الاقليات وانتماءاتها القومية

[Abu ToNi]

لكل شخص عدة انتماءات احداها يدعى بالانتماء القومي " اللي بشكل عام بتم صياغته كمرادف للانتماء الوطني لكن شتان بين المصطلحين "
كيان الأمة بيتكون بشكل اساسي من القومية او فينا نقول شخصية الامة بتتميز بقوميتا ، البعض بقدس الانتماء القومي لمرحلة بيعتبر فيها الانتماء القومي هوي القاعدة الاساسية لبناء الدولة والامة
وغياب الانتماء هاد يعني بالضرورة نهاية الأمة والدولة مع العلم بأن مفهوم القومية والانتماء للأمة كمفهوم عالما مانه عريق بعراقة الدول
فمنشوف انه حديث نسبيا وبداياته كانت مع الثورة الفرنسية وقت لغت شي اسمه انتماء للملك الفلاني ووجهت الانتماء نحو الدولة والأمة ... بمعنى آخر الوطن .


خلينا بسوريا لنحكي بواقعها وفلكها وبالاخص على الانتماء القومي المرتبط بالعرق " كردية تركمانية آشورية أرمنية ... الخ " الانتماءات الاقلية عدديا مقارنة مع القومية السورية ( وليس القومية العربية السورية .. ما بدي فوت بالتفاصيل الا ان الفكر القومي السوري بالاصل يرفض القومية العربية كقالب اله.. )
اغلب الاقليات " وان كان بنظري جميعها بس مشان ما تلافي التعميم " بتحافظ على انتماءها الذاتي وبترفعه لمرحلة التقديس ونادرا ما يصير تلاحم وانخراط كلّي بالمجتمع السوري " شكل من اشكال المحافظة على القيم والتقاليد بعيدا عن التأثر بالمجتمع المتواجدين فيه وبتزداد نزعة التمسك بالقومية مع ازدياد شعورن بالمحاربة والنبذ "

شو هوي الحل المناسب للتعامل مع الاقليات غير المنخرطة وغير المنحلة ؟

منطقيا مافي غير حلين .. اما توفير جو مناسب لتنمية المشاعر القومية او اجراء عدة مدايقات بمحاولة لنزع الهوية القومية وسحب الشرعية من وجودا .

في حال ازدياد عدد الاقلية في ظل الترحيب واعطاء حق التعبير عن المشاعر القومية وتأمين اجواء مناسبة الها.. ما ممكن نصل لمرحلة تقسيم دولة في حال مطالبة الأقلية " اذا كترت اعدادها يعني " بحصولا على كيان خاص متل ما صاير بملف كردستان العراق والطموح الكردية بالشمال العراقي ؟
هل من الصح وضع قيمة لرأي شخص بيعتبر انتماءه لقوميته فوق انتماءه لوطنه ؟

ومن جهة تانية .. الشخص اللي بيحمل اصول قومية غير سورية وسائبت الايام مع اجداد اجداده للهجرة للبقعة المدعوة سوريا
بأي حق فينا نطالب بنسيان هويته وانتماءاته والا منسحب عنه شرعية الوجود بالدولة اللي خلق فيها ؟ ما بالاخير الوطن وطنه تماما متل ما هوي وطني فعلى ايا منطق بدي اظلمه وجرده من حق المواطنة ؟

* هامش : بعرف مسبقا بأن البعض بده يحكيلي بفكرة القومية الوطنية وكيف فيها تشمل كافة الانتماءات القومية بغض النظر عن شو ما كانت تكون
بس خلينا نكون واقعيين .. بسوريا مافي شي اسمه انتماء وطني بمعناه الحقيقي .. انما تسمية مستعارة للانتماء السوري .. وبطرح الموضوع من عندي سلّمت بهي النقطة .

سمعونا رأيكم

[عياش]

أولا أصل المشكلة برأي يعود لتغييب الانتماء الوطني (سوريا) لفترة طويلة على أساس تمكين وتعميق الانتماء القومي(الوطن العربي) الأمر الذي أدى إلى تأثر الانتماء بحلم الوحدة العربية وانتعاشه بفترة الوحدة والحقبة الناصرية وضعفه حاليا ضمن الظروف الموضوعية الحالية التي أصبحت فيها الوحدة العربية جزء من الموروث الثقافي.

برأي الخروج من هذه الازمة ليس بتغييب الشعور القومي أو إذابته للأقليات التي مازالت على اتصال مع جذورها القومية (لأن المواطنيين السوريين ليسوا من نسل يعرب بن قحطان مباشرة بل ضاعت قومياتهم ولغتهم الأصلية عبر مراحل التاريخ) وإنما يكون بتعزيز الانتماء لسوريا الانتماء للوطن سوريا التي تتكلم العربية كلغة رسمية وانا مع أرشفة وتأريخ كل اللغات وكل الموروثات الثقافية لجميع أطياف وإثنيات الشعب السوري لأنها تشكل الغنى الحقيقي والفريد لسوريا كوطن للانسان.

[Elephant And Castle]

انا برأيي المتطرف . ما في شي اسمو دولة سوريا ,,هي كذبة كبيرة (او يمكن مزحة ..و مشت بعدين ) ..لأنو ..
مو السوريين هني يلي رسموا الحدود ,,,بمنطقة الشام المتداخلة القوميات والأديان ,, الفرنسيين والأنكلييز هني يلي رسمو حدودنا ,,فمن بدايتها يا كرام ,,الدولة يلي ما ساهم ابنائها علا الأقل برسم حدودها ,,في شي رح يكون غلط ....منجي عا مرحلة الأستعمار و الخروج الطوعي للفرنسيين ,,صار في مقاومة صح ,,بس بين كل 1000 متعامل مع الفرنسيين كان في مقاوم واحد ...و راحو الفرنسيين ,,و استلمنا العسكر من هداك الوقت ...و خود على جرائم و تصفية وكل شي بدك ياه ,,

الحالة المزرية لي وصلنالها كانت بسبب انو سورية عبارة عن ارض ما بيجمع ابنائها غير حب الوصول للسلطة و تصفية الأخر ...

الموضوع بينجر عالبنان و فلسطين و العراق . ملايين القتلى العراقيين على ايدي عراقية ...
فلسطين ..العوض بسلامتكون ...نباعت من زمان
لبنان ,,كل طائفة عندها حليفها الخارجي يلي بتفضل مصالحوا على مصالح لبنان الوطنية ,,,

خلصنا مسخرة و كذب ..نحنا ما في شي بيجمعنا

[Abu ToNi]

أولا أصل المشكلة برأي يعود لتغييب الانتماء الوطني (سوريا) لفترة طويلة على أساس تمكين وتعميق الانتماء القومي(الوطن العربي) الأمر الذي أدى إلى تأثر الانتماء بحلم الوحدة العربية وانتعاشه بفترة الوحدة والحقبة الناصرية وضعفه حاليا ضمن الظروف الموضوعية الحالية التي أصبحت فيها الوحدة العربية جزء من الموروث الثقافي.

القومية العربية والقومية السورية لهلق مستغرب كيف اندمجوا بمصطلح واحد " القومية العربية السورية " وهلشي واضح اننا متفقين عليه

لكن اني اعتبرها " الوحدة العربية " موروث ثقافي فلا والف لا يا زميل عياش
لأن اللي بدي يعتبر القومية العربية نقطة مرجعية اله .. فهو عما يهين القومية السورية وينقص من قيمتها ويعتبرها ناقصة وما بتقدر ترتقي لحد انتماء منفصل .. الشي اللي برفضه شخصيا بشكل كبير .

كاتب النص الأصلي : عياش

برأي الخروج من هذه الازمة ليس بتغييب الشعور القومي أو إذابته للأقليات التي مازالت على اتصال مع جذورها القومية (لأن المواطنيين السوريين ليسوا من نسل يعرب بن قحطان مباشرة بل ضاعت قومياتهم ولغتهم الأصلية عبر مراحل التاريخ) وإنما يكون بتعزيز الانتماء لسوريا الانتماء للوطن سوريا التي تتكلم العربية كلغة رسمية وانا مع أرشفة وتأريخ كل اللغات وكل الموروثات الثقافية لجميع أطياف وإثنيات الشعب السوري لأنها تشكل الغنى الحقيقي والفريد لسوريا كوطن للانسان.

بنفس الوقت في قومية تركمانية وقومية آشورية وقومية كردية " بالمناسبة ما بفرق بين القوميات السابقة والقومية العربية .. جميعن بنظري اقليات دخيلة على القومية السورية "
بس الحل اننا نذيب قوميتن ونحاربن ونسلبن حق المواطنة !!
مع معزتي الكبيرة يا حكيم .. لو كنت انت من الاقليات كنت اعتبرت الحكي السابق اهانة لوجودك ولكيانك قبل ما يكون اهانة لقوميتك .
مع العلم بأن التاريخ اثبت بأن محاربة الشعور القومي بشكل العامل الأول بانتشاره وتعزيزه عند اتباعه .


اهلا عياش

[عياش]

لأن اللي بدي يعتبر القومية العربية نقطة مرجعية اله .. فهو عما يهين القومية السورية وينقص من قيمتها ويعتبرها ناقصة وما بتقدر تقدر ترتقي لحد انتماء منفصل .. الشي اللي برفضه شخصيا بشكل كبير .

أنا أبدا أبدا ما انطلقت من القومبة العربية كنقطة مرجعية انا كل ما هنالك حاولت فسر الظرف التاريخي والأسباب الموضوعية يلي أضعفت الانتماء لسوريا (بغض النظر عن تعريفه)

جميعن بنظري اقليات دخيلة على القومية السورية "
بس الحل اننا نذيب قوميتن ونحاربن ونسلبن حق المواطنة !!

يا أبو طوني مين قال بدنا نذيبن ما ضل في تذويب هالإيام أنا اقترحت أرشفت كل الموروث الثقافي لكل الإثنيات من اللغة للأغاني التراثية للقصص الشعبية وهاد يعني تأصيل مو تذويب ولكن اقترحت حل أزمة الانتماء بان ننعش الانتماء لسوريا كونها نقطة مرجعية وقاعدة وطنية مشتركة للجميع يعني بالمختصر مو كلنا عايشين ع أرض سوريا عم نشرب من ميتها وناكل من خيراتها معناتها إنتمائنا لازم يكون موحد إلها أما التراث القومي فليبقى ويتأصل ولكن دون أن ينتقص من الانتماء لسوريا على الإطلاق.

أبو طوني بتفهم حماسك بس ياحبذا تكون متروي أكتر بردودك وبحييك عل الموضوع المرتب

[MadMax]

كاتب النص الأصلي : Abu ToNi

خلينا بسوريا لنحكي بواقعها وفلكها وبالاخص على الانتماء القومي المرتبط بالعرق " كردية تركمانية آشورية أرمنية ... الخ "

هامش صغير


بظن الحالة الارمنية .. حالة خاصة .. ما بتشبه الاقليات التانية بسوريا

[Abu ToNi]

انا برأيي المتطرف . ما في شي اسمو دولة سوريا ,,هي كذبة كبيرة (او يمكن مزحة ..و مشت بعدين ) ..لأنو ..
مو السوريين هني يلي رسموا الحدود ,,,بمنطقة الشام المتداخلة القوميات والأديان ,, الفرنسيين والأنكلييز هني يلي رسمو حدودنا ,,فمن بدايتها يا كرام ,,الدولة يلي ما ساهم ابنائها علا الأقل برسم حدودها ,,في شي رح يكون غلط ....منجي عا مرحلة الأستعمار و الخروج الطوعي للفرنسيين ,,صار في مقاومة صح ,,بس بين كل 1000 متعامل مع الفرنسيين كان في مقاوم واحد ...و راحو الفرنسيين ,,و استلمنا العسكر من هداك الوقت ...و خود على جرائم و تصفية وكل شي بدك ياه ,,

لا هاد بالعكس ما اسمه رأي متطرف ولا يمد للتطرف بصلة
قصة " سوريا الكبرى " او " سوريا الطبيعية " مانا قصة جديدة لابل تعتبر بديهية ومنطلق تفكير ومحور عند بعض السوريين .. لكن بمنطق بعيد عن وجهة نظرك اللي بالنسبة الي اول مرة بسمعا .
بالعادة بتم الحكي انطلاقا من فكرة التاكيد على توحيد تاريخ بلاد الشام للاستدلال على ضرورة الوقوف بحكم التلازم بين اهل بلاد الشام بالقضايا والموافق .. مو متل ما انت صغت فكرتك بكذبة وجود سوريا وكذبة وجود شعور قومي سوري .

سايكس بيكو ما كان المخطط التقسيم الأول اللي عانت منه سوريا ... مر مخطط تاني " بسلام نسبيا " صيغته كانت بتنادي بتقسيم سوريا لدولة الشمال ( حلب ) والشمال الشرقي( الجزيرة ) والجنوب ( الشام ) والوسط ( تدمر وحمص ) .. بس مرق بدون ما يتم تنفيذه .. وما بعتقد انه موضوعنا نحكي على تاريخ سوريا وتقسيمها لأن ببساطة المجموعات الجزئية بالضرورة تحمل على الاقل صفة او اكثر من المجموعة الشاملة وبالتالي القومية السورية موجودة شو ما كانت تكون حدود سوريا ( وحتى في حال تقسيمها بتبقى احدى المناطق حاملة للفكر القومي ) .

الحالة المزرية لي وصلنالها كانت بسبب انو سورية عبارة عن ارض ما بيجمع ابنائها غير حب الوصول للسلطة و تصفية الأخر ...

كيف كيف كيف ؟؟؟!؟!؟!
حب السلطة ما بيعمل شي " من ناحية التاثير السلبي " قدام اعتبار الوطن قطعة ارض لامة هلكام واحد ما بيشتركوا بأي صفة وبأي تاريخ وبأي فكرة وأي طموح !!

اذا بدنا نحكي بما يتعلق بمقومات الوطن منشوف سوريا بتشتمل على اجزاء كبيرة .. يمكن مانا بأحسن احوالها لا بل يمكن منقدر نعتبرها بأتعس احوالها .. بس مع هلشي ما بتقدر تأسقط عنها لقب الوطن .
شعور المواطنة متردي جدا وماله وجود وهلشي قلته انا بهاموش الموضوع بحكيي على غياب الشعور والانتماء الوطني .. لكن غيابه حاليا ما بشكل اي دلالة لغياب الوطن !!

كاتب النص الأصلي : Elephant And Castle

الموضوع بينجر عالبنان و فلسطين و العراق . ملايين القتلى العراقيين على ايدي عراقية ...
فلسطين ..العوض بسلامتكون ...نباعت من زمان
لبنان ,,كل طائفة عندها حليفها الخارجي يلي بتفضل مصالحوا على مصالح لبنان الوطنية ,,,

آخر جملة هية اللي بتهمني .. مصالحوا بفهم منها " مصالحه القومية " او بفهم منها " مصالح قوميته " وان كانت القومية اللبنانية مقسمة على مبدأ القومية الدينية اللي ما حدا بينكر وجودها ... شو الحل لحتى ما نمشي على خطوات لبنان ؟
عندك اي تصور على حل ممكن يفيد ؟

[Abu ToNi]

كاتب النص الأصلي : عياش

أنا أبدا أبدا ما انطلقت من القومبة العربية كنقطة مرجعية انا كل ما هنالك حاولت فسر الظرف التاريخي والأسباب الموضوعية يلي أضعفت الانتماء لسوريا (بغض النظر عن تعريفه)



يا أبو طوني مين قال بدنا نذيبن ما ضل في تذويب هالإيام أنا اقترحت أرشفت كل الموروث الثقافي لكل الإثنيات من اللغة للأغاني التراثية للقصص الشعبية وهاد يعني تأصيل مو تذويب ولكن اقترحت حل أزمة الانتماء بان ننعش الانتماء لسوريا كونها نقطة مرجعية وقاعدة وطنية مشتركة للجميع يعني بالمختصر مو كلنا عايشين ع أرض سوريا عم نشرب من ميتها وناكل من خيراتها معناتها إنتمائنا لازم يكون موحد إلها أما التراث القومي فليبقى ويتأصل ولكن دون أن ينتقص من الانتماء لسوريا على الإطلاق.

أبو طوني بتفهم حماسك بس ياحبذا تكون متروي أكتر بردودك وبحييك عل الموضوع المرتب

حلو الحكي
بس على ارض الواقع مافي ولا قومية اذيبت لمصلحة قومية اخرى ( اذا اعتبرنا بأن القومية السورية بمقارنة القوميات الاخرى ) مع الحفاظ على التراث.. تحويل الواقع المعاش لتراث منسمح للاشخاص فيه يحتفظوا بتراثن منكون عما نقتل الفكر القومي " سريريا "

والسؤال بيطلع .. في حال رفض القومجي x التخلي عن قوميته لصالح القومية السورية .. شو ممكن يكون الحل ؟ خصوصا بأن الولاء للقومية مغيارة للقومية السورية ما بيعني ابدا بالضرورة عدم الولاء لسوريا كوطن .


اهلا بعياش

[عياش]

تحويل الواقع المعاش لتراث منسمح للاشخاص فيه يحتفظوا بتراثن منكون عما نقتل الفكر القومي " سريريا "

خصوصا بأن الولاء للقومية مغيارة للقومية السورية ما بيعني ابدا بالضرورة عدم الولاء لسوريا كوطن .

من طرحك هلق حسيت إنو تبلور أمامي خيارين:

الاول الانتماء لسوريا كواقع معاش ووطن حالي بغض النظر عن وجود إنتماء قومي أساسي(كردي - سرياني - أرمني- تركماني - شركسي - آشوري - ...) وهون ما منكون أسسنا لانتماء قومي سوري (ما قصدي جماعة الزوبعة مع احترامي إلون) وبهل الحالة السوري يلي انقطعت صلتو بأصولو القومية (الفينقي مثلا) رح يضيع.

الثاني الانتماء لسوريا كقومية وحيدة والحفاظ على التراث القومي الإثني كموروث ثقافي وأجد نفسي ميال لهذا الخيار هلق ما بعرف إذا فينا نبلور من هون احتمال تالت ويلي هو بحاجة لفلاسفة وعلماء اجتماع لحتى نأسس لانتماء جديد فريد من نوعه هو الانتماء السوري يلي بيجمع قومية وطنية (السورية) مع قومية إثنية اجتماعية ثقافية (أرمنية - كردية - سريانية ...الخ) وبنفس الوقت يقبل بعدم وجود التانية عند بعض الأفراد (يلي ضاعت أصولن التاريخية القومية).

الموضوع بالنسبة إلي صار شيق كتير وغامض ما بعرف إذا رح يطلع شي بالنهاية.

بالنسبة لموضوع الخصوصية بشوف إنو القومية الكردية حاليا هي التي تملك الخصوصية لانها القومية الوحيدة يلي صارلا حاليا مشروع اقامة كيان قومي إلها على جزء من سوريا وطبعا هاد ما بيشمل كل المواطينين الأكراد ولا مجال للتعميم.

[أإأبو العبد]

كاتب النص الأصلي : Elephant And Castle

فلسطين ..العوض بسلامتكون ...نباعت من زمان

الله يسلمك يارب

ذكرتني بنشيد
بلاد العرب مااوطاني

[باشق مجروح]

بالقدر الي قدرت افهمو من الموضوع بقول :
الانتماء مشكلة حقيقية والهوية الوطنية ضايعة عند ابناء الوطن الحقيقيين ( اللي كل اجدادهون انولدو بهالبلد وما عرفو غيرو بلد ) فكيف بدنا نحكي عن الانتمائات المشروعة للاقليات الوافدة لهالبلد .
من الطبيعي ان يحن الشركسي للقوقاز وان يحافظ على عاداته التي جلبها معه وان يشعر بالانتماء للأمة القوقازية أكثر من انتمائه للامة العربية التي لا يمت لها بصلة . اما الانتماء للوطن ( سوريا ) فمحاربة هذا الشركسي ومضايقته والتمييز في تعامله والتشديد في منعه من اقامة مهرجانات تعريفية بثقافته ومعاهد تدرس لغته أو احتفاله بمناسبات وطنية هي عوامل واسباب تؤدي الى اضعاف انتماء الشركسي الى هذا الوطن ولن تؤدي باحساسه بالمواطنة لأن حريته محدودة . اما السماح له بممارسة كافة الحقوق وعدم التمييز ضده ومنحه تلك الخصوصية في الحنين الطبيعي والغريزي الى ارض الاجداد يساهم بانصهاره في بوتقه المواطنة وتعميق احساسه الوطني .
بالمختصر : الشعور بالانتماء لأرض الاجداد شئ طبيعي لا يمكن محاربته . والانتماء للوطن الجديد يتعزز من خلال المساواة الكاملة وعدم التعرض لهذه الاقليات . اما الانتماء الى القومية العربية فهذا شعور بدء يفقد من ابناء هذه القومية الاصليين .

هاموش :
مثال الشركسي فقط مثال . وهو شامل لأي اقلية بأي بلد ...
هاموش تاني :
الارمن كمثال متساويين تماماً مع السوريين وبالتالي كتير من الارمن عندهون احساس عظيم بالانتماء الوطني أكتر بكتير من سوريين اصليين
من هالشي منستنتج انو المحاربة بتعطي نتيجة عكسية . وانو القبول والانفتاح على الاقليات هو الحل السليم

و

[mhsen77]

كاتب النص الأصلي : باشق مجروح

هاموش :
مثال الشركسي فقط مثال . وهو شامل لأي اقلية بأي بلد ...
هاموش تاني :
الارمن كمثال متساويين تماماً مع السوريين وبالتالي كتير من الارمن عندهون احساس عظيم بالانتماء الوطني أكتر بكتير من سوريين اصليين
من هالشي منستنتج انو المحاربة بتعطي نتيجة عكسية . وانو القبول والانفتاح على الاقليات هو الحل السليم

و

و متل الشراكس و الارمن كمان عنا الاشوريين و التركمان وضعهن بالبلد كتير تمام و متلن متل اي مواطن سوري بكافة الحقوق والواجبات

و بظن انو ما في اي مشكلة بهالاقليات غير عند الاكراد (( يلي بظن انو تسمية اقلية ما كتير بتنطبق عليهن اذا عرفنا انو عددون بسوريا بيتجاوز المليونين كردي ))
و المشكلة معهم من الطرفين من طرف السلطة و من طرف الاكراد انفسهم لا هني راضيين بتندمجو بالمجتمع متل باقي الاقليات ولا السلطة بدها تعطيهم يلي عم يطالبو فيه
بالاخير الحل بوجود حلول وسط بين كل المطالب بحيث ما تكون على حساب الوطن

[عياش]

كاتب النص الأصلي : mhsen77

و(( يلي بظن انو تسمية اقلية ما كتير بتنطبق عليهن اذا عرفنا انو عددون بسوريا بيتجاوز المليونين كردي ))

وشو يعني أكتر من مليون بيبقو أقلية سوريا 20 مليون لانو إذا عالحسبة العددية شو وضع الفلسطينية والعراقية.

مشكلة الأكراد هي محاولتن تطبيق ما حدث في العراق هنا بسوريا رغم الاختلاف الشاسع والجوهري سواء من ناحية التركيبة الديمغرافية أو من ناحية الأكراد أنفسهم يعني اليوم الأكراد السوريين يلي أغلبيتهن بيسكنو بالريف غير قادرين على ادراة حكم ذاتي ولا يملكون الحد الأدنى من الكفاءات اللازمة.

[Nihal Atsiz]

كاتب النص الأصلي : mhsen77

و متل الشراكس و الارمن كمان عنا الاشوريين و التركمان وضعهن بالبلد كتير تمام و متلن متل اي مواطن سوري بكافة الحقوق والواجبات

يا زلمة يستر على عرضك لا تخبص بالحكي لأنو هون الحكي مو ببلاش
مين قلك أنو التركمان وضعن كنير تمام بسوريا, عطيني حق واحد بس آخدينوا كأقلية قومية بالبلد, نحن ممنوع علينا حتى تشكيل جمعية خيرية, ولك في زلمة تركماني من اللاذقية فتح دورة لتعليم اللغة التركمانية بضيعتو فكانت النتيجة اختفاءو من الوجود.
بكأس أمم أوروبا الماضية في واحد تركماني هون بالشام كان بشجع منتخب تركيا مشان هيك علق علم تركيا عالبلكون وبنفس الوقت كانوا مقابيلو جارو عربي كمان بشجع منتخب تركيا و معلق علم تركيا عالبلكون, النتيجة انو المخابرات اجت و أخدت التركماني شهر زمان بعدين رجعتو, السؤال هون أنو ليش أخدوا التركماني بس و ما أخدوا جارو العربي مع أنو تنيناتن معلقين علم تركيا, الجواب لأنو حزب البعث الأسدي الارهابي يعتبر التركماني عميل لتركيا حتى يثبت العكس.
بحياتك سمعت وجود مدرسة تركمانية في سورية, ولك بحلب في 14 مدرسة ارمنية و بالشام في مدرستين شركسيات و نفس الشي مدارس السريان بالقامشلي, لكن التركمان ممنوع منعا باتا مع انو نحن عدديا أكتر من هدول القوميات
بقى لا تجيبلي حكي مغلوط من راسك

[Nihal Atsiz]

اخي الكريم ان الحل لمشكلة الأقليات القومية في سورية يتلخص بكلمة واحدة ألا وهي الديمقراطية
اذا تم اسقاط حزب البعث الاسدي الارهابي و عمت الديمقراطية و التعددية صدقني لن تسمع بشيء اسمه مشكلة اقلية قومية بل رح يزداد التلاحم و التماسك بالبلد

[maged-syrian]

كاتب النص الأصلي : Nihal Atsiz

يا زلمة يستر على عرضك لا تخبص بالحكي لأنو هون الحكي مو ببلاش
مين قلك أنو التركمان وضعن كنير تمام بسوريا, عطيني حق واحد بس آخدينوا كأقلية قومية بالبلد, نحن ممنوع علينا حتى تشكيل جمعية خيرية, ولك في زلمة تركماني من اللاذقية فتح دورة لتعليم اللغة التركمانية بضيعتو فكانت النتيجة اختفاءو من الوجود.
بكأس أمم أوروبا الماضية في واحد تركماني هون بالشام كان بشجع منتخب تركيا مشان هيك علق علم تركيا عالبلكون وبنفس الوقت كانوا مقابيلو جارو عربي كمان بشجع منتخب تركيا و معلق علم تركيا عالبلكون, النتيجة انو المخابرات اجت و أخدت التركماني شهر زمان بعدين رجعتو, السؤال هون أنو ليش أخدوا التركماني بس و ما أخدوا جارو العربي مع أنو تنيناتن معلقين علم تركيا, الجواب لأنو حزب البعث الأسدي الارهابي يعتبر التركماني عميل لتركيا حتى يثبت العكس.
بحياتك سمعت وجود مدرسة تركمانية في سورية, ولك بحلب في 14 مدرسة ارمنية و بالشام في مدرستين شركسيات و نفس الشي مدارس السريان بالقامشلي, لكن التركمان ممنوع منعا باتا مع انو نحن عدديا أكتر من هدول القوميات
بقى لا تجيبلي حكي مغلوط من راسك

الاتراك والتركمان عندهم نزعة عنصرية تجاه العرب وبالاخص الذئاب التركية وهاد الشيء لاحظتو من خلال عملي معهم ... بيكرهوا شي اسمو عرب وبيطلقوا مسمى زنوج الصحراء على العرب .... هاد من عدا حبهم للسيطرة والتوسع على حساب الطرف الاخر ... والكبرياء الزايد و و و من مواصفات سيئة وفي عنكم مثل مشهور بتركيا "" اشرب الشراب .. و@#@# العرب وفهمكم كفاية ... لذلك انا اشد على أيدي المخابرات أنها ماتقصر مع التركمان باعتبارهم عنصريين متشددين وولائهم المطلق لتركيا الى أن يثبتوا وطنيتهم وولائهم لسوريا ..

[maged-syrian]

كاتب النص الأصلي : Nihal Atsiz

اخي الكريم ان الحل لمشكلة الأقليات القومية في سورية يتلخص بكلمة واحدة ألا وهي الديمقراطية
اذا تم اسقاط حزب البعث الاسدي الارهابي و عمت الديمقراطية و التعددية صدقني لن تسمع بشيء اسمه مشكلة اقلية قومية بل رح يزداد التلاحم و التماسك بالبلد

بل قولي رح نصير ولاية من ولايات تركيا .. والاكراد رح ياخدو راحتهم ويقومو بانشاء دولتهم المزعومة ... انا ابارك النظام في سوريا بمنع كل منع تسول له نفسه من الانفصاليين التركمان والاكراد باللعب بأمن الوطن

[عياش]

هلق ما تكون متفق مع النظام شي وتكون مانك شايف سوريا بلد أهل للاستقلال أو شعب مستقل شي تاني سوريا لا يساوم عليها أبدا