هل انطلقت ثورتنا السورية..؟

[yass]

عهد جديد : يمتلك فيه المواطن سلطة المحاسبة وحق السؤال

كان المشهد فريدا عندما سمعت صياح سائق سيارة اجرة يمد رأسه من النافذة ويصيح على سيارة بجواره يمكن أن نقول وفق معاييرنا نحن السوريين بانها ( مدعومة ) ، دفعني فضولي لاسترق السمع ، فوجدت ان سائق السيارة العامة يلوم ويصيح على صاحب السيارة المدعومة لأنه " زمّر " عندما كان وراءه بدون وجود سبب لذلك ..



وكل الوقت كان يقول له " ليش عم تزمّر يا .. كذا و كذا .. " احتد النقاش تجادلا وتصايحا ثم انسحب صاحب السيارة الشبح " المفيمة " امام اصرار السائق وعناده ، واخذ طريقاً اخر ، و بقي صاحب سيارة الاجرة واقفا الى ان غاب " المدعوم " عن الانظار ..



الشرارة التي اطلقت الثورة الفرنسية كانت انسكاب برميل خمر على الأرض ، وقد يكون " زمّور " سيارة مدعومة هو الشرارة التي نستدل منها ان ثورتنا السورية قد بدأت.

الثورة السورية لن تكون ثورة دموية تقليدية ، وانما هي ثورة على الخوف ، ورفض للخنوع والخضوع للباطل ، لم يكن سائق سيارة الاجرة يستطيع ان يرفع عينه في عين صاحب السيارة " المدعومة " لو ان هذه الحادثة وقعت منذ بضع سنوات ، ولكان مصير السائق الضرب والاهانة وربما السجن ..

المواطن السوري اليوم يتحرر من الخوف الذي عاش فيه سنين طويلة ، ونحن اذا لم نعترف باننا كنا نعيش حالة الخوف هذه فاننا لن نستطيع ان نوصف الحاضر الراهن على انه ايجابي.

نعم اليوم نحن نكسر القشرة السميكة التي غلفتنا ، ونتنفس لاول مرة منذ عقود هواء تزيد فيه نسبة الحرية.

الاقلام بدأت تطال شخصيات كانت في مقام المقدسات في الماضي القريب ، حيث كان يمكنك ان تكفر بالرب ما شئت في الشارع وباعلى صوتك ، بينما يتحتم عليك ان تهمس حين تذكر اسم هؤلاء ولو كان الذكر يصب في خانة المديح.

لنجد يوماً بعد يوم ان اسماءً كانت تعيش حالة انفراغية فوقية لم تعتد ان تسمع سوى المديح و " النفخ " من الوسط الفاسد الذي تعيش فيه ، تدخل مقلاة النقد وهاجس المحاسبة.

في مجلس الشعب يهاجم عضو في المجلس الحكومة وينتقد الاعلام ، ويطالب بتحقيق مع رجل في موقع المسؤولية والكل يعرف مدى قربه من السيد الرئيس ، المحامون في مؤتمرهم ينتقدون القضاء ويشيرون بشكل مباشر الى السمسرة ، والممارسات الخاطئة ويطالبون بشكل علني بالإصلاح والقضاء على الفساد ، الطلبة يتكلمون في المؤتمرات او الجلسات وينتقدون المناهج ويطالبون بإلغاء قانون الطوارئ ، تخرج بعض المظاهرات و تنفذ الاعتصامات دون ان تكون هناك اية اعتقالات ، اقلام المعارضة بدأت تتواجد في الصحف الرسمية ، وشخصيات عامة مثقفة بدأت بالحديث وانتقاد الوضع الراهن بجراءة في الفضائيات في حلقات تبث من قلب دمشق.

المواطن السوري بدأ يتكلم بدأ يتحرر من الخوف ، ونجد هذا التحرر في حالة متقدمة لدى النخبة وهو لا شك انه سينعكس على القاعدة ، والشيء الذي بت متأكدا منه انه في وقت قريب ، سيكون السكوت عن الخطأ بدافع الخوف شيئاً من الماضي ، وسيستمر الجميع بالمطالبة بالإصلاح وإلغاء الامتيازات ومحاربة الفساد والقضاء على التجاوزات وإنهاء حالة الحصانة القدسية التي تحيط بالشخصيات العامة من المسؤولين والمقربين وأصحاب النفوذ.

اعرف ان الصورة ليست وردية ، واعرف انه ربما يتم رصد حالة هنا واخرى هناك تهدف إلى وقف هذا المد الذي بات يشكل حالة رعب للكثير من الفاسدين، ولكني متأكد أيضا أن جميع من هم في مواقع المسؤولية باتوا يحسبون خطواتهم جيدا ويراقبون تحركاتهم لأنهم أصبحوا متأكدين بان الشعب يراقبهم ولن يرضى الا بمحاسبتهم بعدما بدأت قشرة الخوف تتشقق إيذانا بولادة عهد جديد ، عهد يمتلك فيه المواطن سلطة المحاسبة وحق السؤال ، حتى لو كان السؤال بسيطا ومعبرا عن " زمور " وقح أطلقته سيارة مدعومة فيأتيها جواب رافض " ليش عم تزمر " ؟؟



نضال معلوف

[عاشق من فلسطين]

مشكور على المقال أبو مارل اغالي .. وعلى فكرة بشرفي اليوم صارت مع حادثة قريبة من هي .. اليوم على غير عادتي طلعت بتكسي .. لأني أتأخرت على الشغل .. وبالطريق زمر السائق ( عمره شي 35 سنة) لشبح مفيمة .. ومد راسو وقلو حرك يا جحش واقف بنص الشارع عم تستعرض .. وأطلع فيني وبلش .. هالبلد على هالحكومة على هالطرقات البتهوي ..
أنا انبسطت كتير .. لأنو بالعادة ما كان حدا فعلا" يسترجي يحكي .. فعلا" يبدو أن الفتيلة بدأت بالاشتعال ..

[Joe]

شباب انا و الله شايف انو المقال تعيس لأخر درجة

يا السيارة المفيمة مانا لمسؤول كبير او شوفير التكسي مدعوم!!

ثم يا فرحتي على هيك ثورة... قولوا مظاهرات طلابية قولوا اعتصامات او اضرابات عن الطعام... لكن فرحانين بشوفير تكسي عم عيط ع سيارة جنبو لأنو زمرت؟ عن جد مسخرة

عادة نضال معلوف عندو كتابات حلوة... مدري ليش هل مرة معفس هيك

ثم اذا سائق السيارة المفيمة كان شي عنصر زغنوط فأي واحد اذا كان شاطر شوي بالحكي او التمثيل بيقدر يطرقو بهدلة و يعمل حالو ابن مسؤول... رفيقي لانو مدعوم و لا شي... بس عندو سيارة بيجو خضرا قديمة كتير.. يعني متل سيارات المخابرات او الجيش... حتى مقنعة اكتر منون... كان بدو يروح مرة لجوات شي معسكر قام فات هيك بكل ثقة اجا العسكري عم يقله لوين مافي فوته قام هداك زوره هيك و قله شو دخلك انتي؟؟؟ قام المسكين خاف و خلاه يفوت... بدك تكون شاطر بالتمثيل... بس ما تجربوها اذا ما متأكدين انها رح تنجح!!!

يعني مع احترامي بس حرام نقول عن هيك حادثة "ثورة سورية"...

[yass]

صح جو...حادثة شوفير التكسي بيجوز سخيفة, بس على الأقل بالنسبة لألي الها مدلول كبير, مو لأنو شوفير تكسي عيط على سيارة "مدعومة" .
عقدة الخوف حالة بالشعب السوري من أواخر السبعينات, كل من عايش فترة احداث الأخوان الدموية طبيعي أنو يخاف حتى من أفكارو.

بس في شغلة .................... الجيل الطالع .. يعني نحنا اللي الله أكرم عينا وخلانا ما نعايش هالفترة, عقدة الخوف عندنا أضعف .... وضروري جدا نتحرر منها ....
مدلول هالمقالة أنو كان في شغلات كانت سبب رعب حقيقي هلأ صارو الناس ما يخافو منها, اليوم سيارة مدعومة.... بكرا مسؤول فاسد , و بعدو قيادة غير مناسب.
هاي خطوة صغيرة بطريق طويل كتير ........... بس أنا متأكد أنو وراها خطوات كتيرة




تحياتي

[عاشق من فلسطين]

العزيز جوي ... بالنسبة

ثم يا فرحتي على هيك ثورة... قولوا مظاهرات طلابية قولوا اعتصامات او اضرابات عن الطعام... لكن فرحانين بشوفير تكسي عم عيط ع سيارة جنبو لأنو زمرت؟ عن جد مسخرة

يعني أنت عم تحكي كأنك ما بتعرف سوريا .. بدك يعني الشعب يقفز قفزة واحدة من أنو مافيه يهمس لأنو يصير بين يوم ليل تبع مظاهرات واعتصامات وتجمعات ... بتمنى أنو ما تتسرع .. لأنو شعب صرلو 40 سنة مو مسموحلو يتنفس .. والسلطة عم تشتغل ليل انهار لعى هزمو داخليا" .. وتحطيم ارادتو .. لا تتوقع منو أنو بين يوم ليلة بس صار مجال للحكي .. أنو يصير تبع اعتصام ومظهرات .. هيك مظاهر من الديمقراطية المنظمة والراقية .. بدها كذا سنة لتصير متداولة بين كل الشعب .. كل واحد بيثور على قد فهمو وعلى قد خوفو .. أنا كشب مثلا" ما أثرت فيني السياسة القمعية كتير وما ترسخت فيني مظبوط لأنو لسا عمري صغير .. ولأنو بلشت هالسياسة تسقط .. قبل ما تأخذ مكانتها بداخلي ..لذلك اللي متلي المفروض منهن تكون ثورتهون بمظاهرات واعتصامات (وسبق ان فعلت ذلك )..
..أما لما انا مثلا" بروح وبسب على سائق سيارة مدعومة وبيحكي كاتب أنو هي ثورة ساعتها فيك تقول عنها مسخرة .. أما شوفير تكسي بيكون عمرو شي 40 50 سنة .. يعني نشأ وترعرع ونهل من السياسة القمعية وتأثيراتها .. وانزرع الخوف والهزيمة زرع فيه .. وغير هيك عندو ولاد ممكن يخاف عليهون اذا حكا .. فتعتبر ثورة أنو يسب على سيارة مدعومة عم تزمر ..

يعني ما بدنا نستعجل بالديمقراطية مشان ما نخسرها ..
بدها تروي ..

[krimbow]

مرحبا جوي

هوي معك حق انو هالثورة مبهدلة أو حتى مافي ثورة اساسا بس يللي عايش بسوريا بيعرف انو هيك شغلات تقريبا من المحرمات
يعني كان ممنوع نفتح تمنا إلا عند حكيم السنان و تقريبا مافي واحد عمرو فوق الأربعين الا و بايتلو كم ليلة بالحبس
و متل ما بيقولوا اول الرقص حنجلة
هلأ بعبعة و انشاللة بوكرا ثورة و مجرصة كمان
بدك تعطينا وقت لأنو بعدنا عم نكاغي بموضوع الحرية و الديمقراطية و حقوق الانسان

نضال معلوف لو كان الموضوع اكبر منهيك كان عمل منو ملحمة أهم من الشاهنامة و الالياذة

انشالله مانا مطولة الالياذة السورية انت عين خير لقلك و تأكد انو طروادة الفساد رح تنهد ع روسون

[nana]

اساتو ما مسمحلو يتنفس هيك عم شوف انا بدون ما اسمع من حدن
وحدة معي بالادب بيسموا مدعومة ما بتعرف حدن و تعرفت عليي و تقريبا ما عندا رفقة غيري
انا كتير سمعت بس ما توقعت لهلدرجة طلعت معا بالميرسيدس
بس نكون طالعين عالجامعة بسيارة عادية بيجي يلي علباب بيشوف البطاقة احيانا بيتاكد كمان اذا خالصا مدتا او لا اما هون ولا في بطاقة بيعملو اشارة براسو بيدخل
مرة قالتلو خدنا مشوار عالكورنيش
و حياة الله قالتلو خالف من هون كيف بدي قلكون وقف كل السير شي سبع سيارات مشان الانسي (عقولتو) ولفينا شي 3 مرات مشان ما تصير البرمة طويلة اما الشرطي ضرب راسو بالارض
هيدول بعض من ابسط الامثلة يلي عم شوفون هون غير يلي منسمع عنون
لنشالله تكون خطوة او يصير اي شي يمكن يبعت الامل فينا

[أبو النسيم]