سوريا تصنّع سياراات

[handsome]

هلق عنجد منفكر بالموضوع بشكل حيادي .. يعني شو ناقصنا لحتى ما نصنع سيارات .. ما بعتقد انو من اول دفعة رح تكون سيارة قوية وجبارة وتضاهي السيارات المستوردي بس رح تكون قطع الغيار متوفرة بسهولة ولازم تكون باسعار رخيصة كمان ..
وليش شبون الرافعات المصرية لمعباي الشرطة ... مكتوب عليون وبالعريض وبكل فخر واعتزاز صنعت بمصر.... شو كان صار لو نكتب صنعت في سوريا ما بتطلع احلى
و اي مقاسات رح تطلع باول دفعة .. بين شي اما اسا
وخلو السيارات الالمانية تسنا كام سنة وبعدين تارجينا حالة ..


بس ليش الكذب انا ما رح غير ورح ضل من محبين الالماني وبكل الانواع... الله يرزقنا

[sweetbaby]

يعني وانا مافهمت وين النكتة بالموضوع
بس ياريت يكون هالخبر صحيح مشن كل اللي عم يضحكو ينخجلو

[قلب المثنى]

كاتب النص الأصلي : handsome

يا ســــــــــــــــلام شو هالخبر الحلو ... وبالله رح يصدرو منة لالمانيا شي بركي بجيب وحدي وبارجي الالمان قيمتون ... قال شايفين حالون بال مارسيدس والبي ايم دبليو والبورش و ؤبل و فولكس فاغن ... بس خليون يستنو لتجي السيارة السورية( والي بأشراف ايراني او صيني يعني عظمى على عظمى) وبيعدين يارجونا حالون ...
بس بالله ما قلتولنا شو رح يسمو هالاختراع ...

ليش مستغرب نحنا عنا إمكانيات فنية وتقنية هائلة وأكتر من كتير دول مصدرة وأنا واثق إنو إذا أنوجد الدعم المادي راح تكون سيارة تنافس كتير سيارات منتشرة بباقي الدول

وللمعلومية إيران صارت في عندها أربع أجيال من السيارات الممتازة والعملية
ومن هاي السيارات سيارة أسمها (جيب صحراء) إلّي حلت مكان الجيب واز واللند روفر بالجيش

وأشتهرت السيارة بإسم عابرة الصحراء

[قلب المثنى]

كاتب النص الأصلي : gaby swed

أنتو ما فهمتو شو مبدأ السيارة السيارة رح تتصنع من أفخر الأخشاب وبيقولو من خشب الزان بدون يعملوها بس الإطارات متل العادي ما في غير أفاميا أما الموتور هوي مو موتور بس متلو تقريبا هوي حصانين يعني

هيي متل السيارة

لو بس تفكر ؟؟؟
ليش في عنا سيارات بسوريا موديل 1950 ولسة ماشية متل العروس
مع العلم إنو بالمصنع إلّي تصنعت فيه السيارة ماإلها قطع غيار
هذا دليل إنو الفني السوري بيعمل المستحيل حتى يلاقي الحل المناسب
وهذا دليل نجاح واضح على مبدأ الحاجة أم الإختراع

[Maher 4x4]

أي هه يا عيني عليك يعني سيّارات لازم تكون صارت طناجر هلأ بعدها ماشية متل الصلاة ع النبي بالشوارع و عم تترقوص كمان

السيّارات اللي بدها تتصنّع هلأ هيي بالتعاون مع مصنع أيراني (( شركة المهندس بارس خودرو )) على حسب علمي ورح تكون بتقنيّات ألمانية و فرنسية و أيطالية و هالشركة بتصنّع عدّة أنواع سيارات معروفة منها بيجو و سيتروين و فيات و من أحدث الأنواع بالأضافة لأنواع خاصة بالشركة متل سابا و سفاري و غيرا و أحسن نوع عم يشارك بالراليات العالمية هلأ هوي (( Samand )) هوي تصنيع أيراني بحت مع أعتماد بعض التصاميم العالمية طبعاً يعني رح تكون تقنيتها عالية وهاد المتوقّع
وكمان للي بيحب يعرف و حسب ما سمعت بدهون ينشؤوا هون بسورية سلسلة معامل سيارات خفيفة وآليّات ثقيلة و منها مثال مصنع بالتعاون مع شركة روسية لتصنيع السيّارات (( Kamaz )) اللّي أثبتت أنها أقوى شاحنات في العالم من فئتها و اللّي ربحت سباق التحمّل (( رالي داكار )) ع مدى خمس سنوات متتالية وأيضاً غيرا وغيرا قريباً أنشالله ...

[handsome]

ليش مستغرب نحنا عنا إمكانيات فنية وتقنية هائلة وأكتر من كتير دول مصدرة وأنا واثق إنو إذا أنوجد الدعم المادي راح تكون سيارة تنافس كتير سيارات منتشرة بباقي الدول

يا اخي انا معك وما معك بهالحكي ..
معك لانو انا باكدلك كمان انو سوريا عندا امكانات ما طبيعي ولو ما كان هيك ما كان العامل السوري ( من طبيب لاصغر موظف ) بياخد اغلى المعاشات مقابل الناس الي عم تشتغل بنفس المستوة ببلاد الخليج العربي ...
بس انتي متاكد انو هالامكانات رح تلاقي مجال لحتى تطلع وتكبر بهالمصنع انا بتمنا من كل قلبي انو هاشي يصير. والله اعلم انو لو صارت السيارة مسوقة بسوريا بشكل صح وطلعت لبرا بيكون الي الفخر انو سوريا بلشت تمشي عالطرق الصح ومسكنا حبل التطور .. بس المشكلي لهلق اسا مافي اي بادرة من بوادر التقدم على الرغم من الفرص الي عم تكون بالأول باب للتطور بس بعدين بتتحول بطريقة او بأخرة الي باب مصاري للمدرا والمسؤولين عن المصانع وبيقولو بعدين طز للجودي والتطور وما عاد تفرق معون غير جيوبون...
هلق بالنسبي لأول كام دفعة من المعمل اذا صارو التكاسي الكاسحة البلد بدال ما تكون كيا وهونداي وسابا وما بعرف شو اسا اذا صارت سيامكا كاسحة البلد متلون بيعيش المصنع وبكيف عالوضع وبيكون هادا اول الطريق لانو ققوة اختبار للسيارات هوي الشغل كتكسي...
واسا شغلي صغيري .. هلق بسوريا الواحد وقت رح يشتري سيارة ما رح تكون بنوب الشغلي سهلي عليه ( من الناحية الماديي عم احكي ) ورح تكون السيارة وقتا سيارة العمر .. يعني بكل العالم بيكون متوسط عمر السيارة ابو اربع خمس سنين زمان . انشقت حالة .. بس بسوريا وقت الواحد رح يجيب سيارة بينسا فكرت انو رح يغيرا يعني بتروح الشغلي وبيروح الزلمي ... و هون بتبين معلمية الشغيلي و الصنيعة .. يعني بقلك انو بالاخير السيارة بتضل عم تمشي ويعني ما بشكل عاطل كتير بس كمان بتصير تصف بالصناعا اكتر ما تصف ادام البيت .. مثلا الماذدا 929 هاي الي لونا زيتي مدري اخضر اجت فترة عبت البلد بشكل ما طبيعي مع انو عمرة اكتر من عشرين سني ... ولحتى تكون السيارة السورية اد السقة المحطوطة علية لازم تضاين لفترات طويلي كتير ( وهي اغلب السيارات الشرق اسياويي ما عم تقدر تحقق الموضوع ) يعني بيكون سعر السيارة رخيص اول الشي بس كمان فترة العمل الجاد رح تكون قصيرة كمان ....
ياسيدنا الله يوفق هالسيارة وانشالله تطلع اد الامال السورية الي ناطرتا ومعلقة كل تفكيرا واحلامة فيا ...

ولكم جزيل الشكر

[قلب المثنى]

والله ياعمي أفحمتني يعني كلامك صحيح بس نحنا بنتأمل الأحوال تتحسن وترجع المياه لمجاريها
وشكراً كتير إلك لملاحظاتك الحلوة
وبحب وجه تحية لماهر بيك وشكراً لمرورك

[here i am]

هلق بدنا نشوف شغلة أنو السعر يناسب العمر
ع كل حال يد عاملة موجود
أمكانيات مادية في
عقول قابلة للتهجير في بركي مابيتهجرو و بينضبو بهيك مشروع
و أنا هون ما تخافو

[قلب المثنى]

والله إنك كفو يامعلم

بس إنشالله يكون السعر مناسب وما تطلع السيارة السورية أغلى من الياباني أو الألماني