الشركة اللي بشتغل فيها WORLD FINANCIAL GROUP -WFG

[hanny dagher]

بناء على طلب اعضاء كتير (عضوين او تلاتة ) قررنا انو ننزل موضوع كامل عن الشركة اللي بلشت اشتغل فيها من فترة شهرين تلاتة

الموضوع رح يكون طويل شوي رح يكون معقد شوي رح يكون في اسئلة كتير في كلمات انكليزي كتير بجوز ما اقدر ترجمها للعربي بس حاولو تفهموها واذا ما مشي الحال سالوني بحاول ترجمها
بس بنصح الكل يقرا الموضوع لانو رح يكون ممتع نوعا ما ورح يفتح افكار جديدة ترجعو تفكرو فيها من اول وجديد وانا جاهز للاسئلة اذا حدا عندو سؤال
رح نزل الموضوع على عدة ردود لانو شرح الشركة بشكل عام لما بدنا نشرحها لحدا بياخد بين الساعة والساعتين فانا رح وزعهن على كذا رد وانشالله اقدر اكتب الموضوع بطريقة ممتعة

قبل ما بلش احكي بالشركة بدي احكي شغلة صغيرة عن حالي

بتعرفو من لما بيكون الواحد بسوريا وبيكون عندو امل انو يجي على امريكا بيبلش يحلم انو بكرا يبا بس وصل بامريكا رح اشتغل كم سنة جمع مصاري كتير وصير غني و بعدها ممكن افتح بيزنس لحالي وبخلي العالم يشتغلو عندي وانا بطلع بفتل العالم هيك كيف معظم العالم بتفكر واولهن انا
بس الشي العالم بسوريا ما بتعرفو انو امريكا مانها سهلة امريكا فيها تعب وكتير كتير كتير قديش العالم بتتعب بسوريا بامريكا بيتعبو اضعاف مضاعفة
بس الشي الحلو بامريكا انو في فرص بتقدملك فرص كتير وانتي بتنقي المجال اللي بتحبو وبتحس حالك بتنجح في وبتقلك مشي
معظم الشعب السوري بس يجي على امريكا اول ما بيتوجه على الليكر ستورات (الليكر ستور للي ما بيعرف هوي محل لبيع المشروبات الكحولية والدخان وشوية اكل وشرب وهيك قصص ) على اعتبار الليكر ستورات ما بدها لغة زيادة يعني هاي- هاو ار يو - باي طلعنا خالصين
انو بيقلك يبا انا بشتغل سنتين تلاتة بالليكر ستور بجمع شوية مصاري بطلع بشترك انا ومعلمي اللي بشتغل عندو بستور تاني انا بستلمو بيصير الي حصة من الربح وهيك شوي ورا شوي ممكن اشتري ستوري الخاص
بس اللي معظم العالم اللي ما بتحسب حسابو او بتحسب حسابو وبتكون رضيانة بالامر انو بدك تشتغل من الصبح للمسا بالستور وسبع تيام بالاسبوع يعني انتي حاطط حالك كليا بالستور ما بتطلع ما بتفوت ما عندك حياة
والمشكلة بالعرب اللي كانو قبلك انو كل ما قبيت راسك مشان تتطلع على فرص تانية حواليك بيخبطوك على راسك بيخلوك معد تفكر غير بالليكر ستور

بالنسبة الي انا اجيت من سوريا وما حاطط ببالي ليكرستور انو قلت بشتغل بالليكرستور بس لقوي لغتي وبعدين بدي اطلع شوف شغل تاني وهيك صار انو اشتغلت سنتين بالليكرستور بس طبعا من بعد ما قطعت السنة وانا عم حاول لاقي فرصة تاني بشغل تاني انتقل علي واطلع من جو الليكر ستورات

انا اجيت على امريكا وفي احلام كبيرة براسي بدي حققها
بدي اشتري بيت لاهلي بيت لالي بدي اتزوج واطلع افتل العالم مع المدام بدي حصل تعليم عالي بدي افتح شركة برمجيات خاصة فيني (على اعتبار انا اختصاص هندسة كمبيوتر ) بدي خيي يكمل تعليمو وبدي وبدي وبدي
الليكر ستور كان محطم للاحلام بدال مانو محقق للاحلام فحاولت بعد عنو باكتر قدر ممكن واجاني عروض كتير مشان اشترك بليكر ستور وانا كنت ارفض

اللي صار انو كنت اخد صف رقص هاي السنة وتعرفت على بنت بالصف قالتلي انو بتشتغل بشركة وعزمتني عالشركة رحت وشفت كيف بيشتغلو وحبيتها وحبيت العالم اللي هنيك وانضميت وبلشت شغل

حاولت اترك الليكر ستور (بس متل ما قلت سابقا انو العرب بيكبسوك على راسك مشان ما تطلع من الليكرستور ) معلمي ما عم يخليني اترك بس انو اخر هالصيف رح يكون نهاية الليكر ستور الي


الشي اللي شفتو بالشركة رجع جدد فيني الامل انو فيني حقق احلامي اللي كنت احلم فيها من انا وصغير

هاي بالنسبة الي وكيف تعرفت عالشركة
رح احكي عن الشركة بالردود الجاي


يتبع .................................................. ................

[marioma alghzayala]

ولي كل هاد .. ,, ويتبع ..
وينك يا حكيم ..

[Reemi]

وينك يا حكيم ..

بتوقع هاني رح يقطع شوط عالحكيم

[hanny dagher]

قبل ما احكي عن الشركة وعن شو منساوي بالضبط رح احكي قصة صغيرة :

بعد نهاية الحرب العالمية الثانية رجعو الجنود الاميركان على امريكا ومشتاقين لنسوانهن
فبيقولو بين سنة 1946 وسنة 1964 في 78 مليون طفل خلقو بامريكا بالاضافة ل 10 ملايين هاجرو من بلدان تانية على امريكا يعني صار في 88 مليون طفل بامريكا بياطلقو عليهن اسم baby boomer
وكان يقولو اذا بتقدر تتوقع شو ال baby boomer بدهن وبيحتاجو قبل ما هني يحتاجو في عندك فرصة انو تكون من اغنياء العالم
يعني اذا بتقدر تحصل دولار واحد من كل BABY BOOMER بتكون حققت 88 مليون دولار
في شركة اغذية اطفال اسمها gerber لحد عام 1950 كانو بايعين 50 الف قطرميز اكل اطفال بتاريخ الشركة كلياتو بسنة 1950 وما بعد صارو يبيعو 7 مليون قطرميز بالشهر و بيقولو انو المبيعات بالشركة انفجرت والشركة صارت غنية كتير
بعد هيك الاطفال كمان بدهن العاب مبيعات شركات العاب الاطفال كمان زادت بشكل مو طبيعي
بعدين الاطفال كبرو وصارو شباب صار بدهن مكان يطلعو يتسلو في ويقدملهن اكل سريع و رخيص وهيك طلعت سلسلة مطاعم مكدونالدز وكارلوس جونيورز وجاك ان ذا بوكس
الشباب شو بيحبو يسوقو ؟ اكيد سيارات سريعة سيارات رياضية
كان في شخص بيشتغل بشركة فورد اسمو "اية كوكو " (ظريف الاسم ) اخترع الفورد موستانغ وفورد حققت اكبر ربح بتاريخ الشركة بهالكم سنة اللي baby boomer صارو يشترو الفورد موستانغ
في شركة سيارات اسمها "كريسلر" كانو عم ياعلنو افلاسهن باوائل التمانينات بس اخر الشي ضمو الهن "اية كوكو" اللي اخدو من فورد وقتها اية سال سؤال انو وين ال baby boomers بالحياة وشو بدهن وكان بالتمانينات الشبيحة بلشو يتزوجو ويصير عندهن ولاد اجا اخترع شي اسمو ال mini van وكريسلر انتقلت من مرحلة الافلاس لتحقق اكبر ربح بتاريخها
بالتمانينات كمان في شي اسمو REAL ESTATE واللي هيي الشركات المسؤولة عن بيع البيوت كمان حققت ارباح كبيرة لانو البومرز كانو عم يشترو بيتهن مشان يعيشو مع عيلهن
بنفس الوقت كانو عم يدورو عن التكنولوجيا بحياتهن وهيك لما طلعت مايكروسوفت وبيل غيتس عرف شو بدهن البومرز وصار اغنى واحد بالعالم

هلأ بعد ستين سنة اكبر BABY BOOMER صار عمرو ستين سنة وقرب من سنة التقاعد (65 بامريكا ) فشو صارو يفكرو انو كيف بدهن يأمنو مصاري مشان هالكم سنة الباقية من حياتهن؟ كيف رح يقدرو يعيشو بعد التقاعد ؟ كيف رح يقدرو يعيشو بدون الراتب ؟

هون بيجي دور شركتنا بمساعدتهن انو يأمنو هالكم سنة الجايات اللي ممكن تكون عشرة عشرين او تلاتين سنة عند بعض العالم



يتبع .................................................. ...........

[يمان Rooooonaldo]

ناطر ناطر .. سوبر سوبر حلو الموضوع ..

[ِAbu Alzooz]

طيب شريك فيك تختصرون

بتلت كلمات

[suryoyo]

الشي اللي فهمتو ..
شركتكم انسانية كثير !!!



ما اقول غير ... الله يفوقك .. و تحقق كل احلامك و ترجع على بلدك و تفتح مشروع تقضي فيه العمر !

[وشم الجمال]

جد كتير روعة اسلوبك ومثير وبشد

يعني نحنا في انتظار التكملة....

بانتظارك هاني

[hanny dagher]

بالعودة للحديث عن WFG (رح استخدم هالاختصار كتير اسهل من استخدام كامل الاسم)

WFG هيي جزء من شركة اسمها AEGON او بمعنى تاني AEGON هيي الشركة الام ل WFG
AEGON وحدة من اقوى شركات الانشورانس بالعالم
عمر AEGON اكتر من 150 سنة متوزعة بكل انحاء العالم بس تركيزهن الرئيسي كان بامريكا بريطانيا وهولندا
وحاليا صارو بالصين بتايلند باليابان وقريبا بالهند وعم يحاولو يكونو بالمكسيك
الشركة AEGON قيمتها اكتر من 413 مليااار دولار
كان في شركة كبيرة بامريكا اسمها TRANSAMERICA وهيي كانت اكبر شركة استثمارات بامريكا
AEGON اشترت TRANSAMERICA بسنة 2001 وكتبولهن شيك بقيمة 26 مليار دولار
هاي قديش الشركة الداعمة لشركتنا قوية
AEGON بسنة 2005 اعتبرت المرتبة 82 من بين اكبر 2000 شركة بالعاااااااااااااااااااال م (على مستوى العالم مو بس على مستوى امريكا )

بالنسبة لشركتنا شركتنا عندها مهمة بدها تحققها واللي هيي انو ما تترك اي عيلة بامريكا بدون ما تساعدها ماليا
عندها رؤية انو بدنا نكون اكبر شركة خدمات مالية بالعالم
ولنحقق هالشي عنا نظام نظامنا قوي متين عمرو 15 سنة عالم كتير نجحت بتطبيق هالنظام وعلى اساس هالنظام نحنا ماشيين يعني متل ما بيقولو عنا بالشركة RUN THE SYSTEM AND THE SYSTEM RUNS YOUR BUSINESS يعني انتي طبق النظام والنظام لحالو بيحققلك نجاحك وبيمشيلك شغلك



يتبع .................................................. .......

[hanny dagher]

كتير من العالم بتتساءل (من السؤال ) انو شو رح استفيد من شركتكن
قبل ما جاوب عالسؤال بدي احكي شوية احصائيات (الاحصائيات صارت بسنة 2005 وشوي منها هاي السنة بس بدكن تعتبرو انو بهالسنة هاي الاحصائيات تضاعفت )

1- الديون الاستهلاكية (هيك طلعت ترجمة الجملة الانكليزية ) وصلت لحد 2 مليار دولار
يعني بمعنى تاني متوسط العالم بامريكا اذا بيقبضو 100 دولار بيصرفو 108 دولارات مقابيلها وبيحطو ال 8 دولارات الفرق على كريديت كاردس او قروض او ............
يعني صارت العالم مدينة لشركات الكريديت كاردس والبنوكة كتيييييير
متوسط الشخص الاميركي مدين لشركات الكريديت ب 9000 دولار (سنة 2005 بال 2008 صارت 12000 )

2- عادات حفظ مصاري سيئة
بالمانيا اذا بيقبضو 100 دولار بيقدرو يشيلو على جنب للزنقات 18 دولار ويعيشو بالباقي (18 بالمية )
بالصين اذا بيقبضو 100 دولار بيقدرو يشيلو على جنب للزنقات 50 دولار وبيعيشو بالباقي (50 بالمية )
بامريكا اذا بيقبضو 100 دولار ما بيشيلو للزنقات شي بالعكس بيصرفو زيادة نسبة الSAVING بامريكا هيي - 4.0 بالمية
الشعب الاميركي باخر كم سنة صار يقبض اكتر بس يشيل للزنقات اقل

3- في شي بامريكا اسمو SOCIAL SECURITY واللي هوي انو بتقضي كل حياتك عم تشتغل وعم تدفع ضرائب ببس وقت بتتقاعد ال SOCIAL SECURITY بتصير بتأمنلك راتب شهري بحيث تقدر تكفي حياتك
المشكلة اللي عم تواجه الاميركان هلأ انو ال SOCIAL SECURITY بدو يوقف دفع للمتقاعدين ابتداء من عام 2017 يعني اللي رح يتقاعدو بعد 2017 معد يطلعلهن الراتب الشهري ورح يضطرو يعيشو على هني شو مجمعين مصاري
والحكي طالع من البيت الابيض بشهر اذار من هالسنة (هاي سنتين بيعملو الدراسات وبتطلع معاهن نفس النتائج )
وهاي مشكلة تانية انو معظم الشعب الاميركي او 68 بالمية كل شي مجمعينو للتقاعد هوي 50 الف دولار اللي ممكن تقديهن نص سنة او سنة بالكتير طيب شو مشان اذا عاش المتقاعد تلاتين سنة تقاعد ؟

4- حالات الافلاس اللي تم اعلانها ب 2005 وصلت ل 2.1 مليون حالة افلاس بامريكا زيادة 30 بالمية عن 2004
ب 2008 حاليا في بكاليفورنيا لحالها مليون بيت مهدد بالتسكير و مليون حالة افلاس عالطريق (فقط بكاليفورنيا يعني بولاية وحدة فقط وبعتقد بباقي الولايات في ارقام مقاربة لهالرقم )

5- التأمين عالحياة واللي هوي ممكن يكون الحل الوحيد للواحد يخلص من كل الديون اللي علي ما عم تعتمدو العالم
لنقول شخص عندو 10 الاف دولار كريديت كاردس وتوفى هالزلمي بشكل اوتوماتيكي هال 10 الاف دولار بدها تنتقل على اسم ولادو ومرتو يعني بيصيرو ولادو ومرتو بدهن يدفعوها بالاضافة لديونهن هني
بينما لو عندو الواحد تامين حياة ب 200 الف دولار وتوفى اهلو رح يقدرو يدفعو هال 10 الاف ويدفعو ديونهن كمان ويضل معاهن شوية مصاري
مع هيك بين سنة 1985 وسنة 2003 عدد بوليصات تامين عالحياة نزل بنسبة 39 بالمية


هون بيجي دور شركتنا WFG نحنا شركة الحلول THE SOLUTION COMPANY نحنا منقدم للعالم 6 خطوات ليرتاحو ماديا ومنقدمهن بدون ترتيب محدد انما كما يحتاج الشخص والشخص فقط (يعني ما منقدمهن نحنا بهدف نقبض عليهن منقدمهن حسب حاجة الزبون ومتل ما منقول على طول MISSION BEFORE COMISSION انو نحقق هدفنا بانو نساعد هالشخص اهم من انو نعمل مصاري على حسابو ونقدملو خدمات ما بتساعدو )

اول شي منقدمو للعالم هوي فرصة عمل فرصة ليشتغلو شغل تاني يشتغلو بشكل جزئي ويقبضو شوية مصاري زيادة ممكن تساعدهن بكتير امور بالاضافة انو منساعدهن ينظمو اموالهن ويعرفو وين عم يصرفوها ويحاولو يقللو من صرفها على امور ما الها داعي

تاني شي منقدمو للعالم منحاول ننظم الديون اللي عليهن عم نتعامل حاليا مع شركة لتنظيم الديون رح احكي عنها بعدين

تالت شي منقدمو للعالم منحاول انو نساعدهن يأمنو راتب تلت شهور من شغلهن على جنب بحيث اذا صارت حالات اضطرارية متل عطلت السيارة واحد من العيلة اضطر يعمل عملية بيكون العيلة معها مصاري تدفع لهالحالات بدون ما تزيد ديونها

رابع شي منقدمو للعالم هوي الحماية في حال خسارة المصدر الرئيسي للدخل
يعني في حال خسرو شغلهن في حال صارت حالة وفاة بيكون في عندهن مصدر تاني يعتمدو علي وهالحماية هاي بشكل اساسي هيي تأمين الحياة

خامس شي منقدمو للعالم تأمين مصاري في حال عاشو حياة طويلة بيكونو قادرين يصرفو على حالهن ومنحاول نخفض عليهن الضرائب

سادس شي منقدمو للعالم بمعظم الحالات وقت بيصير وفاة لزلمي العيلة العيلة بتكون مهددة انو تخسر كل شي بتملكو (بيوت او شركات ) في عنا عالم متخصصة بتقدر تخليهن ما يخسرو شي


بالنسبة لهالخدمات اللي منقدمها او خلينا نسميها بضاعة تجاوزا
هالبضاعة اللي منقدمها مو موجود منها شي باسم الشركة يعني ما عنا شي اسمو WFG LIFE INSURANCE
نحنا كشركة منلعب دور الوسيط (BROKER ) بين العميل او الزبون وبين شركات الانشورانس او شركات الاستثمارات او شركات البيوت او او او بحيث نقدر نقدملو للزبون احسن الخدمات ونحنا منعمل كل هالشي بدون ما نحاسب الزبون اي دولار يعني ما منحاسب الزباين على خدماتنا

في كتير شركات بتشتغل نفس شغلنا بس في فرق انو هديك الشركات بتهتم بالعالم الغنية يعني لحتى يساعدوك لازم يكون معك نص مليون دولار بجيبتك وتدفعلهن 150 دولار على كل ساعة بيقعدوها معك
نحنا بشركتنا منتعامل مع الطبقة الوسطى من العالم وما منحاسب العالم ولا نكلة


يتبع .................................................. ......................

[achelious]

موضوع شيق..
تسجيل متابعة

[Reemi]

يرحم ايامك يا حسام

[hanny dagher]

كاتب النص الأصلي : Reemi

يرحم ايامك يا حسام

انا كنت مخبر مريوم من قبل ما بلش الموضوع انو الموضوع رح يوصل لحد العشر صفحات (يعني في مبالغة شوي كان بحكيي )
بس انو ما خلصنا اسا في كتير اشيا ينحكى عنها

الحلو بالحكي اللي عم احكي انو مو بس عن الشركة انو في حقائق عن المجتمع الامريكي في امور تعليمية (جاي لقدام ) وفي شغلات ممكن تفيد كل العالم (كمان جاي لقدام )

فنطرونا

بتشريفكن يتم سرورنا
جنة الاطفال منازلهم

[يمان Rooooonaldo]

بالنسبة لهالخدمات اللي منقدمها او خلينا نسميها بضاعة تجاوزا
هالبضاعة اللي منقدمها مو موجود منها شي باسم الشركة يعني ما عنا شي اسمو WFG LIFE INSURANCE
نحنا كشركة منلعب دور الوسيط (BROKER ) بين العميل او الزبون وبين شركات الانشورانس او شركات الاستثمارات او شركات البيوت او او او بحيث نقدر نقدملو للزبون احسن الخدمات ونحنا منعمل كل هالشي بدون ما نحاسب الزبون اي دولار يعني ما منحاسب الزباين على خدماتنا

هن .. ما فهمت .. كيف بتكون ارباح الشركة طيب ؟

[hanny dagher]

كاتب النص الأصلي : يمان Rooooonaldo

هن .. ما فهمت .. كيف بتكون ارباح الشركة طيب ؟

جاييك بالحكي يمون ما تستعجل اسا في كتير قصص ودرخشات وطلعات وقصص
يعني رح تترحمو كتير على ايام حسام

[يمان Rooooonaldo]

جاييك بالحكي يمون ما تستعجل اسا في كتير قصص ودرخشات وطلعات وقصص
يعني رح تترحمو كتير على ايام حسام

لاء لاء .. هلا حكياتك ظراف .. صحي انك حومصي .. بس حكيك ما فيو حمصنة

يسلمون اب الهن .. ومتابعين

[marioma alghzayala]

كاتب النص الأصلي : يمان Rooooonaldo

لاء لاء .. هلا حكياتك ظراف .. صحي انك حومصي .. بس حكيك ما فيو حمصنة

يسلمون اب الهن .. ومتابعين

قعود عاقل يا شب ....

هنهنات تابع تابع .. متابعين ..

[يمان Rooooonaldo]

ولي كل هاد .. ,, ويتبع ..
وينك يا حكيم ..

هنهنات تابع تابع .. متابعين ..

شيزفرينيان