السلطات السورية تقمع بوحشية احتفالات ليلة نوروز

[ayhamm26]

كاتب النص الأصلي : شب الكوبة

كلامك سليم ..لأنو مو من مصلحة الدولة السورية يللي صار ..يعني منطقيا أكيد الدولة ع مستوى القرار ما الها دخل بيللي صار..و خصوصا بهاد الوقت مما يطرح اشارات استفهام كتيرة
يعني كلنا ما لازم نعطي احكام لحتى تطلع نتائج التحقيقات ..و منو بيتبين مين يللي بلش ومين تصرف بعنف زيادة ... وبياخدو بحقو الاجراءات اللازمة
و سوريا الله حاميها

بالله عن انو تحقيقات عم تحكي مين قلك رح يصير في تحقيق مشان 3 اشخاص انقتلوا هيك اي ما نظام الممانعة والصمود والتصدي تبعنا قتل عشرات الالاف وعشرات الالاف التانيين اختفوا بالسجون ولا صار تحقيق ولا تعاقب حتى مجند بالمخابرات فعن انو تحقيق عم تحكي حضرتك؟؟؟؟

وفعلا الدولة عمستوى القرار ما دخلها ما بالفساد الدولة والسيد الرئيس ما الن علاقة الشعب هو الفاسد وبالمجازر والقتل الجماعي وقتل الناس بسجون المخابرات تحت التعذيب كمان ما الن علاقة الشعب هو لحالو عم ينتحر هي كلها مؤامرات صهيونية امبريالية للنيل من قلعة الصمود الاسدية الرهيبة

[ayhamm26]

صديقي فاوست للاسف انت متفائل كتير بموضوع الثورة الشعبية انا عندي قناعة دائمة انو النظام الاسدي ما زال يملك كرت بلانش من اسرائيل واميركا لانو وجودوا ضروري لامن اسرائيل مشان هيك لو صارت هيك ثورة فمصيرها لن يختلف عن حماة 1982 وكل شي رح تسمعو هو شي كم بيان استنكار من امريكا والاتحاد الاوربي

الثورة الشعبية لازمها ظروف دولية مواتية لانو عندك نظام لا يمكن يتراجع مهما قتل من الشعب مافيا همها الوحيد البقاء اطول فترة ممكنة بالحكم

[شب الكوبة]

كاتب النص الأصلي : yass

يا زلمة شو هالحكي... ممنوعين من كل شي يمس ثقافتهون... مضطهدين من جميع النواحي, أراضيهون تصادرت و انعطت لعرب الغمر... ما خلولهون شي.. حالتهون سيئة جدا... عم احكي عن المواطن الكردي العادي

و الأغلبية منهون ناس عاديين, عايشين بين هالعالم و مالهون علاقة لا بالسياسة و لا بشي, و الناس اللي عايشين بالجزيرة فيهون يأكدو ع كلامي... لذلك مافي مبرر لهالقمع الرهيب, يعني بحلب عيادات الدكاترة الأرمن قارماتها بالأرمني مكتوبة.. بينما اذا انكمش عند حدا كتاب بالكردي يتحاكم عند محكمة أمن الدولة.. ليش طيب؟

من شي 4 سنين بمهرجان بالرقة عملو متل أيام الرقص الشعبي بالجزيرة, و من بين دبكات الآشوريين و الجراكسة و كل ما هنالك في فرقة قدمت دبكة كردية.. أي انعفطو كلهون و انعفى مدير المركز الثقافي و صارت كومة مشاكل و نص موظفين مديرية الثقافة تحقق معهون... ع دبكة, يعني بدل ما ينعطالهون حقوق ثقافية و ينسمحلهون بما يسمح للأقليات الأخرى لحتى ما يكون عندهون مبرر ليعملو شي عم يتخونو و يتعاملو كبهايم... يعني الكردي عميل و خاين و ابن كلب حتى يثبت العكس... طيب ليش؟

هالحادثة مو أول مرة تصير.. كل سنة تصير مشاكل بالنيروز.. بالعكس مؤخرا خفت كتير. بالزمانات لما كنا صغار قبل عيد الأم بيوم من نطلع من المدرسة بوجهنا عالبيت و ما نطلع من البيت لتاني يوم.. و الأمن ينتشر و يصير شبه حظر تجوّل و يستنفرو الموظفين و الحزبيين و الشبيبة... و حتى شيوخ العشاير يستفروهون... و كل سنة كان يصير قتلى و جرحى, الفرق انو هلأ صار في نت و صارو العالم يدرو... طيب في قوات مكافحة شغب و في سرية حفظ نظام و في وفي وفي.... يعني في كتير أساليب لتطوّق المشاغبين من دون ما تفتح النار و تعرّض أبرياء للخطر, لأنو كمان المشاغبين باحتفالات النيروز أقلية بشهادة الحزبيين اللي كانو مكلفين بمراقبة الاحتفالات عن بعد... يعني يجتمعو المئات و يشغلو نار و يشوو و يدبكو و يغنو.. عائلات و كبار و صغار ... و آخر الحفلة في كم همجي بيعمل مشاكل متل كل التجمعات... متل أي مباراة كرة قدم بين فريقين من نفس المدينة...

مع احترامي ليللي ذكرتو من قصص"مع انو بعض القصص ما بتكفي لاعطاء تصور عام لوضع الاكراد لانو ممكن تصير مع مين ما كان" ببرجع بقلك أنو وضع أكراد سوريا أحسن بألف مرة من وضع أكراد باقي الدول ... وعايشين معززين مكرمين وهاد الكلام أنا لمستو ع أرض الواقع ... وما حدا بسوريا عايش احسن منهن اذا بدك
وسوريا اكتر دولة دعمت الأكراد و ساعدتهن و وقفت الى جانبن بمحنتن ..بس كمان ما لازم تنسى أنو نسبة منيحة من الأكراد اذا بينعطوا حرية زيادة عن اللزوم أول شي بيعملوه انن بيستقلو "بغض النظر اذا حقن ام لا "
ولهيك ممكن تتفسر بعض الاجراءات يللي حكيتها و يللي أنا من ناحيتي مو سمعان فيها
و بسوريا عنا بأكدلك كل المواطنين بالنسبة لمبادئ الدولة العلمانية متل بعضن ..وأكتر من هيك الاكراد بسوريا بيحكوا كردي .. وبعض الاذاعات عنا بسوريا بتحطلن اغاني كردية .. واخدين مناصب حساسة بالدولة و الخ
الله يحمي سوريا و قيادتها من كل المؤامرات ...امين

[yass]

حاسس ما عم نحكي لا عن نفس الدولة و لا عن نفس الشعب...

[شب الكوبة]

كاتب النص الأصلي : ayhamm26

صديقي فاوست للاسف انت متفائل كتير بموضوع الثورة الشعبية انا عندي قناعة دائمة انو النظام الاسدي ما زال يملك كرت بلانش من اسرائيل واميركا لانو وجودوا ضروري لامن اسرائيل مشان هيك لو صارت هيك ثورة فمصيرها لن يختلف عن حماة 1982 وكل شي رح تسمعو هو شي كم بيان استنكار من امريكا والاتحاد الاوربي

الثورة الشعبية لازمها ظروف دولية مواتية لانو عندك نظام لا يمكن يتراجع مهما قتل من الشعب مافيا همها الوحيد البقاء اطول فترة ممكنة بالحكم

با عتبارك كل ما دق الكوز بالجرة بتجبلي سيرة حماة
رح قلك كلمتين و بدون ما نكتر حكي

يللي صار بحماة بال 82 متل ما صار بمخيم نهر البارد اللبناني من كام شهر و فهمك كفاية... وما في داعي ترد ع كلامي بحيث تظبطو لحتى يتوافق مع وجهة نظرك لأني مو حابب نفوت بنقاش بعيد عن الموضوع الأصلي

[BL@CK]

كاتب النص الأصلي : شب الكوبة

ببرجع بقلك أنو وضع أكراد سوريا أحسن بألف مرة من وضع أكراد باقي الدول ...

بإعتبار المقارنة بين وضع الأكراد بـ سوريا و وضع الأكراد برا سوريا هيه المقياس .. طيب أوك ما في مشكلة

مع قناعتي الكاملة بعدم جواز هذه المقارنة لسبب بسيط لأني المواطن الكردي مش كندرة لنقول بسوريا وضع الكندرة جيد و بالعراق وضع الكندرة تعيس .. هاد إنسان متلو متلك ..

مع ذلك رح أجي معك

برأيك الشخصي وضع الأكراد بسوريا متل وضع الأكراد بألمانيا ..

هاي أبسط مقارنة ..

و السلام ختام ..

[ayhamm26]

كاتب النص الأصلي : شب الكوبة

مع احترامي ليللي ذكرتو من قصص"مع انو بعض القصص ما بتكفي لاعطاء تصور عام لوضع الاكراد لانو ممكن تصير مع مين ما كان" ببرجع بقلك أنو وضع أكراد سوريا أحسن بألف مرة من وضع أكراد باقي الدول ... وعايشين معززين مكرمين وهاد الكلام أنا لمستو ع أرض الواقع ... وما حدا بسوريا عايش احسن منهن اذا بدك
وسوريا اكتر دولة دعمت الأكراد و ساعدتهن و وقفت الى جانبن بمحنتن ..بس كمان ما لازم تنسى أنو نسبة منيحة من الأكراد اذا بينعطوا حرية زيادة عن اللزوم أول شي بيعملوه انن بيستقلو "بغض النظر اذا حقن ام لا "
ولهيك ممكن تتفسر بعض الاجراءات يللي حكيتها و يللي أنا من ناحيتي مو سمعان فيها
و بسوريا عنا بأكدلك كل المواطنين بالنسبة لمبادئ الدولة العلمانية متل بعضن ..وأكتر من هيك الاكراد بسوريا بيحكوا كردي .. وبعض الاذاعات عنا بسوريا بتحطلن اغاني كردية .. واخدين مناصب حساسة بالدولة و الخ
الله يحمي سوريا و قيادتها من كل المؤامرات ...امين

والله انا حاسس حالي عم اقرا شي بيان لمحسن بلال مكتوب على طريقة الصحاف يعني كل شي تمام في سوريا الاسد والوضع احسن من اوريا وكل البشر متساوين في ظل القيادة الحكيمة والمنجزات ماهيك بالله ؟؟
بصراحة ما بعرف اذا انت من اللي قلي عنن ياس مرة اللي مخدوعين تماما ب بروباغاندا النظام ولا شي تاني؟؟

يللي صار بحماة بال 82 متل ما صار بمخيم نهر البارد اللبناني من كام شهر و فهمك كفاية... وما في داعي ترد ع كلامي بحيث تظبطو لحتى يتوافق مع وجهة نظرك لأني مو حابب نفوت بنقاش بعيد عن الموضوع الأصلي

صح موضوع حماة لحالو بدو مواضيع بس اللي صار بحماة مو متل نهر البارد اللي صار هي محاولة ناجحة للاسف عملها النظام لكسر نفسية الشعب ومقاومتو وافهامو انو ما في مفر من الحكم الاسدي يعني بالعربي لبربوا الشعب ولهيك انا جبتو مثال على اللي ممكن النظام يعملو لو فكر حدا بخيار الثورة الشعبية نفس الجزارين ونفس المجرمين موجودين وجاهزين ليعيدوا اللي عملوا في سبيل مصالحن الشخصية الوضيعة

[MadMax]

بصراحة ..
الغلط من الطرفين ....بس أكيد اللوم الأكبر عالحكومة ............. لأنها حكومة....
يعني من حق الأكراد مثلاً ....أنو الدولة تعترف بلغتهون انها لغة رسمية الى جانب اللغة العربية




بس كمان أنا ضد أي تفكير بإنشاء دولة و أو اي شكل من اشكل الحكم الذاتي للأكراد ... أو لأي أقلية تانية في سوريا ....و للأسف هالهاجس موجود و بقوة ..... يمكن مو عند الكل ..... بس عند قسم كبير

[شب الكوبة]

بإعتبار المقارنة بين وضع الأكراد بـ سوريا و وضع الأكراد برا سوريا هيه المقياس .. طيب أوك ما في مشكلة

مع قناعتي الكاملة بعدم جواز هذه المقارنة لسبب بسيط لأني المواطن الكردي مش كندرة لنقول بسوريا وضع الكندرة جيد و بالعراق وضع الكندرة تعيس .. هاد إنسان متلو متلك ..

مع ذلك رح أجي معك

برأيك الشخصي وضع الأكراد بسوريا متل وضع الأكراد بألمانيا ..

هاي أبسط مقارنة ..

و السلام ختام ..

انتي ياما ما فهمت عليي يا اما ما بدك تغهم

و شغلة تانية كان قصدي بباقي الدول الدول يلل موجودين فيها الاكراد كجزء من المجتمع .. مو كلاجئين

[yass]

معلش ياس , أنا مالي كتير مقتنعة بفكرة أنو الأكراد مضطهدين بالشكل الي عم تصورو أنت ..
هني حاولو يرسمو هاي الصورة و الظاهر أنهون نجحو ..
الحكومة مالها متحطتهون لأنهون / اكراد / بس ..

سوري بس ما عم جيب حكي من عندي... عم قول شي ما أعتقد انو حدا معتبرو مو صحيح..

في مكتبات عامة تبيع عالمكشوف كتب باللغة الكردية متل ما في كتب أرمني فرضا؟ في مدارس تدرّس كردي متل مدارس الأرمن؟ في معاهد لغة كردية؟ ممكن واحد كردي يحط دعاية لمحلو بالكردي متل مافي أرمن و آشوريين و سريان بيعملو؟

الحكومة متحطتهون لأنهون كراد, طبعا لأنهون كراد... لأنو ما بدهون يتركو كيانهون.. هنن جزء من الشعب السوري, و وجودهم بسوريا قديم قدم التاريخ كمان

و هني الوحيدين من بين الأقليات كلها / أرمن , جركس , تركمان و غيرو ... / يعتبرو أصحاب الأرض أو جزء من الأرض
و هون ما بتسأل طفل كردي صغير إلا بقلك ليه ما بيخلونا نعمل وطن متل مافي كردستان بالعراق ..
و هون الدم بيضرب للراس بمجرد التفكير بتقسيم الأرض ..
و هني بغير هيك ما بيرضو !!

لأنهون أصحاب أرض و جزء من الأرض... هنن جزء من هالكيان, و ما بعرف عن أي طفل كردي عم تحكي.. مزبوط هنن عندهون نزعة اثبات ذات طبيعية جدا و ناتجة عن محاربتهم ككيان (كل قومية انما تنشأ نتيجة تعصب قومي آخر)... يعني الكردي يبدو انو لازم يخجل انو كردي.. لغتو مرفوضة و تراثو مرفوض و بدو يرضى يعيش كمواطن درجة خامسة أو سادسة لحتى تكون الحكومة راضية عنو... و معليه الأرغومنت تبع و الله ما بينعطو حقوق لأنو ما بينعطو وش لاغي و لاغي جدا, و اضطهادهون باسم انو انفصاليين مشابه لاضطهاد و تهميش العلويين بعد الاستقلال بحجة انو كان في جانب من العلوية كان بدهون دولة علوية.. ليش منرفض هالحجة لناس و نستخدمها لغير ناس؟ المفروض نرفضها ضد الكل ما هيك؟ هلأ لما بيحكو عن شيعة لبنان انو هنن ولائهون لايران مو للبنان ليش نزعل بينما نستعمل نفس الحجة عن الاكراد انو هنن بدهون "نظريا" كردستان؟ أساسا للي بيعرفهون فينو يعرف انو أكراد العراق و تركيا و سوريا مختلفين فيما بينهم جدا.. و بيكرهو بعض حتى اذا بدك.. و كل واحد منهون عندو تصوّر خيالي عن شو هيي كردستان و كلهون بيعرفو انو كردستان بعمرها ما انوجدت

الأكراد جزء أساسي و أصيل من الشعب السوري... ثارو ضد العثمانيين جنب العرب, ثارو ضد الفرنسيين جنب العرب.. بالكتلة الوطنية اللي نالت الاستقلال كان في قياديين أكراد... الجندي اللي رفع العلم السوري على وزارة الداخلية يوم الاستقلال كردي... و ما كان في أي مشكلة و لا أي نزعة انفصالية من أي نوع

مشكلة الأكراد بديت ع زمان الوحدة.. لما بلش الاسلوب القومي العربي الغاشم .. بلشو يتهمشو.. ع أيد عبد الحميد السرّاج الله يدق عظامو بقبرو الى يوم الدين... و بعدين عملو الجرد هاد تبع ال 61 و طيّرو الجنسية عن أغلبهون... و حجة انو هدول اجو بعدين ما بتمشي الله وكيلكون...

اجا البعث.. مزبوط المشكلة ما بديت ع أيد البعث انما ع زمان الوحدة... اللي صار ع زمن البعث انو استفحلت... ع أيد رفعت الأسد لما كان رئيس مكتب الأمن القومي بالحزب و نظرية الطوق العربي تبعيتو.. و هلأ بشرح شو نظرية الطوق العربي:

بشمال سوريا.. بالأخص بمنطقة الجزيرة, كان في مناطق ذات كثافة سكانية كردية عالية جدا.. قرى كاملة فقط أكراد, و أراضي شاسعة.. فاللي صار انو لما انعمل سد الفرات و لواحقو, مع المشروع الرائد تبع حوض الفرات.. في جزء من العشائر العربية (الولدة خصوصا.. هيك اسمهون) فقدو اراضيهون لأنو يا انغمرو بمياه البحيرة يا استملكت للمشروع الرائد... فهدول شو عملو فيهون... مكان كل دونم أرض كان عندهون عطوهون دونمين عند أراضي الأكراد بس لازم يروحو يعيشو هنيك.. و صادرو أراضي الأكراد و عطوها لعرب الغمر (من المفارقات المضحكة انو حجة مصادرة أراضي الأكراد كانت انو ما كان عندهون غير سندات طابو من أيام العثمانيين أو الفرنساوي و هالسندات ما قبلوها و ع أساس هالأمر تم "استملاك الأراضي"... المضحك انو نفس السند العثماني المرفوض للكردي كانو يقبلونو من العربي لحتى يثبت ملكيتو لأرض مغمورة و يتعوض بأرض تانية... و هاد واقع ما عم جيبو من عندي... معروفة هالقصص)

و بهالطريقة قرى كردية كاملة انمحت و صارت مزارع تعاونية... قرية مثلا اسمها الشركراك, لليوم أهل البلد يسموها الشركراك.. صار اسمها مزرعة العروبة التعاونية.. و أولاد أصحاب الأراضي الأصليين صارو بويجية بحلب...

و لو تروحي ع شمال الجزيرة.. اسألي الناس مثلا شو اسم هالقرية.. بيقلولك اسم كردي للقرية (حتى العرب منهون) و تشوفي عالخريطة أو ع قارمات الطريق يكون اسمها يا اليعربية, يا القحطانية, يا الاشتراكية, يا العروبة... الخ

بعدين منشان عيد النيروز :
الحكومة قالت 1000 مرة بلا تشعيل دواليب سيارات و ضرب رصاص .. و هني ( عبس ) ..
يعني و الله إن كانو عرب ما راح تسكت عليهون ..
( مع إني ضد الأسلوب ) !!

معليه سؤال: الحكومة بتوفر للأكراد فرصة الاحتفال متل ما توفر فرص الاحتفال للأقليات الأخرى؟ في منهون همج ما اختلفنا و طبعا قوات حفظ الأمن لازم توقفهون.. بس مو برصاص حي!! يعني هلأ عنا سريات حفظ نظام و قوات مكافحة شغب فيها تفضي ملعب كرة قدم فيو 30 ألف بني آدم بعشر دقايق اذا لزم الأمر... معقول ما قدرولهون؟

و ما عم قول ينسكت.. بس العنف المفرط هاد مالو معنى.. يعني عنا بالجزيرة تخرب الدنيا أحيانا بين العشاير.. تصير مذابح حقيقية و ندوّر للأمن و ما نلاقيه, اساسا ما بيتدخلو بين العشاير, بيعملو واسطات بين الشيوخ و يحلوها حبّية.. بس من في بالمشكلة أكراد بيقلبو سلفستر ستالوني الشباب

أنا ضد نزعة بعضهم القومية... أنا ابن الجزيرة و سوري, سوري للصميم (رغم انو ابناء الجزيرة عند البعض محسوبين عراقية ).. بس لأني بعرف منهون كتير بيفكرو متلي, و الغالبية العظمى لو عندهون الحقوق الثقافية الدنيا كان ما ينسمع صوتو, ولكانو القوميين الأكراد أقلية صغيرة جدا جدا لا تؤخذ بالحسبان... أغلبهون بدو يعيش ككردي سوري.. يكون الو حق يكون كردي, انو يحكي كردي و يعلّم ولادو كردي... ما بدو غير شي..

[فاوست]

أول شي الخبر ناقل عدة شهادات يعني في عالم قالت أنو الأكراد ضربوا الشرطة بالحجارة وفي عالم قالت لأ
بكلتا الأحوال النظام دائماً يقوم بإستفزاز الاكراد والشعب العادي وخصوصي بشرقنا بيرد بهيك طرق على كل

سوريا دعمت عبد الله أوجلان يلي لعن أخت القضية الكردية في سوريا،وركز كل الجهود الكردية في سوريا على كردستان تركيا بالطبع كان أوجلان متل ما كلنا منعرف تحت يد نظام الأسد الأب إلى ان باعوا سنة 99 لتركيا

موضوع كردستان أول شي كل الأحزاب السياسية الكردية لا تطالب بكردستان ببرامجها السياسية حتى أشدها تطرفاً كما يقال عنها النظام حزب يكيتي الكردي مثلاً لا يطالب بالإنفصال أبداً
لكن صحيح هناك حلم كردي بدولة كردستان وهذا حقه الطبيعي مثل ما للعربي الحق في أن يحلم بالامة العربية
بالطبع يلي بزيد هذا الشعور هو الإحساس بالظلم والإضطهاد يلي عم يتعرضلوا الاكراد
ممنوع التكلم باللغة الكردية ممنوع إرتداء الرموز الكردية ممنوع الإحتفال بالإعياد الكردية نسبة كبيرة منهن ممنوعة من التوظيف بلإضافة إلى عدد كبير من المجردين من الجنسية يعني الدولة ما عم تعترف فيهن أنن سوريين شو بدكن يكون شعورهن
مع هيك الأكردا ما زالو ا وطنيين سوريين رغم إرتباطهم الوثيق ثقافة ولغة وعادات وتقاليد مع الأكراد في البقعة الجغرافية الممتدة بين سوريا والعراق وتركيا وإيران أي كردستان وكردستان تعني بالكردي أرض الأكراد وهذا شيء حقيقي وصحيح ومنطقي فالأكراد يشكلون امة ولهم الحق في أن يحلموا في أمتهم كما يحلم العربي بالأمة العربية وكما يحلم الفارسي بالأمة الفارسية وهكذا
لذا لن نستطيع مصادرة حلم الكردي

نعود لنيروز في سنة 1986 تظاهر عدد من الاكراد أمام القصر الجمهوري في سوريا مطالبين بالسماح لهم بالإحتفال بعيد نيروز فما كان من حرس الأسد الأب إلى أن أطلقوا النار وأسشهد مواطن يدعي سليمان ادي

المشلكة هي قديمة منذ إستلام البعث للسلطة للتضخم المشكلة بعد إستلام الأسد للسلطة حيث لا من صوت مسموع إلا صوت التطبيل والتزمير للقائد الخالد والأصوات الأخرى تعتبر شاذة ويجب إزالتها

[مايا *]

اول شي ياس انا كتبت انو (( ضد )) الي قامت فيه الحكومة ..
بس أنا عشت بين أكراد و إحتكيك فيهون كتير ..
أنت قلتها هيني كيان داخل سوريا .. بس كيان رافض النصهار الطبيعي الغير كامل بالمجتمع الي هوي فيه ..
يعني رافض فكرة انون أقلية و الأكترية بتحكم الأقلية ..
أزا الموضوع موضوع لغة .. كيف مصضهدين بهاي الناحية ازا في ضيع كامل ما بتحكي عربي ..

تصير لغة اساسية متل ما قال سامر // بجنب اللغة العربية // هاد الشي هني رافضينو .. هني بدون يحكو .. و يتعاملو باللغة الكردية و بس ..

هاد الشي مرفوض منطقيا .. يعني ممكن يصير في مدارس كردية و مدارس سورية .. ؟؟
بعدين مو ليتفقو على لغة وحدة .. عندون الصوراني و الباديني و غيرو .. و كل وحدة ابجديتها شكل ..
/ يعني و الله هني ما بيعرفة ابجديتهون كيف /
انا ما بدي أحكي بشي ما بفهم فيه و الي هوي السياسة .. أنا عم احكي من معاشرتي الهون ..

بعدين يعني انا حاسة بمبالغة بالموضوع .. طلعت 3 مرات حضرت عيد نيروز بعفرين ..
كيف يعني ممنوعين من انو يحتفلو ..
و برجع بأكد انا ماني لا ضد و لا مع .. بس خلو الامور تبين متل ما هيي بدون مانضخمها ..
انا مع و بشدة انون يحافظو على ثقافتون حقون و ما منختلف عليه ..

وهذا حقه الطبيعي

لا يا سيدي ..
هاد الشي بترفضو اكبر الدول و أكترها ديمقراطية ..
و هاد الشي أنا برفضو كسورية ..
أصلا مين الي راح يحدد حدود هاي الدولة .. بالاصل ماكان في دولة و لا وطن مسوّر بحدود ..

[yass]

كاتب النص الأصلي : مايا *

اول شي ياس انا كتبت انو (( ضد )) الي قامت فيه الحكومة ..
بس أنا عشت بين أكراد و إحتكيك فيهون كتير ..
أنت قلتها هيني كيان داخل سوريا .. بس كيان رافض النصهار الطبيعي الغير كامل بالمجتمع الي هوي فيه ..
يعني رافض فكرة انون أقلية و الأكترية بتحكم الأقلية ..
أزا الموضوع موضوع لغة .. كيف مصضهدين بهاي الناحية ازا في ضيع كامل ما بتحكي عربي ..

تصير لغة اساسية متل ما قال سامر // بجنب اللغة العربية // هاد الشي هني رافضينو .. هني بدون يحكو .. و يتعاملو باللغة الكردية و بس ..

هاد الشي مرفوض منطقيا .. يعني ممكن يصير في مدارس كردية و مدارس سورية .. ؟؟
بعدين مو ليتفقو على لغة وحدة .. عندون الصوراني و الباديني و غيرو .. و كل وحدة ابجديتها شكل ..
/ يعني و الله هني ما بيعرفة ابجديتهون كيف /
انا ما بدي أحكي بشي ما بفهم فيه و الي هوي السياسة .. أنا عم احكي من معاشرتي الهون ..

بعدين يعني انا حاسة بمبالغة بالموضوع .. طلعت 3 مرات حضرت عيد نيروز بعفرين ..
كيف يعني ممنوعين من انو يحتفلو ..
و برجع بأكد انا ماني لا ضد و لا مع .. بس خلو الامور تبين متل ما هيي بدون مانضخمها ..
انا مع و بشدة انون يحافظو على ثقافتون حقون و ما منختلف عليه ..

لا يا سيدي ..
هاد الشي بترفضو اكبر الدول و أكترها ديمقراطية ..
و هاد الشي أنا برفضو كسورية ..
أصلا مين الي راح يحدد حدود هاي الدولة .. بالاصل ماكان في دولة و لا وطن مسوّر بحدود ..

حاسس كلامي ماعم يوصل... و الله ما جبت سيرة السياسة و لا سيرة الأحزاب الكردية

يعني كل ما سلف رأيك و مالي علاقة فيه... بس ممكن تأشريلي بالضبط وين الواقعة اللي عم بالغ فيها أنا؟ أو شو هي الحادثة اللي عم اخترعها؟ أشريلي عليها لو سمحتي... وين جبت من عندي شي بكل كلامي؟

ما عم دافع عن قوميتهون... اساسا أنا ضد أي فكر قومي.. بحسو خرط حكي.. ان كان هالفكر القومي سوري أو عربي أو كردي أو شو ما كان...كل قصدي من كلامي انو ليش نقبل حدا يقول عربي سوري أو سرياني سوري أو آرامي سوري أو حتى مسيحي سوري هيك بشكل عام و لما ينقال كردي سوري ما نقبل؟

كم كردي في بسوريا؟ مليون؟ طيب من هالمليون قديه نسبة "المشكلجية"؟ طيب و المومشكلجية ليش عم يتحملو خطا المشكلجية و عم ينحرمو من حقوقهون؟ بعدين معليه اعتقد المبالغة من عندك مو من عندي لما عم تقولي

أنت قلتها هيني كيان داخل سوريا .. بس كيان رافض النصهار الطبيعي الغير كامل بالمجتمع الي هوي فيه

ليش ما عم ينصهرو؟؟ ليكهون جيراننا دكاكينهون جنب دكاكيننا و قبورهون حد قبورنا حتى بنفس المقبرة.... ما بعرف يعني يجوز في حالات خاصة بالمدن الكبرى عاملين غيتوات... بس بمكان تواجدهون الطبيعي, بالجزيرة... عايشين بين هالعالم و عين الله عليهون و بيتجوزو منا و بنتجوز منهون على عكس فئات أخرى من الشعب ما حدا بيسترجي يقول عنها انو "مو منصهرة".

و مزبوط في ضيع كاملة بتحكي كردي... بس هاد مو حقوق ثقافية. ما عندهون غطاء يحمي ممارستهون لحقوقهون الثقافية أسوة بباقي الأقليات.. وجود كتاب كردي بحوزة حدا ممكن تكون نتيجتو السجن...

طيب و بدي اعرف بناءا ع شو عم تأكدي انو استعمال الكردي الى جانب العربي ما بيقبلوه؟ يعني القصد حدا سألهون و جاوبو هيك؟ اذا بناءا على تعايشك معهون عم تقولي ما بيقبلو أنا بقلك انو بناءا ع تعايشي معهون بالجزيرة بيقبلو.. و اساسا من أسباب الحنق هاد الموجود انو شايفين الاقليات التانية عندها مدارسها و مراكزها الثقافية و كل هالقصص و هنن لأ...

و بعدين اذا بدنا نفتح ملف الانصهار الطبيعي داخل المجتمع معناتو بدنا نفوت بمتاهة كبيرة... لأنو بدنا نعرّف أول شي معنى الانصهار و بعدين نقعد نحلل مين من "فئات" الشعب السوري منصهرة فعلا

تبعيت فاوست لما قال الحق الطبيعي بالحلم القومي؟؟ مع احترامي الك كلامك مو دقيق... في داخل جسم كومة دول ديمقراطية احزاب قومية .. و مو بس قومية, انفصالية حتى, و ديمقراطية و مرخصة و داخلة بالبرلمان متل العادة و حتى تشارك بائتلافات الحكم... ببلجيكا و اسبانيا و ألمانيا و حتى بفرنسا و ايطاليا... موجودين... قوميين و متعصبين حتى.. و نشاطهون السياسي شرعي و ما حدا بيناقشو..

هلأ انو خرج بسوريا نعمل هيك؟؟ طبعا اول شي لازم يكون في عنا ديمقراطية و ديمقراطية ناضجة كمان... يعني لحتى ما نتحمل هيك قصص يمكن لازم يمرو شي 30 سنة و تكون المنطقة مستقرة...

قصدي من الرد انو كلامك مو دقيق حول انو أشد الدول ديمقراطية ما بتقبلو.....

[MadMax]

كاتب النص الأصلي : فاوست

فالأكراد يشكلون امة ولهم الحق في أن يحلموا

مو كتير موزون هالكلام ..
و لو تطبق ...... .. رح تلاقي خلال كم شهر ظهور حلم بالكيان الدرزي ..و الكيان العلوي و يمكن جمهورية أرمنية ببعض أحياء حلب و الها فرع بسوق الصاغة بالشام ....الخ ..

[Syrian Gay]

كلام مايا* سليم مليون بالمية

[yass]

كاتب النص الأصلي : Madmax

مو كتير موزون هالكلام ..
و لو تطبق ...... .. رح تلاقي خلال كم شهر ظهور حلم بالكيان الدرزي ..و الكيان العلوي و يمكن جمهورية أرمنية ببعض أحياء حلب و الها فرع بسوق الصاغة بالشام ....الخ ..

أي لحتى يكون هيك.. متل مافي أحزاب قومية بأوربا.. لازم ينضج عندنا مفهوم الدولة كتير, و لازم ينضج حتى مفهومهم الذاتي للدولة الـ "مافوق القومية" .. و هالشي بدو وقت طويل كتير, لا على المدى القريب و لا على المتوسط... بدو وقت طويل جدا.. هلأ الطرح تبع فاوست غير واقعي بالمرحلة هاي و بالمراحل اللاحقة

[MadMax]

كاتب النص الأصلي : yass

حاسس كلامي ماعم يوصل........

أنا عندي ملاحظة زغيرة
انك عم تعتبر اي تصرف غلط من الجانب الكردي ... بيندرج ضمن اطار رد الفعل ..و عم تبرئهن من المشكلة تماماً

أنا شايف أنو هني كمان بيتحملوا مسؤولية جزء من المشكلة ...بالرغم من أنو الجزء الأكبر بتتحملوا الحكومة

[MadMax]

كاتب النص الأصلي : yass

أي لحتى يكون هيك.. متل مافي أحزاب قومية بأوربا.. لازم ينضج عندنا مفهوم الدولة كتير, و لازم ينضج حتى مفهومهم الذاتي للدولة الـ "مافوق القومية" .. و هالشي بدو وقت طويل كتير, لا على المدى القريب و لا على المتوسط... بدو وقت طويل جدا.. هلأ الطرح تبع فاوست غير واقعي بالمرحلة هاي و بالمراحل اللاحقة

أنا برأيي أنو أساس المواطنة ..... هو الشعور بالانتماء للدولة (أو الوطن ) قبل الانتماء لأي شي تاني




يعني ما بعرف كيف الواحد بدو يشعر بانتماءو لسوريا .....و هو عم يحلم باللحظة يللي بدو يرتاح فيها من رب الدولة السورية