لا حياة لمن تنادي

[desertrose]

لا حياة لمن تنادي

السادة المشرفين على هذا المنتدى المبجل, بادئ الأمر أحيكم تحية عربية و أشد على أياديكم المباركة.

شجعني الحوار الساخن الذي جرى في منتدى المشرفين الخاص بموقعكم على تعديل مسرى مشاركتي الأخيرة عن لغة أس كيو ال و إظهار هشاشة منتديات الحوار المطورة باستخدام بي اتش بي, الأمر الذي كنت قد ذكرته في "حوار الطرشان":

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

أحداث القصة:
-------------
تمكنت منذ بضعة أيام (أثناء عطلة عيد ميلاد يسوع ملك الملوك) من الإطلاع على ما يدور من نقاش في منتدى المشرفين حول التشكيلة الجديدة لمشرفين هذا الموقع, و للأمانة أطالب أحد المشرفين ذوي الصلاحيات المحدودة أو المشرف الكامل الصلاحيات بنشر وقائع الجلسة كاملة بدون أي تعديل, هذا بالطبع أن امتلك أحدهم الجرأة على ذلك.

لقد كنت قادراً بالطبع على نشر المقال, لكنني لم أفعل كي لا أتهم بالتعدي على الحرمات, و اغتصاب أمن موقعكم.

و الغاية من هذا المقال ليس التشهير بسمعة المشرفين لا سمح الله, إنما فسح المجال أمام أعضاء المنتدى بالتصويت على اختيار المشرفين, و أعتقد أن لهم الحق في التصويت أكثر من المشرفين المتواجدين حالياً.

فلا تنسوا أن "ملح الأرض" هم أعضاء الموقع و ليس مشرفيه.
‍
كما أطالب أعضاء الموقع بالإطلاع على مقالة "حوار الطرشان", و التي لم تكن الغاية منها التشهير بمدير هذا الموقع الذي له مني كل التقدير و الاحترام (لأنه يذكرنني دائماً بالواقع الذي نعيشه), إنما كانت الغاية شكر الأخ "الكينغ رور" الذي أعتبره الشخص الجدير ليس بإدارة منتديات التكنولوجيا فحسب – كما قرر المشرفون الأكابر - بل بإدارة الموقع بأكمله.



تعليق ديزريت روز
-------------------
التشكيلة الجديدة للمشرفين على منتديات موقعكم مثيرة للضحك, ليس هذا استهزاء بل هو استطراء,

رشحني أحدهم لكي أصبح من المشرفين فله مني كل الشكر, لكنّي كما قال صديق لي (وهو من المشرفين) لا أملك الوقت و بالطبع هو محق لكنه لا يملك الحق أن يذكر اسمي أو طبيعة دراستي أو مكان عملي.

أنا لست باميلا اندرسون حتى يتم جذبي إلى موقعكم, كما اقترح أحد المشرفين.

رأي مدير الموقع أنه ليس بالضرورة أن يكون المشرف "فهيماً" بل يكفي أن يكون متفرغاً أي يملك من الوقت أكثر ما يملك من المعرفة- كما هي حالة معظم المشرفين- أكرر تقديري و احترامي لمدير الموقع (لأنه يذكرنني دائماً بالواقع الذي نعيشه).

أنا معكم في ضرورة تمتع المشرف بالوقت الكافي للإشراف, لكني لست معكم في أن يكون هذا الشرط أكثر أهمية من المعرفة التي يجب أن يتمتع بها المشرف.

عزل الآباء الروحيين عن الإشراف ليس خطوة حكيمة بل هو تأكيد على أن هذا الموقع يتمتع بطابع شخصي متمثل بالمدير و لا أظن أنها كانت الفكرة الرئيسية من الموقع. أكرر تقديري و احترامي لمدير الموقع (لأنه يذكرنني دائماً بالواقع الذي نعيشه),

مشاركتي هذه حرمت عددا من الأعضاء من الإطلاع على لغة أس كيو آل و هشاشة منتديات الحوار المطورة باستخدام بي اتش بي, إلا أنهم قادرون على مراسلتي إن أرادوا.

تحية ليست بتحية عربية - فلتكن مثلاً تحية على الطريقة الصينية!! - إلى الصديق "الحلاق", راجياًً يتعاون مستقبلي لما فيه خير لمجتمعنا.

إن قررتم فتح باب التصويت, فصوتي سيكون للأخ "الكينغ رور" لإدارة منتديات التكنولوجيا و الانترنت و التصميم و الغرافيكس و الخواطر و ... و... و... و...., و بعبارة مختصرة إدارة الموقع.


متي سيصبح بالامكان الكتابة بلغة أعداء الأمة الأمريكان في موقعكم؟؟؟ سؤال أوجهه لمدير الموقع.

أعرف الآن السؤال الأهم الذي يدور في بالكم جميعاً, لكن الجواب ليس عندي!!!


لكم جميعاً فائق الاحترام من ديزريت روز

[Joe]

انت برأيك يلي عملتو هلأ صح؟

انت لما قلت:
تمكنت منذ بضعة أيام (أثناء عطلة عيد ميلاد يسوع ملك الملوك) من الإطلاع على ما يدور من نقاش في منتدى المشرفين

كان بالاحرى.. و بما أنو موضوعك عن الصراحة... الاحرى انك تقول انك "اخترقت منتدى المشرفين عن غير وجه حق"... و ليش دحشت يسوع "ملك الملوك" بالنص هادا يلي ما فهمتو...؟

بعتقد يا أخي انو الطريقة يلي تم فيها التهجم على خصوصية منتدى ما.. أو عفوا.. الاطلاع اثناء عطلة ميلاد الرب يسوع ملك الملوك... بتجرد كل كلامك التالي من اي مصداقية و أهمية.. و لو انك ما اخترعت شي من عندك او كذبت.

بعمري ما سمعت عن حرامي رفع دعوة على أهل بيت لانو شاف شي ما عجبو جواتو!

فكر فيها لحالك

سلامات و كل عام و انت بخير

[yass]

كاتب النص الأصلي : joe

انت برأيك يلي عملتو هلأ صح؟

انت لما قلت:
تمكنت منذ بضعة أيام (أثناء عطلة عيد ميلاد يسوع ملك الملوك) من الإطلاع على ما يدور من نقاش في منتدى المشرفين

كان بالاحرى.. و بما أنو موضوعك عن الصراحة... الاحرى انك تقول انك "اخترقت منتدى المشرفين عن غير وجه حق"... و ليش دحشت يسوع "ملك الملوك" بالنص هادا يلي ما فهمتو...؟

بعتقد يا أخي انو الطريقة يلي تم فيها التهجم على خصوصية منتدى ما.. أو عفوا.. الاطلاع اثناء عطلة ميلاد الرب يسوع ملك الملوك... بتجرد كل كلامك التالي من اي مصداقية و أهمية.. و لو انك ما اخترعت شي من عندك او كذبت.

بعمري ما سمعت عن حرامي رفع دعوة على أهل بيت لانو شاف شي ما عجبو جواتو!

فكر فيها لحالك

سلامات و كل عام و انت بخير

أنا معك مية بالمية ...

[Anmar]

رشحني أحدهم لكي أصبح من المشرفين فله مني كل الشكر, لكنّي كما قال صديق لي (وهو من المشرفين) لا أملك الوقت و بالطبع هو محق لكنه لا يملك الحق أن يذكر اسمي أو طبيعة دراستي أو مكان عملي.

والله مشان الصراحة الكاملة يا جماعة .. أنا هاد الصديق ...
بس يا سيد ديزرت روز كان لازم تشترك باسم العميل السري 007 لحتى أعرف أنو هالمعلومات (اسمك العظيم -وطبيعة دراستك السرية-ومكان عملك المتواري عن الأنظار) هيي معلومات غير قابلة للنشر ...

هلأ أنا رديت عن الجزء اللي بيخصني بس لأنو ما بقدر رد عن باقي الموضوع ..

[al7alla2]

لقد كنت قادراً بالطبع على نشر المقال, لكنني لم أفعل كي لا أتهم بالتعدي على الحرمات, و اغتصاب أمن موقعكم.

والله شايفلك لازم ننشر هالمعلومات خلي هالشعب يعرف شو عم يصير

أنا لست باميلا اندرسون حتى يتم جذبي إلى موقعكم, كما اقترح أحد المشرفين

لباميلا اندرسون

فلا تنسوا أن "ملح الأرض" هم أعضاء الموقع و ليس مشرفيه

هاد بنظري ونظرك, بس يمكن في كم واحد هون معتبرين حالن شوال الملح كلو...

التشكيلة الجديدة للمشرفين على منتديات موقعكم مثيرة للضحك, ليس هذا استهزاء بل هو استطراء,

لأ أخي استهزاء ونص...وأنا برأيي انو يغيرولي هالطقم الكفؤ جدا ً يلي مرشحينو

تقديري و احترامي لمدير الموقع (لأنه يذكرنني دائماً بالواقع الذي نعيشه).

اما و اقع

أنا معكم في ضرورة تمتع المشرف بالوقت الكافي للإشراف, لكني لست معكم في أن يكون هذا الشرط أكثر أهمية من المعرفة التي يجب أن يتمتع بها المشرف.

يمكن هاد رأيي و رأيك و رأي الأغلابية بس الواقع أنو شوال الملح عندو رأي تاني

عزل الآباء الروحيين عن الإشراف ليس خطوة حكيمة بل هو تأكيد على أن هذا الموقع يتمتع بطابع شخصي متمثل بالمدير و لا أظن أنها كانت الفكرة الرئيسية من الموقع.

بدون تعليق

تحية ليست بتحية عربية - فلتكن مثلاً تحية على الطريقة الصينية!! - إلى الصديق "الحلاق", راجياًً يتعاون مستقبلي لما فيه خير لمجتمعنا.

إن قررتم فتح باب التصويت, فصوتي سيكون للأخ "الكينغ رور" لإدارة منتديات التكنولوجيا و الانترنت و التصميم و الغرافيكس و الخواطر و ... و... و... و...., و بعبارة مختصرة إدارة الموقع.

صرنا اثنين

متي سيصبح بالامكان الكتابة بلغة أعداء الأمة الأمريكان في موقعكم؟؟؟ سؤال أوجهه لمدير الموقع.

سؤال طرحتو من زمان و الجواب كان ( جكر بالأمريكان ) :P

كان بالاحرى.. و بما أنو موضوعك عن الصراحة... الاحرى انك تقول انك "اخترقت منتدى المشرفين عن غير وجه حق"... و ليش دحشت يسوع "ملك الملوك" بالنص هادا يلي ما فهمتو...؟

حبيبي سميها متل ما بدك أختراق, دخول غير مشروع.............. المهم الزلمي ما أذى المنتدى بشىء و أعترف بدخوله لمنتدى المشرفين .
و يمكن ما بدها ذكاء خارق أو مخ أو حتى نخاعات لتعرف أنو الشب كان بيوم عيد ميلاد يسوع "ملك الملوك" عم يحتفل بموقع المشرفين و يشرب كاس هالمنتدى

بعمري ما سمعت عن حرامي رفع دعوة على أهل بيت لانو شاف شي ما عجبو جواتو!

ليك يا حبيبي أذا عبالك أنو ينزل مستوى الحديث لهيك مستوى فيمكن كل واحد مننا عندو لسان متلك يتفصحن فيه ......
و لو كان حكيك مظبوط فيمكن منتدى الهكرجية لازم يصير أسمو منتدى الحرامية

فكر فيها لحالك

و لله انت الي لازم تفكر فيها مو هوي

بس يا سيد ديزرت روز كان لازم تشترك باسم العميل السري 007 لحتى أعرف أنو هالمعلومات (اسمك العظيم -وطبيعة دراستك السرية-ومكان عملك المتواري عن الأنظار) هيي معلومات غير قابلة للنشر ...

و لله أنا مقتنع %100 انو الي عملتو غلط و كتير ولادي و شي لازم ما يجي من واحد متلك يا أنمار...يمكن لو كان بدو العالم تعرف مين هوي كان بيقدر يحكي و يعرف عن حالو .......بس يمكن الثقة حطها بغير محلها

[Akhawia]

1- سرقة باسوورد رفيقك المشرف ودخول منتدى المشرفين موضوع بينك وبين رفيقك انمار .. وتعليقك على هذه النقطة يا ريت اتحطلي ياه بمنتدى المشرفين _ان كان عندك القدرة بعد الان_

2-

و الغاية من هذا المقال ليس التشهير بسمعة المشرفين لا سمح الله, إنما فسح المجال أمام أعضاء المنتدى بالتصويت على اختيار المشرفين, و أعتقد أن لهم الحق في التصويت أكثر من المشرفين المتواجدين حالياً.

اي فهمت عليك
قصدك مستقبلا من خلي الرعية تختار الكاهن بالانتخابات .. ومنخلي الرعية مثلا مثلا .. تختار المطران والبترك بتاعهم كمان بالانتخابات ... هيك قصدك لا يكون ؟؟
مان ما بينفع تعمل انتخابات لوزير الصحة بين مهندسي الكمبيوتر .... هذا لا يعني ديمقراطية هذا يعني رجعية ..
نفس الشي .. الفاهم للخطوط العريضة للموقع ليس الاعضاء وانما المشرفين .. وتجري انتخاب وترشيح مشرفين جدد من قبل المشرفين القدامى .. لهذا السبب .. وهذه الدميقراطية بعينها ..
فكيف حتساوي صوت عضو ليه يوم بالمنتدى مع صوت عضو عنده 1000 مشاركة وفاهم المنتدى كلو ؟؟؟
لا بد من حصر المنتخبين بالاختصاصات .. ببساطة ما بينفع شخص ما بيكتب غير بعال الطايرة وبالصالون ولا له علاقة بالكمبيوتر يكون صوته يساوي صوت شخص اخر متعمق بالكمبيوتر .. مثلا وبالتالي ما بينفع الاعضاء يختارو مشرفيهم ..

3-

فلا تنسوا أن "ملح الأرض" هم أعضاء الموقع و ليس مشرفيه.

بالظبط .. تماما .. وهذا المثلا الي كنت انا حقولو ..
يعني الملح مثلا ما بينفع اتحطو فوق البتفور .. الملح ليه مكانه بالطعام .. ما بينفع ينحط بمكان اخر .. ؟؟
كل شيء وليه شي .. وما بينفع اتكون الدنيا شوربا وكلو تبع كلو .. وما بينفع هوشة العرب ..

4-

كما أطالب أعضاء الموقع بالإطلاع على مقالة "حوار الطرشان", و التي لم تكن الغاية منها التشهير بمدير هذا الموقع الذي له مني كل التقدير و الاحترام (لأنه يذكرنني دائماً بالواقع الذي نعيشه), إنما كانت الغاية شكر الأخ "الكينغ رور" الذي أعتبره الشخص الجدير ليس بإدارة منتديات التكنولوجيا فحسب – كما قرر المشرفون الأكابر - بل بإدارة الموقع بأكمله.

قريت مقال حوار الطرشان بس ما لقيت فيه تشهير بمديري الموقع ؟؟
وشرفت مديري الموقع بنعتهم بانهم يزكروك بالمواقع الي تعيشه .. فالبعض كان مفكرهم اميركان واوربييين .. طلع بالفعل هني سوريين

5-

رشحني أحدهم لكي أصبح من المشرفين فله مني كل الشكر, لكنّي كما قال صديق لي (وهو من المشرفين) لا أملك الوقت و بالطبع هو محق لكنه لا يملك الحق أن يذكر اسمي أو طبيعة دراستي أو مكان عملي.

رأي مدير الموقع أنه ليس بالضرورة أن يكون المشرف "فهيماً" بل يكفي أن يكون متفرغاً أي يملك من الوقت أكثر ما يملك من المعرفة- كما هي حالة معظم المشرفين- أكرر تقديري و احترامي لمدير الموقع (لأنه يذكرنني دائماً بالواقع الذي نعيشه).

ما فهمت شو دخل ..
اذا ما عندك وقت يعني ما بينفع اتكون مشرف ... ببساطة .. لانو ما بينفع يجي يكون البابا شنودة ولا البطريرك هزيم ولا المتروبورليت براهيم نعمة مشرف بالموقع .. لانو كمان ما عندو وقت !!
ولا من الاعضاء والمشرفين من هوي افهم من سيدنا مثلا ... بس برأيك معقول يكون سيدا مشرف على قسم او كل المنتدا ؟؟ طبعا لاء لانو الاشراف بدو وقت ... وليس المعيار الاول التخصص والتعمق والخبرة بمجاله بقدر ما هي الخبرة + الوقت !!

اما في ما يتناول نقطة انو باقي المشرفين قليلي الخبرة وما فهمانين .. فانت غلطان .. - ما اتواخزني - بس انتا غلطان كتيييييير ... الي بينقص المشرفين الحاليين هو الوقت .. وليس الخبرة وهوي سبب ترجيح عامل التفرغ واتيانه بالمرتبة الاولي كشرط في المشرف على عامل الخبرة ...

6-

أنا لست باميلا اندرسون حتى يتم جذبي إلى موقعكم, كما اقترح أحد المشرفين.

يا ريتك باميلا اندرسون ......

7-

عزل الآباء الروحيين عن الإشراف ليس خطوة حكيمة بل هو تأكيد على أن هذا الموقع يتمتع بطابع شخصي متمثل بالمدير و لا أظن أنها كانت الفكرة الرئيسية من الموقع

ما دخلك بهال المواضيع بتاتا .. هذا شأن داخلي جدا جدا .. وما في داعي لمديري الموقع انو يوضحو كل خطوة بيقومو فيها بكل حيثياتها ليش تمت .. ولو انو الموضوع معروف لكثير من الاعضاء الي بيعرفو الاباء شخصي .. لكن على الرغم فيك اتراجع مشاركات الاباء وتفهم احد اسباب تغيير الصفة الي حتتناول الأباء من مشرف الي "عضو شرف "

8-

مشاركتي هذه حرمت عددا من الأعضاء من الإطلاع على لغة أس كيو آل و هشاشة منتديات الحوار المطورة باستخدام بي اتش بي, إلا أنهم قادرون على مراسلتي إن أرادوا.

لم افهم مبتغى هذا التعليق وما مدى علاقته بالموضوع او بغير موضوع .. ممكن طرحه كموضوع منفصل لو شئت ... + ما حدى قال ان ال MySQL افضل من SQL مثلا او PHP افضل من ASP .. موضوع ممكن مناقشته على جنب لكن عموما كل وليه اسلوب وقدرات .. وكل شي بتمنه .. منتدى مثل اخوية مصاريفه السنوية بحدود 600$ من غير اي دخل للموقع .. وهيي من جيوب الشباب ...
لما بدي اعمل موقع وشغلة SQL واخدلو سيرفر وندوز .. و و و و.. من وين بدنا انجيب ال 1000 -2000$
بالوقت الي بيئة الموقع الحالية بيئة مناسبة جدا وكافية لحاجات المنتدى .. _هذا ليس انقاص من قيمة php اطلاقا .. فلما شركة عاليمة وموقع رقم واحد بالعالم يعتمد php كلغة برمجة في صفحاته والي هوي Yahoo فاكيد لو مانها لغة تستحق ولا تعاني من الهشاشة بشيئ لما اختارها .. هني ما مفكرين بال 1000 وال 10 الاف ولا الملايين الي بيحطوها بهيك مجال .. على خلافنا .. عموما لو حبيت اطرح الموضوع على جنب ..


9-

إن قررتم فتح باب التصويت, فصوتي سيكون للأخ "الكينغ رور" لإدارة منتديات التكنولوجيا و الانترنت و التصميم و الغرافيكس و الخواطر و ... و... و... و...., و بعبارة مختصرة إدارة الموقع.

لا ليس الموضوع عرضى للنقاش والجدال .. هل سيفتح باب التصويت للاعضاء لانتخاب مشرفيهم ام لا ..
صوتك غير محتسب ..


Joe

بعمري ما سمعت عن حرامي رفع دعوة على أهل بيت لانو شاف شي ما عجبو جواتو!

يزكرني بواقع الذي نعيشه

ِAnmaar

بس يا سيد ديزرت روز كان لازم تشترك باسم العميل السري 007 لحتى أعرف أنو هالمعلومات (اسمك العظيم -وطبيعة دراستك السرية-ومكان عملك المتواري عن الأنظار) هيي معلومات غير قابلة للنشر ...

او رأفت الهجان بينفع كمان

هلأ أنا رديت عن الجزء اللي بيخصني بس لأنو ما بقدر رد عن باقي الموضوع ..

الباقي ما بيخصك او كيف ؟

yass

أنا معك مية بالمية ...

لم نجد في الردود الاخرى ما يستدعى الرد .. لخروج الردود الاخرى عن بيئة الحوار السائدة في اخوية (الموضوعية الهادفة )
وليس في كلامنا الاخير وردنا على كلام "ديزرت روز" بيان شرعية ما قام به سواء بسرقة باسورد صديقه المشرف او بانتهاك حرمات بعض الاقسام ... لكن اتى هذا الرد كترسيخ احترام اخوية والقائمين عليها للخطوط العريضة التي ما فتئنا نبزل اقصى ما بوسعنا لترسيخها ونشرها .. في ما يتناول حرية التعبير و الفكر والانتماء ...


فائق الاحترام
- فصحون (ابن عم سوسو الامورة) المتحدث الرسمي باسم صهر جوز احمى سوسو الامورة .. (طويلة العمر)

[Anmar]

1- سرقة باسوورد رفيقك المشرف ودخول منتدى المشرفين موضوع بينك وبين رفيقك انمار ..

الباسوورد تبعيتي ما انسرقت ... يعني في باسوورد تاني لشخص تاني أكيد يعني ما دخل باسمي أكيد

و لله أنا مقتنع %100 انو الي عملتو غلط و كتير ولادي و شي لازم ما يجي من واحد متلك يا أنمار...يمكن لو كان بدو العالم تعرف مين هوي كان بيقدر يحكي و يعرف عن حالو .......بس يمكن الثقة حطها بغير محلها

لا تواخذني مشان الله .. شو بدك تعمل زغير وغلط ...

[Fares]

أول شي أنا بدي قول أنو انتهاك حرمة الموقع هو أمر مرفوض مية بالمية!!!! ووقت قريت الجملة التالية لديزرت روز حسيت حالي بشي حارة قبضايات وعم أحكي مع زعيم الحارة:

((تمكنت منذ بضعة أيام (أثناء عطلة عيد ميلاد يسوع ملك الملوك) من الإطلاع على ما يدور من نقاش في منتدى المشرفين حول التشكيلة الجديدة لمشرفين هذا الموقع ............ لقد كنت قادراً بالطبع على نشر المقال, لكنني لم أفعل كي لا أتهم بالتعدي على الحرمات, و اغتصاب أمن موقعكم.))

يعني الفكرة أنو إذا في شي مزعوج منه الأخ بيقدر يكتب موضوع أنو أنا شايف أنو الشغلة الفلانية غلط أو الشيء الفلاني غير صحيح، أما أن يدخل ع منتدى المشرفين (بسرقة باسوورد) فهادا خارج عن أصول التعامل في أخوية.نيت....

ولكن رغم هذا الخرق الواضح لمبادئ الحوار والكتابة في الموقع، إلا أنه ومن منطلق احترام جميع الآراء لأنها تعبر عن أصحابها، لن يتم حذف هذا المقال، وسيترك من مبدأ الموضوعية التي تأسس عليها هذا الموقع...


قال ديزيرت-روز:
كما أطالب أعضاء الموقع بالإطلاع على مقالة "حوار الطرشان", و التي لم تكن الغاية منها التشهير بمدير هذا الموقع الذي له مني كل التقدير و الاحترام (لأنه يذكرنني دائماً بالواقع الذي نعيشه),

أنا قرأت المقال بتمعن وما وجدت فيه أي شيء يمس مدير الموقع أو أحد أعضاء الموقع!!!! وما فهمت الربط بين موضوع (حوار الطرشان) والموضوع الذي تفضلت بطرحه هنا!!!!!!!!



قال ديزيرت-روز:
التشكيلة الجديدة للمشرفين على منتديات موقعكم مثيرة للضحك, ليس هذا استهزاء بل هو استطراء,

بصراحة ما فهمت شو يعني كلمة (استطراء) هاي؟؟؟؟ إذا حدا فهم يشرحلنا يا جماعة.......


قال ديزيرت-روز:
رأي مدير الموقع أنه ليس بالضرورة أن يكون المشرف "فهيماً" بل يكفي أن يكون متفرغاً أي يملك من الوقت أكثر ما يملك من المعرفة- كما هي حالة معظم المشرفين

الفكرة لم تذكر بهذه الحرفية!! الفكرة أنه لدينا العديد من الأعضاء في الموقه يملكون الخبرة الكافية، ولكنهم لا يملكون الوقت... ومن هنا كان الأقضل بالنسبة للموقع أن يشرف على إدارة أحد أقسامه عضو يجمع بين التفرغ والمعرفة المتوسطة من أن يشرف على أحد الأقسام شخص خبير ولكنه لا يستطيع أن يشارك إلا ما ندر ومساهماته لا تتعدى العشر مشاركات مثلاً....


قال ديزيرت-روز:
عزل الآباء الروحيين عن الإشراف ليس خطوة حكيمة بل هو تأكيد على أن هذا الموقع يتمتع بطابع شخصي متمثل بالمدير و لا أظن أنها كانت الفكرة الرئيسية من الموقع

مع احترامي لجميع رجال الدين إلا أن الآباء الروحيين الذين يشرفون حاليا لديهم أشغالهم التي تمنعهم من دخول الموقع، و عندما تكون آخر مشاركة للمشرف في الموقع قد تمت منذ عدة أشهر فالأفضل أن لا يستمر بموقع الإشراف (وهذا الأمر ينطبق على جميع المشرفين وليس فقط على رجال الدين) ومن هنا سيتم تنصيبهم لقب (عضو شرف)..

قال ديزيرت-روز:
إن قررتم فتح باب التصويت, فصوتي سيكون للأخ "الكينغ رور" لإدارة منتديات التكنولوجيا و الانترنت و التصميم و الغرافيكس و الخواطر و ... و... و... و...., و بعبارة مختصرة إدارة الموقع.

إذا كنت تعتقد أن هذا المقال سيفتح باب التصويت فأنت مخطئ أنك لم تدخل بطريقة شرعية، ولم تضع موضوغك في المكان المناسب... وإذا كان عندك اقتراح لهذا الشأن فلتتفضل وترسله إلى بريد المنتدى، وربما يتم أخذه بعين الاعتبار في الخطة المرحلية القادمة.....

[الأستاذ]

الحقيقة لما قريت الموضوع بالبداية و شفت قديش الأخ وردة الصحراء معصب إعتقدت أنو في مشكلة كبيرة بينو و بين الموقع أو أحد مشرفينو ، لأنو يلي بيقرا النص تبعو بلاحظ أنو ما في قضية جوهرية عم يدافع عنها و إنما عم ينتقل من قصة لقصة و من شخص لشخص بدون ما يوضح شو المبدأ أو القصة يلي عم يقاتل منشانا، و لكن لما سألت توضحلي أنو أغلب المشرفين ما بيعرفو شخصياً و بعضون مانو متابع مشاركاتو حتى(ما بيتعدو عدد أصابع الايدتين) و خاصة متلي أنا يلي ما إلي اهتمام بالكميوتر لا من قريب و لا من بعيد، فبتوقع أنو الشب كان لما عم يكتب تحت تأثير غضب أو ما بعرف شو لما كتب المقالة و أنا متلي متل غيري ما عرفت شو بدو
على كل حال هو طرح عدة أمور متباعدة رح حاول علق على بعضا
بالنسبة ل:

شجعني الحوار الساخن الذي جرى في منتدى المشرفين الخاص بموقعكم على تعديل مسرى مشاركتي الأخيرة عن لغة أس كيو ال و إظهار هشاشة منتديات الحوار المطورة باستخدام بي اتش بي, الأمر الذي كنت قد ذكرته في "حوار الطرشان

يعني هادا موضوع كميوتر و بهم المتابعين و المختصين و إذا عندو وجهة نظر معينة لقى مين يعارضا أو ما يشد على إيدو فيا فهادا صراع بين فكرتين كان فينو ببساطة يتابعو بطريقة علمية بالحجج المنطقية و بالمنتدى المخصص لذلك ، و هيك كان عفانا أنا و غير المهتمين بالكميوتر من الإطلاع على شي مو بس ما منفهم في و كمان بايعينو بقشرة بصلة، و بالنسبة إلى مشاركاتي بهديك الأقسام بتشهدلي :P

رشحني أحدهم لكي أصبح من المشرفين فله مني كل الشكر, لكنّي كما قال صديق لي (وهو من المشرفين) لا أملك الوقت و بالطبع هو محق لكنه لا يملك الحق أن يذكر اسمي أو طبيعة دراستي أو مكان عملي.

يعني ما بعرف إذا إنت مزعوج من صديقك لأنو ذكر إسمك فينك تروح نعاتبو و هي شغلة بينك و بينو
أما لو كنت من الناس يلي ما بحبو التعدي على الخصوصيات ليش لحتى تسرق باسوورد مو قلك و تطلع على حوارات خاصة ما إلك الحق بالاطلاع عليها و بطريقة غير مشروعة

التشكيلة الجديدة للمشرفين على منتديات موقعكم مثيرة للضحك, ليس هذا استهزاء بل هو استطراء,

يعني هادا يلي الله قدرنا عليه، و الانتقاد دائما بجي للشخص يلي عم يشتغل و الأفضل بدل الضحك أنو الواحد يعملو شي شغلة مهمة و لو الناس انتقدوها و حتى هزؤو منها ، و طالما هالواحد عندو قضية عم يشتغل كرمالا بهمو آراء الآخرين بس ما بتأثر عليه محاولات التفشيل يلي غالباً أهدافا مو سامية

بصراحة ما فهمت شو يعني كلمة (استطراء) هاي؟؟؟؟ إذا حدا فهم يشرحلنا يا جماعة.......

ما بعتقد أنو صاحبها بيعرف معناتا لأنو معناها غير مناسب لسياق كلامو
الاستطراء هو أنو الشخص يعمل شي هدفو أنو الناس تطريه يعني تمدحو ، ما بتوقع أنو يكون هادا هدف المقالة، بس الأكيد أنو ما وصل صاحبا لهل الهدف

متي سيصبح بالامكان الكتابة بلغة أعداء الأمة الأمريكان في موقعكم؟؟؟ سؤال أوجهه لمدير الموقع.

إذا قصدك الانكليزي فالمشاركة ممكنة فيهمن زمان، بس إذا قصدك لغة القطب الواحد و عدم سماع الآخر أو فهمو ، أو لغة العنجهية و الانخداع بالذات و جنون العظمة فهيي لغة ممكن الموقع يسمح للبعض باستخداما على أمل تتفتح بصيرتون بيوم من الأيام، ومن باب حرية الرأي و رحابة الصدر للجميع
بانسبة لموضوع المشرفين يلي أثرتو و خاصة موضوع الآباء يعني لوكنت عرفان عن شو عم تحكي كنت رح جاوبك بس شوف هاد اللينك

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

بالحقيقة مبارح شفت الأخ وردة الصحراء شخصياً و اعتبرتا فرصة لإني أفهم شو بدو، و لما سألتو شو يلي بتهدفو من ورا مقالتك قال أنو هو ما بهمو يعبرلي عن آراؤو ( مع أنو فايت على موقعي و حاطط المقالة و عم يتهجم على الموقع و إدارتو) و اكتفى بعد ما عصب و غلط بالحكي بأنو يهرب من الحوار و يدفن راسو بكتيب كان بايدو و تقتصر مشاركتو على الااستماع للحوار و إطلاق بعض الضحكات الحادة من حين لآخر،
عل كل حال أنا برجع بدعيه للأخ وردة الصحرا متل ما دعيتو مبارح، أنو لما بلاقي عندو الرغبة و القدرة على الحوار ، بدعيه لأنو يعبر عن فكرو و قضيتو سواء كان ذالك هون أو شخصي
و بعتقد أنو هادا هوو موقف أغلب أعضاء الموقع يلي بيتميز بالحرية الفكرية وقبول الآخر
و سواء كانت التحية عربية أو صينية أو غيرو ( ما بعرف شو أهمية هالطرح) فتحياتي للأخ صاحب المقال و جميع من شارك و لم يشارك من أعضاء الموقع فيه و خاصة كينغ رورو و أنمار

[أبوعبدو]

مساء الخير ..
انا بالحقيقة صحي بيطلع اسمي بالاخضر وهذا الاخضر بيقلع عيون بعض الناس ... بطلب منك يا اخي الكريم دكتور هوس اتساويلي اسمي بالاسود ...
لانو بالحقيقة انا ما بعمل مشاركات بالموقع بس بتصفحو بشكل دائم ... وبعرف اكيد الهدف الاساسي من وجود هذا الموقع
واسمي هوي من اول الاسماء المنتسبة لعضويتو .. وبيشرفني كتير كون عضو من اعضاؤو ..


يا اخي وردة الصحراء والي عادة وردة الصحراء ما بيكون فيها غير الشوك .. اذا عندكون بالصحراء ما في ميي ترويك منشان تكبر .. فانا بعرف كيف خليك تكبر ..

و الغاية من هذا المقال ليس التشهير بسمعة المشرفين لا سمح الله

دخيلك ليش مينك انت لحتى اتشهر بسمعة المشرفين ولا غيرهم ؟؟
,

إنما فسح المجال أمام أعضاء المنتدى بالتصويت على اختيار المشرفين

ومن ايمت عينوك الناطق الرسمي باسم الاعضاء حبيبي ؟؟؟؟؟؟؟؟؟؟؟؟؟؟؟؟؟؟؟؟؟

, و أعتقد أن لهم الحق في التصويت أكثر من المشرفين المتواجدين حالياً.

واعتقد انه ليس لك الحق في ان تتفلسف على كيفك ...............................

كما أطالب أعضاء الموقع بالإطلاع على مقالة "حوار الطرشان",

صرت مطلع عليها عدة مرات .. وكل مرة بطلع عليها بحس انو كاتبها مالو علاقة باللياقة

التشكيلة الجديدة للمشرفين على منتديات موقعكم مثيرة للضحك

اي منيح البينو هال الأسنان الولو.. حبيب قلبي :P

أنا لست باميلا اندرسون حتى يتم جذبي إلى موقعكم, كما اقترح أحد المشرفين.

خمسمية محروفة لالك ... عفوا لباميلي اندرسون

رأي مدير الموقع أنه ليس بالضرورة أن يكون المشرف "فهيماً"

ومنشان هيك الظاهر رشحوك
ترى انا ما لي علاقة بس هيك انت قلت ... انو رشحوووووووووووووك

مشاركتي هذه حرمت عددا من الأعضاء من الإطلاع على لغة أس كيو آل و هشاشة منتديات الحوار المطورة باستخدام بي اتش بي

له له له .. كلشي إلا ال اس كيو ال وال بي اتش بي ...

تحية ليست بتحية عربية - فلتكن مثلاً تحية على الطريقة الصينية!! - إلى الصديق "الحلاق", راجياًً يتعاون مستقبلي لما فيه خير لمجتمعنا.

اي وبهال المنسابة اي حلااااااااااااااااااااااا ااااااااااااااااااااااااا اااااق
___ وقصاصة ____

إن قررتم فتح باب التصويت, فصوتي سيكون للأخ "الكينغ رور"

انا ما بعرف مين "الكينغ رور" انا بعرف الكينغ رورو ...
اذا كان هذا قصدك فعلى عيني الكينغ رورو .. بس منشان باب التصويت ما حينفتح اطمن

وبما انو وردة الصحراء حاطط لينك .. والاستاذ حاطط لينك .. وما حدى احسن من حدى ..
هاي احلى لينك للشباب الطيبة ..

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

لكم جميعاً فائق الاحترام من ديزريت روز

اي على عيني .. بس مبدأيا رووووووووووووووووح لعااااااااااااااااااااااا ااب بعععييييييييييييييييييييي يد
اتضل

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

وبالنهاية انا بحب انتهز هال الفرصة بان اشد على ايادي الناس المرتبة الي بقدر اخلع قبعتي الها وانحني اكبارا .. من امثال

yass , joe ,dimozi kingRORO, philip anmar , kakabouda, LoLO , عاشق من فلسطين ,, شوكوزولو وحنان ,, وحشت نشت ,,
عبير nana C.a.. والي ما حضرني اسمهم هلق
الشباب المشرفين ومديري الموقع

[Abo_Hanna]

يا شباب أنو أنا ماني عرفان ليش عم نتعذبوا حاكن كل هل القد وتقرو هيك موضوع ..........
(مع إحترامي الشديد لكل اللي قروا).

بس القصة يا شباب أنتو هل الزلمي القادمي (desertrose) زلمي قبضاي وفهمان واسم الصليب حولوا وحولي....
بس المشكلة أنو مانو فهمان غير بالكمبيوتر والبرمجة وبس.... ويعني بس.....

أما ما تبقى من أمور الحياة فتخيل أنو الموضوع اللي أتحفنا بهل الجواهر اللي عم بتهر من الأسطر اللي كتبها فهو أكبر دليل على هو بشو بيفهم ......

يعني أنا ما رح رد على الزميل المهندس وإذا هو بيستحي بشهادة وباسموا وبمكان عملوا فأنا بئسف على الشي

والله إذا منشان هيك صارت هالطوشي كلياتها فأنا ما رح علق على الموضوع أكتر من هيك ... لأني كنت حابب رد على الموضوع قبل حيبيب القلب أبو عبدو ويا سيدي إذا اللون الأخضر عم يقلع عيون العالم فخليه يا سيدي (بعد إذن مدير الموقع الغالي) لأنو هدول حساد أبو عبدو

وعين الحسود .... أحسن من عشرة عل الشجرة

ما قصدي أنو باقي الردود سيئة ..... بس هيك تصرف وهيك موضوع ما بدو حوار ومسايرة يا شباب (جو - الأستاذ - فارس ) هيك موضوع بدو قشاطين من قشاطات أبو حنا خليها تعلب على جنابك يا أبو الف...... عفوا نسيت أنو إسمك سري وما لازم ينعلن ........

على كلن بسيطة .... ومانها مشكلة ...... وصارت من قبل ورح تضل تصير ..... يعني زكرتوني بقصة الاختراق القديم .... بس بيضل في عالم هيك ..... عقلها صغييييييييييييييييييييييي يييييييييييير كتييييييييييييييييييييييي يييييييييير

[al7alla2]

مرحبا عيون كينغ رورو (( عيونو بس )) .....
أول شي ما كنت متوقع انو تطلع منكن هيك ردود و خصوصاً بعد ما كنتو مجتمعين كلكم (( ماعدا الصديق الوفي ل ديزرت روز و أخو أبو عبدو المدعو (( أبو حنين )) )) , يعني الواحد يحكي الصراحة لوكان في كاميرة فيديو عن هالقاء الحاسم لكنتو غيرتو احاديثكم شوية صغيرة (( و كان الموقع عرف ألوان قوس قزح من خلال وجوهكم ))
من خلال رد فارس الموضوعي مع أنو رأيك ضد رأينا بس موضوعي و طالع من واحد واعي و فهمان و على عيني .
أما من خلال رد (( عضو المنصة )) الأستاذ بمفهوم العساكر (( هي أذا فهمتها ) الذي يمتلك 183 مشاركة خلال سنة و شقفة بيناتون شي 180 أبتسامة و 2 تمسيح جوخ و هاي المشاركة الفعالة جداً جداً جداً فخلينا نعلق شوي :
1_ عم تقول انو ديزرت روز معصب مع أنو تنيناتنا منعرف مين كان معصب يوم أجتماع الشباب .
2_ يا ضو مع أنو عدد مشاركات ديزرت روز بينعدو على الأصابع بس كان لهم تأثير أكثر من كل أبتساماتك يلي بالمنتدى و يمكن أنو عندك أنت عدد المشاركات أهم بكتير من المضمون .
3- مع أنك أعترفت أنك ما بتفهم بالكمبيوتر و لا بأمور الكمبيوتر (( بيني و بينك ما أستغربت بنوب )) شو مفكرلي أنو الواحد ما فيه يفوت على منتدى المشرفين الا بسرقة باسورد ؟؟؟؟؟؟؟؟!!!!!!!
من طيبو ما بتشتريها بقشرة بصلة .... (( كمان ماني مستغرب ))
4_ ولله يا ضو شكلك ما فهمت كلمة أستطراء ولا رح تفهمها بحياتك, بنصحك بشغلتين أولهم معجم مختار الصحاح و ثانيهم أنك تتذكر كيف أستطراك ديزرت روز يوم الأجتماع .
5_ ليك يا ضو لو كنت كاتب المشاركي بالأنكليزي لكانت رح يطلعك الحكي بالمقلوب من اليمين للشمال و حتى لو طلعتلك من الشمال لليمين ما كنت رح تفهما لأنك ما فهمت العربي شلون بدك تفهم الأنكليزي؟؟؟؟؟؟؟ ؟!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!
6_ هاد موقعك يا ضو الله يديمو منور عليك وعلى غيرك .
7- عم تقول أنو ماعندو القدرة على الحوار ليش مينك انت يا ((( مريم نور ((ضو )) )))

[al7alla2]

أما الأخ(( المشرف)) أبو عبدو الحرك يلي من تأسيس المنتدى تكارم علينا بـ 27 أبتسامة و هذه المشاركة التي تنم عن ذكاء و قدرة على التخويت ....
1_ بالنسبة لشغلة الوردة والشوك والتكبير و التصغير ففي مثل صراحة بستحي قلك ياه لأنو حتى هاد ما بتستاهلو .
2_ ليك أسمك بالأسود ولا بالأخضر هاد شي سخيف و بايخ انك تحطو بالمشاركة تبعيتك بس بنصحك باللون الأحمر او الأبيض لأنو هيك هيك رأيك لا بيقدم ولا بأخر .
3_كل حديث ديزرت روز كان عبارة عن رأي شخصي بحت لا أكتر ولا أقل بس ليش هيك عمل هالمعمة كلها ما بعرف!!!! على كل حال أرجاع للمثل السابق ذكره ((يا رب تكون فهمتو ))
4_حوار الطرشان أثبت أنو بالفعل أنتو طرشان و خصوصاً بموضوع الـ اس كيو ال و ال بي أتش بي يلي أنتي بالذات أثبتت أنك فاقد لكل حواسك (( مو بس السمع )) .
5_من جهة موضوع الترشيح و الفلسفة يمكن فهمت غلط قصدو الأقتراح على الترشيح لرئاسة المنتدى و الأقسام من رأي شخصي و شخصي بحت فأذا كان كل أقتراح عندك فلسفة فالأحسن أنو تغيرو أسم قسم القترحات الى قسم التفلسف و العلاك المصدي, مو هيك يا ديبو قراطي !!!!!!
6_ ديزني لاند (( هاي حلوي كتير, لما كنت بعمرك كنت أنبسط كتير لما روح عليها )) و بحب قلك أنو قناة ديزني لاند مفكوك تشفيرها على قمر الأسترا 1 ( الله وكيلك أخي الصغير بيضل عليها 24/24 ) يعني أذا ما فتحت عندك تعى قعود مع أخي و تفرج .

آآآآآآآآآآآآآآآآآآآآآآآآآ آآآه من أبو حنين ذو الوجهين ((و يا ضيعان المرحبا فيك )) >==== نقلا ً عن ((أتصال هاتفي دام 10 ثواني و انتهى بطبشة السماعة في وجهك من قبل السيد ديزرت روز .
1_ انا معك ديزرت روز مانو فهمان غير بالكمبيوتر و البرمجة (( يعني دخل بعدك بسنتين على الكلية و تخرج قبلك بـ N سنة حيث F(X)=2N+1 حيث F(X) هي سنوات الاستنفاذ هي اذا بتعرف تحلها يا مشرف قسم البرمجة ............
2-ليك يا حنون اللون الأخضر لا بيقدم ولا بيأخر بس اللون الأحمر بيأخر و ما بيقدم و خصوصا ً بعد طبشة سماعة و عقبالك باللون الأسود متل ما سمعتو و شفتو بمنتدى المشرفين ((( أذا بدك المقال المقصود فتكرم عينك بس بعد حلااااااقة على الصفر و قشة دقن))).
3_ شو يا حنين صاير نكتجي فروح على الطاير و زت نكتك هنيك و خود بنصيحة أخوك هالك الأخضر و روح تسلالك شوي بديزني لاند.
4_ أنا بعرف القشاطة الها شكلين و حدي بيستعملوها ستات البيوت و وحدي بيستعملوها بالمطارات و تبعيت المطارات بتذكرني بشعر واحد زبون جديد عندي بدي أحلقلو على الصفر و قشط دقنو قشط ...مو عيب عليك تقول تعلم القشاطات ...... و أنت حضرتك مشرف بهالمنتدى و لا لفاية عم تقشط الدرج ........ و الأحلى من هيك أنو ديزرت روز كان رفيق شخصي الك من 6 سنين و من يومين كان عندك بالبيت عم يعايدك ...........بس يا حيييييييييف (( حتى المرحبا معد بدنا ياها منك ... السماعة طج )).
5_أما عملية الأختراق التي تمت من قبل ذوي العقول الصغيرة بنظرك فأنت يا كبير المبرمجين بالكلية و الأقدم والمخضرم بالون الأخضر و الذي تمتلك المرتبة الشرفية بالكلية بالنسبة للقدم و أنا بعتقد رح يخرجوك تيمم....و الطريقة يلي فتنا فيها الفهمان متلك بدو شي 10 ثواني ليفهمها (( هاي أذا فهمها )) :P :P

و كما يقول الكينغ (( الرأي لألكن كالعادة ))
بس هالمرة كما بيقول حلاااااااااااااااااق

[keko]

يعني أنا ماني عارف شو صاير
أنا بعتقد ياصديقي (desertrose)أنو لو كان عندك اعتراض فممكن توصلوا بالتلفون أو بالايميل إما عن طريق رفقاتك اللي بالموقع واللي هنن كتار متل anmar أو keko اللي هوي أنا أو ممكن تسأل المشرف بدل ما تعمل هيك
يعني متل ما انت بتقول خلينا نحكي شغل وقيم الرفقة على جنب
ومن هادا المنطلق أنا بقلك أنك غلطان بجميع المقاييس ولا في أي مبرر لكل شي عملتو
يعني عالقليلة إذا مانك شايف انو لازم تحترم مشرف الموقع احترم رفقاتك اللي الك معهن عالقليللة 6 سنين

مابعرف .... مابعرف

بعدين بانسبة الك سيد حلاق مع احترامي الشديد الك ما مسموح الك أبدا تتدخل وتقيم تصرفات الأشخاص بالموقع وما بسمحلك نهائيا انو تحكي هالحكي عن أنمار وإذا كان (desertrose) سامحلك فضيعان الصحبي فيه

[keko]

أنا بنصح الأخ حلاق انو طالما مزعوج هالقد
فينو يفتح منتدى تاني لالو وساعتها فيو يعمل ديمقراطية قد ما بدو وهيك منرتاح منو ومن مشاركاتو القيمة

بس ما بتخيل لانو يمكنلك مانو قدها

وطالما عم تحكي على دراسة ابو حنا فيك تخبرنا انت شو بتدرس يا واعي

بالمناسبة بما انو عم تحكي عن ابو حنا نقلا عن ديزيرت روز
فحكيك غلط ورح صححلك اللي صار
اللي صار انو الصديق الوفي ديزرت روز هوي اللي حكا مع ابو حنا وهددوا من مكتب كينغ رورو وصار يحكي حي طالع نازل معو للزلمي وللصراحة ابو حنا طلع أصيل وما رد عليه بالمثل بل اكتفى باغلاق السماعة بوجه الحبيب ديزرت روز

يعني انا ما بعرف شو عم بيصير معك ديزيرت روز يعني بتحكي بتسبو لابو حنا وبتهددوا فهمنا بس تروح تحكي حكي غلط عن رفقاتك للعالم وبتدخل الغريب بيناتنا يا ضيعان كل شي فيك مو بس المرحبا كمان ضيعان الكلمة العاطلة فيك

[Joe]

مع احترامي بس بعتقد الأخ حلاق من اول الموضوع كان عم يكبر الموضوع و يعطيه أبعاد شخصية ... شو هل حكي الفاضي هاد كلو... رجاءا عندكم مشاكل شخصية حلوها ع جنب شو دخل المنتدى ,,, ممكن نفهم بس انت وين واقف من كل هل موضوع يا أخ حلاق.. و ليش كان عم يبعتلك سلامات و "تعاون مستقبلي" نحو مزيد من مدري شو... يعني نحنا شو دخلنا نسمع هل حكي كله ... و انت ليش عم ترد عنو و فينو جنابو أبو الستع مشاركات يلي بيعتقد انو بيعرف بمصلحة المنتدى اكتر من اهل المنتدى... و الله كل الموضوع حكي فاضي و لعب ولاد صغار

ثم يمكن الاخ ديزيرت روزز يا عم يتخيل شغلات غير موجودة يا انا صاير أعمى ... وين صار في حوار حامي الوطيس بموضوع حوار الطرشان... كله الموضوع ما فيه يمكن خمس مشاركات

بعتذر من باقي الشباب على التدخل بس انا رأيي تطنشوا الموضوع لانه حركات ولدنة ما اكتر

[keko]

الأستاذ بمفهوم العساكر

حزير هاي الكلمة لمين لازم تقولها
لـ.....
عرفت لمين ماهيك

[عاشق من فلسطين]

أنا قرأت حوار الطرشان وهي تعليقي:
والله أنا ما بيهمني اذا عم يراقبوني المشرفين لما لا لأني انا لما فتت على المنتدى فتت وعاطيه كل ثقتي ومعتبر كل الأعضاء( من مدير الموقع الى أحدث عضو في الموقع أخوتي (أخوية ) ) وبالنتيجة اذا خان المشرفون هذه الثقة فليس بالأمر المهم (مع تأكدي بأنهم لن يخونوها) لأننا نتعرض للخيانة من أصدقاءنا ومن أهلنا ومن عروبتنا ومن أولياء أمورنا (رؤساءنا) نعم رؤسائنا وسجل أنا حسام ملحم قلت هذه الكلمة ولست خائفا" اذا كان هناك من يتجسس علي أو لا لأنني ما أقوله وأكتبه وأحسه في هذا المنتدى مستعد أن أقوله على الملأ
دون خوف وليس هناك شيء أخفيه عن المنتدى أو عن أي أحد لذلك أنا أقول لك يا أفندي desertrose أنو اذا بيطلع بأيدك تتجسس عليي وتسحب كل ملفي وتنشرو وين مابدك لا تقصر لأنو مانو ما في شي مخبأ.. لأنو أنا فايت على هالمنتدى وعم أحكي مع أخواتي ..
وما بخبي شي عليهن من أصغر عضو لأكبر مشرف..واذا مو عاجبك المنتدى فأنا مو بالنيابة عن حدا..بس بالنيابة عن نفسي رح قلك الله معك في ميت منتدى تاني ترمي بلاك فيه وأنت اخترت المنتدى الخطأ...
و لا تواخذونا