فزعانه يا قلبي اكبر بهالغربه

[The morning]

و ما تعرفني بلادي ..

.. مـقطع من أغـنيه فيـروزيّـه بتذكرني بشكل شخصي بصـباح دمـشقي عم يـبوس جبين الدخنه اللي طالعه من فنـجان الـقهوه بـخجل بيمشي على أصابعي مع النـسمه البارده عم تفركهم سوا ..

و بـعد الحلم ..

لنـرجع للـواقع هلئ .. بعيدا ً عن الأحلام و المـثاليات و الرغبـات و الطموحات .. هل بنقدر كـأشـخاص تربينا في الغربه نـرجع نـعيش بسوريا ؟؟

هل هالخيـار صحـّي ؟؟

في حلـقه قديمه كتير من مسلسل مرايا بتطلع فيه سـلمى المصري بعد وفاه جوزها رجعت مع ولادها التلاته لانو بدها تربيهم بـ " الوطن " و بـعد فـتره شي كم اسـبوع أو كم شـهر بتقرر تـرجع عالمـغترب لأنها لا هي ولا ولادها بيقدرو يتأقلمو مع وضع البلد اللي بكون الجديد عليهم ..

طـيب بهـيك حاله شـو الحل ؟ و هل الحل الـصح أنـّو نترك و نمـشي ؟؟

و

لايمت ؟؟

[Nay]

هالبلد بعمرا ما كانت غير ألكون.. وإلنا.. بعمرا ما كانت لهدول الناس الل خلو سلمى المصري تطفش بالمسلسل..
بس انت بدك تكون مستعد لكل شي.. يعني الي بدو يرجع لازم يعرف كل شي عن البلد لحتى ما ينصدم.. متل ما صار بكتير ناس حبو يرجعو وانصدمو بالواقع ورجعو على اوطانهون المستعارة.. او ماتو بحسرة..
مثل صاحب شركة القدموس اللي كان ناوي يعمل اهم شركة نقل بسورية.. ولاسباب لايصح ايرادها هون.. انصدم..
مثل كمان صاحب شركة الجولان للنقل اللي دفع مبالغ طائلة في سبيل يرجع على بلدو.. فشلت الشركة فشلا ذريعا.. وهوي مات السنة الماضية بالجلطة..
واخيرا منتذكر كلياتنا الوزير السابق الدكتور عصام الزعيم اللي اجا على سورية من بلاد المهجر ممثلاً للفكر الجديد الذي يطرحه الرئيس بشار الأسد وخرج منها متهما بتهم فساد وقلة ادارة !!....
بالمختصر .. اللي بدو يرجع على البلد ..بدو يكون مستعد لتقديم تضحيات.. وتلقي صدمات .. وبدو يرجع وما يتوقع حياة سعيدة ..
بدو يرجع مشان يساعد البلد وما تساعدو هيي.. واذا كان هادا الشي ما بيناسبو فهو كتييييير معذور

[Sun Shine Art]

هلى هي الحالات بتصور انسب شي يحكي عنها هو المغترب ...كونو عايش الحالتين ..متل حالتك وحالتي وكتير ناس ..
انا بدي احكي نقطه بهل الموضوع ومحدا يفسرها ع كيفو ...

انا عايشه بالغربه ..وكتير بحس بالحنين والشوق لايامي الماضيه بالوطن ...بس لما بنزل وبضل فتره ..بحس حالي لح اختنق ...وبس بدي ارجع ...يمكن لان عشت الجهتين ..,بكل حالاتون ومابحس ما بقدر ارجع

ولاكون صريحه اكتر ..واقعيا ..مابقدر ارجع وعيش بالوطن ...بس لما بحلم ...بحلم ارجع متل الاول ..

الحل صعب كتير بس بتصور اذا الواحد قضى اجازات تحت وكفى العيشه هون ممكن يحاول يتأقلم ..

في نقطه تانيه بواجهها كتير ...مع الناس المقربين ...لما بسالوني ما بترجعي ومو ناويه ترجعي تستقري هون لما بجاوب ب لا ..بيستغربو .انا بضيف شغله ع جوابي انه الي تحت في امور كتير غامضه عليون وعن الحياه الي برى ان كانت بحلاوتها ولا مرتها بس صعبه كتير يفهموها اذا ماعشوها ......
وبالاخير ما منعرف وين بدنا ننشلح ..

ويسعد صباحك the morning

[The morning]

كاتب النص الأصلي : Nay

بالمختصر .. اللي بدو يرجع على البلد ..بدو يكون مستعد لتقديم تضحيات.. وتلقي صدمات .. وبدو يرجع وما يتوقع حياة سعيدة ..
بدو يرجع مشان يساعد البلد وما تساعدو هيي.. واذا كان هادا الشي ما بيناسبو فهو كتييييير معذور

سلامات بدايه ً ..
أنا بتفق معك للعـضم بهالجملتين .. بتفق معك لأنـّو كلنا عنّـا مسـؤوليه اتجاه البلد و بـغيابنا بنـشارك باهمال هالمسـؤوليه ..

** هامش ,
ما بدي اتفلسـف كتير و اعطي نـظريات كتـير و الحـكي ببلاش لـكن مجرّد نـقاش و أفكـار عشـوائيـّه

[The morning]

بس لما بنزل وبضل فتره ..بحس حالي لح اختنق ...وبس بدي ارجع ...يمكن لان عشت الجهتين ..,بكل حالاتون ومابحس ما بقدر ارجع

احكيلك سر و يضل بيناتنا ؟
أنا بس كـون بـسوريا بـصير أحيانا مابعرف حالي ! بـحس مطره جامل كتير ناس و مطره سـاير و اســــــــــــــمع حكــي من فـلان و تـنقيره من عـــلان .. و بـصير بـعصب على غيـر عاداتي اليـوميه .. بس ما بـخفيكي أنـّي بفضل كـل هالشـي على لـحظه اللي بـدي أطلع فيها بالـطياره و شـوف الشـام من الـسما لآخر مرّه و دوّر عبيتنا و السياره اللي وصلتني عالمطار .. يعني بقـصد بالرغم من كل هيـك فأنا بـحس أنـّو اللي بـحاجته الوقت ليس الّا و بعدها بيمـشي الحال بـرجع بتبنى شـخصيتي بتجرّد ..

ولاكون صريحه اكتر ..واقعيا ..مابقدر ارجع وعيش بالوطن ...بس لما بحلم ...بحلم ارجع متل الاول ..

أنا شـخصيا مابعرف اذا فيّ او لاء .. عـطول بفكر انو فيّ بـس خايفه ما يكون فيّ و أكل غول مرتب ! و لكن اللي بعرفه انو اذا ما رجعت فحـياتي رح بتـضلها وافقه على الـ pause .. انـّو هيك بـحس هون .. الحياه وافقه لـترجع تكمّل بسوريا و هي كلها مرحله مستقطعه ..

الحل صعب كتير بس بتصور اذا الواحد قضى اجازات تحت وكفى العيشه هون ممكن يحاول يتأقلم ..

لا أنا برأي اذا ما بدو يـرجع و نـهائيا ليش الواحد يعـذّب حالو و أهلو بـأنـّو يضلو يشوفهم و يودعهم يا زلميـّه عزاب نفسي رهـييب القصه ..

ويسعد صباحك the morning

يـسعد أيامك شمسنا الصغيره

[مجنون يحكي وعاقل يسمع]

يسعد صباح الصباح
الموضوع بدو صفنات كتييير , بس يمكن ماعاد خايف أنا أكبر بهالغربة ، لأن كل يوم الصبح لما بنضرب على قلبي وبفيق قبل الشحادة وزوجها وبروح غسل وجهي بعد ما بكون وقفت عالحيط نص ساعة وأنا أتفقد الصور المتكية عالحيط وأحكى معها ،وأحيانا بنسى حالي وبحكيلها قصص , وبوصل عالمغسلة بتكون الوجوه صارت مكسرة بعيوني وما عاد تبين الملامح وبقول بعدو الحبايب بيعدو بعدو الحبايب , وبضرب على وجهي جوازين تلاتة مي وبحاول ما شوف وجهي بالمراية , لأني بخاف أنا ما أعرف وجهي بس ياترى بلادي مارح تعرفني أكتر مما بعرف نفسي
ومرة واحد من الشباب طلب من كل واحد منّا يختصر الوطن بكلمة أو بكلمتين , فضحكت ومشيت , وتاني يوم بعتلو إيميل بيحكي عن الوطن ومن أسبوع وأنا عم فكر نزل الإيميل بالأخوية
ورح أرجع عالموضوع مرة تانية

[Reemi]

مثبت

وإلي رجعه للرد

[باشق مجروح]

ليكي .
أول شي ميرسي ع الموضوع الظريف .
تاني شي . الانسان بطبيعته بيحب الحرية ( هي نقطة ) . والانسان بطبيعته بيحب مكانو الاصلي ( نقطة تانية ) . كونو هالشيئين بصراع مستمر في دولنا . ( يعني لما كون ببلدي بتكون حريتي أضيق ) لأنو مضطر امشي مع العادات . ومضطر أطّر حالي باطار الاجتماعيات وحكي الناس . فـ :
المغترب بس يخرج من هالحدود والحواجز الي بتخنق حريتو ( مع فروق المكان والمجتمع ) ويعيش بمكان اخر بيحققلو حرية اكبر قد تكون مطلقة ( مع فروق مكان الاغتراب ) بس بكل الحالات اكتر من المكان الي بيكون بين ناسو , فـ بيوصل لحرية اكبر بتحققلو الراحة حسب النقطة الأولى بس بيبقى حب الوطن عندو يعذبو حسب النقطة التانية وهالنقطتين رح يضلو يتصارعو .
بيحس بالحنين لبلدو بالغربة , والغربة عن حريتو ببلدو .

الحل :

اما بيرجّع الزمن لورا و بيتنكر لكل الحرية الي عاشها ( او الي بيخاف منها ) وبيرجع متل ما كان قبل وبيستسلم .
او بيحارب العادات وبيخلق لحالو هامش حرية اكبر وبيستحمل تبعات هالحرب .
أو ما بيرجع بنوب غير زيارات وبيتحمل الحنين للوطن كرمال الحفاظ على هامش حريتو .

هاموش :
في حالات بتطلع برا البلد وبتعيش بنفس القوقعة الي كانت عايشة فيها وبتضل منغلقة وهالفئة من الناس كتير سهل عليها ترجع بدون اي مشاكل .

[ritka]

انا ما بخاف ما تعرفني بلادي... هيك وهيك بلادي ما بتعرفني..بيكفيني اني بعرفها
عمري ما دخلتها لفلسطين...
عشنا بـ الاردن.. ولهلا ما بتزكر ولا يوم حسيت فيه بــ لانتماء للاردن (يمكن لبيتنا..للحارة..الخ)بس هاي شغلات مقدور عليها لانو كمان عشنا بالسعودية! و ما كنت انزل ع الاردن الا بالصيف!!! (ايام ما كنا بالسعودية)

هلا المغزى من كل هالحكي انو في بعض الحالات بتحس فيها بالحنين و الانتماء لشي مستحيل تكونو
او خيار الرجعة ممكن يكون حلم بعيد... بعيد كتير و ما بعرف ازا رح اقدر اساسا اوصلو...

بالنهاية.. متغربة و متغربة اتغربلي بشي بلد يحترمني و يعطيني الحرية احسن (منطقيا) لانو ما عد تفرق..

و هي الك و لموضوعك الحلو...

[شامي للنخاع]

موضوع عم بيضروب بصميم.......كل يوم بيجي.......بقول خلص حاجة لازم ارجع.....تعبت من رب هل الغربة السودة........الي عم بتسروق ايام....وأحلامي...........بس بطلع هيك......لك وين بدي ارجع.........لك بموت عا بلدي.......بس وقت برجع عا بلد بحس حالي دايخ........لك مضيع الوجوه.......مدري الوجوهمضيعتنا.........من بيتنا لاهلي.....لصحابي..........حتى بخاف اطلاع بل الحجار لتكون نسيتني..........كمان بطلع.........كمان بدي ربي ولادي بل الغربة..........يطلعو غريبن عن ارضون....واهلون.........المشكلة معقدة كتير..........وما عم بقدر لقيلها حل
موضوع حلو كتير
تحياتي

[a7la lolo]

ما بظن انو حدا من أهلي عم يفكر انو يتأقلم مع الحياة بسوريا .. وأنو نعيش بقية حياتنا بسوريا ..
بس أنا ماني مسدقة ايمتى اخلص البكلوريا .. لحتى عيش ببلادي ...
وهي شغلة إرادة .. كل واحد وهو يلي بقلبو من إرادة .. وحتكون كتييير صعبة لو كانت إجبارية الشغلة

يمكن الواحد اذا كان مضطر رح يجبر حالو ويغصب حالو عالتأقلم .. أما اذا ما بيقدر.. فرح يضطر يرجع عالبلد يلي عايش او مقيم ومتغرب فيها لوقت ما يفرجها ربو وتتغير أحوالو ..

[abosleman]

بعد صفنة لقيت انو الرد لازم يكون فيروزي متل العنوان


فـ لو بئدر لفتش عليك ولـ لئيك .. الكذبة الغيم المارئ والمنفى سميك
عطيني اهرب منك ساعدني انساك .. اتركني شوف الاشيا وماتذكرني فيك

و.. ندهتك خلصني من الليل وياريت ... نرجع ..إلنا اشيا نحبا وعنا بيت
صدقني لو بئدر اتحمل عذاب ... عذاب الاشيا كلها ماكنت فليت
ولا كنت حرئتا حياتي .. وحرئتك ... بس يا ريت

بس كمان .. إذا رجعت بجن وإن تركتك بشئى ... لاقدرانة فل ولا قدرانة ابقى
شو بكره حياتي لما بشوفا عندك ... يا بتحرمني منها يا بسرئها سرئة


ويطول الشرح ...

شوش ..

[butterfly]

رح طول بالرد اعذروني
أول شي في جملة لكوليت معلقتا ع الخزانة هيك كاتبتا ومعلقتا لتذكرني كل يوم أنا ليش هون " يعني هالمشكلة والمعضلة ما بس بيعانوها اللي برا ، نحنا اللي جوا منسأل حالنا ليش باقيين ولأيمتى ؟ ورح نربي ولادنا هون أو لأ ؟ "
هالجملة بتقول
" كنت أمام خيارين أن كون سورية في الغربة ، أو غريبة في سوريا
واخترت الحل الأصعب وبقيت "

أول شي بدي أبدي استغرابي من اللي ساكن بوطن عربي ومستصعب العودة للبلد ، لأني بكل شوفينية " بشوف المجتمع السوري ، والتجربة السورية والحياة بسوريا والعلم بسوريا والناس و الكتاب والموسيقى ولك حتى الأكل هو أفضل من كل المحيط .. ( ربما أستثني لبنان يعني مشان ضميري يكون مرتاح )

هلق بعد ما نتفق عن أنو هالبلد مسؤوليتنا ، يبقى هالمسؤولية بيجي معها ضرائب ، وللأسف بحالة سوريا عم تكون هالضرائب كبيرة شوي ..

يعني يا جماعة أنو اللي ما حابب يرجع لأنو المجتمع ممكن يقيدو اجتماعيا ، بعلاقات و طريقة حياة مختلفة شوي ! فأنو هادا ما بعرف إذا بفهمو
يعني كرمال البلد اللي بتحبا والمفروض تكبر فيك ، وتتغير فيك ما عندك استعداد شوي تجابه مجتمع ! إي مشكلة
لك مين قال التغيير بيجي ع مهل ولا شوي شوي ؟ مين قال انو في تغيير بالدنيا ما فيه الم ؟

أنا اللي بفهمو تماما ً ، هو اللي ما بيقدر يرجع لأنو سوريا ما عاد فيها مكان الو ، لطموحو ، لفكرو ، لأفكارو ، لعلمو
يعني كل اختصاص علمي فريد بالدنيا ، كل الأشخاص ذوي المؤهلات العالية ، كل هالناس هدول إذا بيجو بيعيشو بسوريا ما بعرف شو بيعملو ، بس اكيد بيكونو حدو حالن وحدو طموحاتن
وطبعا كل الناس اللي وجودا بسوريا بيكون بيهدد امنا ، وسلامتا وسلامة عيلتا للأسف
هدول أسباب بقدر أفهمها لأنو الناس ما ترجع ع سوريا ، وبفهمها بغصة ع البلد
بحرقة ع البلد كبيرة كتير

بس بيوم من الأيام ما نسأل هالبلد ليش ما عم تتغير ؟ وليش هالبلد ما فيها شباب ؟ وليش وليش ؟
لأنو هالبلد كيف بدا تتغير ، إذا أول ما منكبر شوي ، منصير أكبر من أنو نقدر نعيش فيها

بحلم وبقلب محروق ، اقدر ربي ولادي بسوريا واقدر احكيلن عن سوريا بفخر ، واقدر حسسن أنو هالبلد واجبن ومسؤوليتن ،
بخاف أي كتير بخاف ،وبحس هالحلم صعب ، وبنقهر وقت بشوف أغلب الشباب اللي أنا فخورة أنو مرقو بحياتي يا برات البلد ، يا عم يحلمو يكونو برا

"أُحبّك يا بلادي كما يحبّ العاشق التاعس امرأة بين قلبه وقلبها رباط لا يفصم، وبين حالته الروحيّة وحالتها هاوية لا تجتاز...ولكنّ النار التي يضرمها الله لا يقدر الإنسان على إطفائها، وخير لي أن تسحقني تقاليدك ويقتلني تعصّبك ويذري جهلك برمادي إلى الرياح من أن أرضى بفسخ هذا القران بيني وبينك".

فيلكس فارس

[Sun Shine Art]

كاتب النص الأصلي : butterfly

رح طول بالرد اعذروني
أول شي في جملة لكوليت معلقتا ع الخزانة هيك كاتبتا ومعلقتا لتذكرني كل يوم أنا ليش هون " يعني هالمشكلة والمعضلة ما بس بيعانوها اللي برا ، نحنا اللي جوا منسأل حالنا ليش باقيين ولأيمتى ؟ ورح نربي ولادنا هون أو لأ ؟ "
هالجملة بتقول
" كنت أمام خيارين أن كون سورية في الغربة ، أو غريبة في سوريا
واخترت الحل الأصعب وبقيت "

أول شي بدي أبدي استغرابي من اللي ساكن بوطن عربي ومستصعب العودة للبلد ، لأني بكل شوفينية " بشوف المجتمع السوري ، والتجربة السورية والحياة بسوريا والعلم بسوريا والناس و الكتاب والموسيقى ولك حتى الأكل هو أفضل من كل المحيط .. ( ربما أستثني لبنان يعني مشان ضميري يكون مرتاح )

هلق بعد ما نتفق عن أنو هالبلد مسؤوليتنا ، يبقى هالمسؤولية بيجي معها ضرائب ، وللأسف بحالة سوريا عم تكون هالضرائب كبيرة شوي ..

يعني يا جماعة أنو اللي ما حابب يرجع لأنو المجتمع ممكن يقيدو اجتماعيا ، بعلاقات و طريقة حياة مختلفة شوي ! فأنو هادا ما بعرف إذا بفهمو
يعني كرمال البلد اللي بتحبا والمفروض تكبر فيك ، وتتغير فيك ما عندك استعداد شوي تجابه مجتمع ! إي مشكلة
لك مين قال التغيير بيجي ع مهل ولا شوي شوي ؟ مين قال انو في تغيير بالدنيا ما فيه الم ؟

أنا اللي بفهمو تماما ً ، هو اللي ما بيقدر يرجع لأنو سوريا ما عاد فيها مكان الو ، لطموحو ، لفكرو ، لأفكارو ، لعلمو
يعني كل اختصاص علمي فريد بالدنيا ، كل الأشخاص ذوي المؤهلات العالية ، كل هالناس هدول إذا بيجو بيعيشو بسوريا ما بعرف شو بيعملو ، بس اكيد بيكونو حدو حالن وحدو طموحاتن
وطبعا كل الناس اللي وجودا بسوريا بيكون بيهدد امنا ، وسلامتا وسلامة عيلتا للأسف
هدول أسباب بقدر أفهمها لأنو الناس ما ترجع ع سوريا ، وبفهمها بغصة ع البلد
بحرقة ع البلد كبيرة كتير

بس بيوم من الأيام ما نسأل هالبلد ليش ما عم تتغير ؟ وليش هالبلد ما فيها شباب ؟ وليش وليش ؟
لأنو هالبلد كيف بدا تتغير ، إذا أول ما منكبر شوي ، منصير أكبر من أنو نقدر نعيش فيها

بحلم وبقلب محروق ، اقدر ربي ولادي بسوريا واقدر احكيلن عن سوريا بفخر ، واقدر حسسن أنو هالبلد واجبن ومسؤوليتن ،
بخاف أي كتير بخاف ،وبحس هالحلم صعب ، وبنقهر وقت بشوف أغلب الشباب اللي أنا فخورة أنو مرقو بحياتي يا برات البلد ، يا عم يحلمو يكونو برا

هلى انا ما بتفق معك بموضوع انه ان كان البلد عربي او اجنبي بالاخير هي غربه بكل معنى الكلمه ....ولما بتعيشي بالغربه ان كانت ببلد عربي او غير الصعوبه نفسها بتلاقيها بالتفكير بالرجعه
اما انه مجتمع سوريا له خصوصيته متل ما حكيتي انا بايدك بهل الشي ...وبحب ضيف انه مجتمعنا منفتح ومثقف اكتر من من غيرو من البلاد العربيه ع الاقل ...

اما لما بدنا نجي ع التضحيات .. انا معك بس هل التضحيات الي بدو يقدمها الشباب لازم تتوفر الها كتير امور ومعطيات وهي للاسف مانها موجوده..وصعبه كتير نتوجد ...انا عم احكي عن تجربه شوفي الشباب من 15 سنه كيف كانت احلامون وطموحاتون ..وقارنيها بهل الوضع ....يمكن انا متشائمه بجوز لان عم اكبر ومريت بهل التجربه الي حيكتيها وما لقيت النتيجه الي كان بدنا ياها ...ولما بطلع ع الوضع ..هلى ما بشوف انه مشجع او جاهز لهل التغير الي عم تحكي عنو .......وانا اكيد بتمنى من كل قلبي بلدي يكون احسن البلدان واكترها تتطور بكل النواحي ...بس امسحولي انا كمان كتير واقعيه ..لما عم شوف الواقع عم حس بالالم اكتر



انا عم احكي عن تجربه ...وما تفكرو ا ابدا انه موضوع الرجعه للمغترب سهل او حتى الغربه سهله ....

ع قد ما بتعطيك الغربه ع قد ما بتقتل فيك كتير امور ..... ومنضل هيك ما منعرف هون ولا هونيك ..
ولما بتطلع هيك ببلدك الي عم يقتلك اكتر ..بتصير معلق بين الامل والالم ......

يمكن صعب كتير الي ماعاش برى يعرف هل الاحساس ....

وعايشين ع امل مدري شو هو ...

وعذروني ع الرد الطويل

[سيجارة]

يا عمي no body يرجع ..............
نصيحة من هالدئن
إييييييييييييييييييييييه

[leonardo_dicabreo]

كاتب النص الأصلي : The morning

هل بنقدر كـأشـخاص تربينا في الغربه نـرجع نـعيش بسوريا ؟؟

هل الموضوع متعلق بالأخوان المغتربين السوريين فقط , ولا كيف بالضبط ! !

[The morning]

كاتب النص الأصلي : مجنون يحكي وعاقل يسمع

يسعد صباح الصباح
الموضوع بدو صفنات كتييير , بس يمكن ماعاد خايف أنا أكبر بهالغربة ، لأن كل يوم الصبح لما بنضرب على قلبي وبفيق قبل الشحادة وزوجها وبروح غسل وجهي بعد ما بكون وقفت عالحيط نص ساعة وأنا أتفقد الصور المتكية عالحيط وأحكى معها ،وأحيانا بنسى حالي وبحكيلها قصص , وبوصل عالمغسلة بتكون الوجوه صارت مكسرة بعيوني وما عاد تبين الملامح وبقول بعدو الحبايب بيعدو بعدو الحبايب , وبضرب على وجهي جوازين تلاتة مي وبحاول ما شوف وجهي بالمراية , لأني بخاف أنا ما أعرف وجهي بس ياترى بلادي مارح تعرفني أكتر مما بعرف نفسي
ومرة واحد من الشباب طلب من كل واحد منّا يختصر الوطن بكلمة أو بكلمتين , فضحكت ومشيت , وتاني يوم بعتلو إيميل بيحكي عن الوطن ومن أسبوع وأنا عم فكر نزل الإيميل بالأخوية
ورح أرجع عالموضوع مرة تانية

مجنون , بتعرف .. أحيانا بحس في شي مشترك بين تعابيرك و خيـالي .. بس للصراحه مابعرف اذا بتفق معك ببرنامجي الصباحي ..

أنا كل يوم الصبح لما بفيق .. بفتح عيوني و بقول راح يـوم .. بـوقف عالمرايه لغسـّل وجهي بـسألها مرايتي ما مرايتي كيفها سـوريا ؟ و دائما مرايتي بتسـكت و أنا بـسـكت .. و بعد ما بغسـّل وجهي بقـرا صـلاتي تبع كل يوم اللي بتـقتضي بأنـّي ذكـّر حالي بأنـّو سـوريه مسـؤوليتي و أنا بكل شـغله بعملها بحياتي جزء من سـوريا و علي تقع مسـؤوليه توازي و تجاري مسؤوليه أي شخص جوا سـوريا .. آخر شي بـغار منـهم للناس اللي جوا سوريا و بـطلع من الـبيت و أنا عم اسأل حالي .. هل يا ترى سـوريا عتبانه عليّ .؟؟

بانتظار موضوعك

[The morning]

كاتب النص الأصلي : Reemi

مثبت

وإلي رجعه للرد

بالانتظار ..