البيت .... الأهل .... الأولاد ... الأخوات

[whiterose]

الموضوع كتير حلو

هلىء انا من النوع يلي كتير بحاول حافظ على الروابط الأسرية يعني ماعندي مشكلة
قدم تنازلات لأحصل على رضى امي وابي وحتى اختي واخي

ولو الحق مش عليي

وفعلا هيك كتير قدرت اتجاوز واتجنب مشاكل ومشاحنات عديدة

لكن انك تقدر تحصل على علاقة مثالية مع الأهل وحتى اخوتك شيء شبه مستحيل

الأهل دائما بشوفوه حالهم صح
ونحنا دائما منشوف حالنا صح

لهيك نصيحتي لكل واحد فيكم بس ياخد البكالوريا ويقرر يدرس اي شيء
يشتغل ولو ب 100دولار بالشهر

لتتخلص من سلطة والديك عليك بالاستقلال المادي وهيك انت عيني

[Gazita]

ابو اللول والله مافي احلى من البيت وجو العيلة والاكل في سفرة وحدة.
يمكن اذا حدا كان عندو مشاكل بالبيت بيفضل يبقى برا لحتى تهدى النفوس.بس ياريت نتفادى المشاكل مع بعضنا لانو بجد راح نشتاق في يوم من الايام ل لمة العيلة..وساعتها اذا حبينا نجتمع ماراح نلاقي مناسبة.
في عوامل كتيرة بتخلي الواحد يتحسس من جو العيلة خصوصا بمرحلة مابعد الباكالوريا لانو ساعتها بتوصل للجامعة وبيصير الواحد اكتر تطلبا للمصاريف.بس اهم شي مايكون حساس زيادة ويحط في بالو انو راح ييجي اليوم اللي يشتغل فيه ويصير عضو نشيط بالعيلة ويصير هوي كمان يهتم بمصاريف البيت ويجيب هدايا لابويه واخواتو .ساعتها راح يحس بقيمة العيلة اكتر.
ابو اللول لساتك زغير انشا الله بس تشتغل ويصير عندك بيت مستقل عن اهلك راح تحس بقيمتهم وساعتها رغما عنك راح تلاقي حالك ببيت اهلك مشان تقضي معهم احلى الاوقات.
اختك ام انس

[أبو شريك]

الحب متل ما حكيت انتا ، الحب بين الاخوه بضل موجود و عميق .... بس على السطح بكون في شويه كره سببو الخناءات والمشاكل اللي بتصير كل كم ساعه << كل كم ساعه للمحظوظين ، في ناس كل نص ساعه لازم مشكله / امثالي


المشكله هي انو لما عم تصير المشاكل والخلافات ما عم تنحل بشكل صح ، يعني عم نعالجها بصياح و بهادل او زعل ومخاصمه ، وهيك بتتراكم مشكله ورا مشكله ، وكل مشكله ما بتنحل ..

واكتر شي بيزعج الانسان يكون عندو مشاكل متراكمه وبدها حل ومو عرفان يحلها .. ( تذكر ايام الدراسه وكيف بتصير حالتك لما يطلع عندك 5 بحوث و 7 واجباتو 3 امتحانات لازم تخلصن خلال اسبوع وانتا مو عارف كيف تدرس ولا ايمتا تدرس .... شي بيحول ما ؟ ) اي نفس الشي ، بتصير معنا مشاكل بالبيت وما منحلها صح ، بالاخير بنزهق وبنطفش



طيب في ناس مبسوطه ببيوتا ؟؟


اي طبعا



كيف ؟؟



هدول الناس اللي عرفانين يعالجوا مشاكلهم ، عندهم المعرفه والقدرة على حل هالمشاكل ، فما عندي مشكله لو صارت عندهم مشاكل ، بالعكس بعد كل مشكله وكل خناقه بصيروا احسن ..


انا بعتبر البيت حقل الغام .... قصدي حقل تدريب ، مرحله تدريب وتأهيل لباقي العمر :

نجاح علاقة الانسان مع اخوتو الصغار العفاريت رح يحدد نجاحو بعلاقتو مع ابناءو ..

نجاح علاقتو مع اخواتو اللي بعمرو رح يحدد نجاح علاقتو مع زوجتو ..

نجاح علاقة مع ابوه وامو رح يحدد نجاح علاقتو بشغلو مع رؤساء عملو ..


خود حياتك بالبيت كانها مرحلة تدريب .......... وعلى قد ما بتتعب لتعيش هالمرحلة حلوه ، على قد ما رح تصير باقي مراحل حياتك حلوه



انا هيك عم بعمل ، وفي كتير اشياء بيعملوها اخواتي الصغار و الكبار واهلي بتجنني ... بس عم بمشي على هالمبدأ وعم حاول اتعامل مع كل مشكله بافضل شكل ممكن لحتى حياتي بعدين تكون ناجحه و ممتازه .. بالنهايه ما حدا رح يستفيد قدي

[مايسترو]

انا باخر 4 سنين عشت لحالي

انو اهلي مسافرين وكنت بحمص وهلق بمصر وهيك

انو اسوا شي انو الواحد يعيش لحالو بعيد عن اهله

انو بتفوت عالبيت ما بتلاقي امك مثلا بتلاقي الحيط هيك على طول

انو شغلة حلوة بس مع العيلة احلى بكتير بجد

[باشق مجروح]

هلق الاهل هني اكتر شي حقيقي بحياتنا لأننا منشوفهون متل ما هني بدون تصنع . انا رأيي وجودنا معهون على طول واحتكاكنا المستمر فيهون على الرغم من انو كل واحد فينا حفظان التاني عن ظهر قلب بيولد الروتين والملل . ولأنهون ما بيجاملونا منحس انو هني ضدنا او ما عم يفهموا علينا . ببساطة برا البيت منشوف ناس جداد مو خاليين من التصنع . برا منتعرض لضغوط ومشاكل . مكانها الدائم للتفريغ بالبيت ومع الاهل لأنو هني الوسط الوحيد المتاح . وبالأخير منضل ما منتصور شكل الدني بلاهون . وسألني انا الي بتمنى روح هلق بالطيارة وبوس ايد ورجل ابي و امي وارجع من المطار . حتى اخواتي الي ما بتفاهم انا وياهون كل يوم ما بغمض عيوني الا وانا بتخيلهون . متل ما قلتلك الشي الحقيقي الوحيد تقريباً بحياتنا .

[أبو شريك]

احد اصدقائي وحيد على 3 بنات ، دايما بقلي : بتمنى يكون عندي اخ لـ حسّ بالاخوه ، وبتدمع عينو ..

وبعرف واحد هون بالكويت وتنين بسوريا ، لا عندهم لا اخ ولا اخت وحيدين ، وحلم حياتهم يكون عندهم اخ واحد ..



الحمد لله على نعمه الاخوه

[sandra]

ما في أحلى من العيلة
هلا لأنك معهم طول الوقت بتضيق خلاقك منهم وبتختلفو وأوقات بيفكر الواحد يبعد عن أهلو بس ليخلص من النق
بس ابعد عنهم شوي بتحس بأهميتهم وبتحس أدي أنت بحاجتهم ... هالشي أنا لمستو ببعدي عنهم أنو صحيح كنا نتخانق بس مو دايماً الحق عليهم .. نحن أوقات كمان منصير غير محتملين ...
كتير تفاصيل كانت تزعجني فيهم هلا بحس إني عم اشتقلا أوقات ... مو دايماً ها

في شغلة عنا نحن بمجتمعاتنا
العيلة مهمة وفي ترابط عائلي أحسن بكتير من غير مجتمعات كالغربية
بس تسلط الوالدين عندنا مزعج جداً
يعني لهلا الأهل ما عم يقدرو يقتنعو أنو ولدنا هو كيان مستقل عننا حقو الطبيعي يكون الو درج يحط فيه خصوصياتو ... حقو الطبيعي لما يحكي تلفون يسكر الباب على حالو لأن ما بدو حدا يسمع
في فرق بين أنو تنبنى علاقة ثقة وصراحة بين الأهل والابناء وبين التدخل والتسلط يلي عم يصير

لتتخلص من سلطة والديك عليك بالاستقلال المادي وهيك انت عيني

صح فيها وجهة نظر ... الاستقلال المادي بيلعب دور كبير ...
بس شو مشان عنا الواحد بيشتغل بيتزوج وبيصير عندو عيلة ولسا أهلو بيتدخلو فيه

[أبو شريك]

ابو ويليم ... تذكرت فيلم شفتو من فتره ، بيحكي عن الاهل .. الاولاد .. وبالبيت .... فيلم حلو كتير ، كوميديا على دراما على شي فوقاني كتييير ... اذا قدرت وكان معك وقت فبنصحك تشوفو

هاد بوسترو :

[alhralhr]

اخي العزيز احييك موضوع مهم ومن الضروري والواجب الرد عليه...اول شيء ..نحن الادميين يعني البشر سبحان الله ميزنا عن كل مخلوقاتو بالعقل هي اولا....ثانيا ميزنا بميزة كتير بشعة هي عدم الرضا .وكثرة التطلب...وللتبسيط ,..انا شاب الي عايش لوحدي 3 سنوات ...بتعرف شو بتمنى..يكون عندي ميت اخ ينكدو حياتي بس يكونو موجودين معي بالبيت نفسو ....سبحان الله الي قال فاقد الشيء لا يعطيه ما غلط...