كيف تحصل على 260/260

[TheLover-_-]

محمد قتيبة المرعي

المحافظة : حمص

الشهادة الإعدادية عام 1998: مجموع 290/290

الشهادة الثانوية/علمي عام 2001: مجموع 260/260

حاليأً: سنة سادسة (تخرج) طب بشري/جامعة دمشق

صفاته : مرح - اجتماعي جدا - حاد الذكاء

أول علامة 260 بعد انقطاع حوالي 13 عام لم يحرز فيها علامة 260 في القطر العربي السوري.





آثر الطالب قتيبة المرعي أن يكتب كلمته باللغة العامية كي تكون مألوفة سهلة للطلاب فكتب لبكالوريا ما يلي




بسم الله الرحمن الرحيم

له له يا شباب البكالوريا! لشو كل هالتوتر؟ بعرف إنّو القصّة صايرة كلمالها أصعب و أصعب و المعدلات ما منعرف لوين رايحة, يعني يمكن الـ 260 تبعي من هون لشي كم سنة يا دوبا تفوّتني عالطب تشحيط فحسبكم الله و نعم الوكيل! بس الحكي هلأ لزلم البكالوريا.....لا تخافوا الأمور لسّاها بخير و أنا قدّم البكالوريا بعدي تلاتة من إخواتي و كان الوضع عال العال بفضل الله تعالى.

لمّن طلبوا مني أكتب هالمقال صفنت و كنت قدّام خيارين: يا أمّا بشربكلكن الشغلة و بطعميكن ترعيبة ماكنة, و بعدين بطجّلكن برنامج دراسة مخيف لا أنا و لا جد جدّي بيقدر يمشي عليه, و بترككن للإحباط الناجم عن فشل هالبرنامج و هيك ما بكون فدتكن إنّما ضريتكون, يا أمّا مندردش على بساط أحمدي متل ما بيقولوا و منحكي شلون ممكن تمشي الأمور بإذن الله تعالى بسلاسة و واقعية و منعطي كم تكنيك أساسيين للدراسة و يلّي ممكن البعض يحسّ إنّون سهلين بس برأيي على أرض الواقع كتير ضروريين.

طبعاً أنا آثرت الطريقة التانية لأنّي بآمن أنّو البرامج المتحجرة تبع ادرس من الـ 6-9 بعدين خود ربع ساعة استراحة بعدين من 9 وربع للـ12 وبعدين تغدّى بربع ساعة... يعني هي البرامج مستحيل تنطبق عالناس كلهن لأنو معلومكم البشر مختلفين واللي ارتحت عليه بيجوز ما يرتاح عليه غيري فاللي لح أعمله أنو لح لخص كم ملاحظة من خلاصة هالتجربة واللي استمريت عليهن خلال دراستي الجامعية وما قصّرو معي أبداً زاتن أنا هلأ عندي فحصي التخرج بلش من كم يوم ادعولنا الله يخليكم!): طبعاً الحكي موجّه لزملائنا وزميلاتنا وإن كان الكلام يكتب بصيغة الذكورة متل ما بتعرفو بالعربي لما نوجه حديثنا لخليط من الجنسيين فلا تؤاخذوننا.

لا تخلّي نشوة الإنجاز بمواد معينة تلهيك عن المواد التانية:

كتيرين من رفقاتنا الكفوين بالرياضيات و الفيزياء أهملوا العربي فكبّوا عشر خمس تعشر علامة بدون سبب. فدرلي بالك خصوصاً من المواد اللي ما بتحبها, بعرف أدّيش بيروق اللي فهمان رياضيات لما بيطج كل المسائل بس معلومكن الرياضيات 60 وما بتنجحك لحالها!

البرامج الأسبوعية واليومية كتير مفيدة:

ليش؟ لأنها بتوجّه دراستكن يعني أول ما تفتح عينك بكير بترتب بشغلة دقيقتين تلاتة شو مخططك الزمني لليوم وشو الدروس اللي لازم تخلصها. كمان كل أسبوع بتعمل بشغلة ربع ساعة زمان شو الأمور الإضافية لوظايفك واللي لازم تساويها (مثلاً مراجعة قسم الاحتمالات أو وحدة المغناطيس أو شي كم درس قومية). هيك برامج كتير كتير ضرورية صدقوني لتبقى دراستكن متوازنة وبتخفف من وقت التلهاية والضوجان.

الباكالوريا متل سباق الماراتون:

شو يعني؟ بسباق الماراتون المتسابقين يللي بيشدوا من الأول و بيدبحوا حالون ما بيصلوا لخط النهاية وهيك البكالوريا, ما بدّو الواحد يحرق حالو بالتوتر و الكركبة من الأول لأنو بيفرط بالآخر, بلشو متوازنين وكل ما قربت النهاية بتكون دراستكن عم تشد لحتى يقرب الفحص بيفتح فتحة وحدة. (طبعاً مو معناتها ما أدرس أول الشي بس ما يقبر حالو من البداية إنما يعملو شوية نشاطات عالخفيف أما قبل الفحص بأسبوعين تلاتة مثلاً فهالنشاطات معدنا مقبولة و بتحطلي الصمغ على الكرسي لتلزق فيه و جيبو صمغ مرتب مو شو ما كان كل شوي بيفك!)

ساعة تركيز ولا ستة كلون صفن:

فالبعض بينام عالفقرة ساعة و ساعتين و عين عالكتاب و عين عم تسبح بالغرفة وبالو بستين إرنة! هادا الحكي ما بيشتغل معنا يعني الدراسة بدها تركيز و وقت تحس حالك بلّشت تصفن قوم و تلهالك شي تلهاية مسلية أو نام و بعدين بترجع بتكمل (مو تسحبها كل النهار تلهاية كمان!)

التثبيط من المجتمع عدوك الأول:

حاول تبعد عن أجواء الاحباط و التثبيط و لمّن تحس إنّو في عندك رفيق بيضل يثبطك ( يعني كل ما تحكي معو بتبطل تدرس ساعتين تلاتة) بعّد عنّو و غنّيلو!

للمستجدين:لا تفكر بالإعادة!

بالنسبة للمستجدين إنسى فكرة الإعادة و قلعلي ياها من بالك عالخالص و هادا شعار(الباكالوريا سنتان, من زادها استحسان و من أنقصها قليل وجدان) سلبة بسلبة و إذا هيك الشغلة فمعلش الله يجعلك من قليلين الوجدان! و خاصّة لمّن يقرب الفحص فالتفكير بالإعادة بيقضي عليك عالخالص ولا يمنع يكون عندك طموح يا أخي ولا حرام حتى نحلم؟

ركّز على منهاجك فقط:

بالنسبة للمواد اللي فيها مسائل يعني رياضيات و فيزياء و كيمياء فالأسئلة ما طلعت (وما لح تطلع بإذن الله) عن العامّات و الدورات فلا تضيع وقتك و تشوش حالك بنوط يصدرها بعض أساتذتنا الأفاضل (النوطة السحرية لابن دريّة والنوطة اللي ما بتخيب لأحلى طبيب وهيك شي!)يعني الأختصاصيين الجامعيين والله ما بيعرفو يحلّوها. هيك نوط بتشتتك عن الأساسيات وكتير طلاب من كتر ما بيحلّو من هالنوط بيتلبكو بأبسط المسائل بالفحص لأنو بيفكرو بأعقد الطرق بدل ما يتوجهوا للأبسط , و حتى لو خلصت فالتفتلي للعربي و المواد التانية الله يرضى عليك..اتفقنا؟ يعني شيل هالنوطة من إيدك و يالله اركض عالعامّات!

مو الشغلة بتمريق الصفحات و عدد الإعادات:

لأنّو هادا كله ما بيشفعلك بالفحص إذا ما كانت المعلومات مرتبة ببالك و منسّقة! يعني كل ما تخلص بحث مو مباشرة تنط عاللي بعدو إنما عملو شطفة إعادة و ركز أفكارك وكل ما تخلص وحدة كاملة خصص وقت لتراجعها كلها مع بعضها (منرجع للبرنامج الأسبوعي, خصص لكل أسبوع فترة تراجع فيها وحدة علوم أو فيزياء أو عربي حسب الوضع). آخر الشي يا شباب والله الشغلة بدها رضا وإخلاص بالنيّة لأن معلومكن مسألة رياضيات وحدة تطير فكرتها من بالك بتنزلك فرعين تلاتة لتحت فبتروح الله يرضى عليك لعند الوالدة و الوالد الله يحميلك ياهن و بتبوس إيدين وبتصليلك ركعتين عسى الله يوفقك و لا تعملي جو إرهاب بالبيت و تعيط على إخواتك (أنا عندي بكالوريا!!!) وتتغالظ بلا طعمة فالله سبحانه و تعالى بإيدو كل شي فلا تغضبه....سماع مني ما بتندم و استهدي بالرحمن واتوكل عالله إنت اعمل اللي عليك واتوكل على الله و ادعيه أنّو يوفقك ولا تنساني من دعاءك والسلام عليكم ورحمة الله وبركاته.



منقول من موقع bakaloria.com

[لامار]

هلاء بدنا سوي كل هدول شي صعب يلا نحنا خلصنا البكالوريا العترة عللي بعدنا

[ادونيس_90]

هلا نجحنا عا البكالوريا ومنشوف شو بنعمل
الله يساعدنا

[قهوة دايمي]

وين كان هالحكي لما كنت بكالوريا

[Placebo]

الواحد يللي بدو يدرس بكالوريا .. لازم ببداية الأمر الضغوط الخارجية والمشاكل النفسية ما تأثر عليه .. ويحاول أنو يركز فقط على دراستوا ويمحي كل الأحلام الوهمية من بالوا وما يفكر بأشياء غير كتبوا .. ولازم يكون متهيئ نفسياً ومعنوياً للدراسة .. ولهذا السبب لاحظت كتير شباب من أبناء القرى عم يجيبوا علامات عالية كتير .. بينما إبن المدينة يللي براسو خمسية شغلة غير البكالوريا ماعم تزبط معو ...

طريقة ناجحة ورفيقي عملها وياريتني رديت عليه .. كنت هلأ عم أدرس حقوق عالقليلة

[abu-wdea3]

ولي لازم اعمل كل هالشي ما بدنا ياها ازا هيك .....

[BL@CK]

صفاته : مرح - اجتماعي جدا - حاد الذكاء

سمحلي أقلك هالحكي برأيي الشخصي غلط .

صفاته : منطوي - معّت - بصيّم

معلمي البكالوريا ما بدا لا ذكا و لا هوا بدا بصم . بتعرف بتبصم بتجمع ما بتعرف بتبصم راحت عليك

و نفس الشي جامعاتنا ..

من المعروف أنو النظام السوري في التدريس ما بقيس مستوى الذكاء على العكس تماماً النظام السوري بقيس مستوى البصم سواءاً في المجالين العلمي أو الأدبي

و كذلك كلية الطب ..

لذلك قلو لصاحبك . بلا تقسيم و أكل هوا .. كلياتنا في الهوا سوا

و على عيني انت

[ادونيس_90]

كاتب النص الأصلي : BL@CK

سمحلي أقلك هالحكي برأيي الشخصي غلط .

صفاته : منطوي - معّت - بصيّم


من المعروف أنو النظام السوري في التدريس ما بقيس مستوى الذكاء على العكس تماماً النظام السوري بقيس مستوى البصم سواءاً في المجالين العلمي أو الأدبي

و كذلك كلية الطب ..

حاجة عاد لسا كل ماحدا حكى كلمة بتدخلوا النظام


يعني بدك يانا نبصم 600 مسائلة فيزياء و500 كيمياء
كمان بدها فهم
مختصر مفيد:بكالوريا 10 %ذكاء و90%عمل ومتابعة الدرس

[TheLover-_-]

يا شباب يا شباب انا لا تدخلوني بالنص
انا رأيي بالبكلوريا السورية:
1-انا خلصت هالتفاهة كلها و نجحت بعلامة ازفت من الزفت(167)
2-اي انا معكم انو البكلوريا بدها بصممو درس هيدا شي اكيد لان (لا تواخذني اخي ادونيس)99%بصم 0.5%ضغط نفسي 0.4%ضغط العالم 0.1%فهمشي عن جد بيعل البني ادم
3- بعرف وحدة هيوايتها انو تشوف مستوى البكلوريا بكل العالم
لحد هلئ درست باوكرانيا رحلها علامة وحدة
درست بلبنان رحلها كمان علامة وحدة
درست بسوريا رحلها 9 علامات و بدكن تجيبوا علامات اذا ما ابصمتوا
4-اللي بدو يدرس طب هندسة صيدلي اي فرع محترم او شبه محترم بدو 230 لحت ها يطلعلوا شي فرع شبه محترم
5- بيخلص درس جامعة بعد عناء طويل و دفع لاساتذة الجامعة اللي فوقوا و اللي تحتو ما بيطلعلو وظيفة بسوريا الا اذا كان عندو واسطة و اذا ما عندو يقعد ببيت اهلو او يروح يشحد
6- اللي عم يفكر يدرس بكلوريا نصيحة شخصية(ساَل مجرب و لا تسال حكيم) لا يعتل هم و غم يروح يجمع هالمصاري اللي بدو يدفعها للاساتذة (شي 150 الف )و بمساعدة الأهل و الله بيجبلو شوية مصاري من هون و هون و يدرس جامعة خاصة اريح الو و لاهلو
7- روحوا يا شباب اتأكدو من موقع bakaloria.comو شوفوا نسب الاعتراض على العلامات 69%مو رضيان على علامتو 20% يعني مقبولة 11%اي منيييييييحة
8-مبروك لكل اللي نجحوا

[BL@CK]

كاتب النص الأصلي : ادونيس_90

حاجة عاد لسا كل ماحدا حكى كلمة بتدخلوا النظام


يعني بدك يانا نبصم 600 مسائلة فيزياء و500 كيمياء
كمان بدها فهم
مختصر مفيد:بكالوريا 10 %ذكاء و90%عمل ومتابعة الدرس

لك حياتو لألبي , ما جبنا سيرة النظام و لا جبنا سيرة السياسة , عم بحكي عـ نظام التدريس يعني المناهج , الظاهر نضاراتك مغبشات ,

و بالنسبة لموضوع البصم , اي بدك تبصم 600 مسألة , بس كيف حتبصمون ,

حتبصم مسألة ميكانيك و مسألة نواسات و و و و و و بالأخير ما تبقى مكرر , يعني ما حيكون في إبداع في الأسئلة

وصلت الفكرة و لا نرجع نعيد ,.؟