مقلاية أخوية (6) بحلتها الجديدة

[yass]

طيّب ياس أنت شاوي؟! ... تصوّر يعني أنّو مثلاً يعني يطلع المشرف الإداري عالأخويّة شاوي؟!

حاكين بهالأمر بكتير مواضيع من زمان...

أي أنا شاوي, و ابن شاوي.. و الشوايا جزء من الشعب السوري ذو ثقافة و تراث بامكان أن يحسده عليها أي جزء آخر..

يعني باختصار, شاوي و أفتخر, و شاوي و بالخط العريض

[قرصان الأدرياتيك]

zen

كيفك قرصان
يالله حابب اقليك شوي وتطلع الريحة الشهية مشان الصايميين يشتهوا المقالي

أهلين بالزينين... هلا زين.
بتعرف أنّو رمضان كان فاتحة خير عليّ... ريّحني شوي مالقلي وخلا العالم ملبوكة ببطنا وحالا!

1- مين أكذب واحد بأخوية (بصراااحة )مع ذكر أسماء

أنت ليش هيك أسئلتك؟! ناويلي على الشرّ؟! يا زلمة والله أنا هيك هيك طالعة عليّ سمعة عاطلة، فخلّينا نعدّل شوي وبلا فضايح. يا سيدنا وعن جد بصراحة ما ألي كتير لميّز الكذّاب مالصادق بس كون أكيد إذا كان صديق ما رح قولا عالعلن... رح قولا بيني وبينو!

2 - شو بيعنيللك شهر رمضان بما انو نحنا فيه ؟

يعني بدال ما يكون شهر فضيل وشهر صوم وصلاة صاير مظاهر وأكل وعزايم ويلعن دين الفقير!!!

3- انت مع انو الناس الغير مسلمين انو يحترموا المسلمين الصائمين برمضان رغم انو بأشهر الصوم عند المسيحيين بضل سياخ الشاورما معلقة طول النهار؟

شوف أنا رأيي بهالموضوع بيختلف عن التنين... أنا بحب الله وبحب البشر بس بفضل مجتمع تسود فيه العلمانيّة. يللي بدو يصوم أهلا وسهلا بس أنّو عطّل البلد كرمال الصايمين (مسيحيّين أو إسلام) فما بفضّل هالشي.

4- كيف بتتخيل بلدك بعد 10 سنين ؟

مو كتير لقدام ولا كتير لورا... بس بظن في شويّة أمل أنّو تتحسّن بعض الأشيا!!!

5- عندك امل بأنو التغيير للأحسن جاية واذا اي شو هني الأسباب اللي مخلينك تلمح هالضو؟

الأسباب هو المسيرة... يعني برغم كل فساد ونهب و... في شي أحسن من شي! ولو هالتغيير طفيف كتير وما كتير ملاحظ مع تسارع التقدّم بغير أماكن!!!

6- شو رأيك بشعار سيادة حريي إستئلال

مجرّد شعار مو أكتر... متلو متل كل شعارات البعث: حبر على ورق.

ودمتم ودامت اخوية حرة مستقلة

تسلم يا طيّب... وعاشت أمّتنا أبيّة فتيّة .

[قرصان الأدرياتيك]

marwa hanna
مرحبا قرصان استويت ولا بعد؟ أهلين مروة أهلين بالحلو والأمّور... يعني لسّا في كام شقفة بدون تحميص!

بدي رأيك بهي الأشيا
ختان الأناث: عادة قديمة تعود لمظاهر دينيّة وطقسيّة غبيّة! فيها ظلم واعتداء وحرمان! بتمنّى تبطّل نهائيّاً.

تجارة الرقيق الابيض: بكره استغلال الإنسان بكل أشكالو!

رجال الدين: هنّ نظرياً دعاة سلام وحب، بس عملياً صايرين دعاة كره وحرب وقتال وعنصريّة... إلخ.

الانبياء، مع شمل سعدو والنبي كيكي... : الأنبياء عموماً حاولو يوصلو رسالة معيّنة فهموها هنّ انطلاقاً من اختبار شخصي، بس أخطأوا لما جعلو اختبارن الشخصيّ اختبار عامّ!!!

الأيجو... لازم يتملكنا ولا نتملكو ولأي حد لازم يسيطر علينا؟ أنت بتقصدي الـ "أنا" باللاتينيّة؟! إذا إي... فممكن توضحي السؤال أكتر!

وألف وردة لبنت الأراضي المقدّسة.

[قرصان الأدرياتيك]

yass

حاكين بهالأمر بكتير مواضيع من زمان...
إي تمام... بس شو رأيك تجي تعملي كفين؟! ... أنا ما كنت بهداك الزّمان!!!

أي أنا شاوي, و ابن شاوي.. و الشوايا جزء من الشعب السوري ذو ثقافة و تراث بامكان أن يحسده عليها أي جزء آخر
محدا قال غير هيك! هلا أنا ما توقّعتك تجاوب... لأن على ما أعتقد أنّو معروف بالجزيرة بكل بساطة أنّو أهل الرقّة هنّ عرب والمصطلح المتداول هو كلمة "شاوي" فسؤالي كلو على بعضو كان على سبيل الدّعابة وإذا اعتقدت أنّو في أي نوع من المسخرة أو الإهانة فأنا بعتذر!!! بيجوز السمايليات يللي حطيتن ما كانو كافيين... أو بيجوز المسألة عندك عانيت منها في السابق وما بتحب حدا يسأل هيك أشيا... أنا آسف خيّي إذا صار في سوء فهم!

يعني باختصار, شاوي و أفتخر, و شاوي و بالخط العريض
ونحن كمان بنفخر فيك وفين .

[MaTyA]

لك آخ بس.. رح حرّم اوعد ما اسأل .. حظك حلو عطيتك كلمة اني ما اسألك زيادة ورح كون عند كلمتي

علمًا انو عبالي اسأل وزيد النار تحت المقلاية

بس .. حظك .. حلو ..

+

انك فدت حالك بـ مدحك الي..لانو بسبب كترة مديحك قلت حرام اتعبك بزيادة اسئلة

فـ خدها منية

[was616im]

يا جماعة احترق رب الشب من كتر الاسئلة حرام عليكن حلو عنو بقى

خليه يجاوب ع سؤال رأيو بالاعضاء و حاجتو العمى والله زعلت عليه

[MaTyA]

كاتب النص الأصلي : was616im

يا جماعة احترق رب الشب من كتر الاسئلة حرام عليكن حلو عنو بقى

خليه يجاوب ع سؤال رأيو بالاعضاء و حاجتو العمى والله زعلت عليه

يا ابن العم.. ما عم بعرفك حنون اولاً

سانيان ما صرلو 3 ايام... يعني بيحقلنا نسألو

[*Marwa*]

كاتب النص الأصلي : was616im

يا جماعة احترق رب الشب من كتر الاسئلة حرام عليكن حلو عنو بقى

خليه يجاوب ع سؤال رأيو بالاعضاء و حاجتو العمى والله زعلت عليه

اي وانا عم فكر متلـك

انو بالبداية ما كنت استرجي اسألو ..اسا حتى لو استرجيت ما رح اسأل..حرام اللي فيه مكفيه

انو اووووووخ يا ميتوتشا شو كنت مرتاحة بمقلايتي

[yass]

إي تمام... بس شو رأيك تجي تعملي كفين؟! ... أنا ما كنت بهداك الزّمان!!!

له يا زلمة.. و الله ما قصدي هيك! فقط كنت عم خبّر انو محكي كتير بالموضوع.. لا بعملك كفين و بعملك شي..

محدا قال غير هيك! هلا أنا ما توقّعتك تجاوب... لأن على ما أعتقد أنّو معروف بالجزيرة بكل بساطة أنّو أهل الرقّة هنّ عرب والمصطلح المتداول هو كلمة "شاوي" فسؤالي كلو على بعضو كان على سبيل الدّعابة وإذا اعتقدت أنّو في أي نوع من المسخرة أو الإهانة فأنا بعتذر!!! بيجوز السمايليات يللي حطيتن ما كانو كافيين... أو بيجوز المسألة عندك عانيت منها في السابق وما بتحب حدا يسأل هيك أشيا... أنا آسف خيّي إذا صار في سوء فهم!

مجرد حكيت أنا من باب الايضاح فقط لا غير.. يمكن بنزعج لو بخجل من هالشي.. و الحمد لله ما بخجل, بل و أعتز بهالشي.. فمافي مشكلة بنوب



آسفين يعني

[hanny dagher]

كاتب النص الأصلي : قرصان الأدرياتيك

hanny dagher

عزيزي هاني...
اسمحلي أشرح الملابسات وفصّل بغضّ النّظر عن سؤالك يللي جوابو كلمة وحدة بس "لأ".
الانطباع الأوّل كتير مهمّ وخاصّة لرسم صورة معيّنة عن أي إنسان... هاد حال البشر! إذا بترجع لمشاركتك يللي جيت على سيرتا فكتير كانت جارحة في قسما الأوّل... يعني لو اكتفيت بالتعليق عالخطأ اللغوي اللي صار كل شي كان رح يكون مختلف!!! وهالحكي مع التأكيد أنّو ما كان في أي لقاء سابق. فأنّو أنا شخص ما بعرفو بفوت أحكي معو هيك أكيد رح ياخد عنّي انطباع يتعلّق بهالحكي... هاي كلّ الحكاية!!!
الانطباع بمزيد من التعامل يتغيّر... مثلاً ياس، كنت آخد عنّو انطباع معيّن وبعد احتكاك بسيط تغيّر هالانطباع كلياً بدون ما أرجع لأتأكد من هالشي إذا كان صحيح أو لأ.
العقلانيّة والمنطق أساس كل شي بس الواقع والمشاعر ألها دور كبير بحياة الإنسان.
بتمنّى تفهم ليش كتبت هيك مو أكتر... كان فيّ بكل بساطة حطّ جنب اسمك كلمة "ما بعرفو" وخلصنا!
تحيّتي .

انا ما سالت سؤالي لانو انزعجت من حكيك
بس أمر خاطئ انك تحكم على شخص من رد واحد او من حركة وحدة بيعملها
ماني عم لومك على شي انا وقعت بهالخطأ من قبل وفي كتير عالم كانت بتستاهل مني كل الاحترام وحكمت عليها من شغلة وحدة وخسرتهن كاصدقاء عزيزين

مو مشكلة القصة كلياتها ما بيناتنا

[قرصان الأدرياتيك]

كاتب النص الأصلي : matya

لك آخ بس.. رح حرّم اوعد ما اسأل .. حظك حلو عطيتك كلمة اني ما اسألك زيادة ورح كون عند كلمتي علمًا انو عبالي اسأل وزيد النار تحت المقلاية
بس .. حظك .. حلو .. + انك فدت حالك بـ مدحك الي..لانو بسبب كترة مديحك قلت حرام اتعبك بزيادة اسئلة
فـ خدها منية

طيّب والمطلوب؟! . منيّة ما اختلفنا بس كيف بدّي عوضك ياها؟!
ميرسي يا حلو... كرمال سخائك ورحمتك .

كاتب النص الأصلي : was616im

يا جماعة احترق رب الشب من كتر الاسئلة حرام عليكن حلو عنو بقى
خليه يجاوب ع سؤال رأيو بالاعضاء و حاجتو العمى والله زعلت عليه

هلا إذا ربّي احترق مو مشكلة... المهم أنا ما أحترق بس الهيئة ما رح تكون هيك!
عن جد بشكرك لرقّة قلبك عليّ ولسّاتني عم جاوب على سؤال ريمي تبع الأعضاء... بس شي بيطفّر. وإذا كل ما كتبت شي عن حدا رح يطلعلي متل هاني داغر فرح ضلني هون 30 يوم مو 3!!! من هيك رح يبقى للآخر.

كاتب النص الأصلي : *Marwa*

اي وانا عم فكر متلـك
انو بالبداية ما كنت استرجي اسألو ..اسا حتى لو استرجيت ما رح اسأل..حرام اللي فيه مكفيه
انو اووووووخ يا ميتوتشا شو كنت مرتاحة بمقلايتي

لك والله ماني بعبع! أنا استفسرت منّك يومتا عن شغلة بس وحبيت أستوضح القصّة مو أكتر!

كاتب النص الأصلي : yass

له يا زلمة.. و الله ما قصدي هيك! فقط كنت عم خبّر انو محكي كتير بالموضوع.. لا بعملك كفين و بعملك شي..
مجرد حكيت أنا من باب الايضاح فقط لا غير.. يمكن بنزعج لو بخجل من هالشي.. و الحمد لله ما بخجل, بل و أعتز بهالشي.. فمافي مشكلة بنوب
آسفين يعني

الله يسامحك... أكيد ما في مشكلة من جهتي وبعتذر مرّة تانية.

كاتب النص الأصلي : hanny dagher

انا ما سالت سؤالي لانو انزعجت من حكيك
بس أمر خاطئ انك تحكم على شخص من رد واحد او من حركة وحدة بيعملها
ماني عم لومك على شي انا وقعت بهالخطأ من قبل وفي كتير عالم كانت بتستاهل مني كل الاحترام وحكمت عليها من شغلة وحدة وخسرتهن كاصدقاء عزيزين
مو مشكلة القصة كلياتها ما بيناتنا

قبل كل شي أهلا وسهلا فيك هاني...
وبحب قلّك أنّو كلامَك هاد مو بمكانو ليش؟! لأن أنا ببساطة شديدة ما حكمت على هاني كشخص. حكمت عليه بردّو هداك. وشم سألتني إني أعطي نصيحة لكل من هؤلاء فأنا كتبت عنّك:
"إذا عم تحكي عن هاني داغر فأنا التقيت فيه مرّة وحدة بس وكان اللقاء شي بيهوّي! فات على موضوع بطريقة مزعجة جداً واستهزائيّة ولما رديت عليه ما جاوب. فنصيحتي أنّو إذا فتت عشي موضوع فيا فوت واحكي وناقش وكون قد هالشغلة فيا لا تفوت مالأوّل".
وإذا بتلاحظ كل حكيي كان عم يدور عن مشاركتك هونيك وبس!!! والنّصيحة يللي عطيتك ياها استندت بس على ردّك هداك! وأكيد هالشي ما بيعني (من جهتي على الأقل) إني حكمت عليك بسبب مشاركة وحدة.
بس إذا حبّيت، وكونك دخلت بنقاش حول المسألة، وكوني لسّاتني بالمقلاية، فرح ذكرك بردّك:

"طول عمرو تمسيح الجوخ وكلمات الضحك على اللحى بتسببلي ارتفاع ضغط و بتخلي الحوار يفقد المعنى تبعو (بعرف الجملة مانها صحيحة قواعديا بس هادا اخر همي لانو ما كتير بتهمني العربية الفصحى ) طبعا ما قريت كل الردود قريت لحد ما بلشت التحيات ورفع القبابيع (انتبهولي عالقبابيع انا جمعتها هيك قصدا )"

كنّا أنا واللامنتمي بنقاش حول موضوع كتبو وناقشنا اللغة والمضمون فالزلمة شكرني وأنا شكرتو... شو صار فيها يعني؟! ولا الغلطة يللي ارتكبتها أنا فتّقتلك جروحاتك؟! بربّك هاي دخلة تدخلا على موضوع؟! بتعرف يومتا كنت رايق ومطوّل بالي وما حبّيت ردّ وخاصّة إنّي كنت جديد... فأمّا تجي تكتب "تمسيح جوخ وضحك على اللحى... إلخ" فهاد بيدلّ على أنّو حضرتك انفعلت جداً لما شفت صديقين بيلاطفو بعض!!!
والأنكى أنّك زتّيت كلامك ومشيت... ردّيت عليك وحضرتك ما كلّفت خاطرك بمشاركة صغيرة أو كلمة عالماشي!!! فأنا ما زلت عند كلامي في ما يتعلّق بتوجيه نصيحة للأسماء اللي وردت: يا فوت وشارك باحترام وكمّل حوارك للآخر... يا أمّا بلاها من الأوّل!!!

وميت وردة .

[قرصان الأدرياتيك]

سلام...

الله يسامحك يا ريمي على هيك سؤال... صرلي يومين وما خلّصتو!!! (سؤال ريمي كان عن رأيي الشخصي بالقائمة المعتادة).

حابب قول كلمتين قبل ما عبّر عن رأيي بالأعضاء وكيف بشوفن من وجهة نظر شخصيّة قابلة للتبدّل لأنّا مرتبطة بمعرفة محدودة. هالسؤال رح يكون كتير صعب عليّ بحكم أنّو ما ألي بالقصر إلا مبارحة العصر، يعني غالبيّة هالأسماء ما احتكيت فين لا بنقاش ولا بشي آخر. وخاصّة الإداريين بيناتن يللي ما بيحضروا بالأخويّة (المشاركة بالمواضيع) إلا نادراً (عم أحكي عن فترة وجودي). وإذا حضروا فحضورن بيتمثّل بكلمتين تعليق أو تنبيه أو نقد لاذع أو تهديد... إلخ، وهالشي ما بيدلّ على مشاركة حقيقيّة. في إداريين حضورن فعال أكتر بكتير من الأعضاء بس هن نادرين وبتمنى البقيّة ينعدوا منن.
يللي ما بعرفو (كونن كتار) رح راجع ملفو وبعض مواضيعو ومشاركاتو وتعليقي رح يستند لهالشي، من هيك ما رح يكون دقيق تماماً (أنا عم أحكم هيك).

رح أعتمد على القائمة يللي طرحتها ساندرا بس رتّبتها بشكل أبجدي... وإذا نسيت حدا فالأحسن يضاف بشان تكون القائمة المرتّبة أبجدياً كاملة.

وبتمنّى من يللي نسيتو أنّو يعذرني لأنّي عم جاوب على سؤال وما عم أعطي رأيي بالكل.

وقبل ما بلّش بأكّد على أنّو شخصياً بحب الجميع وما عندي أي شي مع أي شخص... هي مجرّد اكتشافات وتعليقات لا أكثر، يعني قابلة للصحّ والغلط... وبكرّر أنّو أي رأي بالبشر قابل للتغيّر بمرور الزّمن والاحتكاك أكتر معن!

[قرصان الأدرياتيك]

اسبيرانزا: صديقة أدبيّة. مميّزة بالسّرد والقراءة والتعليق. عندا موهبة رح تتطوّر إذا اهتمّت بنفسها أكتر! بتمنّالها الخير والنجاح.

امرأة من ورق: ما بعرفا . كلمة ورق يللي جاية باسما وبتوقيعا بتدلّ على حساسيتا. حاولي تكوني أقسى مما أنتِ عليه.

اممي: ما بعرفو . بس عجبتني اهتماماتو وخاصّة الرّماية! من شلّة الظرفاء.

باشق مجروح: التقيت فيه قبل شوي بالمقلاية وأسئلتو جيدة نوعاً ما. بحيّي فيه دعوتو لليبيراليّة والفصل بين الدّين والدّولة. بتمنّى منّو يواصل هالنضال والله محيّيك.

بنفسجة: ما بعرفا . بس إذا هيّ طبيبة الأسنان يللي بتحب بشار الأسد فلازم تخلي الحق يسود على العلاقة.

راديا: ما بعرفو – ما بعرفا . مو مبيّن جنسو - جنسا بالملفّ لأنّو "غير ذلك". بيجوز تكون - يكون "غير ذلك"!

سرسورة: ما بعرفا . صورتا وتوقيعا بتدلّ على إيمانا. هالدكتورة بتحب الكتب كتير وملبوكة فين كمان.

سوا ربينا: ما بعرفو كتير . بالمقلاية التقيت فيه بسبب فيفا. الشب ظريف.

شوط يا قمر: ما بعرفو . مالأشخاص يللي كنت أتساءل على طول عن اسمو. اهتماماتو غريبة... بيجوز من ورا شغلو!!!

صياد الطيور: ما بعرفو . بس الله يسامح جورج وسّوف!

طفوله: ما بعرفا . ملفّا كلّو مصفّر... بس الحلو ذاكرة أنها صبيّة.

ظل جيفار:ا ما بعرفو . ثوريّ وبيحب يدافع عن الظّلم وعندو نزعة اشتراكيّة خفيّة.

قرصان الأدرياتيك: ما بعرفو... قصدي... هاد أنا إي والله صحي! هلا الزلمة حباب بس أحياناً بشوف فيه تكبّر وعناد وانفعال. عصبي. لسانو شوي طويل وإذا علق مع حدا بيطالع الخمير والفطير. بيشارك مين ما كان ما بتفرق معو إذا كان قريب ولا غريب. اللي بحبّو فيه أنّو ما بيكره بعمرو وما بيضلّ قلبو شاعل أكتر من كام ساعة.

القلبالدافيء: ما بعرفو . بس ألي عندو سؤال: أنّو أنت مسجّل بالمنتدى بس لتضيّع وقت؟! اطلع شوي من قسم التسالي وشارك الشباب شوي هون شوي هونيك إذا بدّك طبعاً!

كهربجي: ما بعرفو . وما بعرف شو بدي قول.

اللامنتمي: هون حطنا الجمّال! صديق عزيز. شو بدّي أحكي عن هالزلمة!!! غير أنّو مبدع عندو موهبة الكلمة حقيقةً ولمّا يكتب شي كأنّو عم يغرف من البحر. مميّز بقسم الأدب والفلسفة. حسّاس وحزين والليل عندو ألو مكان كبير. بحب فيه السّلام يللي عم يزرعو بالمنتدى. هادئ دائماً. يللي ما بيعجبني فيه أنّو يغرق أحياناً بالأحلام ويحاول يفرض الفكر عالواقع وهالشي مستحيل!!!

ليندا: ما بعرفا . بس شفت بملفّا صفة "منسق" اكتأبت وانصدمت عاطفياً ومعنوياً! بتركّز كتير عالظاهر من الشّعر.

مايا *:ما بعرفا . شلّتها كلن إداريين وهالشي دليل على قلّة اندماج بمجتمع الأعضاء.

مايسترو: ما بعرفو . الوداع ألو قيمة بحياتو وتأثير عالحاضر (الماضي). فعّال ومشاركاتو تدور حول مواضيع اجتماعيّة. متخاصم مع القناعة ويريد كل شي بسرعة.

محمد ابراهيم: ما بعرفو . شلتو كبيرة. محاور. عندو جانب إنساني حلو عم يتأثر بالدّين سلباً غالب الأحيان.

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

: إداري. ما شفتو بالمنتدى بآخر فترة. بيحب الأدب والفن. كلامو بدون تقشير.

وائل76: ما بعرفو . الزّلمة باين عليه من جماعة حماس. حلو الدّفاع عن شي بنحبّو بس المو حلو أنّو يوصّل لتقسيم البشر إلى طبقات ومنازل. اللي زعّلني هو صورة ملفّو... كتير بزعل لمّا بشوف استغلال الطّفولة واستخدامن لإيديولوجيّات الدّمار.

وشم الجمال: بعرفا. بشلّة حبايبا 25 هي مو مضافة عندهون!!! كنت أتّبع كتاباتا ولاحظت شي معيّن. علّقت عليه بالمقلاية (الله لا يوقّع حدا فيا) فسألتني عنّو وبيجوز عبّر هلا أكتر من قبل. لمّا الواحد يكتب شي فهو عم يقدّم شي عندو والحلو بأي مكان مشاركة التانيين بما عندن. يعني أنا بفوت بعبّر استناداً للي عندي عن الشي اللي عند الآخر. بس وشم غالباً ما تفوت تعبّر عن الشي اللي عندا استناداً للي عندا، وهالشي بيدلّ على قلّة اكتراث بالآخر.

يمان: إذا تبع الطابة قصدي كرة القدم فبيستاهل كل حب. عادل وحبّاب.


ملاحظة: أنا اليوم مسافر ولسّاتني ما عملت شي والبركة فيكن . فاسمحولي كفّي القائمة لاحقاً وبإذن الله رح كفّيها بعد ما نام كام ساعة. وإذا ما لحّقت رح تضلّ للمسا وهيك بختم مقلايتي وبرميلكن واحد شهم ومتطوّع!!! سامحونا هلا .

[hanny dagher]

كاتب النص الأصلي : قرصان الأدرياتيك

قبل كل شي أهلا وسهلا فيك هاني...
وبحب قلّك أنّو كلامَك هاد مو بمكانو ليش؟! لأن أنا ببساطة شديدة ما حكمت على هاني كشخص. حكمت عليه بردّو هداك. وشم سألتني إني أعطي نصيحة لكل من هؤلاء فأنا كتبت عنّك:
"إذا عم تحكي عن هاني داغر فأنا التقيت فيه مرّة وحدة بس وكان اللقاء شي بيهوّي! فات على موضوع بطريقة مزعجة جداً واستهزائيّة ولما رديت عليه ما جاوب. فنصيحتي أنّو إذا فتت عشي موضوع فيا فوت واحكي وناقش وكون قد هالشغلة فيا لا تفوت مالأوّل".
وإذا بتلاحظ كل حكيي كان عم يدور عن مشاركتك هونيك وبس!!! والنّصيحة يللي عطيتك ياها استندت بس على ردّك هداك! وأكيد هالشي ما بيعني (من جهتي على الأقل) إني حكمت عليك بسبب مشاركة وحدة.
بس إذا حبّيت، وكونك دخلت بنقاش حول المسألة، وكوني لسّاتني بالمقلاية، فرح ذكرك بردّك:

كنّا أنا واللامنتمي بنقاش حول موضوع كتبو وناقشنا اللغة والمضمون فالزلمة شكرني وأنا شكرتو... شو صار فيها يعني؟! ولا الغلطة يللي ارتكبتها أنا فتّقتلك جروحاتك؟! بربّك هاي دخلة تدخلا على موضوع؟! بتعرف يومتا كنت رايق ومطوّل بالي وما حبّيت ردّ وخاصّة إنّي كنت جديد... فأمّا تجي تكتب "تمسيح جوخ وضحك على اللحى... إلخ" فهاد بيدلّ على أنّو حضرتك انفعلت جداً لما شفت صديقين بيلاطفو بعض!!!
والأنكى أنّك زتّيت كلامك ومشيت... ردّيت عليك وحضرتك ما كلّفت خاطرك بمشاركة صغيرة أو كلمة عالماشي!!! فأنا ما زلت عند كلامي في ما يتعلّق بتوجيه نصيحة للأسماء اللي وردت: يا فوت وشارك باحترام وكمّل حوارك للآخر... يا أمّا بلاها من الأوّل!!!

وميت وردة .

قرصان
اول الشي الشكر على جودة الحوار مانو شي غلط ابدا كل واحد بيعملها وقت بيشوف الحوار بيعجبو يعني الشي اللي صار بينك وبين اللا منتمي ما كان شي غلط بس صار شي زاد عن حدو

لي معك لقاء آخر...
دمتَ لنا صديقاً

سَـأرفعُ لكَ قبعتي وَ قبعة َ أبي الذي يُحييكَ مَعي عَلى هذا النقد

قبّعتي هي المرفوعة لما تكتب... ليس لذلك فقط بل من أجلِك أيضاً.

بكْ .. سَيَكُونُ صَبَاحاً جَدِيداً لَا تَفُوحُ مِنْهُ إلا رَائِحَة ُ الياسَمين وَ الفل وَ النرجس

لكَ مِني وِدٌ يَليقُ بما يَعبقُ بهِ فِكرُك

أنتَ تقتلني بإطرائك
وفقري غير المحدود يمقت المديح والثّناء
لا لشيءٍ إلا لأني لستُ أهلاً له.
أشكر لطفَ كلماتك فارحمني!

وما الياسمين والفلّ والنرجس إلا وروداً في حديقةِ عطرِك الواسعة...

يعني هيك صارت ردودكن معدها داخلة بالنقاش صارت غزل ببعضكن وهادا الشي اللي زعجني انو الموضوع كان حلو وانتو طلعتو برات الموضوع بس على تحيات لبعضكن
بعتقد انو كلمة شكرا على نضافة الحوار كانت بتكفي عن كل هالكلام الحلو هاد مهيك ؟
يعني لو اسعتكن عم تتناقشو بنص الموضوع كنت دخلت وناقشت بالموضوع بس انقلب الموضوع حصة نحو واعراب ورفع قبعات وتوزيع ورود


اللي صار انو انا رديت بهالشغلة

طول عمرو تمسيح الجوخ وكلمات الضحك على اللحى بتسببلي ارتفاع ضغط و بتخلي الحوار يفقد المعنى تبعو (بعرف الجملة مانها صحيحة قواعديا بس هادا اخر همي لانو ما كتير بتهمني العربية الفصحى )

طبعا ما قريت كل الردود قريت لحد ما بلشت التحيات ورفع القبابيع (انتبهولي عالقبابيع انا جمعتها هيك قصدا )

المهم قد يكون الموضوع اسعتو مهم لبعض العالم لهيك ما رح طول كتير بالحكي وما رح انزع الموضوع بس حبيت علق على هالجملة

طول عمرو تمسيح الجوخ وكلمات الضحك على اللحى بتسببلي ارتفاع ضغط و بتخلي الحوار يفقد المعنى تبعو (بعرف الجملة مانها صحيحة قواعديا بس هادا اخر همي لانو ما كتير بتهمني العربية الفصحى )

طبعا ما قريت كل الردود قريت لحد ما بلشت التحيات ورفع القبابيع (انتبهولي عالقبابيع انا جمعتها هيك قصدا )

المهم قد يكون الموضوع اسعتو مهم لبعض العالم لهيك ما رح طول كتير بالحكي وما رح انزع الموضوع بس حبيت علق على هالجملة

اجيت انتي رديت عليي

مساءُ الخير...
ومرحباً في منتدى الأخويّة من جديد بعد غيابٍ دام نهاراً بحالِه!

هلأ ما بعرف اذا انتي غلطان باعراب كلمة مراهق وقايل انها اسم كان وهيي خبر كان

عزيزي هاني داغر
أخطأتُ يا عزيزي بين الاسمِ والخبر وأعتذر منك ومن البقيّة... فبدل أن أكتبَ "خبر كان منصوب" وضعتُ "اسمَ... "!
أنتَ تعرفُ ثقلَ الليلِ على روّاده... ولا يُسعفنا التركيزُ أحياناً فاعذرني، والكريمُ مَن عَذّرْْ.
هذا والمُنتدى لا يسمح بتعديل المُشاركات بعد مضيّ زمنٍ يسير...

او انو هيي فعلا... اسم كان وانتي حكمت عليها بالنصب مع انو اسم كان حكمه الرفع دائما

كلمة "مراهق" هنا جاءت "خبر" كان فتُنصب.

عفوا ما حطيت تنوين النصب لانو ما بعرف محلو عالكيبورد

في الكيبورد العربيّة والإنكليزيّة يقع تنوينُ النّصبِ ( ً ) بالدّمج بين shift وحرف الصّاد أو الـ W، وتنوينُ الرّفعِ ( ٌ ) بالدّمج بين shift وحرف القاف أو الـ R، وتنوينُ الجرِّ ( ٍ ) بدمجها مع حرف السين أو الـ S.

طول عمرو تمسيح الجوخ وكلمات الضحك على اللحى بتسببلي ارتفاع ضغط و بتخلي الحوار يفقد المعنى تبعو

وأنا أيضاً مثلك أمقتُ المديح والإطراء وأحاول تجنّب الثّناء، ولكن لا يُمكن للمرء أن يفرضَ على الآخرين أسلوباً معيّناً من التعبير... ولا مانع أيضاً أن يتخلّل الحوارَ ثناءٌ وتشجيع، فمن شأنهما أن يشجّعا الكاتب على مواصلة الكتابة والإبداع.

شكراً على ملاحظتك القيّمة وإلى لقاءٍ أرجوه قريباً

انتي عبرت عن رأيك انو بتحب الثناء والتشجيع وانا عبرت عن رايي انو ما بحب هالطريقة بالحكي

وانتهى الحوار انا ما عرفت انتي شو بدك ياني ارجع حاور لانو الموضوع باعتقادي انتهى عند هالنقطة


على كلن برجع بقول هالشغلة مو بيناتنا وما بيتوقف عندها
شكرا الك عالنصيحة (ممكن يكون صحيح انو ما بكفي حواري ) بحاول اشتغل عليها


ملاحظة: سوري عن الخروج عن الموضوع بس كان لازم توضيح هالنقطة

[وشم الجمال]

كاتب النص الأصلي : قرصان الأدرياتيك

وشم الجمال: بعرفا. بشلّة حبايبا 25 هي مو مضافة عندهون!!! كنت أتّبع كتاباتا ولاحظت شي معيّن. علّقت عليه بالمقلاية (الله لا يوقّع حدا فيا) فسألتني عنّو وبيجوز عبّر هلا أكتر من قبل. لمّا الواحد يكتب شي فهو عم يقدّم شي عندو والحلو بأي مكان مشاركة التانيين بما عندن. يعني أنا بفوت بعبّر استناداً للي عندي عن الشي اللي عند الآخر. بس وشم غالباً ما تفوت تعبّر عن الشي اللي عندا استناداً للي عندا، وهالشي بيدلّ على قلّة اكتراث بالآخر.
.

اول شي بالنسبة لشلة حبايبي فيعني ما بعرف شو النقطة يللي بتطرحها ...اي 25 بحبن ومو ضايفيني يعني شو فيها ووين نقطة النقاش ما بعرف!!!ورح اعمل اخفاء الهن كمان

بالنسبة لكتاباتي فانت قلت كتاباتها بمعنى انو هاد الشي يللي انا بحس فيه يللي انا عايشاه يللي انا بحلم فيها فهاد بحد ذاتو بيعني انو انا عم احكي عن حالي والسبب كتير بسيط اني ما بكتب كرمال كون كاتبة حاليا ولكن بكتب فشة خلق مو اكتر,,,,انا معك حلو كتير نشارك الاخرين باللي عندن بس انا حسب معرفتي بحالي ومعرفة الكل باستثناءك الي بيعرفوا اني بشارك الاخر كلشي عندو رأي وهم واسلوب فيعني لهلق مو قادرة افهم من وين انت استوحيت هالشي يللي عم تذكرو....

واذا قصدك بالاراء بشكل عام شي طبيعي عبر عن قناعاتي بغض النظر عن قناعات الجهة المقابلة فيعني مو حلوة اني اعتمادا على المطلوب اني احكيه احكي كتير حلو نعبر عن زواتنا بدون بهرجة حسب اعتقادي,,,,

وانا هلق عندي عدم اكتراث بالاخر!!!!ما بعرف شو قلك بس والله ظالمني اكتر ما فيك تتخيل...واذا اي حدا عندو هالرأي فيي بتمنى يحكي بس ما بعرف ما بتوقع

طبعا يا قرصان هاد رأيك يللي بحترمو وما فيني قلك غير شكرا عليه ....بس هالمرة نقدك مو بمحلو

[قرصان الأدرياتيك]

كاتب النص الأصلي : hanny dagher

قرصان
اول الشي الشكر على جودة الحوار مانو شي غلط ابدا كل واحد بيعملها وقت بيشوف الحوار بيعجبو يعني الشي اللي صار بينك وبين اللا منتمي ما كان شي غلط بس صار شي زاد عن حدو
يعني هيك صارت ردودكن معدها داخلة بالنقاش صارت غزل ببعضكن وهادا الشي اللي زعجني انو الموضوع كان حلو وانتو طلعتو برات الموضوع بس على تحيات لبعضكن
بعتقد انو كلمة شكرا على نضافة الحوار كانت بتكفي عن كل هالكلام الحلو هاد مهيك ؟
يعني لو اسعتكن عم تتناقشو بنص الموضوع كنت دخلت وناقشت بالموضوع بس انقلب الموضوع حصة نحو واعراب ورفع قبعات وتوزيع ورود
انتي عبرت عن رأيك انو بتحب الثناء والتشجيع وانا عبرت عن رايي انو ما بحب هالطريقة بالحكي
وانتهى الحوار انا ما عرفت انتي شو بدك ياني ارجع حاور لانو الموضوع باعتقادي انتهى عند هالنقطة
على كلن برجع بقول هالشغلة مو بيناتنا وما بيتوقف عندها
شكرا الك عالنصيحة (ممكن يكون صحيح انو ما بكفي حواري ) بحاول اشتغل عليها
ملاحظة: سوري عن الخروج عن الموضوع بس كان لازم توضيح هالنقطة

صديقي هاني...
ما أحلى شدّ الشّعر في المشاجرات... أكتبُ الآن بالفصحى ولا أعرفُ لماذا، فقد استيقظتُ قبل قليل وبقي لي أربع ساعات على السّفر وعليّ القيام بمئة أمرٍ وأمر!

اللامنتمي أحبّني وأحببتُه والثّناء الذي زادَ عن حدّه، ربّما، كان بسبب هذا الذي جمعَنا. حتّى أنّه أنشأ موضوعاً خاصّاً فيّ، فماذا تقول لصديقٍ يُحبّك؟! لم أستطع منعَ كلامِه يا أخي لأنَّ هذا من قلّة الذّوق!!!

نحنُ ناقشنا في الموضوع وغمرناه بتعابير المديح والإطراء، أنتَ على حقّ، فلربّما كانَ علينا الاكتفاء بكلمة أو كلمتين، لكنّك أحياناً لا تستطيع أن تمنع ما في قلبِك تجاه الآخرين، فإمّا تقولُه، وإمّا تكتبُه... هذا هو التّواصل الذي ينفجرُ أحياناً بسيل من الكلامِ المعسول!!!

إذا لاحظتَ في ردّي قلتُ بوضوح: أنا مثلك أمقتُ الثّناءَ... ولم أقلْ عكسَ ذلك! فلا اختلاف حول هذا الأمر!!!

ما لم يعجبني هو الأسلوب الذي عبّرتَ فيه عن رأيك لا أكثر!

على كلّ حال، وكما قلتَ، ما حدث ليس بشيء ولن نتوقّف عندَ محطّةٍ عابرة.

لك منّي المحبّة والتقدير .

كاتب النص الأصلي : وشم الجمال

اول شي بالنسبة لشلة حبايبي فيعني ما بعرف شو النقطة يللي بتطرحها ...اي 25 بحبن ومو ضايفيني يعني شو فيها ووين نقطة النقاش ما بعرف!!!ورح اعمل اخفاء الهن كمان
بالنسبة لكتاباتي فانت قلت كتاباتها بمعنى انو هاد الشي يللي انا بحس فيه يللي انا عايشاه يللي انا بحلم فيها فهاد بحد ذاتو بيعني انو انا عم احكي عن حالي والسبب كتير بسيط اني ما بكتب كرمال كون كاتبة حاليا ولكن بكتب فشة خلق مو اكتر,,,,انا معك حلو كتير نشارك الاخرين باللي عندن بس انا حسب معرفتي بحالي ومعرفة الكل باستثناءك الي بيعرفوا اني بشارك الاخر كلشي عندو رأي وهم واسلوب فيعني لهلق مو قادرة افهم من وين انت استوحيت هالشي يللي عم تذكرو....
واذا قصدك بالاراء بشكل عام شي طبيعي عبر عن قناعاتي بغض النظر عن قناعات الجهة المقابلة فيعني مو حلوة اني اعتمادا على المطلوب اني احكيه احكي كتير حلو نعبر عن زواتنا بدون بهرجة حسب اعتقادي,,,,
وانا هلق عندي عدم اكتراث بالاخر!!!!ما بعرف شو قلك بس والله ظالمني اكتر ما فيك تتخيل...واذا اي حدا عندو هالرأي فيي بتمنى يحكي بس ما بعرف ما بتوقع
طبعا يا قرصان هاد رأيك يللي بحترمو وما فيني قلك غير شكرا عليه ....بس هالمرة نقدك مو بمحلو

يا حبيبتي يا وشّوم أنا قلت أنّو هو مجرّد رأي قابل للصح وللغلط... مجرّد رؤية لا أكثر!

بس حب قول شغلة وحدة مو أكتر أنّو حضرتنا قلنا "قلّة اكتراث" مو "عدم اكتراث" وفي فرق كبير بين التنين. يعني هالشي بيُلاحظ عندك أحياناً مو دائماً!!!

وهالاكتراث يا ستّي الفاضلة هو بالكتابة والمشاركة لا أكثر. فما فيّ أطبعك بهيك صفة وأنا ما بعرفك تماماً.

وأنا بحبّك متل ما أنت: اكتراث مو اكتراث ما بيهمّ! المحبّة ما بتبحث عن كماليّات... تبحث عن بشر!

وهاي بوسة رضى... قصدي وردة رضى . .



ملاحظة: عندي رجاء خاصّ وبخجل قووووووول... يا ريت ما تضيفو شي عالتعليقات يللي رح تنزل بس كرمال الوقت! اليوم لازم خلّص مقلايتي وما عاد عندي وقت وقد أبليتُ بلاءً حسناً وأتممتُ شوطي . مشكلتي هي أنّو وقتي رح يروح بالسّفر فاعذروني...

إذا في نقص و إضافة فمن هلا كرمال المسا كفّي كل شي... بس بعدين رح يكون كتير صعب!

للجميع منّي التحيّة والحب .

[مشاعر]

مرحبا قرصان
يا قرصان أخبرني بما هو آت
1- ما هو أجمل بحر رأته عيناك؟
2- ما هو أصعب شيء في الغربة؟
3- تنوع دراساتك العلمية اخترتها عن حب للعلم أم لرؤية مستقبلية تخدم عملك؟
4- أيهما أصعب الابحار في البحر أم الابحار في أعماق النفس الإنسانية؟

[وشم الجمال]

يسعدو خجلني انا.....قرصان سؤال صغير....عمركـ رح تتهور وتحط حالك بالمقلاية مرة تانية؟