قول بشو عم تحلم .. بقلك مين أنت ؟

[flower bomb]

بس الانسان يبطل يحلم ويتشوق للعيد متل الطفل الزغير بيكون بلش يموت, وبما انوا الموت نتيجه طبيعيه لنهاية الحياة بتكون حياة الأنسان انتهت بس ينتقل من مرحلة الطفوله إلى مرحلة الشيخوخه الفكريه .. أي الشيخوخه الفكريه لانو العمر مش المشكله،المشكله هي طريقة التفكير وهيدا ما بيعني انو يلي بيفكر بنضج بيكون تفكيرو ذاهب إلى الزوال انما يلي بيفكر بنضج بيعرف كيف يحافظ على روح الطفوله والبرائه والحلم يلي ما بيموت , ويلي بفكر بنضج هو أو هي يلي بيشوف الفرص وما بيشوف العوائق .



اليوم كلنا منعرف شو عم بيصير حوالينا وما حدا بيقدر يتحجج ويقول ما بعرف ويمكن منشان هيك كتار بيتخبو ورا كلمة انو أنا بعرف ومش عايز حدا يخبرني… بس في مرات كتيره عم ننسى أبسط الأمور يلي الطفل الزغير بينتبه لالها أكتر منا نحنا بتعرفوا ليش ؟؟ لانو الطفل بعدو عم يتطلع بعيون بسيطه وبريئه ومش مليانه أحكام مسبقه ومش ملوني بألوان مذهبيه وطائفيه ..

انو ما حدا بيقدر يقول شو بدو الشب والبنت وبشو عم يحلموا ؟ شو يعني انو الشب المسيحي بيحلم أحلام غير الشب المسلم ؟ انو إذا كانوا تنيناتن بيأمنوا بالله وبدن يروحو عالجنه دخلكن كم طريق بيوصلو عالجنه ؟ وإذا كانو تنيناتن بيحبو يتعلموا ويكونوا منفتحين وبيحبو كل الناس … كيف ممكن يحلم الشب المسلم بطريقه متناقضه مع الشب المسيحي ؟ الجواب هو مش ممكن لانن تنيناتن بشر وخلقة الله بغض النظر إذا كانو بيأمنوا بالله أو لا . انو مين قال للشب المسيحي انو حلمك منو مسائب على حلم الشب المسلم؟ ومين قال للبنت المسيحيه انو قيمتك أكبر إذا تجوزتي مسيحي ومين قال للبنت المسلمه انو الشب المسلم رح يعاملك ويحبك ويحترمك أكتر من الشب المسيحي ؟ مين خربطلن أحلامهن ؟ مين قال أنن صارو كبار وبطلو يكونو أطفال ؟ مين لعبلهن بعقلهن ؟ اللعبه الوحيده يلي الكبار بيعرفو يلعبو فيها اسمها … فرق تسد … نعم غير شي ما بيعرفو يلعبو لانن صارو كبار والشيخوخه الفكريه عم يعمموها عالاطفال ت ما يعودو يحلمو … أنت يلي عم تقرا هالمقال أسأل حالك سوأل ..أنا بشو عم أحلم وهل بعدني طفل حالم أو صرت ختيار؟

ألان صفا