على هامش نهائي الكوبا أميريكا... سمعة البرازيل حاليا

[fady juventus]

مباراة البرازيل و أوروغوي كانت تاني مرة بحياتي بتمنى إنو البرازيل تفوز فيها ، لأني عنجد حابب شوفن عم ينكسرو قدام سحرة التانغو.

هي البطولة يا شباب رح تكون الرصاصة الثانية في جسد سمعة البرازيل العالمية بعد الرصاصة الأولى بكأس العالم الأخيرة ، و رح تزيد بشكل كبير مشجعي التانغو بالعالم متل زادت شعبية الطليان بعد مونديال ألمانيا2006 ، وبعد شوي رح قول فكرتي بالموضوع.

التاريخ ما بيذكر إنو البرازيل حظظت بكتير مباريات و بطولات مؤخرا ، و لا إنو إيطاليا و إسبانيا و الأرجنتين إنظلمو بالتحكيم هون أو بضربات الترجيح هنيك ... التاريخ بيذكر إنو السامبا عندا 5 كؤوس عالم و الآزوري 4 و التانغو 2 ... و هي شغلة بتوقع إنو الأغلبية متفقين عليها.

أما وجهة نظري بالنسبة للأسباب و العوامل اللي بتحدد و بتشكل شعبية المنتخبات العالمية فبتتلخص بثلاث أجزاء و ببدأ من الأقل تأثيرا للأهم:
-الجزء الأول هوي ظهور لاعب مميز و مبدع بيلفت أنظار الجماهير بكل العالم إلو وبالتالي لفريقو.
-الجزء التاني ظهور لاعب مميز و يقود منتخبو لبطولة عالمية.
-الجزء التالت تحقيق منتخب معين إنجازات و بطولات متكررة وبفترات زمنية متقاربة.

هلأ بكل وقت من الأوقات فينا نقسم متابعي كرة القدم إلى :
-فئة عريقة كرويا وهدول بيكون عندن فريق مفضل و أمرن محسوم وغالبا بيضلو يشجعوه طول عمرن.
-فئة عريقة كرويا بس محايدة وبيهمها تشوف لعبة حلوة.
-فئة خام ... و هيي فئة حديثة العهد بمتابعة اللعبة إما لأنن صغار بالعمر"يعني يافعين".. أو هني كبار بس تعلقو بكرة القدم بوقت متأخر لأسباب مختلفة أهما التأثر الإيجابي بمتابعة الناس اللي حواليهن للعبة والإعلام الرياضي المتنامي.

الفئة التالتة والأخيرة هي الأكبر بين الفئات و بنفس الوقت هي الأشد تأثرا بمحيطها لأنها خام وسهلة الإنقياد تشجيعيا لجهة معينة ، مثلا شخص مشجع مر لفريق معين بتلاقي إبنو بيتأثر فيه وبيصير يشجع نفس الفريق ويمكن يتحمس أكتر منو كمان ، وراحت وراثة!!

هلأ رح قول وجهة نظري بالنسبة لشعبية البرازيل تبعا للأجراء التلاتة من العوامل اللي ذكرتها بالبداية ...
البرازيل شعبيتها مبنية عالأجزاء التلاتة مع بعض ، لأنو بكتير مراحل كان عندا نجوم مميزين بعضن مر بهدوء وما عمل شي ، و بعضن حقق بطولة أو أكتر ، و الأهم إنها مرت بمرحلتين ذهبيتين الأولى بين 1958 و 1970 بقيادة بيليه والتانية بين 1994 و 2002 ، بغض النظر عن أحقيتها بهالبطولات اللي شاف جيلنا الأواخر منن واللي بتوقع كتيرين بيوافقوني إنو ما كانت الأحق بالفوز فيها.
وسبب كون البرازيل واسعة الشعبية حتى لما كان عندا 3 كؤوس عالم بالتساوي مع الطليان و الألمان لحد سنة 1994 فبتوقع إنو هوي الفترة الذهبية الأولى للبرازيل بقيادة بيليه و اللي ترافقت بدايتها مع ظهور التلفزيون و ترافقت نهايتها مع إنتشارو الواسع بالبيوت بدرجات متفاوتة حسب الدولة ، مشان هيك كتيرين بيستغربو و بيستهجنو تسمية بيليه كأفضل لاعب بالقرن الماضي بالتساوي مع الأسطورة مارادونا وخصوصا لما منشوف أهداف بيليه البسيطة على دفاعات ساذجة وأهداف مارادونا الخارقة و اللي بتتضمن فنيات هائلة ! بس القصة إنو في أكتر من جيل و مع بداية مشاهدتو للعبة كرة القدم عالتلفزيون شاف لاعب مميز(بوقتو) وعم يقود فريقو للفوز ب 3 من 4 بطولات متتالية ويحتفظ بكأس جول ريميه للأبد كونو أول فريق بيفوز بالكأس 3مرات.

منجي للأرجنتين و اللي تأخرت كتير لحتى ظهرت عالساحة العالمية ، و إبتدى عصرها الذهبي على دور ماريو كيمبيس سنة 1978 واستمرت حتى 1990 مع نجم النجوم دييغو مارادونا ، وفينا نقول إنو شعبيتها ترسخت بالتمانينات و استمرت بالتصاعد حتى إيامنا الحالية اللي عم تشهد ثورة إنتاج ضخمة لمصنع النجوم الأرجنتيني و اللي أخيرا أنتج خليفة حقيقية لمارادونا وهو ليونيل ميسي .. مشان هيك بتوقع نمو الشعبية الأرجنتينية لتتفوق على البرازيلية ياللي صارت عاجزة عن تحقيق الأداء و النتيجة بعكس الأرجنتين ياللي جمعتن سويا بكل مبارياتها الأخيرة.

أهم شي ما ننسى إنو نحنا لسى ما وصلنا ل 100 سنة من عمر المنافسات العالمية بكرة القدم وكل شي ممكن.

آسف لأني طولت كتير .. يمكن عندي ضعف بالتعبير على إعتبار إنو البلاغة في الإيجاز ، و يمكن لأني حبيت فصل فكرتي لحتى توصل بوضوح.

[super messi]

يا عيني عالفهمان

[الغالي جورج]

الكأس سيرفعه البرازيل إنشاء الله