تأكل جسم ضحيتها دون أن يشعر بشيء

[Mr.yosef]

والله ما أصرت فيهن هالعناكب!! مو هيك ؟؟

[mhmary]

right abo past

[Joe]

مرحبا أخ keko

اخي مشان اليابان الوضع كان مختلف تماما عن مجرد هجوم مباغت.. العلاقات كانت قائمة بين البلدين و في محادثات و كلشي.. و فجأة تم الهجوم. على كل حال انا ماني خبير بهل موضوع و ما هوي موضوعنا اصلا

نحنا موضوعنا بين العرب و أميركا... بين مين الحيوانات و مين البشر.. بين مين بيحقلو يحكي.. و بين مين لازم يضل ساكت و يروح يظبط بلاده قبل ما ينتقد غير ناس. الشغلة بسيطة جدا.. و ما بدها لا يابان و لا فييتنام.

و ع فكرة مشان أوروبا و أميركا.... مان أي "حضارة" لسا عم تحكي عنها... لسا عم تحكوا حضارات و عمر حضاري.. و ثقل حضاري و مدري شو.. يا أخي هادا كلو حكي فاضي هاد.. بيعلمونا اياه بالمدارس العربية.. مشان الشعب يضل مبسوط و فخور .. انو شعب صاحب حضارة!!!! ما نحنا يمكن ما خربنا الا هل الحكي عن الحضارات... لساتنا منحكي بالحضارات و العراقة و هل حكي الرومانسي... اخي التطور = (عمل + رأس مال + حرية + نشاط + دقة + نظام + الخ الخ الخ)... شو بدها تعملي الحضارة.... ليش انت لما ولدت يا أخي .... كنت متذكر شي مثلا من حضارات الفينيقيين أو الاراميين.... ؟؟؟

مان اسمحلي وضح الفكرة شوي
في نوعين من الوراثة.. وراثة جينية.. و وراثة اجتماعية... يعني تناقل الاعراف و العادات ضمن المجتمع. انت اكيد قصدك على هاد النوع من التناقل لما عم تحكي عن الحضارات.
بهل الحالة
هل النوع من الحضارة.. مارح ينفعنا كعرب نهائيا... لانو العرب صرلهم غارقين بالتخلف منذ اواخر العصر العباسي. و الحضارات السابقة ما قبل المسيح.. أكيد انقطعت عنا نهائيا .يعني ماعاد في "وراثة اجتماعية" بين اهل هدوليك العصور و نحنا هلق.. بقي منها فقط العصبية القبلية و المذهبية و العقلية الشرقية المحافظة... و هذا كله لا ينفعنا الان.

اوكي شيلك من هاد هلق
منرجع عل الاوروبيين
من حيث الحضاراة العصرية التي كان يعيشها الاوروبييون قبل الحرب... أكيد ما لحقت تتلاشى بفترة الحرب. بس مان هاي نفسها مشتركة بينهم و بين الامريكيين... يا اخي هدول نفس الشعوب.. حتى فيك تقول اميركا تاريخها الحضاري و البشري.. اقوى... لانو فيها من كل الدول الاوروبية.. و اضافة الى ذلك شعوب و حضارات من مختلف اصقاع الارض!

بقى الفرق الوحيد... الذي قصدته انا... هوي ان الامريكان كان معهم مصاري و مشاريع .. و الاوروبيين منهارين... فاوروبا احتاجت للمساعدة الامريكية حتى تنهض. و من هنا كان قولي... انو المانيا و اليابان تطورا بفضل اميركا
نحنا شو دخلنا ما اذا كانت المانيا دولة قديمة .. و اميركا دولة حديثة... يهمنا مين شغل هذه الاموال.. و من حرر هذه البلاد.. و مين رجع عمرها

ثم يا اخي... اكبر دليل... المانيا الغربية.. و المانيا الشرقية...اميركا اشتغلت بألمانيا الغربية... و فيك تقول الشرقية ضلت ع حالها ... قارن بين اسرائيل.. و باقي الدول العربية.. اسرائيل تتلقى الدعم الامريكي.. و نحن صامدون على حضاراتنا

سنغافورة و تايوان... ما بعرف شو عندهم حضارات قديمة... بس اكيد ما صاروا هيك بعملهم الشخصي

و نفس الشي اليابان و المانيا... وين عم تقلي هدول دول قديمة و هاي دولة جديدة... اميركا ما اجت تعملهم النظام و الدقة.. هاي اشياء بيعرفوها افسهم... بس عمرت لهم بلادهم من اول و جديد

طبعا انا بتمنى ما تتحول المواضيع لانتقادات شخصية او مذهبية... و بعتذر اذا ازعجتك بطريقة كلامي... بس انا هادا اسلوبي طول عمرو... و بحاول عبر عن رأيي بصراحة و بكل وضوح

سلامات

جو

[Hasanco]

مرحبا على الكل
كيف شباب الموقع
اولا برد على الأخ جو بمقولته الحيوانات قليلة الحس وهدا خطأ الحيوان يحس مثل أي مخلوق آخر والدليل أن الحمار الذي تكلمت عنه عندما تضربه يتألم (وممكن من الألم أن يرفسك) لا أقصد التجريح... والدليل أن الحيوانات تحس هو جمعية الرفق بالحيوان ؟؟؟؟
أما عن البشر المتحيونة بكلامك (عفوا للهجة ولكن انت من كتب!!) فليس من حق أي شخص وصف الانسان بالحيوان لو مهما كان الأمر إلا إذا نزل لدرك الحيوان وبدا يصف بدون أي مسؤولية
بالنسبة للشعوب المتخلفة التي تتكلم عنها هدول بالبداية والنهاية أهلك ووطنك ولا انت متبري منهم وتذكر الكلمة اللي بتقول اللي ما في خير لأهلو ما في خير لحدا
طبعا لأنك متأثر جدا بالمجتمع الغربي نسيت روح الشرق لا أعرف معنى الحرية بنظرك ولكن أدرك أنك شخص غير متفهم ؟؟؟وطالما أنك تلقي السباب والشتام مثل كلمة (الخراء) واعتذر من زملائنا بالمنتدى على تكرارها فأنت لا تختلف عن هذه الشعوب المتخلفة بشيء لماذا لا نبدأ بتهذيب أنفسنا أولاً
وبالنسبة للعصابات الموجودة بالعراق كما تسميها هم ليسوا غارقين في مشاكل الحسين أو علي بل غارقين بالدفاع عن أمهاتهم وبناتهم وعرضهم وليس كما تقول ولا يا أخ جو اللي بدافع عن شرفه عقلوا صغير برأيك؟؟؟؟
وطالما أن رأيك ما زال فخار يكسر بعضو فلماذا تتكلم بلهجة غير مسؤولة
وصدقا يا جو أن العرب قتلوا على أيدي الأجانب أكثر أم نسيت ميسلون ونسيت النكبة والمذابح الفلسطينية ونسيت النكسة 67 ونسيت أمجادنا في تشرين (الله يرحم شهداءنا ) من الممكن ان النظام الخميني أن لا يكون جيد لا يمكن لي أن أحكم لأني لم أعشه فلا أستطيع رمي الكلام بالهواء كما تفعل ولكن هل سألت الشعب الإيراني هل كان مرتاحا معه أو لا؟؟؟
بالمناسبة لماذا ترد نسبة الأحصائيات عندنا في الوطن الأم على أنها خاطئة (حيث كل ما تقوله هو قيل عن قال ) ولا يوجد اثبات ؟؟؟؟
وكيف يا جو عم تقول وتكذب ماشاهده العالم على الفضائيات من فضائح المسجونين في العراق
لا أعلم ماهو تفكيرك لماذا لا تقول انو امريكا اتت لتستغل شعوب المنطقة اهذا هو التحرير الذي تطالب فيه؟؟؟؟؟
بالنسبة لأفاميا انا ابن المنطقة واؤكد لك أن الآثار تسرق بجميع الدول وأكبر دليل أن تسأل نفسك أين الآثار المصرية ومن سرقها او انك لا تعرف ؟؟؟ أما عن تزفيت الطرقات فوق الاثار فهذا افتراء وفيه تزوير واضح للحقائق وكره للجهة السؤولة لا أعرف سببه
بالمناسبة انت مثل بقية شبابنا الضائع لا يستطيع أن يعيش غربيا ولا شرقيا ضائع في الوسط يعني مع التيار الماشي ....
أتمنى يا جو أن تنظر ألف مرة في مرآة نفسك وتتجرد مرة واحدة من المجتمع الذي تعيش فيه
وما زلت أأسف على شبابنا الذين يشوهون وجه الوطن في الغرب وأعود لأسألك متى آخر مرة زرت أرض سوريا وقبلت ترابها أم صرت متلك متل أي شخص أجنبي يدوس على تراب هذا الوطن
تقبل تحياتي بكل صدق واخلاص

[Hasanco]

الى الغالي جو
بدي اسألك سؤال مين قصدك بجملة يروح يظبط بلاده ؟؟؟؟
وانا مع الأخ keko بمسألة الحضارة فالحضارة ليست رومانسية بل عمل ورأس مال ونظام اعتقد أنها الحضارة الذي قصدها زميلنا ففسرتها انت على انها حكي فاضي؟؟؟
ما معنى العادات والتقاليد بوجهة نظرك هل هي خيمة وصبوا قهوة مرة!! اتركني صححلك معلوماتك وقول انو العادات والتقاليد البالية الي عم تحكي عنها هي الاخلاص حب الأهل وما الى ذلك من عادات ربينا عليها نحن الشرقين وخليني ذكرك انو هي العادات مذكورة بالديانات كافة
وخليني ذكرك الحياة بدون رومانسية تجعل الانسان كالحيط وتدفعه للانتحار(هدا الحكي فيه دراسة واحصائيات موثقة)
وما زلت ترى ان الأمريكين هم مخلّصوا العالم يا ترى الى متى دعني اذكرك ان كل دولة لها خط بياني يعلو ويوصل للقمة ثم يهبط من جديد والأمثلة كثيرة وبالنهاية بقول انو الدولاب بضل يدور
ممكن اقتبس منك شغلة بعد اذنك:
طبعا انا بتمنى ما تتحول المواضيع لانتقادات شخصية... و بعتذر اذا ازعجتك بطريقة كلامي... بس انا هادا كمان اسلوبي طول عمرو... والصراحة اهم شي

على فكرة ورغم الخلاف بوجهات النظر حبيتك وشكراً

[Joe]

مرحبا صديقي

أنا بصراحة لا أحب اللف و الدوران كثيرا... و أصبح كلامنا هنا فقط لف و دوران... و لطالما دخلت في نقاشات مماثلة و على أن أعترف ان هذه كانت اكثرها احتراما و جدية.. و لكن للأسف جميعها تنتهي في نفس الطريقة... حيث يبدأ الجميع بالتلميح الى اشياء .. كأنني لا أحب وطني او أنكر أصلي.. و انا لست مستعد ان أكمل النقاش بهذه الطريقة. ثم ان نقاشنا اخذ يتجه الى اتجاهات لا أحبذها أبدا قمت انت بذكرها... لذلك انا أنسحب من النقاشات السياسية هنا... و لكن لنا عودة

تقبل تحياتي

جو

[keko]

أنا برأيي أنو ننهي النقاش عند هذا الحد
وإلي رجاء خاص أنو كل اللي كتب ردود على هل المقال يعيد قراءة المقال كلو
ويحاول يشوف بنظرة متجردة الأفكار المطروحة
وكلو للخير والتقدم
أكيد كل الأفكار اللي انطرحت برأيي كان هدفها هوي الحوار مع الآخر واللقاء معه
وهادا أهم شي ممكن أنو في البعض غلطو بكلمة أو جرحوا الأخر بس بقول للكل بكل محبة أنو ما حدا يزعل من التاني وهادا يعتبر اعتذار عن الكل من الكل فاقبلوا الاعتذار

أنا بالاذن منكن رح أقفل الموضوع

[وائل 76]

كاتب النص الأصلي : keko

أي والله ومن الميز اللي الله عطاها لها البشر ضرب الأمم والشعوب الأخرى لانو بيفكروا حالهن انو شعب الله المختار
هوي تاريخ أكيد الكل بيعرفوه بس رح رد عيدو للتأكيد
1945 أريكا تلقي بأول قنبلة نووية على مدينة هيروشيما فتعلن اليابان استسلامها ولكن ذلك لم يكفي أميركا فتلقي بعد ثلاثة أيام قنبلة أكبر وأشد على مدينة ناكازاكي
الحرب التحريرية في فييتنام والكل يعرف ما ناب الفيييتناميين من الجيش الأمريكي المحرر
تجويع العراق لما يزيد عن 11 سنة و ايصاله لمرحلة بدائية بعد أن كان من الدول العربية الأفضل كانت نسبة الأمية فيه صفر بالمية هادا سنة 1980 علما أن اميركا هي من دعمت حرب العراق ضد ايران و هي من ألمحت لدعمها حرب العراق ضد الكويت (ما بذكر مين كان وزير الخارجية تاكدو شو قال لصدام أثناء الزيارة للعراق قبل اندلاع الحرب)
أميركا هيي اللي دعمت بن لادن طوال عشرات السنين ضد الاتحاد السوفياتي وهلق صارت بدا تتخلص منو لانو ما عاد في اتحاد سوفياتي
أميركا المحاميي للعدالة استخدمت حق الفيتو بعدد خيالي ما بذكر قديش يمكن 80 (بركي الاستذ بيصلحلي ) ضد قرارات تدين اسرائيل لجرائمها الفظيعة بحق الفلسطينيين (ومعروفة لوين وصلت القضية الفلسطينية هلق...)
أمريكا وتاريخها المشرف لا ما رح قول تاريخ رح قول واقع
أمريكا وواقعها المشرف في الأمريكية الجنوبية من اغتيال رؤساء لتغذية ثورات لتجويع شعوب
حصار اقتصادي لكوبا هلق لو بدها أميركا تقيم كاسترو من الحكم ما كانت شالتو بس هيي ما بهمها هادا الشي هيي بهمها تجوع الشعب الكوبي .. لتخلي الشعب الأميركي شبعان
أمريكا بتكب كل سنة آلاف الأطنان من الحبوب والقمح بالبحر (بتغرق سفن..) لتحافظ على قيمة الدولار بالوقت اللي 48 ألف انسان بيموت كل يوم من الجوع
أمريكا لها الحق في امتلاك النووي واستخدامه وغيرها ليس له الحق أصدقاء أميركا لهم الحق في قتل الأبرياء و مخالفة القوانين و لا يحق لاحد أن يقول لهم هيك مخالفة للقانون حتى الكلام ممنوع بالفعل ديمقراطية


يا شريك هادا اسمو تخلف وكل العالم بيرفضوه وبكل مجتمع في سلبيات و في ايجابيات وهاي الشغلات عنا بيسموها جرائم
والمجتمع الأمريكي من أكتر المجتمعات اللي عنها جرائم وبنسب مخيفة (فيكن تشوفوها بالانكارتا) بينما بلادنا من أقل البلدان بنسبة الجريمة
أميركا بلد غني لذلك ممكن انو نوع الجرايم يكون غير الشكل اللي طرحتو يا جو بس بلادنا بلاد فقيرة لذلك هاي الجرايم هيي المنتشرة
ومع هيك هيي حوادث فردية
معك حق انو المراءة ماكول حقها بمجتمعتنا بس ما الحل انو تجي أميركا تغتصب رجالنا بالسجون لحتى يصير في مساواة بين الرجل والمرأة
أميركا ما اجت لتعمل ديمقراطية بالعراق أميركا اجت تنهب العراق وتزيدو تخلف وفقر
من أول ما فاتت تركت الشعب يقتل بعضو الفوضى عمت المتاحف انسرقت ووي كانو الأميركان كانو عند وزارة النفط عم يطمنو قديش ربحت الصفقة معهن ...



بقى يا شباب أميركا يمكن بتمثل القوة العظمى بتمثل الرفاهية - الازدهار - الغنى - التقدم العلمي ......
بس أبدا ما بتمثل الحضارة و الحرية و التقدم ....
وأنا ما عم ادعي انو نحا منمثلن ....!!!!؟

[Government]

لك هالموضوع شقد صلوا

شو مشان النكش