المرأة الأمريكية.. بعض الحقائق والإحصائيات حول ظاهرة التحرش الجنسي

[maged-syrian]

يعتبر التحرش الجنسي جريمة عنيفة وليس جريمة جنسية فقط. حيث يستخدم المتحرش الجنس كوسيلة لإلحاق المعاناة الذي يسببها للضحية جراء العنف والإذلال الذي يفرضه عليها لإضعافها وللسيطرة عليها والتحكم بها.
وفي كل دقيقة في الولايات المتحدة الأمريكية، هنالك 1.3 حالة اغتصاب لنساء بالغات، وتغتصب 78 امرأة في كل ساعة في الولايات المتحدة الأمريكية. وهكذا في كل يوم هنالك 1871 امرأة بالغة تغتصب في أمريكا أي ما يعادل 56916 امرأة شهريا (1).

وقد أثبتت الدراسات أن 90% من كل حالات الاغتصاب يخطط لها سابقا. إذ إنه في 87% من حالات الاغتصاب إما إن المعتدي يحمل سلاحا أو يهدد الضحية بالموت إذا قاومته
(2).

ونتج عن الدراسة التي أجريت في إحدى الجامعات الأمريكية سنة 1998أن 25% من الإناث التي أجريت عليهن الدراسة إما أنهن تعرضن للاغتصاب أو تعرضن إلى محاولة اغتصاب
(3). ومن ناحية أخرى تبين أن 50% من رجال الجامعة اعترفوا بأنهم قد قاموا بإجبار النساء لممارسة الجنس. وفي دراسة أخرى قال 51% إنهم سيقومون بالاغتصاب إذا ما تأكدوا بأنهم سينجون بفعلتهم
(4).


وفي بعض الاستبيانات الأخرى تبين أن 75% من الرجال و55% من النساء كانوا يشربون الكحول أو يتعاطون المخدرات قبل حادثة الاغتصاب
(5).

وقد تبين أن نسبة التحرش الجنسي في الولايات المتحدة الأمريكية هي الأكثر بين الأمم المتقدمة صناعيا في العالم
(6).

وفي عام 1990، تعدى عدد حالات الاغتصاب في الولايات المتحدة الأمريكية 100000 حالة اغتصاب ولأول مرة في تاريخ أمريكا. وارتفعت نسبة الاغتصاب بنسبة أربع مرات بالمقارنة مع نسبة الجرائم الأخرى في السنوات العشر الأخيرة
(7).

وأخيرا توصلت بعض الدراسات التي أجريت في الولايات المتحدة الأمريكية إلى أن عدد النساء اللواتي تبلغ أعمارهن من 16- 24 هم أكثر عرضة للاغتصاب بثلاث مرات من النساء الأخريات
(.


المصادر:

1- National Victim Center and Crime Victims Research and Treatment Center, 1992
2- Information about Rape and Sexual Assault, 1987
3- Project on the Status and Education of Women. The Problem of Rape on Campus
4- Koss, M.A. (198 Hidden Rape: Sexual Aggression and Victimization in a National Sample in Higher Education
5- Koss, M.A. (198 Hidden Rape: Sexual Aggression and Victimization in a National Sample in Higher Education
6- Koss, M.A. (198 Hidden Rape: Sexual Aggression and Victimization in a National Sample in Higher Education
7- National Victim Center (April 23, 1992) Facts about Rape In America. Arlington VA: National Victim Center
8- Violence Against Women: The Increase of Rape In America 1990

ولسا غلاة الليبراليين العرب قاعدين عم ينفخوا بسمانا بالحرية الامريكية والديمقراطية الامريكية !!

[هبه الاردن]

لك الله يعطيك الف عاقيه على هالمعلومات

احكي للعالم الي مخدوعه ب امريكا والدمقراطيه فيها لك الحمد لله نحنا بالف نعمه

والمصيبه انو الشباب ما بقلدوا غير المتسكعين بالشوارع على شان يبينو حالهن انهن عصريين

مره تانيه يعطيك العافيه ماجد

[yass]

انو شي تسالي عالآخر... هلأ بدي افهم شو دخل ارتفاع معدّل جريمة ما بـ

ولسا غلاة الليبراليين العرب قاعدين عم ينفخوا بسمانا بالحرية الامريكية والديمقراطية الامريكية !!

ماني من أنصار الحرية الأميركية و الديمقراطية الأميركية, لكني من أنصار الحرية و الديمقراطية (لأن مالون جنسية.. مهما حاول غلاة المتحجرين)...

شوية منطقية و شوية موضوعية... بس مو أكتر, لأنو خلط الأمور ببعضها بشع كتير.. أميركا دولة رأسمالية قحة و بالتالي في نسبة عالية من المجتمع الأميركي مهمّش اقتصاديا و اجتماعيا, و بالتالي في ارتفاع كبير بنسب الجريمة..

بعدين الأرقام يعني مو كتير تخلي عربنا يفرحو بحالهون.. لأنو أميركا دولة عدد سكانها فوق الـ 300 مليون (يعني حوالي العرب مجتمعين), و ما بعتقد انو نسبة هالجريمة بالذات أعلى من عنا, بالعكس عنا تتستر و تتخبى بينما هنيك لأ... فالمقارنة خاطئة, عدا قصة خلط الأمور بالحرية و الديمقراطية يعني...

و ليس الأمر دفاعا عن المجتمع الأميركي, اللي بعتقد انو مجتمع مانو سليم و معافى.. بس انو ما بطيق شغلة انو نشوف عيوب غيرنا و ما نتطلع بحالنا ( و لأ انو ازا عندون ارتفاع معدك اغتصاب يعني الحرية و الديمقراطية زفت بزفت) .... لأ و حرية و ديمقراطية.. بصراحة ما توقعت هيك خلط ديماغوجي من ماجد... للصراحة يعني

[Nay]

كاتب النص الأصلي : maged-syrian

ولسا غلاة الليبراليين العرب قاعدين عم ينفخوا بسمانا بالحرية الامريكية والديمقراطية الامريكية !!

كمان انا بشد على ايد yass هادا الكلام عيب كتير كتير.. وبيدل على قصر نظر.. ولك كل ما طلع عندون شغلة عاطلة بدنا نتسابق على الشماتة ونحنا مغطيين عوراتنا وماشيين..
من فترة طويلة كتير في مذيع اسمو توفيق حلاق عمل برنامج اسمو السالب والموجب سالو اهاليكون عليه
طلع مناظر شي ما بيتصدق بالبرنامج.. شي عجيب غريب.. دغري التغى البرنامج لانو ما بيصير ننشر غسيلنا الوسخ هي ثقافتنا..
اما الغرب بينشرو وبيحكو لحتى يحاولو يزبطو الوضع..
بيكلشي هنن سابقينا بالعلوم بالطب بالهندسة بالفلسفة بالطاقة النووية...و حدث ولا حرج..
ولك حتى بالتفاهات بالازياء وقصات الشعر بفنون الرقص بالغاء وتقنيات الصوت..
يعني بس نحنا سابقينهون بالادب والاخلاق؟؟!!..مشان الله حدا يجاوبني..

[sandra]

اي صحيح في حالات تحرش جنسي بأميركا وبكل دول العالم لأن بالنهاية أميركا مش الدولة الفاضلة ومجتمعها مافيني قول عنو سليم 100%
بس لنفترض ببلدنا إذا عملو هيك إحصائية شو رح يطلع معهم
مع العلم أنو بيكفي البنت تنزل على شي سوق وزحمة ناس ... لتلاقي شي ايد انمدت عليها قال بالغلط يعني
البنت ببلدنا بتتعرض للتحرش الجنسي كلما بتنزل عالشارع وبتمشي وبتتلطش بكلام بذيئ جداً بس لأنها بنت
يا للفرحة يا للفرحة بعتقد أننا رح نغلب أميركا بهي ... ولسا بيقولو أميركا والغرب سابقنا بكل شي

[Nay]

كاتب النص الأصلي : maged-syrian

ولسا غلاة الليبراليين العرب قاعدين عم ينفخوا بسمانا بالحرية الامريكية والديمقراطية الامريكية !!

كمان انا بشد على ايد yass هادا الكلام عيب كتير كتير.. وبيدل على قصر نظر.. ولك كل ما طلع عندون شغلة عاطلة بدنا نتسابق على الشماتة ونحنا مغطيين عوراتنا وماشيين..
من فترة طويلة كتير في مذيع اسمو توفيق حلاق عمل برنامج اسمو السالب والموجب سالو اهاليكون عليه
طلع مناظر شي ما بيتصدق بالبرنامج.. شي عجيب غريب.. دغري التغى البرنامج لانو ما بيصير ننشر غسيلنا الوسخ هي ثقافتنا..
اما الغرب بينشرو وبيحكو لحتى يحاولو يزبطو الوضع..
بيكلشي هنن سابقينا بالعلوم بالطب بالهندسة بالفلسفة بالطاقة النووية...و حدث ولا حرج..
ولك حتى بالتفاهات بالازياء وقصات الشعر بفنون الرقص بالغاء وتقنيات الصوت..
يعني بس نحنا سابقينهون بالادب والاخلاق..مشان الله حدا يجاوبني..

[Abu ToNi]

اخترعوا آلة الزمن
يا اما فعلا في انتقال ارواح وتقمص

المقال هاد اذا ماني قريانه ماني قريانه
قراينه اكتر من شي 15 مرة وعلى الأخوية شي 5 مرات اذا ماني غلطان

منرجع كالعادة منسال نفس السؤال
لو كان في احصائية عربية مشابهة شو النتائج " المتوقعة "
وهل الحل لهيك قصص هوي بالتعتيم الاعلامي متل ما بصير عنا بالدول العربي
ام بمواجهتا بالارقام والاحصائيات " اللي على صارت تستعمل كتشويه سمعة الدولة اللي بتقوم فيها مع انها مش اكتر من كشف واقع لمحاربة الظاهرة والتخلص منها "

وفي جملة ما ركبت على راسي كتير ... على الاغلب مش جاية مع الاحصائية ... لأن حفظان الاحصائية حفظ :

ولسا غلاة الليبراليين العرب قاعدين عم ينفخوا بسمانا بالحرية الامريكية والديمقراطية الامريكية !!

عالميا
مافي شي اسمه حرية " امريكية " او ديمقراطية " امريكية " يعني في حرية وديمقراطية وفق مقاييس عالمية لكن ما في حرية على المستوى الاميركي متل دوري المحترفين ال nba الها قوانينها الخاصة وشروطها الخاصة .

وشو دخل الديمقراطية بالاحصائية اللي بين ايدينا

[Abu ToNi]

ولسا بيقولو أميركا والغرب سابقنا بكل شي

فشروا بعينهم شو سابقينا ما سابقينا
لك بكل شي نحن افضل خدي هلق بشهر رمضان
المواطن العربي بيحضر بهاد الشهر مسلسلات وافلام اكتر مما بيحضر المواطن الاميركي والاروبي مجتمعين خلال سنة كاملة ... بكل شي نحن الاصل ونحن المتقدمين ... بس لعبة اعلامية وسخة بتأظهرنا متخلفين ومتكتمين على واقعنا اللي ابدا مش مذل .. مشرّف وفق كافة المقاييس .

[Nay]

ما فينا نعمل دراسة او احصائية.. لانو مو بس التعتيم اعلامي كمان الناس ما حدا بيبلغ عن الاغتصاب او التحرش سواء اغتصاب النساء او الاطفال... وهي شغلة مانها سر.. الكل بيعرفو البنت اللي بتغتصب ماعاد حدا يتجوزها وكمان بينحط الحق عليها اجتماعيا...شيلك عن العرض والشرف وما الى ذلك مشان هيك ماحدا بيبلغ حتى بالمخفر...
بعرف شب انحبس بسجن عدرا سياسي.. حكى كتير عن ناس محبوسين بتهم سفاح القربى حكم اسمو عرفي مفتوح يعني بدون محاكمة بيضلو بالسجن طول العمر...
واحد ضل يعتدي على بناتو 15 سنة..
وشخص هوي ابنو عم يتناوبو على الاعتداء عل بنتو يعني البنت عم يعتدو عليها اخوا وابوا من وقت اللي كان عمرا تسع سنوات لحتى صار عمرا 16 سنة.. والام بتعرف..
وفي كتير هيك قصص.. بس ما حدا بيعرف فيها

[Reemi]

هالارقام ما بتطلع شي قدام ارقامنا..لانو نحنا هون عنا تحرش جنسي كتير كتير كتير وبكل انواعو ..ما بس الاغتصاب .. موضوعك ما اطرق الا للاغتصاب.. بينما التحرش الجنسي بيبدا بالسلوك البدني (يعني بنت ماشي بالشارع وزحمه وهيك وخوود ع اكل هوا ) مرورا باللفظي ( التلطيشات الطالعه النازله والحكي القميء) والايحائات الجنسيه الي ما الها طعمه واطلاق النكت المزعجه كمان الى الاغتصاب ...

طبعا عنا كل شي مخبا لانو كل شي عيب ... بتخبي الموضوع مشان سمعتها وسمعة اهلها ..واذا كان التحرش من قبل المدير بالشغل بتسكت طبعا مشان ما تفقد عملها ... غير تحرش دكاترة الجامعه كمان ..قصص بتنجح وما بتنجح وعلامات وما علامات ومن هالعلاك هاد كلو كلو كلو موجود عنا بشكل كبير بس مسكوت عن هالظاهره مع الاسف

[maged-syrian]

ماني من أنصار الحرية الأميركية و الديمقراطية الأميركية, لكني من أنصار الحرية و الديمقراطية (لأن مالون جنسية.. مهما حاول غلاة المتحجرين)...

شوية منطقية و شوية موضوعية

نسيت ان اذكر ملاحظة أني كلامي موجه الى من يتشدقون بالحرية الامريكية والحلم الامريكي ,, الحرية والديمقراطية بالوقت الحالي متمثلة بأمريكا التي نصبت نفسها شرطي العالم ..

بعدين الأرقام يعني مو كتير تخلي عربنا يفرحو بحالهون.. لأنو أميركا دولة عدد سكانها فوق الـ 300 مليون (يعني حوالي العرب مجتمعين), و ما بعتقد انو نسبة هالجريمة بالذات أعلى من عنا, بالعكس عنا تتستر و تتخبى بينما هنيك لأ...

ياريت لو تتكرم علينا وتعطينا أحصائية عن العالم العربي ... أنا على حسب ماسمعت أن اعلى نسبة انتحار بالوطن العربي هي بمصر ... شخص لكل 500 الف شخص
بانتظار الاحصائية ان وجدت !!

ليس الأمر دفاعا عن المجتمع الأميركي, اللي بعتقد انو مجتمع مانو سليم و معافى.. بس انو ما بطيق شغلة انو نشوف عيوب غيرنا و ما نتطلع بحالنا ( و لأ انو ازا عندون ارتفاع معدك اغتصاب يعني الحرية و الديمقراطية زفت بزفت) .... لأ و حرية و ديمقراطية..

أنا لم أرى عيوب غيري ... كل مافي الامر أني احضرت احصائيات موثقة عن المجتمع الامريكي الذي يعتبر في نظر البعض المجتمع الفاضل والكامل والذي لاينقصه شيء على الاطلاق .. ايضاً عبرة لبعض الناس الذين يحسبون ان القيم الامريكية هي القيم العليا والديمقراطية الامريكية هي الديمقراطية التي ليس لها مثيل

بصراحة ما توقعت هيك خلط ديماغوجي من ماجد... للصراحة يعني

لست بديماغوجي ... فالديماغوجي هو من يغير رأيه بين لحظة وأخرى .. وأنا موقفي ثابت اتجاه امريكا والمجتمع الامريكي ...
عالهامش :: بدك ياك تعطيني رايك وبكل صراحة عن العضو lostman هل هو ديماغوجي أم لا !! أم هنالك سياسة معايير مزدوجة بالموضوع ؟!

كمان انا بشد على ايد yass هادا الكلام عيب كتير كتير.. وبيدل على قصر نظر

شكراً الك على تعليمي الأدب و العيب ... فأن دل على شيء فهو يدل على حسن الفاظك وحسن التعامل لديك .. اشكرك

لو كان في احصائية عربية مشابهة شو النتائج " المتوقعة "

والله ياغابي لو لديك احصائية فلا تبخل بها علينا فنحن بحاجة الى احصائية شاملة عن الوطن العربي نستطيع ان نعرف بها رؤوسنا من ارجلنا

[sandra]

المشكلة ببلادنا ما في احصائيات
وما خرج يكون عنا احصائيات لأسباب انذكرت بباقي المشاركات
بس فتلة صغيرة بالبلد وملاحظة سلوكيات فئات من الشعب لما بيشوف بنت ... بعتقد بتعطي جواب

[The morning]

كاتب النص الأصلي : yass

بعدين الأرقام يعني مو كتير تخلي عربنا يفرحو بحالهون.. لأنو أميركا دولة عدد سكانها فوق الـ 300 مليون (يعني حوالي العرب مجتمعين), و ما بعتقد انو نسبة هالجريمة بالذات أعلى من عنا, بالعكس عنا تتستر و تتخبى بينما هنيك لأ... فالمقارنة خاطئة, عدا قصة خلط الأمور بالحرية و الديمقراطية يعني...

أَضف الى هالحكي انّو الاميركان يعتبرو تحرّش الزوج بزوجته دون رغبتها بيتصنّف تحت التحرش الجنسي و الاغتصاب لذلك مفهومهم عن الاغتضاب يختلف نوعا ما و بالتالي ارقامهم ايضا ..
اضافه لهيك هالارقام ما بحسها من شغلنا كـسورين يعني او عرب- اذا كان و لا بد - يعني انا شو بهمني اذا جارنا عندو كيلو بندوره معفنه و انا ريحه بيتي طالعه ؟؟ شو بهمني اذا جارتنا بيتها حلو بس وسخ و انا ما عندي بيت من اصلو ؟؟

[maged-syrian]

كاتب النص الأصلي : sandra

المشكلة ببلادنا ما في احصائيات
وما خرج يكون عنا احصائيات لأسباب انذكرت بباقي المشاركات
بس فتلة صغيرة بالبلد وملاحظة سلوكيات فئات من الشعب لما بيشوف بنت ... بعتقد بتعطي جواب

بيجوز ...
بس ماوصلت لهالدرجة .. يعني انا بأمن على أختي أو أمي تمشي بشوارع الشام وانا مطمن أن مارح يصيبها مكروه .. لو كان بشوارع نيويورك او لوس انجلس مستحيل أني أكون مطمن .... مافي وجه للمقارنة !

[yass]

نسيت ان اذكر ملاحظة أني كلامي موجه الى من يتشدقون بالحرية الامريكية والحلم الامريكي ,, الحرية والديمقراطية بالوقت الحالي متمثلة بأمريكا التي نصبت نفسها شرطي العالم ..

شو هالحكي؟ و ليش خيو؟ لأنو ما عاجبتك الحرية و الديمقراطية؟ طيب ازا حكيك صحيح فمعناتو كمان الاسلام يتمثل بآل سعود...شو رأيك بهالحكي؟

ياريت لو تتكرم علينا وتعطينا أحصائية عن العالم العربي ... أنا على حسب ماسمعت أن اعلى نسبة انتحار بالوطن العربي هي بمصر ... شخص لكل 500 الف شخص
بانتظار الاحصائية ان وجدت !!

منوين بدي جيبلك احصائية؟ مين رح يعمل الاحصائية؟ المطاوعة؟ ما رح تنعمل احصائية لأنو "خلي الطابق مستور" هو القانون غير المكتوب ببلادنا..

أنا لم أرى عيوب غيري ... كل مافي الامر أني احضرت احصائيات موثقة عن المجتمع الامريكي الذي يعتبر في نظر البعض المجتمع الفاضل والكامل والذي لاينقصه شيء على الاطلاق .. ايضاً عبرة لبعض الناس الذين يحسبون ان القيم الامريكية هي القيم العليا والديمقراطية الامريكية هي الديمقراطية التي ليس لها مثيل

انو شو دخل الديمقراطية بمعدلات التحرش الجنسي؟ و مين قال انو المجتمع الأميركي هو المجتمع الفاضل؟ هو الأكثر تطورا و تقدما لكن ما حدا قال انو المجتمع الفاضل, و لا حتى هنن بيقولو عن حالهون انهون المجتمع الفاضل..

لست بديماغوجي ... فالديماغوجي هو من يغير رأيه بين لحظة وأخرى .. وأنا موقفي ثابت اتجاه امريكا والمجتمع الامريكي ...
عالهامش :: بدك ياك تعطيني رايك وبكل صراحة عن العضو lostman هل هو ديماغوجي أم لا !! أم هنالك سياسة معايير مزدوجة بالموضوع ؟!

لأ مو هاد تعريف الديماغوجي... الديماغوجي هو من يخلط الحقائق و يستخدمها بمنظور معين لتحقيق هدف معين هو غير ما تشير اليه الحقائق (يعني مع احترامي الك بالزبط هو الشي اللي عم تعملو هلأ) ..

أنا ما شايف غير انو جبت هالاحصائية لتهاجم الديمقراطية, رغم انو مافي رابط منطقي من أي نوع يربط بين معدل جريمة و الديمقراطية... شي عن شي مالو علاقة بنوب... و مستغرب يعني... جدا مستغرب


و بخصوص لوست مان.. شو يعني معايير مزدودجة؟ شو شايفني مثبتلو مواضيعو مشان تحطو هلأ و كأنو "كمشتني" ...

بدك رأييي؟؟؟ بهالموضوع ما بتفرق عنو بشي.. هو بيجيب نماذج مريض ليذم الاسلام.. و انت عم تعمل نفس الشي لتذم الديمقراطية و الحرية... يعني ما فرقت عنو هلأ بشي.. و التعامل واحد على ما اعتقد (بالعكس أنا هداك قلّما أناقشو... لكن انت منتظر منك موضوعية أكبر .. و منتظر شي تاني غير هالنوع من المواضيع بصراحة يعني..)


رديت بما يكفي و غيري رد بما يكفي..


و شكرا

[Nay]

كاتب النص الأصلي : maged-syrian

\

شكراً الك على تعليمي الأدب و العيب ... فأن دل على شيء فهو يدل على حسن الفاظك وحسن التعامل لديك .. اشكرك
ا

بالمناسبة كلمة عيب مو معناتا قلة ادب.. واذا انا قلت عيب فهذا مانو لفظ سيئ لانو هي الكلمة بتنحكى بأكتر المحادثات رقياً"يعني مو مسبة"
بعدين صار عشرين واحد عم يقلولك ما عنا بالبلاد العربية دراسات ولا احصائيات لانو العرب ما بيحكو الحقيقة.. بتقوم انت بتقول عطوني احصائيات؟؟!
بعدين يا اخي الموضوع موضوعك.. ليش عم تضيعو بالمواضيع البعيدة عنو.. يعني هادا ديماغوجي ولا لأ.. وهداك عم يعلمك الادب.. ما حدا مستقصدك يعني..
ومية وردة.. لاتزعل ..ولو.. اذا اختلفنا بالرأي ما بيصير نزعل من بعض

[sandra]

كاتب النص الأصلي : maged-syrian

بيجوز ...
بس ماوصلت لهالدرجة .. يعني انا بأمن على أختي أو أمي تمشي بشوارع الشام وانا مطمن أن مارح يصيبها مكروه .. لو كان بشوارع نيويورك او لوس انجلس مستحيل أني أكون مطمن .... مافي وجه للمقارنة !

اي لسا ما وصلنا لمرحلة عصابات واختطاف
بس ما بيمنع من أننا نحكي عالتحرش يلي عم تتعرضلو المرأة لما بتمشي بالبلد
التحرش متل ما قالو مش بس اغتصاب ... بيكون لفظي وكمان مد للإيدين وحركات وسخة من بعيد

[Reemi]

كاتب النص الأصلي : sandra

المشكلة ببلادنا ما في احصائيات
وما خرج يكون عنا احصائيات لأسباب انذكرت بباقي المشاركات
بس فتلة صغيرة بالبلد وملاحظة سلوكيات فئات من الشعب لما بيشوف بنت ... بعتقد بتعطي جواب

لالالا صدقي نحنا بشوية خير...هون بالاردن انا مستحيل جدا انزل عالشارع-لحالي- الساعه 9 المسا..بينما بالشام والساحل-رح بحكي عن هدول لانو مجربتون- فبرياحه بمشي انا ورفيقتي 12 بالليل وما بتعرض لربع ربع الي بتعرضوا بالاردن