترة في واحد اسمو مدري شو ايتان (مسؤول بالشين بيت) ببريطانيا ما استرجى ينزل من الطيارة و رجع بنفس الطيارة ع اسرائيل لأنو كان في دعوى ضدو و كان راح يتوقف لو نازل ببريطانيا.

كتير ضباط عليهون دعاوي و ما فيهون يدخلو أوربا, و مو بس هيك... في زلمة هون بعرفو عمل حملة تواقيع و جمع مصاري و كل واحد فلسطيني تهجر من أرضو (هي جمعية من عرب الـ4 و رفعو دعاوي شخص شخص ضد الوكالة اليهودية و مافي مسؤول من الوكالة اليهودية راح يقدر يدخل اسبانيا بدون ما يتوقف للمحاكمة.. (عملو صفحة انترنت بس لاقيها بجيبها)

بعتقد باسرائيل معروفة هالقصة انو ضباط كبار و هيك غير ع أميركا ما بيسافرو, و حتى شارون بدون المنصب ما كان يسافر (لما تسافر بالمنصب عندك حصانة طبعا) و هاد جانب يجب استغلالو لأنو الدعوى تكلفك حق الطابع و ما تخسر شي.. و تزعجو في حال دخل البلد (طبعا بدك تعرف شخص بعينه و تعرف انو عمل هالشغلة)

شارون هلأ مثلا ما فيه يزور لا بلجيكا و لا اسبانيا و لا البرتغال و يمكن السويد لأنو في دعاوي انتهاك حقوق الانسان ضدو (دعوة اسبانيا رفعها بشكل جماعي 550 شخصية يسارية و جامعيين و اكاديميين برعاية الحزب الشيوعي الاسباني سنة 2002)

[Donald Duck]

صحيح كلامك ..

بس على الاغلب ما في محاكمة لهالناس .. يعني معروف وين همي .. وما في قانون دولي بحاكمهم ..

يعني لو بدنا نحسبهم انهم مثل اسامة بن لادن ..

انا ما بقول انو ما في جمعيات ومحاكم بتحاكم بعضهم ..

بس الي مربط العالم والحكومات والقوانين الدولية معروفة انها امريكا واللوبي الصهيوني من بعدها ..

على فكرة .. بيرس اليوم بترئس جمعية للسلام في اسرائيل .. وهو معروف تاريخة ..

بس شغلة وحدة حابب اذكرها .. انو الي قتلهم تنظيم القاعدة بكل العالم ..

ما بيجوا قد ربع الي قتلهم شارون لوحده ..

بس للاسف ما في مين يحاكم .. لانو معروف موازين القوى في العالم ..

[yass]

هلأ هون كمان بدك تحسب حساب عامل مهم... انو تاريخ شارون و ضحايا شارون مو معروفين لدى الرأي العام العالمي بالقدر اللي وصلو فيه ضحايا بن لادن الغربيين (لأنو لازم ما ننسى انو بن لادن و القاعدة ضحاياهم كأغلبية عظمى هم منا و فينا.. بالعراق و بغير العراق.. مو أول عملاتو برج التجارة)..

و في حركة شعبية بين الناس المتعاطفة مع الشعب الفلسطيني يحسب لها الحساب.. يعني لما حصار غزة أو أي شي يصير تصير مسيرات تضامن و صلوات بالكنايس و اعتصامات يجوز ما تشوف متلها بالدول العربية

بعدين لما بيشوفو الأوربيين حكام اسرائيل خوش بوش مع الحكام العرب (يعني يجي يقلك ليش عم تجي تطالب فيني لما ليكو يروح ع مصر و عالأردن و عالمغرب خوش بوش و حبايب... روح طالب حكامك بعدين تعا عاتبني..) شو بدك تحكيلو ؟

رحنا بعيد عن الموضوع كتير كأنو.. ما هيك؟

[Donald Duck]

صحيح ..

نرجع للموضوع ..

متاسفين مروى ..