ما الحل

[COSTA]

كاتب النص الأصلي : حسون

الثورة مانها هدف الثورة حل

يا حسون

الثورة مانها لعبة ,الثورة في الها ايجابيات وسلبيات
هلأ ما بدنا ثورة متل الثورة الفرنسية نحط المقصلة ونقطع الروس
ولا متل البلشفية نكسر المعابد الدينية ونصادر ونأمم

بدنا ثورة تتماشى مع ظروفنا وظروف البلد يعني نحاسب المرتشين والمقصرين حساب صارم
ولا بد من وجود بلبلة وتدخل عسكري بس مو على حساب شعبنا وارضنا وخيراتنا
يعني ما بدنا دبابات اميركية ولا تدخل خارجي
بدنا الطبقة المثقفة والجيل الشبابي يقود هالثورة من دون عودة لزمن الخمسينات والستينات والانقلابات العسكرية

وبتقبل منكن الرد بروح رياضية اخواتنا

[oliver68]

أخي حسون، هلأ إنك تشتغل بالسر مو حل بنوب، ما إنتي شايف التدخلات الخارجية لبلدنا، أميركا من جهة و اسرائيل من جهة، يعني مو وقت السرية هلأ، هلأ وقت إنو نوقف كلنا مع سوريا، مو الحكومة، و لا الأسد، لازم نوقف مع الشعب، يا سيدي نحنا ما هدفنا إنو نغير النظام قد ما هدفنا حرية البلد و أهلو، يعني ما في مشكلة إذا ضل النظام موجود، و بشار الأسد رئيس، بس مو نفس القمع و الظلم و الفساد!!!!! يعني إذا ضل رئيس و حرر الشعب، و سمح بالتعدد الحزبي و السياسي، و غير الحرس القديم، و قضى على الطائفية و المحسوبيات بالوظائف الحكومية، و أهم شي لغى شعار "سوريا الأسد" ساعتا يا ميت أهلا و سهلا، أنا رح كون أول واحد بينتخبو رئيس، بس إذا بدو يضل على نفس السياسة اللي ماشي عليها البلد هلأ، لأ سيدي، ما بدنا، بس كمان مو الحل بإنو نرجع النظام الشيوعي، و نخلي هوي الحاكم، الله وكيلك رح نرجع بعدين لنقطة الصفر، مو يعني إني بحقد عالشيوعية بس يا أخي ما نجحت هالحركة، فشلت ، أهدافا كانت حلوة، بس منعت الحريات، و هدمت الجوامع و الكنائس، و عيشت الشعب برعب كبير، يعني ما هادا اللي بدنا ياه، الشعب ما بدو لا أحزاب و لا حركات، و لا شي، الشعب بدو حرية، بس ضروري يعني نكون دولة حزبية ذات اتجاه معين، ضروري يكون من شروط الرئاسة الحاكم سني ولا علوي ولا مسلم و لا مسيحي ولا يميني ولا يساري؟؟؟؟؟!!!!!!!!!!!!!!!!! والله مو ضروري، المهم إنو يكون بني آدم طبيعي، شو ما كان انتماؤو الديني أو الحزبي، المهم إنو يكون عادل، يعني-مشان ما كون أفلاطوني- أغلبية الشعب عايش برضا، هلأ شوف الغرب، المتعلم منن بعيش و بلاقي شغل، بس الفاشل و الي بيلحق البنات و الخمر و المخدرات هوي الفاشل، مو المتعلمين، نحنا هادا اللي بدنا ياه و بس، كل واحد ياخد نصيبو، و ياخد على قد ما بيشتغل، بدون ما يكون حزبي أو منتمي لشي جماعة، و مو شرط إنو إذا واحد عندو معمل يروح يقسمو على الموظفين، والله مو عدل، المهم إنو يعطي الموظف حقو، بس يقسم المصنع بيناتن، شو الله جابرو؟؟؟؟؟؟
ما بعرف إذا هالشي اللي عمإحكي أفلاطوني أو مستحيل، بس يا أخي شايف الدول الأوروبية و أميركا و كندا، يعني ليش هنن إي و نحنا لأ؟؟؟؟!!!!!!!!!!!!!!!!!!!!!!
الحرية لسوريا

[sezar]

يا سيدي نحنا ما هدفنا إنو نغير النظام قد ما هدفنا حرية البلد و أهلو، يعني ما في مشكلة إذا ضل النظام موجود، و بشار الأسد رئيس

يا سيدي نعم حرية سوريا و شعبا لكن انو يضل رئيس بالأصل مخالف لقوانين الدستور و لم يتم انتخابه بشكل شعبي هذا لا يجوز ...
بيجي شخص زكي بقلي يا اخي سميلي واحد يجي بدالو ...
إي لا مو هيك بصير الحكي

و نقطة النظام الشيوعي فعلا أخد تجربتو و فشل فيها و ما بظن لازم ياخد فرصة تانية لأنو مصيرو الفشل ..

و آخ لو الأفلاطونية تطبق بالحياة بس نفسي أعرف كيف ممكن تكون الحياة .. بظن بتكون مملة

[حسون]

هلأ ما بدنا ثورة متل الثورة الفرنسية نحط المقصلة ونقطع الروس

أنا معك

ولا متل البلشفية نكسر المعابد الدينية ونصادر ونأمم

ما بدي سكر المعابد بس بدي صادر و أمم

يعني ما بدنا دبابات اميركية ولا تدخل خارجي

معك

الطبقة المثقفة

المثقفين مانون طبقة
يعني الدكتور بالمتشفى عامل
الدكتور بالعيادي بروازي صغير
الدكتور يلي عندو مستشفى رأسمالي

بدنا الطبقة المثقفة والجيل الشبابي يقود هالثورة

يلي بدون يثروا هني العمال و الطلبي

دون عودة لزمن الخمسينات والستينات والانقلابات العسكرية

معك

يا سيدي نحنا ما هدفنا إنو نغير النظام قد ما هدفنا حرية البلد و أهلو،

الحريي لسوريا ما بتجي غير بتغيير النظام

بس يا أخي ما نجحت هالحركة، فشلت

النظام بالاتحاد السوفييتي ما كان لا اشتراكي و لا شيوعي
كان رأسمالية دولي

مو شرط إنو إذا واحد عندو معمل يروح يقسمو على الموظفين، والله مو عدل، المهم إنو يعطي الموظف حقو، بس يقسم المصنع بيناتن، شو الله جابرو؟؟؟؟؟؟

الله ما بيجبرو بس الشعب بيجبرو

شايف الدول الأوروبية و أميركا و كندا

شو رأيك قلك أنو الشعب هونيك مانو مبسوط

[حسون]

و نقطة النظام الشيوعي فعلا أخد تجربتو و فشل فيها و ما بظن لازم ياخد فرصة تانية لأنو مصيرو الفشل ..

يعني انتا مع ورقة معادات الشيوعيي يلي كان بدو يطرحها الاتحاد الأوربي

[Danito]

كاتب النص الأصلي : حسون

ما بدي سكر المعابد بس بدي صادر و أمم

يعني الدكتور بالمتشفى عامل
الدكتور بالعيادي بروازي صغير
الدكتور يلي عندو مستشفى رأسمالي

هون لازم تعدل وجهة نظرك: التأميم صار بالخمسينات على أيدي جماعة الثورة العسكريين و جمال عبد الناصر و جماعته كل اللي انتجتوا إزاحة طبقة من البرجوازيين الوطنيين ليحل محلون منظرين و متسلقين اللي صاروا في مابعد محدثي نعمة فاسدين، هلق مو عيب الواحد يكون فقير و يتخلص من فقره بس العيب أنو يثرى على حساب الوطن و يبيع الوطن
الفكرة أنو هون لازم يكون مفهوم إعادة توزيع الثروة و لمصلحة طبقة أوسع فكرة حاضرة و بقوة و هي الفكرة اللي تجذب القاعدة الجماهيرية بدل من جذبها على أسس دينية أو عرقية أو طائفية أو غيرها و هي النقطة بدها موضوع كامل لحاله صرلي زمان عم فكر نزله و كنت بدي نزله بأخوية اقتصادية
يعني مع إعادة توزيع الثرورة و لكن ضد التأميم لأنه أسلوب قصري التوزيع لازم يكون على أساس قانوني تشريعي و بدون ما يحد من المبادرة الفردية و لكن بيشجعها أنو تصب بالمصلحة الاجتماعية

[حسون]

التأميم صار بالخمسينات على أيدي جماعة الثورة العسكريين

لأ التأميم صار أيام لينين عايدين البلاشفي
عكل حال عندي حل أحسن من التأميم
احتلال المصانع متل بفنزويللا

[COSTA]

يا حسون

ليش بدك تصادر وتامم ؟؟؟؟ انت اذا عندك محل او ورشة بترضى انو تتصادر؟؟؟؟
اي حتى بالاتحاد السوفييتي كان في ملكيات خاصة
بعدين العمال يا اخي ببلدنا اي نصهون ما بيعرف يفك الحرف والنص التاني دوبو معو شهادة تاسع
شلون هاد بدو يقود ثورة ؟؟؟؟اي بتكون فوضى بفوضى
اما الطلبة معك حق انو يقود ثورة بس يكون عندو درجة وعي وبعد سياسي

بتمنى تعطيني فكرة عن الثورة يلي بدك ياها

وشكرا اخي حسون

[Danito]

كاتب النص الأصلي : حسون

لأ التأميم صار أيام لينين عايدين البلاشفي
عكل حال عندي حل أحسن من التأميم
احتلال المصانع متل بفنزويللا

أنا معك أنو بدنا تغيير و حتى ثورة
بس المشكلة أنو تم تفكيك معطيات الثورة
بسوريا في ظلم اسا أسوء من فنزويلا
و بالعالم كلو
بس هني في معادلة أصحاب الرواتب و الأجور بمواجهة الملاكين الكبار بس يعني مو عمستوى مصنع بس هدول اللي بيسموها شركات أموال (كوربوريشنز) يلي مملوكة او مرتبطة بالأميركان
نحنا عنا الوضع شوي مختلف في طبقة ملاكين بجوز مو بغنى الرأسماليين تبع الكوربوريشنز بس هني مثل المافيا مسيطرين عالوضع باحتكار بدعم من قوانين مخالفة للدستور و روح الدستور و بدعم من الحكم و هي جزأ من صفقة الفساد و أهم منتج جانبي للوضع السياسي الشمولي

الفكرة هي بأنو الطبقة العاملة مانا متماسكة سياسيا و حتى الطلاب و حاليا أكبر رابط عم يجذب العالم (بما فيها البرجوازيين الحاليين) هو العامل الديني و الناجم عن قصور الوضع و تشويه معاني الاشتراكية و مفاهيمها إن كان الشيوعية منها أو الاشتراكية على طريقة السوق الاجتماعية

الوضع السوري وضع كتير فريد مافينا نسحب أي تجربة تانية سحب مباشر عليه

أنت معك حق تطالب بحركات سرية بس ، يعني تنظيمات سرية بكون عندا اجندة غير معلنة هي التغلغل بالنقابات و الاتحادات على الهدى و بعدين استخدام الهيكلية الحالية لتغييرها ، يعني مو مسيرة اصلاح و تحديث و بروباغندا تبع النظام بس تسلل من الباب الخلفي و بعدين بيصير ضغط و ضغط قوي كمان غير هيك الحكومة و أجهزتها مفتحة عيونها 10 على 10 و أنا باعتقادي الشخصي أسهل على أسرائيل أنو تضرب حدا من حماس ولا مصالح عسكرية سورية بنص سوريا من أنو حركة أو حزب سوري معارض و فعال يقدر يعمل 3 اجتماعات ورا بعض بدون ما ينعفطوا او تخترقهن الاجهزة الأمنية

[sezar]

على هامش الحوار هي لحسون :
أول شي لتعمل ثورة عل نظام بدك يكون في ........ نظام

تاني شي لتعمل ثورة عل نظام بدك يكون في ........ نظام


بال.....سيكام المهم نظام


( زياد )

[كهربجي]

صباح الخير شباب

هلق أنا بدّي أسأل أوّل شي حسّون... شو كانت عواقب التأميم التعسّفي كلّ مرّة؟؟

برأيك الإتحاد السوفييتي انهار بسبب أخطاء صارت من بداية البدابة؟؟ (عند البلاشفة قصدي)

يا ترى اللينينيين قدروا يعملوا اقتصاد قوي شي مرّة؟؟ تفضّل شوف شو صار بالشعب الكوبي.. الجوع أكلهن أكل

فنزويلّا و بوليفيا والبرازيل قريباً هيّ دول اليسار الجديد.. ما عاد في شي أسمو تأميم متل ما كان.. هنن طرحوا على الشركات الكبيرة (بس الكبيرة) شروط.. اللي رضي استمرّ, واللّي ما رضي ما استمرّ... الموضوع مو قمع...

أهم شي أنّو ما ننسى أنّو ديكتاتوريّة البلوريتارية مو النخبة هي اللي بتقرر شو بدها تعمل.. طبعا لمّا بتكون النخبة حقها خر*ة أجلّكن...

فبالتالي مو نحنا اللي منقرر شو بدّو الشعب... اللي للأسف بدّو الدين حاكم..

[Nirvana]

الثورة بدها عصب وغضب..

نحنا شعب مدعوس عليه .. (هاي للعصب)
وبطّل عنا احساس .. بليد يعني .. (هاي للغضب)

وبقصد بالشعب ( الشعب العربي بشكل عام) لأنو التجربة السورية بتنطبق تقريباً على باقي الدول العربية( يعني الفساد، والسلطة، وما إلى ذلك).

[COSTA]

كاتب النص الأصلي : Nirvana

الثورة بدها عصب وغضب..

نحنا شعب مدعوس عليه .. (هاي للعصب)
وبطّل عنا احساس .. بليد يعني .. (هاي للغضب)

وبقصد بالشعب ( الشعب العربي بشكل عام) لأنو التجربة السورية بتنطبق تقريباً على باقي الدول العربية( يعني الفساد، والسلطة، وما إلى ذلك).

اخت نيرفانا

الثورة مانها لعبة يعني هاد مصير شعب وامة بحد ذاتو
والثورة دائما تحصد ابنائها واكبر مثال الثورة الفرنسية (روبسبيير)

لكن التجربة السورية فريدة من نوعها بالعالم حالات القمع والنفي والهرب لخارج البلاد وملاحقة رجال الاحزاب وحالات التعذيب , تصوروا انو في ناس غطسوهن بالاسيد
والانقلابات العسكرية وكل مين ايدو الو

فسورية غير مؤهلة نفسيا للثورة لانو الشعب تجربتو ضئيلة

[حسون]

الفكرة هي بأنو الطبقة العاملة مانا متماسكة سياسيا و حتى الطلاب

مشان هيك أنا عم بطالب بحركة سرية بين العمال و الطلبي

بعدين العمال يا اخي ببلدنا اي نصهون ما بيعرف يفك الحرف والنص التاني دوبو معو شهادة تاسع
شلون هاد بدو يقود ثورة ؟؟؟؟اي بتكون فوضى بفوضى

اذا بتلاحظ أنا قلت

يعني الدكتور بالمتشفى عامل

أنت معك حق تطالب بحركات سرية بس

شباب أنا كنت بحزب العمل الشيوعي يلي هوي جزء من المعارضة العلنيي
و كنا بعاد عن الشعب لأنو ما حدا بيسترجي يتعاطى معنا

وبقصد بالشعب ( الشعب العربي بشكل عام) لأنو التجربة السورية بتنطبق تقريباً على باقي الدول العربية( يعني الفساد، والسلطة، وما إلى ذلك).

الثورة ما بتكفي تكون عربيي
لازم تكون عالميي
و هالثورة بلشت بأميركا الجنوبيي و بأزن عمال لعالم بتصير عكل الكوكب

ليش بدك تصادر وتامم

ملاحظة أنا بدي المصانع تكون للعمال لا للدولي و لا للرأسمالي
و هون بيجي الفرق بين الاشتراكيي و رأسمالية الدولي
و اذا بتلاحظو أنا قلت

عكل حال عندي حل أحسن من التأميم
احتلال المصانع متل بفنزويللا

فنزويلّا و بوليفيا والبرازيل قريباً هيّ دول اليسار الجديد

هدول لسا ما صاروا دول اشتراكيي

[Nirvana]

كاتب النص الأصلي : كوستا

اخت نيرفانا

الثورة مانها لعبة يعني هاد مصير شعب وامة بحد ذاتو
والثورة دائما تحصد ابنائها واكبر مثال الثورة الفرنسية (روبسبيير)

لكن التجربة السورية فريدة من نوعها بالعالم حالات القمع والنفي والهرب لخارج البلاد وملاحقة رجال الاحزاب وحالات التعذيب , تصوروا انو في ناس غطسوهن بالاسيد
والانقلابات العسكرية وكل مين ايدو الو

فسورية غير مؤهلة نفسيا للثورة لانو الشعب تجربتو ضئيلة

بالنسبة للثورة فأنا اللي بقصدو أنو بس بأحلامنا بتصير في ثورة بتغير هالحال...
أما بالنسبة للتجربة السورية... يمكن في اختلاف بس صدقني العراق تجربتها ما بتختلف كتير..
وبالنسبة لباقي الدول (وما رح أحكي عن تجربة دول أمريكا اللاتينية اللي ما زالت تحت تاثير الانقلابات والثورات!! ):

بدي أسألك:
مين من الدول العربية للشعب فيها إلو رأي؟
مين من الدول العربية ما فيها الفساد والنهب والحرامية والاحتكار؟
مين من الدول العربية بيقدر حدا يعارض ويفتح تمو ؟
مين من الدول العربية في حرية رأي وتعبير ؟
مين من الدول العربية ما فيها بين كل واحد واحد ، واحد مخابرات؟
مين من الدول العربية السلطة مو لاعنة أبو الشعب؟
مين من الدول العربية ما فيو حيتان وواسطات و اللي معو قرش بسوا قرش واللي ما معو الله لا يردو؟
أنا لحد هلق بابا ببقى يقولي ما تحكي هيك وهيك على التلفون لانو مراقب... الناس كلها عايشة برعب ( الجيل اللي قبل ما زال تحت تأثير هالإرهاب والخوف، والجيل الجاي راسو فاضي)

مين اللي بدو يعمل ثورة، الثورة يا جماعة مو بس تنظيم (يمكن تفكيري رومانسي شوي)، الثورة ناتجة من روح الشعب الغاضب، اللي ما عاد يتحمل ظلم وقرف و.......... .

عكل حال انا بحترم رأي الجميع .. ويا ريت فينا نعمل 1/100000000000000 من اللي عم نحكيي ، أنا شخصيا بكتفي بهالنسبة عالأقل وبكون مبسوطةوعندي أمل.

آسفة للإزعاج.

[chefadi]

كاتب النص الأصلي : كهربجي مثقف

صباح الخير شباب

هلق أنا بدّي أسأل أوّل شي حسّون... شو كانت عواقب التأميم التعسّفي كلّ مرّة؟؟

برأيك الإتحاد السوفييتي انهار بسبب أخطاء صارت من بداية البدابة؟؟ (عند البلاشفة قصدي)

يا ترى اللينينيين قدروا يعملوا اقتصاد قوي شي مرّة؟؟ تفضّل شوف شو صار بالشعب الكوبي.. الجوع أكلهن أكل

فنزويلّا و بوليفيا والبرازيل قريباً هيّ دول اليسار الجديد.. ما عاد في شي أسمو تأميم متل ما كان.. هنن طرحوا على الشركات الكبيرة (بس الكبيرة) شروط.. اللي رضي استمرّ, واللّي ما رضي ما استمرّ... الموضوع مو قمع...

أهم شي أنّو ما ننسى أنّو ديكتاتوريّة البلوريتارية مو النخبة هي اللي بتقرر شو بدها تعمل.. طبعا لمّا بتكون النخبة حقها خر*ة أجلّكن...

فبالتالي مو نحنا اللي منقرر شو بدّو الشعب... اللي للأسف بدّو الدين حاكم..

مرحباااااااااااااااااا
اكيد التأميم اللي صار بالاتحاد السوفييتي كان الو سيئات كتيرة بس متل مابيقول زياد كزا مليون فلاح صارو بلحظة ملاكين هي بتحمللا كم سنة سكوت (اكيد مو لهلق )
مشان الاقتصاد البلاشفة اكيد مانجحو ببناء اقتصاد متين بس كمان هاد بسبب كتير ظروف تاريخية وسياسية و عسكرية حتى بسبب نقص بالشروط الموضوعية (اللي حكا عنها ماركس) للثورة ,,
و انا معك انو امريكا الجنوبية تمثل اليسار الجديد اللي بيعتمد عالاقتصاد المتين ,,,,
الف تحية
سلامات

[chefadi]

كاتب النص الأصلي : كوستا

الثورة مانها لعبة يعني هاد مصير شعب وامة بحد ذاتو
والثورة دائما تحصد ابنائها
لكن التجربة السورية فريدة من نوعها بالعالم حالات القمع والنفي والهرب لخارج البلاد وملاحقة رجال الاحزاب وحالات التعذيب , تصوروا انو في ناس غطسوهن بالاسيد
والانقلابات العسكرية وكل مين ايدو الو

فسورية غير مؤهلة نفسيا للثورة لانو الشعب تجربتو ضئيلة

حكيك ع راسي و سوريا غير مؤهلة نفسيا للثورة بس بعتقد مو لآنو الشعب تجربتو ضئيلة (في كتير ثورات نجحت بدون عامل الخبرة ) بس لأنو الشعب غير واعي و غير مثقف سياسيا زائد متل ماحكت نيرفانا انو ماحدا بيسترجي يعطس ,,,,,

تحياتي ,,,

[حسون]

لأنو الشعب غير واعي و غير مثقف سياسيا

هون بيجي دورنا بتوعيت الشعب