** خاص بالشوام : شلة شوام ..شاركونا يا بي... **

[هدوء البحر]

كاتب النص الأصلي : المحارب العتيق

ياريت

انا شامي البي كبير
مالح قول غير
الله يسامحكم

بعدين بدنا نحرك الشلة شوي

بدنا نجيب جميع الكلمات الشامية الئديمة والاغاني والدئات متل دئة ستي ومابعرف شو

[هدوء البحر]

والله واحد ماخرج يوصيكم بشي


هي المصطلحات الشامية المعتئة

شاضومة
تعبير مؤنث لا مذكر له يفيد كون المرأة غير مرتبة وليست من الأكابر وتحب الكلام غير المنمق وكثرته

· شرنه
(إنظر الشرح في تفسير مصطلح شاضومه )

· ملحو على ديلو
يعني لا يقيم وزناً للعشرة والخبز والملح


· يلي بالي بالك
كناية عن أمر يتعذر ذكره


· معصمص
نحيل بارز العظام صغيرها


· يا إيدكم!
تعبير عن الهرب من شيء ما بسرعة

· زمئ
أي هرب ببراعة وحذق، وزمط شرحو

· سرّي مرّي
أي جيئة وذهاباً بشكل متكرر إلى حد الغلاظة وتتبعها أحياناً أو تنوب عنها (خدني جيتك) و(كيلي ميلي)

· حط بالخرج
أي لا تعبأ بما يقال

· على قفا مين يشيل
كناية عن كثرة الشيء وشيوعه و(قابر القنى) مثلها

· مأنّف
يعني لا يعجبه العجب ولا الصيام برجب

· فش نيعو
يعني انتقم منه شر انتقام وهي بالحلبي: يفشر حنكو

· أزّت نفسو
أي نفر من الشيء نفوراً كأنه رأى صرصوراً

· جفص
صفة للجلف غليظ الروح

· حنتر
أي "تيّس" و"بوزم" في الوقت نفسه

· طلع من عيونو عامص
يعني دفع ثمناً غالياً وندم على ما نالتحديث لمفردات القاموس الشامي ومع أنه بسيط إلا أننا أضفنا في شهر أكثر مما يضيفه "المورد" في سنة

· كل طلقة براحة
أي يقوم بالشيء رويداً رويداً بين الفينة والأخرى

· يلي بدو يموت يوصّيك بولادو
ذم بصيغة المدح يعني أن المذكور غير أهل لحمل المسؤولية

· على كراريت حلقو
يعني مصاب بغثيان شديد وإقياء لا يستطيع كبحه لا بحلال ولا بحرام

· لا تكرّك عليه
يعني لا تلح عليه إصراراً

· قلبه عميقول حق بق (كما قلنا أن القاف تقرأ ء)
يعني أنه يريد أمراً بشدّة لكنه يضمره إضماراً ولا يظهره إظهاراً ( مشان ما يزعل سيبويه)

· لحم السير عالقبقاب وصاروا المبغضين صحاب
مبينه وما بدها شرح

· يلي بيجي منمدلّه فرشة ويلي ما بيجي منرتاح من وشه
مثل نسائي بحت يفيد عدم الترحيب بأشخاص معينين ما عم يجوا أصلاً

· شو هالتجرة
يعني الأفندي ما عجبته هالحكاية كلها وحاسس إنو تعبو ذهب سدى أو أدراج الرياح (كمان مشان سيبويه الله يرحموا)

· وحياة خالقك ماني مفارقك
تعبير يفيد غلاظة المتكلم وتغالظه على المتكلم عنه ويتبعه عادة: مومحبة فيك بس بدي دايئك

· العين الطرّاءة
عبارة عن التمسخر على المتكلم عنه وأن لا شيء فيه بينحسد عليه

· بيقطش وبيلحش
يعني المهذار كثير الهفوات ومن يهرف بما لا يعرف ولسانه يسبق عقله

ولي على كسرتو
تعبير يفيد التحسّر على شخص ما مع لومه على ما فعل (في تناقض، مهيك؟)

· كـــــــن
بكسر الكاف وتسكين النون يعني اهدأ أحسنلك

· كروج
يعني درمل، وبتعبير أفصح افرنقع من هنا، وادحال مثلها

· فــز
كمان بكسر الفاء يعني قوم (أوقف وانت بتكلمني)

· جماش
أي همجٌ رعاع مستجحشون

· مصطهج
يعني مسلطن، مكيّف، مبسوط أو كما قال سيبويه: منتشي

· أفّّعت معو
يعني حمل القشة التي قصمت ظهر البعير وبلغ السيل الذبى

· مو نفعان لا للخل ولا للخردل
يعني بلا فائدة تذكر، وأحياناً بقولو من نافع لألله بنافعة

· لاطيلو
يعني كمن له منتظراً ومنها المتل القائل: "قلّو لاطيلك قلّو صاحيلك" يعني هدول تنين ناويين عالشر لبعض وكل واحد منتبه للتاني بس بدون كبريته ليشعلو

· ادفشو وشوف ما أجحشو
يعني بالإنكليزي: Fools rush in where angels fear to tread

· ما فيه الوتكة
يعني صاغ سليم خالي من العيوب وأحياناً يعني فاضي

· ما معو نكله
مفلّس وحالو عدم

· أول باشتان.....ثاني باشتان
طريقة النسوان في تعداد الأمور والأوامر والأسباب والمسببات

· بظّت عيونو
يعني جحظت العينان حتى كادت المقلتان تخرجان من محجريهما (على طريقة الجاحظ)

· سك
حقيبة تقليدية تصنع من قماش (مستعمل عادة) تستعمل للتسوق وخصوصاً من سوق الجمعة


انتظروا التتمة

[Black Orchid]

هي ستي كانت تقولها كتير والغايه منها تقليل القيمه,
( لقت لي و لبقت لك )وبتسكبن أغلب الحروف
ويسعد صباحكن هالحلو.

[jovia]

هههههه
زكرتني بهالمصطلحات اخخخخخخخ وعلى موعد معكون بلكي بجبلكون وجبة مصطلحات تتغدوها او تتعشوها ازا بدكون
شتقتلكون هدوء وباشق بس هلا عندي شغل كتير ما عم بقدر افتح نت كتير

[المحارب العتيق]

كاتب النص الأصلي : jovia

هههههه
زكرتني بهالمصطلحات اخخخخخخخ وعلى موعد معكون بلكي بجبلكون وجبة مصطلحات تتغدوها او تتعشوها ازا بدكون
شتقتلكون هدوء وباشق بس هلا عندي شغل كتير ما عم بقدر افتح نت كتير

[Black Orchid]

( لولا علبه مكي ولا الاحوال بتبكي)والتفسير عندكم .

[المحارب العتيق]

مَرَرْتُ عَلى أَزِقَّةٍ حَوَتِ الذِّكرَياتْ

وَأَرصِفَةٍ تَضُمُ بَقَايا الفُتاتْ
* * *
وَزُهورٍ عَطَّرَتْها دُمُوعي

دُمُوعُ مَا فَاتَ وَمَا هُوَ آتْ
* * *
أُقَلِّبُ لِلماضي صَفَحاتِهِ

آآآهٍ عَليها مِنْ صَفَحاتْ
* * *
عَصِيَّةٌ عَلى النِّسيانِ فيها

شُجونُ اللَّيالي وَآهُ الشَّتاتْ
* * *
شآمُ المَحَبَةِ فيكِ لِقَانا

وَفيكِ الفُرَاقُ وَفيكِ الحياةْ
* * *
وَهَذا سُؤالي أََفَلا تُجيبي

أََعَلَى رُبوعِكِ يَغدو المَماتْ!؟
* * *
أَئِنْ تَحينُ فِيكِ وَفَاتي

فَيَا فَخْرَ نَفْسي بهَذي الوَفَاةْ.
منقول

[المحارب العتيق]

كاتب النص الأصلي : Black Orchid

( لولا علبه مكي ولا الاحوال بتبكي)والتفسير عندكم .

يلي بتطلعو السمرا . بتحطو حق بودرة وحمرة

[a7la lolo]

ههههههههههههههههههه .. يبعتلك الهنا يا هدوء .. حسيت حالي عاقدة مع ستي او مع عماتي بالشام .. وعم يحكو عن شي حدا ..
لك آآآآآآآآآآخ ماكان يمرق هالشهر بقا ..

[jovia]

وينكون رفئاتي الغليزين اشتئتلكون يا غلااااااااااااازززززز

[هدوء البحر]

كاتب النص الأصلي : jovia

وينكون رفئاتي الغليزين اشتئتلكون يا غلااااااااااااازززززز

تتحورئي الهي

[suzaan]

هون كيفك ياقمر ؟؟

ونحن بالأكتر

[هدوء البحر]

منكمل الجزء التاني من المصطلحات

خسكار

كمية من العمل المقرر ليوم واحد أو بضاعة معدّة للبيع ضمن اليوم


· من دهنو سئّيلو
تعبير يفيد الكحتنة والجرب وصرف النقود على الشخص أو الشيء بعد أخذها منه دون التكلف عليه بقرش

· ما صرلو بالأصر إلا مبارح العصر
يعني أنه جديد على أمر ما وغرّ فيه وأحياناً تكون إشارة للنفاريش أي باللاتينية nouveau riche

· ولاد آدو
يعني المشكلجية والعونطجية وولادين الحرام (يالطيف الله يبعدون عنا وعنكن أولو آمين)


· سبرتاكو
القطعة الصغيرة التي تكون مسمّرة في كعب الكندرة النسائية من الأسفل (وبتطلع عند أول لبسة بالكنادر الوطنية)


· قراضة
يعني نوع عاشر، شي تعبان بنوب (متل الكنادر المذكورة آنفاً والمسمّاة عند البعض: بضاعة لا حول)


· متمسح
يعني واحد متبلد المشاعر والأحاسيس متل التمساح بفرد شكل (وبمعنى آخر: لا الحر بحرّو ولا البرد بضرّو)


· كل ما حدو بيت السلطان خيلهن بتمد الخنفسة رجلها

مثل شعبي يقال كناية لمن يحب الاشتراك دوماً في أمور لا ناقة له فيها ولا جمل، ولا فهم ولا علم له بها وهو يعتقد أن له ما للآخرين


· اندفس
أي: نام أحسنلك، انقبر


· تكورت
متل تدولق، فعل يفيد تناول الطعام، وتزهرم مثله أيضاً


· من بيت شقاع لبيت رقاع (وهي تقرأ كالعادة: من بيت شآع لبيت رآع

تعبير نسواني عن المرأة الشطاطة النطاطة التي تنتقل من بيت لآخر ولو بالشحاطة


· عم يحاسب القاضي
أي يقوم بقضاء حاجته في بيت الخلاء


·
· يلي ببالك منو

كناية عن أمر يتعذّر ذكره لأسباب عديدة


· انطمز

أي انزعج وبوزم وقلب خلقتو وما عاد يتحاكا


· مطهمز

أي مطأطأ أو مطأطئ الرأس

· شامم ريحه كرهه

تطلق على المتكبر يلي رافع مخاره وقالب وجهه


· آكل كم بحالو

انظر تفسير شامم ريحه كرهه


· خود منّي
إنهاء للنقاش ودعوة الطرف الآخر للثقة بما يقول المتكلم دون نقاش.


· دواليب الجنة

مصطلح جديد للفلافل ومحاولة لرفع شأن هذه الأكلة الشعبية


· عليّي ما عليّي

قسم يريد به المتكلم أن يحلف بالطلاق ولكن سمع أنو هذا لا يجوز فبطلها واستعاض عنها بهذه العبارة.


· سم الكرّاتي
تقال عندما يكثر الطرف الآخر من الأكل.

· فجعان
أي الحالوش أو الشره


· مكلولك
أي اللألوء الذي يحب تمسيح الجوخ.


· كعي في

يعني كثير ألح وأصر عليه ولكن الطرف الآخر يرفض


· طرفنده

تعبير مؤنث يدل على أنه شيء جميل جداً ومميز

[المحارب العتيق]

كاتب النص الأصلي : هدوء البحر

· اندفس
أي: نام أحسنلك، انقبر

وأنا هاد رأيي

[jovia]

شو من شان المنتدى كلو اندفس هالكم يوم

[هدوء البحر]

كاتب النص الأصلي : jovia

شو من شان المنتدى كلو اندفس هالكم يوم

شو من شان انو كيفك

[هدوء البحر]

صباح الخير يا شام

[هدوء البحر]

عتيق بدال ما تلقي خطب


ائلي كيف الشام هلئ