مقلاية أخوية (6) بحلتها الجديدة

[MaTyA]

كاتب النص الأصلي : قرصان الأدرياتيك

وين هالموضوع؟! يا ريت حدا يعطيني شي رابط؟! أو يدلني عالقسم بس.

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وما بالضرورة ترجع تعطي رايك..بما اني قلتلك ما عاد رح اسألك

[قرصان الأدرياتيك]

Urhoy

يا سلااااام القرصان في الطوّاية!!!

إي والله صرت طاوايه... بس لسّا ما استويت مزبوط! هلا بعد كفّ هاني داغر المكتوب فوق يمكن يعلا معدّل استوائي .

يا هلا بصديقي العزيز في مطبخ الاخوية...خيو مبارح اجتني تنكة سمن عربي من جنوب الردّ.. رح أقليك بالسمن ورح استعمل طنجرة الجينكو الي اجتني هدية بعيد ميلادي...
مابدي استعمل الطواية لانو ما رح أقليك راس عصفور او شرحات (ما بتهون عليّ)، بدي اعمل "قليّة" والقليّة بدها طنجرة...

هلا في أحلى من أنّو الواحد ينقلى بسمن عربي... بتعرف أنّو ياما كنت أقتصر بفطوري عالسمن العربي والسكّر؟! مجرّبا شي؟! وخاصّة لمّا كنت أطلع عالحصاد ونقضّيها بين الشوايا (عرب الجزيرة السوريّة) صيد وسمن عربي وحياة متل آدم وحوا... ربّي كما خلقتني .
قلتلي جينكو ما هيك... كرمال الضّرب هي مو كرمال القلي!!!
وبعدين "قليّة"... طيّب يا زلمة الشباب عم يقرو مصطلحات جزراويّة بحت لقيلك شي ترجمان يفكّ هالطلاسم!

- شو رأيك بالمكتبات بسوريا من حيث المضمون والتنظيم؟

بصراحة إذا قبل ما سافر، يعني قبل أكتر من 11 سنة، المكتبات سرقة وفساد وفوضى لا مثيل لها! هلا لازم الوضع يكون متحسّن بس ما فيّ أكّد أو أجزم لأنّي ما بعرف. متل ما عم أسمع أنّو في تحسّن من ناحية التنظيم... بس من ناحية المضمون أنت بتعرف وضع بلدنا فصعب يُسمح بقراءة كتير كتب وهالشي بيُفتقد إليه حقيقةً في أي مكتبة سوريّة عدا المكتبات الخاصّة متل يللي عندي .
المكتبة، أي مكتبة، تحتاج لدخل ثابت حتّى تنمى بما أنّو عالم النشر ما بيهدى لحظة. وأي انقطاع رح يعرّض المكتبة لتراجع درجة معيّنة. أكبر مكتبة مطبوعات في العالم هي مكتبة الكونجرس الأميركي يللي حلمي زورا. وأهمّ مكتبة أرشيف ومخطوطات في العالم هي المكتبة الفاتيكانيّة يللي زرتا. من فترة قريبة نالت السويد الدرجة الأولى على المستوى الأوروبي في تنظيم المكتبات...
سوريّة غنيّة بينقصها بس إدارة!

- كيف بتتمنى يكون منهاج التاريخ بالمدارس السوريّة؟

يكون معتمد على مصادر متنوّعة وعدم الاكتفاء بالمصادر العربيّة. يعني التاريخ بشكل عام يعتمد على مصدرين مكتوب ومنقوش... المكتوب أهمّ بكتير حالياً مع أنّو المنقوش (بعالم الآثار) يا ما ساعد على فكّ مبهمات بعالم التاريخ.
في العالم يُعتمد على المصادر باللغات الأصليّة والأساسيّة يللي هنّ: اليونانيّة واللاتينيّة. بالنسبة لمنطقتنا ففينا نضيف العربيّة ولغة أساسيّة تانية كالسريانيّة إضافةً إلى الأرمنيّة والتركيّة القديمة... لخ.
هاد من ناحية المصادر.
نجي هلا على منهج البحث التاريخيّ... في البلاد العربيّة يُعتبر أكتر من ضعيف يعني ينال درجة 1 أو 2 على عشرة مو أكتر. لسبب بسيط يللي هو: العالم العربي يرجّح صدق المصادر العربيّة والإسلاميّة على بقيّة المصادر لأسباب دينيّة أو أسباب أخرى! وهالشي بعالم العلم مرفوض. بدون أدلّة أكاديميّة ومقارنات علميّة مرفوض ترجّح شي على شي رفض بت قطع.
أي استنتاج تاريخي لا يستند إلى برهان ملموس ساقط حكماً.
هالشي غير موجود في مناهجنا التعليميّة لأسباب كتيرة ذكرت أهمّ واحد منها. وأنا بتمنّى أنّو يعاد النّظر بطريقة تفكيرنا وأخدنا للأمور.

- برأيك رح تطول المدة لبين ما تصير سوريا دولة علمانية "حقيقية"؟

مع وجود الأديان وحكمها على العقل العربيّ أو السوريّ وبقوّة نعم رح تطول وشخصياً ما متوقّع شوفها بحياتي!!!

- الموت يضحك لنا جميعنا، الشيء الوحيد الذي نستطيع فعله هو ان نضحك له ايضاً..

رأي غير واقعيّ. صعب على الإنسان يقبل الانتهاء أو ما نسمّيو العدم (في الحياة الدنيا) قبول تامّ! بس في كتير بشر ما بيهتمّو للموت ولا يفكرو فيه فما رح يعنيلن هيك قول!

- تستطيع ان تحب أيّ إنسانٍ كان او أي شيءٍ كان اذا فكرت باحتمال فقدانه يوماً ما...

لأ. أنا ما بشوفو صحيح وخاصّة بعالم الجريمة. نحن بنعرف أنّو المجرم الشرس مصيرو الإعدام، وما بظنّ أهل الضحيّة رح يقدرو يحبّو المجرم حتّى لو انعدم!!! وإذا بالعالم الاعتيادي بيجوز يصير غفران إذا عرفنا رح يموت مو محبّة... هالقول مثالي شوي.

- سامح اعدائك ولكن لا تنسى اسمائهم..

بشكل طبيعي ما رح تنسى أسماءهم... وإذا كان تذكّر الاسم ألو أي دلالة سلبيّة فالمثل متناقض حكما!
فأمّا ذا كان التذكّر هو للمنفعة الشخصيّة من ناحية الاختبار والتعلّم فأكيد الأمر جيّد.
قبل ما روح على غير سؤال يا ريت تعدّلي همزة "أعداء" و"أسماء" وتكتبا عالسطر مو على نبرة .
هاي ألك . وهاي للي سألتني عن الهمزة .

- يجب ان يكون كل ما ننطق به مبنياً على الحقيقة، ولكن لا يجب ان ننطق بكل الحقائق..

رائع بيحكي عن الرّصيد المخزون عند كل إنسان. والذخيرة ما لازم تنتهي مهما كان الحال!
يعني بالمقلاية مثلاً خبيلك شوي ماللي عندك كرمال ما يصير تكرار بوجودك...

صيد السمك
- ايمتا رح نروح سوا عالصيد؟

رح نعدّ للأمر بس أنا برأيي تكون بستوكهولم... أقرب ألي وألك!!!

- شو اكبر سمكة صدتا بحياتك؟ (عم احكي عن السمك الحقيقي، لا يروح فكرك لبعيد! )

صدّق أنا حظّي بالصّيد متل حظّي بالشّهادات . بصيد بس ولا مرّة حصل هيك مفاجأة معي. بيجوز أكبر وحدة صدتا كانت بالربيع الماضي واسم النوع "يَدّا".

- وين بتستمتع أكتر: الصيد عنّا بالبلد بالمعدات التقليدية ولّا الصيد بأوربا بالمعدات الحديثة والمزركشة (سوكو سوكو) والدود الاوروبّي (400 غرام ب 3 يورو!! )

أكيد بالبلد والمعدّات التقليديّة... يحرم بعد القعدة عالبحرة على ضو فانوس الكاز والراديو شغّال على أمّ كلثوم وجنبك رغيف خبز عليو قطعة جبنة بيضا مملّحة وخيار وبندورة وإيديك كلّن مصران جيج وتراب وأنت عم تاكل... بعمري ما حسيت بالفرح والسّعادة أكتر من هديك اللحظات!!! إلهي رجعلي شوي منّا...

- اذا كنت عم تصيد عالسدّ بالصيف وانقطعت من الدود- حفرت ومالاقيت شي- وما معك أي شي تاني لتستعملو كطعم! شو بتساوي؟

. هلا ياما صارت معنا... بس أنا كنت أستخدم مالأكل يللي نجيبو معنا وخاصّة البندورة أو الخبز أو حتّى الخيار... إذا ما كان معنا أكل فبدوّرلي على شي نبتة أو حشيشة علّ وعسى كفّي الصّيد وإذا كنت بصحرا فرح قلّك: شو الشغلة تعجيزيّة؟! بس أنا حاسس أنّك عم تضرب على وتر معيّن كونك حطيت خطّ تحت كلمة "صيف"... احكي والله بعد المقلاية ما عاد جمّع. متل الواد منصوووور.

الصيد البرّي:
- شو عملت لما صدت أول عصفور

كان عمري عشر سنين لما أبي اشترالي جفتة (خردق) والعصفور يللي صدتو قعدت أبكي عليه وخاصّة لما إيدي صارت دمّ من آثار الجريمة... ما تحمّلت المشهد. طلّعت بعيونو حسيتن عم يدمعو قمت حطيتو عالطاولة وغطيتو بالمحرام وقعدت أبكي وعيّط... ريش هالعصفور لهلا عندي بعلبة بعد عشرين سنة من مفارقتو للحياة . يا زلمة ليش لتفتّق الجروحات... حرام عليك.

- شو الأطيب: الفرّي والّا ديك البور؟

الفرّي طيّب بس صغير... عندي ديك البور أطيب وخاصّة لحم الصّدر... يلعن غيمك جوّعتني على هالسّير!!!

قرصان الأدرياتيك انت انسان رائع واعتزّ بك واتمنى ان نلتقي عن قريب

وأنا كمان متمنّي نلتقي عن قريب... .

[قرصان الأدرياتيك]

Reemi

هالوردة بتستاهليها أنت أكتر مني بكتير! وهاي وحدة تانية .

[yass]

بتعرف أنّو ياما كنت أقتصر بفطوري عالسمن العربي والسكّر؟! مجرّبا شي؟! وخاصّة لمّا كنت أطلع عالحصاد ونقضّيها بين الشوايا (عرب الجزيرة السوريّة)

أييييه.. اللي ما جرّب السمن بسكر عالفطور ما بيعرف طعمة تمو (طبعا مستبعد من هالحكي مرضى الكولستيرول)


Shawaya Power


أي خيو... آخر سؤال الله وكيلك ها ما بزل عليك بحرف..


أوصفلنا الـ" كافاليري" سيلفيو فيرلسكوني بكم كلمة.. و توافقني على انو هو و القذافي أخوة أولاد نفس الأب لكن هنن ما بيعرفو هالشي؟

[قرصان الأدرياتيك]

وشم الجمال

اول شي بدي قلك انو كتير اجوبتك على اسئلتي كانوا حلوين خاصة بخصوص الكتّاب ....حبيت اسلوبك ونقدك ,,,,

شكراً شكراً...

اما بالنسبة للغة العربية فصدقني يا عزيزي انا ما بنكر الجمالية يللي بتتميز فيها بس بمجرد انو مو الكل بيحكي فيها فهاد بحد ذاتو بيشكل حاجز بينك وبين المتلقي ,,,,بمعنى انو فيك تستخدمها بس مو بهالشكل,,,,طبعا رأي مو اكتر

الآراء كلا على راسي وعيني بس صدقيني العلاقات هيّ اللي خلتني أعتمدا كمبدأ من حيث التواصل الكتابي! بيجوز بمرحلة تانية من عمرك بتحسّي بهالشي أكتر... لأنّي أنا نفسي من قبل ما كنت هيك.

وكمان حلو رأيك بالغروب وفي اشيا كتير عجبتني وبصراحة قربتك مني لانو انا من قبل ما تنقلي بصراحة ما كنت كتير بستوعبك

هلا مو هاد المهم... الأهمّ أنّو تستوعبيني لمّا أطلع مالمقلاية صاغ سليم... هاد إذا ما طلعت مشوّه!!!
أنت كنت قريبة بكل الأحوال... العوائق نحن بنصنعها ونحن بنشيلها فالشغلة متعلقة فينا مو بالعوائق...
.

وبالنسبة لانو تتعرف على ذاتك فانا لما حطيت حالي بهالموقف حسيت قديش الواحد بيكون بمتاهة مو لانو ما بعرف يجاوب لكن لانو رح يكون متلو متل غيرو عم يحاول يعرف مين هوي وشو هوي,,,,فيعني مية وردة الك قرصان ...بس وشم الجمال مو وشم الحلا بس منك مقبولة

وكل الورود والحب والفرح والخير ألك كمان يا أحلى وشم لأحلى جمال.

تعليق,,,كتير الازرق مع نوع الخط وحجمه بيعملي حالة تعصيب فالسؤال ما بدك تغير تنسيق الخط يللي بتستخدمو

طيّب أنت طلبتِ التغيير بس ما قدّمتِ نصيحة... إذا اخترتِ شي أحلى ماللي عم أستعملو ما عندي مشكلة بالتغيير!

سؤال تاني هلق ليش عطيتني هديك النصيحة يعني انت اكيد ما عطيتها من فراغ فشو السبب يللي خلاك تنصحني فيها؟؟؟؟

السبب هو حثّك على مشاركة الآخر بالشي يللي عندو وعم يطرحو مو بالشي يللي عنّا نحن وإلا ما عاد اسما مشاركة... ما بدّي فسّر كتير! .

[قرصان الأدرياتيك]

suryoyo

و قبل أن يعودوا جاءت قوات دوق بيروجيا (فالنتينو) و اعلنت الحرب من جديد على البنادقة و على القراصنة أيضا ... بتدخل الاسطول الفرنسي ايام لويس السادش عشر ... و بدهاء فالنتينو و الكساندر !

إي ناطرينن نحنا خيّو ناطرينن وأعلى ما بسفنن خلّي يركبو... لخلّي مدافعي تمزّق أساطيلن وقراصنتي ياكلو لحمهن وهن أحياء... .

[قرصان الأدرياتيك]

hanny dagher

سؤال واحد
هل في معرفة بيني وبينك غير القصة تبعيت الغلط النحوي اللي صار ؟

عزيزي هاني...
اسمحلي أشرح الملابسات وفصّل بغضّ النّظر عن سؤالك يللي جوابو كلمة وحدة بس "لأ".
الانطباع الأوّل كتير مهمّ وخاصّة لرسم صورة معيّنة عن أي إنسان... هاد حال البشر! إذا بترجع لمشاركتك يللي جيت على سيرتا فكتير كانت جارحة في قسما الأوّل... يعني لو اكتفيت بالتعليق عالخطأ اللغوي اللي صار كل شي كان رح يكون مختلف!!! وهالحكي مع التأكيد أنّو ما كان في أي لقاء سابق. فأنّو أنا شخص ما بعرفو بفوت أحكي معو هيك أكيد رح ياخد عنّي انطباع يتعلّق بهالحكي... هاي كلّ الحكاية!!!
الانطباع بمزيد من التعامل يتغيّر... مثلاً ياس، كنت آخد عنّو انطباع معيّن وبعد احتكاك بسيط تغيّر هالانطباع كلياً بدون ما أرجع لأتأكد من هالشي إذا كان صحيح أو لأ.
العقلانيّة والمنطق أساس كل شي بس الواقع والمشاعر ألها دور كبير بحياة الإنسان.
بتمنّى تفهم ليش كتبت هيك مو أكتر... كان فيّ بكل بساطة حطّ جنب اسمك كلمة "ما بعرفو" وخلصنا!
تحيّتي .

[sandra]

أسئلة خفيفة هيك فاصل منشط


واضح أنك بتحب الأسفار ...
لما بتسافر بتجب تقتني شي من المكان يلي زرتو وشو بيكون عادةً؟
أي بلد زرتو وبتريد تزورو مرة تانية ... وبلد زرتو وندمت عالوقت يلي قضيتو فيه
بلد نفسك تزورو
إذا قلتك خدني معك أكيد بتوافق ماهيك ؟
طيب إذا عرفت إني رح سافر على حسابك بتغير رأيك ؟؟؟

شو احلى هدية اجتك؟ ومن مين كانت وشو مناسبتا؟
إذا بدك تهدي حدا شي ... بتفكر بشو أول شي

لما بدك ترتبط بتفضل ترتبط ببنت من مجتعك ومدينتك وهالشي أساسي عندك ؟
شو أكتر صفة بيهمك وجودها بشريكة حياتك وشو الصفة يلي ما بتقبل وجودها وما بتتحملها أبداً

ايمت رح تجاوب على سؤال رأيك بالأعضاء ؟ الجمهور ينتظر

[قرصان الأدرياتيك]

suryoyo

1. هل تجيبك احلام اليقظة و اذا نعم ... هل هي متعلقة بالواقع و هموم الواقع اكثر من احلام النوم (اللي نتمنى تكون وردية دائما) .. ؟؟

أحلام اليقظة عندي هي المشاريع يللي بفكّر فيها بس بمثاليّة وكمال ما ألو وجود... متل يللي عم يتضحّك عحالو!!! تتعلّق بواقعي لكن من منظور طوباويّ كتير... بتحاول ترفع من مستوى هالواقع لمستوى أعلى من حقيقة الوجود البشري، وإذا فيّ علّق على هالشي فأنا بشوفها خطأ لأنّا ممكن تجرف الإنسان لأماكن هو بغنى عنّا عدا عن الوقت المصروف هباءً فيها.

2. هل تعتقد ان العشائريات هي تقدم او معوقات للتقدم ؟؟

إذا بتقصد العشائريّة فالانتماء كتير رائع بشرط ما يكون عائق في سبيل ملاقاة الآخرين. من الناحية العمليّة هالشي عم يوقّف أكيد في سبيل التقدّم بس على الصّعيد الأخلاقي... يعني ما يتعلّق بالإنسان من جوّا مو من برّا!!!

3. تعتقد انو ثقافتك و بيئتك قريبة الى العراق ... و الى أي درجة تحسهم قراب الى نفسك كشعب ... ؟؟

قريبة إلى المنطقة الشماليّة أكثر حيث تكثر القرى والبلدات والحياة الريفيّة. ما فيّ أعطي درجة معيّنة لأن هالشي مرتبط بالأشخاص... في صديق عزيز جداً على قلبي وهو من بلدة قره قوش ما شفت إنسان منفتح وخدوم ومحب متلو!!!

4. هل تعتقد ان بيث نهرين هي تسمية حصرية على الجويرة ككل ... لو تعتقد هذه المنطقة هي بيث نهرين العليا ... و العراق اليوم هو بيث نهرين ؟؟

بيث نهرين مصطلح كان يستخدم للقسم الأعلى من ما بين النهرين... يعني المنطقة يللي تشمل شمال العراق كاملاً والقسم الشرقي الشمالي من سوريّة والقسم الغربي الجنوبي من تركيّا. المشكلة أنو أخد اصطلاح خاطئ للدلالة على كل العراق وهالشي غير صحيح علميّاً. لأن عندك جنوب العراق كان يسمّى سومر وفوقها شوي بابل وفوقها آشور الواقعة في "بيث نهرين". العراق اليوم يمثّل "بيث نهرين" لأنّو فيه القسم الأكبر من أراضيها...

5. من وحي دراستك لحوار الاديان .. على أي اساس ممكن يكون حوار الاديان ؟؟

حوار الأديان يقوم على أساس واحد ومنو ينطلق كل شي: قبول الآخر واحترام الاختلاف بشرط أنّو القبول يكون متبادل. المبدأ العملي اللي ينطلق من هالمبدأ الأوّل هو المساواة بالحقوق والواجبات.وإذا مبدأ القبول ما تجسّد عمليّاً من خلال ثمار معيّنة متل ما ذكرت المساواة، فهو مبدأ عقيم.

الي رجعة ب 5 اسئلة جديدة !

آنست ونوّرت... .

[فسحة أمل]

مرحبا قرصان .....
كم سؤال عالسريع :
شو رأيك بما يلي :
الموت.
الجنة والنار.
التكفير.
الغربة .
الهجرة.
الفقر.

الزواج.
الخيانة الزوجية.
الزواج من غير دين.
الموت الرحيم.

[sona78]

شكرا ع الأجوبة ..

بس كمان سؤال
بعتبارك قرصان شو رايك بالقرصان سلفر؟؟؟
ما تقلي ما بتعرفو

وميت فتحة وضمة...... وبلاها الكسرة ما كتير حلوة

[zen]

كيفك قرصان
يالله حابب اقليك شوي وتطلع الريحة الشهية مشان الصايميين يشتهوا المقالي
1- مين أكذب واحد بأخوية (بصراااحة )مع ذكر أسماء
2 - شو بيعنيللك شهر رمضان بما انو نحنا فيه ؟
3- انت مع انو الناس الغير مسلمين انو يحترموا المسلمين الصائمين برمضان رغم انو بأشهر الصوم عند المسيحيين بضل سياخ الشاورما معلقة طول النهار؟
4- كيف بتتخيل بلدك بعد 10 سنين ؟
5- عندك امل بأنو التغيير للأحسن جاية واذا اي شو هني الأسباب اللي مخلينك تلمح هالضو؟
6- شو رأئيك بشعار سيادة حريي إستئلال

ودمتم ودامت اخوية حرة مستقلة

[Marooshe]

مرحبا قرصان
استويت ولا بعد؟



بدي رأيك بهي الأشيا

ختان الأناث...

تجارة الرقيق الابيض...

رجال الدين...

الانبياء، مع شمل سعدو والنبي كيكي... ...

الأيجو... لازم يتملكنا ولا نتملكو ولأي حد لازم يسيطر علينا؟

[قرصان الأدرياتيك]

matya

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وما بالضرورة ترجع تعطي رايك..بما اني قلتلك ما عاد رح اسألك

لا ضروري جداً أعطي رأيي وخاصّة أنّو هي مريومة مو حايلا... !!!
بتعرفي يا ماتي: بعد ما سمعت صوتا أنّبني ضميري أكتر من قبل... يعني لازم هيك؟!
وبتعرفي أنّك أنت السّبب يا شرّيرة . بسيطة وحصل خير!!!
بالنسبة لصوتا فرائع جداً وعجبني وبتمنّالا التوفيق والنّجاح وهيك يعني نشوفا عالشاشات والمسارح ونقول: هيدي من عنّا!
بس كمان إذا سمحتلي حابب ضيف تعليق: ما يتعلّق بحرف السّين هل المشكلة مالتسجيل أم في مشكلة بالأداء؟! (أغنية فات الميعاد، المقطع الثالث: الليل ودقّة الساعات... ).
أنت موهوبة وربنا يبارك بموهبتك ويعطيك على قدر اجتهادك... .

أهلين متّوشتا.

[قرصان الأدرياتيك]

yass

أييييه.. اللي ما جرّب السمن بسكر عالفطور ما بيعرف طعمة تمو (طبعا مستبعد من هالحكي مرضى الكولستيرول)
Shawaya Power

موتتني مالضحك على كلمة: طاقة الشّوايا أو قوتن إذا بتمشي. من وين ابتكرت هالمصطلح؟!
طيّب ياس أنت شاوي؟! ... تصوّر يعني أنّو مثلاً يعني يطلع المشرف الإداري عالأخويّة شاوي؟!
ويلي الله عليك وعلينا... !!!

أوصفلنا الـ" كافاليري" سيلفيو فيرلسكوني بكم كلمة.. و توافقني على انو هو و القذافي أخوة أولاد نفس الأب لكن هنن ما بيعرفو هالشي؟

أوّل شي ما بيستاهل كلمة "كافاليري"...
بعدين غير أنّو أغنى رجل بإيطاليا الزلمة ماسك البلد بقبضة رأسماليّة قويّة ألها تعاملات وثقى مع أهمّ عائلات المافيا بالبلد.
بيضحك عالكنيسة (الفاتيكان) عأساس موقفو من القضايا الإنسانيّة والأخلاقيّة ليستفاد من عدد الكاثوليك الكبير بكل مشروع يطرحو... والحقيقة أنّو هو ذئب في ثوب حمل.
بالسّياسة فاشل وبالعلاقات منحطّ وخاصّة مع المرأة!!!
بالنسبة للموافقة فبتّفق معك على أنّو التنين ولاد حرام.

بعدين شو خطر على بالك تجيب سيرتو؟!
.

[قرصان الأدرياتيك]

sandra

أسئلة خفيفة هيك فاصل منشط

قلتيلي فاصل منشّط ما هيك؟! ليش مو إعلاني؟! .


واضح أنك بتحب الأسفار ...
لما بتسافر بتجب تقتني شي من المكان يلي زرتو وشو بيكون عادةً؟

أوّل شي بقتني كرت تصويري لأهمّ الأماكن تبع البلد... بعدين بحبّ أقتني شي بينصمد لشي يعبّر تماماً عن المكان. كمان بحب أقتني عمل وطوابع تبع هالبلد والأشيا المتعلقة بالفلكلور... في كتير أشيا بحبّا!


أي بلد زرتو وبتريد تزورو مرة تانية ... وبلد زرتو وندمت عالوقت يلي قضيتو فيه

كلّ البلدان بحب زورا مع أنّي ما زرت كتير بلدان بسبب الحالة الاقتصاديّة المترديّة! بس حابب أرجع زور العراق!
ما ندمت ولا بحياتي على زيارة لبلد أو مكان أو شخص مهما كانت النتائج لأن كلّو بالمحصّلة رح يصبّ بخانة زيادة التجربة والمعرفة إن كان سلباً أو إيجاباً.

بلد نفسك تزورو

فلسطين.


إذا قلتك خدني معك أكيد بتوافق ماهيك ؟

إي أكيد .


طيب إذا عرفت إني رح سافر على حسابك بتغير رأيك ؟؟؟

إذا معي، بالعكس أهلا وسهلا... بس إذا رح ينضاف الحساب لقائمة الديون فوالله بدّا زوق الشغلة .


شو احلى هدية اجتك؟ ومن مين كانت وشو مناسبتا؟

بالنسبة للهدايا فما بعرف شو بدّي قول... بيجوز نظرتي للأمر ألها جانب كتير مختلف، لسبب بسيط أنّو أنا ما بحتفظ بالهدايا مو لأنّي ما بحب أو ما بقدّر الهديّة أو أو... إلخ. لأن بصراحة ما بقدر خجّل إنسان... فغالباً ما تُطلب منّي الأشيا وأغلب الأحيان بقدّما بكلّ فرح وأريحيّة! وخاصّة إذا كان اللي عم يطلبها صديق...
أحلى هديّة لهلا أجتني كانت من حبيبتي الأولى... أصابع قناني عطر مع رسالة! صرلي 11 سنة محتفظ فيه والغريب أنّو لسّاتو عم يفوح بس ليذكّرني فيها... ! المناسبة كانت تبادل هدايا بعيد الحبّ.


إذا بدك تهدي حدا شي ... بتفكر بشو أول شي

أكتر شغلة صعبة علي بحياتي هي... ما بعرف أختار هدايا. وعلى كل حال يعود هالشي للشخص المُهدى إليه. غالباً ما أهدي عطورات وريّح راسي!


لما بدك ترتبط بتفضل ترتبط ببنت من مجتعك ومدينتك وهالشي أساسي عندك ؟

بفضّل أكيد أرتبط من مجتمعي وبلدي بس مو شي أساسي... الأساسي عندي هو الحب والتفاهم بعدين بتجي الأشيا التانية، بس غالباً بفضّل تكون شرقيّة وعاشت بالشّرق!!!


شو أكتر صفة بيهمك وجودها بشريكة حياتك وشو الصفة يلي ما بتقبل وجودها وما بتتحملها أبداً

أكتر شي بيهمني أنها تحبني متل ما رح حبها... وبفضّل كمان تكون شوي ذكيّة وشوي دارسة وشوي مثقّفة . هلا إذا كانت كتير فأحسنين بس المينيموم هو اللي ذكرتو. يللي ما بقبل وجوده فيها الكذب لأن كتير رح يألمني وما عندي مشكلة عن بقيّة الأمور... محدا كامل!


ايمت رح تجاوب على سؤال رأيك بالأعضاء ؟ الجمهور ينتظر


بس تعطوني مجال ويصرلي فراغ شوي لروح طيّارة كمّل القائمة... لأنّي مبلش من مبارح بس ما شالله الزيت ما خلص والنار كل مالها شغّالة... شو رأيك توطّيها شوي؟! .

[قرصان الأدرياتيك]

فسحة أمل

مرحبا قرصان .....
كم سؤال عالسريع :

أهلين فسحة...
معك حق الأسئلة سراع كانو... بس الأجوبة بطيئة وبتاكل وقت!

شو رأيك بما يلي :
الموت: خاتمة لشي وبداية لشي آخر.
الجنة والنار: أشيا يختارا الإنسان بملء إرادتو.
التكفير: شي يخلّي الإنسان يحسّب حالو الله.
الغربة: ما في أصعب منها... هي فصل الإنسان عن ذاتو.
الهجرة: شي بيضطرّ إليه الإنسان لأسباب كتيرة متوفرة بشكل كبير في الشرق الأوسط.
الفقر: عاهة في المجتمع البشري... ونتيجة أكيدة للرأسماليّة.
الزواج: هو إحدى مراحل الحب أو فينا نقول تشريع الحب في المجتمع.
الخيانة الزوجية: من أصعب الأمور... انقطاع في التواصل بين الشريكين.
الزواج من غير دين: بلوى للأطفال، ومشاكل مستقبليّة، وحياة غير مستقرّة، وجمع بين عالمين لا ارتباط بينهما.
الموت الرحيم: مرفوض... هو أخد شيء محدا ألو حق ياخدو!

وميت السّلامة بهالقامة .

[قرصان الأدرياتيك]

sona78

بس كمان سؤال
بعتبارك قرصان شو رايك بالقرصان سلفر؟؟؟

ما تقلي ما بتعرفو

أكتر من رائع... كتير كنت حبّو متل جيم تماماً. بس القرصان ما عندو مشاعر وهيك كان جون سيلفر!

وميت فتحة وضمة...... وبلاها الكسرة ما كتير حلوة

إي إي عجبني هالسلام... روحي الله يملي أيّامك فتحات وضمّات وهمزات وشدّات... لا بلا شدّات ما حلوة بتصعب عليك بعدين .