حلقة حوار أخوية : لقاء مع ... (( الحلقة الأولى ))

[SABE]

مرحبا يا أشاوس ...

و أهلا و سهلا فيكون بالحلقة الأولى من برنامجنا (( حوار مفتوح )) و بدكون ما تأخذوني إنو اليوم المذيع مريض شوي

بقا أنا أخدت المايكروفون عنو و بدي قدم البرنامج ..

متل ما تم الحديث من قبل , بكل حلقة موضوع جديد أو ضيف جديد معنا هون ... و بمناسبة بدء البرنامج رح يكون معنا

ضيف الكل بيحبو ..

رح تكون المفاجأة يلي أنا (( بشكل شخصي )) كنت حابب يكون في مجال إسألو كتير أسئلة و بعتقد إنو كتير منكون كمان

حابين يطرحو عليه شوية أسئلة ..

و رح يكون الموضوع عبارة عن إنو كل واحد عندو سؤال بيسألو .. و يلي عندو تعليق على شي موضوع إنو يعلق

عالموضوع ..
ساحة الأسئلة مفتوحة .. يعني والله أنا بدي إسأل الشخص شو نوع الموسيقى يلي بيحبها ممكن .. ( هاد كان طبعاً مثال ..

أنا مارح إسأل هيك سؤال إذا في بعقلي كتير أسئلة أهم .. و إذا ما في أسئلة .. ممكن الواحد بس يقرا .. يعني التعليق مو

إجباري بهدف التعليق )

بدي قول للكل خلينا نعمل الموضوع حلو ... لأنو الموضوع إلنا و نحنا يلي مننبسط إذا كان الموضوع حلو .. و نحنا يلي

بتديق خلاقنا إذا الشغلة عاطلة ..

بقا هلأ رح نبلش البرنامج ...

بس نقطة .. إنو حسيت هلأ أحسن وقت مشان نعمل اللقاء مع العضو ضيفنا اليوم ... و خصوصي في كتير شباب

عمتعترض على كتير شغلات عمتصير .. بقا بتقدرو تعترضو للشخص الضيف اليوم .. و إنشالله بيوضح كل

إستفساراتكون .. هلأ بس تعرفو مين الضيف بتفهمو شو قصدي ..


له له له ... لعمى رح نصير على الهوا و أنا إسا ما قلتلكون مين راح يكون الضيف هالحلقة ...

الضيف هو العضو (( AKHAWIA )) مشان المعلومات .. AKHAWIA هاد من جماعة الحمر ..

بحب أول شي عرف عن العضو AKHAWIA... (( مع إني ناوي إترك الشغلة إلو إنو

يخبرنا مين هو )) بس بدي قول إنو أخوية هو المشرف العام ... هو يلي بيعين المشرفين و بيعين أعضاء الإدارة ...

هو يلي عمل الموقع و تعب عليه (( ما بنكر جهد بقية الأعضاء و المشرفين )) لحتى وصل للمرحلة يلي هو فيها اليوم ...


و بتسمحولي أنا كون أول واحد بيبلش بالأسئلة ...

أخ (( AKHAWIA )) : أول شي بدي إسأل ... إنو ليش أخوية ... منين إجت الكلمة .. و هل أخوية مرتبطة بشي أخوية بالواقع ولا بس إسم ؟
تاني شي (( ممكن تعرفنا عن حالك ؟ ))

هلأ هدول مبدئياً الأسئلة تبعوتي .. بس ما كلون .. لأنو عندي إسا كتير أسئلة .. بس خليون لوقت بيحما الموضوع

شي ..

هلأ رح إبعتلو رسالة شخصية للمشرف العام و بقلو إنو رح نبلش الحلقة و رح نصير على الهواء مباشر ..

و إذا حدا عندو سؤال خلونا نبلش ...


3 ...
2 ...
1 ...

أكشن .. صرنا عالهوا ..

[layla]

اول شي مشكور ابو السعود عالموضوع والفكرة اللي بتجنن وهي فكرة الضيف
وسؤالي لاخوية هوي انو في شي جهة معينة متبنية الموقع من الناحية المادية ولا لاء

[صياد الطيور]

مسا الخير للجميع ..
بدي اسأل اذا كانت الأخوية حكر على حدا معين او في شروط خاصة انتو بتحطوها لوحدكن للأعضاء وللمشرفين
مع الشكر الجزيل للكل من ساهم ويساهم بالأخوية

[blue eyes]

شكرا ع الموضوع والفكرة الحلوة وانا حابة اسئل اخوية شلون خطر ع بالو يفتح المنتدى ومين شجعوا وساعدوا...

[توت توت توت]

مرحبا ....
مشكور سعيد كتير عالموضوع الحلو ...
و أنا حابب اسأل سؤال صغير ....
ليش الأخ أخوية مشاركاته نادرة جدا .؟؟؟؟؟
وبحب اتشكرو من كل قلبي ....
أخوية وبسسسسسسس ....

[Tarek007]

مرحبا بالضيف

هلق منيح أنك صرت عنا بما أنك المسؤول


في عدة مواضيع كنت طارحون بالمنبر و ع أساس رح يصلني جواب بس يما أنك معنا ف الشغلة أسهل على ما أعتقد


ليش بريد المشرفين ما بنقدر ندخل عليه ...و أذا كان لا بد ليش مرئي بالنسبة ألنا ...يعني ليش ما تحجبو ظهورا

ليش ما في قائمة سودء ب الرسائل الخاصة
( هلق هاد مو طلبي )
بس في أعضاء عم تصلون غلاظات بشكل مستمر
و برغم التطنيشو التهميش يلي بيعملوا معهون بضل الغليظ عم يمارس غلاظتوا


بيجوز ما يكون فيها شي خرج الواحد يشكيه
بنفس الوقت ما بدو تصلوا رسائل منو


يعني أنا لو بتصير عندي هيك شغلة ...دغري بحطك بالائحة السوداء :P



موضوع تاني مهم كتير

في كتير من المواضيع القديمة أختفت ...و ما عم نلاقيها بالبحث

هي الشغلة ...بتخلي ثقتي تهتز بالاخوية ( آسف )
بس أذا تعرضت شي شغلة أنت كاتبها للقرصنة ...ما عندك دليل أنها ألك ...لانوا التاريخ مع الموضوع طاروا


كمان :
بس تعمل
طالعلي مساهمات العضو
صفحة تنتين تلاتة
بعدين :
شروط البحبشة و ما في و لا صفحة !!!؟؟؟؟؟؟



ما رح كتر أسئلة أكتر من هيك و الله يعطيكن العافية ع الشغل الحلو

[Kakabouda]

يا أخ أخوية أنا لاحظت انك مقصر معنا شوي كأعضاء بشركتك المحترمة ... شو مشان عملنا هدايا مو مشان شي مشان برستيجك يعني

[layla]

كاتب النص الأصلي : Kakabouda

يا أخ أخوية أنا لاحظت انك مقصر معنا شوي كأعضاء بشركتك المحترمة ... شو مشان عملنا هدايا مو مشان شي مشان برستيجك يعني

[melad_nor]

انا بدي اسال اخويه مشان اعضاء المنتدى انو ما يسمح لاي حدا يشارك واكيد الكل بعرف عن مين قصدي ...
كمان سوال صغير اخويه شب ولا صبيه

[krimbow]

لك شو هالمفاجأة اخي سعيد بتجنن

مرحبا اخوية:
مرحبا صبايا و شباب

هلأ في عندي سؤال و بعدو اقتراح

السؤال : كيف بيتم تعيين المشرفين؟؟؟ يعني في مراحل معينة و في اساسات و في مزايا عند المشرف ليتم تعيينو؟
و الاهم من هيك ... اذا المشرف صار مشرف خلص بيتم مشرف للأبد ؟؟؟ و اللا في خطوط حمرا لما بيتجاوزا بيبطل مشرف او ظروف بتوقف المشرفين؟؟؟

و الاقتراح : انو نعمل منتدى بيهتم بعلم النفس لأنو كتير مواضيع بتحكي عن هالشي

و شكرا الك و لجهودك

[SABE]

تم حزف بعض التعليقات الخارجة عن الموضوع

[here i am]

أولا شي الله يعطيك العافية سعيد
تاني شي الله يخليلنا هالأخوية يلي عم تجمعنا
تالت شي بحب أسأل أخوية ... شو بتعنيلك كلمة " انسان "

[Atramez_Zeton]

احيانا بيصير من بعض الاعضاء الخروج عن الحدود و القوانين و ما بيتم اتخاذ اجراءات صارمة اتجاهون شو السبب بهل التراخي ؟؟؟ هل هو ضعف من ثبل الادارة او خوفا من الانقاص من عدد الاعضاء مع العلم ان التفاحة المعفنة بسحارة تفاح منيح بتنزع باقي التفاحات

[Sedrec]

شكراً على فكرة الحوار هذه
الحوار، حرية التعبير عن الرأي، الصبر، التواضع، الديمقراطية في التعامل، الانفتاح العقلي والقلبي على الانسان الآخر، واضح انها من مميزات هذا الموقع اللطيف
هذه الأمور مهمة جداً (ولا بد منها) للنضوج وتبلور الشخص حول هدف أو غاية تحمل شئنا ام ابينا جزءاً من الحقيقة.
أنا سؤالي إلى الأخ أخوية: يا ترى شو هو هدفك من هالنشاط؟ وواضح انو هالهدف كتير ايجابي وبناء ومحترم، لأنه "من أعمالهم تعرفونهم" وواضح كمان من خلال التفاف هالشباب حول هالموقع.

أحيانا بكون الهدف سامي وكبير وبحاجة لوقت مشان ينشرح ويوصل لعقول الناس وقلوبهن، بس يمكن بضع كلمات نابعة من القلب تكون كافية، حتى ولو كان صعب على الناس ادراك مكنونات النفس، الثقة بهالشخص برأيي بتكفي ليمشو معو.

مع أحلى ابتسامة لأخوية ولجميع الشباب الشغيلة يلي القمحة نزرعت بقلوبن.

[Akhawia]

مساء الخير
بداية منشكر قناة الحوار الي استضافتنا بحلقتها الأولى من برنامج (حوار مفتوح) فكرة وإعداد وتقديم المشرف المتقدم "Saeed"

اما بعد .. فحنبتدي بالإجابة على الأسئلة واحد تلو الأخر بالترتيب .. واننشاء الله بيسنح لنا لاوقت للإجابة على كل الأسئلة والإستفسارات..

إنو ليش أخوية ... منين إجت الكلمة .. و هل أخوية مرتبطة بشي أخوية بالواقع ولا بس إسم ؟

نعم هون صار لازم نحكي شوي عن تاريخ نشوء الموقع ..
بدء الموقع Akhawia.COM بعدام 2002 .. على اعقاب عدة احداث .. كان اولها ان اقامت (اخوية سيدة السلام في حمص) كرمس خيري وتزامن هذا مع تعلمنا في ذلك الوقت لعمليات التصميم -

تصميم المواقع- فقمنا بإنشاء موقع خاص بالكرمس الخيري من بابين اساسين
1- كحركة شيك با ل2002 .. ايام ما كان لسا في مواقع
2- كتغطية اعلامية لنشاطات الكرمس ..
(طبعا كان موقع الكرمس على مستضيف مجاني وبطريق بسيطة جدا..)
بشتاء ال2002 كان زاد جدا اطلاعنا في علوم التصميم والبرمجيات التفاعلية في تصميم المواقع وادارة السيرفرات .. واقترحنا على لجنة الأخوية إن نقوم بإنشاء موقع خاص (مستقل) بحيث يكون اجتماعي عام وليس

خاص بالأخوية فقط على ان يتم في وقت لاحق ادراج باقي الأخويات+ اخوية سيدة السلام في الموقع بمواقع فرعية على حسب الإمكانية لكن هذي الأخيرة لم تتم بسبب تواجدنا بالخارج وعدم التنسيق الجيد الي كان ..
بعدها تم حل الأخوية !!ورجع تم انشائها من جديد بصيغة جديدة بس ما كنا في لجنة ولا كان في تنسيق بما يخص الموقع ابدا هذا كله بما يتعلق بالكوم
اما اخوية نت فبوقت لاحق وحرصنا منا على ما يسمى بال Branding
يعني للمحافظة على ان لا يتم سرقة شهرة الموقع من خلال حجز نطاق اخر من قبيل akhawia.net or akhawia.org الخ
فقمنا بحجز النطاقات على امتدا net,org,info ..
كان تزامن هذا مع انخفاض بأهمية المقوع اخوية دوت كوم وقتها بسبب مشاكل الأخوية الي كان معظم الأعضاء منها وبسبب عدم التنسيق وبسبب ضيق الإمكانات المتاحة ..

بعدها اجانا فكرة انشاء منتدى اجتماعي تعليمي تربيي تنشيئى سوري ! .. يعني هيك كان الفكرة او التوجه الأساسي ..
وفعلا بحكم كان اخدين akhawia.net فكان في عدة افكار منها دمج اخوية كوم ونت وانشاء ما يسمى ب Akhawia Passport بحيث
بيكون في عدة مواقع عدة مواقع وكل موقع يقدم خدمات معينة لكن يمكن الدخول لأي موقع والإستفادة من الخدمات بإشتراك واحد بكلمة مرور واسم مستخدم واحد ..
الفكرة الأخيرة تم تأجيلها بسبب ما كان لدينا الطاقة (الوقت + الكوادر) الكافية لإنشاء عدة مواقع بحسب الي بزهننا .. فبلشنا باخوية نت كمنتديات ..
طبعا بالفترة الأولى اتعسر الموضوع جدا .. فصعب انشاء موقع هادف من الصفر بهذي الأيام .. يعني لو كان موقع تسالي او موقع ترفيهي بحت كان الموضوع حيكوون يسير جدا ..
اما في حالتنا فتعثرنا كثيرا .. بس ما كان هذا بنظرنا له قيمة يعني لا عدد المشاركات ولا عدد الأعضاء له قيمة .. الهم الأول هي طبيعة الأعضاء وجودة المادة المنشورة والشي الي بيقدر يحققو الوقع من تنشئة او توعية

لنسبة من الأعضاء .. (ان تساعد اخوية 5 اعضاء في تغييرو تطوير افكارهم وتوجهاتهم واسلوبه في شيئ معين اهم من عضوية 500 لا يؤثرون ولا يتأثرون...)
وهيك كان الموقع ..(هذا اكثر الإختصار طبعا)

بالنسبة للسؤال الثاني

عن ان اعرف بنفسي ..(سؤال صعب لان الإجابة عليه ستكون طويلة فهو عام .. لكن سأحاول ان اجيب برؤس الأقلام)
اسمي حسام عبود, طالب طب بشري (سنة 6 تخرج الآن), عمري 23, ومن مواليد 28-03-1982 -ليلي بيحب يبعتلي هدية مثلا هاهاهاها-
عربي سوري حمصي, تربيت بسوريا للبكلوريا وبعدها سافرت مصر(القاهرة) للدراسة ..

--------------- layla --------------------
هلا ليلى ..

انو في شي جهة معينة متبنية الموقع من الناحية المادية ولا لاء

لا .. مافي اي جهة ..

---------------صياد الطيور ----------------
هلا صياد الطيور ..

بدي اسأل اذا كانت الأخوية حكر على حدا معين او في شروط خاصة انتو بتحطوها لوحدكن للأعضاء وللمشرفين

نعم ,
اخوية ليس مشاع.. ولدينا شروط للعضوية وللإشراف
للعضوية الشروط بالخطوط العريضة , ان يلتزم العضو بآعراف الكتابة في المنتدى
بالنسبة للإشراف ايضا هناك شروط عديدة جدا .. سأحاول سردها بالإجابة على سوال اخر ايضا يتعلق بهذي النقطة

----------------blue eyes--------------
هلا بلو ايز( اسمك متل لون عيوني )

اسئل اخوية شلون خطر ع بالو يفتح المنتدى ومين شجعوا وساعدوا...

حكيت شوي فوق كيف بلش المقوع ..
اما عن مين شجعني: فهو انتم !! (بتفاعلكم ومحتبكم وصلنا لهون .. وبهم نستمر)
اما عن من ساعدنا: فأيضا انتم !! اولا .. والمشرفين من بعدها .. هذا عامة .. ام عن من ساعدني في العمل التقني فللأسف لا يوجد .. اقصد وحدي ..

----------------توت توت توت-------------
هلا توت توت توت (شو هال الإسم الحلو)

و أنا حابب اسأل سؤال صغير ....
ليش الأخ أخوية مشاركاته نادرة جدا .؟؟؟؟؟

انا لدي عدة عضويات وعندي عدة شخصيات .. بلبس الشخصية بمجرد الكتابة بها
فانا بالمنتدى عضو بإسم Dr_HUS متل باقي الأعضاء ولما بكتب من خلاله بكون عم بحكي بشكل شخصي كعضو ينطلي عليي ما ينطلي على باقي الأعضاء.. وليس بأي صفة اخرى ..
والمشرف العام بإسم Akhawia ولما بكتب من خلاله فعم بحكي بإسم المشرف العام
وعضوية Police بستخدمها بالتحقيقات وضبط الأمن بالموقع ..
وعضوية GodAdmin الي هوي الرأس تبع العضويات الي من خلاله بقدر بعطي الصلاحيات لأي عضوية ..

ومتل ما قلت .. كل عضوية ليها صفة اعتبارية مستقلة ولما بتعامل من خلالها بكون عم بحكي بإسمها .. وبصفتها ..
وهذي اللخبة وتعدد العضويات من باب تقسيم المهام (يعني بوقت لاحق ممكن يكون كل من هذي العضويات شخص غير الأخر وليس انا لكن بالوقت الحالي اقوم انا بإستخدامها )

[Akhawia]

---------------- Tarek007 --------------
هلا طارق المشاغب شو الأخبار ؟

في عدة مواضيع كنت طارحون بالمنبر و ع أساس رح يصلني جواب بس يما أنك معنا ف الشغلة أسهل على ما أعتقد

نعم اشرنا ان ليس لدينا علم بهذا (اي لا ندري كيف تم ذلك) لكن اغلب الظن ان تم بفترة سابقة (قبل الغاء خواص الحزف) اختراق احدى اشتراكات المشرفين القائمين على المنبر الحر وحزف هذي المواضيع .. هذا اغلب الظن ..

ليش بريد المشرفين ما بنقدر ندخل عليه ...و أذا كان لا بد ليش مرئي بالنسبة ألنا ...يعني ليش ما تحجبو ظهورا

سؤال حلو .. وهوي الجواب
ما بتقدرو تدخلو عليه لأنو بيتم فيه مناقشة قضايا خاصة (اي بيتم فيه طرح اسماء اشخاص ومناقشتها بيتم فيه طرح استراتيجيات عمل ومناقشتها .. فيه منتقاتل بين بعض ومنتزاعل ومنتصالح .. وكتير من هال الشغلات ما منيح يشوفها كل الأعضاء)
اما ليش مرئي... فلنفس الفكرة الي صارت عندك .. فكرة ان تضع قسم مرئي وغير مصرح للجميع بدخوله بيخلق فضول .. لدى الشخص وبيخلي في فجوة صغيرة بين الي عم يقدر يدخل (المشرف) والي ما عم يقدر يدخل (العضو) بحيث بيصير بيحاول الي ما عم يقدر يدخل (العضو) يجتهد بعمله واخلاصه في الموقع بحيث يصير مشرف ويقدر يدخل ..
هذا احد الأسباب يا طارق .. لكن في اسباب تانية .. بحيث حيكون في عدة اقسام غير مصرح بالدخول للأعضاء بشكل عام فيها .. وبتصير حكر على فئة من الأعضاء (وليس المشرفين اقصد) بحسب شروط خاصة
مثال .. حيكون في قسم فرعي بالمنبر للحوار الجاد ولن يتاح لأي كان الكتابة بها .. وانما فقط من مجموعة من المحاورين الجيدين (بيتم اختيارهم على عدة اساسات منها الإختيار وشي اسمو النقاط وهيك ) بحيث نطور الأقسام بحسب التخصصات

اما عن باقي الأسئلة التقنية كالرسائل الخصة والبحث .. فلن اجيب عنها لأن سنقوم بالإنتقال لبيئة جديدة بوقت قريب وتؤمن كل الطلبات التي اشرت إليها (يعني هو قصور تقني فقط)


------------------- Kakabouda ----------------
هلا ابو جريج..

يا أخ أخوية أنا لاحظت انك مقصر معنا شوي كأعضاء بشركتك المحترمة ... شو مشان عملنا هدايا مو مشان شي مشان برستيجك يعني

حقية ما فهمت السؤال كتير.. فعن اي شركة تقصد (اي منهم)
ان كان تقصد ما يخص الإستضافة مثلا هيك شي .. احنا تحت امركم اعضاء ومشرفين

----------------- melad_nor --------------------
هلا ميلاد .. (اليوم قال برد بفرنسا .. كيفك والفودكا ؟)
:P

انا بدي اسال اخويه مشان اعضاء المنتدى انو ما يسمح لاي حدا يشارك واكيد الكل بعرف عن مين قصدي

ان ابغض الحلال هو الحزف (حزف المواضيع او الردود او العضويات) ولما منعمل اي من هذي فعلى مضض شديد..
عنا امنية قريبة بعيدة ..
امنيتنا نوصل بالمنتدى والأعضاء لفترة ما نضطر نحزف فيها ولا كلمة ولا رد ولا موضوع .. وما نضطر فيها نحزف ولا عضو ولا ننذر احد ولا نوقف عضوية احد ..

اما عن ان لا نسمح لأي كان بالمشاركة .. (هيك بشكل عام ) لاء صعب ..
الي عم تنفرو منهم هم اكثر الناس حاجة لوقوفكم جمبهم
والي عم تنزعجو من ردودهم وتقاطعوهم مقاطعة جماعية بكلمة حلوة وابتسامة من القلب واحدة فيهم يكونو اكثر اصدقائكم وااحبهم على قلبكم ..
احنا هون مش منتدى نخبوي .. وليس حكر على نخبة الشبيبة .. (الإجتماعية او الفكرية او غيرها ) بل بالعكس
احنا في منتدى تنشيئي هادف .. بالتالي ساحة عملنا هم الناس الي بحاجة لمساعدة (سواء شخصية , او تثقيفية, او اجتماعية الخ .. ) لذا وجودهم و قدرتنا على مساعدتهم هم اول (الصحيح لا يحتاج لمساعدتنا اما المعوز هو من يحتاج)



---------------- krimbow -----------
هلا كريم .. هادي القسم عندك اليوم (على غير العادة )

كيف بيتم تعيين المشرفين؟؟؟ يعني في مراحل معينة و في اساسات و في مزايا عند المشرف ليتم تعيينو؟

لا .. ما في منهجية صريحة او نقاط واحد اتنين تلاتي على ضوئها بيتم تعيين مشرف وغيره ..
لكن مع تطور المنتدى اتطورت الية اختيار المشرفين
فكانت بالبداية مبنية على الحماس والمشاركة في المنتدى
تطورت فصار نتعب اشخاص (منتابعهم عن كثب ومنتابع مشاركاتون) بحيث نقدر نستشف اكثر عن شخصياتهم
ومن ثم مناخد آراء بعض المقربين والي هم في واقع وبيئة الأعضاء اكثر .كمشرفي بعض الأقسام الي على تواصل كبير مع عدد كبير من الأعضاء وهيك .. بحيث بتتبلور صورة اولية عن عضو معين
بعدها منراسل العضو منطلب منه المساعدة في الموقع (بالإنضمام لفريق العمل) ومنرسل ليه استمارة طويلة
فيها اسئلة عامة وخاصة وغريبة .. بس مدروسة منيح ..
كل سؤال بالإستمارة بالإجابة عليه بيحطلنا قطعة من البازل .. بآخر الإستمارة ومع الصورة الأولية الي عنا بيتكون عنا صورة وفكرة منيحة عن الشخص .. وعلى ضوء كل هذا بيتم اختياره مشرف او لا ..
هذا بإختصار
(دائما هناك قصور في الإجرائات في تعيين المشرفين هو الحال في اي تعيين في اي مكان .. فهذا متل السمك بالمي .. ما حتقدر تعرف بالظبط امكانية الشخص دون ان تتعامل معه بالمكان الي هوي فيه بشكل مباشر اقصد بدون ان يعمل كمشرف ما فيك تعرف امكاناته .. لكن نسعى دائما ونحاول دائما لأن تكون كل الخظواة ما قبل تعيين المشرف تعطي صورة اوضح عن كيف حيكون عملو وتفاعله)

و الاهم من هيك ... اذا المشرف صار مشرف خلص بيتم مشرف للأبد ؟؟؟

بمسودة الدستور او الخطوط العريضة لآلية المشرفين الي حطيناها في مطلع هذي السنة
كان المشرف له فترة اشرافية محددة ب 4 شهور .. ولا يتم اختيار مشرف لأكثر من دوريتين متتاليتين على نفس القسم .. لكن لم يتم اكمال هذي المسودة ولم يتم تطبيق هذي الشروط .. لأسباب اعتزر عن زكرها الآن

وانما هذا سيتم العمل به (اتمام المسودة ووضع الخطوط العريضة للمشرفين او دستور اخوية الداخلي) وسيتم العمل بها بدقة بفترة قريبة انشاء الله .. (في بعض النقاط عالقة بعد)

انو نعمل منتدى بيهتم بعلم النفس لأنو كتير مواضيع بتحكي عن هالشي

ولو ان ليس مكان الإقتراحات هنا (فعاملينلو قسم طويل عرييض ) هاهاها
لكن سأجيب ..
الفكرة جيدة .. وقابلة للتطبيق جدا .. تحتاج لدراسة حنتناولها بقسم المشرفين مع باقي المشرفين ..

هلا

[Akhawia]

------------------ Here I Am -------------------
اولا مبروك عضوية المنصة .. وانشاء الله على اول الإسبوع القادم حنشوفك مع سعيد بالصالون
شدو الهمة .. الهمة قوية .. صالة بتنده .. يا اخوية ..

شو بتعنيلك كلمة " انسان "

سؤال صعب.. بحكم اني عم بحكي بإسم اخوية .. وبدي جاوب على السؤال بصفتي حسام وليس بصفتي اخوية ..

انسان هيي درجة متقدمة (او رتبة كونية) .. بيكتسبها فئة من البشر بحسب طريقة تحليلهم لإنعكاسات الواقع الإجتماعي لإقتصادي عليهم وعلى البيئة المحيطة التي بدورها بترسم عندهم انعكاسات بيتم ايضا بلورتها على صورة افكار وايدولجيات . (الي بيجمع الإنسان هو طريقة التحليل هذي .. فالإنعكاسات الإجتماعية الإقتصادية بتنطلي على كل البشر كل ضمن نطاقه (بحسب الأتموسفير الي هوي مغموس فيه) .. لكن شريحة واحدة لديها نفس طريقة تحليل وبلورة الإنعكاسات او بدقة اكثر بلورة فئة من الإنعكاسات لفئة من المكونات الإيديولوجية الي بدروها بتتبلور بفئة من الأعمال.)

-- ما قدرت اختصر وبسط اكثر من هيك .. يعني لو بدي بسط بدي طول بالحكي ولو بدي اختصر اكثر بدو يتعقد الكلام اكثر .. هذا الحل الوسط كان --

----------------- Atramez_Zeton -------------------
اهلين باشا ..

احيانا بيصير من بعض الاعضاء الخروج عن الحدود و القوانين و ما بيتم اتخاذ اجراءات صارمة اتجاهون شو السبب بهل التراخي ؟؟؟ هل هو ضعف من ثبل الادارة او خوفا من الانقاص من عدد الاعضاء مع العلم ان التفاحة المعفنة بسحارة تفاح منيح بتنزع باقي التفاحات

ليس ضعف (فالضعف يتلازم وعدم المقدرة .. لكن لدينا المقدرة !)
وليس خوف من نقص العدد (العدد آخر الأولويات التي نأخذها بعين الإعتبار)

التفاحة المعفنة بسحارة تفاح منيح بتنزع باقي التفاحات ..
ليش مين قال انو احنا بسوق خضرا ؟؟؟؟ ؟؟؟ ؟؟؟

الي حاسس حالو تفاحة وحاسس التفاحة الي جنبو عم بتنزعو او عندها قدرة تنزعو فيحمل حالو ويروح على خير سحارة !!

اما احنا فشايفين انو "---- أَنتُم مِلحُ الأرض‏.‏ فاذا فَسَدَ المِلح‏,‏ فبماذا يُمَلح ؟‏ ----"
يعني من بد وجديد "ليس الأصحاء بحاجة إلى طبيب بل المرضى"

------------ Sedrec ---------------
هلا سيدرك .. ما بعرف رحبو فيك ولا لسا .. بس هاي من عندي سلف

يا ترى شو هو هدفك من هالنشاط؟ وواضح انو هالهدف كتير ايجابي وبناء ومحترم، لأنه "من أعمالهم تعرفونهم" وواضح كمان من خلال التفاف هالشباب حول هالموقع.

أحيانا بكون الهدف سامي وكبير وبحاجة لوقت مشان ينشرح ويوصل لعقول الناس وقلوبهن، بس يمكن بضع كلمات نابعة من القلب تكون كافية، حتى ولو كان صعب على الناس ادراك مكنونات النفس، الثقة بهالشخص برأيي بتكفي ليمشو معو.

بالظبط متل ما اشرت ان الشرح سيطول من ناحية .. ومن ناحية اخرى لا نحب ان نحصر اهدافنا ببضعة كلمات .. فهي ابعد قليلا .. لكن ان احببنا الإيجاز جدا ..
أخوية منتدى تنشيئى تربوي ..بالدرجة الأولى ..(اي ان نحاول ونسعى حتى في الجوانب الترفيهية ان تكون ترفيهية هادفة .. )
سياستنا هي عدم اسقاط اي ايديولجيا مسبقة الصنع او توجه فكري مسبق التحضير على اسلوب العمل ..
اي لكل -اي كان- متسع ومكان يستطيع المكوث به والتعبير من خلاله ..
ولكل اي كان ايضا الحرية في اعتناق ما يقتنع به (وهنا ساحة العمل الفعلية فكل سيبشر -سواء بطريقة مباشرة او غير مباشرة- بما يعتقد به وسيسعى لإستقطاب الأخرين به والباسه لهم .. وبالنهاية ما بيصح غير الصحيح .. اي اننا لا نخاف على ان يغلب الباطل مثلا .. او ان يتم تسويق افكار خاطئة او افكار سيئة ان صح التعبير .. فنحن نثق بقدرة الشبيبة القيادية الموجودة بالموقع على الثبات والمحافظة على الخط القويم (او الذي نعتقد نحن انه الخط السليم) .
- بقدر الإمكان نعتمد على العمل دونا عن التنظير .. اي كمثال:
الحرية شيئ يفتن الكثيرين وخاصة من عانى من نقصها .. لكن نحن نعتقد ان لها مساوؤ كثيرة .. ليس بإمكاننا نقل هذي الفكرة بصورتها الحقيقة بالكلام النظري .. لكن لو افتتحت قسم وقلت هذا قسم حر بدون اي قوانين ستجد ان الأعضاء من تلقاء نفسهم بعد فترة سيكتشفون مساوؤ الحرية وسلبياتها وسيقومون من تلقاء نفسهم بإبتداع اساليب وطرق لترويض الحرية هذي .. مثل ان يقومو بإنشاء قوانين واعراف... مثل ان يقومو بردع من يتصرف بطريقة معينة كانو هم يتصرفون بها سابقا لكن من تجربتهم استطاعو ان يكتشفو ان هذا الإسلوب لا يجدي وانما كذا الخ ..

اي نحاول بقدر طاقتنا ان نوصل الفكرة بالتجربة والخبرة الشخصية (فتتبلور في النهاية ثوابت راسخة في رواد الموقع واعضائه -هي مبتغانا -)

بتطبيق ديمقراطية مطلقة في احد الأقسام ستوضح للأعضاء على اكمل وجه مفهوم الديمقراطية وستفهمهم مساوئها جدا وبتطوير نظام العمل ستعلمهم التغلب على مساوئها ..

[Atramez_Zeton]

شكرا اخوية على يلي قدمتو بس انا في الشق الاول من السؤال ما اجبت عليه :P

احيانا بيصير من بعض الاعضاء الخروج عن الحدود و القوانين و ما بيتم اتخاذ اجراءات صارمة اتجاهون شو السبب؟؟

بعتقد انو اجبت على النص الثاني :P الا ازا ما فهمت عليك منيح :P
طبعا زا بحقلي ناقش