الزواج من فتاة ليست عذراء

adler · 14/02/2006

اول شي مرحبا للكل و بالحقيقة ما كنت بدي اكتب هالموضوع الا لانو انتوا اخوتي
حابب احكي عن موضوع حساس و يمكن بعاني منو شبابنا السوري و بفكر فيو و بحسبلو ميت الف حساب
مو تحسبو انو هالشي صار معي انا مالي علاقة و ياريت ما يصير معي هيك شي متل ما صار مع ابن خالتي
هادا ابن خالتي تعرف على بنت اصغر منو تقريبا ب 4 سنين يعني عمرها هي 20 سنة و بحبها من كل قلبو و هي كمان بتموت علية لحد ما بتصوروه
المهم هلق صرلون خاطبين فترة منيحة و متل السمنة عالعسل
يعني اثنين لاقو بعض و رح يتجوزوا بعد شهرين
اسف لانو عم بطول بس مشان تعرفوا تقيموا الموضوع و تعطوني رايكم
بيوم من الايام صارحتو انو كان الها علاقة مع شاب قدها و قت ياللي كانت بالمدرسة لفترة سنة يعني بال16 تقريبا و انو كانوا يمارسوا هديك الشغلة من برا لبرا يعني بس بوسات(عفوا)و تركوا بعض بعدين بعني لسا عذراء
و جن جنونو لما سمع هالشي و هي اعترفت انو كانت غلطة و شغلة ولاد يعني و اعتذرت
ابن خالتي مسك حالو شوي و سامحها بعد ما هددها انو بدو يفسخ الخطبة و بعد ما بكيت دم خليني قول هيك
و مشيت الامور منيح و قرب موعد الزواج
و حكالي هو هالقصة بركي يعني بحسن اساعدو لانو هو لهلق متوتر و بيسال حالو انو معقول هي ياللي بدا تصير مرتي مخبصا بزمانو مع شب غيري؟ يعني بصراحة ما عاد عندو ثقة بس مالها معدومة
بقى شو رائيكم ؟ انو شو صار الفرق بين البنت العذراء و المو عذراء و هل العذرية دليل عفة و متل ما شفتوا هي خطيبتو عذراء و مخبصة كتير قبلو

Syrian__Angel · 14/02/2006

امممم .. تعليقي على القصة هو مشان موضوع ابن خالتك ..
انا برأيي لو ما عاد فيه يثق فيها .. فالاحسن يتركها ...
لانه انت قلت انو ( مسك حالو وسامحها ) ... بس هاد السماح مجرّد كلام .. وما بيعبّر عن اللي بقلبه...
ولو استمرّوا وتزوجوا .. وهو بعدو ما سامحها عنجد ...الاحتمال الكبير انه رح ينتهي زواجهم بالانفصال عاجلا او آجلاً ... لانه متى ما ضاعت الثقة بيضيع الحب

adler · 14/02/2006

ما هي هي المشكلة سامحها لانو بحبها غيرو كان فسخ الخطبة دغري بس هو بحبها من جوات قلبو

لاوديسا · 14/02/2006

اقتباس:

كاتب النص الأصلي : adler

ما هي هي المشكلة سامحها لانو بحبها غيرو كان فسخ الخطبة دغري بس هو بحبها من جوات قلبو

اوووووف قلتلي بيحبها بالقليلة هيي صارحتو وقالت الصدق
انا ما عم قول هيي مو غلطانة بس اعترفت بغلطها هي اولا و بعدين لو ما بتحبو ما بتصارحو هيي كمان
وبعدين لاتنسى انو البنت كمان كتلة مشاعر واحاسيس ومن حقها تحب
برجع بكرر اني مو مع الشي اللي ساوته هيي
وبعدين سؤال يعني هو ماكان الو تجارب بنوب ولا الشب مسمحلو كل شي
يلا مو موضوعنا هاد
انا مع ملاك اذا مو قدران يسامحها يتركها بس هو الخسران لانو كانت بتقدر تخبي عليه وما تقلو بس هيي شكلا حبيتو اكتر ما هو حبها ومشان هيك صارحتو واختارت الصدق بغض النظر عن النتائج ولازم ينبسط مو يتوتر

Daiski · 14/02/2006

مادام صارحتو ما لازم يتركها

و هي كانت ما حكت لو ماشافتو رجل و بيقدر يتحمل هيك شغلة

و يالنهاية الله يوفق لنصفق و لا تنسى تعزمنا

toocoolfriend · 14/02/2006

بحب استشهد بنزار:

"تظل بكارة الأنثى
بهذا الشرق عقدتنا وهاجسنا
فعند جدارها الموهوم قدمنا ذبائحنا..
وأولمنا ولائمنا ..
نحرنا عند هيكلها شقائقنا
قرابيناً .. وصحنا _( واكرامتنا ) .
صداع الجنس ..مفترس جماجمنا
صداع مزمن بشع من الصحراء رافقنا
فأنسانا بصيرتنا ، وأنسانا ضمائرنا "

ليش عنا البكارة شي مقدس لهذه الدرجة. كل واحد فينا بيغلط المهم يعترف بغلطو ويكون طاهر من جوا. وكأنو الفتاة التي فضت بكارتها (والحالة في هذا الموضوع أخف) وكأنها شقت طريق اللاعودة في الخطيئة. وكأن حدود شرف المرأة هي زنارها الذي اذا ما اخترق فقدت انسانيتها وباتت رهينة المجتمع يفعل بها ما يشاء. وصارت رهينة زوج يستغل أي فرصة ليذكرها بماضيها "الأسود".

المهم انو صاحبك يتأكد من صدق اقتناعها بغلطتها (وهيدا الواضح من اعترافها وبكائها) ويسامحها من قلبو وما يذكرها بالقصة كل ما دق الكوز بالجرة ليحسسها انو هوي ولي نعمتها وانو له الفضل عليها بانو سامحها. اما يسامحها من قلبو وينسى الموضوع من أساسو, واذا مش قادر بكون خرب بيتو بايدو.

Daiski · 14/02/2006

اقتباس:

كاتب النص الأصلي : toocoolfriend

بحب استشهد بنزار:

"تظل بكارة الأنثى
بهذا الشرق عقدتنا وهاجسنا
فعند جدارها الموهوم قدمنا ذبائحنا..
وأولمنا ولائمنا ..
نحرنا عند هيكلها شقائقنا
قرابيناً .. وصحنا _( واكرامتنا ) .
صداع الجنس ..مفترس جماجمنا
صداع مزمن بشع من الصحراء رافقنا
فأنسانا بصيرتنا ، وأنسانا ضمائرنا "

ليش عنا البكارة شي مقدس لهذه الدرجة. كل واحد فينا بيغلط المهم يعترف بغلطو ويكون طاهر من جوا. وكأنو الفتاة التي فضت بكارتها (والحالة في هذا الموضوع أخف) وكأنها شقت طريق اللاعودة في الخطيئة. وكأن حدود شرف المرأة هي زنارها الذي اذا ما اخترق فقدت انسانيتها وباتت رهينة المجتمع يفعل بها ما يشاء. وصارت رهينة زوج يستغل أي فرصة ليذكرها بماضيها "الأسود".

المهم انو صاحبك يتأكد من صدق اقتناعها بغلطتها (وهيدا الواضح من اعترافها وبكائها) ويسامحها من قلبو وما يذكرها بالقصة كل ما دق الكوز بالجرة ليحسسها انو هوي ولي نعمتها وانو له الفضل عليها بانو سامحها. اما يسامحها من قلبو وينسى الموضوع من أساسو, واذا مش قادر بكون خرب بيتو بايدو.

دعني اشد على يدك ......... يعني نزار اجا بمحلو هون

toocoolfriend · 14/02/2006

اقتباس:

كاتب النص الأصلي : Khaldi

دعني اشد على يدك ......... يعني نزار اجا بمحلو هون

تسلم..
نزار ترك لنا بكل مناسبة مثلا نستشهد به

المستحيل · 14/02/2006

وأنا مع رأيك يا ديمة وضروري البنت تكون عزراء عي اهم شي

toocoolfriend · 14/02/2006

اقتباس:

كاتب النص الأصلي : المستحيل

وأنا مع رأيك يا ديمة وضروري البنت تكون عزراء عي اهم شي

بعدنا عم نحكي يا أخي..
العذرية مش كل شي

Kakabouda · 14/02/2006

هلأ كل واحد بفكر بمنطلق معيين ..

ناس بتقول أنو عروبية و التار ورا العار و و و .. و ناس بتعدها كانت فترة حلوة بحياتها و مضت مع مرور الزمن ..

هلأ الحب اللي حبتو و هي صغيري انا بعدو بريء و خالي من اي عار دام الموضوع ما اتطور .. هلأ بوسي بوستين مسكة ايد عادية بهالزمن يعني ممكن تكون هالبوسات كانت كلها بدافع تجربة شي يمكن ببلادنا غريب بس برا عادي ..

يعني مختصر الكلام عادي ..
يتكّل على الله و يتجوز هههه

تحياتي

blade · 14/02/2006

حابب ضيف على الشباب شغلة انه ابن خالتك ما خبصلو شئ تخبيصا و ما باس ولا بنت بحياته بدون ماترد علي بعرف الجواب
بس نحن الشباب معلش وغيرنا لا وبرجع وبقلك انه كلنا اولاد تسعه وماحدا معصوم عن الخطأ وعلى فكرة كان البنت فيها تخبي الموضوع وبكل بساطه

صياد الطيور · 14/02/2006

اقتباس:

كاتب النص الأصلي : adler

و هل العذرية دليل عفة

حبيب القلب ..

يعني .. شو العذارء وشو ما عذارء ..
يعني بعدنا عم نحكي بهالأمور الي صار ممكن التغلب ببساطة مطلقة .. والي هي لا بتدل على العفة ولا شرف البنت ولا على حسن تصرفها ..

وبرأيي ... الموضوع لازم يتغلب عليه قرايبك ... يعني البنت صارحتو ومشي الحال ..ليش لحتى يتعذب ويعذبها معو ..

يعني هي كان فيها تخبي عنو لو ما كان الموضوع تافيه وشغل ولاد

واحسبها غلطة ... ممكن تبقى تتحاسب عليها كل حياتها .؟؟؟
وقرايبك ما غلط بحياتو ؟؟؟؟

الدنيا آخ وعطى ..
بس .. بالنهاية هي شو مشاعرها معو ؟ هادا هو المهم .. بعد ما تعرفت عليه .. هادا هو المهم ..

أما قبل ..ذهب مع التاريخ .. هادا رأيي .. ولكل واحد رأيي ..

hala · 14/02/2006

مع احترامي لآراء كل الشباب
بس للأسف هدا الحكي 90% منو تنظير, يعني حكي وبس
لأنو اي شب من مجتمعنا الذكوري بحط حالو مكان هدا الشب ما رح يرضاها ورح تتحرك فيه موروثاث الكرامة والشرف ويعتبرها (عايبي) بالشامي.. وبدها أص رئبي.
مع انو كانت بكل بساطة بتحسن تخبي الموضوع وما يعرف شي عنو بس البنت اختارت تصارحو وهدا دليل على انها بنت نقية.
وأنا رأيي:
الشب ما لو علاقة بماضي البنت قبل ما تعرفو.. لأنو ما كان بحياتها
والبنت ما لها علاقة بماضي الشب لنفس السبب وما بيحسنو يحاسبو بعضون على ماضيهم.
(طبعا كلمة الماضي هون ما بتعني المفهوم السلبي المتعارف عليه لأنو المعروف عنا انو بنت الها ماضي يعني مسموعياتها مو منيحة)

adler · 15/02/2006

كلامك صح يا هالة بس شغلة وحدة ما عم بفهما انو البنات بقولوا انو ليش الشب يعني بصير يخبص بماضيه و نحن لا؟؟
طب انا رح اسال سؤال ليش الشب مالو غشاء بكارة؟؟؟
خيتو انا بعرف انو البنت المرباية لازم ما تغلط و لا تقللولي البنت احاسيس و البوسة ما بتساوي شي !!!!!!!!!!!

تيريزا · 15/02/2006

موضوع في الصميم

في نظري ان لما هالصبيه صارحت خطيبها بالموضوع هدا دليل على قوتها وثقتها بنفسهاوهدا الشي بعلله من ناحيتين .....

اولا....... انها اتمردت على طبيعه ونفسيه المراة المتخلفة الضعيفه ,بأنها كان عندها الشجاعه الكافيه انها تواجه شريك عمرها المستقبلي بأمر يتعلق بمستقبل التنين .

تانيا......انها حبت تكون علاقتها بحبيبها نضيفة وما يسودها اي شوائب قديمة وانه يكون كل حياتها مفتوحة أمام شريكها لحتى تكون الحياة ابسط بكتير ,من انه يكون في شي قديم او رواسب راح تأثر على العلاقة بيناتهن , وبدل ما يذلها ويمسك اعصابه ويسامحها لازم يزيد حبه لالها ويثق فيها أكتر .

وهيه بهالحاله حبت تطلع من هالدائرة اللي يمكن خانقتها او راح تتعبها بالمستقبل بانها تحكي لأقرب الناس الها , بالرغم انها كانت بتتوقع انه راح يصير اللي صار , وفضلته .

وطبعا بديهيا ازا انعدمت الثقة بين الطرفين راح ساعتها تتولد الخيانة الحقيقية , طبعا بعد الزواج , فهادي خطوة جريئة وصحيحة , بس للاسف شبابنا متمسكين بالعادات والتقاليد البائدة اللي اكل الدهر عليها وشرب .
يعني فرضا انه فتاه عملت هيك مهيه انسان متلها متل الشب الها احاسيس , مشاعر , غريزة , ومش غلط انها تعمل الغلط وانها بالاخر تعترف فيه حتى لو بينها وبين نفسها .

نصيحتي ....انه يتركها احسنله لانه بما أنه فقد الثقة فيها , فهوه شخصيا ماراح تنبع عنده الثقة تلقائيا بعد ما صارت بنظره مجرد مجرمة .

ولا خليتوا هالشي حكر عليكم معشر الرجال , انكم تعملوا السبعة وذمتها , بينقال عنكم رجال ساعتها .

عجبـــــــــــي

وانا مش عم هاجم الشباب ولا عم بشجع الصبايا ,لا, كل اللي قصدته بتعليقي انه يكون هناك مساواه وعدل لاعطاء الحقوق المتساوية بين الرجل والمرأة , لأنه في مجتمعنا المرأة انظلمت وماتزال مظلومة ,وخوفي أن يستمر الظلم......

صياد الطيور · 15/02/2006

الله عليك يا تيريزا على ردودك ما أروعها

تحياتي الكبيرة ألك

ملك الهكرز · 15/02/2006

اقتباس:

شغلة ولاد يعني و اعتذرت

هلاء شغل الولاد كم مرة تولدنة

اقتباس:

انو شو صار الفرق بين البنت العذراء و المو عذراء و هل العذرية دليل عفة و متل ما شفتوا هي خطيبتو عذراء و مخبصة كتير قبلو

هلاء انتى بتاخد علبة كولا مفتوحة شي
او حدا شربان منها