من قلب محروق ............

سنفورة · 21/02/2006

لما بتمشي بالشارع وبتلاقي بني آدم (مع وقف التنفيذ) عم ينطوز نطز من فوق الاسوار مع انو الجسر او النفق يا دوب عشر متار قدامو،

لما بتلاقي شرطي المرور ماشي على الموتور بعكس اتجاه السير مشان ما يعذب حالو ويلف من الشارع التاني (مع انو المازوت مو هو اللي دافع حقو)، بتعرف اننا عم نحكي عن شرطة بسوريا

لما بتركب بباص النقل الداخلي وبتلاقيه بيوسع (او بيجبروا إنو يوسع) لحد الـ 400 زلمة جلوساً ووقوفاً وتفعيساً (حتى أحيانا بيخطرلك تدق لموسوعة جينيس تسجلو أو لجمعية حفظ حقوق الباصات لانو لو هالباص كان الو روح كانت انتقلت إلى رحمته تعالى من زمان)، بتعرف انك بسوريا

لما بتلاقي المحارم والكياس وعلب الكولا وغيرو عم بينلحش لحش من قلب السيارات على الشارع مع انو الشارع يا دوب الحكومة منضفتو، بتعرف انك بسوريا

لما بتكون ماشي مروق الصبح والعصافير عم تزقزق من حواليك وفجأة بتلاقي واحد قدامك بالشارع عم يتنخع بنص الطريق (خع تفوووووووو)، بتعرف انك بسوريا

لما الحكومة (وما رح بالغ إذا قلت) موظفة زبالين بعدد نجوك السما (فينا نقول زبال لكل مواطن) شغالين على مدى 24 ساعة ومع هيك بتلاقي الشوارع وسخة والعالم عم ترمي كياس الزبالة شي من عالاسطحة وشي من الشبابيك وشي ما بتعرف من وين جاية، بتعرف انك بسوريا

لما بتلاقي زحمة عالسرافيس ولما يا دوب يعني يا دوب بتدحش حالك انت وكم زلمة بشي سرفيس وبعد شي حارة ولا حارتين واحد طلع معك من دقيقتين بقلو للسرفيس "عمهلك نزلنا هون" مع انو كان اسرعلوا يمشي من هالوقفة وهالخناق بس الافندي مو جاية على مزاجو يمشيلو شي شويتين مشان هيك اخد سرفيس (وبكون وقتها طبعا اخد مطرح شي واحد متاخر على وظيفتو ولا شي طالب على جامعتو) ، بتعرف انك واقف بمواقف بسوريا

لما سواق السرفيس بيوقف وين ما بدو وايمتى ما بدو مع انو في مواقف رسمية بكل شارع، ، بتعرف انك بسوريا

لما بتطلع الصبح وبأمان الله يعني عم تحاول تبلش نهارك بنفس مفتوحة بتلاقي اللي قاعد جمبك ريحة تمو بتخنق من الدخان ومع هيك عم بحدث ويضحك "ملء فيه" أو بكون اكلو شي صحن فول من عالصبح ومو نسيان يفقس براسو شي راس بصل ، بتعرف انك راكب بباصات بسوريا

لما بتكون عم تعيّش عيلة طويلة عريضة وفينا نقول عنك موظف عادي (ما رح نقول مثالي) بشي شركة خاصة، وفجأة بتلاقي حالك بالشارع لان مديرك سمع حكي عنك ما عجبو كتير، بتعرف انك بسوريا

لما دكتور الجامعة بياخد راتب قد راتب الخريج العادي، وخريج الجامعة بياخد قد راتب اللي معو باكالوريا، واللي معو بكالوريا مو ملاقي شغل، واللي معو تاسع أبوه فاتحلو شركة خاصة، بتعرف انك بسوريا

لما بتكون معك شهادة معهد ومع هيك عندك خبرة الف مهندس ومديرك بيعرف هالشي ومع هيك راتبك يا دوب عم بكفيك اللقمة لانو متل ما عم بقلك المعلك (عفواً المعلم) البلد هيك وشهادة المعهد مو قد المقام، بتعرف انك خريج بسوريا

لما بتكون رايح الصبح على الوظيفة (مو عامل شي) ومع هيك حاطط ايدك على قلبك وماسك وردة عم تنتف وراقها وعم تقول: يا اليوم بتقلع يا أما ما بتقلع - يا اليوم بتقلع يا أما ما بتقلع ، بتعرف انك متوظف بسوريا

لما بيقطعولك خط التلفون لانك نسيت تدفع الفاتورة وما إجاك إنذار متل باقي البلدان تبع العالم والناس (مو تبعنا يعني) وبتروح و وشك أصفر على مركز البريد لتدفعها وانت عم تقول لحالك: "ولي على قامتي أكيد طلعت كتير عالية لحتى قطعولي ياه للخط) بتقوم بتلاقي فاتورتك (80 ل.س) يعني قيمة الاشتراك لا غير، بتعرف انك بسوريا

لما الكهربا بتقطع وبتتصل على شركة الكهربا وبقولو ما في مشكلة وشوي بترجع ومع هيك بتضلك يومين تلاتة بدون لا كهربا ولا غيرو وعلى أثرها بتبظلها مدامتك (يعني مرتك) شي ولد عاشر لانو ما كان فيكن تتسلوا بالفرجة على التلفزيون، بتعرف انك عايش بسوريا

لما بتروح عالجامع لتصلي وقلبك كلو نور وإيمان وبيغمى عليك بالركعة التانية لانو اللي قدامك مو غاسل جراباتو من شي شهرين تلاتة، بتعرف انك عم بتصلي مع أحد مصليين بسوريا

لك لما بتشغل التلفزيون وبتسمع أخبار صايرة عندك بالبلد ولما بتقلب المحطة على قناتك الفضائية (على اساس بدك تتابع الاخبار من قلب الحدث) وبتلاقي انو القناة ولا كإنو عندها خبر بالموضوع، ، بتعرف إنو عم نحكي عن قناة سورية الفضائية بسوريا

لما بيجبروك تصف سيارتك بمرآب خصوصي مع إنو الشارع طويل عريض بره وما عليه عجقة ولاممنوع الصف فيه ولا حتى محطوط لافتة ممنوع الوقوف، بس لإنو صاحب الكراج عاطي الشرطي قرشين وقايلو يشحط كل سيارة رح ترفض تصف عندو، وبتقول لحالك ماشي الحال الله بعيننا رح نروح للمرآب وبتلاقي انو اللي رح تدفعوا هنيك ببساوي راتب شي 6 موظفين بالشهر وبقولولك عادي هيك الأسعار، بتعرف انك بسوريا

لما بتحكي وبتحكي وبتحكي وبتحكي وما حدا بينطش الا اللي ما بدك ياهن يسمعوك (بيت خالتك) ، بتعرف انك بسوريا

لما تكون دارس و متعب حالك و باظّة عيونك من كتر الاجتهاد و متخرج باختصاصك بدرجة ممتاز و ما صفيان شهادة باختصاصك مو اخذها و تروح أخر الشي تشتغل بشغلة غير اختصاصك كلو لانعدام الشاغر باختصاصك (هي إذا ماطلعت اخر الشي شوفير تكسي ) ... معناتا صدقني أنت بسوريا

ولك آه آه آه آه آه آه آه آه آه آه آه آه آه آه آه آه آه آه آه آه آه آه آه آه من قلب محروووووووووووووووووووووو ووووووووووووق

طنش تعش · 21/02/2006

لك هي ميزة بسورية لحتى نتميز عن باقي شعوب العالم شبك لك ام الرور ولووووووو......

بالله بتلاقي هيك ميزات بشي دولة تانية ...هييي هيأ فاحمدي ربك انو نحنا مميزين مافي متلنا.....

مشكورة..... وبعد زمان والله.........

(((الجنرال أبوجعفرالورد))) · 21/02/2006

هل الأمور هي كرمال المحافظة على التقاليد .................... ودمتم .

sweetbaby · 21/02/2006

اقتباس:

كاتب النص الأصلي : طنش تعش

لك هي ميزة بسورية لحتى نتميز عن باقي شعوب العالم شبك لك ام الرور ولووووووو......

بالله بتلاقي هيك ميزات بشي دولة تانية ...هييي هيأ فاحمدي ربك انو نحنا مميزين مافي متلنا.....

مشكورة..... وبعد زمان والله.........

اي معك حق والله
مافي ولا دولة في هيك ميزات

مشكورة يا احلى سنفورة

سنفورة · 21/02/2006

فهمت عليك هلا مشان هيك بقولو انو سوريا غير شكل

شو بعد زمان

Mado0o0 · 21/02/2006

بطمنكن انو مش بس بسوريا هيك
لبنان من شو بيشكي
بدعيكن لزيارة لبنان (لتشوفوا المصايب)

"كلنا بالهوا سوا"

سنفورة · 21/02/2006

لك شباب ناويين شي نية عليي انا ما دخلني هلا بياخدوني على بيت خالتي

(((الجنرال أبوجعفرالورد))) · 21/02/2006

سلميلنا على جيران بيت خالتك .....................

طنش تعش · 21/02/2006

اقتباس:

كاتب النص الأصلي : سنفورة

فهمت عليك هلا مشان هيك بقولو انو سوريا غير شكل

شو بعد زمان

هو الحق علي انا يلي لازم ينقلي بعد زمان بس حاسس حالي صرلي شي سنة ماشفتكون.....

سنفورة · 21/02/2006

لك ولا يهمك انت بقلبنا او بعيونا ولو رحت انت بضل موجود

(((الجنرال أبوجعفرالورد))) · 21/02/2006

أيامو ..........................

سنفورة · 21/02/2006

لك انت ليش دائما نظرتك هيك

بعدين ليش لسلم على الجيران ارواح معي احسن

(((الجنرال أبوجعفرالورد))) · 21/02/2006

أنت ليش فهمتي نظرتي هيك ............ بعدين دايمة على الروحة وبلا السلام كلو لك خيتو ...... ولي

طنش تعش · 21/02/2006

اقتباس:

كاتب النص الأصلي : سنفورة

لك ولا يهمك انت بقلبنا او بعيونا ولو رحت انت بضل موجود

ياعمي والله اخت رجال واصيلة والله........

بعدين شو سيد عبو الله وكيلك هي خيتي وشادة ضهرا فيني ..وبما انك خيي انت كمان فيؤدي انو ههي خيتك....معادلة من الدرجة الثانية....بقا بوصيك فيا بغيابي...

اقتباس:

أيامو ..........................

(((الجنرال أبوجعفرالورد))) · 21/02/2006

اقتباس:

كاتب النص الأصلي : طنش تعش

ياعمي والله اخت رجال واصيلة والله........

بعدين شو سيد عبو الله وكيلك هي خيتي وشادة ضهرا فيني ..وبما انك خيي انت كمان فيؤدي انو ههي خيتك....معادلة من الدرجة الثانية....بقا بوصيك فيا بغيابي...

يا هلا وغلا بأبو طنيش لا توصي حريص بعدين والله ما قصدنا شي ........ ولا قلك لا أيامك ولا شي منيح هيك لك خيو .............

أدوات الموضوع
عرض صفحة الطباعة إرسال هذه الصفحة إلى صديق