زاوية لـــــــــ أخوية ..

[butterfly]

أخـــــــــــــوية .. مسؤولية ..

يمكن هي هاجس .. يمكن أكتر هي قلق ..
أخوية .. سوريا
يمكن هية شقفة وطن .. ما عم نقدر نغيرو عالأرض ..
فحاولنا نرسم على حيطانو ونلون .. لنخليه أحلى ..
يمكن هو مجموعة شباب .. عم تفكر .. عم تحس .. عم تخاطر حتى أوقات كرمالا ..
عم تحاول .. عم تحاول .. عم تبني
اخوية .. تحدي .. ( ونص )
أخوية .. هي صبية صغيرة وعم تكبر .. عمهلا
ضعيفة أوقات .. وحاملة ضعفنا .. كلنا
قوية اوقات .. بجهدنا ... بتعبنا كلنا
والأهم عم تجمعنا ..

أخوية .. هي مسؤوليتك ..
اي مسؤوليتك .. انت اللي فايت تلعب .. وتقضي وقت ممتع ..
مسؤوليتك انت اللي جابك شي محرك بحث لعنا بالصدفة .. ولاقيت عنا
كتاب .. غنية .. صورة .. او حتى فكرة ..
مسؤوليتك انت اللي كنت جزء من الفريق .. من مجموعة الناس اللي حاملة هم هالصبية
وبعدين الظروف .. ساوتك محارب قديم
مسؤوليتك .. انت اللي معنا .. وما عم تطل
مسؤوليتك .. انت اللي عم تنقدنا بكل لحظة .. انت ومتكي ومرتاح ..

مسؤوليتك .. مهما كان مرورك فيها صغير ..
حاول .. ترسم خط بهاللوحة .. بس يكون خط متقن ..
حاول تشيل كتف .. وقت نحنا منتعب ..
حاول .. تمحي .. اثار مشاكل قديمة .. انطباعات قديمة ..
حاول .. ما تبخل علينا برأيك .. بإبداعك .. بحضورك ..
بوقتك ..

مسؤوليتك .. أي ..
ليش معتبر انها مسؤوليتي ومسؤولية .. كام واحد بس ..
ليش راضي تكون متفرج ؟ دام فيك تكون جزء من اللوحة ..
ليش راضي .. تمر .. بدون أثر ..
مدام فيك .. تبني .. وتغير ..
وتأثر بمجموعة كبيرة من الناس

أخوية .. مسؤوليتك ...
يمكن .. صار لازم تبدا .. تعيش معنا هالمسؤولية ..
بفرح ..


رح يتبع ..

[butterfly]

زاوية واحدة لا تكفي ..
واقف بموقع معين .. اخترتو لحالك ..
وعم تقرا وتتابع حروف .. صرت بتعرفا ..
يوم ورا يوم .. صارو مألوفين ألك ..
وفجأة بتفترض .. أنك بتعرف الأشخاص
وانو هالكلمات اللي عم يكتبوها على الصفحات .. بتختزلن ..
بترسملن صورة وتصنيف .. ويا ويلن لو طلعو منو ..

محسب أنك بتعرفني ؟ لأنك عم تشوفني من زاويتك ؟
فكر مرة .. انت وعم تكتبلي .. أني اللي بتعرفو عني هو .. ظل لشخص افتراضي ..
يمكن ما أكون بالقوة اللي شايفة فيي .. لهيك .. ارفق بكلماتك .. معي
يمكن اللي شايفو غرور .. في ّ .. هو مجرد انشغال .. بمسؤولية عم تاخدني بعيد ..
يمكن اللي شايفو ثقافة في ّ .. هو بالحقيقة بيحمل قلب طفل .. وإحساس مجنون
يمكن اللي شايفو فيي سلبية وحس نقد عالي ..
هو مجرد غيرة .. بس عم يخوني التعبير ..

حاول ما تصنفني .. من زاويتك .. لأنها ما بتكفي ..
قرب ..
فكر ّ ..
عاين ..
تفهم ..
بس أرجوك ..
زاوية واحدة لا تكفي .. لكي " تحكم علي "



( هي صرخة شخصية شوي ) ..

رح يتبع .. بس مو اليوم

[وشم الجمال]

مرسيل اول شي اسمحيلي
اي اخوية شي كتير اكبر من ما كنت اتصورو .اخوية بحياتا ما كانت منتدى وبحياتا ما كانت مجرد تضييع وقت....اخوية احلى حياة ممكن بندور عليها وما عم بنلاقيها اخوية فكر عم ينضج ورؤيا عم تتشكل اخوية بحث عن شي جواتنا ما استرجينا ندور عليه اخوية روح يللي مالو روح
اخوية لما انمنعت فوتا ما قدرت مو لانو ضعف بشخصيتي او من هالحكي بس لانو انا بلاقي انو هيي الصحوة
اخوية مو وقت بضيع فيه فراغي قد مانو وقت بجمع فيه بقاياي وقيمي يللي بلحظة لقيتا اشلاء
اخوية حتى لو اختلفنا بنبقى مجتمع كتير بنأمل فيه
اخوية لو قريتك اليوم وحبيتك وقريتك بكرة وما حبيتك فمعناها اني بكتشف شي جديد فيك
اخوية ما فيني احكي عنها من زاوية اخرى لانو عدد لانهائي من الزوايا

مرسيل احلى قبلة لروحكـ...ولروح الكل....وبنوعدك وبنوعد الحلم يللي عايش فينا انو نصير جزء من اللوحة بمجرد فكرة برأي بوجع بفكر بقيمة....بنوعد السما والارض والنجوم ...بنوعد الوطن الضايع جواتنا....

[THE_unforgiven]

أخوية
من وقت ما سجلت بأخوية .. ...
حسيت حالي .. انتسبت لعيلة جديدة
حسيت في أهل تبنوني ...
حسيت حالي كان في كتير شغلات كانت ناقصتني ..
كأنو كان في شي محذوف من حياتي ..
أول ما اشتركت بأخوية ..
كنت مر هيك .. متل الغريب ..
اترك كم تعليق وأمشي ..
بعد فترة ..
صرت .. اترك كم تعليق ..
بس بدون ما امشي ..
وقف .. اصفن .. فكر شوي ..
ومرت الأيام ..
وصرت .. ساكن بأخوية ..
مابقى في داعي لأتحرك منا ..
صرت .. بترك مشاعر .. عبارات فرح وحزن ..
أحيانا .. كلمات .. بحس انو لازم تغير شي فينا ..
أحيانا .. صحي هيي كم حرف .. بس هيي أكتر من كتاب ..
مابقاتا تعليقات ..
مابقى بحس أخوية مجرد ..منتدى ..
مابقى بحس هدفا نشر المعرفة والمعلومات .. وبالنسبة للبعض (التسلية للأسف ..)
صرت عم حسا .. المستقبل ..
وللأسف .. لسا في كم عضو ... عم يخلوني شوف المستقبل ..
متل ما كنت شوفو قبل ما أدخل الأخوية ..
يا شباب ويا صبايا .. يا .. ما بدي سميكن غير أخوتي ..
خلونا .. نغير من المستقبل .. ولو بس شوي ..
خلونا نحس .. انو في أمل ..
انو في حدا عم يفكر .. حدا عم ينقهر من شدة سخف الواقع ..
حدا بيحب وطنو وحابب يغير فيه ...
خلينا نبلش من حالنا .. ننسى غيرنا ..
خلو كلو واحد مننا .. يفكر بالمستقبل .. ويقول ..
المستقبل ... أكيد أحسن ..
ويخلي هالفكرة ببالو ..
بركي .. وأكيد .. انشالله بيكون أحسن ..

تحية إلى صاحبة الموضوع .. BUTTERFLY ...

..............................
THE PUNISHER " ,,,

[قرصان الأدرياتيك]

محسب أنك بتعرفني ؟ لأنك عم تشوفني من زاويتك ؟
فكر مرة .. انت وعم تكتبلي .. أني اللي بتعرفو عني هو .. ظل لشخص افتراضي ..

لستُ أعارض وجودَنا في الظلّ أو في مجتمع افتراضي، لكن تذكّري يا صديقتي أنَّ الفراشة التي تكتبين تحت اسمِها ليست في الحقيقة إلا أنتِ وكل ما تريدين قولَه ولم تستطيعي يوماً لأسبابٍ كثيرة!

الإنسان يُرى من خلال ما يُعبّر عنه هنا وهناك وخاصّة إذا ما كان تعبيره حراً بدون قيود من أيّ نوعٍ كانت!

نحن هنا كما نريد أن نكون على حقيقتنا الخارجة من الأطر والعادات والدّين... إلخ. نحن هنا كما نحن، فأمّا من يعرض نفسَه على غير ما هو عليه... على غير حقيقته... فهو ينافق ذاتَه، يسخر من نفسِه قبل أن يسخر من الآخرين.

بالتأكيد مجتمعنا هذا الافتراضيّ لا يعبّر بشكلٍ كامل عمّا نحن عليه لكنّه جزء هامّ منّا ومن كياننا وإلا كنّا مجرّد أفكار لا أجساد لها!

فلنكن هنا كما نحبّ أن نكون وكما نريد أن نكون وكما نكون في الحقيقة.

سلام ومحبّة.

[سوا ربينا]

عن جد اخوية شغلة كبيرة بالنسبة الي ....يمكن اول ما سجلت فيها ما كنت متوقعها هيك ...يعني فكرتها منتدى متل اي منتدى .... بس حتى كملة منتدى انا ما بحب احكيها لما احكي عن اخوية .....لانها اكبر من انو ينحكي عنها هيك ......
اخوية غيريت فيي كتير شغلات ...ما رح انساها....
اخوية بتعنيلي كتير وبتهمني كتير واخوية عائلتي التانية ...اللي ما بتوقع بيوم من الايام انو استغني عنها ......

اخوية هي انا .......

[ِAbu Alzooz]

الأخوية صبية و ست الصبايا

و حتضل صبية