بشار الأسد يدعو أمريكا للتعلم من سوريا - عرب تايمز

Cube · 22/09/2004

لخبر... اكد الرئيس السوري بشار الاسد في لقاءه الاخير بادوارد جرجيان السفير الامريكي السابق في سوريا ان السياسة الامريكية في الشرق الاوسط " لا تجسد المساواة والحرية وحقوق الانسان " وطالب واشنطن بفهم افضل لحضارة المنطقة ومصلحة وكرامة شعوبها ".
التعليق
* لم تتمكن جريدة " الدومري " من نشر تصريحات السيد الرئيس عن " الحرية " و " المساواة " لان وزارة الاعلام السورية الغت ترخيص الجريدة في اطار سعيها لتكريس الحريات في سوريا .

* نفى سكان مدينة حماه الاشاعات الامريكية المغرضة عن وجود مقابر جماعية لسكان المدينة اسوة بمقابر صدام حسين ... وقال ناطق باسم المدينة ان اجهزة الاعلام الامريكية تبالغ كثيرا في هذه المعلومات وان الموجود هو مقبرة واحدة جماعية حفرها لسكان المدينة عم السيد الرئيس رفعت الاسد بتعليمات من والد السيد الرئيس حافظ الاسد واضاف ممثل المدينة ان عدد سكان المقبرة غير معروف على وجه التحديد ولكنه لا يزيد عن شي كم الف وكسور .فيه "

* ندد رئيس منظمة حقوق الانسان في سوريا من مقره في سجن المزة بالموقف الامريكي وقال ان حقوق الانسان في سوريا مكفولة وان دخوله السجن تم عن طريق الخطأ والسهو .... وان جلده في السجن وتعذيبه مع رفاقه من اعضاء المنظمة يهدف فقط الى تسليتهم .

* سألوا فخامة الرئيس عن الذي قصده " بمصلحة وكرامة شعوب المنطقة " فأجاب : اقصد مصلحة حكامها في ان يورثوا الحكم لاولادهم .

* اشادت الصحف السورية بتصريحات السيد الرئيس .... وقالت جريدة " البعث " في افتتاحيتها ان الحرية والمساواة بين طوائف الشعب السوري مكفولة بدليل وجود طائفتين فقط في سوريا ... طائفة المليارديرية وهم من المسئولين في حزب البعث .... وطائفة الفقراء والشحادين وهم غالبية الشعب السوري .

* قرر الرئيس الامريكي ارسال وفد خاص الى سوريا تكون مهمته " فهم حضارة المنطقة ومصلحة شعبها " بخاصة وان الرئيس السوري ذكر في اكثر من مناسبة ان مصلحة المنطقة وكرامة شعوبها لا تتم الا بسيطرة الحزب الواحد على الحكم والزج بالمعارضين في السجون وتوريث الحكم للابناء وسرقة خيرات البلاد وفتح السجون والمقابر الجماعية لابناء الشعب الحبيب والابقاء على مصطفى طلاس وزيرا للدفاع الى الابد .

* طلب الكونغرس الامريكي من الرئيس بوش ارسال خبراء الى سوريا كي يتعلموا منها اصول " المساواة " و " الحرية " لتطبيقهما في امريكا بخاصة وان سجل سوريا في حقوق الانسان بيرفع الرأس .

* بعث معمر القذافي برسالة الى واشنطن يدعو فيها الوفد الامريكي الى زيارة ليبيا ايضا بعد زيارة سوريا ... وجاء في رسالة القذافي ان تجربة ليبيا في " حقوق الانسان " يمكن تدريسها في الجامعات الامريكية ... واضاف انه سيسمح للادارة الامريكية بترجمة الكتاب الاخضر الى الانجليزية واعتماده كبديل للدستور الامريكي .

philip · 22/09/2004

له ياشباب في عنا أهل وعالم نخاف عليا شو قرمقراطية وشو حرية وشو كرامة وشو تعادل مع الزمالك

بعدين مين قال مافي حرية ومافي ديموقراطية

keko · 22/09/2004

تقيلة والله
طولوا بالكن يا شباب

HashtNasht · 22/09/2004

أن نناقش و نتكلم بموضوعية شئ و ان نلقي بتعليقات فراغة أمر آخر ....غيرمقبول من وجهة نظري الشخصية

الأستاذ · 22/09/2004

النص بكامله لا يرتقي إلى المستوى الذي يجعل الإنسان يصرف جهداً للتفكير بمحتواه
فهو قائم على التعليقات السخيفة و التوليفات التافهة
و لا يقترب النص بالتأكيد من مستوى النقد الموضوعي المطلوب في هذه المرحلة للنهوض بالوطن من واقع التخلف السياسي الحاضر، لا بل أن هكذا خطاب هو تكريس لهذا الواقع
أملنا أن نرتقي بفكرنا و قولنا إلى المستوى الذي يجعل حلمنا بالنهضة أمراً ممكن الحدوث

NEDAL-S · 22/09/2004

للحئيئة الشعب عنا ما بيمشي غير هيك واذا رخو الحبل شوي بدو يصير مصايب ومصائب قوم عند قوم فوائد

اقتباس:

و لا يقترب النص بالتأكيد من مستوى النقد الموضوعي المطلوب في هذه المرحلة للنهوض بالوطن من واقع التخلف السياسي الحاضر، لا بل أن هكذا خطاب هو تكريس لهذا الواقع
أملنا أن نرتقي بفكرنا و قولنا إلى المستوى الذي يجعل حلمنا بالنهضة أمراً ممكن الحدوث

وهاد الحكي المظبوط لأنو هاي الفترة حساسة كتير ورح يكون فيها تقرير المصير

Cube · 23/09/2004

اقتباس:

كاتب النص الأصلي : NEDAL-S

لأنو هاي الفترة حساسة كتير ورح يكون فيها تقرير المصير

دعني أكمل الديباجة عنك أرجوك فقد حفظتها:
و بما أن سوريا, قلعة الصمود و التحدي, تمر بمرحلة مصيرية حرجة في حربها ضد القوى الامبريالية و الرجعية العالمية.. نعلن انه سيتم قمع جميع الحريات الداخلية و المحلية و فرض قوانين الطوارئ إلى أجل غير مسمى

كما ينبغي على المواطنين التقيد ببعض الخطوط العريضة في توجيه النقد المتمثلة بعدم احتوائ النقد على أي جمل سخيفة أو ذات معنى مضحك (معاذ الله).. لأن ذلك قد يعطل مسيرة الثورة و البعث و يؤثر سلبيا على حربنا مع الصهيونية و الامبريالية و الماسونية العالمية... خصوصاً.. ان سوريا الان تمر في مرحلة عصيبة, حساسة و "مصيرية"!

ننتقل الان بكم اعزائي المشاهدين لمتابعة حلقة جديدة من مغامرات لولو الصغيرة

keko · 23/09/2004

بتخيل أنو الحكي اللي عم تحكيه ما بنحكى عن الرئيس بشار
ومانو أكتر من حكي تافه وسطحي ناتج عن عدم وعي وسطحية بالتفكير

إذا في غلط بتشير غليه مباشرة وما في داعي لها المسخرة والحكي الفاضي
وإذا سمحت يعني لازم تعرف انو الدولة غلها عدة أركان ومو واحد هوي اللي بيحمل المسؤولية
بعدين أنت ما أجيت تحكي غلا على الزلمي اللي عم يحاول يصلح بالبلد

يعني أنا بستغرب منك

aboziad · 23/09/2004

كل الحكي ومن كل الاطراف .......... عن جد

انو ما عليه جمرك ولا ضرايب

اقتباس:

يعني أنا بستغرب منك

انا بستغرب منكن كلكن

architecturer · 24/09/2004

نقاش مرفوض من طرفي الشخصي

افضل البقاء بدون تعليق

RAMI007 · 24/09/2004

أول شي مرحبا
تاني شي يا مدري شو أسمك (صاحب المقال ) الظاهر أنو عربستان اللي عايش فيها مانا ع الأرض
والظاهر أنو أنتا واحد ما بتعرف شي على الخالص
فا سوريا اللي مو عاجبتك ورئيسها اللي مو معبي عينك مع إحترامي الكبير لشخصه
رح بتضل القلعة اللي رح يتكسر راس كل واحد من أشكالك تحت صرمايتها
وكل هل اللت والعجن اللي تفضلت فيه يا محترم بيدل أنو أنت واحد فاضي جدا وما عندك حتى ثقة بحالك
حتى يكون عندك ثقة بسوريا اللي كانت وما زالت وستبقى الشوكة اللي رح تسد حلق كل واحد بيحاول المس من كرامتها ...
ويكون بعلمك نحن اللي عايشين على أرض سوريا ونحن اللي عم ناكل من خيراتها مو أنت يا استاذ
اللي يمكن دخانك مارلبورو ومشروبك كوكا كولا وعلكتك مدري شو ..... يا استاز علاك
ولك يا قليل الزوق إزا كنت سوري بس أحترم الارض اللي عايش عليه واحترم رفقاتك اللي عايشين عليها
ويكون بمعلومك نحن رضيانين كيف ما كانت دولتنا ومو ناطرين شوية حثالة من أمثالك منشان يغيرو من أساسياتنا .... صحي أنا مو بحزب البعث متلي متل غيري كتير بس هادا ما بيعني أنو أنا مورضيان بسياسة الدولة وبسياسة الحزب
وإزا عم تحكي بالفساد في بكل دول العالم فساد حتى بالدول المتقدمة وكل هادي الدول عم تحاول القضاء عليها أو على الأقل تحاول قدر الإمكان التخفيف من أضرار الفاسدين شرواك بالخير
خلاصتو : ضب لسانك بحلقك وهيك مواضيع لا تحكي فيها منشان ما يوجعك راسك لأنو أنا متأكد أنك هلق عم تاخد حبة وجع راس وأنشاء الله ما يطيب يا تافه

**Hus** · 26/09/2004

تحية عبقة
وبعد .. الي كاتب المقال Cube
شوف خيو .. قد لا اتفق معك باي فكرة من الافكار الي طرحتها بموضوعك الحالي .. االلهم غير الفكرة المضمنة الداعية للتفكير ... والاهم منه اعادة التفكير في الافكار الي سبق وفكرنا فيها والافكار المسلمة الي ما سبق وفكرنا فيها .. افكار موجودة براصنا بحكم العادة والوراثة والتطبع والطبع ..
لو اجيت عليي انا .. انا خيو يميني متل ما اتقول .. ويميني متشدد كمان .. .. لانو بطبعي متفائل .. وبطبعي بحاول اوجد دوم مبررات ومسوغات للاغلاط الي بشوفها امامي بحكم حبي للقيادات الحالية .. (وليس هذا الحب موروثا) وبحكم ايماني بأن لا يمكن لكل او اي قيادة او انسان في مكانه القيادي ان يضع تفسيرات لكل ما يقوم به .. فبعض الامور لا يمكن الافصاح بها علنا . .. وعن مبرراتها
اما الشق التاني من المقال اي اتناول جانب الاصلاح .. اري ايضا ان الاصلاح لا ياتي بعلبة ملفوفة .. الاصلاح سلم بينطلع عليه درجة درجة .. والي بدو ينط بيوقع وبيفك رقبتو .. و بحب وبتمنى انو ما نفك رقبتنا بيوم من الايام
مثال دائما بطرحه لما يجي موضوع يتناول الاصلاح وبطء وسرعة الاصلاح
السيارات .. السيارات بالنسبة للمواطن هي عبارة عن حاجة انو يشتري سيارة لتنقلاته وخدمته الشخصية بالتالي بيحب وبيرغب انو يكون تمن السيارة في متناول يديه (يعني بالبلدي المواطن بيفكر بطريقة واحدة انو السياراة لازم اتكون رخيصة .. وانو الحكومة لما بتغلي السيارات معناها عم تشتغل ضد مصلحته .. لانو ما عم يقدر يجيب سيارة)
الحكومة بتفكر .: انو السيارات تحتاج لطرقات .. والطرقات تحتاج لتنظيم وانشاء بالتالي
لما بدي رخص ثمن السيارات بدي كون مسبقا قد اعديت طرقات تمشي عليها لاسيارات ونظمتها وهذا لا يحصل بين ليلة وضحاها ..

شوف بيروت .. السيارات شقد رخيصة .. بدك لقطع كيلو متر واحد داخل العاصمة بيروت اكتر من نصف ساعة بالوقت الي بتحتاج ما لا يزيد عن 2 دقيق لو الطرقات فاضية
دمشق العاصمة فيها ذحمة على الرغم من غلو سعر السيارات .. طيب اتخيل معي لو صار سعر السيارات نصف السعر الحالي .. بالتلاي حيزيد عدد السيارات تقديرا بنسبة 30% .. طيب يعني الزحمي حتزيد 30% .. طب هل هذا يعقل .. يعني الوضع الحالي للزحمة لا يعقل .. كيف بدك اتزيد الزحمة

هيك لما المواطن يحط حالو بمكان الحكومة بيقدر يلاقي المبرر المنطقي والمباشر ليلي عم بيصير .. بشكل موضوعي ..

بخصو الرد الاخير من الاخ Rami007
والله ما بعرف شو بدي قلك يا مان .. خيو معلش بعرف انو ممكن الوضع مستفز بالنسبة لك بطريقة او باخرى .. بس هذا ما بيعطيك مبرر للتلفظ بالالفاظ الجارحة غير الهادفة الي استهليت فيها حديثك ..
دوم هدف اي موضوع في المنبر الحر هوي الوصول لحل لفكرة جديد لطريقة تفكير جديدة .. الخ
واي رد يودي بالحوار نحو العقم .. ماله داعي و بجسب قوانين المنبر الحر الردود السلبية غير مسموحة .. الهدف هوي الوصول لحل .. واي رد خارج عن هذا الاطار ماله داعي ولا لزوم فقط يودي بالحوار الي العقم

مع كل حبي

RAMI007 · 26/09/2004

مرحبا.....
أول شي أنا بعتذر عن أسلوبي اللي وصفتو يا حكيم بس ما بعتذر عن المضمون
واللي شرحتو حضرتك مظبوط مية بالمية بس السؤال هون أنت برأيك إذا كان صاحب المقال واعي للكلام اللي كاتبو والأسلوب اللغوي المستفز اللي حكيت عنو مناسب أو لأ؟؟؟؟
النقد حسب ما بعرف وأنت بتعرف .. إلو أسلوب وطريقة سرد مناسبة مو بطريقة صاحب المقال المستهزئة وبعدين إزا كان أبن البلد معقول ما بيعرف شو الظروف اللي عايشين فيها وشو في عالم بالأخص من برا ناطرة فرصة كتير صغيرة منشان يقدرو يهدمو البلد ...؟؟
على كلا يمكن بشرحك البسيط يكون صاحب المقال ( ما رح قول غير وجهةنظرو )بس أنو صار عندو فكرة ولو بسيطة عن وضعنا !!!
وبرجع بقول أنا آسف عن أسلوبي القاسي بس صدقني لما قريت الموضوع وصل الدم لراسي وما عرفت شو عم أكتب لأنو الأرض اللي عايشين عليها لازم على القليلة نحترمها وندافع عنها ونحاول متل ماقلت نطلع ع الدرج درجة درج منشان نكون بالمستوى الحضاري اللائق قدام العالم ونتم رافعين راسنا أننا سوريين
شـــــكــــرا وعفوا

**Hus** · 26/09/2004

اي انا معك 100% انو الارض الي عايشين عليها والي حتكون والي حنندفن فيها والي حيعيش فيها ولادنا واحفادنا لازم و شي طبيعي نحترمها .. بس طبعا احترام الارض لا يقتضي باحترام حكامها .. و بدورنا كشباب (عم بيحاول يكون واعي ) منقدر نقول هذا صح وهذا غلط .. وهيك بيجوز وهيك ما بيجوز .. ومنقدر نحدد بقدر ما شو ممكن يكون بمصلحة البلد وشو الي عم بيكون لمصلحات شخصية لناس خاصين من هال البلد ..

الحكام العرب نصفين
اما حمار وانتهازي وحشرة والي حواليه شرفاء و نضاف وذوي عقول راجهة واعية لمصلحة البلد
او فهمان وخايف على البلد ووطني و و و و .. والي حواليه ولادين ستين كلب براغيث وحشرات ..

اكيد واضح نحنا شو عنا و منعرف كلنا شو بلدنا ومين حكومتنا

yass · 26/09/2004

اقتباس:

كاتب النص الأصلي : RAMI007

أول شي مرحبا
تاني شي يا مدري شو أسمك (صاحب المقال ) الظاهر أنو عربستان اللي عايش فيها مانا ع الأرض
والظاهر أنو أنتا واحد ما بتعرف شي على الخالص
فا سوريا اللي مو عاجبتك ورئيسها اللي مو معبي عينك مع إحترامي الكبير لشخصه
رح بتضل القلعة اللي رح يتكسر راس كل واحد من أشكالك تحت صرمايتها
وكل هل اللت والعجن اللي تفضلت فيه يا محترم بيدل أنو أنت واحد فاضي جدا وما عندك حتى ثقة بحالك
حتى يكون عندك ثقة بسوريا اللي كانت وما زالت وستبقى الشوكة اللي رح تسد حلق كل واحد بيحاول المس من كرامتها ...
ويكون بعلمك نحن اللي عايشين على أرض سوريا ونحن اللي عم ناكل من خيراتها مو أنت يا استاذ
اللي يمكن دخانك مارلبورو ومشروبك كوكا كولا وعلكتك مدري شو ..... يا استاز علاك
ولك يا قليل الزوق إزا كنت سوري بس أحترم الارض اللي عايش عليه واحترم رفقاتك اللي عايشين عليها
ويكون بمعلومك نحن رضيانين كيف ما كانت دولتنا ومو ناطرين شوية حثالة من أمثالك منشان يغيرو من أساسياتنا .... صحي أنا مو بحزب البعث متلي متل غيري كتير بس هادا ما بيعني أنو أنا مورضيان بسياسة الدولة وبسياسة الحزب
وإزا عم تحكي بالفساد في بكل دول العالم فساد حتى بالدول المتقدمة وكل هادي الدول عم تحاول القضاء عليها أو على الأقل تحاول قدر الإمكان التخفيف من أضرار الفاسدين شرواك بالخير
خلاصتو : ضب لسانك بحلقك وهيك مواضيع لا تحكي فيها منشان ما يوجعك راسك لأنو أنا متأكد أنك هلق عم تاخد حبة وجع راس وأنشاء الله ما يطيب يا تافه

اذا ما بتعجبني سياسة البعث مو معناتو اني أقل وطنية..بيجوز أنا بحب سوريا أكتر من ناس كتير بيتغنو بوطنيتون..
أنا بس بدي أطلب منك ترجع تقرا الرد اللي كتبتو بايدك....و بعدين تشرح شو هوي احترام الرأي الآخر برأيك!
مع الاحترامي

philip · 26/09/2004

بس ياشباب خليكون صحاب وقرايب ولا يصير فيكون متل ماصار بالأشقاء اللبنانيون

yass · 26/09/2004

الشغلة مافيها زعل..عم نتناقش بواقع بلدنا, وكل واحد حر بأفكارو ..وتحيا سوريا

yass · 26/09/2004

اقتباس:

كاتب النص الأصلي : Dr_HUS

اي انا معك 100% انو الارض الي عايشين عليها والي حتكون والي حنندفن فيها والي حيعيش فيها ولادنا واحفادنا لازم و شي طبيعي نحترمها .. بس طبعا احترام الارض لا يقتضي باحترام حكامها .. و بدورنا كشباب (عم بيحاول يكون واعي ) منقدر نقول هذا صح وهذا غلط .. وهيك بيجوز وهيك ما بيجوز .. ومنقدر نحدد بقدر ما شو ممكن يكون بمصلحة البلد وشو الي عم بيكون لمصلحات شخصية لناس خاصين من هال البلد ..

الحكام العرب نصفين
اما حمار وانتهازي وحشرة والي حواليه شرفاء و نضاف وذوي عقول راجهة واعية لمصلحة البلد
او فهمان وخايف على البلد ووطني و و و و .. والي حواليه ولادين ستين كلب براغيث وحشرات ..

اكيد واضح نحنا شو عنا و منعرف كلنا شو بلدنا ومين حكومتنا

SYRIA