رفع سعر المازوت الحر إلى 25 واسطوانة الغاز إلى 250 ليرة سورية

[MadMax]

أصدرت وزارة الاقتصاد قرارات مساء يوم الجمعة تتضمن رفع أسعار المازوت بنوعيه, المدعوم والحر, إضافة إلى رفع سعر اسطوانة الغاز المنزلي.
وقال مدير عام شركة محروقات عبد الله خطاب لـسيريانيوز إن سعر المازوت الحر أصبح 25 ليرة سورية, فيما سيباع المازوت المدعوم وفق القسائم التي تم توزيعها بسعر تسعة ليرات سورية, بعد أن كان بسبع ليرات.
وأضاف الخطاب أن سعر اسطوانة الغاز المنزلي أصبح 250 ليرة سورية بدلا من 145 ليرة, لكنه شدد على أن سعر الخبز "لم يرفع نهائيا وبقي كما هو".
وتأتي هذه القرارات ضمن سياسة "ترشيد الدعم" التي اتبعتها الحكومة بغية تخفيف الإنفاق الحكومي.
وانتهى قبل أيام توزيع قسائم المازوت التي تسمح للأسر السورية ,ومن في حكمها, بشراء ألف ليتر سنويا من المازوت المدعوم.

واستلمت حوالي 80% من الأسر هذه القسائم, بينما تم تعيين لجان دائمة في جميع المحافظات للاستمرار في عملية التوزيع لمن فاتهم الاستلام أو للحالات الخاصة التي يتقرر أحقيتها بالحصول على القسائم.
ويتوقع أن يحد رفع سعر المازوت الحر من الازدحام الحاد أمام محطات الوقود للحصول على هذه المادة, وهو الأمر الذي عزاه مسؤولون وأصحاب محطات إلى إقبال الناس على التزود بالمازوت وتخزينه قبل ارتفاع سعره.
ويأتي رفع سعر الماوزت بعد أن تم رفع سعر البنزين مرتين خلال خمسة أشهر ليصل إلى 40 ليرة سورية لليتر الواحد.
وتقول الحكومة إن حزمة من القرارات سوف تترافق مع رفع سعر المازوت للحد من التأثير التضخمي لهذه الخطوة, مثل زيادة "مجزية" في الرواتب والأجور ودعم الزراعات الإستراتيجية وبعض الزراعات غير الإستراتيجية ودعم الصادرات


سيريا نيوز

[MadMax]

كاتب النص الأصلي : Madmax

لكنه شدد على أن سعر الخبز "لم يرفع نهائيا وبقي كما هو".

يعني يكتر خيرون ....... تفضلوا ع نافوخنا من فوق

[ماغنوم56]

الظاهر مو هول الخبر
نسيت السمايلي تبعك

[اممي]

كاتب النص الأصلي : Madmax

وتقول الحكومة إن حزمة من القرارات سوف تترافق مع رفع سعر المازوت للحد من التأثير التضخمي لهذه الخطوة, مثل زيادة "مجزية" في الرواتب والأجور ودعم الزراعات الإستراتيجية وبعض الزراعات غير الإستراتيجية ودعم الصادرات

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

: lol:

[whiterose]

كاتب النص الأصلي : Madmax

يعني يكتر خيرون ....... تفضلوا ع نافوخنا من فوق

هاد الحكي لخبز الدولة افران الخبز العادي

لكن الخبز السياحي غلي خلال فترة 3 شهور من 30 إلى اربعين
وتفاحة عم يبيع ب 45 ليرة
وشمسين 40 الله لا يشمس مخلوق

[MadMax]

كاتب النص الأصلي : whiterose

هاد الحكي لخبز الدولة افران الخبز العادي

لكن الخبز السياحي غلي خلال فترة 3 شهور من 30 إلى اربعين
وتفاحة عم يبيع ب 45 ليرة
وشمسين 40 الله لا يشمس مخلوق

مو هون خلافنا


المشكلة أنو كل يوم بيرفعوا سعر كم مادة
و بحطّوا ملاحظة بالأخير أنو سعر الخبز ..ما رح يغلا



يعني يا ريتون غلّوا الخبز ........و تركوا باقي الاسعار على حلا

[sandra]

ألف مبروك ياوطني ومبروك للشعب السوري هذا الانجاز الاقتصادي العظيم
وعقبال الراتب ما يزيدوه 50% مشان نستوعب زيادة الأسعار 200%
المهم بالنسبة للمسؤولين ماعاد في تهريب مازوت برا البلد وهيك بتخلص مشاكلنا

[اممي]

كاتب النص الأصلي : sandra 82

ألف مبروك ياوطني ومبروك للشعب السوري هذا الانجاز الاقتصادي العظيم
وعقبال الراتب ما يزيدوه 50% مشان نستوعب زيادة الأسعار 200%
المهم بالنسبة للمسؤولين ماعاد في تهريب مازوت برا البلد وهيك بتخلص مشاكلنا

لك لايمتاه راح نظل مخدوعين بتبريرات الدردري ؟؟
لك قال شو قال منشان لايتهرب المازوت
طيب مين الي عم يهرب المازوت ؟وليش ياتري لمدة 30 سنة الماضيات ماكان في تهريب مازوت
القصة بكل مافيها ان نحنا عم نرضخ لطلبات البنك الدولي واتفاقية الشراكة
فينا نعرف شو المكتسباب الي انجت من اتفاقية الشراكة؟
انا بقللكن
اتمشوا بابو رمانة والمالكي وشوفو الفليبينيات والسنغافوريات وسيارات الي مابتشوفوها بارقي شوراع اوروبا
غير الكافيهات الي مافيه حدا من شبابنا ان يقعد فيها
ياتري من وين كالهالمصاري وهل الاتفاقية كانت هدفها خدمة المواطن السوري ولا طبقة من البرجوازين الجدد الي ماخلو شي الا ولهطو
طلعت ميزانيتنا فيها عجز 4 مليار دولار طيب ما خلال ال5 سنين الماضية كل مابيطلع وزير الاقتصاد بيقول فيه نمو طلع في عنا نمو بالعجز
وطيب هالا4 مليار مو لازم تنجي من هالكم من الراسماليين الموجودين بالبلد ؟
يعني لايمتاه راح يظلوا معفيين من الضرائب اعتمادا علي قانون الاسثمار رقم 10
ولايمتاه راح يظل المواطن الي عم يشتغل شغلتين والله ماعم يلحق هوه الي بيدفع الثمن؟؟

[sandra]

شوبك أممي عم تحكي معي وكأني أنا مقتنعة بهالحكي
أنا قلت المهم بالنسبة للمسؤولين والمعنى واضح

[باشق مجروح]

انجاز حكومي جديد .. على أمل زيادة رواتب عندما تبلغ نسبة غلاء الاسعار الـ 500 % .
و محملين المواطن جميلة انو الخبز ما عم بيغلا كمان .
للأسف كنا نطالب باصلاح الاسباب لتزول النتائج هلق حتى النتائج بطلنا نقدر نرقعها.
مبروك.

[اممي]

هلق حدا منكن ياجماعة الخير عم يفهم سياسة البلد الاقتصادية ؟
يعني بالله شو بدهم

[باشق مجروح]

كاتب النص الأصلي : اممي

هلق حدا منكن ياجماعة الخير عم يفهم سياسة البلد الاقتصادية ؟
يعني بالله شو بدهم

باختصار المتنفذين والمستفيدين يضلو للأبد مستفيدين.
وكل تبعات الأزمات الاقتصادية يتحملها المواطن.
ان كان الغلاء العالمي أو النقص المائي والتصدير العشوائي وكل ما شابه.

[sandra]

كاتب النص الأصلي : اممي

هلق حدا منكن ياجماعة الخير عم يفهم سياسة البلد الاقتصادية ؟
يعني بالله شو بدهم

تعباية جيوب المسؤولين والشعب يموت ما حدا سائل

[زوربا]

ومنرجع على سؤال Madmax القديم..... أنو أيمت هالشعب بدو يقوم... بس يصير حق كيلو البندورة 200 ليرة واللي 500...! أنو بقول بس يطلع الكر على راس الجوزة

[sandra]

بس أنو اللي مجنني وين رأي الشارع السوري
ليش ما عم يتحرك ويطالب بحقوقو بالعيش حياة كريمة

[زوربا]

كاتب النص الأصلي : sandra 82

تعباية جيوب المسؤولين والشعب يموت ما حدا سائل

هالشعب لو ما كان مكون من دجاجات وخواريف ما صار هيك

[اممي]

صحيح شو مشان دعم المواصلات لان علي هالقرار العظيم فان زيادة المازوت صارت بنسبة 250 % وهاد يعني السرفيس ابو 5 صار 17,5 وباعتبار ان شوفيريتنا شرفاء فاكيد راح يجبروها لل 20
ياريت الي سمع شي عن موضوع المواصلات ينورنا

[زوربا]

كاتب النص الأصلي : اممي

صحيح شو مشان دعم المواصلات لان علي هالقرار العظيم فان زيادة المازوت صارت بنسبة 250 % وهاد يعني السرفيس ابو 5 صار 17,5 وباعتبار ان شوفيريتنا شرفاء فاكيد راح يجبروها لل 20
ياريت الي سمع شي عن موضوع المواصلات ينورنا

يا أخي ليش الرفاهية الزائدة....هلق الناس ما عاد تعرف تطلع غير بالسرفيس...روحو مشي...منو بتفيقو أبكر بشي تلت ساعات ومنو بتعملو رياضة....
كمان يا أخي الدولة عندها آراء لمصلحتنا أبعد من قدرتنا عالنظر...لكن...معلوم