فيما يخص بعض المشاركات بمسابقة التصوير

[leonardo_dicabreo]

يا جماعه:

في أريع صور مو مزبوطين , على زمتي ازنهم مو كلهم فوتوشوب , وفي صور مو ملتقطه من ذات

الشّخص . . ! !

مثل :

UnForgiven , The Light , Jimmy الخ . . .

لذلك أنا بحجب صوتي, وأعترض وبشدّه ! !

[The morning]

كونه نوهت لعدم الأخد و الرد داخل موضوع التصويت و المحافظه على ترتيبه كموضوع تصويت فقط .. فحبيت انقل ردّك هاد لهون كوني حسيتك مش راضي و عم تتهم البعض باستخدام الفوتوشوب و كذلك عم تتهمنا بترشيحهم رغم ذلك ..

غير TheLight كونو وضحت انو قررنا اعطاء فرصه لوحده من الصور اللي شفنا انهم مستخدمين الفوتوشوب و وقع الا ختيار من جميع اعضاء اللجنه على thelight ففينا نكون انتهينا من مشاركته كونو تم توضيحها و ترشيحها بشكل منفصل ..

عودة لحكيك فياريت تعترض توضحلي فكرتك و نتفاهم هون بدل من الاعتراض داخل الموضوع نفسه ..

[leonardo_dicabreo]

أوك , بنبلّش :

صورة SelvaI :

يعني هالصّوره مو مبيّن راسا من رجليها , ولا معروف ايش الي بالصّوره , وسألت اكتر من عضو بتعرفلي شو هاي الصّوره وما كانوا يعرفوا , فعلى أي أساس تم أختيار هاللّوحه الفنيّه masterpiece . . ؟ ؟

صورة Unforgiven :

يعني ماشاءالله , ما خلّى شي لبيكاسو , يعني كيف طلعت معه هيك ما كنت اعرف , الصّوره الحقيقيّه بتبين بمجرد النظّر اليها , بس هالصّوره فيها شكوك متل ( الابعاد , الزّاويه يلي مأخوده منها الصّوره , الألوان) ؟


صورة The Light :

يعني أنا قريت بأوّل موضوع الك (مورننج) , بشروط المشاركه بهالمسابقه , أنّه استخدام الفوتوشوب ممنوع قطعيّاً , وسيتم استبعاد الصور المستخدمه فيها الفوتوشوب , استثناءاً للّعب بالألوان (يعني مثل التبييض والتسويد وخدني جيتك).

فعلى أي أساس بتحكيلي قرّرنا اعطاء فرصه لوحده من الصّور , هالحكي مو مزبوط منوب , وفيو تشكيك بالأساس الي اعتمدتوا عليه بأختيار الصوّر . . ! !

ومن هذا المنطلق أنا أعترض وبشدّه على هذه الصّور , وأرجو أن يأخذ اعتراضي الغير مسبوق بعين الاعتبار .

شكراً

[The morning]

صورة SelvaI :

يعني هالصّوره مو مبيّن راسا من رجليها , ولا معروف ايش الي بالصّوره , وسألت اكتر من عضو بتعرفلي شو هاي الصّوره وما كانوا يعرفوا , فعلى أي أساس تم أختيار هاللّوحه الفنيّه masterpiece . . ؟ ؟

لنكون جميعا ً بالصوره فرح حط الصور ضمن ردي هون ..


هي الصوره اللي عم تحكي عنها ..
أنو بالفن عامه مش مطلوب يكون معرّف الجسم لتكون الصور حلوه .. في كتير صور بتكون مقتطعه من اجسام و المستيري اللي فيها هي اللي بتشد الها لتبحث عن الكمالة مثلا ً عن الحل !
كذلك بالرسم في كتير ناس بترسم مجرد خطوط و بتنباع لوحاتهم بمئات و ألوف على انها فنيه .. يعني كونو انت او البعض او حتـّى كلنا ما عرفنا شو اللي مصوره فهاد الشي ما بيجعل صورته مش فنيه ..
على أيّ أساس .. قلنا سابقا ً انو هي المسابقة لتوثيق الاحساس لا الاشياء و اعتمادا ً على هالشي فما كان مطلوب يكون معرّف الجسم اللي عم يصوره لتتأهل صورته ..

أيضا ً نقطه .. متل ما واضح أنـّو في كتير اصوات اجت لصوره SelvI فما بعتقد كان اختيارنا الها خاطئ ..

اضافة لهيك فأنا ما لقيت صعوبه اعرف شو اللي بالصورة لكن مش رح بقلك ياه لارجع للمصوّر نفسه و اعرف اذا ما عنده مانع ..

صورة Unforgiven :

يعني ماشاءالله , ما خلّى شي لبيكاسو , يعني كيف طلعت معه هيك ما كنت اعرف , الصّوره الحقيقيّه بتبين بمجرد النظّر اليها , بس هالصّوره فيها شكوك متل ( الابعاد , الزّاويه يلي مأخوده منها الصّوره , الألوان) ؟

بيكاسو كان رسام و ليس مصوّر ..

و أنا مافيّ أحكم اعتمادا ً على انـّو اذا الصوره حلوه فلازم تكون مسروقة .. حضرتنا دورنا بالنت ( بشكل طفيف عقدر ما بتسمح قدراتنا و وقتها ) و ما لقيناها فاذا انت بتجبلنا دليل انها مش تصويره بنأحطله مباشرة ً و حالا ً..

لكن بس اعتمادا ً على انو زاويتها و ابعادها و ألوانها ظابطين فلازم تكون مش تصويره .. هيك مافينا نحـكـم .. بجوز هوّ محترف ، بجوز عنده خبرة بهالمجال ..

و بهالسياق بذكر صورة شوط يا قمر اجى عليها تعليقات شي انو فوتوشوب شي انـّو معقول هالقد حلوه و تصويره و وو .. و هوّ فات و خبّر الجميع انـو هو ّ أصلا ً مصوّراتي حارتهم و هي رده :

جلّ مافي الأمر أنو التصوير شغلتي بلحياة . مصوراطي انا يعني .. و هي الصورة نأخدت بوضع موسيقي بحت . كان في 3 عازفين عود . وكانت الحفلة عبارة عن استزكار أو تحية لروح الشاعر محمود درويش . فا تخيل الوضع . عود وموسيقى وطرب . وانا عمصور .

شو بنعمل فيه بنقلو مافيك تشارك لأنك محترف تصوير ؟؟ أيضا ً الأمر بالنسبه ل انفورغيتن مافينا نحاكمه بهالطريقة لمجرد انو صورته ظابطه ..
جبلي ياها منشوره عالنت بتاريخ يسبق ادراجها باخويه و انا معك لكن غير هيك مافينا نطلق الأحكام و نحاكم عاساسها ..

و هي صوره شوط يا قمر اللي حكينا عنها :

صورة The Light :

يعني أنا قريت بأوّل موضوع الك (مورننج) , بشروط المشاركه بهالمسابقه , أنّه استخدام الفوتوشوب ممنوع قطعيّاً , وسيتم استبعاد الصور المستخدمه فيها الفوتوشوب , استثناءاً للّعب بالألوان (يعني مثل التبييض والتسويد وخدني جيتك).

فعلى أي أساس بتحكيلي قرّرنا اعطاء فرصه لوحده من الصّور , هالحكي مو مزبوط منوب , وفيو تشكيك بالأساس الي اعتمدتوا عليه بأختيار الصوّر . . ! !

ومن هذا المنطلق أنا أعترض وبشدّه على هذه الصّور , وأرجو أن يأخذ اعتراضي الغير مسبوق بعين الاعتبار .

شكراً

بداية ً هي الصوره ما أخدت فرصه من أيّ من المرشحين العشرة اللي حكينا انـّو رح يتم ترشيحهم و تم ّ ترشيحها كالصورة رقم 11 لذلك ما حدا تمّ استثناءه مشانها انما تمت اضافتها ..

أنا كنت واضحه انو يستبعد من المشاركة كل مين يستخدم الفوتوشوب للتعديل بعناصر الصوره نفسها باضاءتها بالوانها .. الخ صار في اسئلة كتير و صار في متل انو مش الجميع قدر يحدد هالعناصر اللي ما معلش نلعب فيها ..
فنزلت رد حضرتي بعدها قلت اي نوع من استخدام الفوتوشوب ممنوع .. ( هاد الرد كان بعد مشاركه ذا ليت نفسه لكن راسلنا بعض و ضل الكلام ساري على الجميع ) ..

بعد ما خلصت المسابقة و عم نختار العشر صور للي بدنا نرشحهم ..
وحده من المفاجآت (( اللي ذكرنا انو في مفاجآت )) كانت انـّو يتم اختيار صورة وحده تترشح من بين الصور اللي واضح انهم مستخدمين الفوتوشوب .. و كان في اجماع من قبل جميع اعضاء لجنه التحكيم على صوره ذالايت انو هي اللي تترشح عن هي المجموعة و بذلك صار ..

أيضا ً اللي شاركو بالمسابقة و حطو وقت و جهد ايضا ً و ما بيمنع نعطيهم فرصه مع ذكر انهم استخدمو الفوتوشوب و انو نحنا ما عم نرشحهم ضمن العشرة الافضلية انما عم نرشحهم لحالهم منفصلين اذا العضو بشوف انـّو اي و اوكي و حتى لو استخدم فوتوشوب بتحديد اطار اللوحة فبيستاهل بعد انو صوتله ففيه يصوتله يعني الحكي كان واضح و مباشر مش انو يابا قلنا مافي فوتوشوب و دخلنا بالمسابقة مع انو عامل فوتوشوب لانو امو بتعرف بنت خالتي ..


و برجع بقول انتظرو المزيد من المفاجآت


لكن قبل ما أحـّط ( أنا ) .. أنت أيضا ً ذكرت شي فيما يخص مشاركه Jimy و اطلقت اتهام ( ما ) بحقها فيا ريت ايضا ً اذا بعد بتحس انو عندك شي تقوله حولها تذكره لنتفاهم عليه و اذا ما عندك شي حيالها فبعتقد انك لازم تكون مطالب باعتذار لـ Jimy كونك اتهمته بردك و ما دعمت اتهامك بأي ّ اثباتات او ما الى ذلك ..

صوره جيمي اللي تم ّ ذكرها :



غير هيك اذا ما ضل عندك شي بعدها يا ريت تقوم بتسكير الموضوع من ادوات الموضوع ( على يسار الصفحه بالأعلى ) - ثم ّ اغلاق ..

[TheLight]

مرحبا جميعا....

ذا مورنينغ....اسف لاني حطيت نفس الرد بموضوع التصويت بس عم شوف انو وضعي لهاد الرد كتير مهم لانو موضوع الفوتوشوب يللي بالصورة صار سبب لاخد ورد كبار...ويمكن علي مسؤولية توضيح بعض النقاط:

1- الصورة وبكل تواضع هي من تصويري وباستخدام كاميرتي...وبدون أي مساعدة خارجية تقنية او غير تقنية...(لا كرتونة مثقوبة ولا غيرها)
الكاميرا المستخدمة هي Fujifilm S100FS
الاعدادات المستخدمة..فتحة العدسة 2.8....زمن التصوير 1/125 من الثانية...ISO 400

2- التعديل المستخدم بالفوتوشوب هو قص الصورة والتخلص من عدة سنتيمترات من فوق ومن تحت...اضافة الاطار...واضافة جملة (الى كريم)

3- ما في اي تعديل على المساحة السوداء المحيطة بالشمعة...ولا بالاضاءة ولا بالابعاد ولا تغميق ولا تفتيح ولا بأي شي تاني....بيكفي متل ما قال Ahmad اننا نمتلك أداة جيدة ونمتلك معرفة هالاداة لنقدر نحصل على هالصورة...
وليلي بيحب....هي هي الصورة الأصلية بحجم 4.38 ميغا بايت...

http://img11.imageshack.us/img11/4100/dscf1968w.jpg

وهي صورة تانية ع نفس المبدأ وبدون اي تعديل ولا تقنية ولا فوتوشوب ولا بطيخ

http://img20.imageshack.us/img20/3143/dscf1593h.jpg

بالختام...شكرا لكي من عجبته الصورة وكمان شكرا لكل من لم تعجبه الصورة....ونورتونا...
وبنحب نقول....
يللي ما يطول العنب...حصرما عنه يقول...

[..AHMAD]

مع الاعتذار المسبق عن التدخل ، توضيح تقني صغير بخصوص صورة The Light

الصورة اللي وضعها حسان عهالرابط بقياسها الأساسي وقبل التعديلات اللي قام فيها

ازا منفوت على الـ Properties تبعها ومن خانة Summary منختار Advanced

بيطلع عنا خانات عن الاعدادات المستخدمة بالصورة ونوع الكاميرة ، والبرنامج اللي تم التعديل او انشاء الصورة عن طريقو

الصورة الأساسية ، الخانة المعنية واللي بيهمنا نشوفها هية :

Creation Software
واللي ظاهر فيها البرنامج الملحق مع تعريف الكاميرا عند وصلها بالكمبيوتر

Digital Camera FinePix S100...

بالإمكان تنزيل الصورة الأساسية من الرابط التالي للتأكد

http://img11.imageshack.us/img11/4100/dscf1968w.jpg

لكن بحال لو تم استخدام الفوتوشوب بهالصورة هي متل المثال التالي قمت بالتعديل عليها ( فقط تغيير بالقياس ) وعملتلها حفظ عن طريق الفوتوشوب ولما تفوت عالخصائص تبعا وتتبع نفس الخطوات فيك تلاحظ انو تغيرت القيمة اللي بالخانة ذاتها تبع

Creation Software

لتتحول من Digital Camera FinePix S100...

لـ Adobe Photoshop CS Windows...

فيكن تنزلو الصورة المعدّلة بالفوتوشوب من الرابط التالي للتأكد

http://img521.imageshack.us/img521/2843/123bww.jpg

وهالإسقاط فيكن تعمموه ازا بدكن ع اي صورة شاكين فيها

ودمتم... شكاكين

[The morning]

كونه الموضوع صار توضيحي عن عدد من المشاركات المدرجه بالمسابقة فوجب نقل رد شوط يا قمر لهون كونه مش مسموح يتم الرد داخل موضوع التصويت :

رد شوط يا قمر عن تعليق بيستفسر عن استخدامه الفوتوشوب

:

تعا لئلك .. الصورة تبعت شوط ياقمر .. مافيا جنس الفوتوشب أو أيتها مقادير أخرى .

بس جلّ مافي الأمر أنو التصوير شغلتي بلحياة . مصوراطي انا يعني .. و هي الصورة نأخدت بوضع موسيقي بحت . كان في 3 عازفين عود . وكانت الحفلة عبارة عن استزكار أو تحية لروح الشاعر محمود درويش . فا تخيل الوضع . عود وموسيقى وطرب . وانا عمصور .
اي وبحب نوه انو هي الصورة .. كتير بتعنيلو ل شوط ياقمر . مع انو ممكن للي يشوفا للوهلة الأولى يحسا عادية . بس شخصياً بتعنيلي كتير . ليش مابعرف .

اي وبنحب ننوه انو شوط ياقمر كمرشح .. يراقب سير العملية الإنتخابية عن كثب .. وبطمنكن انو هوي راضي عن الأجواء الإيجابية السائدة بين المرشحين .



اي وصوطولي

بس في إحساس غريب عميئلي .. انو المراقبين الدوليين للعملية الإنتخابية الديمقراطية .. سوف تقوم بحزف ردي .. كنوع من القمع والكبت .

بس صوطولي .. اي

لاتنسو

[شوط ياقمر]

كاتب النص الأصلي : The morning

اي ياباشا ..

هادا بإعتبار انو انا مصوراطي متل ماحكينا .. وبعرف المستور والمخبا بئصص الإضاءة والتصوير والفوتوشوب . بئلك انو الصورة أعلاه . سهلة التصوير . والنتيجة يلي ظاهرة .. حتمية .. بهيك توئيت ( عند الغروب يعني ) وبهيك وضعية للمصور ( خلف الإضاءة . إلا وهي الشمس ) .

فا الصورة بعيدة كل البعد عن الفوتوشوب .

وكذلك الأمر بلنسبة لصورة the light . الزلمي حكا وشرح ووضح .. يلي صار . بلبراهين والأمثلة . بس صورتو فيا حرفية طبعاً .

انا ماعم قيّم طبعاً .. بس وبإعتبار نفتح هيك موضوع . وعندي خلفية فيه .. حبيت وضح . فقط لاغير

[leonardo_dicabreo]

كاتب النص الأصلي : The morning

لنكون جميعا ً بالصوره فرح حط الصور ضمن ردي هون ..


هي الصوره اللي عم تحكي عنها ..
أنو بالفن عامه مش مطلوب يكون معرّف الجسم لتكون الصور حلوه .. في كتير صور بتكون مقتطعه من اجسام و المستيري اللي فيها هي اللي بتشد الها لتبحث عن الكمالة مثلا ً عن الحل !
كذلك بالرسم في كتير ناس بترسم مجرد خطوط و بتنباع لوحاتهم بمئات و ألوف على انها فنيه .. يعني كونو انت او البعض او حتـّى كلنا ما عرفنا شو اللي مصوره فهاد الشي ما بيجعل صورته مش فنيه ..
على أيّ أساس .. قلنا سابقا ً انو هي المسابقة لتوثيق الاحساس لا الاشياء و اعتمادا ً على هالشي فما كان مطلوب يكون معرّف الجسم اللي عم يصوره لتتأهل صورته ..

أيضا ً نقطه .. متل ما واضح أنـّو في كتير اصوات اجت لصوره SelvI فما بعتقد كان اختيارنا الها خاطئ ..

اضافة لهيك فأنا ما لقيت صعوبه اعرف شو اللي بالصورة لكن مش رح بقلك ياه لارجع للمصوّر نفسه و اعرف اذا ما عنده مانع ..


يعني اذا المشاهد ما عرف شو يلي بالصّور ه , كيف بدّه يقيّمها , انها حلوه ولا لأ ؟ ؟

وأذا انتي عارفه شو يلي بالصّوره غيرك كتير مو عارف شو الطّبخه . . ! !

يعني المفروض الصّوره تكون معبّره ومفهومه بالكامل , مشان الواحد يستمتع وهوه بشاهدها ! !


بيكاسو كان رسام و ليس مصوّر ..

و أنا مافيّ أحكم اعتمادا ً على انـّو اذا الصوره حلوه فلازم تكون مسروقة .. حضرتنا دورنا بالنت ( بشكل طفيف عقدر ما بتسمح قدراتنا و وقتها ) و ما لقيناها فاذا انت بتجبلنا دليل انها مش تصويره بنأحطله مباشرة ً و حالا ً..

لكن ضلّك دوري من هون لسنه , واذا لقيتي شي عطيني خبر , يعني بفكرك لو بحثتي عنها عن طريق محركات البحث رح تطلع معك ؟ ؟

لكن بس اعتمادا ً على انو زاويتها و ابعادها و ألوانها ظابطين فلازم تكون مش تصويره .. هيك مافينا نحـكـم .. بجوز هوّ محترف ، بجوز عنده خبرة بهالمجال ..

والله كلشي ممكن بالدنيا ما بتعرفي ! !

و بهالسياق بذكر صورة شوط يا قمر اجى عليها تعليقات شي انو فوتوشوب شي انـّو معقول هالقد حلوه و تصويره و وو .. و هوّ فات و خبّر الجميع انـو هو ّ أصلا ً مصوّراتي حارتهم و هي رده :

أنا ما جبت سيرة صورة شوط يا قمر بشي فلذلك ما عندي رد ! !

أيضا ً الأمر بالنسبه ل انفورغيتن مافينا نحاكمه بهالطريقة لمجرد انو صورته ظابطه ..
جبلي ياها منشوره عالنت بتاريخ يسبق ادراجها باخويه و انا معك لكن غير هيك مافينا نطلق الأحكام و نحاكم عاساسها ..

لكن استنيني , شي سنتين زمان بكون جايلك اياها ! !

بداية ً هي الصوره ما أخدت فرصه من أيّ من المرشحين العشرة اللي حكينا انـّو رح يتم ترشيحهم و تم ّ ترشيحها كالصورة رقم 11 لذلك ما حدا تمّ استثناءه مشانها انما تمت اضافتها ..

أنا كنت واضحه انو يستبعد من المشاركة كل مين يستخدم الفوتوشوب للتعديل بعناصر الصوره نفسها باضاءتها بالوانها .. الخ صار في اسئلة كتير و صار في متل انو مش الجميع قدر يحدد هالعناصر اللي ما معلش نلعب فيها ..
فنزلت رد حضرتي بعدها قلت اي نوع من استخدام الفوتوشوب ممنوع .. ( هاد الرد كان بعد مشاركه ذا ليت نفسه لكن راسلنا بعض و ضل الكلام ساري على الجميع ) ..

هالكلام في تناقض كتير كبير ! !

بعد ما خلصت المسابقة و عم نختار العشر صور للي بدنا نرشحهم ..
وحده من المفاجآت (( اللي ذكرنا انو في مفاجآت )) كانت انـّو يتم اختيار صورة وحده تترشح من بين الصور اللي واضح انهم مستخدمين الفوتوشوب .. و كان في اجماع من قبل جميع اعضاء لجنه التحكيم على صوره ذالايت انو هي اللي تترشح عن هي المجموعة و بذلك صار ..

أيضا ً اللي شاركو بالمسابقة و حطو وقت و جهد ايضا ً و ما بيمنع نعطيهم فرصه مع ذكر انهم استخدمو الفوتوشوب و انو نحنا ما عم نرشحهم ضمن العشرة الافضلية انما عم نرشحهم لحالهم منفصلين اذا العضو بشوف انـّو اي و اوكي و حتى لو استخدم فوتوشوب بتحديد اطار اللوحة فبيستاهل بعد انو صوتله ففيه يصوتله يعني الحكي كان واضح و مباشر مش انو يابا قلنا مافي فوتوشوب و دخلنا بالمسابقة مع انو عامل فوتوشوب لانو امو بتعرف بنت خالتي ..


و برجع بقول انتظرو المزيد من المفاجآت

انا حاسس انه المفاجأه رح تكون انّه الصّور يلي تم أختيارها مو مهيّه الحقيقيّه ! !

لكن قبل ما أحـّط ( أنا ) .. أنت أيضا ً ذكرت شي فيما يخص مشاركه Jimy و اطلقت اتهام ( ما ) بحقها فيا ريت ايضا ً اذا بعد بتحس انو عندك شي تقوله حولها تذكره لنتفاهم عليه و اذا ما عندك شي حيالها فبعتقد انك لازم تكون مطالب باعتذار لـ Jimy كونك اتهمته بردك و ما دعمت اتهامك بأي ّ اثباتات او ما الى ذلك ..

لك عندي عندي :

يعني لحد الأن نفسي أعرف على أي أساس تم اختيار هالصّوره بالزّات , يعني الشروط كانت انه الواحد يصوّر اشي منظر حلو معبر خدني جيتك , بس يصوّرلي ورقه مكتوب عليها كلمه , وين رب المنطق برب الموضوع , يعني هالكلمه بتعبّر عن جماليّه , ولّا مشان جيمي صاحبنا بندعمه ! !

غير هيك اذا ما ضل عندك شي بعدها يا ريت تقوم بتسكير الموضوع من ادوات الموضوع ( على يسار الصفحه بالأعلى ) - ثم ّ اغلاق ..

خلّيه شوي على شو مستعجله ! !

يعني كنت بتمنّى تكون الأداره منصفه بالأختيار وما يكون للمحسوبيات والصحبه مكان بهالمسابقه ! !


وبعتذر من الشباب ما قدرت رد عليهم , بس كلهم بيجمعو على نفس الشّي , فـــ ما في فايده ! !


الموضوع مغلق