الذي قتل رفيق الحريري

[غريب الدار]

هناك من اتهم سوريا
هناك من لم يتهم اعداء سوريا
من هم اعداء سوريا
هناك اعداء في الخارج وهناك اعداء في الداخل
ممكن ان يكونو الذين في الخارج وممكن ان يكونو الذين في الداخل
ولكن من هم اذين في الداخل ويستطيعون قتل رفيق
سؤال أطرحه على الشباب للنقاش ممكن نطلع بش استنتاج ما الو علاقة برفيق ولا بحدا
شو رايكن؟

[yass]

هناك من اتهم سوريا

سبق و تكلمنا بهالموضوع, لا أعتقد بوجود صلة بين النظام السوري و مقتل رفيق الحريري لسبب بسيط, من الواضح أن المتضرر السياسي الأول من مقتل الحريري هي سوريا, و قد ثبت هذا الأمر

هناك من لم يتهم اعداء سوريا

اعذرني بس ما فهمت قصدك

من هم اعداء سوريا
هناك اعداء في الخارج وهناك اعداء في الداخل
ممكن ان يكونو الذين في الخارج وممكن ان يكونو الذين في الداخل

أحيانا أفكر أنو أكبر أعداء سوريا هم السوريين أنفسهم
بالنسبة للأعداء في الداخل الأمر نسبي و مو سهل النقاش فيه, بدنا نحدد اذا قصدنا على أعداء النظام البعثي وللا أعداء لسوريا كبلد, أعداء النظام البعثي في الداخل, المعارضة , أستبعد علاقتها بالموضوع تماما , لسببين :
الأول : والأهم, سياسيا لم يكن الاغتيال اسلوب المعارضة السورية الداخلية ( باستثناء الأخوان!)
الثاني : لا أعتقد أن المعارضة السورية تمتلك القدرات لتنفيذ عملية من هذا النوع .

بالنسبة لأعداء سوريا الخارجيين.........لأول وهلة نقول أمريكا و اسرائيل, لكنني استبعد تورطهم بشكل مباشر
أمريكا لا مصلحة لها حاليا باشعال المنطقة نظرا لوضعها في العراق
اسرائيل بشكل مباشر لم يكن الوجود السوري في لبنان مزعجا جدا, القصد أنه لم يكن بهذه الخطورة لكي تورط نفسها بعملية بهذه الضخامة, لكنني لا أستبعد الجماعات اللبنانية المرتبطة باسرائيل, مثل جيش لبنان الجنوبي الذي اختفى من لبنان بعد الانسحاب الاسرائيلي, و الذي بدأت اسرائيل تتخلى عنه تدريجيا. ممكن جدا أن تكون هذه العملية بمثابة اعادة اعتبار..

[zen]

اسرائيل بشكل مباشر لم يكن الوجود السوري في لبنان مزعجا جدا, القصد أنه لم يكن بهذه الخطورة لكي تورط نفسها بعملية بهذه الضخامة, لكنني لا أستبعد الجماعات اللبنانية المرتبطة باسرائيل, مثل جيش لبنان الجنوبي الذي اختفى من لبنان بعد الانسحاب الاسرائيلي, و الذي بدأت اسرائيل تتخلى عنه تدريجيا. ممكن جدا أن تكون هذه العملية بمثابة اعادة اعتبار..

انا اظن ان اسرائيل واللبنانين في اسرائيل الذين كما قلت بدات اسرائيل تتخلى عنهم هم الذين اغتالوا رفيق الحريري ودار حديث عن اسلحة هربت من اسرائيل الى داخل لبنان بعد ان دفعت رشاوى ضخمة لعاميلين الامم المتحدة في الجنوب
وايضا كشف ان هناك اجتماعات بين بعض اللبنانين باسرائيل مع شارون وطلبوا منه مساعدة لكي يخرج سوريا من لبنان لكي يقدروا ان يعودوا الى لبنان
مع تحياتي

[غريب الدار]

انا ما قصدت بأعداء سوريا الداخليين المعارضة لأنو متل ما قلت خيو ما عندها هالقدرة
بس انا كنت قلت أعداء داخليين
وانتو حصرتوهن بأعداء محددين مبينين
السؤال في أعداء للحكومة في سورية وهدول أعداء للبلد ككل
مثلاً جماعة رفعت بس أنا بستبعد يكون هوي ورا الحادث (ما بعرف ليش)
بس كمان في ناس غيرو كانو طمعانين بالورثة بعد الأسد وكانو يراهنو على قدرة بشار على الحكم والحقيقة إنو استمرارو أحبط آمالهن ففكرو كيف يخلخلو الوضع حولو
يعني من عنا بس مو إلنا
بالضبط ما بقدر حدد مين هني بس انتو شو رأيكن؟

[to live is to die]

من وجهة نظري في احتمال يكون منفذ العملية ظابط سوري (غبي) أو عدة (أغبياء) والممول عملاء لاسرائيل
وممكن يكون الموضوع تضارب مصالح مالية بين عبد الحليم خدام وغازي كنعان ورفيق الحريري
في احتمال تورط سوريا بسبب تحقيق بعض المصالح الضيقة لبعض الشخصيات

[hamza]

انا بقول انو ما في لبناني شو ما كان بيقدر يقتل رفيق الحريري لانو اشرف انسان بلبنان و انا بقول انة ممكن اللي عملها المخابرات السورية بالتعاون مع القيادة اللبنانية العميلة لسوريا و خصوصا لحود بعد اللي صار وقت التمديد لما قال الحريري انو بقص ايدو و ما بمدد للحود بس رستم غزلة هدد الحريري بانو بدو يقتل ولادو فخاف الحريري على ولادو و مدد و الله يرحمو

[Danito]

أي طولي بالك شي 3 كيلومتر يا استاذ حمزة و لا الشغلة بالعيطة و العصبية يعني؟

انا بقول انو ما في لبناني شو ما كان بيقدر يقتل رفيق الحريري

أي عدلي نظرك بها الحكي ألف مرة قبل ما تقولوا هي شغلة اغتبال السياسيين علامة مسجلة بلبنان (بغض النظر عن االجهة صاحبة المصلحة أو التوجيه..أي بس التنفيذ في معظم الأحيان لبناني)

أما مين اغتال رفيق الحريري فيمكن فصل هذا السؤال لسؤالين:
أول شي : مين أوعز باغتيالوا؟
ثاني شي: مين نفذ اغتيالوا؟

السؤال الأول: سؤال كبير و متشعب، يعني القضية أكبر من لبنان و سوريا.. شغلة إقليمية دولية مشربكة فيها أطراف لا تعد و لا تحصى، فيك تبلش من المعارضة اللبنانية اللي تباكت على المرحوم و طالبت في الحقيقة .. و هيك لتوصل لحماة الديمقراطية و ناشريها.. بقوة النار و الحديد طبعاً (ديمقراطية مطعمة ببارود و دم لدرجة ما ضل منا غير الأخيرين) الشيطان الأكبر أميركا و ما مننسى بها المعمعة أسياد الاغتيالات و العمليات القذرة الإسرائيليين...فكيف حضرتك جزمت مخابرات و عملاء؟

لانو اشرف انسان بلبنان

أي هو ترى زعلنا على الزلمة لأنوا مات بهالطريقة الشنيعة المرفوضة أي بس المعارضة نفسا كانت بتكره كره العمى و بتتهم بأشنع التهم .. و هي المستفيدة الأكبر من موته لأنه بتخلصون من كتلته اللي مسيطرة على مقاعد بيروت بالبرلمان... و الأميركان جمدولوا حساباته الله يرهمه من أبل ما يترك الوزارة بفترة قصيرة لأنو عميل لسوريا.. جريدة النهار و مواقع الإنترنت هللت و زغلدت لها الموضوع... أي احترنا مين العميل و مين الصديق...

أما السؤال الثاني؟
أي يعني عفواً منك استاذ أي حجم الخروقات الأمنية و المخابرات الإسرائيلية بلبنان ما بيعرفها إلا الله .. بما فيها الخروقات بالجماعات الفلسطينية بالمخيمات .. و الكلام هون مو توجيه اتهامات.. بس فيك تراجع مقالات و تصريحات و برامج وثائقية عن لبنان و اللي بتحكي عن هذا لأمر كجزأ من التركيبة السياسية للبلد من أيام الحرب الأهلية.. و لذلك هيك عملية كثير محتمل أنوا تكون و بتوجيه من إسرائيل و بتنفيذ عملاء...

هلا الاحتمال السريالي اللي أنا فكرت في هو: ليش ما يكون الحريري نفسه قرر ينتحر سياسياً لأنوا ربما اقترب من نهاية مسدودة و فيها بهدلة .. يعني كشف أوراق مستورة .. و بهيك يبكون اقتمص دور الشهيد الرمز ؟؟ (مع احترامنا لذكراه يعني بس هي فكرة مجنونة أجت براسي و ما بعرف قديش احتمال تكون حقيقية)