الصوت الرائحة والشكل

[sandra]

أول شي بدي أشكرك طارق لاستضافتي والشكر لاختيارك هالمقال للعزيز يامن حسين عن حجب المواقع بسوريا
بالفعل شي مخجل أنو رغم انفتاح العالم كله على بعضه البعض وتحوله لقرية صغيرة تتناقل فيه الأخبار والبيانات بسبب انفجار ثورة الاتصالات (الانترنت)
منلاقي وزارة الإعلام والاتصالات عندنا عم تمارس بكل صرامة محاولة قمعية لخنق وطمس حرية الإنسان بالتعبير الصريح عن رأيه .
بانتظار المحاورة معك

[phoenixbird]

وزير الاتصالات السابق عمرو سالم قال انو ما عنده علم بحجب المواقع
في حين ان وزير الاعلام محسن بلال ذكر انو ما في موقع بينحجب الا بسبب مخالفة قانون المطبوعات انما كمان هوي بيقول انو هالمواقع ادت الى تضييع وقت الشباب متل ما قالوا ليامن انو هوي فاشل
وقيل عن احد الزملاء الكتاب باخوية انو شقفة عاطل عن العمل
شو رايك؟

[sandra]

هي نكتة وزير الاتصالات ما عندو علم بالحجب بس بدك رأيي بشو أنو انحجبت المواقع لأن بتضيع وقت الشباب ولا لأنو يامن فاشل ولا أنو الشب يلي بالأخوية عاطل عن العمل !!!!
هون بينطبق المثل القائل عذر أقبح من ذنب
قانون المطبوعات ما كتير عندي علم فيو ....
لكن إظهار هيك قرار أو هيك ممارسة وكأنو الشباب السوري ما بيعرف مصلحتو وولد صغيرهو عذر أقبح من ذنب
وزارة الاتصالات مي وصية على عقول شبابنا وأفكارهم وكيف رح يقضو وقتهم
بأي حق يتقرر أنو هالشب عم يضيع وقتو إذا قعد عالانترنت ! بأي حق عم يتقرر كيف الشباب لازم يقضوا وقتهم ؟؟؟
إذا واحد راد يضيع وقت في كتير مجالات لتضييع الوقت قبل ظهور الانترنت
هي ما عدا أنو اللي بيسمع هالتبرير بيقول أنو المواقع اللي عم تنحجب كلها لتضييع الوقت !!!
هيك تبرير هو إهانة لعقل شعب بكاملو لما بيقولوا أنو خايفين عليهم من تضييع الوقت وكأنو نحن ولاد صغار
منجي للقول أنو يامن حسين فاشل
أنا قريت من زمان مقال يامن حسين اللي كان سبب بحرمانو من دورة الامتحانات وكأنو عمل جرم عظيم بيضاهي السرقات اللي بتصير بالجامعة وغير قصص
يامن ما اخترع بهالمقال شي من عندو ,,,, يامن صوّر واقع شافو واللي بيقرا مقالتو بدو يحس بمدى تفاهة الاجراءات اللي صارت بحقو
بغض النظر إن كان بالغ أم لا بتصويرو للواقع لكن ما بيستاهل أبداً الحرمان
وهلا هو عم يكتب مقالات بقلمو الساخر واللي بدو يعرف إذا كان يامن فاشل يروح ويقرا مقالاتو على كلنا شركاء أوغير مواقع .... أنا من جهتي ما بظنوا هيك أبداً
منجي لشب الأخوية اللي ما عرفت مين هو بس بدي قول شغلة
اتهام شب من قبل دولة بأنو عاطل عن العمل هو يعني متل واحد عم يضحك على حالو، ليش هالشب عاطل عن العمل ؟؟؟ لأنو هو ما بدو يشتغل ولا لأنو بكل بساطة ما في شغل بالبلد
وحتى لو كان هو هيك ما بدو يشتغل .... شو دخل كتاباتو والتعبير عن الرأي بقصة إذا كان عامل أو لا

[phoenixbird]

ساندرا معك حق
مو بصدد مناقشة قانون المطبوعات
انما الدولة اليوم بتقول انو هالمواقع قد تكون سبب لانحراف الشباب
الشباب لازم يهتم بالامور العلمية والتقنية وما بيصير يضيع وقته هيك
من جهة تانية بتقول الحكومة اليوم انو هالمواقع ممكن تتسرب الها جهات تسبب تغيير افكار الشباب

اما بخصوص الشباب اللي حكينا عنهون وعن اتهامون بالفشل
بتقول الحكومة انو هاد الجيل ما عم يهتم بتفاصيل الامور ودقتها

احمد تيناوي مدير تحرير جريدة بلدنا بيقول انو الشباب الجديد عم يقدم ادب هابط وغير مقبول وفيه كتير اغلاط
والسبب انو تلت رباعون بس بدون يحكوا وهاد الشي اللي ما المفروض يصير
(بتصرف (

[sandra]

ليك يا طارق متطلبات العصر ونمط الحياة تغير عن أيام أهالينا
قبل كانت المعرفة تنطلب عن طريق الكتب بس
هلا عن طريق الانترت صارت ممكنة كمان وبطريقة أسرع
هلا أنا معهم بأنو الانترنت عم يعمل دور بإبتعاد الشباب عن الاهتمام بأمور ثقافية وفي نسبة عم تاخد الانترنت من باب التسلية بس هالشي صاير من قبل الانترنت فما فينا نحط اللوم عالانترنت .... يمكن هو ساهم بزيادة هالشي بس أصل المشكلة مو هو .

اقتباس:
انما الدولة اليوم بتقول انو هالمواقع قد تكون سبب لانحراف الشباب

صحيح وكمان التلفزيون الفضائيات والرفقة.... شو العمل نحجب هدول كمان
في مقولة بتقول كل ممنوع مرغوب وهالشي صحيح
لما بمنع المواقع عن الشباب هالشي عم يعملهم دافعية أكتر لاكتشافو والدخول فيه
فالأفضل برأيي تنفتح المواقع ومافي ضرر من التلكم عنها ومناقشة دورها مع الشباب وهيك بيصير في نوع من التوعية

الشباب لازم يهتم بالامور العلمية والتقنية وما بيصير يضيع وقته هيك

إي بس كمان الأنترنت هو بوابة لتلقي العلوم وآخر الأخبار العلمية

من جهة تانية بتقول الحكومة اليوم انو هالمواقع ممكن تتسرب الها جهات تسبب تغيير افكار الشباب

من حق كل شخص يكون الو فكرو الخاص فيه
برأيي الحكومة لازم تفتح طرق الحوار مع هالشباب اللي الهم آراء مختلفة حول عدة مسائل
رفض الانفتاح على الآخر هي مشكلتنا

بخصوص الشباب اللي حكينا عنهون وعن اتهامون بالفشل
بتقول الحكومة انو هاد الجيل ما عم يهتم بتفاصيل الامور ودقتها

وعلى أي أساس استنتجوا هالشي ؟

احمد تيناوي مسؤول الثقافة بجردية بلدنا بيقول انو الشباب الجديد عم يقدم ادب هابط وغير مقبول وفيه كتير اغلاط

الأدب الهابط موجود من زمان بس هلا عن طريق النت انكشف المستور وهاد شي حتمي
بيكفي محاولات تغطية وتستر لهالنوع من الأدب لأن ما رح يلغي وجودو ولا رح يحل المشكلة

والسبب انو تلت رباعون بس بدون يحكوا وهاد الشي اللي ما المفروض يصير

الحكي مو غلط .... هلا ممكن في ناس بتوصل بأفكارها بطرق غير حضارية وعلى سبيل المثال عن طريق السب والشتم أو النقد لأجل النقد
بس برأي بدل أننا نقول للناس لاتحكوا ، الأفضل نعلمهم أصول الحوار والنقد وهالشي بيتم لما بتفتح الحكومة طرق الاتصال بينها وبين شعبها ، هيك بيبطل في ناس تلتجأ للانترنت للتعبير وكتابة شو ماكان بطريق ما بترضي الحكومة وبتهينها

[phoenixbird]

احد الناشطين في مجال التنمية والشباب التقيته مؤخرا وسالته عن الموضوع فقال
بالنسبة لحجب الفيس بوك او يوتيوب فاني مع ذلك نظرا للانحطاط الكبير في مستوى الحوار فيه

اما بالنسبة لاخوية فيقول انه الموقع تخنها وخاصة عند نشر كاريكتور مسئ للرئيس بشار الاسد

ومن جهة تانية
ان هناك وسائل اعلام اخرى تنتقد بحرية ولا احد يحاربها مثل الوطن شبابلك بلدنا وغيرها كما ان الصحافة الحكومية تمارس دورها بشكل بناء

[sandra]

احد الناشطين في مجال التنمية والشباب التقيته مؤخرا وسالته عن الموضوع فقال
بالنسبة لحجب الفيس بوك او يوتيوب فاني مع ذلك نظرا للانحطاط الكبير في مستوى الحوار فيه

ما عندي فكرة عن تدني الحوار اللي بيقصدوه
بس أنو ما بعتقد هالشي مبرر لحجب هك مواقع
هلا صراحة الفيس بوك ما بستعملو بس اليوتيوب ما بقدر بلاه للبحبشة على مقاطع قيديو وأغاني
ولا مرة شفت حوار من النوع المنحط فيو وحتى لو كان موجود ,,,, أنو يا عالم كل شي حلو ممكن لاقيه باليوتيوب بروح بكبو بس لأن في كم واحد عندو انحطاط بالحوار !!!!!!!

اما بالنسبة لاخوية فيقول انه الموقع تخنها وخاصة عند نشر كاريكتور مسئ للرئيس بشار الاسد

ما بعرف هالموضوع وما شفت الكاريكاتير مع العلم إني ضد الكاريكاتير اللي بيهدف للسخرية فقط لا غير

بس كمان الحجب مو حل لهيك مواقف

ان هناك وسائل اعلام اخرى تنتقد بحرية ولا احد يحاربها مثل الوطن شبابلك بلدنا وغيرها كما ان الصحافة الحكومية تمارس دورها بشكل بناء

الصحافة الحكومية تمارس دورها بشكل بناء ليش مين عم يقراها
ما بعرف هالمواقع بس ممكن يكونوا متل ابرة مورفين لينقال عنا حرية رأي والذي منو
وإذا كان في مواقع بتنتقد بحرية ومو محجوبة معناها صار في خيار وفقوس كمان بالمواقع
صحيح اللي بغير عادتو بتقل سعادتو

[phoenixbird]

الشعب السوري والشباب السوري الواعد الجدي

عندو شي أهم وافضل من أنو يفكر انو انحجب هدا الموقع او الموقع فلاني ما انحجب (الفيس بوك +الهاي 5 )

أيه عندنا شي أهم وأهم واهم و أفضل من أنو نفكر في هيك شي ياخد من وقتنا وتفكيرنا

رد من احد الاعضاء

يعني وإذا انحجب الفيس بوك !!!!!! أفضل وعقبال كمان Hi5

وبتمنة كمان تنحجب كافة مواقع يلي ع أساس تعرف وحكي فاضي وبلا طعمه
وعقبال مواقع الشات والمحادثة كمان (التعارف والحكي الفاضي والتسلية بلا طعمة وهزة البدن من ناس بتعرف حالها )

أكيد انتو عم تاخدو الموضوع من أبعاده البعيدة وليست الإيجابية
ثالث شي : يعني لو بدي أشرح لك سر طبيعة الحجب لبعض المواقع ما رح توصل الفكرة لعندك او لعند البعض

بالنسبة للبلوغ سبوت بعتقد سبب حجبه لأنو مو هو بيستضيف مدونات ؟ وبالنسبة للسوريين أكتر عالم بيستعملو المدونات هنن مفكرين وصجفيين وبمعنى آخر مثقفين، وطبعا جماعة من هالمثقفين المعارضين عاملينا مدوناتون عالبلوغ سبوت وبالتالي ما لازم ينتركلون المجال وبسكروا الموقع كللو لأنو الكل بيعرف انو في 100 طريقة إذا تسكرت صفحة معينة فينا نفتحها بطريقة تانية وتالتة مشان هيك بلا وجع راس ، وبالنسبو لل يو تيوب كمان نفس الشي صار في فيديوهات شي بطعمة وشي بلاطعمة بتخص امن البلد وخصوصي لما صار ينحط عليه العمليات الارهابية تبع العراق وبالنسبة للفيس بوك
وما أدراك شو عم يصير بالفيس بوك؟؟؟
طل شي هون رح قولو سمعتو سمع وما حاولت اتأكد مشان ما انشحط .. سمعت انو إذا في قسم من اللبنانية نازلين حكي طالع نازل على سوريا والجيش السوري وشي أعظم وبشكل مهين كتير.
انا ما عم دافع عن حدا بس إذا حدا قاري اتفاقية استعمال الفيسبوك انو ما لازم ينهان في شخص كحد شخصه او كصورة أي بأي طريقة … طيب وين هالشي؟
كتير ناس عم تنهان وكتير شغلات عم تصير وادارة الفيس بوك مطنشة
فالحكومة لما توقف الموقع في عندا حجة انو الفيسبوك ما عم يلتزم باتفاقيته وفي عالم عم تهين سوريا والشعب السوري وبالتالي الون الحق انو يحجبو

وبعدين الحمد لله صار للسوريين الخارجين عن البلد دور للكلام ويحكوا بس للأسف عم يحكوا عن وطنهم

بالشي العكس او الشي السلبي بدال ما يحكوا الشي الإيجابي فهاد شي كتير خطير بحق السوررين الخارجين

عن البلد بالنسبة للسوريين داخل البلد يلي عم يبنوا أيد في إيد كرامة البلد وسمعة البلد ويرفعوا علم الوطن يرفرف عالياً

شو رايك؟

[phoenixbird]

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

لقلك هالموضوع من ايام الاخوية الغابرة
عطيني رايك فيه

[sandra]

أول شي صباح الخير طارق
اي أنو لسا بتوقيتي هاد أنا بعتبرو الصبح وعم اشرب القهوة تفضل .... مع أنو المفترض تكون القهوة عليك كوني أنا الضيفة
منجي لردود الأعضاء

الشعب السوري والشباب السوري الواعد الجدي

عندو شي أهم وافضل من أنو يفكر انو انحجب هدا الموقع او الموقع فلاني ما انحجب (الفيس بوك +الهاي 5 )

أيه عندنا شي أهم وأهم واهم و أفضل من أنو نفكر في هيك شي ياخد من وقتنا وتفكيرنا

مزبوط بس شو بينقص الشعب السوري عن بقية الشعوب لتنحجب المواقع عنو ؟
أكيد انتو عم تاخدو الموضوع من أبعاده البعيدة وليست الإيجابية

ثالث شي : يعني لو بدي أشرح لك سر طبيعة الحجب لبعض المواقع ما رح توصل الفكرة لعندك او لعند البعض

إي لكن لا يشرح طالما الفكرة ما رح توصل

بالنسبة للبلوغ سبوت بعتقد سبب حجبه لأنو مو هو بيستضيف مدونات ؟ وبالنسبة للسوريين أكتر عالم بيستعملو المدونات هنن مفكرين وصجفيين وبمعنى آخر مثقفين، وطبعا جماعة من هالمثقفين المعارضين عاملينا مدوناتون عالبلوغ سبوت وبالتالي ما لازم ينتركلون المجال وبسكروا الموقع كللو لأنو الكل بيعرف انو في 100 طريقة إذا تسكرت صفحة معينة فينا نفتحها بطريقة تانية وتالتة مشان هيك بلا وجع راس ، وبالنسبو لل يو تيوب كمان نفس الشي صار في فيديوهات شي بطعمة وشي بلاطعمة بتخص امن البلد وخصوصي لما صار ينحط عليه العمليات الارهابية تبع العراق وبالنسبة للفيس بوك
وما أدراك شو عم يصير بالفيس بوك؟؟؟
طل شي هون رح قولو سمعتو سمع وما حاولت اتأكد مشان ما انشحط .. سمعت انو إذا في قسم من اللبنانية نازلين حكي طالع نازل على سوريا والجيش السوري وشي أعظم وبشكل مهين كتير.
انا ما عم دافع عن حدا بس إذا حدا قاري اتفاقية استعمال الفيسبوك انو ما لازم ينهان في شخص كحد شخصه او كصورة أي بأي طريقة … طيب وين هالشي؟
كتير ناس عم تنهان وكتير شغلات عم تصير وادارة الفيس بوك مطنشة
فالحكومة لما توقف الموقع في عندا حجة انو الفيسبوك ما عم يلتزم باتفاقيته وفي عالم عم تهين سوريا والشعب السوري وبالتالي الون الحق انو يحجبو

هلا فكرة المدونات حلوة يا زلمة أنو الواحد يكون الو مساحة حرية تعبير خاصة فيو عالنت بما أنو أفكاروا مش ممكن تصل عن طريق االصحافة العادية وبعدين واي نت؟
المدون هو بطبيعة الحال إنسان ، بيريد يعبر عما بداخله من عواطف ، وشو في برأسه من أفكار
والأفكار بتحتمل الصحة والخطأ
مرة تانية ما بعرف ليش نحن منخاف من الرأي الآخر المعارض وما عنا الشجاعة لنسمعو أنو نواجهو لنواجهو ما بعرف.
من بين كل الايجابيات اللي ممكن تحملها هالمواقع مافيني الغيها مشان شوية سلبيات
كل شي بهالدنيا بيحمل الوجهين الايجابي والسلبي وانت لازم تكون شاطر بأنك تستفيد منهم لمصلحتك مو تبتعد عنهم لأن هنن موجودين بكل الأحوال فالهروب مارح ينفع

وبعدين الحمد لله صار للسوريين الخارجين عن البلد دور للكلام ويحكوا بس للأسف عم يحكوا عن وطنهم

بالشي العكس او الشي السلبي بدال ما يحكوا الشي الإيجابي فهاد شي كتير خطير بحق السوررين الخارجين

عن البلد بالنسبة للسوريين داخل البلد يلي عم يبنوا أيد في إيد كرامة البلد وسمعة البلد ويرفعوا علم الوطن يرفرف عالياً

نفس الكلام اللي قلتو فوق
بيكفي خوف وجبن من الرأي المخالف ومن كل شي مختلف عننا

[sandra]

كاتب النص الأصلي : phoenixbird

فقشي هون


لقلك هالموضوع من ايام الاخوية الغابرة
عطيني رايك فيه

لا تعليق حالياً بس
بانتظار الأسئلة

[phoenixbird]

راجعلك بعد الغدا

[sandra]

كاتب النص الأصلي : phoenixbird

راجعلك بعد الغدا

مافي تفضلي

[phoenixbird]

قلنالك عم نتغدى كبة ومحاشي وانحرق قلبك

ستي
اللي بدي اسالك ياه هوي انو لهدرجة نحنا محتاجين موعظة لحتى نعمل فبركة للصور ونقول والله هالبنت تمسخرت عالقرآن
؟

شي مرة مرقتي بهيك موقف ؟

[sandra]

كاتب النص الأصلي : phoenixbird

قلنالك عم نتغدى كبة ومحاشي وانحرق قلبك

ستي
اللي بدي اسالك ياه هوي انو لهدرجة نحنا محتاجين موعظة لحتى نعمل فبركة للصور ونقول والله هالبنت تمسخرت عالقرآن
؟

شي مرة مرقتي بهيك موقف ؟

إي حرقت قلبي صح بس احترق أكتر أنو ما عزمتني

بالنسبة لسؤالك الأول نحن شعب عاطفي جداً قائم عالإيمان بالمسلمات بدون ما كتير نتبع المنطق والعقل
وهي القصص ملفقة برأيي لخلق ايمان أعمى لضعاف القلوب من باب الدعوة وكسب الحسنات أو التبشير

سؤالك التاني ما فهمتو

[phoenixbird]

كاتب النص الأصلي : sandra

إي حرقت قلبي صح بس احترق أكتر أنو ما عزمتني

بالنسبة لسؤالك الأول نحن شعب عاطفي جداً قائم عالإيمان بالمسلمات بدون ما كتير نتبع المنطق والعقل
وهي القصص ملفقة برأيي لخلق ايمان أعمى لضعاف القلوب من باب الدعوة وكسب الحسنات أو التبشير

سؤالك التاني ما فهمتو

يعني اليوم بتشوفي بسوريا الله مو مكتر غير هالسير

الولد اللي صار عقرب لانو سب الله
والبنت اللي انمسخت
والاغرب من هيك فيديوهات اغتصاب ما بعرف مين واعدام هاد وقتل هداك وعليها اقبال ما شاء الله

والعالم بتصر على انو الولاد تشوف هالشي قال معليه خليه يتعلم ويخاف

برايك شو السبب بهالقصة ومعقول يصير هالشي حتى من قبل اشخاص مثقفين

[sandra]

للأسف هالظاهرة عم تكتر
-المجتمع الشرقي مجتمع بيعتمد على الدين في موقفه من الحياة والموت وكل شي بالدنيا بدون إعمال العقل
وما رح يتوقف المتدينون (المتدينون بشكل أعمى) عن ذكر هالاشيا والسبب بسيط وهو أن الإنسان بيعتقد انو اللي بيؤمن فيه هو الأفضل .ولازم يدعي الناس تكون متلو بشتى الطرق
وللأسف عم شوف هالأفكار منتشرة كمان بين الطبقة المتعلمة
لان ببساطة ما عم يشغلو عقلهم بهالموضوع كونوا التفكير بالأمور الدينية وتشغيل الخط الاحمر هو تابو

[phoenixbird]

واللي عم يصير باخوية خير دليل
ساندي ب6 اسطر شو بتقولي للمتدينين بشكل اعمى واللي عم ينشروا هيك قصص