الحريات الفردية و الحدود الاجتماعية

[abosleman]

اخواتي بعد هيك كم تحية ومن هالقصص
انو انتو ليش معقدين الموضوع كتير وعم تفلسفو الحرية خلينا نكون ابسط من هيك
طالما عم نحكي عن الحرية مافينا نحكي عنها بالمطلق مافي شي اسمو حرية مطلقة
طالما مابدنا نربط الارادة بالحرية فما في انسان حر حرية مطلقة


برجع ..

[dimozi]

فكرة البدائل بدها تدوخنا

لساني ما مع فكرتك أخي محمد

فكرتي الأساسية من تقييد البدائل للحرية أنو لو عندك مشكلة اختيار و عندك مجموعة خيارات و عندك حرية عدم اختيار أي بديل و عندك حرية اختيار أحد البدائل , كل ها الشي رح يخليك مقيد بها العدد من البدائل يعني اذا عندك تسع بدائل, فانت مقيد بها التسعة و ما فيك تختار العاشر اللي مو مطروح ( أو حتى مو موجود عملياً أو نظرياً)

و طالما أنت مقيد فأنت مو حر بشكل مطلق, بغض النظر عن اسبقية الحرية عن المشكلة.

كابيش ؟؟


طيب ما كننا بالقيود الاجتماعية, وين صرنا ؟؟؟


صحي وين موضوع جون ناش؟؟


مية خسة

[محمد ابراهيم]

لاء مش كابيش !!! كمان بتعرف ايطالي لازم اخود حذري معك من هلاء .
شوف بئى ، انا بردي الاخير ما حكيت عن بدائل بصورة اساسية (هلاء رح احكي ورح اكتب معلقة اطول من كل ردودي هون مجتمعة )
*اولا متفق معك بان البدائل تمنع الوصول للحرية المطلقة من حيث المبدا والفلسفة .
بس اصلا انا ماني متخيل انو في اختراع اسمو حرية مطلقة !!
انا قلت

العدد اللانهائي من البدائل مالو دخل بالحرية المطلقة (هاد اذا كانت موجودة فعلا ومانها فلسفة افلاطونية او يوتوبيا )

مابعتقد اصلا انو في حرية مطلقة .
نروح عالتساؤل التالي : هل الشعب الاميركي يللي عندو 10 بدائل (مرشحين للرئاسة) اكتر حرية من الشعب الفرنسي اللي عندو 3 بدائل ؟؟؟
انا بشوف انو لاء (التنين متل بعض )والون حرية كاملة بس غير مطلقة لانو في اطار البدائل كل شعب بيقدر يختار اي بديل من المجموعة المتاحة , العبرة بانو الشعب يقدر يختار اي بديل متاح .
اما عن انو اذا كان في عدد من البدائل مقدارو (ص) بيكون في (1 + ص)
انا بقول انو العبرة بالمتاح يللي هو ص (لانو مافي حرية مطلقة ) الحرية وفق البدائل المتاحة .
ضحكت عليك ومارح احكي كتير (بدي احصر الموضوع بنقاط اتفاق واختلاف لانو بعتقد اتناقشنا بأغلب الافكار)
موضوع نظرية التوازن لجون ناش هون

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

ميت خسة للجميع والك خص نص

[yass]

انا مؤمن بحرية الاعتقاد و مؤمن اكتر بحرية التعبير عن هالاعتقاد .... و هاد يللي رح حاول انو نوصللو
بس الاهم من هالحريات اني مؤمن بكرامة الانسان ... اي انسان .... لمجرد انو انسان
سواء كنتوا شايفين انو جدو قرد او جدو هوي آدم فأنا مؤمن انو اي انسان الو كرامة ما بيجوز انو نمسها

كريم عربجي ( Krimbow)

بعرف انو علاقة هالاقتباس بموضوعنا و بالنقاش نوعا ما سطحية, بس كنت اقرأ موضوع "ظلو الخطر... ظلو المطر...ظلو شعرا" المثبّت بالمنبر و شفت هالقول لكريمنا (على عكس مطبّلي حرية التنك متل موقع الممكيجين الجدد تبع سوريا الحرة فينا نحنا و هون, بمنبر أخوية الحر, نضيف ضمير "ـنا" على اسم كريم) وشفت انو لازم ينحط بهالموضوع......

أعترف بأنو قريتو و دمّعو عيوني..... يمكن لأول مرة من سنين.....

أتمنى من الزملاء يكملو النقاش بشكل طبيعي

[yass]

هل الشعب الاميركي يللي عندو 10 بدائل (مرشحين للرئاسة) اكتر حرية من الشعب الفرنسي اللي عندو 3 بدائل ؟؟؟

حجي المثال هاد ما بينفع . أنظمة الاقتراع و التصويت مختلفة تماما و حتى النظام السياسي (كتنظيم اداري) يكاد يكون متناقض.....

المهم..... انتو جوز مفزلكين و العالم ملّت

عم امزح, شو رأيكم نبلّش شوي نركّز على نقطة معينة منشان ما نضيع

أنا عندي سؤال عام: ضمن وسط اجتماعي ما, و بغض النظر عن ماهيّة هالوسط, امتى نكون احرار و امتى عم نكسر الحد الاجتماعي الموجود على شكل عادات و تقاليد؟

[mrwhiteangel]

.1234526789

[THE_unforgiven]

كاتب النص الأصلي : yass

أنا عندي سؤال عام: ضمن وسط اجتماعي ما, و بغض النظر عن ماهيّة هالوسط, امتى نكون احرار و امتى عم نكسر الحد الاجتماعي الموجود على شكل عادات و تقاليد؟

كلمتين خفاف ظراف :
حسب تحليلي للحرية .. وبقصد حرية هالأيام ..
إلها نوعين رئيسيين .. أو إذا بدك تصنيفين عامين .. هني :
1- الحرية القانونية :
وهيي انو الإنسان يتصرف حسب مايشاء .. ولكن ضمن حدود قانون الدولة أو المجتمع الذي يعيش ضمنه .. وإلا صار فوق القانون .. وما عادت حريته قانونية ..
2- الحرية الإنسانية :
أو مايعرف بالحرية المطلقة إذا بدكن ..
ووهيي أنو الإنسان يتصرف حسب ما يراه صحيحاً ..
ولو كان هالشي ضد القانون .. بس هوي بنظرو هادا الشي صح ..لان أحيان كتير بيكون القانون ظالم .. وكتير أحيان .. القانون مابيكون شامل لكل الحالات الخاصة اللي ممكن تعترض بنود القانون ..
مثلاً .. بالقانون .. ممنوع الإنسان يقتل ..
بس مثلا لو خير أحد البشر بأنو يقتل جورج بوش .. او هتلر .. او أحد الشخصيات الي بتأثر ع مجرى الكون ..
أكيد هالشي من منظور الشخص اللي عم ينفذو هوي عم يعمل شي صح .. وبيخدم بنظرو البشرية ..
بس القانون ... بيقللك لأ .. انتا عملت جريمة ..
هلأ هوي صحي بيكون عمل جريمة .. بس بالمقابل .. وفر وقوع العديد من الجرائم ..
.
.
.
THE,unforgiven ,,,"

[i m sam]

كاتب النص الأصلي : yass

أنا عندي سؤال عام: ضمن وسط اجتماعي ما, و بغض النظر عن ماهيّة هالوسط, امتى نكون احرار و امتى عم نكسر الحد الاجتماعي الموجود على شكل عادات و تقاليد؟

كمان انا ناطر جواب لهالسؤال ....