أفكار تحشيشية - صفحة 2

hanny dagher · 17/09/2006

اقتباس:

كاتب النص الأصلي : Syrian__Angel

لك هاني يا ريتك مخبرني من زمان مشان لعبة الجلاد حرامي ... يا لطييييييييف شو بحب اقتل انا

... كان دايما يطلعلي الجلاد " بسلخ من قلب ورب " او الملك " بطالب باشد العقوبات "

يعطيك العافية ابو الهن عالموضوع ... وبركي بس نستمخ شي نهار بنّزللنا تحشيشة صغيرة

يللا ناطرينك دمدوم

وينك يا نيرفانا

حشيشتي خلصت معد عم يطلع معي شي

krakish · 17/09/2006

هههه

متفاءلين فيو اهلو

ههههههه

hanny dagher · 20/09/2006

الموضوع يسلم لنيرفانا والسيريان انجل فقط زعيمات التحشيش

خلي بالكن من العيال يا بتعات

Nirvana · 20/09/2006

اقتباس:

كاتب النص الأصلي : hanny dagher

الموضوع يسلم لنيرفانا والسيريان انجل فقط زعيمات التحشيش

خلي بالكن من العيال يا بتعات

بعد انت وياه .. سمعتو شو حكا ..

تفضل أبو حشيشة ..

شكرا هاني وهاي استلمنا الراية ..

تابعونا تجدوا ما يحبط الاساس تبعكم .. بس صبروا علي شوي ها ..

وهاي أبو حشيشة الكم .. سمعت انو الكمية عندكم خلصت .. وهاد الموضوع ما بيمشي بدون (حبيب القلب أبو حشيشة

)

Nirvana · 20/09/2006

يا هاني رتبتلنا القعدة ورحت .. كنت ضل .. منفش خلقنا لبعض ..
خلاقنا ضيقة هالايام .. ما حدا طايق حالو واذا هو طايق حالو ايه بتكون حالو مو طايقتو .. ههههه

شو قصة هالعالم ..
يعني انا بكون صاحية بهداك النهار رايقة وفايقة وعين الحسود فيها عود .. ما بلاقي حالي غير فجأة بوزمت وهديت ويا ويلو اللي قدامي .. ومن غير سبب ..
انا بقول انو الواحد بكون مضغوط وفجاة بتكبس عليه الكشرة ..

هلأ بدنا نحدد اسباب الضغط لنقدر نعالج هالشي...
اتضحلي انو اهم اسباب الضغط هني الناس اللي حواليك وأهمهم أهلك .. انو شو بصير اذا حلو عنك شوي .. بينقص من قيمتهم شي .. يعني الاهل بربو وبيتعبو وأفضالهم مغرقيتنا .. بس يا عمي خلص .. مو قادرين نتنفس من أفضالكم ..
ما رح نقدر نعيش بطريقتهم بأسلوبهم ... يعني بالوقت اللي كانو هني بعمرنا كانو يلعبو بالحارة بلعب شرايط وجبصين (هاي للبنات) وعربيات سلاك وطابات برضو شرايط (هاي للصبيان).. صرنا نلعب هلأ نتورك جيمز ، وأون لاين جيمز مع ولاد الحارة اللي بالطرف التاني من العالم..
يا خيي ما عم يعرفو يلتقو معنا بنص الطريق .. لك صرنا لافين مرتين حوالي الملعب وما كانو يوصلو ..
حتى الحفرة تبعة الأجيال هاي .. ما عرفو يعبوها ..

قول هالحفرة عمرها ما بتتعبى لا هاي تبعة الأجيال ولا تبعة الحضارة ولا تبعة الثقافة .. كلها حفر ويا نيالو اللي معاه سيارة ..

وحششنا يا بو حشيشة حششنا ..

Syrian__Angel · 20/09/2006

ايييييييييييييييييه والله حطيتي ايدك عالجرح

لا نحنا عم نفهم عليهم شو بدهم بالضبط !! ولا هنن كانو يفهمو علينااا ....
وعيشي وتكيّفي مع هالحالة اذا فيكي تعيشي !

ذكرتيني بوقت اتخانق مع اهلي وتفقع معي .. بقلهم اي احمدو ربكن انو عايشة معكن

ع اساس هنن متمسكين فيني كتير وما بدهم يخلصو مني

شكرا نيرفانا، تحشيشة ظريفة كتير

ووو ابو الهن الغالي ... لك انو صحي ما سمعت آخر خبرية ؟؟؟

قال انا بطلت تحشيش

لاء عم امزح ... بس بهالوقت ما عم افضى بالجامعة لحتى افتح اخوية الا " سرقة " ... بئا انشالله شي نهااااااااار لازم لازم طجّلي شغلة ... اي رح يطق قلبي يوووه على قد ما عم اسكت !!

**abosleman** · 20/09/2006

على البحر يا كروم

**TheLight** · 20/09/2006

طيب بما انو السيد هاني نكوش ع الموضوع وحمل حالو وراح وما حددلنا مين خليفتو بهالموضوع التحشيشي فانا سمحت لحالي اكتب شوي لبين ما يجي (بعدي اسمو) من رحلتو مع حبيبتو وشغلو وكتبو
انو انا صحيح ما بحشش بالعادة لانو الحشيشة غالية وانا طالب ع قدي والحالة ضيقة شوي (وصار لازم ورثها لابن عمي الاصغر مني لأنو ما عاد اجت علي).....بس انو بهالكم يم صار لازم حشش لأنو اذا ما حششت بدكون تشوفوني بعد كم يوم سارح بالبراري ونازل حش مع الدواب والبهائم (حشا السامعين)
أنو يا جماعة...سمعانين بشغلة اسمها تحت الاشراف؟؟؟ولاحظو انو كلمة (تحت) لازم تكون مدحوشة وين ما كان منشان نضل نحس حالنا اننا تحت وفي شي فوقنا....
انوهي يا جماعة شغلة (تحت الاشراف) شغلة بسيطة نظريا وفينا نعتبرها من المنجزات الطلابية برعاية الاتحاد الوطني لطلبة سوريا (وسيريتل ونستله)...و بمقتضى هالمنجز بيحق للطالب الملعون جدو ويللي عم يدرس برا انو يبعت مصدقة جامعية من جامعتو تثبت انو طالب وهالمصدقة بتمرق ع السفارة السورية العتيدة بالبلد يللي عم يدرس فيه (طبعا بعد سكاتعش محاولة فاشلة للاتصال بالسفارة لانو الشباب بيكونوا عم يضربوا متة وفستق وعم ينقو بقدونس وكل مرة بيطلع المجيب الالي) وبعد ما تنختم من الفسم الثقافي بالسفارة بتبعت ع وزارة التعليم العالي بالقطر العربي الحبيب سوريا وبعدين بينحط الطالب تحت الاشراف.....
هلق لهون اكيد معظمكون ما فهم ليش بينحط الطالب تحت الاشراف....لانو نحن عنا اختراع اسمو خدمة الزامية او خدمة علة او خدم جيش...وع هالسيرة تذكرت شغلة....
قال هاد يا جماعة وقت الواحد بيصير عمرو مناسب لينشحط الى الجيش ليصير من القوات الباسلة...بيبعتولو ورقة اسمها (مذكرة تبليغ الى السوق) والسوق بفتح السين...وهي مشتقة من الفعل (ساق_يسوق) وحسب مختار الصحاح تبع ضيعتنا وسائر الضيع السورية فان السوق هو المقصود فية سياقة القطيع من المنزل للمرعى والعكس بالعكس....طبعا وفهمكن كفاية.....
هلق منشان ما (ننساق) الى الجيش او منشان ما ننعفط بالمطار بس نرجع ع البلد ومنشان ما ننشحن بسيارة الجيب لفرع المخابرات....ومنشان ما نعذب الشبيحة بصفق الكفوف منشان يخلونا نعترف ليش هربنا من الجيش....ومنشان ما نشغل قلب الماما نتوفة علينا....ومنشان ما نخلي معارف البابا يتصلو بالمعارف تبعوت المعارف تبع مدير فرع فلسطين...ومنشان ما ينخطف لون اختي يللي ع وش جواز....ومنشان ومنشان ومنشان....بنقوم بنحط حالنا تحت الاشراف وبناخد ورقة من وزارة التعليم العالي وبنعتها ع شعبة التجنيد....
هلق كل هالكلام مانو مهم....المهم انو كيف بدك تحط حالك تحت الاشراف يا حباب....
رحنا بعتنا مصدقة من الجامعة موثقة وموقعة من السفارة السورية....وخلينا البابا يللي صار عمرو بالستينات يروح ع الوزارة....منشان يدحشني تحت الاشراف....راح البابا....قالولو بدنا عشرين ورقة...من بيناتهم ورقة لاحكم عليه...هلق ولرقة لاحكم عليه بدها الهوية الشخصية والهوية الشخصية معي هون....بس ما بيقبلو الا الهوية الشخصية الجديدة....وانا ما معي الهوية الجديدة لانو سافرت برات البلد قبل ما تكون الهوية الشخصية الجديدة جاهزة....طيب هلق صارت جاهزة..اي بس ما فيه حدا يستلملي ياها لانو لازم ابصم وسلم الهوية القديمة....اي شو المعنى؟؟؟المعنى انو والله يا حباب بدك تنزل ع سوريا منشان تبصم وتاخد الهوية الجديدة...اي بس يا معلم انا بفرنسا والنزلة صعبة....اي يا زلمة انت عايش بفرنسا والله اعلم قديش عم تقبض باليورو يعني شو بتكلفك النزلة ع سوريا منشان تستلم الهوية الجديدة ومنو بتشوف البابا والماما...بس يا معلم ما فيني انزل قبل ما حط حالي تحت الاشراف منشان ما يعفطوني بالمطار لانو اذا نزلت بيعفطوني.....ااااااااااه اذا هيك والله بدك تدبر راسك.....

وفهمكم كفاية....بدها بورية حشيش ولا لاء؟؟؟

handsome · 20/09/2006

the light , bs ser balbet b7kelk 2sty , obdon ma 2nb7t

**TheLight** · 20/09/2006

ناطرك خيي وسيم
بعدين بهالموضوع يحلو الانبحات
ولا شو رأيك؟

layla · 20/09/2006

اقتباس:

وفهمكم كفاية....بدها بورية حشيش ولا لاء؟؟؟

mbla bdha kteeeeer

Nirvana · 20/09/2006

اقتباس:

كاتب النص الأصلي : TheLight

طيب بما انو السيد هاني نكوش ع الموضوع وحمل حالو وراح وما حددلنا مين خليفتو بهالموضوع التحشيشي

عمو ذي لايت .. اذا انا مو معبية عينك ها .. خبرني .. بس لاعرف مو منشان شي ..

لانو عمو هاني سلم الراية لالي ولسيريان انجل .. كما سبق وورد أعلاه (هاي حلوة ما تقلي ..)

أما من جهة تانية .. فأهلين وسهلين بالرجعة القوية .. يا هيك الخبريات يا بلا .. وهاي تحشيشة من أبو حشيشة

Nirvana · 20/09/2006

ما بخفيكم أنو ساعة السرحة بتسوى عمر ..
أكتر شي بصير معي .. انو انا بحب لت واعجن كتير

,, هلا مو كلو بلا طعمة ..لا كلو بطعم ولذيذ ورايق .
بس شو بصير معي ..
بتكون جايتني السرحة وطلعت بشي فكرة غير شكل .. بس احداثيات السرحة ما بتكون زابطة ..
قولولي ليش؟

أنا بقلكم .. ما بتيجي هالسرحة الا وانا بشتغل أو بالطريق لمحل أو بمكان لا في كمبيوتر ولا قلم وورقة .. ومحسوبتكم الذاكرة عندها 1mb بس

.. يعني رح اضطر شيل فايلات مشان حط محلها .. ويا عمي كلو مهم ..

بحاول عيد وزيد بهالفكرة وعيد وزيد وعيد وزيد .. وبسابق الوقت والسيلات العصبية تبعة مخي وبعمل حصار على الفكرة

.. وما بوصل للكمبيوتر أو للورقة بتكون الفكرة فقدت ملامحاها .. ووييييييييييييي طارت ..

ومية مليون ابو حشيشة

ما كان يرجعها..

Gazita · 20/09/2006

اقتباس:

كاتب النص الأصلي : hanny dagher

الموضوع يسلم لنيرفانا والسيريان انجل فقط زعيمات التحشيش

خلي بالكن من العيال يا بتعات

وانا كمان كان بدي حشش هون
بلاها بطلت حشيش

**TheLight** · 20/09/2006

اقتباس:

كاتب النص الأصلي : Nirvana

عمو ذي لايت .. اذا انا مو معبية عينك ها .. خبرني .. بس لاعرف مو منشان شي ..

لانو عمو هاني سلم الراية لالي ولسيريان انجل .. كما سبق وورد أعلاه (هاي حلوة ما تقلي ..)

أما من جهة تانية .. فأهلين وسهلين بالرجعة القوية .. يا هيك الخبريات يا بلا .. وهاي تحشيشة من أبو حشيشة

منشان الله بدك ما تواخذيني ما بعرف كيف ما انتبهت ع رد السيد هاني وهو عم يسلمكون الخلافة

ومدام هيك الموضوع انا بسحب موضوعي من هون بس للاسف مروا عشر دقايق وما عاد فيني احذف الرد

بس مو مشكلة راح نعتبرو سقط سهوا

وننتظر مواضيعك التحشيشية انتي وسيريان انجيل

Nirvana · 20/09/2006

اقتباس:

وانا كمان كان بدي حشش هون
بلاها بطلت حشيش

اقتباس:

منشان الله بدك ما تواخذيني ما بعرف كيف ما انتبهت ع رد السيد هاني وهو عم يسلمكون الخلافة

ومدام هيك الموضوع انا بسحب موضوعي من هون بس للاسف مروا عشر دقايق وما عاد فيني احذف الرد

بس مو مشكلة راح نعتبرو سقط سهوا

وننتظر مواضيعك التحشيشية انتي وسيريان انجيل

شو يا جماعة .. ما بتلقو كلمة .. لا هو موضوعي ولاشي ..

شو هالحساسية هاي.. بعلمي انا حساسة كتير .. بس انتو طبشتو الميزان ..

طولولي بالكم شوي .. واذا اتضايقتو .. اعتذاراتي ..

انا ما قصدت غير مزح وتعقيب على كلامك ذي لايت .. وانت جازيتا .. ما فهمتو من كلامي غير هالشي ..

COSTA · 20/09/2006

بدي حشيشة

مشان روق على الاخر

وروح فيها شي مؤبد

Nirvana · 20/09/2006

اقتباس:

كاتب النص الأصلي : كوستا

بدي حشيشة

مشان روق على الاخر

وروح فيها شي مؤبد

شو بدك بالمؤبد ركزلي بالحشيشة شوي