بتمني حدا بيفهم بالدين المسيحي بجاوبني

[yass]

تحياتي للجميع
و أخيرا قررت أخرج من عزلتي مع حوار الأديان وراح أحاول استعملو للغاية اللي موجود لأجلها حقيقة...
عندي سؤال بسيط للأخوة المسيحيين...
أمبارح ببرنامج تلفزيوني سمعت عن شي اسمو بالاسباني : evangelios apocrifos ( صراحة ما حبيت اترجم على كيفي لأنو بعرف أنو هيك مواضيع حساسة و ما بحب اغلط فيها...بس حسب ما فهمت أنو هي أناجيل متلها متل غيرها و أنو الفاتيكان معترف بوجودها و يقر بصحتها بس ما بيتخذها كمصدر للاهوت...أنا هيك فهمتها بس يمكن غلطان...ياريت أذا حدا عندوفكرة عن الموضوع يتكرم و يشرحلي أياه لأنو موضوع بيهمني كتير
تحياتي

[ma7aba]

الكتاب المقدس واحد ولا يوجد غيره ولكن توجد أناجيل ناقصة لبعض الرسل أي صفحات من أناجيلهم تتطابق مع الأناجيل الموجودة ولذلك تعتبر صحيحه ولا ينكرها الفتيكان ولكن بما أنها غير كاملة لذلك لم تورد بالكتاب المقدس هذا هو كل مافي الأمر
ببساطة كل التلاميذ نزل عليهم الوحي بحلول الروح القدس عليهم والكل تكلموا بلغات الدول التي ذهبوا إليها والكل دونوا الأنجيل ولكن منهم من بقيت نسخهم ومنهم من بقي القليل منها ولذلك تم أقتناء النسخ الكاملة وأعتبرت النسخ الغير كاملة صحيحة وداعمة للإنجيل ولكن ليست واردة بالكتاب المقدس

[الأخ نيقولاوس]

ما بعرف بالاسباني بس حسب ما فهمت أنو هاد ما يسمى بالأناجيل المنحولة وهي أناجيل فيها أغلاط جغرافية أو تاريخية منشان هيك الكنيسة ما بتعتمدها لأنو في شي غلط بس من الممكن يقر بوجودها بس من المستحيل أنو يعترف بصحتها ومع هيك على الأغلب فيها أشياء صحيحة ويمكن كل شي ما عدا الأغلاط الجغرافية مثلا لأنو مثلا في انجيل منحول بيذكر مدينة
كفرنا حوم على أنها مدينة جبلية وهي مدينة ما بعرف إذا بتعرف على بحيرة طبرية على ما أظن أو على الأقل على شي بحر أو بحيرة ومتل هيك أغلاط بس هي الأناجيل كتبت بالعصور للمسيحية لهيك ما فيها أخطاء عقائدية باتالي هادا اللي خلاك تفهم أنو الفاتيكان بيقر بصحتها
أما بالنسبة لانجيل برنابا فهو لا يعتبر ضمن ها التصنيف إذا بدك في أخ بالأخوية حضر موضوع رائع عن انجيل برنابا سماه بمحاكمة انجيل برنابا وفيه بيبيين كيف أنو المسيحية والإسلام بيرفضوا هالانجيل إذا حدا من الشباب بيعرف يدلك وين موجود الموضوع لأنو أنا للأسف ما بعرف وين موجود

[yass]

مشكورين

[الأستاذ]

الأناجيل المنحولة هيي كتب غير معروفة المؤلف تحتوي على روايات موجودة في الأناجيل الأربعة المعتمدة لدى المسيحيين جميعاً و تحتوي كذلك على روايات أخرى غير مؤكدة تاريخياً و مسيحياً
و رغم ذلك كما أسلف الإخوة مشكورين فالكنيسة المسيحية لا تحارب هذه الأناجيل أو تمنعها و إنما تعتبرها غير صالحة لأن تبنى العقيدة المسيحية عليها
و كذلك فإن الكنيسة و من باب الاعتراف بأن بعضها كتب بحسن نية من أصحابها و نظراً لعدم تعارضها مع الإيمان المسيحي تضمها ضمن ما يعرف بالتقليد المسيحي أي الكتب المتوارثة للتعليم و طقوس الصلاة و يستفاد منها في التأمل و يقتبس من بعضها صلوات
أي أنها غير مرفوضة كلياً و لكن لا يمكن اعتبارها صحيحة بكاملها
نستفيد من صوابها و نبتعد عن ما تطرفت به

[Fares]

الأناجيل المنحولة متل ما ذكرو الأخوة قبلي..
بس لأنا حابب ضيف شي، أنو هذه الأناجيل لم تدرج ضمن الكتاب المقدس لأنها لا تتعلق بصلب الإيمان المسيحي.. يعني مثلاً في إناجيل تتحدث عن طفولة يسوع وأخرى عن حياة مريم أم يسوع وآخر عن يوسف النجار.. وما إلى ذلك.. أي انها لا تدخل ضمن جوهر الإيمان..
والكنيسة لا ترفضها أبداً، إنما الكنيسة تعتقد أن هذه الأناجيل هي من التراث الشعبي السائد في ذلك الوقت بما فيه من مبالغات وقصص ومحاولات من قبل أشخاص معينين (من غير المعروف من كتب هذه الأناجيل على وجه الدقة) محاولة من مؤلفيها على إلقاء الضوء على المراحل الغير معروفة عن حياة يسوع...
والأناجيل المنحولة كتبت في القرون الأولى التالية لميلاد المسيح (على ما أذكر من القرن الثاني وحتى الخامس)...

وبالنسبة لإنجيل برنابا الذي ذكره الأخ نيقولاوس مشكوراً، فأنا كاتبه، وهو موجود في حوار الأديان ولكن في صفحاته الأولى.. وهو لا يدخل طبعاً ضمن الأناجيل المنحولة لأسباب عديدة موضحة في الموضوع الخاص بإنجيل برنابا منها أنه كتب في أوروبا بعد الأناجيل المنحولة بألف سنة.. ووو..............

[yass]

مشكورين كتير عالمساعدة
تحياتي

[الأسمر]

كاتب النص الأصلي : yass

مشكورين كتير عالمساعدة
تحياتي

ميت وردي ولو واجبنا