جمهورية البوكمال الصديقة تحت النار... سورية تشجب وتستنكر

[VivaSyria]

كاتب النص الأصلي : شب الكوبة

الله يرحم الشهداء يللي ماتو ..طبعا كانت فرصة دهبية للبعض للشماتة بسوريا وقيادتها و ما بيعرفوا انو هاد وسام ع صدر الشعب السوري يللي عم يدعم المقاومة بالعراق فهيك كان انتقام ادارة بوش منو قبل ما تنقلع ...

الشماته بسوريا؟؟؟ والله ماحدا شمتان بسوريا غير يلي ساكتين وعم يطبلو ويزمرو ويهللو لكل هالمصايب والبلاوي.

يعني اذا في حدا هون مو سوري "و عامل حالو سوري" قاعد عم يحكي بالعاطل عن سوريا و قيادتها بنصحوا يخرس..

قسماً بالله أنا سوري.. بتحب ورجيك هويتي أما إخرس بكل الأحوال؟؟؟

لأنو ما حدا من كل الدول العربية بيطلعلوا يحكي عن سوريا ودورها بالمقاومة والممانعة

مين جاب سيرة الدول العربية؟؟

للأسف في ناس ما عم تفكر بواقعية ... و كأنو بدها سوريا تقصف واشنطن بشي كام صاروخ ..أو تعمل انزال بنيوورك...سوريا عندها مجال محدود للرد ولا يمكن تجاوزه ببساطة فقط للمرجلة..أما لما نصير متل روسيا أو الصين وقتا فينا نرد متل ما بدنا ... و مع ذلك صدقوني اننا نستطيع ان ترد بشكل موجع ضمن هذا المجال

للأسف بنص الموضوع وبأغلب الردود كان في لإلنا مطالب واقعية وأقل الإيمان.. بس يبدو هالأسطوانة تبع شو بيطلع بإيدنا ويلي نظام الممانعه البطل حفظكون ياها مصرين تسمعونا ياها...

كمان ياريت كان في شوية احترام بردك للبشر يلي هون...

[yass]

يعني اذا في حدا هون مو سوري "و عامل حالو سوري" قاعد عم يحكي بالعاطل عن سوريا و قيادتها بنصحوا يخرس.. لأنو ما حدا من كل الدول العربية بيطلعلوا يحكي عن سوريا ودورها بالمقاومة والممانعة

**اشراف**

يا زميلنا لو سمحت هون ما حدا بيخرس حدا, و هالطريقة بالحكي جدا مزعجة بمكان يُبتغى فيه الحوار, فلذلك لو سمحت لا تستخدمها


و شكرا

[أبو حـلب]

كاتب النص الأصلي : ayhamm26

خيو معلش بدك تطول بالك شوي , العالم معصبة وقرفانة وجاي حضرتك تحكي صمود و طريق المجد وما بعرف شو

انت عم تحكي عن حرب ضروس في جنوب لبنان ؟؟ فيك تقلي ايمتى نحني ضربنا رصاصة وحدة على اسرائيل من جنوب لبنان ؟؟؟؟ انت عم تحكي انو كل عمر النظام الجبان تبعنا , نظام الاسد اللي رافعلك راسك , متخبي وراء حزب الله وبس ناكل ضربة من اسرائيل منحكي مع حسن نصر الله بلكي بيحاربلوا شوي عننا , يعني متل حكاية نكاح الاستبضاع تبع الجاهلية (على راي نزار نيوف) , يعني واحد عنين بيستاجر واحد لينام مع مرتو بلكي بيعوضلو شوي من شرفو الضائع

يا اخي اتركني من جنوب لبنان , هداك اسمو لبناااااااااان , يعني دولة تانية

نحني عنا جبهة الجولان , الجبهة الاكثر امنا بين كل الجبهات العربية , هالشي ما بيرفعلك راسك كمان؟؟


على كل انا قلت برد سابق , اذا في رجال واحد بهالنظام يا اخي يسترجوا بس يسحبوا السفير تبعن بواشنطن او يطلبوا من القائم بالاعمال الامريكي يغادر الشام , بس هيك ما حدا عم يطالب بدخول حرب مع الامريكيين

أولاً بدي وضح شغلة ، أنـا ما برفع لي راسي نظام ،
أنـا قلت سابقاً ، نقطة إيجابية بعبر عنها .. و سلبية بعبر عنها ، لهيك مافيك تحددلي موقفي إنت من النظام كـ كل.


بالنسبة لحرب تموز ، إرجع إلى أرشيف الحرب إن شئت .. ولعلمك سوريا قدمت لـ لبنان وحده 30 ألف شهيد
و الجبهة اللبنانية بالنسبة لسوريا هي بمثابة تهديد أمن قومي أكثر من الجولان
(كلامي ليس دفاعاً عن النظام كونه لم ينهي أمر الجولان طيلة 40 عام)


ثانياً لو أن سوريا قامت بالرد على إسرائيل على الإنتهاكات لقلبوا الموقف على سوريا
فعندما حماس تطلق صواريخ رداً على هجوم الدولة اللقيطة
المجتمع الدولي يقلب الوضع على حماس وإنها يجب أن لاتطلق الصورايخ
علماً بأن المعتدي هو الكيان الصيوني !!

لهيك أنـا ما بأيد الرد العسكري ، لكن بنفس الوقت بطالب برد (أياً كان) يحفظ كرامة الشعب الســوري
وبالنسبة لإقتراحك ، يا أخي أنـا ما بهمني إش يعملوا .. بهمني رد يحفظ كرامتي و كرامتك وبس.

[أبو حـلب]

أبو حلب خدني بحنانك شوي الله يرضى عليك لأنو عن جد كنت بتمنى انك تكتفي بالرد يلي قبل هاد بحكم انو أقرب للواقع وللحقيقة:

أنـا دائماً آخدك بحناني ، الله يحن عليك و علينا يارب.

بأي ذنب انضموا لمواكب الأبطال؟؟ ومين بياخد بتارهون؟؟؟ ولو لاسمح الله كان الك قريب من بيناتون ياترى كانت رح تكون ردة فعلك نفس الشي؟؟

بأي ذنب ؟
بذنب تغافل وتقاعس جيشنا و إنقطاع الكهربا عن المضادات ، (شي مؤسف الحقيقة)
مين رح ياخد بتارهن؟ هاد الشي يلي عم نطالب فيه من أجل القتلى ، و من أجلنا جميعاً

إلون الشرف العرب اذا بيفكرو بهالطريقة يلي عم تحكي عنها... بس ياريت أعرف شو العقلية يلي النظام بيفكر فيها؟؟؟ ضربة بعمق الأراضي السورية بدير الزور وتدمير بناء عسكري واستشهاد عدد من المواطنين...ياريت تنتبه معي هون على هالعوامل انو اسرائيل ضربتنا بالعمق وانتهكت الأجواء السورية وراح شهداء من الغارة.... نحنا كيف ردينا؟؟؟

كل دولة إلها طريقة معينة بالرد.
و لو أن سوريا قصفت الطائرات الأمريكية لاتخذتها أمريكا لإجتياح سوريا في حرب غير متكافئة
و لكن لسوريا طرق أخرى (وهاي يلي عم نطالب فيها لحفظ كرامتنا)

بس عندي إلك سؤال وياريت تجاوبني بصدق: إنت شايف انو طريقة رد حكومتنا العظيمه سليمه ومشرفه؟؟ يعني اسرائيل بتضربنا وأميركا بتضربنا..وبيضربونا علناً..ونحنا منروح مشان الله ياحزب الله عملو شي أو ياحماس دبرونا...برأيك هي طريقة الرد الصح؟ هي الطريقة يلي بتحفظ الكرامة؟؟

أنـا بشوف أنوه سـوريا قوية باللعب بالأوراق ،
و إذا هاد الشي عم تلعبه صح ضد أعدائنا ، بنظري أنـا مشرف .. (كون أنو عملت شي أو قدرت تعمل شي)
المهم نحنا نستخدم نقطة قوتنا ..

و أنا ما بشوفها متل ما إنت شايفها "ونحنا منروح مشان الله ياحزب الله عملو شي أو ياحماس دبرونا"
أنـا شايف دعمنا للمقاومة بحد ذاته ووقوفنا مع المقاومة ضد الأعداء .. شي مشرف ل دولة عربية

والخلود لرسالتنا

نعم نعم






-----------------------------------------------



بالنهاية ، نحنا (أبو حلب والشعب السوري) نطالب برد (أياً كان) يحفظ كرامتنا (أبو حلب و الشعب السوري)
ورحمة الله على القتلى ،

[مسطول على طول]

بالفعل هل المرة أثبت النظام مدى غبائو الي لايقل عن غباء بوش ولو ردت سوريا لن تتجراء الولايات المتحدة على فتح ولاحتى ربع ربع جبهة

أثبتت هذه الاداره الامريكيه مره بعد مره أنهم مجموعه من الحمقى والمغرورين بالقوه العسكريه التي فقدت شعبيتها والشعب الامريكي غارق بهموهة الداخلية ولايريد حرباً أخرى ولو فكر بوش على اتخاذ قرار بشن حرب لزحف الشعب الامريكي الى البيت الابيض سوريا ليست العراق، سوريا ليست تنظيم القاعدة ، سوريا ليست حركةطالبان ، وأعداء بوش تعاظمو بشكل كبير

كان بالامكان أن لاتكون سوريا مكتوفة اليدين الولايات المتحدة لاتستطيع التنصل من عدوانها ولا تستطيع حل الموضوع بالقوه هم لا يدركون حجم الورطة و المشكله التي كانت ممكن أن تحصل لو اسقطت أحدى المروحيات على أراضينا فحجت الغبي بوش بشن حرب جديدة على سوريا مستحيلة .. وخاصتاً أن سوريا وجيشها يعملون حرس حدود لدى الامريكيين ، والاوربيين سيقفون بوجهه بوش أقوى مماتتصوره أن كانت الحراب على العراق وصدام قد سببت مشكلة كبيرة للأدارة الامريكية فكيف وهي بهذا الحال السىء .. حتى الجمهوريين لايردون أن يخسرو اكثر وأن تددهور شعبيتهم أكثر مماهيا علية ..

ولاننسا أن الأوربيين والحزب الديموقراطي جل اهتمامهم بالملف النووي الايراني الذي يرون فية الخطر الحقيقي وليس حماقات بوش .. وكذالك تنامي قوة طالبان لدرجة قول قائد القوات البريطانية بأنة من المستحيل تحقيق نصر على طالبان

و الناس يلي عندون إعتقاد بالقوه العسكريه الأمريكيه . هؤلاء لا يفقهون عمق المشكله التي تواجهها أمريكا ومازالو يعيشون في عبق الماضي القريب.

لوتصدينا على هذا العدوان لرتفعت أسهم النظام داخلياً وعربياً وعالمياً .. حقنا الطبيعي أن ندافع عن بلادنا

ولكن نحتفظ بحق الرد

هلء هاد هوه حال الشعب السوري الأبي رمز الصمود والتحدي والمقاومه؟
من ذا الذي يقول أن سوريا سكتت ؟

سوربا لن تسكت بل ذكرت وللمرة الألف بأنها تحتفظ بحقها في الرد. ولن نكون أنثاف رجال

لك أذا دمائنا هانت على حكومتنا وشباب بعمر الورد حاكموهم على تهم سخيفة ولا أخدو بعين الاعتبار لا الشب ولا وأهله وأقرابائه..بقا بدكم هنن يحموكم ولا بدكم الامريكان يحترمونا !

لك لحنا اشبه بالحشرات والطفيليات لما بنحكي بأمورنا الداخلية يلي أبسط بكتير من مطالبة الشارع بحق الرد على الولايات المتحدة

الرد بكرة في شنو>>>> سمعت أنو في مظاهرة غداً ولح نسب ونلعن ونحرق العلم الامريكي والاسرائيلي

وكفا الله المؤمنين شر القتال

[pleasurable]

كاتب النص الأصلي : VivaSyria

ا

قبل ماحدا يقلي هي أميركا شوفينا نعمل... ضربتنا اسرائيل بعين الصاحب وخرسنا واحتفظنا بحق الرد وضربتنا بالكبر بالجزيرة السنة الماضية وخرسنا واحتفظنا بخق الرد والطيران الاسرائيلي وصل لفوق القصر الجمهوري باللادقية ونحنا محتفظين بحق الرد.... ا

والله انا بشوف انو هي كلمة حق الرد لازم نحزفها من القواميس والمعاجم ونستبدلها بواجب الرد ,

حقنا نحن كشعب أن نرد ,واجبهم هم تجاهنا أن يردو .
لانو الانسان ببعض الاحيان بيتنازل عن حقوقو لسبب من الأسباب وبيكون عندو مبررات يعني أخلاقيا مقبولة.
أما يلي ما بيأدي واجبو بيكون إنسان متقاعس .

[شامي للنخاع]

لك العمش وصلت فين الحقارة والدونية لهون.............أنو ميازنية الدولة الي عم بتروح على جيشنا المغوار وينها!!!!!!!!!!
لك وبعدين مع رب هل الحال..........

[maged-syrian]

يعني لو ذهبت ضحايا خلال عملية الرد لرفعنا رؤوسنا أمام جميع العربان الشامتين من تعليقات حكومتنا الرشيدة بالاحتفاظ بالرد والشجب والادانة .. بس ان المواطن السوري يصير ملطشة من هب ودب وحكومتنا تحتفظ بحق الرد شوف كم حق رد صار محتفظين فيه الى الان ؟! صار الامر لايطاق

الله يرحم هؤلاء الشهداء الابرياء .. وخلي الحكومة تحتفظ بحقوق الرد لنشوف آخرتها .. ولنشوف هالجيش الخارق اللي بيسحب 75% من ميزانية الشعب ايمتا بدو يأرجينا قدراته ولو باسقاط طائرة هلكوبتر واحدة مو اكتر لنحس بالفعل انه يوجد لدينا جيش بالفعل

أنـا بشوف أنوه سـوريا قوية باللعب بالأوراق ،
و إذا هاد الشي عم تلعبه صح ضد أعدائنا ، بنظري أنـا مشرف .. (كون أنو عملت شي أو قدرت تعمل شي)
المهم نحنا نستخدم نقطة قوتنا ..

و أنا ما بشوفها متل ما إنت شايفها "ونحنا منروح مشان الله ياحزب الله عملو شي أو ياحماس دبرونا"
أنـا شايف دعمنا للمقاومة بحد ذاته ووقوفنا مع المقاومة ضد الأعداء .. شي مشرف ل دولة عربية

بالنهاية حزب الله حزب لبناني يدافع عن ارض لبنانية وفي حال تم تحرير مزارع شبعا فمارح يجي حزب الله ويتكرم عليك بتحرير الجولان السوري المحتل ! لك والله حزب الله ذو الامكانيات المحدودة بيستحي من عدم الرد على اي انتهاك ! ونحنا بنتحفظ بحق الرد في الوقت والمكان المناسب هاهاها حفظناها هالديباجة بصم ... يلعن ديبكم يازلمة اشتهينا مرة نسمع عن رد صادر من الارضي السورية وليس من خارج الاراضي السورية ... نريد أن نرفع رؤوسنا عن طريق المقاومة السورية او عن طريق الجيش السوري وليس عن طريق حزب الله وحماس ولو لمرة واحدة عالاقل

شي مشرف ل دولة عربية

يلعن عرض هالكلمة اديش بكرهها ..
عندك علم خيو انو حضرتكم من اصول تركية او كردية روح شوف شجرة العيلة ساعتها بتبطل تردد شعار البعث العظيم
أمة عربية واحدة ...ذات رسالة خالدة ههههههههههههه ونعم الشعار

[مجنون يحكي وعاقل يسمع]

كاتب النص الأصلي : الحر الباكي

والله انا بشوف انو هي كلمة حق الرد لازم نحزفها من القواميس والمعاجم ونستبدلها بواجب الرد ,

حقنا نحن كشعب أن نرد ,واجبهم هم تجاهنا أن يردو .
لانو الانسان ببعض الاحيان بيتنازل عن حقوقو لسبب من الأسباب وبيكون عندو مبررات يعني أخلاقيا مقبولة.
أما يلي ما بيأدي واجبو بيكون إنسان متقاعس .

بس هي الكلمة بدها حذف من القواميس والمعاجم . كل المفاهيم انقلبت {اسا على عقب , صار الذل والهوان حفظ كرامة , وصار التخاذل والإنهزام بطولة , وصار الخنوع والإنكسار انتصار , وشو بعد تركو معاني للكلمات تعبر عن نفسها

[مجنون يحكي وعاقل يسمع]

صباحنا بؤس وذل وإنكسار , والموضوع اأنو خلص , عقل ينحكى فيه ما ضل, وما عم تظبط معي , ولمين بدنا نرد وشو بدنا القول وصرلنا كل العمر بس منقول , من بعد إذن الجميع , مع احترامي للجميع من كاتب الموضوع الأخ تحيا سوريا إلى الأخ أبو حلب , رح بحكي حكي مجانين الصبح على بكرا ولا تواخذونا
مين بدو يرد وكيف بدو يرد وليش بدو يرد ولمين لازم يكون الرد وكيف وصلنا لهون , ومين قادر يرد , وشو قدرتنا على الرد
لما المواطن السوري صار متل الكلب بسوريا ناطر حدا يرميلو عظمة ليسد جوعوا لأنو الحرامية سرقو كل خيرات البلد ومعظم السرقات من ورا الجيش العظيم حامي الحما الي صنع أبطال فعلا بس أبطال بالسرقات والنهب والنصب , يا بدو يكون الواحد حرامي , يا مطلوب منّو يهج برا الوطن إذا كان نزيه وشريف , يا يزور بيت خالتو إذا فتح تمو وحكى , أو إذا حدا من الشباب الطيبة عمل فحص دم لش مواطن وطلع عندو نسبية حب الوطن بالدم مرتفعة , وإذا كانت الدولة بتتألف من الطرفين , يعني المواطن المقهور الملتعن رب ربو لربو وراطض ورا شي عظمة يسد جوعو من طرف , واللصوص والحرامية من طرف , اللي بدو يرد إذا تركولو مجال يرد ... يا حرام شو بدو يرد , ولك والل شي بيضحك لحد البكاء , حتى يحكيلنا شغلة بتنفس شويه ضغط رح منطق يا شباب , صرنا نشوف المطر ذل وقهر, وصرنا نخاف من حبات المطر , وين نروح و[اي حيط بدنا نفوت , أصلا ماضل حيط مافتنا فيه
كان عندي فكرة ما بعرف شو مدى إمكانية تطبيقها , إذا في حدا قريب من أهالي الشهدا وممكن نساهل نحنا كمواطنين مهجرين بجزء من تعبنا للتخفيف عن هالناس بطريقة ما يا ريت تلاقولنا طريقة وبسرعة قبل مانطق نحنا ونصير محتاجين للمساعدة
واعذرونا عالتطويل
وإذا لم أحترق أنا وتحترق أنت ونحترق نحن فمن إذا سيصنع وطنا ً لأطفالنا

[VivaSyria]

كاتب النص الأصلي : أبو حـلب

كل دولة إلها طريقة معينة بالرد.
و لو أن سوريا قصفت الطائرات الأمريكية لاتخذتها أمريكا لإجتياح سوريا في حرب غير متكافئة
و لكن لسوريا طرق أخرى (وهاي يلي عم نطالب فيها لحفظ كرامتنا)

مافهت شوي بتقلي انو طول عمرنا عم نرد عليون وعم يحسو بردودنا الموجعة حتى لو الشعب ماحس..شوي بتقول لازم نرد مشان نحفظ كرامتنا... معناها انت معترف انو كرامتنا عم تتبعزق...

بس حابب أعطيك معلومة صغيرة انو نحن لو رادين بأرضنا وموقعين هالطيرات أو على القليلة آسرين الجنود ماحدا بالأرض بيقدر يحكي حرف... بحكم انو الهجوم صاير على أرضنا وبالداخل السوري ولعلمك أميركا وقت بدها تجتاح سوريا مو ناطرة حجة ولا ناطرة مبررات.... بس القصة قصة عملو يلي بدكون ياه بس لاتقربو على الكراسي تبعوتنا..

[ربيع دمشق]

طبعا سوريا دولة الممانعة والصمود وووالخ
وسوف ترد في الوقت المناسب والمكان المناسب
هذا وقد دان رئيس جمعية المهندسيين الاروبية الهجوم الامريكي وجمعية حقوق الحيوانات في جمهورية بوركينا فاسو استنكرت العملية الوحشية. ولسا في كتير جمعيات رح تستنكر العملية فانتظروا يا جماعة !!

برأيي انو ما رح يكون اي رد لا عسكري ولا دبلوماسي، من الناحية العسكرية المنطقة هنيك خالية من اي معدات عسكرية ثقيلة لحتى يتم الرد على هيك خروقات جوية او برية واما من الناحية الدبلوماسية ما في هديك التمثيل العالي بالبلد رح يكون الرد ذات معنى.
اغلب الظن الرد رح يكون عبر الكلام وتجميع الاستنكارات والقلق والتنديد من الدول والجيران وبس
طبعا هالاختراق رسالة واضحة انو يا قيادة بسوريا اوعى نحن بنقدر نفوت ونقتل على كيفنا واول مرة فتنا شي كيلو متر وطبعا الاعلام الرسمي غطى على الخبر وما حدا دري بالموضوع، وتاني مرة 8 كيلو متر وبكرا يا على دمشق او القرداحة مادام النفط عم ينزل سعرو فما مشكلة ازا فاتوا لجوا شوي وللعلم فقط بانو اخر صفقة اسلحة بين سوريا وروسيا كانت صفقة شراء اسلحة فاسدة وايضا الاعلام غطى ولفف الخبر عن الجماهير المكدوحة من اسفلها


أمنية اخيرة: بفرض لو حدث هالامر ببلد اروبي او بشي بلد غير بعيد عنا لكان استقال وزير الدفاع ورئيس اركان الجيش من مناصبهم، فهل هالشي رح يحصل عنا ويحطوا انفسهم تحت تصرف المسائلة امام الشعب؟

بانتظار الاجابة

[مجنون يحكي وعاقل يسمع]

للأسف في ناس ما عم تفكر بواقعية ... و كأنو بدها سوريا تقصف واشنطن بشي كام صاروخ ..أو تعمل انزال بنيوورك...سوريا عندها مجال محدود للرد ولا يمكن تجاوزه ببساطة فقط للمرجلة..أما لما نصير متل روسيا أو الصين وقتا فينا نرد متل ما بدنا ... و مع ذلك صدقوني اننا نستطيع ان ترد بشكل موجع ضمن هذا المجال

والله يا حبيبي شب الكبة , يمكن معظمنا لايبصر أبعد من أنفه ,من كام يوم شفت تحليل اقتصادي بالمنام بمحطة أسمها أحلام وردية , لأن كل الشخصيات اللي بتطلع فيها متل النمر الوردي , وبيقول المحلل الوردي أنو العالم مغمّض عيونو يا عيوني وما بدو يقر أنو أسباب الأزمة المالية الأمريكية العالمية اللي هيي واضحة وهي سبب واحد لا ثاني له وهو المقاطعة الإقتصادية اللي عاملتها سوريا على الإقتصاد الأمريكي
وتراني أنا مقتنع بهالحكي بس الله بيقنع الشباب , ما في أمل , خض المي وهي مي , تركون عمرهون ما يعرفو بكرا بيندمو

[مجنون يحكي وعاقل يسمع]

حقنا نحن كشعب أن نرد ,واجبهم هم تجاهنا أن يردو .
لانو الانسان ببعض الاحيان بيتنازل عن حقوقو لسبب من الأسباب وبيكون عندو مبررات يعني أخلاقيا مقبولة.
أما يلي ما بيأدي واجبو بيكون إنسان متقاعس .

شو يا حبيب عن أي حقوق عم تحكي , الظاهر فاتتك قصة الحقوق والواجبات , يا سيدي لما الشياب اشترو دفتر يكتبو عليه الحقوق والواجبات , خلص الدفتر وهنّي عم يسجلو الواجبات وبقي شوية واجبات اللي هي واجبات الدولة تجاه المو واطن "مقصودة هاي ها" وبقيت الحقوق كلها وشكلو لجنة لشراء دفتر تاني وبعد المراجعة القانونية تطلع معون مابيصير تنكتب الحقوق والواجبات إلاّ على دفتر واحد , وعيش يا ........ ليطلع الحشيش وصير في بالسوق دفتر كبيييير يساع الواجبات والحقوق
وليصير عنّا حقوق , بعدين مطالب فيها
ولا يضيع حق وراه مطالب
ويا مقدر المقادير بهالبلد كل شي بيصير , بطاطا تصير محطة ... وترين بيمشي بلا خط

[Bonita]

كاتب النص الأصلي : yass

اذا ردينا بالقوة... هاد دليل على "الحنكة السياسية للقيادة الحكيمة"..

اذا ما ردينا بالقوة.. هاد دليل على "الحنكة السياسية للقيادة الحكيمة"..

اذا شجبنا و استنكرنا.. هاد دليل على "الحنكة السياسية للقيادة الحكيمة"..

اذا ما عملنا شي.. هاد دليل على "الحنكة السياسية للقيادة الحكيمة"..


يعني يا مواطن يا عربي سوري لا تهتم... رغم انو كل العالم فوقك لكن معليه.. "قيادتك الحكيمة عندا حنكة سياسية"...

يكسّر حناكهون انشالله.. حدا يقول آمين


الله يرحم الشهداء, و الصبر و السلوان لأهاليهم.. و لو ظل عند حكومتنا شوي, شوي ها من الكرامة كان تكفّلت بهالعائلات المنكوبة فورا.. و على الأقل 3 أيام حداد رسمي...

آمييييييييييييييين

[VivaSyria]

تشييع ضحايا المجررة الأمريكية في البوكمال

غريب هالعهر والحقارة... بتصور هالشهداء بيستاهلو جنازة رسمية على القليلة... انو ينلفو بعلم بلدهون على القليلة... لك يجي كم واحد من حكومة الصمود والممانعه يحضر الجنازه...

بس بصراحة منيح يلي ماحدا منون حضر ولا كان تشييع رسمي... خلي الجثمان طاهر والجنازه شريفه.

[Bonita]

كاتب النص الأصلي : ربيع دمشق

أمنية اخيرة: بفرض لو حدث هالامر ببلد اروبي او بشي بلد غير بعيد عنا لكان استقال وزير الدفاع ورئيس اركان الجيش من مناصبهم، فهل هالشي رح يحصل عنا ويحطوا انفسهم تحت تصرف المسائلة امام الشعب؟

بانتظار الاجابة

لا بأحلام ولا بأوهامك...

لك حتى بلحلم مافيك تحلم فيها...قال يستقيلوا قال..

[yass]

صور الجنازة فعلا مؤسفة... هاي جنازة شهداء؟؟ وين رئيس الجمهورية عم يعزّي الأهالي, وين فرقة مراسم الجيش حاملة النعوش؟ وين طلقات التحية؟؟؟

طبعا بعد يومين ما حدا متذكر الضحايا و أهلهم... اللي تيتّم و اللي ترمّلت... الجيش ما عندو مصاري يتكفّلون لأنو لازمون الميزانية لشراء اللكزس و المرسيدس...

لك شي بيقرّف ...