واخرتا يا ابو فلان

[hanny dagher]

بما انو صارت بقية الاقسام معتة وما بقي غير هالقسم قررت حط الموضوع هون بس عندي كم كلمة قبل ما فوت بالموضوع
بتحبو تطلعو عن الموضوع طلعو ما عندي مشكلة اي ما هوي هيك هيك المواضيع عم ينطلع عنا ان كانت مرتبة وان كانت ما الها طعمة متل هادا الموضوع ورح نزل الموضوع بدون سمايليات انتو تخيلو السمايليات اللي بتعجبكن

الموضوع بيحكي عن قصة صارت مع واحد اسمو ابو فلان منبدا :

كان يا مكان في قديم الزمان من شي سنتين تلاتة يعني مو اكتر كان في واحد اسمو ابو فلان كان شبيب باول طلعتو بس كان فهيم كان ينزل يلعب مع رفقاتو بالحارة بالكلال او الدحل ما بعرف شو بيسمون وخود على شكلي عالراس وطق وطج وحشكور ومن هالكلمات اللي ما كان حدا يقدر يفهما بحياتو وبعد هاللعبة ويكون واحد فضى شو في بجيبتو كلال بجيبة منافسو يطلعو كلن سوا هيك يتجمعو عند واحد ويبلشو ياركلو مدري يدخنو حشيش المهم انو يساوو الجو ضبابي ويعبق هالسقف فوقن وعلى شوي تبلش ترعد وتشتي
فهادا ابو فلان بوحدة من هالسهرات التحشيشية هاي طلعت براسو فكرة تحشيشية اسا اكتر من سيكارة الحشيش بحد نفسا انو بدو يعمل دولة والله خبطا عجقا عجنا خبزا لبستو الفكرة وتغلغلت بالمسام تبع الخلايا تبع مخو وهيك قالا بصوت قوي متل اللي عم يلقي خطاب (عرفان حالو شو بدو يصير ) قالا للشباب يا شباب انا بدي اسس دولة طلعت الشباب في هيك انو هادا انطفى على الاخير يعني وقعدو بلشو يضحكو علي والله المعلم ما تاثر وقعد يشرحلن الفكرة والله الشباب شوي ورا شوي بلشو يقتنعو وكان من ضمن هالشلة عليتان وكوليرا وبلهارسيا وزحار يعني بتعرفون انتو شلة الحارة وقررو الشباب يساعدو
وبلشو يشتغلو عينو ابو فلان رئيس لهالدولة بما انو هوي اكتر واحد محشش فين مع انو غشيم بالسياسة بس محشش نمرة اولى
واستلم زحار وزارة الخارجية والوزارة العامة واستلمت بلهارسيا الثقافة واستلم سل الداخلية وكوليرا راحت صوب الاعلام والمعلم متحول استلم رئاسة الوزارة

والله كلو كان تمام بس كان ناقصن شغلة وحدة عالم لهالدولة (يعني مو معقولة دولة بدون عالم بتلاقيا معقولة انتي )
المهم بيقررو يفتحو باب الهجرة لهالدولة الجديدة وبتبلش هالعالم تفوت من كل مطرح واحد شي من الشرق وشي من الغرب وشي ما بعرف من وين وكل واحد محشش اكتر من التاني
المهم بيجتمعو بهالدولة هاي وبيصيرو بدن يطوروا
وبيشتغلو وبيشتغلو لحد ما بيجي يوم بيصير يجو عالم يخربو اللي كانو هالعالم عم تشتغلو ومو بس هيك لاء بيصيرو يقلعو العالم الموجودة (اي شو بيخلو اسرائيل تغلبن يعني عيب والله )
المهم بعض من هالعالم بيطق قلبو من الوضع وبيقرر يهاجر (يعني بتعرف حضرتك كل بلد لازم يكون فيها مهاجرين ) وبيهاجرو ومعد بيسمع عنن حدا خبر وبيبلشو هالعالم اللي بقت يغنولن "يا مهاجرين رجعو "والمهاجرين يغنولن "لا تندهي ما في حدا " المهم معظم هالمهاجرين بيكونو من مناصب رفيعة بهالدولة بيتطلع ابو فلان هيك بيتطلع هيك (يعني طبعا هوي ما كان منتبه شو عم يصير لانو عندو شي اهم يعني بدو يطور البلد بتعرفو انتو ويقلولو الشباب يا ابو فلان هيك هيك عم يصير بدولتك اي شو هوي فاضي يسمع لهالعالم شفت بحياتك رئيس بيسمع لشعبو او لحتى المسؤولين اللي تحت ايدو صعبة هاي ما بتصير اصلا عيب تفكر هيك تفكير )
المهم صار ابو فلان بدو مسؤولين جداد وخصوصي انو دولتو كبرت كتير وصار فيها عالم مختلفة كتير وكبرت المشاكل بيجي بيسكر باب الهجرة بيعلن عن انتخابات مشان المسؤولين وبتترشح هالعالم وبتتعبى الطلبات وبتبلش الحملات الانتخابية (يعني ضرورية مشان الصفة الديمقراطية بتعرف انتي طول عمرنا عايشين بديمقراطية بدنا نجي هلأ نغير اي ما بيصير )
المهم بينتخبو هالشعب اللي موجود مسؤولين جداد
وبيتسلمو هالمسؤولين الجداد مناصبن وبيبلشو متحمسين وعلى اقتراحات وتزبيطات وركلجات وفك علقات والله وبيزبط الوضع فترة منيحة
ليجي يوم من الايام بيعلن ابو فلان (بكل ديمقراطية وبعد التشاور مع جميع المسؤولين ) انو رجع فتح باب الهجرة
وهون بتكفت هالعالم يعني الشباب موظفين الجمارك (على اساس ) معد يقدرو يلحقو على عالم بدها تفوت على دولة ابو فلان والشباب المسؤولين صار فيهن متل المثل اللي بيقلك لا يغرك الكر باول طلوعو بعد الحماس والنشاط صابت حالة احباط لانو صارو يشهقو ما يلحقو

المهم بيصيرو هالعالم يطالبو المسؤولين (بما انو ما بيقدرو يوصلو لابو فلان مباشرة ) ويقاتلو على المسؤولين انو بدنا هيك وعملو هيك وهني مو عرفانين انو المسؤولين عم يتناقشو بين بعضن بجو ديمقراطي وعم يدرسو مشاريعن منيح قبل ما يشتغلو اي شغلة وابو فلان حامين تحت جناحو وعاطين جو ديمقراطي عالي الجودة نخب اول وعم يسمع اقتراحاتن ومشاكلن ويلبيا

اي والله وبعد العز والجاه لدولة ابو فلان رجعت تنحدر ورجعت العالم المنيحة تهاجر (يا اخي حقها ما تقلي يعني الله وكيلك صار عدد المهاجرين من دولة ابو فلان قد عدد المهاجرين من لبنان ومن ضيع الوادي بسوريا ) اي والشعب اسعتو عم يغني للمهاجرين يا مهاجرين رجعو والمهاجرين يردو علين لا تندهي ما في حدا

بس انو السؤال هلأ ايمت يا ابو فلان بدك تطلع من حالك وتفتل شوي وتشوف انو كل شي عم تعملو مشان تطور دولتك اخر الشي رح تبقى دولتك بدون شعب
ايمت يا ابو فلان بدك تطلع من غرفتك المسكرة على حالك وتسمع لهالشعب شو بدو وتطبق الديمقراطية والحرية اللي عم تنادي فين بدولتك

اي هاي تسطيلة وتسطيلة الحشيش تسطيلة

اي واخرتا يا ابو فلان

حياكم

[Nirvana]

ابو فلان ماشي على سياسة .. المهم دولة .. صابتو عدوى الدول العربية ..
ما عادت تفرق مع حدا ..
أنا مو عارفة ليش حارقة دمي.. ما ******** ابو هالاخوية ... يعني وين المشكلة .. من بقية أهلي .. ؟؟
بس المشكلة .. أنو .. انو .. أنو ..



موضوع عالي يا دماغ ..

[Reemi]

يا عمي اعطيني مخ وزتني بالبحر

[Gazita]

هاني كم من الوقت اخد منك هالموضوع عن جد يسلمو.بس لا حياة لمن تنادي
بس شو مشان طق وطج وحشكور وما جاورهما جداد علي
حياك.

[بسام2]

أهلين يا ابن الداغر.. شو يعني بدك تقول ان كل الجماعه اللي عاملين حكام علينا يالعرب كلن محششين .. كل شي بيصير معلم..

شكرا ً من صميم ألبي على هيك مواضيع .. ياخطييير

[handsome]

انا من جهتي بعتقد انو ابو فلان اخر همو شو عما يصير بدولتو ..
بجوز الشغلة متل ما قلت ..
يعني الفكرة كانت تحشيشة . وهلق راحت التحشيشة واجت الفكرة ..
ومعد عجبتو الشغلة ...
يعني ببساطة الزلمة ندم عالغلط الي ساواه .
وبدال ما يفرط هالدولة تبعيتو , لانو الواحد ما فينو يفرط دولة كاملة مكملة ما شاء الله . ولانو دخول الحمام ما متل طلعو . قرر انو يترك الوضع على حالو
وفخار يطقش بعضو . هوي شو جايي من ورا فرط الدولة . صح ولا شي .. مشان هيك مبيقي الوضع على حالو .
والي عجبو عجبو والي ما عجبو .. يدور على اول حيط ...


بس بدك كمان ما تنسا مبادرات الشعب الفقير الي ما بيطلع بايدو شي والي عما يحاول اد مافي يحافظ على الدولة من الانفراط ..
بس بالنهاية لا يصح الا الصحيح .
والله اعلم
ونصيحة معد تحشش كتير .. لانو اساتنا بهاي الدولة . وفي احتمال ينحكم علينا بالنفي .

بس صحي ما قلتيلي شو اسما هاي الدولة
مشكرو خيو عالخاطرة الحلوة

[محمد ابراهيم]

ان متعة الحلم اكبر بكثير من متعة السعي لتحقيق الحلم والتي بدورها اكبر بكثير من متعة تحقيق الحلم

ثم ماذا بعد تحقيق الحلم ؟؟؟؟؟؟؟؟؟؟؟

تكون هناك احلام اهم
لان الحلم السابق اخذت متعته تقل ولا تنسى انه قد تحقق واي شيء يرتبط به يسعى الى التذكير بالمتعة التي تقل ,
ولكن هكذا الحياه ربما سيأتي وقت وتتغير الاحلام وتتبدل الاولويات
وتعود الدوله اهم لدى ابو فلان


اعتقد ان لا احد يعرف ماذا يواجه ابو فلان او ماهي مشاغله وهو من المؤكد يفكر بمفاجأه ما من اجل الدوله وربما من اجل الشعب

[hanny dagher]

كاتب النص الأصلي : محمد ابراهيم

اعتقد ان لا احد يعرف ماذا يواجه ابو فلان او ماهي مشاغله وهو من المؤكد يفكر بمفاجأه ما من اجل الدوله وربما من اجل الشعب

قد ما يكون الشعب قرف ومعد الو نفس باي مفاجأة ترجع الحياة البسيطة اللي كانت بالدولة اول ما بلشت وما بدنا لا مفاجآت ولا شي

[محمد ابراهيم]

كاتب النص الأصلي : hanny dagher

قد ما يكون الشعب قرف ومعد الو نفس باي مفاجأة ترجع الحياة البسيطة اللي كانت بالدولة اول ما بلشت وما بدنا لا مفاجآت ولا شي

الامر يحتاج الى تصويت من الشعب وديموقراطيه من ابو فلان كي نعرف راسنا من رجلينا.


في رأيي ان هناك مشكله
ان العلاقه تبادليه بين الشعب والحكومه وابو فلان

الجميع لديه مصلحه في بقاء الدوله ولكن كل بمقدار ما يريد .

الان اما ان نبني جميعا
او يهدم البعض ما يبنيه الاخر

ولا يمكن تجاهل الامر والمضي قدما نحو الطريق
لابد وان نلتف جميعا نحو هدف واحد هو البناء
او سيكون البناء مشوها

[محمد ابراهيم]

............

[Spector]

لو كل المشرفين و الاعضاء متلك ما كنتو وصلتو لهون بنوب بنوب

تحياتي للغالي

[hanny dagher]

كاتب النص الأصلي : محمد ابراهيم

الامر يحتاج الى تصويت من الشعب وديموقراطيه من ابو فلان كي نعرف راسنا من رجلينا.


في رأيي ان هناك مشكله
ان العلاقه تبادليه بين الشعب والحكومه وابو فلان

الجميع لديه مصلحه في بقاء الدوله ولكن كل بمقدار ما يريد .

الان اما ان نبني جميعا
او يهدم البعض ما يبنيه الاخر

ولا يمكن تجاهل الامر والمضي قدما نحو الطريق
لابد وان نلتف جميعا نحو هدف واحد هو البناء
او سيكون البناء مشوها

خيو معد لازم شي لانو خلص الموضوع انتهى واحسن من هيك ما بقى نصير

خيو جي ام سي انتي اللي على راسي بس انا ما بعتقد حالي احسن من بقية المشرفين لا بكتير ولا بقليل لانو هني كمان الله يعطين العافي عم يشتغلو