حوار مع شوفير تاكسي !!

[nebomrj]

كاتب النص الأصلي : sadooka

هع هع ...

رجل سوري = رجل مخابرات

[شوط ياقمر]

يلا بدك تطول بالك . صحتك بلدني . روقلي حالك وهديلي أعصابك . وزت ورا ضهرك . لساتك متل مابقولو بمقتبل العمر . ف مابدك ياها . عيفا وعف عنا

[jouliana]

المشكلة الاولى هي بمستوى تفكير الي بملكه كل واحد فينا

و هاذا الشي ما بقتصر على شوفير التكسي لانه بشمل المتعلمين كمان
لانه مو بس شوفير التكسي الي عنده هادي المعتقدات
حتى شباب جامعية كتار بفكرو متله

بس لو كل شب حطها على حاله قبل ليلطش بنت كلمة
راح يستحي على دمه
يعني قبل ليحكي اي شي ليش ميقول
يمكن اختي او امي بنفس الوقت هادا و بالشارع الفلاني
في واحد ابن حرام نازل يلطشها حكي طالع نازل

لانه كتار مرات بتحول تلطيش الكلام لقلة أدب يعني بتبطل كلمتين
على الماشي بتتعدى كلمة شو يا حلوة تؤبري البي لتوصل ............

[وشم الجمال]

انا معكم انو احيان كتيرة بيصير غلاظات لا تطاق من الشوفير
وحتى انو مجرد ما البنت تطلع بالتكسي ببلش اسئلة بطعمة وبلا طعمة
مسكين بدو حدا يسليه
بس انا ضد الهجوم عشوفير التكسي بحد ذاتو لانو بكل مكان وبأي طبقةاجتماعية بنلاقي ناس مرضى نفسيا وما بيفهموا وبيضلهم يلطشوا حكي شروي غروي بس لازم انو الواحد ما يهضم حقوقهم لانو بتلاقي بيناتهم اللي مكمل تعليمو وما صحتلو فرصة منيحة وبدو يطعمي عيلتو فبيضطر ينضم لهالفئة وبتلاقي المنيح والمحترم
بس انا بالنسبة الي نادرا ما اطلع بتاكسي لاني بخاف بصراحة وما بضمن مع مين طالعة وهاد ما بيناقض رأيي الاول

[ما بعرف]

سيداتي سادتي
بعد جلسة طويلة مع الجلنطة الفاضية تبعي و تفكير عميق جداً (حوالي 2 سم بنفس الجلنطة)

وجدت الحل الامثل لمشكلة شوفير التكسي وشوفيرية العمومي بشكل عام

1. يجب على شوفير العمومي ان يكون بعمر 35 سنة وحتى 50 سنة وبعدين قوصوه اذا طلع عسيارة
2. يجب ان يكون متجوز (يعني متأهل ) وله ما لا يقل عن ولدين
3. يجب ان يخضع لفحص رقابة اخلاقية على ان تتألف اللجنة الفاحصة من رجل دين بارز و ملكة جمال حقيقية و رجل حضاري وأخيراً عاهرة ( عذراً للكلمة ) حتى يكون الاختبار ناجحاً و غير قابل للغش
4. يجب تحويل جميع زمامير السيارات ( العامة والخاصة ) على البنزين


ملاحظة : بخصوص اللجنة انا مستعد لشرح وجهة نظري تحت طائلة المسؤولية

[Placebo]

قسماً بالله شوفيرية التكسي عنا شي قرف .. لك سيارات زفت وشوفيرية من ورا البقر جاية .. خصوصاً هدول الحيوانات يللي بتلاقيهم قصداً طافيين العداد تبعهم وعم يستنوك على كلمة مشان ينزلو فيك!

مبارح كنت راكب ستار تاكسي بحكم أنو كانت الساعة 5 العصر والزحمة مصيبة كانت .. والشوفير تبع ستار تكسي معروف عنو إنو بيبقى ساكت عادة إلا هادا يللي ركبت معو مبارح .. من تاني سؤال خليتو يسكت وقلتلو بالحرف الواحد:

(أنا عم إركب ستار تاكسي لأنو الشوفير عادة بالتكسي العادي بيهلك ربي بالأسئلة البايخة وكل مرة بتركب مع واحد شكل .. مرة واحد عرصة بيقعد بيسألك على النسوان وبيحكيلك عن حياتو الجنسية ومع كم وحدة مارس الجنس .. و مرة واحد شيخ صاحب دين لحيتو بتوصل لصدرو و عم يحاكيك بالدين وأنو النسوان لازم تتحجب كلها وأنو السافرات في جهنم وانو سوريا لازم تكون متل السعودية .. مرة واحد شغل محافظ وشغل عادات وتقاليد متل ما تفضل الشب صاحب الموضوع هو وقصتو مع هادا يللي بيقول أنو النسوان قليلين أدب .. .. ومرة واحد متخلف وفلاح حاططلك أغاني قسماً بالله شي قرف .. ومرة واحد قاعد عم يسب بهالبلد وإقتصاد هالبلد وهالعلاك الفاضي .. وهلم جرا!!!! .. بأه الله يخليك فهام وضعي ومن دون زعل .. من غير شي مقهور )


بذكر في مرة من المرات كنت شاري موبايل جديد ورجاج وعم جاكر صاحبتي يللي كنت قاعد ورا معها بالتكسي .. بحكم أنو رفيقي كان قاعد جنب الشوفير .. وكنت عم حط صيغة الرجاج وخلي الموبايل يلمس كتفا مشان جاكرا أكتر .. وكنا عم نكركر ونضحك على بعض .. وإذ بالصدفة بيوقف الشوفير السيارة و بيطلعلك من قدام وبيقول بالحرف الواحد (تضرب منك لإلها طلعو من السيارة ) وكانت رح تعلق بيني وبينو لحتى رفيقي قام بتهدئة الوضع!

يا أخي حثالة المجتمع بدك تشوفها أحسن شي بسيارات التكسي!!

[أطياف]

ليش شوفير التكسي ما بيحب القطط ؟
.
.
.
.
.
.
.
.
.

.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
..
.
.
.
.
.
.
.
.
.
.
.
.
.
.
.
.
.
.
..
لأنو كلب

[Placebo]

آل في ولد غليظ كتير كتير ركب مع شوفير تكسي .. وبعد خمسة دقائق من الركبة الولد قال لشوفير التكسي:

الولد: عمو عمو
شوفير التكسي: نعم عمو
الولد: آل في واحد دكتور تجوز وحدة دكتورة شو جابو؟
شوفير التكسي: أكيد دكتور
الولد : لأ غلط جابو مهندس هههههههههههههه

سكتلو شوفير التكسي أول مرة .. وبعد 10 دقائق رجع الولد وسألو سؤال تاني:

الولد: عمو عمو
شوفير التكسي: نعم عمو ؟
الولد: في واحد إستاذ تزوج وحدة إستاذة آم شو جابو؟
شوفير التكسي: أكيد إستاذ
الولد: لأ غلط جابو مدير عام هههههههههههههههههههه

هون جن جنانو للشوفير وسأل الولد سؤال حزيرة كمان وقاللو:

شوفير التكسي: عمو حبيبي ؟
الولد: نعم عمو؟
شوفير التكسي: في واحد كلب إبن ستين ألف كلب .. تزوج وحدة كلبة بنت ستين ألف كلب آم شو جابو؟
الولد: أكيد شوفير تكسي عموا ماهيك؟

[Remember Me]

ولي على آمتو شو سئيل هالولد

[ASH]

ولله ماعد عرفنا مين مسحوق و مين عايش اي ولله

[سفينة البر]

الشوفرية بحبو يبرمو ويحكو كتير في ناس بتحب هادا الشي وفي ناس لأ كل واحد حر بنفسه

[ماس]

يا سيدي أنا مرة طلعت جارتنا مع تكسي وهي ست كبيرة راحت تزور بنتها وفي الطريق فتح الشوفير مناحة إنو في أيتام بحارتو وعم يلم مصاري لإنو بيتون إنحرق بعد ما إنفجرت جرة غاز بلا طول حديث عد1د المخلوقة 45ل.س
وهي مافي معه غير 100 ل.س أخد المية وطنش قالتلو المسكينة رجعلي لو سمحت قلها كني إنتي ما بتفهمي
مو عما نقلك أيتام و إحترق بيتون نزلت المسكينة ولسه رجلها التانية بالسيارة قلع الحيوان ومشي
المحزن إنو المسكينة ما لقيت بنتها بالبيت يعني كان ممكن إنو تاخد منها أجرة الرجعة والدنيا كانت بالليل ورجعت يا حرام على بيتها مشي و أخد الطريق مها أربع ساعات تقربيا
لما حكت القصة لإمي وأمي حكت القصة إلي فار الدم براسي قلتلها ما أخدت الرقم تبع السيارة

قالتلي لك إبني خالتك إم نضال مواليد 1940 لا بتعرف تقرا ولا تكتب
بدون تعليق

[ما بعرف]

كأنو طلعنا برا الموضوع بس يلا اذا ما نفعت ما بتضر

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

حالة نصب رمضانية فاشلة ... بقلم : عادل حديدي



حالات النصب والاحتيال مألوفة في معظم المجتمعات وعلى مختلف مشاربها وتطورها أو تخلفها بغناها أو فقرها و لعل البعض منها يكون في الكثير من الاحيان مألوفاً وشبه مكشوف. ولا تنطلي بحيلها على أغلبية إلا اللهم بعض المغفلين أما البعض الآخر فتم عن مقدرة ابتكارية وذهنية وقادة لو وظفت في المسار الصحيح قصصاً وحكايا في منتهى الأبداع لكن قصور نظر بعض مرتكبي حالات النصب و لجاجة الحاجة احياناً وضغوطها وسلوك الطريق السهل والهين تجعلهم ينصبون شراك نصبهم وكما ئنهم للوصول الى هدفهم البخس والدنيء بأسهل وأسرع الطرق ولعل بعض المناسبات الكريمة والمقدسة لدى الشعوب والأفراد تكون مناسبة خصبة عند ذوي النفوس الميتة والضعيفة لممارسات دناءاتهم ورخصهم مستغلين بذلك العطف والنبل لضحاياهم ولكي لا أدخل في مدار الوعظ والأرشاد ـ الذي أكرهه تماماً ـ سأسرد هذه الحادثة التي جرت معي شخصياً قبل أيام قليلة: ‏ كنت في كراج العباسيين بانتظار (تكسي) تقلني الى شارع العابد فتوقفت السيارة وصعدت بها كان يقودها شاب في العقد الثالث تقريباً أخبرته عن وجهتي وبادرني بالسؤال عن مسقط رأسي بعد أن فهم علي ما يبدو لكنتي بأنني لست من أهل الشام وبعد أن أخبرته عن منطقة انتمائي «فقعني» بخطبة مدائحية وتبجيلية جعل من خلالها مدينتي هي المدينة الفاضلة وأهلها اهل الجود والكرم ولايدانيهم في ذلك أحد من بني البشر وأن من بعدهم لا أحد في الكون.. الخ ‏ قلت في نفسي أنا أمام كمين وحالة غير عادية يجب التهيؤ لها نظرت الى صاحبي السائق وجدته لاذ بالصمت وغرق في بحيرة من الأحزان والكآبة وراح يبسمل ويحوقل ويردد بعض الآيات القرآنية التي تدعو الى التمسك بالصبر وتبشر بالفرج وهذا ما دعاني الى التيقن بأنني أمام حالة نصب .. وسألته: ‏ ـ توكل بالله يارجل.. خير شو صايرلك..؟ ‏ وراح يسرد علي قصته بأنه متزوج منذ أربع سنوات وعمل المستحيل من أجل أن تنجب زوجته وأخيراً ومنذ شهر رزقه الله عز وجل بمولود ذكر لكن فرحته لم تكتمل لأن الوليد منذ يومين تقريباً بدت عليه بعض الأعراض الأمر الذي دفعه الى معاودة الطبيب من أجل الوليد لكنه أنتكس وساءت حالته الأمر تطلب ادخاله الى مشفى الاطفال حيث تم تشخيص الحالة بانحلال بالدم الأمر الذي يتطلب ثلاثة اكياس من الدم وقد استطاع ان يشتري كيسين لكن امكاناته عجزت عن شراء الثالث الذي سعره بحوالي 530 ل.س على حد زعمه وأشهر أحد أكياس الدم المزعومة الشراء الأمر الذي زاد في يقيني بأنه نصاب وكاذب.. قلت له: ‏ ـ اذهب بنا الى بنك الدم لأشتري لك الكيس الثالث تطلعت اليه فوجدته قد تلبك وارتبك لكنه امتثل، توجه إلى بنك الدم وعندما وصلنا الى هناك ونزلت من السيارة استأذنني لكي يصف السيارة لكنني وجدته قد (شمع الخيط) وانطلق بأقصى سرعته هارباً مني، ابتسمت بيني وبين نفسي شامتاً به.. لكني عدت واستدركت بأن المقلب قد انطلى عليّ لأنني لم آخذ رقم السيارة.

[سوريانا]

كاتب النص الأصلي : the god father

حوار مع شوفير تاكسي !!

عند ظهيرة هذا اليوم الذي كان يطل بشمسه الحارة ,,وجو يملئه الغبار ,, ووجوه الناس في الشوارع بائسة تبحث عن ملاذ من هذا الحر ,,
قررت وبعد تخاطر طويل وحوار عسير بيني وبين عقلي وبعد أن أدخلنا الجيبة كطرف ثالث في الحوار ,,بأن أخذ تكسي لكي ينقذني من الحر الشديد ,, وفعلاً اتخذت هذا القرار بكل جدية وحزم ,,وتجرأت وأوقفت تكسي !! ويالا فرحتي ,,وأنا في الطريق أنظر بنظرة المتعالي
طبعاً ولي الحق في ذلك فقد أصبحت ركبت التكسي بهل الأيام تميز !!
وبلا طول سيرة ,,وعلاك مالوا طعمة ,,المهم ,,
كنت مبسوط كتير ,,لحد ما صاحبنا الشوفير أدام الله عزه مرق من حد بنت !! أيه ,,أيه ,,لا تستغرب بنت ,,يعني مخلوق بشري ..
المهم يا سيدي ,, كانت هل البنت ,,وللأمانة مؤدبة ومحترمة ,,وكانت ملتزمة بأكثر لباس الحشمة المتعارف عليه في مجتمعنا ..
كانت ترتدي الزي الإسلامي الجميل الذي يتمثل بحجاب يلونه السواد ,,وبالعامية كانت لابسة " مانطو "
وصاحبنا الشوفير كان شب ,,وما اتحمل هيك منظر ,,يعني بنت متحشمة مو معقول !!!
فقرر صاحبنا أنو يكافئها ,,على صنيعها ,,,,وعلى أنو عم ترحم هل الشباب من أنو يطقوا أهر لأنو مالهم متزوجين من الشوفات اللي عم يشوفوها كل يوم ,,
وقلها صاحبنا الشوفير ,," لك يسلملي هل الطول وهل الوش الحلوا " مع العلم أنو ما كنت طويلة ,,بس أنو عم يحكي ,,حاكم شعبنا اتعود على الحكي بطعمة وبلا طعمة ..
والله ,,الصراحة انصدمت ,,بس ضليت خرسان ليش يا حزركم ,, لأنو ما بدي أعلق معوا ,,من غيرشي من يومين ,,علقان مع واحد أسخف منو بالسرفيس ,,المهم ,,كمان بلا طول سيرة ,,وبلا لعي على الفاضي والمليان ,,
يا أصدقائي ,,حطيت لساني بتمي ,,وخرست ,,وقلت ,,أمري لله ,,وبعد بشوي ,,بقول صاحبنا ,,
" والله 99.9 من البنات قليلين أدب ومافي تربية " ( أعتذر عن هذا الكلام لكل فتاة ,,ولكن اتكلم ما حدث معي بالظبط لكي يكون في كلامي مصداقية الراوي )
بعد ما سمعت منو هل الكلام ,,قلت ,,لهون ,,وبس ,,يعني صار لازم أحكي ,,ولو ,,حلي ,يعني ما معقول ضلني ساكت ..
قلتلوا ,,وعلى شو بينت كلامك سيدي الفاضل ,,قلي ,,يعني كانت ما لازم اترد علي ,,لأنو أنا انسيت قلكم أنو البنت كفرت كفرية كبيرة وقالتلوا ورصاص "
اللي المسكينة ما عندها غير هل الكلمة ادافع فيها عن حالها من الوحوش المفترسة في هل البلد ..
المهم يا سيدي ,,قال كان لازم ما ترد عليه ,,يعني عيب ,,لازم كانت تلتزم بأدبها ,,
لك أأأأأأأأأأأأأأأأأأأأأأأأأ أأأأأأأأأخ ,,شوفو مين عم يحكي عن الأدب ,,
قلتلوا ,,يا استاذ شوفير واللي عملتوا أنت قبل شوي شو ممكن اتسميه ؟؟!!
قلي ,,لاااااااااااااا ,,قلت أدب البنت مو متل قلت أدب الشب !!!! والله الصراحة ,,حاولت أفهم هل الجملة ,,بس ما ركبت معي كتير ,بس قلت أمري لله خلينا ننزل لعند مستوى تفكيروا وانشوف شو وجهة نظروا .
قلتلوا ,,ليش يا حبيبي شو بتفرق ممكن اتنورنا ,, قلي ,,يعني شلون شو بتفرق ,,كني أنت ما عم تفهم علي ,,يعني البنت غير الشب ,,
قلتلوا الصراحة لما اتربيت ما ربوني أهلي منيح ,,وكفروا وقالولي أنو البنت نفس الشب ,,فمن بعد أمرك ممكن اتصحح تربيتي واتقلي شو الفرق ,,يعني كمان الإنسان لازم يتعلم بهل الدنيا من الناس اللي بكونوا أحسن منو!! ,,لهيك فيدني بعلمك ,,
قلي عم تتمسخر ما هيك ,,قلتلوا ما عاز الله شو اتمسخر ما اتمسخر ,,بس قلي شو الفرق ,,
والله يا ساده يا كرام ,,قلي ,,يعني لو راح الشب يخطب وكان قليلي أدب ,,فببطلوا يعطوه البنت لأنو هو قليل أدب !!؟؟
وإذا رحت لتخطب وعرفت أنو البنت قليلة أدب فممكن تاخدها !!؟؟
طبعاً هو جاوب على السؤالين مو أنا ,,وقلي ,,
بالنسبة للأول ,,فأكيد مارح يرفضوا الشب والله لأنو قليل أدب ,,وأكيد ,,رح يرفضوا البنت لأنو هي قليلة أدب ,,
الصراحة أنا عم أسمع هل الكلام ,,ولا كأنو سوزان فوروارد قدامي ,,يعني معادلتوا أول مرة بسمعها بتاريخ العلم الاجتماعي وأفكاروا ,,ما ممكن أنو انقارنها بأي مفكر ..

اطلعت ,,شو ممكن قلوا ,,
قلوا أنت غبي ,,وما بتفهم ,,ساعتها بدي اتعالق معو ,,طيب حاول اقنعوا ,,والله اللي حكى هيك كلام غير قدرت ربك لتأقنعو ,,
ما كان قدامي غير قلوا ,,والله اقنعتني ,,قلي لكان ابن عمي البنت لازم اتكون عندها أنوثة وحيا ,,وما ترد على حدى بلطشها .. معك حق يا سيدي معك حق ,,
وبعد ما انزلت من التاكسي ,,ودفعت هديك الحسبة ,,حلفت يامين ما اطلع بتكسي ,,من بعد هل اليوم ,,
يعني فوق ما انجلطت من طلعتي بتكسي ,,فوقها جلطني من الحرة ,,
والله الطلعة بالسرفيس أرحم ,,يعني صحيح رح اتلاقي من أشكالوا كتير ,بس بتعرف حالك بسرفيس !!
لهيك ,,يا أصدقائي بنصحكم ,,من أخ لأخوه ,,ما حدى يوجع قلبوا بالتكاسي ,,

وبنصح البنات ,,ما يردوا إذا حدى لطشهم ,,ليش ,,لأنو بنظر عمنا الشوفير ,,عيييييييييب ,,وهي قلة أدب ,,

لك يلعن شرف هيك بشر بس ,,مارح تابع بالكلام ,,لأنو بتوقع لو تابعة رح أحصل على فصل من أخوية كلها على الكلام اللي ممكن يطلع معي ,,
بس ,,رح قول ,,كلمة أخيرة ,,
مجتمعنا لسع مسيطر عليه نظرة أنا شب وهي بنت ,,ولسع متعصب لكونوا ذكر ,,والذكر لا يلام ,,وأول ما بتعلم الأم لأبنها ,,وبتسمعوا هي ,,أنا ابني شب وما بخاف عليه بس بنت ,,لأ ,,هي بنت ,,وما بصير تتحرك بدوني ,,وما دام التربية لحد هل اللحظة عم تتبع هل الأساليب ,,
رح يبقى الشب شب والبنت بنت كما يراهم مجتمعنا لألف سنة جايين,,

حكمة أخيرة من الكلام اللي كتبتوا كلوا ,,

لما بتشوف ,,واحد حيوان ,,وغبي ,,, أبوس إيدك لا تناقشوا ,,لأنو رح تخسر ,,
وخلونا انحاول ,,نقتنع ,,أنو الشب ,,متل البنت ,,ما بيفرق ,,ما بيفرق ,,ما بيفرق ولا بشي بنوووووب ,,
لما رح يتصرف الشب تصرف مو منيح والبنت بتتصرف نفس التصرف ,,فرح اتكون العقوبة للتنين بنفس الدرجة ,,
وهي بكافة الأديان ,,وحتى بعيداً عن الأديان ,,في عرف أي قانون دولة ,,
لو بنت سرقة ,,وشب سرقة ,,ما بيعفوا عن الشب أو بحاكموا محاكمة مخففة لأنو شب ,,وببيحوا دم البنت لأنو بنت ,,
آخر شي اتذكرتوا بعد ماكتبت هل الكلام انو صاحبا الشفير اعتبر قلت الأدب للشب هي أنو بيقدر يخلص حالوا بس المجتمع عم يظلم الشب وبيسميها قلت أدب !!
لهيك الله يلعن هل المجتمع شو ظالم!!

ودمتم .

والله لو كنت بمحلك كنت نزلت من التكسي وحرقتو هو وياها وخلصنا منو ( عصفور بالجنة احسن من حمار على الارض)