جرائم "شرف العائلة"...

[sandra]

القتل هو القتل مهما كانت الأسباب
وإذا كان متل ما قال البعض أنو نحن شعب عاطفي ومعروفيني بعصبيتنا فهاد أبداً مو مبرر لهالجرائم
بكل بساطة لما الواحد بيعرف أنو اذا قتل أختو مشان الاستشراف (كلمة شرف مو زابطة) ومارح يتعاقب عقاب قاسي فبيقتلها وبيصير حامي شرف الوطن
اما لما بيعرف أنو في عقاب صارم وقاسي بانتظارو لأنها جريمة قتل بالنهاية
فهون رح يعد للمية قبل ما يقتل ويستشرف علينا

[Donald Duck]

كل من يقتل هو مجرم .. باستثناء حالة " الدفاع عن النفس " ..

بس يعني خطر على بالي سؤال .. ليش في مجتمعنا ما بحاسبوا الشباب على اخطائهم ..!!!

[sandra]

كاتب النص الأصلي : Donald Duck

كل من يقتل هو مجرم .. باستثناء حالة " الدفاع عن النفس " ..

بس يعني خطر على بالي سؤال .. ليش في مجتمعنا ما بحاسبوا الشباب على اخطائهم ..!!!

لأنو مجتمع ذكوري وقيمة المراة فيو أقل من الرجل
فطبيعي أخطائها تكون أعظم

[Marooshe]

كاتب النص الأصلي : sandra

القتل هو القتل مهما كانت الأسباب
وإذا كان متل ما قال البعض أنو نحن شعب عاطفي ومعروفيني بعصبيتنا فهاد أبداً مو مبرر لهالجرائم
بكل بساطة لما الواحد بيعرف أنو اذا قتل أختو مشان الاستشراف (كلمة شرف مو زابطة) ومارح يتعاقب عقاب قاسي فبيقتلها وبيصير حامي شرف الوطن
اما لما بيعرف أنو في عقاب صارم وقاسي بانتظارو لأنها جريمة قتل بالنهاية
فهون رح يعد للمية قبل ما يقتل ويستشرف علينا

يعني بالنهاية المسؤولية الكبيرة بتقع على الدولة ودورها في توعية المجتمع...والسؤال ازا احنا منقدر نعمل شي هون...وشو بالزبط دورنا كمجتمع مدني من هيك قضايا...

[عطر البرتقال]

كاتب النص الأصلي : marwa hanna

عطر البرتقال: افرضي.. انو في بنت وحسب قولتك "غلطت" وسلمت جسدها (واسمحيلي ما بقدر قول سلمت شرفها) لشب بتحبو وعن قناعة ذاتية انو الجنس جزء لا يتجزء من حياتها العاطفية... واهلها بيشوفو هشي طبعا غلط...
كيف ممكن انهن يصلحو هاد الغلط برأيك؟؟؟ بانهن يقتلوها مثلا!!!

انا ما بدي اتناقش بشو هيي الحالات يلي فيها البنت بتفقد شرفها... لانو قلت انو "الشرف" هوي مفهوم بيختلف من انسان لآخر...
بس الشي المهم يلي بدي ناقشو هوي الجريمة... شو مبرر هاي الجريمة... وهل في الها اي مبرر؟؟؟
معقولة نضل ساكتين والنساء عم تنقتل لاتفة الاسباب... ويلي في بعض ناس ممكن يشوفو البنلون بيمس بشرفهن ويقتلو البنت مشان لبستو...
القصة قصة مبدأ يا جماعة...
انتو بتوافقو ولا بتعارضو؟؟؟
شفتو قانون العقوبات... حسب رايكو منصف؟؟؟ معقولة يعني؟؟؟

طبعا انا ضد الجريمة هاي....وياما بنات راحو ضحايا وفوق هاد يطلع بالاخير ظلم وما تكون عاملة شي
اكيد هالقضية لازم حد يوقف الها....مش بس الجريمة هاي كمان شغلة انو البنت تتخللى عن شرفها بدافع الحب لازم نعالجها كمان....يعني اي بنت المفروض انها ما تتخلى عن شرفها...واتوقع انك توافقيني بهيك شي
انا ارفض بشدة جريمة قتل النساء بدافع الشرف وضدها بدرجة كبيرة....ويا ريت فينا نعمل شي
وكمان ارفض بشدة انه البنت تكون سهلة وترخص حالها وتسلم شرفها لشخص غير زوجها
وبالنسبة لقانون العقوبات مش منصف....عنا بالاردن كتير بنات ينقتلو كل يوم وبالاردن اكتر نسبة فيها هاي الجريمة
خالي ضابط بالشرطة وكان يحكيلنا شو كان يشوف.....الي يلاقو جثتها بكيس...ولي يلاقو راسها مع ابوها....واكتر شي خلاني اتضايق...انه بنت دهسها اخوها بشاحنة....دهسها اكتر من مرة...وتوقعو شو صار بجسمها
وبالاخير طلعت بريئة.....بعد ما ماتت.....طبعا العقوبة تكون مخففة على الشب لانو شغلة شرف.

هاد الشي حرام ولازم نعمل شي غير الحكي

مرة تانية اشكر على هالموضوع المهم وتقبلي احترامي
اختك عطر البرتقال

[sandra]

كاتب النص الأصلي : marwa hanna

يعني بالنهاية المسؤولية الكبيرة بتقع على الدولة ودورها في توعية المجتمع...والسؤال ازا احنا منقدر نعمل شي هون...وشو بالزبط دورنا كمجتمع مدني من هيك قضايا...

دورنا كمجتمع مدني يا عزيزتي هو التوعية
صحيح أنها عم تبدا بدائرة صغيرة ...اسرة ، اصدقاء ...منتدى
لكن مع الأيام بتتوسع هالدائرة

هلا ممكن من خلال العمل المنظم انشاء منظمات غير حكومية معنية بتأمين لجوء إنساني عاجل للحالات اللي بتدخل ضمن هذا المجال وفيها خطورة على من تتعرض حياتها للتهديد بالقتل من أي شخص كان بحجة الشرف لإنقاذ حياة كل إمرأة مهددة بهالشي

[Abu ToNi]

دورنا كمجتمع مدني يا عزيزتي هو التوعية
صحيح أنها عم تبدا بدائرة صغيرة ...اسرة ، اصدقاء ...منتدى
لكن مع الأيام بتتوسع هالدائرة

سؤال الك آنسة ساندرا انت مستعدة تقعدي مع مجموعة من الشباب وتحكي معهم بهي النقطة ؟! شو برايك حتكون ردة الفعل ؟! ما برايك حيصير ثورة غضب عارمة فيهم لأن بنظرهم عبتهيني شرفهم بمجرد ما تقول لهم _ انتوا غلط ) يعني اللي بده يعمل حملة توعية شقد ما كانت صغيرة لازم يحسب حساب المجتمع هل قادر على تقبل الفكرة ام لا وهل هوي قادر على تقبل ردة فعل المجتمع ام لا .

[sandra]

كاتب النص الأصلي : gabriel

سؤال الك آنسة ساندرا انت مستعدة تقعدي مع مجموعة من الشباب وتحكي معهم بهي النقطة ؟! شو برايك حتكون ردة الفعل ؟! ما برايك حيصير ثورة غضب عارمة فيهم لأن بنظرهم عبتهيني شرفهم بمجرد ما تقول لهم _ انتوا غلط ) يعني اللي بده يعمل حملة توعية شقد ما كانت صغيرة لازم يحسب حساب المجتمع هل قادر على تقبل الفكرة ام لا وهل هوي قادر على تقبل ردة فعل المجتمع ام لا .

ليش مين قلك إني ما بحكي بهالنقطة وإني مو متخانقة مع كتير ناس من ورا هالشي بس للصراحة كنت لاقي دايماً مؤيدين الي بالفكرة
ليك يا كابي رحلة الألف ميل تبدأ بخطوة
أنا ما عم قول أنو بمجرد ما نحن حكينا فرح نغير أكيد هالتغيير اللي عم نطلبو بيحتاج لوقت ووقت كتير
ومتل ما قلت بتبدا بمجموعات صغيرة وبعدها بتتوسع دائرة الناس المهتمين والواعيين لهالقضية
بالنسبة لدرجة تقبل المجتمع لهالفكرة فبعتقد أنها موجودة بشكل أفضل من قبل
على سبيل المثال ...من قبل كان عيب وعار على البنت تروح للجامعة وتدرس ...بس العائلات الغنية أو الارستقراطية كانوا يهتموا بتعليم بناتهن وهلا بأيامنا طلع لوين وصلت المرأة بالتعليم رغم كل الضغوط اللي بتتعرضلها ومن كافة الطبقات الأجتماعية.
وبعتقد نفس الشي لهالقضية ....
وبرأيي نحكي ونوعي الحوالينا أفضل من أننا نقعد بس ننتظر المجتمع ليتغير
لأن لوما كان المجتمع بحاجة لتغيير وتوعية ,,, لما كان في داعي لكل شي عم نحكيه هلا
وعلى قولة كونفوشيوس أن تضيئ شمعة خير من أن تلعن الظلام

[Marooshe]

كاتب النص الأصلي : gabriel

سؤال الك آنسة ساندرا انت مستعدة تقعدي مع مجموعة من الشباب وتحكي معهم بهي النقطة ؟! شو برايك حتكون ردة الفعل ؟! ما برايك حيصير ثورة غضب عارمة فيهم لأن بنظرهم عبتهيني شرفهم بمجرد ما تقول لهم _ انتوا غلط ) يعني اللي بده يعمل حملة توعية شقد ما كانت صغيرة لازم يحسب حساب المجتمع هل قادر على تقبل الفكرة ام لا وهل هوي قادر على تقبل ردة فعل المجتمع ام لا .

وشو برأيك الحل غابي؟؟؟بعدين متل ما انت وانا وكلنا منعرف انو اي انسان بحاول يعمل تغيير بيلاقي معارضة كبيرة... فشي كتير طبيعي انو يلي بدو يحكي بهيك موضوع حساس يلقي ثورات غضب... بس وشو يعني؟؟؟ كمان لما كانو يطالبو للمساواة للمرأة قامت الدني والي فيها... بس وضع المرأة بلش يستغير تدريجياً لحتى صار اليوم بكتير احسن... ولهيك انا قلت انو المسؤولية بتوقع هون على الدولة اولا... وعلينا كشريحة معارضة لهيك جرائم في المجتمع ثانياً...

[Abu ToNi]

يمكن معكم حق بس على مثال ساندرا تبع الجامعة كان في طبقة او مجموعة راقية بتشجع الفكرة وكان بقية الشعب الفكرة غير مستحبة بالنسبة الهم .

لكن الانسان الفقير كان ينظر للانسان الغني على انه راقي وان الجامعة شي من الرقي وبالتالي الدراسة ممكن انها تدخل او بالأحرى دخلت بالمفهوم الاجتماعي لأن كان في طبقة راقية بنظر الجميع بتمارس هاد التصرف .

لكن بقصة الشرق بشوفوا انه التخلي عن القتل بهي الحالات بكونوا عبصيروا متل الغرب الفاسق وهنن ما بيرضوا على حالهم يتشبهوا بالفاسقين بعكس الانسان الفقير سابقا اللي كان بيحلم انه يتشبه بالغني سواء بالشكل او باللبس او حتى باسلوب الحياة .

انا كلّي امل تموت هي الفكرة لكن لمجتمع حيضل متشبث فيها لان بيعتقد هويته مرتبطة فيه وتميزه عن الفسق والغرب مرتبط بهي العادات اللي ما ممكن يتخلى عنها .

[Marooshe]

وهون بيتوقف دورنا بالتوعية وبتيجي مسؤولية الدولة والقانون.... لمل بينوضع عقوبات قلسية ومشددة بالذات على هيك جرائم.... ولما بيبطل في تساهل بهيك حالات... العالم بتصير تفكر قبل ما يرتكبو هيك جرائم... وبالتالي نسبتها تدريجيا بتقل... وهيك منكون عم نسعى لتحقيق مجتمع افضل وارقى... وبس هيك مجتمعنا فيو يتغير...بس بتعرف كتير مرات بقعد بفكر انو الشرطة والدولة اصلاً في خدمة من؟؟؟!!!

[Abu ToNi]

وهون بيتوقف دورنا بالتوعية وبتيجي مسؤولية الدولة والقانون.... لمل بينوضع عقوبات قلسية ومشددة بالذات على هيك جرائم.... ولما بيبطل في تساهل بهيك حالات... العالم بتصير تفكر قبل ما يرتكبو هيك جرائم... وبالتالي نسبتها تدريجيا بتقل... وهيك منكون عم نسعى لتحقيق مجتمع افضل وارقى... وبس هيك مجتمعنا فيو يتغير...بس بتعرف كتير مرات بقعد بفكر انو الشرطة والدولة اصلاً في خدمة من؟؟؟!!!

لو بتصير هي الجملة اللي ملونها بالاحمر كان الوضع كتيييييييير فرق عن هلق
مشكلتنا ما بس مع هي النقطة بالذات مانها مع جرائم الشرف فقط مشكلتنا في كتير اشياء تابعة متتالية بنفس الفكرة وحلقها بيطلع من فكرة ( لو بصير العالم بفكرو ) يعني لو بتصير العالم بتفكربتنحل قصة جرائم الشرف وبينحل معها شي 100 مشكلة بالعبطة .
بالنسبة الي التوعية اهم بكتير من فرض الجزاءات والعقوبات .

[Marooshe]

اقنعتني.... وانا كمان بالنسبة الي التوعية اهم بكتير... وبفكر انو بوجود امثالك بيضل عنا امل بالتغيير... بس بالنسبة للجملة يلي انت ملونها متل ما قلتلك اقنعتني... لانو احنا شعب ما بيحب يفكر... بس بيصيرو يخافو اكتر من العقاب... لانو بيصير العقاب كتير مشدد... اليوم الشب بيعرف انو اذا قتل اختو اذا ما بطلع براءة بياكل فيها 3 اشهر حبس.... بس اذا بتشدد العقوبة وبيصير ياكل فيها 30 سنة حبس بيخاف وبيفكر شو قبل ما يقتلها...وساعتها النسبة بتقل وبالتالي وكمان تدريجيا التأييد الها بيقل... ولهيك انا بشوف انو دور الدولة كتير مهم... عدا عن انو القانون والدولة هني السلطة العليا وموقفهن ازاء هيك قضايا الو تأثير ع المجتمع اكتر بكتير من موقفي وموقفك...

[يمان Rooooonaldo]

انا سوري .. ما كنت مع الموضوع من الاول .. قريت اغلب الموضوع .. بس عندي نقطة صغيرة بدي علق عليها ..

بعيدا عن انو رايي .. بكون اكيد ضد وضد هيك فكرة .. تخلفية لانو .. كتير بفوت بنقاشات مع عالم مختلفة بهيك امور .. لاعطي مثال صغير .. صار من فترة .. 4 شهور صار المثال .. بالبلد اللي عايش فيا ..

انحط بالجريدة تبع الجامعة عنا .. وانو .. في اخ مغرق اختو بالبحر كرمال شو ؟!

قال زوجا شاكك فيها .. انو كانت بتحكي مع غيرو !

صراحة .. يوما قاعدين شلة وهيك وقعدنا نحكي .. اللي استغربتو انو .. نسبة كتير كبيرة من الشباب كانت مع .. وبشدة .. يعني صار يصرخ ويعيط ويقلي لا .. هادا شرفي وهاد مدري شو ..

انو شرفك وين .. بعدين يا ابن الحلال .. شرفك بيضل صافي لو قتلتا لاختك ؟ !!

ما وصلنا لنقطة اتفاق .. لانو عامي قلبو تمام .. عن انو .. يقدر يتناقش ويفهم ..

وهون بيتوقف دورنا بالتوعية وبتيجي مسؤولية الدولة والقانون.... لمل بينوضع عقوبات قلسية ومشددة بالذات على هيك جرائم.... ولما بيبطل في تساهل بهيك حالات... العالم بتصير تفكر قبل ما يرتكبو هيك جرائم... وبالتالي نسبتها تدريجيا بتقل... وهيك منكون عم نسعى لتحقيق مجتمع افضل وارقى... وبس هيك مجتمعنا فيو يتغير...بس بتعرف كتير مرات بقعد بفكر انو الشرطة والدولة اصلاً في خدمة من؟؟؟!!!

هلا بعيد عن المثال .. اللي موجود بالالاف عم يصير .. ووين ما كان .. النقطة المعينة .. والمشكلة عم تكون اولا مو بس بالشعب عم تكون بالقانون نفسو

قبل ما نشدد القانون مروة .. لازم يكون القانون مو مع هي العقوبات !!

.. وقت بيكون القانون اللي عندك بيسمحلك انك تقتل .. وبهمجية .. وبلحظة بتكون فيا .. معصب .. او شي .. بيكون الحق اولا على القانون برايي ..

وقت بكون في شي بيردع .. ممكن العالم تبلش تفكر اول .. تصير تحاول انو تشغل مخا قبل ما تشغل الروح الهمجية اللي مخبيا جوا ..

وقت بتجي .. متل هاد المثال اللي حكيتو القانون ما عاقبو ولا يوم .. ليش .!!!! قال لانو هي اسما . دفاع عن الشرف .. ووبوقتا ما بكون .. الزلمة عقلان وبكون معصب ..

لازم نصلح القوانين فوق .. بس لحتى .. نقدر نوقف شوي .. التفكير الهمجي .. لبين ما يرجعلو التفكير العقلانيي للبني ادم ..

يسلمون مروة عالموضوع .. وكتير للاسف قد ما منحكي .. طول ما في هيك قانون .. بدو يكون في هيك .. جرائم

[Reemi]

والله يا يمون جرائم الشرف متفشيه بالمجتمع الاردني كتير كتيييير مع الاسف ....

يا اخي ما عم اقدر افهم لهلا ... شو هوي مفهوم الشرف عندون !!!!!!!!!!!!!!

[يمان Rooooonaldo]

والله يا يمون جرائم الشرف متفشيه بالمجتمع الاردني كتير كتيييير مع الاسف ....

يا اخي ما عم اقدر افهم لهلا ... شو هوي مفهوم الشرف عندون !!!!!!!!!!!!!!

تمام ريمو .. والمشكلة انو الاغلبية .. واغلب التفكير عم يكون هون على .. النظام القديم .. تبع زمان ..

هلا ما بعرف .. شو الوضع بس اللي عم بقراه بجريدة الجامعة شي ببكي والله شي ببكي ..

وقت بتحكي مع العالم بالجامعة .. بتشوفي انو الشب .. بيمشي باليوم مع 100 بنت ... بروح بياخدا .. وبروح على كزينوهات ولا عشو ما كان هوة عادي ... ما عندو مشكلة .. ! ما بيعتبر من ضمن نطاق دائرة الشرف اللي محددها ..

صراحة المرة الماضية وقت حكينا .. ما عاد فضلت احكي .. لانو وقت بتحكي وبكون الكل ضدك صعب انك تحكي .. !!

[Reemi]

صعب انك تحكي بس لازم تحكي ... اذا نحنا ما حكينا هدول العالم بتاكل الدنيا

كان عندي احصائيه عن الاردن وجرائم الشرف انا اشتغلت عليها بشغلي ,,, ع وجهكون ما عاد لقيتها

[Marooshe]

كاتب النص الأصلي : يمان Rooooonaldo

قبل ما نشدد القانون مروة .. لازم يكون القانون مو مع هي العقوبات !!

.. وقت بيكون القانون اللي عندك بيسمحلك انك تقتل .. وبهمجية .. وبلحظة بتكون فيا .. معصب .. او شي .. بيكون الحق اولا على القانون برايي ..

وقت بكون في شي بيردع .. ممكن العالم تبلش تفكر اول .. تصير تحاول انو تشغل مخا قبل ما تشغل الروح الهمجية اللي مخبيا جوا ..

وقت بتجي .. متل هاد المثال اللي حكيتو القانون ما عاقبو ولا يوم .. ليش .!!!! قال لانو هي اسما . دفاع عن الشرف .. ووبوقتا ما بكون .. الزلمة عقلان وبكون معصب ..

لازم نصلح القوانين فوق .. بس لحتى .. نقدر نوقف شوي .. التفكير الهمجي .. لبين ما يرجعلو التفكير العقلانيي للبني ادم ..

يسلمون مروة عالموضوع .. وكتير للاسف قد ما منحكي .. طول ما في هيك قانون .. بدو يكون في هيك .. جرائم

تشديد القانون معناة انو القانون يكون ضد هيك جرائم... والي قصدتو ان القانون كرادع للمجتمع ممكن يساعد في الحد من هيك جرائم وللأسف اكتر من التوعية... ليش؟؟؟ لانو عالم بترتكب هيك جرائم... ما بتفهم... بتخاف!!!