المقاومة باسم الله أم الوطن ...

[الحب الازرق]

المقاومة....
المقاومة باسم الله او باسم الدين .. مقاومة ...
مقبولة هيك وهيك ...
طيب الرفاق الشيوعيين بالثمانينات بلبنان قاتلوا وقاوموا .. طبعا مو باسم الله ..ولا باسم الوطن .. قاتلوا باسم الاممية ومحاربة الامبريالية ..
ممكن نحرمهم اسم المقاومة ؟؟؟؟ لا طبعا
ممكن نقول انهم قتلوا هباء ؟؟؟ الظلم ان نقول هذا
المقاومة محترمة مهما كان السبب المهم ان نحترم صاحب المبدأ

[اية الرحمان]

كاتب النص الأصلي : Nirvana

يمكن يكون قد طرح الموضوع سابقا بشكل رئيسي أو ضمن موضوع آخر..
بس بظن انو هالموضوع مهم وبأثر بشكل كبير على حياتنا ..

في القرن الماضي عندما كان الاستعمار الاجنبي في بلادنا كانت الروح الوطنية و"القومية لمن يؤمن بها" هي المحرك الرئيسي لمقاومة الاستعمار ..
أما الآن فأصبح المحرك لمقاومة الاحتلال الاسرائيلي أو الأمريكي هو الدين ..

هل نقاتل لأجل الوطن أم لأجل الدين والشَهادة؟

وبعد ما نجاوب على هالسؤال في أسئلة تانية لازم نطرحها؟

الوطن ثم الوطن ثم الوطن (لان في الوطن اديان وللمتديين وطن واحد)

الدين للفرد والوطن للجميع

وبس نتوصل نحن العرب الى فهم هده المعادلة البسيطة راح تتحرر اوطاننا وتكبر قوميتنا العربية



وكل من مات في سبيل الوطن مات شهيدا والدين لا يختلف مع الوطنية ادا احسنا استخدامه بالعكس
وشكرا

[اية الرحمان]

[quote=abosleman;673853]

ولو انو في نسبة من هالعالم كانت امية او جاهلة بس عندهم كرامة وعندهم وعي قومي
ودافعو عن الارض مقابل الحرية لابناء الارض

عجبتني هالجملة لانو هدول الناس هنن يالي لولاهم لما شمينا ريحة الحرية والاستقلال

[vanina]

طيب
من ضمن هالموضوع بدي اسال سؤال يلي ردو عالموضوع ..
انتو في حدا منكون عنجد مستعد يفقد حياتو كرمال الوطن .... وعيونو
وياريت من دون كولكة

[اية الرحمان]

كاتب النص الأصلي : vanina

طيب
من ضمن هالموضوع بدي اسال سؤال يلي ردو عالموضوع ..
انتو في حدا منكون عنجد مستعد يفقد حياتو كرمال الوطن .... وعيونو
وياريت من دون كولكة

من اجل الوطن بضحي مو بس بعيوني وشو فايدة البصر ادا كان لشوف المستعمر عم يدعوس على تراب بلادي

حبيتي الوطن جزء من شخصيتك من كرامتك من وجودك
يعني شو فايدة انك تعيشي تحت الدل والهوان وبلادك مستعمرة الموت لتحريرها احسن
مهما تغربنا ومهما رحنا وجينا وحتى لو متنا بغير اوطاننا يوم تنادينا امنا وتطلب مساعدتنا فما فينا غير نلبي نداها وما ارخص نفسي امام كرامة بلادي وابناء بلدي

بعرف انو صرعتكم بهالديباجة بس مليون ونصف المليون شهيد راحو في سبيل وطني وين راح بان وسط هالمليون انا ولو فرنسا بنت الكلب فكرت بيوم ترجع فراح كون من اول من يضحو بالروح لاجل ان تحيا بلادي حرة مستقلة لمن سياتي بعدي
من غير كولكة
تحياتي فنوشة

[COSTA]

كاتب النص الأصلي : Nirvana

يمكن يكون قد طرح الموضوع سابقا بشكل رئيسي أو ضمن موضوع آخر..
بس بظن انو هالموضوع مهم وبأثر بشكل كبير على حياتنا ..

في القرن الماضي عندما كان الاستعمار الاجنبي في بلادنا كانت الروح الوطنية و"القومية لمن يؤمن بها" هي المحرك الرئيسي لمقاومة الاستعمار ..
أما الآن فأصبح المحرك لمقاومة الاحتلال الاسرائيلي أو الأمريكي هو الدين ..


هل نقاتل لأجل الوطن أم لأجل الدين والشَهادة؟



وبعد ما نجاوب على هالسؤال في أسئلة تانية لازم نطرحها؟

موضوعك ذو شقين
الاول هو مقاومة الاستعمار الاجنبي
التاني مقاومة الاحتلال الاسرائيلي الاميركي
الجواب على الشق الاول
عبر التاريخ ما كان في شي اسمو مقاومة يعني لما بلد تهجم على بلد كانو يدافعو عنها اهلها
بس انو الخريطة الجغرافية بهداك الوقت غير هاد الوقت .....( ومنرجع اكتر من القرن الماضي )
يعني كانت الدول العربية ( غالبيتها ) تحكمها السلطنة العثمانية ولما يدافعو عنها كانو يدافعو باسم السلطنة العثمانية لانو اذا خسرو بالدفاع بدو يحكمون غير ال عثمان متل ما صار بمصر دولة المماليك وبعدها دولة محمد علي
وحتى باوروبا كان الدفاع في سبيل المملكة او الامبراطورية يللي بحكمون ملك او امبراطور .......
يعني قبل بداية القرن الماضي ما كان في شي بالعالم اسمو قوميات او روح وطنية كان في شي اسمو دفاع عن الرجل يللي حاكم البلد .......
منرجع للدول العربية
الدول العربية ومتل ما منعرف انو كانت غالبية شعوبها تعتنق الدين الاسلامي ... وكانت السلطنة العثمانية تدين به
ومشان هيك ما كان فارقة مع الشعب قصة المقاومة لانو ما كان في شي اسمو قومية عربية ...
ولما صارت اتفاقية سايكس بيكو وقسمو السلطنة العثمانية بي فرنسا وبريطانيا... هون صار الشعب بدو يعمل دولة لحالو لانو كانت فكرة القوميات نشأت باوروبا ..... واستوردوها المفكرين العرب وعلى اساسها بنو القومية العربية في سبيل الدفاع عن البلد ونشات عند الغيورين منهم الروح الوطنية بحجة الوطن
الجواب على الشق الثاني
نشات دولة اسرائيل في زمن كانت الدول العربية اما مستعمرة او اخذت استقلالها من جديد .....
ومشان تستمر فكرة القومية العربية لم يكن من المقبول وجود دولة في عمق الوسط العربي تدعى اسرائيل لها قوميتها الخاصة ولها دينها الخاص وعاداتها وتقاليدها المختلفة عن القومية العربية
نشات فكرة جديدة اسمها مقاومة لانو من بعد تجربة حزيران 1967 لم يستطع احد من الدول العربية اعلان الحرب عليها ..... فغذتها الحكومات باسم المقاومة واسم الدين الذي يختلف عن دين بقية دول المنطقة العربية
ومن بعدها دخلت امريكا على الخط ودحشت مناخيرها في سبيل حماية مصالحها في منطقة الخليج العربي وخوفها من المد الشيوعي يللي بلش يتقوى في بعض الدول العربية وحركات التحرر يللي دعمها الاتحاد السوفييتي ..... وغذت فكرة المقاومة في سبيل الدين والله كونو الشيوعية تتنافا مبادئها مع هالفكرة
لكن بعد ما تفكك الاتحاد السوفييتي كانت هي المقاومة نمت وكبرت وبدها حجة حتى تضل مستمرة ومسيطرة ..
ولم تجد امامها سوى اسرائيل وامريكا هدفا لتظل مستمرة ....

هل نقاتل لأجل الوطن أم لأجل الدين والشَهادة؟

بالمختصر اذا بدنا نقاتل ....... فقط لاجل الحرية

[اية الرحمان]

كاتب النص الأصلي : COSTA

بالمختصر اذا بدنا نقاتل ....... فقط لاجل الحرية

رد ديبلوماسي

[Nirvana]

نا مع المقاومي في سبيل الوطن

وأنا كمان ..

انا مع المقاومة في سبيل الله ثم الوطن

اشرحلي ياها أولا .. شو يعني في سبيل الله .. هل الله محتل ويجب تحريره .. أم انت تقصد انك تقاوم وتحارب لأجل نشر الايمان به .. أم لتدخل الجنات التي وعدت بها ؟

رح أحكيلكم قصة من تضحيات حرب تشرين
في وحدة من الوحدات اللي كانت مكلفة بتحرير منطقة اسمها تل فرس على ما أعتقد
نادى الضابط المسؤول على سائق البلدوزر و قال له شايف هالحاجز المكهرب ما رح نقدر نعبر من دون ما نفتح
فجوة فيه و ما حدا بيقدر يعملها غيرك أنت جاهز ؟
جاوب الجندي : بكل تأكيد و بكل فخر
فال الضابط : أنت أكيد رح تستشهد شو طلباتك
الجندي : عائلتي و أولادي
راح الجندي يودع رفاقه و هو مليئ بالثقة و الفخر
طلع عالبلدوزر و قال يا عدرا ( بدون تفرقة أو تعصب ..الشب مسيحي من مرمريتا و أنا عم أنقل الحديث متل
ما اسمعتو بالحرف ) ومجرد ما رفع الحاجز قذفيتو الكهرباء 50 متر .
الرجل استشهد بس هيك تضحية ما بتنسي و رح ضل أحترم هيك شخص طول حياتي
وأخيرا المقاومة من أجل الوطن من أجل الكرامة

الروح هاي هيي اللي عم احكي عنها .. ليش بطلت موجودة .. يعني زمان كان في وطنية وهلا بطلت موضتها ..
ولا بطل يعنيلنا شي الوطن ..

المقاومة برأيي لازم تكون بشان مبادئ معينة

بعدين بيجو بشان الله وبشان الوطن

الانسان لازم يكون صاحب مبدأ .. وصاحب موقف .. مشان يقدر يدافع عن وطنو ..

[Nirvana]

كاتب النص الأصلي : abosleman

الفكرة سابقا كانت الدفاع عن الارض بغض النظر عن الدين
وكان الدين هو حافز مشجع ... لاء عفوا كان الايمان بوجود الله هو الحافز
كانت قناعت العالم اللي عم اضحي بروحها انوهنن عم يقدمو شي للوطن
وعم يفكرو بحرية الوطن ليعيش ابناء الوطن بحرية وكرامة ...وقتها كان في وعي قومي
ولو انو في نسبة من هالعالم كانت امية او جاهلة بس عندهم كرامة وعندهم وعي قومي
ودافعو عن الارض مقابل الحرية لابناء الارض
بس هلئ عنا تخلف قومي
في شغلة صارت معي من فترة مو بعيدة ابدا رح اذكرها ولو انها بعيدة شوي عن الموضوع
ورا الفندق اللي بشتغل فيه في قطة كانت على وشك انها تولد وكان زميلي بالشغل يطلعلها اكل كل يوم
ولو اضطر الموضوع انو يسرق الاكل من المطبخ وقت سالتو ليش هيك عم تعمل برد بكلام غبي كتير
بقول لانو سمع انو واحد من الناس مرة اعتنى بقطة وطعماها فدخل الجنة
وعلى فكرة عامل السبعة وزمتها هالبني آدم
انو بالنهاي التخلف وزرع افكار موجهة بعقول هالعالم المتخلفة هو اللي ورا نشوء هالجماعات الدينية او الطائفية
في نواحي تانية بنحكي فيها بعدين

ولهيك بحترم الفكر القومي اللي كان سائد بتلك الفترة ..
أما هلا ففي فكر ديني مسيطر ويا ريتو فكر .. هو أفكار متطرفة وبعيدة كل البعد عن الاعتدال أو المنطق .. وبتعتمد على إلغاء الآخر ..

[Nirvana]

كاتب النص الأصلي : الحب الازرق

المقاومة....
المقاومة باسم الله او باسم الدين .. مقاومة ...
مقبولة هيك وهيك ...
طيب الرفاق الشيوعيين بالثمانينات بلبنان قاتلوا وقاوموا .. طبعا مو باسم الله ..ولا باسم الوطن .. قاتلوا باسم الاممية ومحاربة الامبريالية ..
ممكن نحرمهم اسم المقاومة ؟؟؟؟ لا طبعا
ممكن نقول انهم قتلوا هباء ؟؟؟ الظلم ان نقول هذا
المقاومة محترمة مهما كان السبب المهم ان نحترم صاحب المبدأ

فكرتك حلوة .. بس برأي لازم يكون للوطن الأولوية .. قبل كل شيْ ..
في ناس بآمنو بالله وفي ناس متل ما قلت شيوعيين .. وفي ناس من أديان مختلفة .. وغيرو .. بس شو المشترك بيناتهم كلهم .. بالتأكيد الوطن ..

[Nirvana]

كاتب النص الأصلي : اية الرحمان

الوطن ثم الوطن ثم الوطن (لان في الوطن اديان وللمتديين وطن واحد)

الدين للفرد والوطن للجميع

وبس نتوصل نحن العرب الى فهم هده المعادلة البسيطة راح تتحرر اوطاننا وتكبر قوميتنا العربية



وكل من مات في سبيل الوطن مات شهيدا والدين لا يختلف مع الوطنية ادا احسنا استخدامه بالعكس
وشكرا [/center]

صحيح .. ليش ليختلف الدين مع الوطنية .. الدين هو علاقة الانسان بربو .. وما الها اي علاقة بالوطن .. متى اصبح الدين مرتبط بوطن أو الوطن مرتبط بدين ؟!

[Nirvana]

كاتب النص الأصلي : vanina

طيب
من ضمن هالموضوع بدي اسال سؤال يلي ردو عالموضوع ..
انتو في حدا منكون عنجد مستعد يفقد حياتو كرمال الوطن .... وعيونو
وياريت من دون كولكة

انا انسانة بكره العنف وبخاف من الموت .. بس بحس اني اذا كنت بهيك موقف مستعدة اموت .

[Nirvana]

كاتب النص الأصلي : COSTA

موضوعك ذو شقين
الاول هو مقاومة الاستعمار الاجنبي
التاني مقاومة الاحتلال الاسرائيلي الاميركي
الجواب على الشق الاول
عبر التاريخ ما كان في شي اسمو مقاومة يعني لما بلد تهجم على بلد كانو يدافعو عنها اهلها (اليست هذه مقاومة)
بس انو الخريطة الجغرافية بهداك الوقت غير هاد الوقت .....( ومنرجع اكتر من القرن الماضي )
يعني كانت الدول العربية ( غالبيتها ) تحكمها السلطنة العثمانية ولما يدافعو عنها كانو يدافعو باسم السلطنة العثمانية لانو اذا خسرو بالدفاع بدو يحكمون غير ال عثمان متل ما صار بمصر دولة المماليك وبعدها دولة محمد علي
وحتى باوروبا كان الدفاع في سبيل المملكة او الامبراطورية يللي بحكمون ملك او امبراطور .......(هاي على ايام روما)
يعني قبل بداية القرن الماضي ما كان في شي بالعالم اسمو قوميات او روح وطنية كان في شي اسمو دفاع عن الرجل يللي حاكم البلد .......(كتير هيك .. حتى على ايام الامبراطورية الرومانية .. كان الشعب يقول روما)
منرجع للدول العربية
الدول العربية ومتل ما منعرف انو كانت غالبية شعوبها تعتنق الدين الاسلامي ... وكانت السلطنة العثمانية تدين به
ومشان هيك ما كان فارقة مع الشعب قصة المقاومة لانو ما كان في شي اسمو قومية عربية ...(بس كان في مقاومة)
ولما صارت اتفاقية سايكس بيكو وقسمو السلطنة العثمانية بي فرنسا وبريطانيا... هون صار الشعب بدو يعمل دولة لحالو لانو كانت فكرة القوميات نشأت باوروبا ..... واستوردوها المفكرين العرب وعلى اساسها بنو القومية العربية في سبيل الدفاع عن البلد ونشات عند الغيورين منهم الروح الوطنية بحجة الوطن (قلتلي حجة )
الجواب على الشق الثاني
نشات دولة اسرائيل في زمن كانت الدول العربية اما مستعمرة او اخذت استقلالها من جديد .....
ومشان تستمر فكرة القومية العربية لم يكن من المقبول وجود دولة في عمق الوسط العربي تدعى اسرائيل لها قوميتها الخاصة ولها دينها الخاص وعاداتها وتقاليدها المختلفة عن القومية العربية (أما اسرائيل مسموحلها تعتدي على دولة أخرى بس نحنا ما بحقلنا نرفض دولة دخيلة معروف شو مصالحها بالمنطقة)
نشات فكرة جديدة اسمها مقاومة لانو من بعد تجربة حزيران 1967 لم يستطع احد من الدول العربية اعلان الحرب عليها ..... فغذتها الحكومات (بس الحكومات .. ما في دعم خارجي) باسم المقاومة واسم الدين الذي يختلف عن دين بقية دول المنطقة العربية (انت عم تحكي عن الدين الاسلامي؟؟؟!!! .. لانو هون ضيعتني .. ليكون عم تحكي عن حزب الله ولبنان.. بس انا عم احكي عن المقاومة بشكل عام)
ومن بعدها دخلت امريكا على الخط ودحشت مناخيرها في سبيل حماية مصالحها في منطقة الخليج العربي وخوفها من المد الشيوعي يللي بلش يتقوى في بعض الدول العربية وحركات التحرر يللي دعمها الاتحاد السوفييتي ..... وغذت فكرة المقاومة في سبيل الدين والله كونو الشيوعية تتنافا مبادئها مع هالفكرة
لكن بعد ما تفكك الاتحاد السوفييتي كانت هي المقاومة نمت وكبرت وبدها حجة حتى تضل مستمرة ومسيطرة ..
ولم تجد امامها سوى اسرائيل وامريكا هدفا لتظل مستمرة .... (وأميركا ما الها دور بشي بالنسبة للجماعات الدينية .. يعني ما كانت امريكا تغذيهم لمصالح خاصة بها في المنطقة ولا ضد المد الشيوعي في فترة سابقة ولا لكي تشعل نزاعات داخلية لتطبيق سياسة فرق تسد المعروفة جدا جدا في تاريخ دولنا؟؟؟؟؟)

بالمختصر اذا بدنا نقاتل ....... فقط لاجل الحرية

لاجل حرية ماذا؟
هل أنت تُجرد أبناء هذه المنطقة من وطنيتهم؟
هل الشعب مسؤول عن أجندة الحاكم تبعو وأحزابو؟

[maged-syrian]

كاتب النص الأصلي : Nirvana

اشرحلي ياها أولا .. شو يعني في سبيل الله .. هل الله محتل ويجب تحريره .. أم انت تقصد انك تقاوم وتحارب لأجل نشر الايمان به .. أم لتدخل الجنات التي وعدت بها ؟



..

الله عز وجل كرم الشهيد في سبيله لأبعد الحدود والشهادة في سبيل الله ثم سبيل الوطن الها فوائد منها :

الشهداء أرفع الناس درجة بعد الأنبياء ,
الشهادة في سبيل الله توجب الجنة ,
رسول الله عليه السلام قال:" ما من أحد يدخل الجنة يحب أن يرجع إلى الدنيا، وأن له ما على الأرض من شيء إلا الشهيد فإنه يتمنى أن يرجع إلى الدنيا فيقتل عشر مرات لما يرى من الكرامة، وفي رواية لما يرى من فضل الشهادة".

قال رسول الله عليه السلام :"لما أصيب إخوانكم جعل الله أرواحهم في جوف طير خضر، ترد أنهار الجنة، تأكل من ثمارها، وتأوي إلى قناديل من ذهب، معلقة في ظل العرش، فلما وجدوا طيب مأكلهم ومشربهم ومقيلهم، قالوا من يبلـغ إخواننـا عنـا أنا أحيـاءٌ فـي الجنـة نـرزق لئـلا يـزهـدوا في الجهاد، ولا ينكلُوا عن الحرب فقال الله: أنا أبلغهم عنكم، وأنزل قوله سبحانه:" وَلاَ تَحْسَبَنَّ الَّذِينَ قُتِلُواْ فِي سَبِيلِ اللّهِ أَمْوَاتًا بَلْ أَحْيَاء عِندَ رَبِّهِمْ يُرْزَقُونَ

الملائكة تظلل الشهيد بأجنحتها

الشهيد يشفع في سبعين من أهل بيته يوم القيامة


طبعا هاد الكلام ماراح تفهميه باعتباره كبير عليكي وباعتبارك مالك علاقة بشي اسمه دين... وانا كمان مو جاية على بالي افتح درس ديني ... بس لخصتلك اعتقادي بشكل عام ... وعطيتك بعض الافكار عن حب الوطن والدفاع عنه بالطريقة الاسلامية بوقت الحرب ....

وعلى فكرة هالمعتقدات هاي بتخلي العدو المحتل يكره حياتو لأن حيعاني بشكل كبير جدا وفوق طاقتو من كل شخص لديه تلك المعتقدات ...

[maged-syrian]

كاتب النص الأصلي : Nirvana

وبخاف من الموت .. .

لو كان عندك ذرة ايمان ماكنتي قلتي هالحكي لأن الارواح بيد الله ....
وبالنسبة للموت في ساحة الحرب ... فأنا بعطيكي مثال على شخص حارب باكثر من 100 معركة ... وقبل مايموت عالفرشة قال (والله لا يوجد شبر من جسدي إلا وفيه ضربة سيف أو طعنة رمح، وها أنا أموت كما يموت البعير فلا نامت أعين الجبناء)
هاد الشخص هو خالد بن الوليد ... يلي تمنى ان يموت بساحة المعركة متل الشهداء وتحسر على انه مات بالفراش متل اي شخص عادي
بس هاد دليل على ان الارواح بيد الله مو بايد البشر ( لو اجتمعت البشر على أن يضروك بشيء لن يضروك الا بشيء كتبه الله عليك ولو اجتمعت البشر على ان ينفعوك بشيء لن ينفعوك الا بشيء قد كتبه الله لك ) ....
خلاصة الكلام : الارواح بيد الله مو بيد المعارك حتى ولو كانت طاحنة

[اية الرحمان]

كاتب النص الأصلي : Nirvana

صحيح .. ليش ليختلف الدين مع الوطنية .. الدين هو علاقة الانسان بربو .. وما الها اي علاقة بالوطن .. متى اصبح الدين مرتبط بوطن أو الوطن مرتبط بدين ؟!

وانا حكيت انو الدين لا يختلف مع الوطنية بالعكس وهاد مو معناتو انو ضروري تكون في علاقة بيناتهم حتى ما يكونو مختلفين
مافيك تربطيهم ببعض الدين ملكية خاصة للفرد او مجموعة من الافراد والوطن ملكية مشتركة بين هؤلاء الافراد على اختلاف دياناتهم وهنن المواطنين

[كهربجي]

كاتب النص الأصلي : Madmax

لازم يكون الهنا هو الوطن .......و دينا المواطنة







و برأيي .... الوطن أقدس من الحياة ....و الكرامة أقدس من الحياة

الكثيرون يقتلون من أجل كرامتهم، أمّا أنا فكرامتي لا تسمح لي بالقتل...

[MadMax]

كاتب النص الأصلي : كهربجي مثقف

الكثيرون يقتلون من أجل كرامتهم، أمّا أنا فكرامتي لا تسمح لي بالقتل...

هي الشغلة نسبية بتختلف من شخص لآخر
بس سؤال الموضوع ....مو هل تقتل .... السؤال ..هل تقاتل في سبيل الوطن
يمكن في فرق بين السؤالين ما بعرف .....
بس المهم .... ما بظن حدا بشوف وطنو عم يعتدى عليه و بتقلو كرامتو يضل ساكت



ما حدا منا مع القتل ( حتى للمجرمين و قلنا رأينا حتى بحكم الاعدام مثلاً )
بس لما بيتعلق الأمر بوطنك ....و ببيتك و بأهلك ....بظن من العار الواحد يخنع