ضلو الخطر .. ضلو المطر .. ضلو شعرا .. - صفحة 3

**butterfly** · 26/08/2007

منكمل ...

اقتباس:

كاتب النص الأصلي : krimbow

ع
ليش ما النظام السوري بيبطل هيك حركات قرعا، و بيقطع الطريق على اعداؤو ؟؟؟؟

ليش ما بيتحاكموا الشباب محاكمة عادلة ؟؟؟ هاد ازا فرضنا جدلا انو عاملين شي غلط

اقتباس:

كاتب النص الأصلي : krimbow

بيجوز
خيانة و وطنية و استشهاد و ...الخ

بخصوص شغلة انو نطول بالنا
يعني ما حيلتنا هالشغلة شئنا ام ابينا

بخصوص شغلة الخيانة و الوطنية
خيو خلينا نتفق على شغلة
خلنيا نتفق انو كل مين بيحب سوريا ... و حصرا سوريا، يعني بدون ما يحب مصر، او مكة، او قم، او باريس مع سوريا
كل مين بيحب هالبلاد الملعونة و المباركة بذات الوقت بطريقة الهية غريبة
هوي انسان وطني مبدئيا
يعني خلينا نتعامل مع بعض على هالاساس
بعدين ...
ازا تصرفاتنا دلت على غير شي ... منعود منخون بعض، او منحط نقاط جديدة للتخوين

اقتباس:

كاتب النص الأصلي : krimbow

برجع و بردد كلمات اسامة الرحباني
يا صبي قديش بدك تعاند
وصلت ع نقطة اللاعودة
يا بتنتحر
يا بتهاجر
يا بتفوت باللعبة

من جهتي ...
قررت فوت باللعبة
امت فتت بالحيط

بس في كلمة حلوة لأنطون سعادة بهالخصوص
بيقول فيها "ما لم تكونوا أحرارا من أمة حرة فان حريات الأمم عار عليكم"

ما بعرف ليش كتير عم استشهد بالرحابنة بهاليومين (يمكن لأنو بيهمني سوريا بالمقدمة و الرحابنة بالذات بيشكلوا ضمير امتنا) بس في مسرحية للرحابنة اسمها ناطورة المفاتيح

هالمسرحية بتحكي عن حاكم ظالم، قرر شعبو كلو انو يترك المدينة و يعيشوا بالبرية ما عدا فيروز (زاد الخير اسمها بالمسرحية) و سكان المدينة بيسلموا مفاتيح بيوتهم لفيروز (من هون اجا اسم المسرحية)
بيقوم الملك (انطوان كرباج) بيصير بينذل لفيروز كونها صارت هيي الشعب
و بالاخير بيكتشف انو "جنة بلا ناس ما بتنداس"و بيصير بيصرخ و بيقول "دخيلكم ارجعوا، ما بقا اظلم حدا... بس ارجعوا" و هوي عم يبكي

مسرحية رائعة يا ريت تسمعوها

وهي ...

تعريف صريح للعولمة

**butterfly** · 26/08/2007

اقتباس:

كاتب النص الأصلي : krimbow

النعيق
(عدد خاص مهداة لكل مين بيقرا بكتاب (حصرا كتاب) غير ديني اكتر من ساعة كل يوم)

على ذمة الراوي:
بزمناتو احد اصدقائي (الله يذكرو بالخير و يفك اسرو) بعد ما قرا كتاب "سأخون وطني" للاستاذ الكبير محمد الماغوط، قرر انو يلتقي فيه و لو دقيقة
و عرف صديقي انو الاستاذ الماغوط معتاد يقعد بمقهى الهافانا بالشام
صار ينزل لهنيك كل يوم و يقعد لساعات هوي و ناطرو، و بالاخير ... فات مرة ع الهافانا، قام ركض لعندو الغرسون و قللو لصاحبي .. حظك حلو ليكو الاستاذ قاعد هنيك و اشرلو ع طاولة الماغوط
ركض لعندو رفيقي و دار بيناتهم الحوار التالي...
حسام: "حبيت قابلك لحتى قدملك احترامي و مودتي، كتاباتك و اشعارك هيي وجدان امتنا و شبابها"
الماغوط: "انا و كتاباتي و اشعاري منسوا قشرة بصلة بيوم الغلا، اتطلع حواليك و شوف بشو مهتم وجدان شبابنا، غير بالموبايلات و السيارات و قصات الشعر ؟؟؟
كل شي كتبتو ما قصر بعمر اسرائيل ساعة
كل شي كتبتو ما رجع حبة رمل وحدة
كان بدي امشي من ساعة، بس الغرسون قللي انو صرلك كزا يوم عم تسأل عني فنطرتك، و هلأ اسمحلي، و شكرا ع مشاعرك النبيلة"
و مشي الاستاذ تارك قلب صاحبنا بحلقو و الدمعة عم تغرغر بعينو

لو كنت محل حسام كنت قلتلو للاستاذ الماغوط:
غلطان كتير يا استاذ
ما بعرف اديش باقي من عمر اسرائيل
و ما فيي عدلك حبوب الرمل
بس بعرف التالي
على الرغم من كل الجنون الاعمى يللي عم يضربنا، بدءا من دخان المكاري الشيطانية و بيروقراطية الموظفين المعترين، و انتهاءا بكل تهديدات الدول العظمى اليومية بتدميرنا، مرورا بكل حثالة جنبلاط و خدام و الحريري، و فساد المخلوف و غزالة و غيرو، و حرق السفارات و هبل الناس،
و على الرغم من اكتر من 2500 سنة احتلال من ما هب و دب من شعوب العالم
على الرغم من كل هالشي
بس لسا ما صرنا لا عراق 2، و لا لبنان 2، و لا كويت 2، و لا حتى دارفور 2...

الفول و الفلافل موجودين بكل هدول يللي ذكرتهم، إذن مو الفول و الفلافل هنن الرقم الصعب بهالمعادلة، و اكيد ولا الفيلات و المرسيدسات ايضا هيي الرقم الصعب
الرقم الصعب هوي انو عنا الماغوط ... و عنا يللي بيقرا الماغوط و غير الماغوط

احد الحكماء قال: "ليس بالخبز وحده يحيا الانسان، بل بكل كلمة" و ما بيعنينا باقي الحكمة بشي

و بالنهاية بتبقى الحقيقة هيي انو "أن تشعل شمعة، خير من ان تلعن الظلمة"

المسيح يحميك ...

**butterfly** · 26/08/2007

اقتباس:

كاتب النص الأصلي : krimbow

الدين لله ... بس الوطن للكل شاؤوا ام ابوا
شئنا ام ابينا
شئتم ام ابيتم ( و انثوها كمان)

اقتباس:

كاتب النص الأصلي : krimbow

خيو انا شفت الموضوع بشكلو الرمزي و اسقطتو على مجموعة وقائع منعيشها

السكر بيعمل سكري و الحلو بشكل عام بيزيد السمنة (البدانة) و ازا بدنا نحكي عن المضار ما منخلص لبوكرا

بس مع ذلك ... بيبقى الحلو حلو
و لو كان الو عمل تاني غير انو ناكلو و نستمتع بأكلو (لاحظ انو الحلو دايما بيرتبط بمفهوم الجائزة... حتى بالجنة شي نهر عسل و شي نهر خمر .. سمعت عن نهر كاتشب بالجنة ؟؟؟)

بذات المقياس
الديمقراطية بتسبب الفوضى
حرية التعبير بتسبب مقاطعة مكعبات زبدة و ليغو و الخ و حتى حرق سفارات و اعلام دول ما الها علاقة بالموضوع ازا بدك

بس بتبقى الديمقراطية و الحرية موجودين لحتى نعيشهم، لحتى نرتقي و نتطور فيهم بعالم بعيد عن اليوتوبيا ملايين السنين الضوئية

بالنهاية، يللي ما بياكل حلو بتروح عليه
و يللي بياكل حلو ... وحدو بيعرف طعم الحلو

اقتباس:

كاتب النص الأصلي : krimbow

فاقد الشيء لا يعطيه

صحيح
بس هالموضوع ما بينطبق ع الحرية
لأنو حرية الشعب بتنطلق من حرية افراد من هالشعب

خلينا نفترض جدلا انو فاقد الحرية لا يعطيها
معناها يللي بيعطيها هوي جهة بيتمتع بالحرية
يعني ازا بدنا نغير وضع الحرية او الديمقراطية ببلدنا لازم نستنى حدا "حر" او "ديمقراطي" لحتى يعطينا ياها و هالشي مو صحيح
الفرنسيين حصلوا على حريتهم من استبداد الملوك بايدهم
و كذلك الروس مع قياصرتهم، و حتى الاميركان تحرروا من نير عبودية الملكة الانكليزية بدمهم

حتى السوريين تحرروا من الفرنساوية بدمهم

فاقد الشيء لا يعطيه
صحيح هالكلام
ازا انت بتدخن ما رح تقدر تقنع حدا انو يترك التدخين مهما سعلت و مهما فرجيتو صورة صدرك السينية
ازا حدا مكبل حالو بكل انواع التحجر العقلي... سواء كانت من النوع الديني او الاقليمي او العشائري او من النوع المرتبط بالاعراف و التقاليد السيئة .. او المرتبط بالخوف او الرعب من الاجراءات التعسفية تبع اجهزة الامن
اكيد ما رح يقدر يقنع حدا بالحرية او الديمقراطية
و هيك شخص ما بعتب عليه
عتبي على المثقف الواعي و المدرك لمخاطر انعدام الحرية و الديمقراطية ببلدنا

....

**butterfly** · 26/08/2007

اقتباس:

كاتب النص الأصلي : krimbow

انت عم تخون المعارضة
و انا معارض لهالنظام
عموما شغلة التخوين هي شغلة الضعفاء .. المفلسين فكريا و الاصوليين
يا بتكفروا يا بتخونوا
هدول الناس بتلاقيهم بمراكز الحكم و السلطة بالبلد حصرا، او قريبين منهم، و إلا ممكن تشرحلي شو معناة كل ما تعلن اميركا تجميد اموال شي مسؤول سوري بينط النظام بيزلغط و بيستنكر ؟؟؟
مين يلل عم يسرق البترول ؟؟؟
مين يللي آخد كل مشاريع البلد ؟؟؟
باسم مين كل مؤسسات الاعلام و شركات الانتاج التلفزيوني بهالبلد ؟؟؟
مين يللي متفنن بفن الضرايب ؟؟؟

ما كلهم باسم اذيال النظام يللي عم تخونني لما قول اني بعارضهم
و بالاخير بتجي بتتهمني او بيخطرلك اني ممكن كون عم اسرق البلد ؟؟؟ ليش ضل شي ينسرق ؟؟؟
مو انا يللي بكتب تقارير برفقاتي و بدكهم بالحبوس و بدمر احلامهم العادية و مستقبلهم
هدول يللي بيريقوا دماء الابرياء هنن اجهزة الامن حصرا

و ازا صار و طلعت بشي منصب بيأهلك انك تخون الناس ... فالخيانة جريمة فردية و ليست جماعية
لما بدك تخون حدا بتذكرو بالاسم
يا اما لا تستعمل هالكلمة بنوب
لأنو مو من حقك انك تستعملها
هي التهمة كبيرة
فيها اعدام
و ما خرج تستعملها ع الطالعة و النازلة

انا عيوني معمصة من الحقد .؟؟؟؟
لما بطالب بحقوقي بصير حاقد ؟؟
لما بطالب اني عيش محترم بدولة محترمة مو حايالله عنصر امن فينو يتمقطع فيني بصير حاقد ؟؟؟

ليش ما عم تفهموا عليي
الخيانة مو لعبة
الخيانة مو مسبة عادية
الخيانة جريمة من اخطر و اكبر الجرايم
ما هيي لعبة

اقتباس:

كاتب النص الأصلي : krimbow

الجملة الاولى يللي قبلها كانت "الحرية مو هبة"
باختصار لما اي رئيس يعطي شعبو الحرية ما بيكون عم يفضل ع راسهم بنوب
ما بيكون عم يضربهم منية
بيكون عم يعمل واجبو
عم يشوف شغلو
و غير هيك بيكون مقصر
بالنهاية .... رئيس الجمهوري (اي رئيس و اي جمهورية) مانو ملك

.........................

**butterfly** · 26/08/2007

اقتباس:

كاتب النص الأصلي : krimbow

الحرية لجميع معتقلي الاخوية

طارق غوراني
حسام ملحم
علي علي

و لجميع يللي عم يتحقق معهم
دياب سرية
عمر العبدلله

و لجميع معتقلي الرأي بسوريا

وحاج لليوم ..

**butterfly** · 30/08/2007

منكمل .. وبتمنى من كل قلبي .. أنو يكون الناس عم توقف ولو للحظة تقرا هالموضوع ..

اقتباس:

كاتب النص الأصلي : krimbow

الحرية لشباب اخوية

اقتباس:

كاتب النص الأصلي : krimbow

ليش من ايمت كانوا يعتقلوا يللي عاطي لضميرو حبة اسبرو ؟؟؟؟
هدول حبيب ما بيعتقلوهم
هدول بيكرموهم و بيسلموهم البلد و رقابنا ازا بدك

اقتباس:

كاتب النص الأصلي : krimbow

تكرم عينك
و لو انو طلبك بيجوز يجيب آخرتي
بس تكرم

إلى عنصر المخابرات المكلف بمتابعة آخر المواضيع في منبر أخوية الحر
تحية و بعد
يسرني و يبهج قلبي أن تعرفوا اني أعتبر المعارضة أمر صحي و مشروع، كما و أرجو ان تبلغوا رؤساء الفروع التي تتبعون لها على اختلاف مشاربها الأمر التالي:
يرجى أخذ العلم أني أعارض الأوضاع البالية التي آلت إليها حال البلاد، و أحيانا بيطلع معي (مو دايما، احيانا) انو حزب البعث و المسؤولين عنه إلى اعلى السلم الهرمي فيه و في الدولة هم المسؤولين عن هذه الاوضاع بشكل أو بآخر
و يهمني جدا ان تعرفوا اني لم و لا و لما أتعامل مع اي قوى خارج حدود الوطن الغالي
بمعنى، اني مثلكم و اكتر بشعرة ... نعتبر اسرائيل عدوا استراتيجيا لوطننا، كما اني أعتبر أن السياسات التي تتبعها اميركا منذ سبعينات القرن الماضي إلى يومنا هذا ... هي سياسات معادية لمصالحنا القومية

بالعادة بختم كلامي بـ "ودمتم"
بس انتوا بالذات ارجو اللا تدوموا

المواطن المفعوص تحت بصاطيركم
كريمبو (و يللي بدو يقول طز .. طز عليه هوي)

اقتباس:

كاتب النص الأصلي : krimbow

انا مدرك تماما انو "إرضاء جميع الناس غاية لا تدرك"
و بعرف انو في عدد ضخم من الاشخاص التي تكره الموقع كلو و ليس فقط ادارتو
و بعرف اكتر مدى رفع طبقة الجليد التي نسير فوقها لما اخترنا الاعلان العالمي لحقوق الانسان كشرع و مبدأ لهالمنتديات ... بس مؤمن بأنو رح نوصل للضفة التانية

بصراحة يا جماعة
بحب باركلكم كلكم
و بحب اشكركم على مساهماتكم الرائعة بقلب هالموقع

مو بس اجهزة المخابرات مهتمة بهالظاهرة الفريدة من نوعها بعالمنا العربي (حرية الاعتقاد و الرأي في منتديات اخوية)
بل حتى وسائل الاعلام

في اخوية هناك رأي و هناك رأي آخر بشكل حقيقي و ملموس ... و ليس مجرد شعار مدحوش تحت لوغو احدى الفضائيات
في أخوية هناك حقيقة، بدون عمليات تجميل، بدون ماكياجات، مهما كانت مؤلمة او مخزية ... الحقيقة ستبقى وحدها موجودة في هذا المنتدى
هي الحقيقة ارعبت رجال المخابرات من ان تنشر فتنتشر
هي الحقيقة (حقيقة اختلاف وجهات النظر و تعدد الآراء) ارعبت من لا يسعهم التفكير بمجرد بوجود فكر مخالف لفكرهم... و في النهاية يتساءلون لماذا هم متخلفون

**butterfly** · 30/08/2007

اقتباس:

كاتب النص الأصلي : krimbow

انا مع تشكيل قانون الاحزاب

هلأ مشان الاحزاب الدينية و العرقية

عندي توجه كتير حلو بيحل الازمة ...
كل حزب بيسمح بانتماء اي مواطن سوري بيتمتع بالاهلية القانونية لصفوفو هوي حزب مقبول .. و غير ذلك لأ
يعني ازا في حزب ما بيقبل الارمني السوري بصفوفو هاد حزب واجب منعو
ازا في حزب ما بيقبل الدرزي بصفوفو هاد حزب واجب منعو كمان و هيك

و معكم بمنع مظاهر التسليح للحزب و اقتصار التسليح على الجيش و رجال الامن

و ضد التمويل الخارجي للاحزاب
لا تقولوا مهاجرين و مغتربين و ما بعرف شو ...
اول ما ينفتح هالباب رح تصير حاكمتنا هيي السعودية و فرنسا و اميركا و .... الخ

نحنا بدنا احزاب سورية تحكمنا

اقتباس:

كاتب النص الأصلي : krimbow

انا قلت كل مواطن سوري اولا و يتمتع بالاهلية القانونية تانيا
هلأ سوري بتصور انها مفهومة
اما الاهلية القانونية فمعناتا انو ...
1- ما بيصير يكون الزلمة مجرم ضد الدولة او المجتمع
2- ما بيصير يكون اخوت او اهبل او اجدب او مجنون ... يعني قانونيا ما بيصير يكون سفيه او مجنون او مغبون غبن استغلالي او معتوه
3- لحتى يتمتع بالاهلية القانونية لازم يكون بلغ سن البلوغ القانوني
هلأ مو معقول يجي حزب البعث ينسب ولاد عمرهم 10 سنين بصفوفو
و لا حتى عمرهم 16 سنة ... يعني هدول الناس قانونيا ما عندهم القدرة على اختيار نمط حياتهم لا عنا و لا باميركا
فيك ازا حابب تتوجه (كونك حزب على فرض) لهالشريحة انك تعمل اندية او تعمل جمعيات او حركات ... الخ
بس ما بيجوز تنسب عالم زغار بقلب حزبك
اما بخصوص الناس الكبار بالعمر (يعني ستين و طالع مثلا) فمتل مو شايف حزب كاديما الاسرائيلي كل اعضاءو انتسبولو فوق الستين ... و هاد الحزب رح يقود اسرائيل ع شوي
يعني ما في مشكلة بتحديد سن للانتساب ... اصلا نحنا عم نحكي عن حزب سياسي مو حزب رياضي شغل عضلات و هيك..

اقتباس:

كاتب النص الأصلي : krimbow

ضد اي حزب ديني
ضد اي حزب عرقي
بغض النظر ان غيروا استراتيجيتهم من العنف للسلم
طبعا هنن بكل بساطة يبقدروا بمجرد انو يطير البيانوني و يجي واحد متعصب انو يرجع للاستراتيجية القديمة
بس بغض النظر عن هالشي
انا معارض للمبدأ تبعهم

الشعب السوري موزاييك ديني عرقي فريد من نوعو ... مسيحيين، اسلام، دروز، علوية، اسماعيلية، يزيديين، مرشدين، اكراد، ارمن، سريان، عرب، اشوريين، شركس، بدو .... الخ الخ الخ و كلو بيكن العداوة لكلو
الاكراد بيكرهوا السريان و العكس صحيح
الارمن بيكرهوا الشركس و العكس صحيح
السنة بيكرهوا العلوية و العكس صحيح
المسيحية بيكرهوا الدروز و العكس صحيح
و هيك
هدول الناس بدون تنظيم عم يدبحوا بعضهم عند اول فرصة (احداث السويدا بين الدروز و البدو سنة 2001، احداث القامشلي بين العرب و الاكراد سنة 2003 ... الخ) كيف لو تنظموا ؟؟؟
و اكبر دليل على هالشي احداث حماه
انت بتعرف اني دايما بندد و بستنكر المجازر يللي صارت بحماه
بس فكر فيها من وجهة نظر علوية .. رح تلاقي انو العلويين قبل ما يعملوا المجازر بدافع الحقد الطائفي، عملوا هيك لأنو من وجهة نظرهم ازا استلموا الاخوان السلطة رح يبيدوهم
ما فيك تبعد هالفكرة
المنطقة شهدت كتير حالات ابادة للاشوريين و السريان و الاكراد و الارمن و الموارنة و الدروز ... الخ
لا يمكن ان تكون السلطة في سوريا إلا سلطة علمانية و إلا انهارت البلد و فتنا بحرب اهلية ما بتخيل رح نطلع منها
عدا عن ذلك الشعب السوري اثبت بجدارة منقطعة النظير مؤخرا انو شعب متخلف همجي عاطفي احمق
قدام هالمعطيات في امامنا حلين لا ثالث لهما
إما انو تبقى حكومة المخابرات الحالية مع اعطاء فسحة اوسع للمثقفين للعمل و تشكيل حكومة تكنوقراط، مع بقاء الوضع العسكري بايد البعثيين (هي مطالب المعتقل كمال لبواني)
او انو نعمل ديمقراطية بشرطين اساسيين
1- تأسيس الدستور على اساس علماني بحت (فصل الدين عن الدولة و السياسة و الاقتصاد و القضاء)
2- تشكيل لجنة لصيانة الدستور و الحفاظ على العلمانية
و هي اللجنة ...
أ: أعلى سلطة دستورية بالبلاد
ب: لا تملك حق اصدار اي قانون او قرار، و لكنها تملك حق الفيتو على اي قانون او قرار يصدر من اي جهة كانت (رئاسية، برلمانية، حكومية، قضائية، عسكرية، ... حتى على صعيد فصل او تعيين معلم بروضة حضانة) في حال كان القرار بيتعارض مع العلمانية
جـ: يتم عند التأسيس اختيار اعضائها من العلمانيين السوريين المرموقين
متل رياض ترك، عارف دليلة، كمال لبواني، .... ياس، كريمبو، الحكيم، حشت نشت الزمخشري، ابو النسيم، ديموزي

و بعد التأسيس يتم تعيين اعضاء حسب الحاجة عن طريق التزكية من قبل الاعضاء السابقين

بالحالتين ما ممكن انو يتشكل احزاب دينية او عرقية

هلأ ازا في حدا كتير كتير مشردق و رح ينجلط لينظم شي جهة عرقية او دينية بإمكانو ضمن الحل التاني انو يعمل جماعة ضغط دينية او عرقية
و الفرق بين جماعة الضغط و الحزب انو جماعة الضغط ما بيحقلها تمثل حالها بالبرلمان او الحكومة بصورة مباشرة
و عليه لازم تتحالف مع احد الاحزاب يللي مرخصلها العمل السياسي ضمن الدستور و القوانين .. و بيتم تمريق مصالح جماعات الضغط عن طريق المصالح المتبادلة (حكلي بحكلك)، بالنهاية السياسة ليست سوى فن المصالح و المصالح المتبادلة

و دمتم

... منكمل ..

**butterfly** · 30/08/2007

اقتباس:

كاتب النص الأصلي : krimbow

مرحبا شبيبة
بخصوص معنى "سوريا"

في 3 نظريات ... و هيي نظريات لأنو ولا وحدة منهم مثبتة بحقائق علمية و انما استنتاجات مقبولة و صعب ردها

1- سوريا من أشور حسب الرؤيا اليونانية لأنو متل ما وضح وايت سنيك بردودو سرجون الاكادي هوي اول مين وحد هالبلاد تحت حكم واحد

2- سوريا من صور لأنو اهل صور اول مين ركب البحر و عرف باقي الشعوب على هالبلاد

3- سوريا من "سير" اله الشمس عند الهنود (عفوا منك زين بس اسمو سير) لأنو الدورة الطبيعية و النظامية للفصول بتتم بتناسق بهي البلاد

بخصوص السوريين سريان او غيرهم
ما ممكن حدا يحدد ... سوريا سكنها اكتر من 50 شعب اغلبهم انذكروا بالكتب المقدسة و جميعهم تمازجوا مع بعض و كونوا الشعب السوري الحالي (ما عدا اليهود)
الهجرة على سوريا بدأت من فجر التاريخ و لسا ما خلصت ... يعني بس من 100 سنة هاجر على سوريا شركس و ارمن و اكراد و ... الخ، و رح تبقى حركة الهجرة من و الى سوريا شغالة

اقتباس:

كاتب النص الأصلي : krimbow

كيف يعني ؟؟؟
كيف يعني بدكم ياني اعترف انو لبنان شعب و سوريا شعب تاني مختلف تماما ؟؟؟
يمكن هنن دولتين
يمكن هنن علمين و نشيدين و حدود و كل شي بدهم ياه سايكس و بيكو و جنبلاط و خدام و كلهم
بس انا من جوا ما فيي كون سوري بدون ما يكون لبنان جزء مني
و ما بتصور انو في لبناني بيقدر يكون لبناني بدون ما تكون سوريا جزء منو
آخ يا لبنان
زعلي طول انا وياك
و سنين بقيت
جرب فيهم انا انساك
ما قدرت نسيت
ما حدا يتصور انو ممكن بيوم من الايام رح تزيد محبة سوريا بسبب كره لبنان
بس شو بدنا نعمل
في ناس من كتر ما حبوا وطنهم .... قضيوا عليه

اقتباس:

كاتب النص الأصلي : krimbow

نص قرايبيني عايشين بلبنان و منهم عمي اخو ابي
بعيد الفطر (يللي بييجي بعد رمضان) كانت خطبة بنت عمي على واحد لبناني من اشد القواتيين (جماعة الحكيم جعج) ... بنص الحفلة اخو الخطيب رفع كاسو و نادالي و قللي "و لك خيي، ما عاش بدنا الحئيئا، بدنا نشوفكم بصحة ع طول و بس"
و ازا بدك وائل كفوري قرايبي و اهلي كتير صحاب مع اهلو و ياما زايرينهم ببيتهم القديم بحوش الامرا بزحلة
صلا عشت سنة و نص بمنطقة كسارا بزحلة و درست بالمدرسة الانجيلية فيها
و الاستاذ جورج ابراهيم الخوري من اشد اصدقاء والدي و هوي يللي درسني الصولفيج (مع انو صوتي مو حلو)
اما مشان الحقد و الكره
عفوا منك ابو الفود ... بس نحنا هون بسوريا، و مو طايقين مخابراتنا و ضباطنا البلهموطية الزعران
بدك هنن يحبوهم ؟؟؟
كيف بدك صاحب السوبر ماركت يحب السوريين لما يجي لعندو الضابط السوري و يقشللو نص السوبر ماركت و يمشي مع تكشيرة او بهدلة لأنو ما لقا شي صنف كان ناوي يقشو ؟؟؟
كيف بدك صاحب الارض اللبناني يللي بدو يعمرها و مستأجر سوريين و ميت رعبة منهم ما يغلطلو بشي كلمة هيك و اللا هيك قدامهم و يروح فيها بشربة مي انو يحبنا ؟؟؟
كيف بدك ام السجين اللبناني يللي بسوريا او اختو او ابوه او ابنو انو يحبونا ؟؟؟؟
انا ما عم قول انو اللبنانية معهم حق يكرهونا ... بس ممكن اني اعزرهم و اتفهم موقفهم
يللي ما بقدر افهمو هوي ليش المعاملة بالمثل ؟؟؟ ازا نحنا زغرنا عقلنا متل اغلبيتهم و ما سمعنا صوت العقل يللي عم يصرخ بهالعجقة من عنا و عندهم رح نخسر اكتر بكتير من يللي خسرناه لهلأ
و ما عم قول انو اللبنانية كلهم رحابنة و كلهم عاقلين
متل ما عندهم جنبلاط الغدار ... عنا خدام الخاين
متل ما عندهم حريري نصاب ... عنا مليون مخلوف حرامي
بنفس الوقت
متل ما منحب صباح ... بيحبوا رويدا عطية
متل ما منحب سعيد عقل ... بيحبوا نزار قباني
متل ما منحب الرحابنة ... بيحبوا سعد الله ونوس
بالنهاية ما حدا مستفيد من الكره يللي بين السوريين و اللبنانيين اكتر من اسرائيل
و دمتم

.................

**butterfly** · 30/08/2007

اقتباس:

كاتب النص الأصلي : krimbow

برأيي الحرية ليست برشامة او تحميلة مندحشها بيقوم بيمشي الحال و منطيب من مشاكلنا الاجتماعية
ولا اغنية وطنية و لا عاطفية... حتى لو صدحت ام كلتوم من هون ليوم الدين "اعطني حريتي اطلق يديا" ما رح نحصل على غرام حرية
و لا هيي قوالب جاهزة من العقائد و الايديولجيات .. منتبناها بيقوم منصير احرار
و لا هيي مجموعة من المقالات و الكتب ازا قريناها منصير منعرف كيف نمارس الحرية
مشان هيك ... حتى لو صار طول الموضوع عشرين كيلو متر، ما بيكفي انو نقراه لحتى نصير نفهم الحرية
و ما بيكفي لحتى تكون حر انك تولد من ام حرة و اب حر، و لا حتى هوي شرط من شروط التحرر

الحرية -قبل كل شي- مسؤولية
لا تحرم غيرك مما تبيحه لنفسك و لا حتى من كل ما تحرمه على نفسك
بل عامل الناس كما تريدهم ان يعاملوك

و الحرية -بعد كل شي- تربية و ممارسة

كيف بدك من شعب كامل مفعوس من 2500 سنة بما هب و دب من الجيوش من الاشوريين للاميركان، مرورا بالاغريق و الرومان و الفرس و العرب و التتر و الصليبيين و الترك و الاوروبيين و اليهود و البعثيين و الناصريين و الشيوعيين (يعني مو بقيان غير الهنود و الحبشيين ما احتلونا) انو يقدر يحكي عن الحرية ؟؟؟
كيف بدك من شعب "نصو انبيا" على قولة شكري القوتلي انو يتحرر من وصاياهم ؟؟؟؟
كيف بدك من شعب "اخترع الله" بالالوان انو ما يشوفو شخصي 32 بت؟؟؟؟؟

الحرية بدأت من عنا (أمارتا) بس مع الاسف خلصت من عنا (البعث)

ما بيمشي الحال انو نستورد حرية ماركس و جان دارك و لوثر كينغ و غاندي

لازم نرجع نحيي "أمارتا" لحتى نرجع الحرية لمسقط رأسها

و دمتم

اقتباس:

كاتب النص الأصلي : krimbow

معقول ؟؟
معقول يكون النظام محظوظ لهالدرجة ؟؟؟؟

معقول يكون الحل بالنسبة لهيك نظام عفن يجي من اكثر المتضررين منه ؟؟؟؟

لا لا
المسألة ما هيي مسألة حظ على الاطلاق

المسألة مسألة عقدة

عقدة هيلسنكي

بالتعريف: هيي تعاطف الضحية مع الجلاد عندما يتحول هذا الجلاد الى ضحية لجلاد آخر
سبب التسمية: تم رصد و دراسة هذة الظاهرة على المستوى الاجتماعي لأول مرة، عندما قام المقاومون من اهالي مدينة "هلسنكي" (عاصمة فنلندا) بحماية الجنود الالمان النازيين (يللي كانوا عم يقاوموهم)، و صاروا يخبوهم و يحموهم من بطش قوات الحلفاء يللي اجوا لحتى يحرروا المدينة من النازية

لوحظت هذة العقدة مع معظم حالات الاختطاف جماعي للرهائن (اختطاف الوفد الرياضي الاسرئيلي في ميونخ، اختطاف وزارء النفظ في فييننا... الخ) و تبدأ مع ضعف المختطفين (الجلاد) نتيجة ضغوط خارجية (جلاد الجلاد) و تنتهي مباشرة بعد سقوط الجلاد، و يعود الناس الى رشدهم

و هالموضوع هوي إظهار مبكر لعقدة هلسنكي

طمن بالك ياس ... لن يطلق على سوريا قذيفة واحدة
انا متأكد من هالشي
سوريا هيي دولة التوازن الوحيدة بالمنطقة
معظم اللاجئين العراقيين عنا
و كذلك الفلسطينيين، و الارمن و الاكراد و الاشوريين السريان، لك حتى اللبنانيين
هدول الناس مع اول قذيفة رح تسقط بسوريا رح يحملوا خيامهم و يدوروا ع بلد استقرار تاني
و بالتأكيد معهم رح يكون في لاجئين سوريين يمكن بيفوقوا مجموعهم بالعدد

و المشكلة انو ع الخريطة ما في دول استقرار
لوين بدهم يلجأوا ؟؟؟
للبنان ؟؟؟ 100000 فلسطيني فيها عاملين ازمة الها اول ما الها آخر
للاردن ؟؟؟ ما هوي متخم باللاجئين الفلسطينيين "all ready"
لاسرائيل ؟؟؟ خلينا ضمن التفكير المنطقي

اميركا بتعرف هالشي، شيراك بيعرف هالشي، و حتى الحريريين بيعرفوا هالشي
و المشكلة انو البعثيين و الاسديين بيعرفوا هالشي، و الاخطر انو بيعرفوا يستعملوا هيك معلومة كتير منيح بعقد الصفقات

ما حدا بدو دبابة اجنبية بسوريا
المطلوب تغيير النظام من الداخل بدون تدخل عسكري خارجي
هاد مطلب الجميع و الجميع متفق ع هالشي

لو رحل صوتي ما بترحل حناجركم
عيوني على بكرا وقلبي معكم ...

sweetbaby · 30/08/2007

اااخ ياميمو
الحرية لكريم وحسام ودياب وطارق وكل شباب اخويتنا
الحرية لمعتقلي الراي في سوريا
الحرية لسوريا
الحرية لشبابنا

**butterfly** · 02/09/2007

منكمل ..

اقتباس:

كاتب النص الأصلي : krimbow

بعدين يا جماعة لسا بتقولوا مبادئ البعث بتجنن و ما بعرف شو
لك انتوا عندكم فكرة بالاول عن مبادئ البعث ؟؟ عندكم فكرة انو البعث لهلأ بعدو عايش على "بعض" المنطلقات النظرية
بتعرفوا انو البعثيين ما عم يطبقوا حرف واحد من بعثيتهم ؟؟؟؟؟؟
انا ضد هالعصابة يللي اسمها بعث
ضد الجبهة الوطنية يللي ع اساس انها تقدمية ... بس يظهر انو تقدمها لورا
و ماني مستعد حط ايدي بايد البعث حتى من اجل الدفاع عن سوريا لسبب بسيط .. انو متأكد انو البعث ما رح يدافع عن سوريا في حال صار شي لا سمح الله متل ما صار بالعراق ... طقوها فريكة الشباب
ازا صار شي لسوريا رح كون اول مين بيدافع عنها ... بس ما رح حط باعتباراتي اطلاقا انو ممكن يكون البعث حليفي بهيك معركة
لأنو ... و يللي بيقرا تاريخ البعث بيعرف انو البعث اول واحد رح يتحالف مع اميركا ضد سوريا
و دمتم

اقتباس:

كاتب النص الأصلي : krimbow

من حرقة قلبنا ع البلد عم نحكي ... و لما منتمسخر منتمسخر ع الساسة تبع البلد ... متل ما نك شايف سياستهم رح توصل اميركا لحضننا

امبريالية و صهيونية ؟؟؟؟ يا رجل يللي اخترعوا هالمصطلحات بطلوا يحكوا فيها ... خوش ع شوي كان رح يعملوا سلام مع الصهاينة بس ربك ستر و انقتل رابين ... و ع فكرة الشباب مقهورين كتير عليه و كل شوي بيطالبوا بالوديعة
ازا ما عندك خبر بكل بساطة لو كان عننا اعلام كنا قدرنا نفهم الناس شو القصة ... هي شغلة الاعلام الضعيف تبعنا عمرها شي 50 سنة على ما اظن ... لهلأ ما كانوا يعرفوا يزبطوه ؟؟؟؟؟

هي مقترحاتي فوق ... بتحل ازمة الاعلام و بتحل مشاكلنا مع اميركا و ما بيعود فيها اميركا تتدخل فينا بنوب و بتخرس خالص لو اتطبقت مقترحاتي ....
الدور و الباقي ع الشباب الطيبة ... نحنا حاطين مقترحات .. بالاخوية و برات الاخوية ... بس بدك مين يطبقها ... ع القليلي يخلونا نطبقها ...

معك حق ... الناس من كتر ما شافت ويلات و معتقلات و اقبية بفروع الامن فضلت تنام ...

اما نحنا يا اما مجانين مو خايفين ع حالنا، يا اما مقايسين و ما فارقة معنا، يا اما شايفين انو بلدنا بتستاهل انو نضحي كرمالها ... بلدنا، مو رئيسها و لا الحزب يللي عم يتمقطع فيها

و دمتم

اقتباس:

كاتب النص الأصلي : krimbow

يللي حضران فيلم العراب الجزء الاول رح يلاقي انو في تشابه كبير بينو و بين حياة حافظ الاسد ... بيغدروه اصدقاءو بيطلع ع كتاف الغير بيموت ابنو الكبير ... بيستلم ابنو الزغير و بيصفي الكل و بيبقى هوي

حاليا لما عم نشوف حياة بشار الاسد منلاحظ انو عم نحكي عن الجزء التاني من العراب
مساءلات قدام جهات عليا
محاولات تدمير
خيانات عائلية

و بالنهاية بيطلبوا من الخاين ( يللي خان عيلة الاسد ) انو ينتحر و بالمقابل بتبقى عيلتو عايشة معززة مكرمة

غازي كنعان حط الفرد براسو و قوص ... بس مو هوي يللي قرر هالشي

و النتيجة هيي هيي

و دمتم

اقتباس:

كاتب النص الأصلي : krimbow

نسيت خبركم شغلة

باقي مشهدين من فيلم العراب 2 ما صاروا بحياة الرئيس بشار الاسد ....

لما بتهجرو مرتو

و لما بيقتل اخوه و بيصفي اعداؤو

عموما .... إن الغد لناظره قريب

**butterfly** · 02/09/2007

اقتباس:

كاتب النص الأصلي : krimbow

بحب خبرك ازا ما كان عندك خبر ... محمد حربا وزير الداخلة الاسبق كان سني ... و شفنا الويل منو
و الله لا يسمع منك و يبعتلنا واحد سني متدين بدو يفرض شرع الله ... لأنو خراب الشام على ايدو باذن الله
بحب خبرك انو ما عندي مشكلة مع السنة ... بس عندي مشكلة كبيرة مع ما تسميه شرع الله
بالله خبرني حسب شرع الله السيارات بتوقف ع الاشارة الحمرا و اللا الخضرة ؟؟؟؟
اي نحنا بدون شرع الله و بنظام على اساس انو علماني و مواطنين درجة تانية .... لكان مع شرع الله شو بيصير فينا ؟؟؟
شفنا شرع الله ايام طالبان و شايفينو بالسعودية ... بقا معلش اسمحلي ، انا بحب سوريا و بخاف عليها و بردلها الخير و مستحيل اني بيوم اقبل انو شرع متحجر انحط لقبائل بدوية من 1400 سنة و بيعتبروها العلماء حلقة داروين المفقودة بالارض يللي اهدت التشريع و القانون للعالم كلو
و دمتم

اقتباس:

كاتب النص الأصلي : krimbow

بخصوص قطع اليد ... يعني مع احترامي للجميع هاد مو حل ... و قضية انو يد الانسان اغلى من الملايين غلطان كتير فيها
شخصيا ازا بتضمنلي راحة الضمير و البال في حال سرقت و تم قطع يدي ... انا اول واحد رح اسرق و بأيدي بقطع ايدي و يا دار ما دخلك شر
حتى بالكلام عن الرادع ... انت جبت مثال جيد .. يللي بدو يركب بدو يدفع و المتهرب عن الدفع ( سارق شركة النقل ) بيدفع اكتر بكتيييييير من غيرو ... بس اكيد ما بيقطعولو لا ايدو و لا رجلو
و ازا ما دفع بينسجن و بيشتغل بالسجن ليدفع
و الحرامي حرامي ... لو قطعتلو مو بس ايدو ... رح يبقى حرامي
و بخصوص الهجرة ...
المستوى المعيشي للمسيحيين بالبلد جيد جدا ... و ليست لقمة العيش هيي يللي دفعت المسيحيين للهجرة
يللي دفعهم للهجرة هوي الاضطهاد العثماني و الفتن بينهم و بين الكراد
و حاليا يللي بيدفعهم للهجرة هوي انعدام الحرية اولا و التخلف ثانيا و التعصب الاعمى عند المسلمين ثالثا
مع انو انا معك بموضوع انو الحكومة بتشجع الهجرة و خصوصي هجرة العقول ... و الدليل هوي قانون البدل يللي بيحق للمغترب انو يدفعو و غيرو بياكلها
كل واحد بيخلص جامعتو بيصير همو يأمن شغل بالخليج ... بس لحتى يخلص من ذل العسكرية ... بدال ما تكون العسكرية فخر صارت ذل
لأنو الناس يللي عم تحكي عن شرعهم قرروا انو هنن و بس بيحقلهم يبقوا عايشين و كفروا كل الناس .. عموما حتى لو سمحوا انو يعيش اهل الذمة بشرط انو يكونوا عبيد لالهم ... اما العلويين فهنن كفرة وجب قتالهم حسب الشرع العنصري الفاشي يللي عم تدافع عنو ...
و بهالحالة بالتأكيد من حأ العلويين انو يدافعوا عن انفسهم بالطريقة نفسها يللي بتحكوا عنها ( قطع الايدي ) و حتى الرقاب ... انت قلت انو الايد غالية فكيف الروح ؟؟؟
الاخوان المسلميين و الاصوليين و اتباع السافل الخاين اسامة بن لادن و الديوس الحقير الفلسطيني ابو مصعب الزرقاوي يللي تارك فلسطين و رايح يغدر و يخرب بالعراق ... امثال هيك سفلة هنن يللي برروا للعلوية انو يبطشوا ... و يللي بيطبش ما بيفرق بين المنيح و العاطل ... و طالما قدروا يبطشوا شو المانع انو يسرقوا ؟؟؟
بعد ما برر الاصوليين الحمقى بطش العلوية بتجوا بدكم تحاسبوهم على سرقاتهم ؟؟؟
عن جد يا رب لا تواخزنا على ما فعل السفهاء منا و السفهاء هم الاصوليين ...
اما عن بيت المال ...
ما رح ناقشك فيه
ما بتصور انو عندك المؤهل الكافي لا انت و لا احسن شيخ جامع و لا احسن عالم دين .. لك اصلا شو دخل الدين بالاقتصاد ؟ شو دخلو بالقانون ؟؟؟
و لسا بتسألوا ليش التخلف ضارب اطنابو بالمجتمعات المسلمة ؟؟؟؟
ما تفوق الغرب ع الشرق غير لما قسموا العمل و تخصصوا
و طبعا بهالوقت ... كان شيخ الجامع بالشرق بدو يجمع الطب و البيطرة و الفلسفة و الاقتصاد و القانون و الفلك و التعليم و ........الخ
ما رح نصير عالم و ناس غير لما يصير عدد يللي بيعرفوا انو مستحيل ينجمع الكون باسرارو بكتاب واحد اكتر من يللي مفكرين انو كل شي مكتوب بهالكتاب ... مع انو الكتاب زاتو بيقلهم انو مو كل شي مكتوب فيه ( بس الهبل هبل )
كل ما بيدق الكوز بالجرة بيقولولنا شوفوا شو عمل عمر بن عبد العزيز و شوفو شو عمل ابو بكر و شوفو شو عمل علاك البان
طيب انا عم شوف انو ما عملوا شي
شو رأيكم تشوفوا وين صرتوا من ورا هالناس ؟؟؟
شو رأيكم تشوفوا وين صار غيركم من ورا انو ما سألوا شو عملوا هالناس ؟؟؟؟

اقتباس:

كاتب النص الأصلي : krimbow

و بناءا عليه رح اعطيك ليستة زغيرة ...
محمد حربا وزير داخلية اسبق سني
محمد عبد النبي عماد سني من حوران
صبحي الطيب استلم قيادة القوات الخاصة و هوي سني من النبك
مصطفى طلاس وزير الدفاع سني من الرستن
محمد زهير مشارقة نائب الرئيس سني من حوران
عبد الحليم خدام نائب الرئيس سني من بانياس
عبدلله الاحمر امين قطري مساعد بحزب البعث سني من التل ( ريف دمشق)
و القائمة تطوووووووووووول بس ما عم يحضرني اسماء حاليا
كل هدول كانوا سنة
و البلد خربانة
ازا هالكلام الو نتيجة انو ما دخل الطائفة او الدين بالسياسة

اما بخصوص انو 50% من المعتقلين باوروبا و اميركا محبوسين لأنو ما عم يدفعوا يللي عليهم ... رح نفترض انو النسبة صحيحة و بقللك انو التصرف صحيح 100% اما انو نقطع ايدهم ... فهاد خاطئ 100%
بخصوص اسباب التقدم الغربي
بس قبل بحب سجل انو كل الاعدامات بدون محاكمة يللي تمت خلال فترة الثورة الفرنسية هيي وصمة عار بتاريخ الثورة
كل الاعدامات اللي تمت من قبل محاكم التفتيش الفاتيكانية هيي وصمة عار بتاريخ الكنيسة الكاتوليكية و الكنيسة قبل نهاية الالفية التانية اعتذرت عنها كلها
و اي اعدام بدون محاكمة و اي تجريم بدون محاكمة هوي وصمة عار بأي نظام و بأي ثورة
مو متل ما عم تحكي انو سبب تقدم الغرب انو اقتبسوا حضارة العرب و لا لأنهم اعدموا الخونة
السبب الرئيسي انو انفتحوا ع العرب و ع الشرق ... استوعبوا حضارتهم، ما تعصبوا ضدها، استفادوا منها و طوروها ... بعكس ما عم يعملوه المسلمين اليوم من اعتبار اي شيئ جايي من الغرب هوي بدعة من الشيطان ...
لم يكن باي يوم من الايام اعدام الاشخاص سبب للحضارة لا باوروبا و لا بغيرها
و الدليل انو الثورة تمت بفرنسا و المقصلة تمت بفرنسا بس بريطانيا كما متطورة و المانيا و ايطاليا و اميركا و ....الخ
و عصر النهضة بلش باوروبا ابتداءا من فلورانسا الايطاليا مو من باريس الفرنسية
ما عم انكر دور الثورة الفرنسية بتقدم الغرب بس عم اكدلك انو الاسباب يللي ذكرتها هيي غير الاسباب
لازم لازم يكون القانون فوق الجميع
لازم لازم يكون في قانون اساسا لأنو ازا ما عندك علم نحنا عايشين ضمن قانون طوارئ بيفرض الاحكام العرفية
لازم يكون في انتخابات ديمقراطية
لازم يكون في حرية صحافة لأنها السلطة الرابعة و الرأي العام و المراقب الاول يللي بيكافح الفساد

مو قطع ايدين و رجلين و فتح تكيات بلا فايدة و ما بعرف شو ...

اما بخصوص التعصب
انا متعصب لحرية التعبير و حرية التفكير يللي بيخنقها اي شخص بباقي المنتديات بمجرد انو يذكر شي حديث نبوي او آية قرآنية و خلص يا ويلو يللي بيعارض ...بيكون عم يعارض فكرة بيصير عم يعارض الله و حلال قتلو
انا رافض رفض مطلق اي جهة بتمنعني من اني شك و فكر، حتى باقدس المقدسات بشك ... ازا كانت قوية بتلغي شكي ... ازا كانت ضعيفة فلتدمر مو يجي حدا و يدافع عنها بحجة الجهاد

.....

**butterfly** · 02/09/2007

اقتباس:

كاتب النص الأصلي : krimbow

م
طيب وين " حق " الهنود الحمر باميركا؟؟ ... هدول يللي عايشين بمحميات تماما متل محميات الفيلة بافريقيا
وين " حق " سكان اوستراليا الاصليين يللي صاروا بيعتبروا " عالة " على الاوستراليين ؟؟؟

الحق اخواتي بيموت ... و باعتبار انو الاعمار بيد الله فما في وقت محدد لموت الحق
يعني حق المانيا بالالزاس و اللورين مات بسبع سنين
بينما حق الكاتوليك الايرلنديين بحكم بلادهم صرلو الف سنة عم يحتضر و مع ذلك لسا ما مات و ممكن بيوم يتجسد على ارض الواقع
هلأ طالما الحق " بيموت " معناتا اكيد بدو يكون بيوم " عايش"
و متل كل شي عايش لازم يتغذى

هلأ المطالبة بالحق هوي جزء من غذاءو لكن ما بيكفي
يعني نحنا صرلنا 57 سنة عم نعوي و نطالب بحقنا بفلسطين و 85 سنة عم نطالب بحقنا باسكندرونا و مع ذلك يوم ورا يوم عم نتنازل عن جزء من حقوقنا
في جملة كتير حلوة قالها العلامة " انطوان سعادة " : لا يكون الحق حقا إلا بقدر ما يدعم من قوة
يعني لحتى نرجع حقوقنا باراضينا لازم ندعمها بالقوة ، بالجيش ، بالعسكر ، بالسلاح و الحديد و النار
شو هي طاولة المفاوضات

لك يا جماعة ... اليهود توهموا انو الهم حق بفلسطين ... قاموا من كتر ما دعموا " وهمهم " بالقوة تحول لحقيقة

شو رأيكم .... معي حأ ... و اللا لأ ؟؟؟
و دمتم

اقتباس:

كاتب النص الأصلي : krimbow

اليس من حق فرنسا ان تدافع عن ارضها و تسترجعها ازا احتلتها المانيا؟؟؟
بالتأكيد باعتبار انو الحق لا يموت ( من وجهة نظرك ) فمن حق فرنسا انو تسترجع اراضيها
خليني كون واضح اكتر
اليس من حق " اليابان" انو تسترجع اراضيها ازا احتلتها سويسرا؟؟؟
بالتأكيد من حقها
طيب اذا فرضنا انو الحق " لا يموت " متل ما عم تقول
اليس من حق سوريا التي عاصمتها دمشق ... ان تسترجع افغانستان يللي احتلتها اميركا؟؟؟
كيف زبطت معي ؟
لأنو افغانستان كانت بيوم من الايام جزء من اراضي الدولة الاموية يللي كانت عاصمتها دمشق
ابدا ابدا
الحق هوي اللي بيموت و ليس المطالبة به
المطالبة مجرد تعواية .... غذاء للحق ... مو اكتر
الحق هوي يللي بيموت
من كام سنة رفعت الصين دعوى ضد اليابان عم تطالبها بتعويضات لأنو الجيش الياباني استأجر خدمات ( عاهرات صينيات ) لترفيه الجنود اليابانيين ايام الحرب العالمية التانية و ما دفعولهم
الجنود اليابانيين ماتوا ...و العاهرات الصينيات ماتوا
و مع ذلك طلع واحد صيني و عوا و طالب

الحق بيموت
حق المسيحيين السوريين بحكم بلادهم يللي انتشرت منها المسيحية مات تحت اقدام الجيش الاسلامي الفاتح ... و صار حق المسلمين بحكم البلاد مدعوم بالدستور السوري
و كذلك حق الاقباط بحكم بلادهم مات ... الاقباط يللي اسمهم مشتق من اسم مصر الحقيقي ، مصر اسمها بالاجنبي " ايجبت" بس المصريين يا عيني بيقولوا عن حرف الـ ج حرف الـ ق( متل ما بيلفظوها الخليجية) فكان بينقال عن المصريين " جبت " و بالعربي " قبط " يعني اسمهم بيعني انهم " مصريين حقيقيين ) و ليسوا قبائل عربية مسلمة دخيلة
و دمتم

اقتباس:

كاتب النص الأصلي : krimbow

تركيا دافعت عن ما تعتبره حقها باللواء و قدرت تاخدو
نحنا بكينا ع الاطلال ( مشان ما حدا يزعل من كلمة تعواية ) و ولولنا
لما نبطل لطم و ولولة و نرجع نشتغل متل الزلم ساعتها منقول انو في النا حق باللواء
بس من هون لوقتها ..... الله يرحمو و يحسن اليه
و دمتم

....

**butterfly** · 02/09/2007

سوريا الله حاميها

حاج لليوم .. بس بدي نسمع جوليا .. ونصرخ معا .. نشيد الحرية ..
من الأسر طلعوا

اقتباس:

من الأسر طلعوا .. ولعنا ارجعوا
لألكن كل الحرية
وعيون الشمس الدهبية
جايي غني والغنية من قلبي اسمعوا
من الأسر اطلعوا
من القهر اطلعوا

دعساتن كانت مسموعة
ودقات قلوب الموجوعة
شو كان قاسي لون العتمة
أسود أسود متل قلوبن
ما اطول ساعات الغربة
عم تزحف كانت عدروبن
الحرية ندهتكن هلق
يا رفاقي اسمعو

Nathalie · 18/09/2007

شو القصة؟ اعذروني يا جماعة بس حاسة حالي ضايعة لأني ما بعرف مين هو krimbow؟! من الي فهمتوا إنه كريم انسجن بسبب آراؤه؟! هل هاد الحكي صحيح؟

Ms. J.A · 13/11/2007

up

قلبي مع كل سجين حر
والله يفك اسرو يا رب
butterfly
ما دمعت
بكيت ومش عارفة شو احكي اكتر

..Jimy · 29/11/2007

قرأت كل حرف من المشاركي

وفي بتمي حكي كتير "ولكن......
الآن علمت إني جبان"

عكل حال الله يرد كل الشباب بالسلامة (مأكذب عحالي وعليكن) .

**butterfly** · 03/01/2008

كان عندي أمل كبير ... ما مستند على أيا شي منطقي
انو كريم يستقبل العيد مع أهلو ...
بس للأسف

ما صار هالشي

بس لازم نكمل

اقتباس:

كاتب النص الأصلي : krimbow

انا مؤمن بحرية الاعتقاد و مؤمن اكتر بحرية التعبير عن هالاعتقاد .... و هاد يللي رح حاول انو نوصللو
بس الاهم من هالحريات اني مؤمن بكرامة الانسان ... اي انسان .... لمجرد انو انسان
سواء كنتوا شايفين انو جدو قرد او جدو هوي آدم فأنا مؤمن انو اي انسان الو كرامة ما بيجوز انو نمسها
و هي 100 خسة

للكل

في الخيانة واالوطنية

العلمانية و الإيمان والألحاد

عدد من النعيق للأسف سقط سهوا ً

مثلي الأعلى

أدوات الموضوع
عرض صفحة الطباعة إرسال هذه الصفحة إلى صديق