المفاوضات السورية- الاسرائيلية.. هل تؤدي الى سلام؟

[yass]

يوم أمس الأربعاء تم الاعلان رسميا عن مفاوضات سورية- اسرائيلية غير مباشرة بوساطة تركية, و قد يكون الخبر غير جديد أو غير مفاجئ كون هذه المسألة كانت نوعا ما منتشرة. لكن الاعلان الرسمي من قبل الطرفين و الوسيط التركي يعطي للخبر بعدا جديدة أكثر جدية.

السؤال الذي أود طرحه على السادة الأعضاء, أو بالاحرى مجموعة التساؤلات هي التالية: هل أنت مع الموقف المفاوض و تدعم الجهود السلمية لتحقيق الأهداف المرجوه من المفاوضات؟ هل تعتقد أنها يمكن أن تحقق شيئا ايجابيا؟ هل يا ترى يدعو هذا الخبر للتفاؤل و انتظار الخير؟


الرأي لكم و شكرا سلفا على المشاركة

[ماغنوم56]

يا سيدي اذا صار هل السلام
ممكن تنفك ازمة هل البلد شوي
وبتخف الضغوطات عن الشعب المعتر
وبينشال قانون الطوارئ
يعني يمكن يكون الو حسانتو هل السلام المنتظر
فا ع هل اساس منئول انشالله

[المحارب العتيق]

مابدي أكتب قرائاتي للموضوع . بس بأختصار بتمنى

[حلبي]

لا يمكن أن يكون هناك سلام ما لم يكون هناك حكومة تمثل الشعب

و عندما يكون هناك حكومة تمثل الشعب عندها تفاوض على ما يتطلع ألية الشعب و يصبو أليه

[Donald Duck]

ما بعتقد يصير سلام ..

لانو ما في دعم لاولمرت ليقدر يعمل عملية سلام ..

يعني في حزبة نفسه في اختلاف على اعادة الجولان ..

وباقي الاحزاب نفس الشي ..

يعني بدهم سلام .. بس بدون ارجاع الجولان ..

المفاوضات هذه كلها على اشي فاضي ..

[مسطول على طول]

سبقتني ياس بالموضوع

أنه يصير سلام من دون أن تتخلى سوريا عن حزب الله وحماس مستحيل .. اسرائيل ماذا ستستفيد من أعادة الجولان وتظل سوريا تدعم حزب الله وحماس وتمتلك علاقات جيدة مع ايران ؟ .. لهل درجة لحنا قوة عظما لحتى خايفين منا ولا من جيشنا لمهرهر


اقتراح
بس ضفلك شي استفتاء هل تؤيد السلام مع اسرائيل .. مع الاسباب .. حسب مو ملاحظ الشعب ماعاد سائل عن القضايا الخارجية والاهتمام عم ينصب للداخل

[باشق مجروح]

أمام سوريا عرض تاريخي لاسترجاع الجولان كامل ولكن هذا العرض بالطبع ليس مجاني وهو مقابل التخلي عن الحلف الشهير (ايران - حزب الله - حماس ) .. مصالح سوريا الاستراتيجية في الميزان الآن ولا اعتقد ان القيادة السورية بوارد التخلي عن حلفها بأي شكل .
السلام يجب ان يكون شامل لكل المشاكل العالقة بحيث تظهر اسرائيل حسن نوايا وتحل سلة مشاكلها بشكل نهائي باتفاقيات كاملة للتقسيم بدون ذلك لن يحصل سلام.
والقيادة الاسرائيلية ليست أيضاً بصدد التخلي عن الأرض مقابل السلام فقط وتعتبر ذلك تفريط فهي تفضل العيش بصراعات.

[simsima57]

اذا بتزبط...
يرجعولنا الجولان ....
ونضل حلفاء مع حزب الله و ايران ....

عنجد حلوي
ان شالله خير

[صياد الطيور]

بعتقد الربط بين المفاوضات السورية التركية و موضوع الخلاف اللبناني بيستاهل الواحد يوقف عند هالموضوعين و يعمل ربط بيناتهم يمكن يوصل لشي ...


أنا بأيد السلام بين البلدين و المفاوضات لوحدها بتفتح 500 باب مسكر بوجه السوريين

[habiba2008]

moustahil israel tkoun 3am tkhatet la salam ma3a sourya
fi mathal bikoul yali ma bijik bilkouwa khoudou biline
israel 3am tmatel ou tfawed bes la lateksab wakt menou betzid dirasetha lalmawke3 ya3ni el aradi esourya ou menou betzid kouwetha el3askarya



la tensou enou hadaf israel houwa ihtilal koul elmantika bes akid elhoukouma esourya fahmet hachi ...........betmana ma touthak bi israel
leanou bibasata israel bedha te3zel sourya jarabet awal mara bilkima el3arabya ou bes chafet enou sourya ma fachlet roghma enou fi kada sawadou wjouh el3arab
fakararet testajdem ousloub elmouhawarat ou esilm bes yali biamen la esrael bikoun hmar hada biamen lachitan akid la

[ayhamm26]

هالحكي تكرر من قبل ,بتذكر بسنة 1999 لما فاروق الشرع وباراك التقوا علنا باميركا ,اتفقوا تقريبا على كل شي
وباراك بوقتها كان منتخب بشعبية كبيرة ووضعو الداخلي في اسرائيل افضل بكتير من وضع اولمرت حاليا

بس بوقتها توقفت المفاوضات وكل طرف حط اللوم على الطرف التاني

انا بشوف انو لا النظام بسوريا ولا الاسرائيليين عندن مصلحة حاليا على الاقل انو يصير هيك نوع من السلام
بالنسبة للنظام السوري, اللي بفكر دايما باستمراريتو بالحكم فقط, استرجاع الجولان رح يجر علي مشاكل ممكن تجيب اخرتو. مثلا لو صار في سفارة اسرائيلية بالشام ما بقى تقدر تقنع حدا بقصة الممانعة والصمود ,ما بقى تقدر تقنع الشعب انو والله نحني هيك عم نشحد لانو 70 بالمية من الميزانية عم تروح للجيش والمخابرات اللي على اساس قال عم يحمي الوطن من العدو الصهيوني,هدا غير قضية قمع الحريات والسكوت على الفساد و قانون الطوارئ اللي كلها مبررة بقصة الممانعة.
اما الاسرائيليين فانا ما ني شايف اي مبرر يخلين يتنازلوا عن ارض احتلوها بالقوة,طالما انو هالارض هي ما فيها اي نوع من المقاومة وتعتبر اكتر ارض عربية احتلوها امانا بالنسبة الن .

[saman]

انا بشوف انو لا النظام بسوريا ولا الاسرائيليين عندن مصلحة حاليا على الاقل انو يصير هيك نوع من السلام
بالنسبة للنظام السوري, اللي بفكر دايما باستمراريتو بالحكم فقط, استرجاع الجولان رح يجر علي مشاكل ممكن تجيب اخرتو. مثلا لو صار في سفارة اسرائيلية بالشام ما بقى تقدر تقنع حدا بقصة الممانعة والصمود ,ما بقى تقدر تقنع الشعب انو والله نحني هيك عم نشحد لانو 70 بالمية من الميزانية عم تروح للجيش والمخابرات اللي على اساس قال عم يحمي الوطن من العدو الصهيوني,هدا غير قضية قمع الحريات والسكوت على الفساد و قانون الطوارئ اللي كلها مبررة بقصة الممانعة.
اما الاسرائيليين فانا ما ني شايف اي مبرر يخلين يتنازلوا عن ارض احتلوها بالقوة,طالما انو هالارض هي ما فيها اي نوع من المقاومة وتعتبر اكتر ارض عربية احتلوها امانا بالنسبة الن .

اول شي قالوا بدهن يساوي سلام مو تطبيع ...
تاني شي الدكتور بشار اعلن من فترة وانا نزلت الموضوع بالاخبار انو مالح يتخلى عن ايران وحزب الله مقابل السلام مع اسرائيل او استرجاع الجولان ...يعني قصة التخلي عن ايران وحزب الله ما حدا يفكر فيها ..لانو كان اعلان الدكتو صريح .......
اما بالنسبة الي ...بعرف مسبقاً انو الجولان مالح يرجع بالمفاوضات ولا حيصير شي يعني عم بيعزبوا حالهن عالفاضي ..القصة فاقسة مبينة متل عين الشمس ....بس سوريا عم اتظهر حسن نيتها قدام العالم الدولي حتى تورجي انو اسرائيل هي يلي رافضة السلام مو سوريا ...وهادا النجاز يلي عم تحاول تساويه سوريا ...بس ...

[مسطول على طول]

طالما انو هالارض هي ما فيها اي نوع من المقاومة وتعتبر اكتر ارض عربية احتلوها امانا بالنسبة الن .

هاد النظام مابيسترجي يضروب رصاصة ...ف صحتين على قلبهم الجولان

لك هاد النظام هوي الي طالع شي اسمو رشوة , فساد , مافيا ال الأسد وما ادراك ما ال الاسد , بدك يحرر الجولان .. لاسلماً ولا حرباً ومن رجلي بيرجع الجولان بوجود هيك نظام

اول شي قالوا بدهن يساوي سلام مو تطبيع ...

شو الفرق بيناتهم ...

[saman]

الفرق يا عزيزي انك لما تكون عامل سلام (مع العلم انو مالح يصير سلام ) انو سوريا ما لح تدخل بالصراع العربي الاسرائيلي ...يعني نحنا بحالنا وهنن بحالهن ...ويعني انو سوريا ما بيصير تدعم حزب الله او تكون حليفة ايران (وهادا الشي ما لح يصير بالتأكيد) هادا سلام ....
اما التطبيع فهو انو يكون نحنا عاملين سلام مع اسرائيل بالاضافة بمعاهدات تبادل تجاي وهالقصص ومساعدات لاسرائيل وسفارة اسرائيلية بسورية (وهادا من سابع المستحيلات )

[abosleman]

كاتب النص الأصلي : yass

هل أنت مع الموقف المفاوض و تدعم الجهود السلمية لتحقيق الأهداف المرجوه من المفاوضات؟

اي...

هل تعتقد أنها يمكن أن تحقق شيئا ايجابيا؟

الغريق ما بخاف البلل

هل يا ترى يدعو هذا الخبر للتفاؤل و انتظار الخير؟

شو هاد تفاؤل ..

الرأي لكم و شكرا سلفا على المشاركة

على فرض انو المفاوضات رح ترجع اليونان قصدي الجولان فأكيد الشعب _ أو أنا بشكل شخصي إذا محسوبين عالشعب _ اكيد الحل السلمي مارح تكون خسائرو متل الحل الحربي انو مو ناقصوا
بس السؤال الأهداف من المفاوضات بس استرجاع الجولان ..؟؟ مابعرف ..
بالنسبة للصمود والتصدي - التصدي من يتصدى وليس من يتصدأ - فحاج صمود وتصدي
وانو تكون حليف لامريكا بشعب مرتاح افضل ما تكون حليف لايران وحزب الله وحماس بشعب منتوف عايف التنكة
وخلي كل مين يشلع شوكو بأيدو
إذا كان في فؤاد فهي تخفيف الضغط عن الحكومة ممكن يخفف الضغط عن الشعب وممكن ساعتها يفكروا بأنو حاج فساد أو انو خلص يعني ماعاد في مجال لهيك قصص
بس هالشي ما بيدعي للتفاؤل - هيك مكتوبة فوق مابعرف - وعلى قول المثل العربي القائل لا تقول فول ليصير بالمكيول او بالصحن ...
واعذروني ع قصر فهمي بالسياسة

هامش : شو الفرق بين السلام والتطبيع

[BL@CK]

كاتب النص الأصلي : yass

يوم أمس الأربعاء تم الاعلان رسميا عن مفاوضات سورية- اسرائيلية غير مباشرة بوساطة تركية, و قد يكون الخبر غير جديد أو غير مفاجئ كون هذه المسألة كانت نوعا ما منتشرة. لكن الاعلان الرسمي من قبل الطرفين و الوسيط التركي يعطي للخبر بعدا جديدة أكثر جدية.

السؤال الذي أود طرحه على السادة الأعضاء, أو بالاحرى مجموعة التساؤلات هي التالية: هل أنت مع الموقف المفاوض و تدعم الجهود السلمية لتحقيق الأهداف المرجوه من المفاوضات؟ هل تعتقد أنها يمكن أن تحقق شيئا ايجابيا؟ هل يا ترى يدعو هذا الخبر للتفاؤل و انتظار الخير؟


الرأي لكم و شكرا سلفا على المشاركة

بتمنى لو صار بيوم من الايام سلام و كان حفيدي موجود و هوي على أعتاب السبعين من عمروه .. يحس للحظة أنو مش عايش تحت قانون طوارئ و أنو ميزانة دولتو مش 80 بالمية منها لجيوب الضباط بحجة أننا دولة مقاومة ..

هازا الشيء الوحيد اللي متمناه .

عموما ً ما بتوقع إني في بوادر خير .. عبارة عن تحريك حجار شطرنج عا الفاضي ..

تشكرات أفندم ..

[BL@CK]

صحيح قبل ما أنسا حذفت شي ألف رد .. تخوين الأعضاء و التشكيك بوطنية بعضنا بشكل مباشر أو غير مباشر مرفوض من أيا شخص كان ..

ألا هل ْ بلغت ؟!

[وائل 76]

من الصيف الماضي و أنا بقول ضرب إيران أصبح أمر لا بد منه !

ضرب إيران يعني أن الكيان الصهيوني سيكون معرض لهجمات قد يشنها حزب الله إنتقاماً لإيران، ما يعني أن نذر حرب إقليمية سيكون على أقل تقدير سيناريو مطروح من سلسلة السيناريوهات التي يدرسها الكيان الصهيوني و الإدارة الأمريكية .

الكيان ما ممكن يغامر بضرب او بالمشاركة بضرب إيران و المعلومات الإستخباراتية تؤكد إمتلاك حزب الله لصواريخ بعيدة المدى قد تطال " تل أبيب " و سوريا تجري تجارب على أسلحة غير تقليدية كما حدث في " دير الزور " وفق الرواية الصهيونية .

ما يجري الآن أعتقد أنه محاولة لتعرية إيران من الحلفاء و الأذرع التي من الممكن أن تشكل خطراً إستراتيجياً على الكيان الصهيوني عندما تضرب إيران على أساس أن تحيد هذه الأطراف عن معادلة الحرب القادمة سيقضي على جزء كبير من تخوفات الكيان الصهيوني .
و بسقوط إيران يسقط محور " الشر " كما تسميه أمريكا و الكيان و محور المانعة كما نسميه نحن !

لا تنسوا أن المفاوضات السورية الصهيونية تعثرت عندما بُحث موضوع السيطرة على شواطئ بحيرة طبريا التي تطل عليها مرتفعات الجولان، حيث أصر الكيان على حقه المطلق في السيطرة على سواطئ طبريا مع وجود أجهزة إنذار مبكر على الهضبة بالإضافة لإعتبار هضبة الجولان منطقة منزوعة السلاح، يعني تحرير الجولان وفق المقاسات الصهيونية التي تضمن للكيان الصهيوني التفوق على كل الأصعدة إضافة لإستغلال المياه بالشكل الذي يضمن تحقيق المصلحة الصهيونية بشكل كامل.

أعتقد أن القيادة السورية تعي ذلك جيداً و تعي أن هذا التحرك التكتيكي من قِبل الكيان ليس سوى محاولة لكسب الوقت و تحيد سوريا عن المعادلة القادمة و ما يستببعه ذلك من قطع كل طرق الإمداد ما بين حزب الله و إيران الأمر الذي سيجعل حزب الله يرضخ للضغوط الداخلية و العربية و أن يُحيد هو الآخر عن المعادلة القادمة !

لو وقعت سوريا في هذا الشرك فعلا المنطقة السلام!