القــاموس اللاذقاني

[ملاك المحبة]

للغة اللادقانية من أحلى اللغات اللي ممكن يسمعا الواحد 6 أكيد عرفتو ليش
و مشان تفهمو كيف طريقة اللفظ رح أشرح القواعد بطريقة مبسّطة كتير ،
ولكن المشكلة أن الللفظ لا يمكن معرفته الا سماعيا
(يعني مشان إزا رحتو بالصيف على اللاذقية تعرفو شو عم يحكوكن)
قواعد اللغة اللادقانية:

1. في اللهجة اللاذقانية يحذف دائما اخر حرف في الجملة او
الكلمة اذا كانت مفردة

2. في اللهجة اللاذقانية تمد الكلمة دائما ثلاث حركات مد لازم

3. في اللهجة اللاذقانية تشدد دائما الكلمات في اوسطها

4. في اللهجة اللاذقانية الافعال الضعيفة تضاف اليها كما ( نهنه ) في
مؤخرتها مثل ( اخدوهنه ) ( اتلوهنه ) ( دبحوهنه ) ( ابوهنه ) مع كسر الهاء

5. كافّة الكلمات التي تحوي حرف الألف تقلب إلى واو عريضة


الكلمات :


اهم كلمة في اللهجة اللاذقانيةهي كلمة عيّن ، حتى انو اللادقاني بينعرف من هالكلمة ، لدرجة انو مرة كان أحد الأشخاص بإيطاليا طالع بعثة مع الجامعة ، فكان بدّو يسأل واحد عربي عن شغلة، فقللو: عيّن!! فسألو الزلمة: إنت من اللادقية ما هيك؟

عيِّن = انظر

زتـّا = ارميها

اشْلفا = ارميها

ازْركو = احْشكو = حاصرو

خـَيسو = اضربو بالسكين

لمّط = لم = شيل

قـبّوع = كيس و تقال أحياناً للشخص الغبي بغيابو

أبتول = غبي

كريم (تلفظ الكاف متل الجيم المصرية)= كريم اللي يستعمل للدهن متل كريم الوش

تتشيّع = هادا الفعل حالة خاصّة جداّ ، لأنو يستعمل بدل أي فعل ، طبعاً و تشتقّ عنو الشايعة و الشايع ولكن طبيعة هالفعل بتنقال في حالة الإشمئزاز من شي أو الإنزعاج من شيء معيّن

مسكليتة = بسكليتة الدراجة

ريحة = بارفان

جاكيّة = جاكيت

باكيّة = باكيت

خفّافة = بوط رياضة

عليا طول = على طول ولكن نادراً ما تسمع هالكلمة

السيبا = السلـّم

العمىىىىى = تقال في حالة الصدمة و غالباً من شي ما كويّس

كتّ = عبّي

إبّا = ارفعها

جلموء = مصلحجي

حمزة = يلي يحشر حالو بكل شي

معلاء = بيتدخل بكل شي

اشْكمو= اخذلوا

يبأبــِش = يلخْبــِص= يلعب بأصابعه

بالورب = بالمايل

عواءبك = شرف العيلة

آآآ ( مد لازم 12 حركة مع فتح الفاه ) = للتعجب و الإستفهام

اعْركا = حكّا

شْـفاتير = شفايف

كلاكيش = غراض

مأنتن = وسخ

صفدعة = ضفدعة

ملنـّص = واصل عل قمة ( توب )

ضبع = طنط

إيّاعااا = إيّا عزّةةة = شَحّاري= شحميطي = للتعجب الكتير

مكن = قوي

عكّيد = أبضاي

عَمْشة = وسخ الانف

سأرأ = علبة معدنية

دَرْبَكو = دَعْتـَرو = اوقعه ارضا

زنزوءة = مرجوحة

شئليبة = قلّيبة

مْأنشِح = وسخ

ألشين = جرابات

ألْشِت = زحطت

أشأ = الطريق الغير معبد = خرج عن الطريق

طـَرْوَشو = صرعو

زْلاعيم = لوزات

خروء = ضعيف

اكْعَرو = اصْغـَرو = اطردو

زَمَأ = مر

بَحَت = مات

طـَشّة = أهبل

إيش ياه = شو ياه

مَكـَـنة (الكاف هون متل حرف الجيم بالمصري) = موتور

مشْنِص = نوع من الموتورات في عام ال 20

مشنص ( مصطلح ) = حظو حلو

دشّـو = تركو

أهتر = أهبل

جيعان = جوعان

هبّور = شرشوح

معتـّر = مسكين = ضريب سكاكين

تليانة = مليانة

صحفة = نفاضة سواكير


أخوّي = أخي

زاوة = زاوية

كبّينة = تواليت

هردبشت = هبور

يا بو = للمناداة

لألوء = الذي يتنقل من مكان الى آخر و يلي بيلزق عليك

عليّ ما عليّ (مع تسكين الياء) = للحلفان

مَـش = دليل على اللاشيء

إتـّة = انت

فـَهْنه = يوجد

آي = نعم

بردلي = أنا بردان

فا = يوجد

إسّا = لسّا

يحمّك = دعوة بالشر و الحمة (نحنا عنا بنقلها يبعتلك حمى )

فلوكا = مركب الصيد المتوسط الطول

لنش = مركب الصيد الطويل
و الكبير

بَبّور = سفينة

رَيسي = معلمي

ما عن طـَيبي = ما عن قصدي

يلعن سلسفيلك = يلعن اجدادك

لزّ = زيح = بعّد

خمخوم = الذي يحشر انفه في كل مكان

شو دحشك = شو دخلك

أتـّورة = نـَتـّوسه = أتـّوسه = شوي صغيرة

فط = نط

خربر = مثقب وهو أداة كهربائية للنجّاريين و الكهربجيّة

حربوْء = ذكي

كـَحَشو = طردو

دَرمِل = احليء = انقلع

فوِّج = انقلع

ليش عم تزاور = ليش عم تتطلع

مسأسئ = مليانة مي أو متشتش

شنتيانة = سيف طويل طري جدا للعلئة = مشكلة

حبْكت = كمْشت = لـَنـْصِت = وصلت للذروة

يو عين = يا عين

بلعِط = لوص = تحرك بسرعة أو احتار لحالك وهي مشتقة من بلعوط و هو ابن الضفدع

قرقوعة = مهرهرة

سيبو = تركو

يطلع صوب برا = يذهب إلى دورة المياه

كل يوم تعا = يا ميت اهلا و سهلا بس لا بآ تعيدا

شكارة = شكيلة ، وهي كلمة سيئة للفتاة الرخيصة جداً

ولا خَي = يا أخي تقال تحبّباً أو إذا كنت آخد وش عالشخص اللي عم تحكي معو

طرْوَشو = طـَوَشو = خـَيَـلو = جنـّنو

صرْضْعو = مشتقة من الصرضعون وهو السلطعون ، الحيوان البحري الذي يمشي على جنب و معناها = جننو

طيك العوفة = يعطيك العافية

لأ ولو (مع التشديد على الهمزة في الـ لأ) = للإندهاش الشديد

بسّة = قطة

مريّة = مراية


ملحوظة: لازمكن شخص يحكيهن شفهي مشان تعرفوا كيف بتنلفظ كل كلمة

طبعاً لسّا في كتير كلمات ، بس هدول اللي طلعو معي ..يلا باااي

[fernanda bachchan kfoury]

العماااااااااااااااااا ع هيك كلمات
لك شوهاد؟صعبة كتير اللهجة اللادقانية

[ملاك المحبة]

لاا بس حلووو كتيير ولازمك حدا يحكيلك باللادئاني .. اسهل من الحلبي

[fernanda bachchan kfoury]

كاتب النص الأصلي : ملاك المحبة

لاا بس حلووو كتيير ولازمك حدا يحكيلك باللادئاني .. اسهل من الحلبي

بس انو بدي اسالك اللادقاني قريب شوي لحكي ضيعة ضايعة ما؟؟

ابونادر سيديزغنطيطة

[ملاك المحبة]

ههههههههههههههههههههههههه هههههههههههههه ..اي براافو عليــك ..تاكل بيض مئلي ؟هههههههههههههههههههههههه ههههههههههههههههه

[ملاك المحبة]

ههههههههههههههههههههههههه هههههههههههههه ..اي براافو عليــك ..تاكل بيض مئلي ؟هههههههههههههههههههههههه ههههههههههههههههه

[fernanda bachchan kfoury]

هه معناتا فيني اتعلم لادقاني
هوّنها بتهون هع

[ملاك المحبة]

ههههههههههههههههههههههههه هههههههههههههه ..اي براافو عليــك ..تاكل بيض مئلي ؟هههههههههههههههههههههههه ههههههههههههههههه

[توم و جيري]

كاتب النص الأصلي : ملاك المحبة

إبّا = ارفعها
قبا

جلموء = مصلحجي

جلموق ......



معلاء = بيتدخل بكل شي

معلاق

يبأبــِش = يلخْبــِص= يلعب بأصابعه

يبقبش

سأرأ = علبة معدنية
سقرق

.نزوءة = مرجوحة
نزق او نزوقة
شئليبة = قلّيبة
شقليبة

ألشين = جرابات
قلشين

ألْشِت = زحطت
قلشت

أشأ = الطريق الغير معبد = خرج عن الطريق
قشق

خروء = ضعيف
خروق

زَمَأ = مر
زمق

دشّـو = تركو
دشرو

لألوء = الذي يتنقل من مكان الى آخر و يلي بيلزق عليك
لقلوق

حربوْء = ذكي
حربوق

مسأسئ = مليانة مي أو متشتش
مسقسق

بدك تخربيلنا بيتنا ..........
انا مو من اللاذقية من طرطوس يعني نفس ىالشي بس يا ملاك المحبة لازم حرف القاف مو الآف يطلع هيك بقوة مو بؤوة شكرا عالموضوع كتير .......

[ملاك المحبة]

ههههههههههههههههههههههههه ههه ..حرام انا ماعملت شــيعلى كل ..هههه ..تشرفنا بمعرفــتك ..خلص مرة تانية بنكتبلك ياا اّف ..قصدي قااف ..اهلا وسهلاا

[سيجارة]

يلعما دبقتو رب اللاذقانيه
حلو عن سماهن
لعما الواح ماعاد في يحكي كمان

[satoman]

لك000
ضيعه وضايعه

[Elaana]

هلأ ياجماعه بدي اسأل سؤال وبدي تجاوبوني ازا مافيها غلبه
أهل صافيتا كيف بيحكو قصدي فيلن لهجه خاصه متل اهل حلب والادقية او بيحكو عادي متل أهل الشام???

[دلوعة سوريا]

ههههههه... والله حكياتون حلوين

[Elaana]

ياجماعه شبكن حدا يجاوب ع سؤالي ????

[ملاك المحبة]

Elaana والله انا ما متزكرة لأنو من زمان ما نزلت عسووريا بس اعرف بخبرك

[satoman]

كاتب النص الأصلي : Elaana

هلأ ياجماعه بدي اسأل سؤال وبدي تجاوبوني ازا مافيها غلبه
أهل صافيتا كيف بيحكو قصدي فيلن لهجه خاصه متل اهل حلب والادقية او بيحكو عادي متل أهل الشام???

هيك وهيك

[Elaana]

كاتب النص الأصلي : satoman

هيك وهيك

كيف يعني هيك وهيك ?
رح انقهر انا بدي اعرف كيف طريقتن بالحكي
حدا منكن يسجلنا شي مقطع بلهجتن ياجماعه
مارح انسالو هالمعروف