نيقة عن الخليقة ؟

[Marooshe]

وأنا أمي بتقلي نفس الشي ..
بس بما اني مو نيقة عن الخليقة .. بل الخليقة نيقة عني
فـ انو عادي



لمصيبة ما بتكمن بالفتاة لي بتدخن بالخفاء ولا باللي فايتة طالعة من المسجد ولا باللي بتنقاد مع العادات والتقاليد ..

مو بالضرورة لي ما بيناسبك ما يناسب غيرك !
والتشابه أو التطابق بعمرو ماكان شرط للصداقة .. ما فينا ننكر إنو محبذ ومريح ،
بس إختلاف الأصدقاء بيخلينا نشوف الاشيا من غير منظار ..


من عندي .. أي وحدة ما فتك فيها فايروس السطحية فيها تكون صديقتي .. ما بيهم ازا كانت مختلفة عني ، أو ازا أحياناً ما تقبلت أفكاري .. المهم تتقبلني متل ما أنا ..


وع فكرة ،
كلامك سمعتو كتير من ذكور .. يعني المشكلة منها محصورة بحواء ..
كتار قالو انهن بيرتاحو بصداقتهن مع الفتيات اكتر من ابناء جنسهم ، والسبب هو انو باختلاف الجنس بينعدم التحدي الجندري لي بيشكل غالباً عائق في بناء الصداقات ..

يعني هالشي مو محصور بس فيكي .. هون فيكي ترتاحي ، منك نيقة عن الخليقة !



وقولي لـ أمك إنو إختلافك عن محيطك ما بينفي وجودك .. ماحدا فرض تطابق الناس .. ويلي هيي والخليقة شايفينو صح ، بيكون صح نسبي ومو شرط يكون صح الك ..

[جـدل]

رفيقتي
حبيبة عمري
الله يطعم كل واحد بهل الدني رفيقة متلا
دائما بتقلي انو تلاقي صديق متل أنك توقع بالحب
نحنا بنوقع بالصداقة
متل حالة الحب اللي صعب تنتهي
ما بقدر قلك كيف حدا بيوقع بالحب
مشان هيك ما بقدر قلك كيف توقعي بالصداقة كمان
بس بقدر قلك لا تبحثي
راح تجي لحالها

[حنين.]

كاتب النص الأصلي : متمردة

نيقة عن الخليقة هو متل بمعنى مختلف عن بقية العالم متل ما ذكرتي ، بس غالباً بياخد منحى سلبي ، مو بصير مو بس مختلف عن العالم ، و مو عاجبو شي كمان ..

وبالنسبة للكمال اللي حكيتي عنو ، فأنا ما عم دور عالصديقة الكاملة ، وإذا العيوب الي ذكرتها ما نوجدت بشخص ، ما بيعني انو صار كامل ..بالإضافة لأنو هي ما كانت عيوب ..هي علل !!!
وطبعاً ما في حدا كامل .

مرسي على الشرح
يعني متل ما نقول نحنا ما بيعجبك العجب
صدقيني انا كمان بيقولولي هيك وبكتير اشياء ومواضيع ابتدي من اتفه شيء لاهم شيء
حتى افهم عليكي اكتر ممكن تقوليلي الاساسيات اللي بدوري عليها بصديقتك

[متمردة]

انو ليش حاسستكن عم تواسوني


منا مشكلة ..أنا مو كتير متأزمة

اللي زاعجني هو وضع الفتيات والشباب- متل ما ذكرتوا انتوا كمان- .

في شي عم يصير

الشبيبة مو طبيعية بنوب

ما بعرف ..مقطوعة كهربتهن ..فايتين بستين حيط ..ملبكين ومكركبين عالفاضي ..ما بعرف ..

شو بدي قلكن ما بعرف ..

يعني اذا بتحكي مع واحد أو وحدة منهن ، بتحسن فهمانين و مو فهمانين عليك
عم يفكروا ..وما عم يفكروا

عقلهن دايماً بمكان تاني

شو هاد

شي بملل ..

ما بقا في حدا بيتناقش متل العالم ..بيفهم حالو شو عم يقول ..بيعرف وين الله حاطو

هوففف ..مليت

[mhsen77]

كاتب النص الأصلي : متمردة

هوففف ..مليت

افففففففففففف
و انا كمان

[nour333]

كاتب النص الأصلي : متمردة

هذه هي رحلة بحثي ليوم واحد ، لم أصادف الكثير من النماذج ، لكن سأختصر ما صادفته في حياتي ب :
1-فتاة تنتظر عمر لكي ينظر إليها نظرة واحدة على الأقل ، لتنسى العالم بأجمعه .
2-فتاة تبحث دائماً عن eyeliners و أحمر الشفاه والمرايا ، وتصرخ إن شاهدت القليل من الغبار على حذائها أو ثيابها .
3-فتاة دودة كتب ، ليس عندها وقت للمرح ، ولا للصياعة ، وحياتها كلها بين المحاضرات الدراسية .
4-فتاة متعصبة ، فايتة طالعة من المسجد . أو ممثلة ممكن .
5-فتاة أنانية بالمعلومة ، وتحتفظ بما تعرفه من معلومات وكتب لنفسها .
6-فتاة لا تتقبل أفكاري -ابتعدت عني الكثير من الزميلات بسبب هذه النقطة -.
7-فتاة لا تعرف المناقشة .
8-فتاة متقبلة للعادات وتعيش على طريقة أمها .
9-فتاة جبانة ، تدخن في الحمامات .

يعني انت في مرحلة البحث عن رقم 10 وهالشي مو صعب لسبب بسيط مادام انت كنت غير عن التسع نماذج فأكيد رح تلاقي ناس متلك بس اهم شي ما تبحثي عن هالموضوع خلي يجي بصدفه

[هبه الاردن]

كاتب النص الأصلي : متمردة

لكنني لم أتجرأ على سؤالهم :"شو هي ؟ " ، خشية أن أقابل بنوع آخر من اللامبالاة .

اذا بتسمحيلي احكيلك رأيي بصراحه ... شكرا الك

انا شايفه انو التقصير منك لاكن بتخافي انك تنرفضي وتقابلي بال لا مبالاه فلازم انك تغامري ومو غلط اذا اترفضتي عالاقل بتكوني ما بتبني النتائج من الخيال

وكمان " بدك تتحمليني " ما لازم تحكمي عالاشخاص من خلال موقف واحد شفتيه منهم وما عجبك

واخيرا اذا بدك صديقه حقيقيه لازم تتقبلي جميع سلبياتها قبل ايجابياتها

فيمكن السلبيلت بنظرك تكون ايجابيه بنظرها والعكس صحيح

وموفقه يا رب ومن هلا بحكيلك نيال صديقتك المستقبليه فيكي

[inodessa]

كاتب النص الأصلي : متمردة

هذه هي رحلة بحثي ليوم واحد ، لم أصادف الكثير من النماذج ، لكن سأختصر ما صادفته في حياتي ب :
1-فتاة تنتظر عمر لكي ينظر إليها نظرة واحدة على الأقل ، لتنسى العالم بأجمعه .
2-فتاة تبحث دائماً عن eyeliners و أحمر الشفاه والمرايا ، وتصرخ إن شاهدت القليل من الغبار على حذائها أو ثيابها .
3-فتاة دودة كتب ، ليس عندها وقت للمرح ، ولا للصياعة ، وحياتها كلها بين المحاضرات الدراسية .
4-فتاة متعصبة ، فايتة طالعة من المسجد . أو ممثلة ممكن .
5-فتاة أنانية بالمعلومة ، وتحتفظ بما تعرفه من معلومات وكتب لنفسها .
6-فتاة لا تتقبل أفكاري -ابتعدت عني الكثير من الزميلات بسبب هذه النقطة -.
7-فتاة لا تعرف المناقشة .
8-فتاة متقبلة للعادات وتعيش على طريقة أمها .
9-فتاة جبانة ، تدخن في الحمامات .

هلق هاي هيي انواع البنات عنا... شباب فينا نستفيد من هالتصنيفات بجمعية رجال بلا أغلال

ع كل انك تلاقي رفيقة حقيقية مو امر سهل.. معك حق..
هاد النص الفاضي من الكاسي.. بدك تطلعي ع النص المليان... موجود بس بدو مين يشوفو..
والله في بنات بينحطو ع الجرح بيطيب

[صفر]

دعيها تجديها دون بحث ... كما أنه ليس شرطاً أن تكون فتاة ...

[صفر]

هلق بالنسبة لموضوع هالجيل الجديد ... للأسف صار جيل معظمو بيدور على الفوارغ ... وهادا خطير جداً ...

لانو هالجيل هو اللي رح يكون المنتج بالمستقبل بمجتمعاتنا .. فإذا كان هلق هيك فمصيبة بعدين ...


الحل ... هو جذري ... من المدرسة ... بس صعب


تحياتي

[متمردة]

انا شايفه انو التقصير منك لاكن بتخافي انك تنرفضي وتقابلي بال لا مبالاه فلازم انك تغامري ومو غلط اذا اترفضتي عالاقل بتكوني ما بتبني النتائج من الخيال

خوف ؟
لأ أبداً مو هيك القصة
بس اللامبالاة أبداً مو شي ظريف بالنسبة إلي .

ما لازم تحكمي عالاشخاص من خلال موقف واحد شفتيه منهم وما عجبك

ذكرت قبل انهن زملائي من سنة ، وهاد الموقف اللي ذكرتو كان مثال ..مو معقول اكتب كل الأمثلة هون

ومن هلا بحكيلك نيال صديقتك المستقبليه فيكي

دعيها تجديها دون بحث ... كما أنه ليس شرطاً أن تكون فتاة ...

ايه صحيح ..
بس أنا ذكرت بالبداية انو عندي plenty من الأصدقاء الذكور

[ritka]

انا اللي شايفتو انو الكل عم يحكي ع الجيل الجديد هون عنا بالبلد
بحب بشركن انو باخر ما عمر الله (كندا) كمان نفس الشي
و الناس اللي ممكن تحكي معهم قلال و بينعدو ع الاصابع و طبعا اغلبهم شباب متل ما تفضلت...
يعني ما تزعلو كتير... وين ما تروحي رح تلاقي نفس المشكلة بكل المجتمعات وما بتخيل انو المشكلة بالمدارس
لانو اكيد المدارس بكندا غير عن الوطن العربي شكلا و مضمونا
بس المشكلة ما زالت موجودة
فبتخيل انو الشغلة اكبر من مدرسة
بس شو هي المشكلة ؟؟؟؟

[butterfly]

كاتب النص الأصلي : متمردة

كنت في أغلب الأحيان لا أعير اهتماماً لما تقوله أمي عني ، لأنني كنت أعتقد أنها لا تعرفني جيداً ..
مؤخراً ..اقتنعت بقولها عني أنني " نيقة عن الخليقة" ..


هذا الموضوع ليس دعاية للبحث عن صديقة ، ولا أرمي منه إلا إلى مناقشة القضايا المشابهة لهذه المشكلة .
ومعرفة رأيكم فيما إذا كنتم تواجهون نفس الصعوبة بالعثور على صديق/صديقة .

هلا يا بنت ..
رح رد لأنو لمست شبه فيي بالموضوع " اي هيك بكل نرجسية يعني "
أنا كمان أمي بتقلي اني نيقة عن الخليقة
وإذا بتسألي أقرب عشر اشخاص مني رح يوقعو تماما ً .. اني نيقة من الخليقة

بدي قلك .. انا عندي كوشة اصدقاء شباب كتير كتير كتير " أكتر من اللازم "
وصديقة مقربة جدا ً ( ووحدة اضطرت الظروف تكون بعيدة )

رح احكيلك عن خبرتي مع هالصديقة المقربة حدا ً .. هي معنا هون بأخوية " اسمها شوش "
ما اعتقد انو نقاط التشابه بيناتنا كتيرة
انا بعبر كتير هي ما بتعبر كتير .. انا متسرعة .. هي زيادة بتحسبا .. انا بحب الزحمة والعجقة وناس ناس ناس وهي بتحب " الرواق خلينا نقول "
ولكن اعتقد انو انا محظوظة بصداقتي لهالبنت وأنها من اكتر الناس اللي غيرو بحياتي ..
ما مهم قدي بتكون صديقتك بتشبهك .. إلا إذا كنتي عم تدوري ع صورتك بالمراية تحبيها
الناس المتشابهين ما بيحفزو فينا شي .. ليتغير .. بالعكس نحنا وهني منضل ع ما نحن

الصديقة اللي بتختلف عنك .. بتنميكي وبتنميها وصداقتكن بتكون متوازنة .. طالما قادرين تكونو
واعين وناضجين " وفي حواااااار " بيناتكن

شغلة تانية .. بما أنك نيقة عن الخليقة .. حاولي ما تصنفي الناس حسب انطباعك الاولي .. "لأنو يمكن كتير ناس صنفتك وظلمتك .. من اول مرة "
عطي لحالك الوقت لتعرفي الناس .. لتعرفي أنو اللي عم تدخن بالحمام .. يمكن هي بقناعتا بتحب تساير المجتمع .. ما بتحب تستفزو .. يمكن و يمكن ويمكن..
ويمكن اللي بيعنيها جمالا .. تكون قادرة يعنيلا شي تاني
الأحكام المسبقة بتخنق إي علاقة .. وإي أمل بعلاقة
فعطي الناس فرصة

ورديلنا خبر
سلام يا حلو ة