عن المد الإسلامي نحو الغرب

[أإأبو العبد]

كاتب النص الأصلي : عياش

أكيد في نسبة كبيرة من العائلات المسلمة المهاجرة يلي تعيش في وئام ومندمجة مع محيطها ويبدو إني بمحاولة تحليل الظاهرة الكان عم يحكي عنها أبو طوني وقعت بخطأ التعميم وهاد خطأ مني وأعتذر


أنا ما نفيت أبدا الجانب الديني من الصراع وكوني قلت إنو عزز فكرة الصراع الديني مع الغرب العلماني ما يعني إني نفيت الصراع الديني بالقضية الفلسطينية وهاد موضوع منفصل وأنا لا أنفيه ولا أؤكده.



بهذه لا أتفق معك، عنا الكثير من المبدعين من يوسف شاهين لمصطفى العقاد(شهيد التطرف الاسلامي) لكل المخرجين والكتاب والفنانين والموسيقيين بس هاد ما بينفي كونن حالات شاذة من الابداع ومعظمهم ينمو خارج بلاده معظمه يبدع في الغرب أو في لبنان على أقل تقدير وبكفي قول إنو بكل السعودية يوجد على حد علمي صالة سينما واحدة فقط وموضوع الابتكارات ومهرجان جنيف أنا أتفق مع الرأي القائل بأن المجتمعات الخليجية هي مجتمعات مستهلكة للحضارة وليست مصدرة للحضارة وهي حال الشرق الأوسط بشكل عام ووجود برائات اختراع أو ابتكارات لمخترعين سعوديين لا يغير برأي هذه القاعدة يعني بالمختصر لا يوجد اسهام حقيقي وملموس في مسيرة الحضارة العالمية من قبل العرب حالياً.
العرب خارج التغطية ووجود حالات شاذة معنية لا ينفي هذه القاعدة.

هلا بتفق معك مية بالمية

وبالنسبة للمبدعين والمبتكرين كمان انا معك وعندك اهم مثال مصر فيها علماء ومبتكرين ومبدعين في كل مجال بس للاسف هالابداع دائما يُصدَّر للخارج واهم مثال محمد مصطفى البرادعي رئيس الوكالة الدولية للطاقة الذرية والي للاسف تم استغلاله لتحقيق اطماع امريكية في العراق وغيرها وهاد بيعني انو في امكانيات للابداع بس بالوطن العربي مصيرها اما التصدير واما الاغتيال واما الفشل

[ritka]

كاتب النص الأصلي : Elephant And Castle

يوسف شاهين مسيحي

بحب اخبرك شغلة صغيرة
بالغرب بشكل عام كل العرب مسلمين الا ازا قلتلو انك مش مسلم بيقتنع وممكن بالأول يرسم علامات تعجب(هالشي باكدلك اياه من اكتر كم حادث صار قدامي).

مو مهم هلا فوق كمان قريت انو العرب او المسلمين مش متخلفين
ايه لا يا سيدي الاغلبية و للاسف متخلفة...طبعا ما فينا ننكر انو في انجازات عملوها (ولو شحيحة)..
بس لما تحكي عن كمّ هائل من الناس عم يطلع معهم بس هالكمّ الصغير من الانجازات بدك تكون عم تحكي عن محتمع متخلف

اما عن الصراع بفلسطين ما بتخيل انو احنا عم نحاربهم لانهم يهود او لانو احنا مسلمين
لانو الصهيوني ما بيفرق بين فلسطيني ملسم او فلسطيني مسيحي بالوقت اللي بحط ايدو بايد الغرب "المسيحي"...و للاسف الشرق "المسلم"!!!

هلا ما رح فوت بالصراع العربي الاسرائيلي لانو مش موضوعنا بس حبيت نوّه ع الفكرة

اما بالنسبة لالنا (كعرب مسلمين بالغرب) منطويين!! لا ابدا مش منطويين
بس في شلّة من الناس اللي حتى ببلدهم بتكون منطوية و متشددة هدول شي طبيعي ما يتأقلمو
و متل ما قال ياس...احنا مشكلتنا انو منشوف حالنا الحضارة و الدين
و هاي مش بس مشكلة هاي مصيبة... ما فيك تلغي الاخر او تفني من الوجود
لمجرد انو دينو غير عن دينك و هالشي بيخلي ملحد و كافر و "ما بيستحق" معاملتك الغير شكل!!
العالم برا عم تتقبلنا متل ما احنا ليش ما احنا نتقبلهم متل ما همّ؟!

.

[أإأبو العبد]

كاتب النص الأصلي : ritka

اما عن الصراع بفلسطين ما بتخيل انو احنا عم نحاربهم لانهم يهود او لانو احنا مسلمين
لانو الصهيوني ما بيفرق بين فلسطيني ملسم او فلسطيني مسيحي بالوقت اللي بحط ايدو بايد الغرب "المسيحي"...و للاسف الشرق "المسلم"!!!

لا طبعا ماعمنحارب اليهود والدليل على هالشي حركة الجبهة الشعبية لتحرير فلسطين وهي حركة تنتهج الماركسية والتي اسسها كارل ماركس وهو من (اصل يهودي)

[عياش]

كاتب النص الأصلي : أإأبو العبد

هلا بتفق معك مية بالمية

وبالنسبة للمبدعين والمبتكرين كمان انا معك وعندك اهم مثال مصر فيها علماء ومبتكرين ومبدعين في كل مجال بس للاسف هالابداع دائما يُصدَّر للخارج واهم مثال محمد مصطفى البرادعي رئيس الوكالة الدولية للطاقة الذرية والي للاسف تم استغلاله لتحقيق اطماع امريكية في العراق وغيرها وهاد بيعني انو في امكانيات للابداع بس بالوطن العربي مصيرها اما التصدير واما الاغتيال واما الفشل

طبعا رح يكون في عنا مبدعين وعلماء لأنو المشكلة مانها بالجينات أو بتركيبة مخنا الفيزيولوجية بس المشكلة بالتيار العام أو بالأحرى بالركون العام وانعدام الرعاية للابداع لأنو ما عنا هاجز النهضة أو رفد المسيرة الانسانية نحنا كشعوب بشكل عام وحكومات ومؤسسات وشركات اخترنا إنو نكون برات التغطية أو على الهامش مستهلكين شبه سلبيين وبالتالي كل مبدعينا رح ينجبرو يسافرو ولما رح يحاولو يرجعو رح يصدموا بالواقع ومثال من مصر الدكتور أحمد زويل رجع وكلو أمل من الدعاية التي قدمت له إنو يعمل نهضة على غرار نهضة كوريا بس من فترة شفتلو ندوة بدار الاوبرا بمصر كان عم يعبر عن خيبة أملو بطريقة مهذبة.

الأخ Elephant And Castle بعرف إنو يوسف شاهين مسيحي واسمو جو بس كنت بقصد المبدعين في العالم العربي والاسلامي مو المبدعين المسلمين حصرا إلا إذا بتعتبر مصر خارج العالم العربي أو الاسلامي بعدين بشرفك ولو كنت غلطان يعني لقيتلك شغلة تحكي فيها يا ريتك قدمت فكرة إنو يعني المهم تحكي مثلا.

مو مهم هلا فوق كمان قريت انو العرب او المسلمين مش متخلفين
ايه لا يا سيدي الاغلبية و للاسف متخلفة...طبعا ما فينا ننكر انو في انجازات عملوها (ولو شحيحة)..
بس لما تحكي عن كمّ هائل من الناس عم يطلع معهم بس هالكمّ الصغير من الانجازات بدك تكون عم تحكي عن محتمع متخلف

طالما نسبة الامية تتجاوز الـ60% فمجتمعاتنا متخلفة حكماً هاد بغض النظر عن المستوى التعليمي للبقية الباقية وبغض النظر لمعدل القراءة المخزي.

و متل ما قال ياس...احنا مشكلتنا انو منشوف حالنا الحضارة و الدين
و هاي مش بس مشكلة هاي مصيبة... ما فيك تلغي الاخر او تفني من الوجود
لمجرد انو دينو غير عن دينك و هالشي بيخلي ملحد و كافر و "ما بيستحق" معاملتك الغير شكل!!
العالم برا عم تتقبلنا متل ما احنا ليش ما احنا نتقبلهم متل ما همّ؟!

هي فعلا مصيبة وجزء منها يعود للنظرة الاستعلائية للآخر الملحد لتعويض الشعور بالدونية بالاضافة لأزمة الانتماء في ظل اهمال مطلق للمغتربين من قبل دولهم الأم.

[أبو الوليد]

كاتب النص الأصلي : باشق مجروح

فهمنا الموضوع هلق جابي .
بس صرت فاتح باب النقاش وفاتحو فـ خليك ع جنب .

لأحمد -- المتطرفين او ما يسمى الوهابيين او السلفيين هم مطاردين في بلادهم بسبب الافكار المتطرفة الداعية للفوضى والعصيان والي ممكن تشكل خطورة على انظمة وامن البلاد الي بيعيشو فيها . بيدفعهون هالشي للتجمع بالغرب والتكتل بجماعات منظمة عم تعمل نشاطات من الوقت للتاني . و مرات بتكتفي بالتهدئة التنظيمية مع الاستمرار بالترويج للفكر المتطرف . صدقني هني موجودين وبكثرة .
اما الي سميتهون معتدلين فهدول هجرة عادية ماننا بصدد الحكي عنها لأنها غير دينية ع الاغلب فهي متلها متل هجرة الهنود والفليبينين للعمل وتحسين مستوى المعيشة او حتى للحصول على جنسية اجنبية او الحياة بحرية والهرب من جو الحروب مثلاً . كلها اسباب غير دينية مطلقاً .

حضرتك وصفت السلفيين بأنهم جماعة متطرفة ومطارديين من بلادهم لأنهم فئة تخريبية وبتعمل فوضى في البلاد
اول انت بتعرف شو هو تعريف السلفية؟؟
السلفية مبدأ بسيط وهو اتباه منهج السلف الصالح يعني منهج النبي الكريم وصحابته أي الأبتعاد عن الخرافات والشركيات اللي عم نشوفها طلعت جديد في عصرنا الحالي وبقصد الخرافات اللي طلعت في الدين الأسلامي متل البدع اللي اخترعتها الجامعة الصوفية من ضرب شيش والى ماهنالك.
وما أظن الرسول الكريم طرح افكار متطرفة أو تخريبية ولو كان هلشي مو صحيح كان مافي ولا مسيحي او يهودي عايش في بلاد المسلمين وكانوا كلهم اتذبحوا.
أما انهم مطاردين لأنهم متطرفين وبيعملوا فوضى فبأكد لك انهم فعلا مطارديين ولكن لأنهم ثاروا على الأنظمة الدكتاتورية وما قبلوا الذل على حالهم ولا على امتهم
لأنهم شجعان وفرسان هلأمة وما أظن السلفية وحدهم المطارديين في بلادنا العربية بل أي واحد بيعارض الحكم وبيفرض الذل بيكون مطارد حتى لو كان يهودي ولا مسيحي ولا شيوعي.
السلفية هم الذين اوقفوا مجازر البوسنة والهرسك ودفعوا بأرواحهم ليدافعوا عن هذا الشعب المسكين اللي ذبح بإسم الدين المسيحي والصليب.
السلفية هنن اللي اتحدوا اعظم دولة في العالم وهزموها وهي الأتحاد السوفيتي
السلفية هي اللي وقفت الزحف الأمريكي القادم من العراق بإتجاه سوريا ولو ما كانت المقاومة العراقية اشتعلت وكسرت امريكا في العراق لكانت امريكا عنا هلاء وكان سورية انخربت وصار عنا فضايح ابو غريب.
والله ما سمعنا عن مسيحي عراقي قاوم الأمريكان أو عمل عملية استشهادية في سبيل الدفاع عن دينه وارضه وعرضه رغم وجود المسيحيين في العراق.
يا حبيبي حتى نكون واضحيين العالم بأسره مقسوم الى قسمين
القسم الأول هو اتحاد صليبي يهودي هندوسي
والقسم التاني هو العالم الأسلامي
ومهما خرجت حركات متطرفة من المسيحيين او اليهود او الهندوس او اي ديانة سماوية او باطنية فما حدا بدو ينتقدها ولا اي دولة في مجلس الأمن والدليل على ذلك مجازر اليهود في فلسطين ولبنان ومجازر الأستعمار الصليبي من فرنسا وايطاليا واسبانيا في الدول العربية والأسلامية ومجازر الهندوس في كشمير ومجازر الروس في الشيشان وداغستان وطبعا السب معروف لأن الضحايا هم من المسلمين ودائما دماء المسلمين رخيصة في وقتنا الحالي وعلى فكرة هلشي محدث عنو من الف واربعمائة سنة في القرأن الكريم والسنة النبوية.
أما لو خرجت فئة من العالم الأسلامي رافعة الأسلام شعارها حنشوف العالم قام وما قعد عليهم ووصفهم بالأرهاب والمتطرفين وعمل سجن متل جوانتنامو لسجنهم وقاموا بتدنيس القرأن الكريم ووضعه في المراحيض والمزابل وما حدا بيحكي ولا حدا بيفتح تموا وطبعا منرجع منقول لأن الضحايا هم مسلمين.
من مئات السنين والى الأن العالم عم يحكي على مجازر الأتراك في حق الأرمن وما بيحكو على المليون ونصف شهيد اللي في الجزائر او مئات الوف الشهداء في ليبيا أو الشهداء التي تم حرقهم وهم احياء في اسبانيا لما خرجوا المسلمين منها ومنرجع ومنقول السبب معروف لأن الأرمن مسيحين وباقي الضحايا مسلمين.
ومنجي اخيرا على تركيا المسكينة اللي صار لها عشر سنوات عم تحاول تدخل الأتحاد الأوربي وما عم يوافقو بينما كتير دول وضعها الأقتصادي كان اسواء منها بكثير ومع ذلك قبلوها مباشرة وحاليا اوكرانيا عم تتحضر للدخول للأتحاد الأوربي رغم وضعها اللي متل الزفت واسوأ بكتير من تركيا بس اكيد ما رح يدخلو تركيا في الأتحاد الأوربي حتى لو اعترفت بمجازر الأرمن ولو شعلت اصابعيها شموع مارح تدخل لأن تركيا طبعا دولة اسلامية... ومنشان هيك انا بقترح أحسن ما يسموا هلأتحاد بالأتحاد الأوربي يسموه بالأتحاد الصليبي ويرحونا.
بس الله يخليلنا السلفية لأننها شوكة في حلق امركيا واوربا وشمعة السلفية ان شاء الله مارح تنطفي بينما شمعتهم حتزول ان شاء الله.

[أبو الوليد]

كاتب النص الأصلي : Abu ToNi

ما تمت مواجهته بغضب إسلامي وبشعور عام يتلخص بمحاولة فرنسا محاربة الحجاب ومحاربة الوجود الإسلامي لو لم يكن هنالك وجود لمفهوم المد والصراع الديني المتعشق بالعقول المهاجرة .

يعني حضرتك بررت همجية فرنسا وتعصبها بنزع الحجاب على أن المهاجرين المسلمين هم اللي حاطين في راسهم الصراع الديني ومنشان هيك فرنسا قابلتهم بردة فعل وهي نزع الحجاب.
طيب شو رأيك نعامل المسيحين اللي في بلادنا بذات المعاملة ونمنعهم من رفع الصليب ونبرر اننا عملنا فحص اشعة على عقولكم اتضح النا انو في صراع ديني في راسكم منشانهيك بدنا ننزع حقكم في حمل شعائركم الدينية؟؟
يعني بدل ما تلوم فرنسا على هلعمل المشين لمت المسلمين
دائما وابدا رح نشوف أن المسلمين هم الضحايا وهم سبب كل الكوارث وكل الحروب اللي حصلت وعم تحصل واللي رح تحصل وهذا الشيء ابتدأ من الحملة الصليبية الأولى ومارح ينتهي حتى تقوم القيامة

[inodessa]

القضية ان الدين الاسلامي يدعو للتجمع و التعاضض بين المسلمين... و دول العالم بكل بساطة بتتخوف من كل التجمعات او الاتحادات... فبتبين انو الحرب ع الاسلام..! مع انو امريكا مثلا..لو فيها تقسم الصين ما كانت قصرت.. هل هناك عداء بين المسيحية والبوذية الصينية؟؟.. اميركا وقت فرطت الاتحاد السوفيتي بخططها كانت عم تساعد المسلمين برأيكن؟؟؟! ولا خايفة من هالجمهورية الهائلي؟......... (في واحد ضحكني.. قال السلفية هيي يلي كسرت الاتحاد السوفييتي..!)

طول مو المسلمين رح يضلو يطلعو ع السياسي من منظور ديني رح يستمرو بتخلفهم السياسي..

خلص يا أخي.. العلوم صارت اختصاصات... في واحد بيدرس كتب الدين واسمو رجل دين و بيتفزلك بالدين... و واحد بيدرس علوم سياسية و بيصير سياسي و بيحكي بالسياسي...

هلق يمكن حكيي بينطبق ع الشعب... الشعب يلي لاحق خطبات رجال الدين, بس الحكومات فهمت هالشي..

[أإأبو العبد]

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

كلامك عين العقل

[ابو نجبو]

كاتب النص الأصلي : inodessa

القضية ان الدين الاسلامي يدعو للتجمع و التعاضض بين المسلمين... و دول العالم بكل بساطة بتتخوف من كل التجمعات او الاتحادات... فبتبين انو الحرب ع الاسلام..! مع انو امريكا مثلا..لو فيها تقسم الصين ما كانت قصرت.. هل هناك عداء بين المسيحية والبوذية الصينية؟؟.. اميركا وقت فرطت الاتحاد السوفيتي بخططها كانت عم تساعد المسلمين برأيكن؟؟؟! ولا خايفة من هالجمهورية الهائلي؟......... (في واحد ضحكني.. قال السلفية هيي يلي كسرت الاتحاد السوفييتي..!)

طول مو المسلمين رح يضلو يطلعو ع السياسي من منظور ديني رح يستمرو بتخلفهم السياسي..

خلص يا أخي.. العلوم صارت اختصاصات... في واحد بيدرس كتب الدين واسمو رجل دين و بيتفزلك بالدين... و واحد بيدرس علوم سياسية و بيصير سياسي و بيحكي بالسياسي...

هلق يمكن حكيي بينطبق ع الشعب... الشعب يلي لاحق خطبات رجال الدين, بس الحكومات فهمت هالشي..

لا لا ..هي أمريكا مو خايفة من التجمعات و الاتحادات ....
أمريكا خايفة من الدول اللي بتتبنى الخطاب و العقائد ثورية اللي ضد مصالحها ..."ايدلوجية - دينية ...الخ
ركزلي على كلمة ضد مصالحها...يعني مثلاً لما قام الهوتو "المتطرفين" بقتل مئات الالاف من التوتسي برواندا ماحدا استكال بكيلهون...
بينما العالم قايم و قاعد كرمال دارفور لاسباب كلنا منعرفها...
وبما انو الخطاب الاسلامي هو أكتر الخطابات "تشدداً" بنظر أمريكا ..فبهي الحالة عمتحاول تحاوط و تحتوي هالافكار وتحول دون امتدادو و تقضي على منابعو ....
المشكلة الاساسية بأمريكا و الغرب انو دعمن اللا محدود لاسرائيل و والصهيونية عمتأدي الى انو شعوب المنطقة عمتتوجه للتطرف و التشدد .....

[ابو نجبو]

أمريكا والغرب متشددين و متطرفين "بنظري" بالنسبة للقضية الفلسطينية ....
هالتطرف و التشدد ولّد التشدد الموجود هلاء بالمنطقة و اللي الله بس وحدة بيعلم لوين بدّو يوصلنا....

[inodessa]

كاتب النص الأصلي : أإأبو العبد

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

كلامك عين العقل

شكرا ع الوردة اخي أبو العبد.. تحياتي

كاتب النص الأصلي : ابو نجبو

لا لا ..هي أمريكا مو خايفة من التجمعات و الاتحادات ....
أمريكا خايفة من الدول اللي بتتبنى الخطاب و العقائد ثورية اللي ضد مصالحها ..."ايدلوجية - دينية ...الخ
ركزلي على كلمة ضد مصالحها...يعني مثلاً لما قام الهوتو "المتطرفين" بقتل مئات الالاف من التوتسي برواندا ماحدا استكال بكيلهون...
بينما العالم قايم و قاعد كرمال دارفور لاسباب كلنا منعرفها...
وبما انو الخطاب الاسلامي هو أكتر الخطابات "تشدداً" بنظر أمريكا ..فبهي الحالة عمتحاول تحاوط و تحتوي هالافكار وتحول دون امتدادو و تقضي على منابعو ....
المشكلة الاساسية بأمريكا و الغرب انو دعمن اللا محدود لاسرائيل و والصهيونية عمتأدي الى انو شعوب المنطقة عمتتوجه للتطرف و التشدد .....

ابو نجبو... معك حق.. بس وين الغرابة.. كل مين داير ع مصالحو.. اذا كان الخطاب الاسلامي هو أكتر الخطابات "تشدداً" او اذا كان بهدد مصالحها بشكل او بآخر فرح تحاربو.. ونحنا اذا في اي فكر امريكي كا او غير امريكي بهدد مصالحنا.. بهدد امنا لازم نحاربو..

دعم اسرائيل يمكن اصلو ذكاء اليهود سياسيا.. و مو جاي من منطلق ديني ابدا ابدا.. اصلا الانجيل كلو ذم باليهود وشرشحة الهن! واليهود لاتؤمن لا بالمسيح ولا بالمسيحية كديانة ربانية.. فهل اليهود صادقو المسيحيين ع أسس دينية؟!!

القصة متل ما تفضلت قصة مصالح... ابو نجبو وكم واحد واعيين لهالقصة.. فعتبي عالباقي...

[عياش]

القسم الأول هو اتحاد صليبي يهودي هندوسي

إنو بس دخيلك شو دخل الهندوس؟؟؟؟؟ ولا هي آخر تحديث لنظرية المؤامرة؟؟؟

[Abu ToNi]

كاتب النص الأصلي : أبو الوليد

حضرتك وصفت السلفيين بأنهم جماعة متطرفة ومطارديين من بلادهم لأنهم فئة تخريبية وبتعمل فوضى في البلاد
اول انت بتعرف شو هو تعريف السلفية؟؟
السلفية مبدأ بسيط وهو اتباه منهج السلف الصالح يعني منهج النبي الكريم وصحابته أي الأبتعاد عن الخرافات والشركيات اللي عم نشوفها طلعت جديد في عصرنا الحالي وبقصد الخرافات اللي طلعت في الدين الأسلامي متل البدع اللي اخترعتها الجامعة الصوفية من ضرب شيش والى ماهنالك.
وما أظن الرسول الكريم طرح افكار متطرفة أو تخريبية ولو كان هلشي مو صحيح كان مافي ولا مسيحي او يهودي عايش في بلاد المسلمين وكانوا كلهم اتذبحوا.

يا سيدي لو عبيتعاملوا مع الواقع بنفس اسلوب (مو بنفس الوقائع بحذافيرا ) السلف الصالح ما كان صار مشاكل بالأصل .
والمشكلة الكبرى واللي بشكلها التيار السلفي هوي الفكر الاقصائي اللاغي للآخر ..يعني انت بدون ما تحس نبذت وتهجمت على المذهب الصوفي مع العلم بأن الصوفية بتحمل من الرقي والفكر الانساني المتطور ما يفوق التصور .

هالحكي في حال وافقتك الرأي بأن الدين ممكن ان يكون قاعدة جيدة لبناء حزب سياسي عليها .

أما انهم مطاردين لأنهم متطرفين وبيعملوا فوضى فبأكد لك انهم فعلا مطارديين ولكن لأنهم ثاروا على الأنظمة الدكتاتورية وما قبلوا الذل على حالهم ولا على امتهم
لأنهم شجعان وفرسان هلأمة وما أظن السلفية وحدهم المطارديين في بلادنا العربية بل أي واحد بيعارض الحكم وبيفرض الذل بيكون مطارد حتى لو كان يهودي ولا مسيحي ولا شيوعي.

عملية شمل السلفية وحزب الاخوان وبقية أشكال الإسلام السياسي ( على فكرة ما تحسب بأن علاقة السلفية بالاخوان علاقة طيبة ، لا بل في بعض التيارات بتكفّر تيار الأخوان وما بتعتبرن أحزاب تطبق فكر الاسلام السياسي بشكله الصحيح ) مع باقي اشكال المعارضة عملية رخصية كتير
ما منختلف بان بلداننا العربية عم تشكل تضييق على العقول المفكرة من شتى الجماعات المتنورة والواعية بالأفكار الحرة والمنتسة لشتى الاقليات أو الاحزاب القومية غير الحاكمة ( شخصيا برفض التقسيم الطائفي اللي انت طرحته ( يهودي .. مسيحي .. شيوعي ) )
بس لازم نتذكر بأن التيار السلفي المتزمت هوي أول المستفيدين بهلحالة لان عم يلاقي عذر مقنع لاستمرار وجوده .. بأنه ما اخد فرصته وما عم يحقله العمل بطريقة عادلة
مع العلم بأنه بحد ذاته بعيدا عن الفكر اللاغي للحكومات العربية يفترض يكون معزول ومنبوذ اجتماعيا كونه بأدي لكوارث مدنية بسبب الافكار الرجعية اللي بيتبنيها وبسبب عدم قدرته على محاكاة الواقع والتماشي مع القيم العصرية اللي انوجدت بعد حقبة الازدهار السياسي الاسلامي المحصورة بفترة حياة الرسول الكريم واللي كان شخصية سياسية فزة ما مر بالبشرية ( وما بتوقع بالمستقبل يمر ) شخص محنك ومفكر سياسي قادر على مجاراته .

السلفية هم الذين اوقفوا مجازر البوسنة والهرسك ودفعوا بأرواحهم ليدافعوا عن هذا الشعب المسكين اللي ذبح بإسم الدين المسيحي والصليب.

لا يا عم رجاع للتاريخ .. اميركا اتدخلت ووقفت المجازر وتأكدت من اتمام عملية فصل البوسنا والهرسك عن يوغسلافيا الأم .. إلا إذا بتعتبر أميركا جزء من التيار السلفي الاسلامي .. وبالمناسبة أميركا اللي بتم شتما ليل نهار واللي بتم اعتبارا الغازي الصليبي المعاصر واللي بينظر إلها بأنها المشنة للحرب الصليببية بعصرنا الحالي هية اللي وقفت بجانب المسلمين في محنتن ولولاها ما كان حصلوا على استقلال وما كانت محنتهم انتهت .. أميركا همها الأول مصالحها الشخصية بغض النظر عن الاسلوب أو عن الطريقة وهلشي بشوفه حق مشروع الها وإن كان ما بيتماشى مع رغباتي الشخصية .

السلفية هنن اللي اتحدوا اعظم دولة في العالم وهزموها وهي الأتحاد السوفيتي

شلون ؟ كيف ؟ وين ؟ امتى ؟
ضرب المعالج عندي بسبب هلجملة !!!
ابسط قارئ بالتاريخ والمطلع بشكل سطحي جدا جدا جدا على احداث القرن الماضي من الحروب العالمية الأولى والتانية والحرب الباردة بيعرف مين اللي حل الاتحاد السوفيتي وألغى مفهوم القطبين الحاكمين للعالم وطبق سياسة القطب الواحد واللي عم يدافع بكل طاقته على استمرار ميلان كفة الميزان للشكل الحالي !!
من فين جبتلي السلفية !!!!؟!!؟

السلفية هي اللي وقفت الزحف الأمريكي القادم من العراق بإتجاه سوريا ولو ما كانت المقاومة العراقية اشتعلت وكسرت امريكا في العراق لكانت امريكا عنا هلاء وكان سورية انخربت وصار عنا فضايح ابو غريب.
والله ما سمعنا عن مسيحي عراقي قاوم الأمريكان أو عمل عملية استشهادية في سبيل الدفاع عن دينه وارضه وعرضه رغم وجود المسيحيين في العراق.

علاقة سوريا بأميركا غير محكومة بالتيار السلفي .. يعني ما بعتقد التيار السلفي كان بيوم من الأيام المتحدث باسم الحكومة السورية .
مزبوط بأن التيار السلفي كان ولازال عم ينفذ عملياته التفجيرية ضد الجيش الأميركي وهلشي عم يشكل ورقة ضغط من قبل الأمركيين نفسن على حكومتن كونن عم يشوفوا حكومتن مغامرة بحياة جنودها عن طريق استمرار وجودها بالمنطقة ، ومزبوط بأن أوباما لاقى استحسان اميركي داخلي ودعم كبير بحملته بسبب موقفه من الحرب على العراق واعلانه رغبته بالانسحاب الكامل بعد 18 شهر من توليه الحكم .. بس يا ترى اميركا ندمت لدخولها العراق ؟!
او لو عادت الأيام فيها لما رجعت عملت نفس خطوتها ؟!
الحسابات الاميركية العراقية بتختلف عن الحسابات الاميركية السورية لإختلاف طبيعة العلاقة بين الحكومة السورية ومواقفها وعلاقاتها مع الحكومة الامريكية .. بعتقد منكون صرنا بغير موضوع لو كملنا بهلمجال

اما بخصوص تخوين المسيحية العراقية لعدم وجود احداث استشهادية منفذة من قبل المسيحيين فبفضل عدم التعليق على الموضوع

يا حبيبي حتى نكون واضحيين العالم بأسره مقسوم الى قسمين
القسم الأول هو اتحاد صليبي يهودي هندوسي
والقسم التاني هو العالم الأسلامي

اذا قلنا الصليبي هوي اميركا
اليهودي هوي اسرائيل
الهندوسي مين

المهم
يا سيدي حطيت ايدك علوجا تماما
الاسلام السياسي او خلينا نقول تاثير الاسلام السياسي بعقليه عامة الشعب من المثلمين خلق فكرة تعشّقت بالعقول مع مضي الوقت بتقول هي الفكرة بأن العالم أجمع يحارب الرسالة الإسلامية ويحارب وجود المسلمين !!
وهاد الشي اللي انا كاتبه بموضوعي بأن الاسلام بمفهوم الحرب المقدسة والمد الديني بيشعر بأن العالم كله عم يحاربه وهاد الشي انت اثبتلي أنه فعلا موجود بعقليه الانسان المسلم المتأثر بالخطابات الدينية .

ومهما خرجت حركات متطرفة من المسيحيين او اليهود او الهندوس او اي ديانة سماوية او باطنية فما حدا بدو ينتقدها ولا اي دولة في مجلس الأمن والدليل على ذلك مجازر اليهود في فلسطين ولبنان ومجازر الأستعمار الصليبي من فرنسا وايطاليا واسبانيا في الدول العربية والأسلامية ومجازر الهندوس في كشمير ومجازر الروس في الشيشان وداغستان وطبعا السب معروف لأن الضحايا هم من المسلمين ودائما دماء المسلمين رخيصة في وقتنا الحالي وعلى فكرة هلشي محدث عنو من الف واربعمائة سنة في القرأن الكريم والسنة النبوية.

بمجال علم النفس ما عندي ايا صفة أكاديمية لأتبناها بالحكي
لكن خلال عملي التطوعي في احدى المنظمات الاجتماعية اكتسبت خبرة إرشادية بالتعامل مع الأطفال والمراهقين .
بالنسبة النا كمرشدين اجتماعيين من الواضح بأن الشخص اللي دائما بيشعر أنه منبوذ وموضع سخرية الجميع وأن الجميع بدون استثناء بحوال النيل منه .. بكون فعليا هوي عم يضع نفسه بخانة النبذ وعلى الأغلب بكون بالحقيقة هوي أكبر الرافضين للآخر ويفضل العزلة وبمانع بشكل واضح المشاركة مع الآخرين والاحتكاك معن .
ومهمتنا بتكون صعبة كتير لأن قبل ما نعلم الطفل هاد كيف العالم تتقبله لازم نعلمه هوي كيف لازم يتقبل العالم ويحببها بحاله .

نفس الحكي بشوفه بينطبق على المسلم المتجذّر براسه الفكر الاقصائي الاغي (مشان ما يصير لبس بالموضوع الصفات السابقة غير شاملة بكل مسلم انما بتحدد صفة معينة عند جماعات اسلامية منتشرة بكثرة لكنها ما بتشكل قاعدة مطلقة للإسلام ) واللي بشوف بأن البشرية كلها بأديانها السماوية والأرضية والمؤرضة وتياراتها الالحادية القوية والضعيفة والحكومات العلمانية والدينية وكل ما خلقه الله من هب ودب على سطح الكرة الأرضية عم يحاول يهين مقدساته ويحاربه ويشن حرب من نوع ما عليه .

فإن كان بحسب روايتك بأن الاسلام محارب من 1400 سنة فهاد بشكل دليل كافي بالنسبة إلي بأن الاسلام من 1400 سنة عنده مشكلة بالتعامل مع الآخر ولهلق ما قدر يوصل لصيغة حل مناسبة لمشكلته ( هي اذا كان حاسس فعلا انه في مشكلة )

أما لو خرجت فئة من العالم الأسلامي رافعة الأسلام شعارها حنشوف العالم قام وما قعد عليهم ووصفهم بالأرهاب والمتطرفين وعمل سجن متل جوانتنامو لسجنهم وقاموا بتدنيس القرأن الكريم ووضعه في المراحيض والمزابل وما حدا بيحكي ولا حدا بيفتح تموا وطبعا منرجع منقول لأن الضحايا هم مسلمين.

بخصوص رفع شعار الاسلام فقبل احداث 11 أيلول من عام 2001 ما بعتقد كان العالم الغربي بيعرف شو هوي الاسلام السياسي وشو هية الشعارات المرفوعة .. بفضل الارهابي بن لادنوالصورة اللي نقلها عن الاسلام .. وبفضل تأكيد بعض المتحديثن الاسلاميين لفكر القاعدة الارهابي ومنحه الشرعية ، صار للعالم موقف سلبي من الشعارات الإرهابية المرفوعة .. يفترض يكون في جهود حثيثة لمحاول تجديد الصورة المنقولة لكن للأسف لا حياة لمن تنادي .. نظريات مؤامرة ووضع الأمة بخانة الضحية والاسلام بخانة المستهدف هاي الاشياء الوحيدة الشاطرين بفعلها مع العلم انها ما عم تحقق أي تغيير وما عم تصحح من صورة الاسلام ومع هلشي متثبتين فيها .


لو فعلا تمت عملية الاستجاوب والتحقيقات بخصوص احداث معتقل غوانتانموا واللي ممكن تأدي لإغلاقه متل ما صرح الرئيس الاميركي الحالي .. ابقى فرجيني كيف بدك ترجع تحيك ثوب مآمرة جديد لتستر عورة ثقافة الإلغاء اللي حاملها براسك .

من مئات السنين والى الأن العالم عم يحكي على مجازر الأتراك في حق الأرمن وما بيحكو على المليون ونصف شهيد اللي في الجزائر او مئات الوف الشهداء في ليبيا أو الشهداء التي تم حرقهم وهم احياء في اسبانيا لما خرجوا المسلمين منها ومنرجع ومنقول السبب معروف لأن الأرمن مسيحين وباقي الضحايا مسلمين.

دليل اضافي لصحة الحكي اللي انا كاتبه فوق .

بس الله يخليلنا السلفية لأننها شوكة في حلق امركيا واوربا وشمعة السلفية ان شاء الله مارح تنطفي بينما شمعتهم حتزول ان شاء الله.

رأيك وانت حر فيه
بس بحب خبرك بأن السلفية بشكلها الحالي وصيغتها الحالية بدها اتم محاربة ومرفوضة ان كان من قبل الغرب متل ما هوي الوضع الراهن فبده يكون من قبل الشعوب اللي شاءت ام ابت التيارات السلفية الشعوب عم توعى وتعرف تفرق بين الصح والغلط وليكا الكويت مثال واضح قدامنا .

كاتب النص الأصلي : أبو الوليد

يعني حضرتك بررت همجية فرنسا وتعصبها بنزع الحجاب على أن المهاجرين المسلمين هم اللي حاطين في راسهم الصراع الديني ومنشان هيك فرنسا قابلتهم بردة فعل وهي نزع الحجاب.

بعيد وبقول بأن فرنسا ما نزعت الحجاب وما شنت أيا قوانين معينة ووجهتها للمسلمين بصفة شخصية
فرنسا منعت كل الرموز الدينية داخل الدوائر الحكومية بما فيها الصليب والحجاب على حد سواء بهدف تحقيق المساواة بأفضل أشكالها دون وجود أي عامل تمييز بين المواطنين
يا ترى ليش ما طلعلنا بوذي حرق العلم الفرنسي وقال بأن فرنسا عم تحارب معتقداته بعدم السماح إله بارتداء لباسه الديني الخاص
او طلع هندوسي وقال بأن فرنسا عم تهين مقدساته بسماحها القيام بذبح الأبقاء
انا بجاوبك ... لأن غير المسلم ما بيحمّل التصرفات ابعاد دينية وما بيتصرف بناء على البعد الديني والانتماء الديني للإنسان المقابل اله .

طيب شو رأيك نعامل المسيحين اللي في بلادنا بذات المعاملة ونمنعهم من رفع الصليب ونبرر اننا عملنا فحص اشعة على عقولكم اتضح النا انو في صراع ديني في راسكم* منشانهيك بدنا ننزع حقكم في حمل شعائركم الدينية؟؟
يعني بدل ما تلوم فرنسا على هلعمل المشين لمت المسلمين
دائما وابدا رح نشوف أن المسلمين هم الضحايا وهم سبب كل الكوارث وكل الحروب اللي حصلت وعم تحصل واللي رح تحصل وهذا الشيء ابتدأ من الحملة الصليبية الأولى ومارح ينتهي حتى تقوم القيامة

بدي أهمل تماما وجود فرق بين الأقلية المهاجرة نحو البلاد الاوروبية والأقلية المتأصلة بالبلاد والموجودة بتاريخ البلاد عبر العصور ...وبدي اعتبرها مجرد تعامل أكثرية مع أقلية :
لو تم منع الصليب بصفة فردية فما بعتقد بدنا وقت كبير لإطلاق لقب التمييز بالتعامل
بس وقت بيمنع كافة اشكال الرموز الدينية بما فيها الصليب والقلنسوة والحجاب فشو التمييز بهلحالة ؟

بفهم منك بأن العقل الإسلامي ما بده يتطور حتى يوم القيامة وما بده يطالع نفسه من دائرة النبذ والعزل ؟
انا مستعد راهنك على خطأك وعلى قدرة العقل الاسلامي التماشي مع البشرية والعيش جنب إلى جنب معها .. شوية تحرر من السلطة الدينية وقتل النزعة الإقصائية الموجودة حاليا وشوف كيف بيتغير كلشي صاير وبتتغير كل المعاير وبتتغير طريقة التعامل مع الملف الاسلامي


*بخصوص ضمير المخاطب الموجود بكلمة راسكم
فبحب وضحلك بأني ما بشكل الرأي المسيحي وماني معني بالدفاع عن اتداء الصليب .. لتفوت أكتر بالأخوية وتفهم ثقافة سطلنا المقدس بتعرف شو وضعي

طولنا عليكم .. لا تواخذونا

[Abu ToNi]

كاتب النص الأصلي : ابو نجبو

لا لا ..هي أمريكا مو خايفة من التجمعات و الاتحادات ....
أمريكا خايفة من الدول اللي بتتبنى الخطاب و العقائد ثورية اللي ضد مصالحها ..."ايدلوجية - دينية ...الخ
ركزلي على كلمة ضد مصالحها...يعني مثلاً لما قام الهوتو "المتطرفين" بقتل مئات الالاف من التوتسي برواندا ماحدا استكال بكيلهون...
بينما العالم قايم و قاعد كرمال دارفور لاسباب كلنا منعرفها...
وبما انو الخطاب الاسلامي هو أكتر الخطابات "تشدداً" بنظر أمريكا ..فبهي الحالة عمتحاول تحاوط و تحتوي هالافكار وتحول دون امتدادو و تقضي على منابعو ....
المشكلة الاساسية بأمريكا و الغرب انو دعمن اللا محدود لاسرائيل و والصهيونية عمتأدي الى انو شعوب المنطقة عمتتوجه للتطرف و التشدد .....

حكي صحيح ولا غبار عليه

[wile]

يا شباب المد الإسلامي نحو الغرب ما قصدون فيه يعني صراع فكري أو إحتلال ولكن المقصود فيه تأثير هالكم مسلم على رأي الناخب وعلى نتائج الإنتخابات يعتي هالمسلم إذا أخد جنسية هو وأولاده وأولاد أولاده المسلمين رح يصيرو ناخبين ورح ينتخبو مسلم وهكذا مشان هيك الغرب عم يحاول هلأ ما يسمح بها الشي

[BL@CK]

أزكر بال 92 أو 93 قريت كتاب عن هالقصة .. فيو إحصائيات عم تقيس نسبة إزدياد المسلمين بالمية في كل دولة من دول العالم .. كل اللي بزكرو أنو ل 2030 كان لازم كل دول العالم تصير إسلاميّة ..

و بستغرب من شي هاي كلمة "المد" و لا كأني وباء عم يمتد نحو الغرب , أو طاعون رح ياكل الأخضر و اليابس .

غريب .

[Abu ToNi]

كاتب النص الأصلي : wile

يا شباب المد الإسلامي نحو الغرب ما قصدون فيه يعني صراع فكري أو إحتلال ولكن المقصود فيه تأثير هالكم مسلم على رأي الناخب وعلى نتائج الإنتخابات يعتي هالمسلم إذا أخد جنسية هو وأولاده وأولاد أولاده المسلمين رح يصيرو ناخبين ورح ينتخبو مسلم وهكذا مشان هيك الغرب عم يحاول هلأ ما يسمح بها الشي

مين قلك بأن الغرب ما عم يسمح لهلشي ؟
لحد اللحظة أبواب السفارات مفتوحة والجنسية عم يتم منحهل للمسلم تماما متل ما عم يت منحها لبقية لمهاجرين

أزكر بال 92 أو 93 قريت كتاب عن هالقصة .. فيو إحصائيات عم تقيس نسبة إزدياد المسلمين بالمية في كل دولة من دول العالم .. كل اللي بزكرو أنو ل 2030 كان لازم كل دول العالم تصير إسلاميّة ..

و بستغرب من شي هاي كلمة "المد" و لا كأني وباء عم يمتد نحو الغرب , أو طاعون رح ياكل الأخضر و اليابس .

غريب .

انا كمان نفس السؤال خطرلي انه ليش كلمة ( مد ) بلتحديد
لهيك ذكرتا متل ما هية بالموضوع

[wile]

كاتب النص الأصلي : Abu ToNi

مين قلك بأن الغرب ما عم يسمح لهلشي ؟
لحد اللحظة أبواب السفارات مفتوحة والجنسية عم يتم منحهل للمسلم تماما متل ما عم يت منحها لبقية لمهاجرين

ما إختلفنا بس هلأ ما عادو عم يرضو يعطو جنسيات مثل الأول وبفرنسا عم تصير مشكلة كل فترة وفترة بين الحكومة والمسلمين هي عدا عن الدعاوي الي رافعينها المسلمين على الشرطة لأنها قاعدة عم تقمع المسلمين هنيك و مثله كثير -يعني خصوصا حكومة فرنسا هي أكبر المعادين لما يسمى بالزحف الإسلامي نحو الغرب-
و