|
| س و ج | قائمة الأعضاء | الروزناما | العاب و تسالي | مواضيع اليوم | بحبشة و نكوشة |
أخوية سوريا: تجمع شبابي سوري (ثقافي، فكري، اجتماعي) بإطار حراك مجتمع مدني - ينشط في دعم الحرية المدنية، التعددية الديمقراطية، والتوعية بما نسميه الحد الأدنى من المسؤولية العامة.
نحو عقد اجتماعي صحي سليم، به من الأكسجن ما يكف لجميع المواطنين والقاطنين.
أخذ مكانه في 2003 و توقف قسراً نهاية 2009 - النسخة الحالية هنا هي ارشيفية للتصفح فقط |
||||||
|
||||||
 |
|
|
أدوات الموضوع |
09/04/2006
|
#1 | ||||
|
عضو
-- مستشــــــــــار --
|
عريس الأنترنيت
خلونا نشوف قصة سلوى ………يلي أجاها عريس عن طريق النت فجأة صرخت سلوى بصوت عالي وتركت جهاز الكمبيوتر يلي من الأكيد بتقضي عليه معظم وقتها مــــــــــــــامــــــــ ـــا الأم:لك شو شبك ليش صوتك عالي سلوى:لوتعرفي شو لك أنا فرحــــــــانة الأم:خير يا بنتي فرحينا معك سلوى:عريس يا ماما عريس الأم:عنجد لولولولولولولولولولولولول ولولولويش وبعد دقيقتين من العناق والقبلات تذكرت الأم وقالت:بس قليلي مين ها العريس اللي بدو يتقدملك ليش ماقلتيلي من وقت ما أجيتي من الجامعة؟؟ سلوى:لأنو هلق عرفت الأم باستغراب:هلق عرفتي,كيف لسه هلق أمتي من على الكبروتر سلوى ضاحكة:كبروتر شو أسمو كمبيوتر يا ماما الأم:مو مهم كيف عرفتي؟ومين ها العريس؟ومن وين جايي سلوى: من النت يا ماما ضليت يا حرام الأم المسكينة صافنة ببنتها سلوى وهية عم تراجع شو بتعرف من كلمات وما لاقيت لكلمة النت آثر بين ها الكلمات. وسألت :وهي وين هي النت؟ سلوى:كيف وبن.. الأم:يعني من وين بتروحيلا بالمكرو ولا الباص ولا تكسي ...أوعى وله يكون بالبولمان سلوى ضاحكة:لك شو بولمان..هي مجموعة كمبيوتراتحول العالم متصليت ببعض بعدة طرق المهم هلق شب ومتقدملي وخلص. الأم:ماشي وكيف تقدملك بئا عن طريق النت سلوى:بعتلي إيميل الأم:إيميل جارنا المسيحي سلوى عم تحكي مع حالها:ياربي كيف بدي فهمها ماما إيميل يعني رسالة عن طريق النت الأم:مادخلني أنا بهيك قصص بدي أعرف هو مين وشو دارس وشو بيشتغل وشو أصلو وشو فصلو سلوى:اسمو مجد وطالب هندسة معلوماتية قاطعتها الأم: طالب سلوى: أي بس أخر سنة الأم: أي أنا مادخلني أبوكي بيتصرف رح أتصل فيه على الموبايل
لا تـــحــــزن لأن الحزن يزعجك من الماضي
ويخوفك من المستقبل ويذهب عليك يومك لا تحزن لان الحزن يقبض له القلب ويعبس له الوجه وتنطفي منه الروح ويتلاشى معه الأمل لان الحزن يسرُّ العدو ويغيظ الصديق ويُشمت بك الحاسد ويغيِّر عليك الحقائق سعود الشريم |
||||
|
|
09/04/2006
|
#2 | ||||
|
عضو
-- مستشــــــــــار --
|
قهوة أبو زهدي الحاج أبو لطفي منهمك بدق طاولة زهر ...برن جهازو الخلوي أبو لطفي:ألو..مين أم سلوى:أنا..أم أبو لطفي مقاطعاً:شو بدك الأم:تعى شوف بنتك جاييها عريس قال من النت أبو لطفي:من وين؟ الأم:من النت أبولطفي:شو يعني مافهمت عليكي الأم:بس أفهم أنا بفهمك تعى شوف بنتك وأسألها أبو لطفي:لخلص دق الطاولة. وسكر أخونا ها الموبايل وبلش أخونا أبو لطفي يحاكي حالو مين ها النت لتكون أم لطفي جنت بس هي مو ناقصها جنان من يوم يومها مجنونة صديق أخونا أبو لطفي بدق الطاولة:شبك ياحج ليش وقفت لعب شو خير أبو لطفي:بما أنك متعلم ومتنور ومعك سرتفيكا مين هاد النت؟ صديقنا هون نفش ريشو وزبط أعدتو وأخد وضع فخر وعزة وقال: أنت من وين بتعرف ها الأشكال هي أبو لطفي:بعرف وخلص الصديق:أنا ولله مرة سمعت أنو بنت أخت عمة جار خالتي أنها شافت على النت صور المذابح اللي عم تصير بالعراق أبو لطفي:يعني شي بيشبه التلفزيون الصديق:لاء مو متل التلفزيون يعني فينك تقول جريدة بس بتقرأها على هاد الجهاز شو كان اسمو أه تكروتر أبو لطفي:ياربي دخيلك معقول جريدة صارت بتدخل على ها الشاشة الصغيرة كيف بئا بيدخلوها الصديق بكل نشوة انتصار:موعاملين هنن فتحات من ورى أي هيك بئا أبو لطفي:ناس فاضية ماعندن شي يعملوه الصديق:هو هيك بس انت ليش عم تسأل أبو لطفي: أختك أم لطفي عم تقول أنو بنتنا سلوى رح يتقدملها عريس عن طريق النت الصديق:مبروك مبروك أكيد بئا ها العريس صحفي ريش أبو لطفي وقال: معقول الصديق:لكن ما قلتلك أنو النت عبارة عن جرايد على جهاز التكروتر هاد بئا أكيد العريس صحفي مبروك يا أبو لطفي يلى بكرى نشالله بتعمل دعاية لمحلك وبتطلع صورتك وصورة المحل في صفحة الحوادث أبو لطفي:يلى لعاب يا وش السعد ألعب رمى الصديق الزهر وقال:دش..راحت عليك ولله يا أبو لطفي |
||||
|
|
|
09/04/2006
|
#3 | ||||
|
عضو
-- مستشــــــــــار --
|
مشهد المنزل... سلوى في سرها:ماهي هي المصيبةسلوى:ياماما فهمي علي ها العريس ولله لقطة ومافي متلو بالنت كلو أنا حبيتو من كتاباتو الأم:كتاباتو ليش هو شعر؟ ولا مؤلف؟ ليكون بألف مسلسلات سلوى:مو مألف يعني أمي بس بيكتب على النت الأم:أي بس بشو بيكتب بالضبط؟ سلوى:لك لاء يا ماما هو ماخلى شي إلا وكتبلي عنو الأم بخبث قال:ومين بيشهد للعروس سلوى: ولله ماما عم أحكي جد الأم:سمعي يا بنت أنا مابعرف نت ولا كتابات لما يجي أبوكي فهميه وهو بيتصرف |
||||
|
|
|
09/04/2006
|
#4 | ||||
|
عضو
-- مستشــــــــــار --
|
جاء العريس ركضت سلوى لتفتح الباب بس أبوها وقفها وأجبرها أنو تجلس بغرفتها لحتى يناديلها فتح الحج أبو لطفي الباب ليشوف أدامو شب ظريف أنيق وائحة بارفان حلوة وابتسامة هادئة وبيده كيس موز تفائل عمك أبو لطفي ودعاه للدخول وهو مستغرب ليش العريس جاي لوحدو ومو معو حدا سكر الباب بقوة وقال بعصبية:أهلين مجد:بالمهلي ياعم أبو لطفي:خير يا ابني مجد بقلق:عفواً بس الأنسة سلوى ماقالتلك أنو أنا جايي؟ أبو لطفي:مبلى قالت بس ما قالت أنك رح تشرف لحالك مجد:لاء ياعمي أنا مو لحالي (بأبتسامة)معي كيس موز أبو لطفي:بلى شو ..كيس موز أم لطفي:ياما جاب الغراب لأمو مجد:طيب عمي ندخل بالمفيد أبو لطفي:أنت متأكد أنك رح تدخل بالمفيد مجد:أكيد يا عمي وإلا أنا ليش جاية أبو لطفي:ونشالله رح ندخل بالمفيد بدون والدك ولا والدتك ولا عمك ولا خالك ولا حدا مجد: لا ياعمي نشالله بتشوفوهون بالعرس أبو لطفي غاضباً: نعم بالعرس مجد:معلش عمي خليني فهمك كل شي أبو لطفي بهدوء:اتفضل مجد:أنا اسمي مجد وعمري 22 سنة و3 شهور و5 أيام و4 ساعات ونص أنا ياعمي عندي بيت كبير وجاهز على الفرش أبو لطفي: اللي بعدو مجد: وجاي لأطلب أيد الأنسة سلوى بعرف أنو مستغربين جايي لحالي.. أبو لطفي: هون حطنا الجمال وين الحجي والحجة مجد: بصراحة يا عمي أهلي مو مقتنعين بقصة زواجي عن طريق النت أبو لطفي:نعم حبيبي نعم مين من النت نحنا ولا أنت مجد:نحنا الأتنين يا عمي |
||||
|
|
|
09/04/2006
|
#5 | ||||
|
عضو
-- مستشــــــــــار --
|
أبو لطفي: بدك تخربطني ليش يا أبني أنا خضرجي مو صحفي مجد:وشوفيها يا عمي ما أنا طالب مو صحفي أبو لطفي:مو صحفي كمان طالب الأم:لكن أنت شو مفكر هو طالب بهاد التكروتر اللي بيشتغلوا عليه أبو لطفي:روحي بسرعة نادس لسلوى أجت سلوى بسرعة ومو شايفة تطليعات أبوها يلي كلها غضب بالوقت اللي ابتسم فيه مجد وقال: أهلين أنسة سلوى سلوى:أهلين أستاذ مجد أبو لطفي:عدي يا بنتي وشوفي ها المصيبة سلوى: مصيبة خير يا بابا أبو لطفي: حضرتو بقول انو هو طالب سلوى:أي بابا هندسة معلوماتية أخر سنة أبو لطفي: وأنا كنت مفكرو صحفي مجد:أنا عمري ماكنت صحفي ولا رح كون سلوى:استنى شوي مجد أكيد في غلط هنن مفكرينك صحفي بتكتب لأني قلتلون أنك بتكتب بالمنتديات ودارت لعند الوالد وقالت: يابابا الأستاذ مجد بيكتب على النت مو على الجرايد وكتاباته مميزة جداً أبو لطفي:ما أنا بعرف أنو بيكتب بالجريدة وبعدين بيدخل الجريدة على الشاشة والناس بتشوفو على النت شو مفكريني جاهل مابفهم بأمور النت ولا شو؟ مجد:لالاياعم العفو منك سلوى: معقول بابا في جريدة بالعالم بتدخل الشاشة مين قلك هيك؟ أبو لطفي:صديق متعلم ومتنور ومعو سرتفيكا سلوى :غلط بابا الكلام على النت هو عبارة عن أحرف مطبوعة ..,,و... أبو لطفي مقاطعاً ابنته: وليش حضرة الوالد مو موافق لنكون مو قد المقام يعني ولا.. مجد:أبداً ياعمي شرف كبير ألي و ألهون أنهم يناسبوا حضرتك وكمان طنط الأم: طنط مين يا ضنايا سلوى:ماما قصدو يحترمك مو أكتر مجد: اكيد متل ما قالت سلوى الأم:معلش ألي يا حجة مجد:حاضر يا حجة أبو لطفي:وأذا شرف ألهون ليش بئا مو موافقين سلوى: بابا هو بيقصد أنو هنن مو موافقين عن الطريقة نفسها الزواج عن طريق النت أبو لطفي: ليش يا أبني هو مو زواج على سنة الله ورسوله |
||||
|
|
|
09/04/2006
|
#6 | ||||
|
عضو
-- مستشــــــــــار --
|
مجد:أكيد يا عمي شوبدنا نعمل الله يهديهن أبو لطفي:طيب ممكن تقلي بنتي كيف عجبتك بدون ما تشوفها؟يعني على شو أنت جايي بناءً على شو؟؟ نظر مجد في سلوى وقال: عجبتني مشاركاتها يا عمي مواضيعها وردودها قابلتا أول مرة بموضوع عن الدخان كلامها لفت نظري ومرة كانت مشاركة بموضوع أنا اللي كاتبو عن كرة القدم وأقنعتني أنو الكرة هي للفاضيين بس يلي بلا شغلة ولا عملة ومستحيل يكون انسان يحس بأخوانه بالعراق و فلسطين وهو عم يكتب موضوع عن كرة القدم وبيشجع فريق حطين أبو لطفي:أخص عليكي يا سلوى خليتي يشجع حطين بدل تشرين مجد: لا يا عمي هي خلتني أترك كرة القدم كلها وشجع الوحدة الأنسانية وبعد ما اقتنعت بكلامها طلبت من الموديراتور أنو يسكر الموضوع و.. أبو لطفي مقاطعاً:طلبت من مين ومين هاد التور كمان؟ سلوى: بيقصد المشرف بابا اللي بينظم المكان أبو لطفي :طيب مجد:المهم بدأت أعجب فيها وتابع مشاركاتها وأمشي وراها على كل موضوع بتروحو خرجت من ساحة الشباب للمنتدى السياسي لحتقها لقيتها شاركت بموضوع عن بوش وشارون شاركت معها وشكرتها على مشاركتها ونسيت أشكر صاحب الموضوع الأصلي وخاصة انها كانت داخلة تشكرو يومها وشي صار أسود وبعدين تركت السياسة وراحت على ساحة النساء وأنا كنت ماشي وراها متل المسحور وشاركت بعد مشاركتها دغري مع بعدين لقيتها بالمنتديات العامة عم تشارك بموضوع عن النكت قلت لأكتبلا كام نكتة يضحكو قلبها بعدين انصدمت لما لقيتها كاتبة رد طويل عريض بعدين دخلت للعبة شمس قمر قلت يلى فرصة نلعب سوى فدخلت وقلت شمس قبل ماهي تقول قمر بس أتأخرت وما كنت تكتب الكلمة قلت معقول كل ها الوقت عم تكتب ها التلات الحروف قلت بلكي عم ترسمو وفجأة ردت رد عنيف انو نحنا شباب واعي مالازم نكون تافهين بألعاب سخيفة عن النت مين الأجمل وعد للعشرة وعد للمليون لازم تكون مشاركاتنا هادفة ومواضيعنا تكون بتهم الشباب الواعي المثقف فقلت دغري انو ها البنت لازم تكون من نصيبي لأنها ايجابية جدا ومحترمة جدا طلبت ايميلها من المشرف قلي ممنوع من هون لهنيك مافي فايدة ومحسوبكون أبو لطفي وأم لطفي أعدين عم يسمعو ومو فهمانيين شي سلوى: لكن كيف عرفت أيميلي مجد:القدر لقيتك مرة كاتبتية لوحدة رفيقتك أمت دغري أخدتو أبو لطفي:نحنا نشالله مارح نخلص اليوم مجد: أنت أكيد موافق يا عمي أم لطفي:يوافق على شو شو الشغلة شوربة أبو لطفي:بدك ياني وافق على شو أنت قلت شي لوافق عليه مجد: أكيد ياعمي على طلبي أيد بنتكن سلوى أبو لطفي: على شو بدك ياني أقبلك على طولك بدون أهلك يوافقوا ونتفاهم على التفاصيل مجد:وشو فيها يا عمي هو أنا يلي بدي اتزوج ولا هنن أبو لطفي: شوف يا ابني انا صابر عليك من الصبح وأنت قاعد عم تحكيلي قصة حياتك كأنك صلاح الدين وبعدين بتقلي كنت عم ألحقها على النت من موضوع لموضوع لوقت اطعتلي نفسي وجيت اخطبها ونجي للمفيد أذا كنت مفكر انك رح تضحك علي بخمسة كيلو موز بتكون غلطان لو بدك تخطب سلوى بجد روح جيب اهلك نحكي بالتفاصيل وغير هيك مافي قال شو طالب الله معك يا طالب مو تاقص غير بكرى تجبلي عريس من الأنترنيت فوتي على غرفتك وله تمت |
||||
|
|
|
09/04/2006
|
#7 | ||||||
|
عضو
-- مستشــــــــــار --
 |
لك اي .. كيف هي تمت .. ما عرفنا تزوجوا ولا لأ ..
بس أحلى شي الكبروتر ....... و تكروتر  
ســــــــــــــــــوريا قلعة الصمود العربي
|
||||||
|
|
|
|
«
الموضوع السابق
|
الموضوع التالي
»
|
|
الساعة بإيدك هلق يا سيدي 17:27 (بحسب عمك غرينتش الكبير +3)